NAHUM

1 Sɛ gbi nɛ kɔɔ Nineve he ji nɛ ɔ nɛ: Womi nɛ ɔ tu nina nɛ Mawu je kpo kɛ tsɔɔ Nahum* nɛ e je Elkosh ɔ he munyu:

 2 Yehowa ji Mawu nɛ́ e suɔ kaa a ja lɛ pɛ, nɛ e yeɔ lue;

Yehowa yeɔ lue, nɛ e pee klaalo kaa e ma je e we abofu nɛ nya wa a kpo.

Yehowa yeɔ lue ngɛ e he nyɛli ɔmɛ a nɔ,

Nɛ e buaa abofu nya kɛ mlɛɔ e he nyɛli.

 3 Yehowa mi mi fu we mla, nɛ e ngɛ he wami wawɛɛ,

Bɔ fɛɛ bɔ nɛ ji ɔ, Yehowa maa gbla nihi nɛ a ye fɔ ɔ, a tue.

Ke e ma a, kɔɔhiɔ nɛ puɛɔ ní kɛ ahumi nyɛɛɔ e se,

Nɛ bɔkuhi ngɛ e nane si kaa bunyuku.

 4 E kãa wo ɔ hɛ mi, nɛ e haa nɛ e gbliɔ;

E haa nɛ nyu miiɔ kɛ taa pahi tsuo a mi.

Ngahi nɛ a ngɛ Bashan kɛ Karmel ɔ gbliɔ,

Nɛ Lebanon mɔmɔhi gbliɔ.

 5 Yokuhi mimiɛɔ ngɛ e he je,

Nɛ kponguhi sileɔ.

Zugba a ma hoso ngɛ e hɛ mi,

Kɛ piɛɛ je ɔ kɛ ni nɛmɛ nɛ a ngɛ mi ɔ tsuo a he.

 6 Mɛnɔ ma nyɛ maa da e mi mi la a nya?

Nɛ mɛnɔ ma nyɛ maa da e mi mi fumi nɛ nya wa a nya?

E ma plɛ e we abofu ɔ ngɔ pue si kaa la,

Nɛ tɛsa amɛ maa gbɛ ngɛ e he je.

 7 Yehowa hi, e ji he piɛ pomi he ngɛ haomi ligbi nɔ.

E hɛ ngɛ* ni nɛmɛ nɛ a ba saa we ngɛ e ngɔ ɔ a nɔ.*

 8 E maa ngɔ nyu kpekpemi nɛ puɛɔ ní kɛ puɛ e* hi he ɔ pɛsɛpɛsɛ,

Nɛ diblii maa fiee e he nyɛli ɔmɛ a se.

 9 Mɛni ga lɛ o maa to kɛ wo Yehowa he?

E ngɛ a hɛ mi kpatae pɛsɛpɛsɛ.

Haomi be bae si enyɔne.

10 Ejakaa a lo mɛ kaa miohi,

Nɛ a ngɛ kaa nihi nɛ a nu dã* nɛ a de;

Se a maa sã mɛ kaa nga gbigbli.

11 Nɔ ko nɛ e toɔ ga yaya kɛ woɔ Yehowa he ɔ maa je o mi,

Nɛ e maa wo ga nɛ nui tso.

12 Nɔ́ nɛ Yehowa ngɛ dee ji nɛ ɔ nɛ:

“E ngɛ mi kaa a he wa wawɛɛ nɛ a he hiɛ mohu lɛɛ,

Se kɛ̃ ɔ, a maa poo mɛ kɛ pue si nɛ a be si hie hu.*

I hao mo,* se i be mo haoe hu.

13 Nɛ amlɔ nɛ ɔ, ma ku e kuɛpã tso ɔ ngɛ o kuɛ,

Nɛ ma tsɔ o kpa amɛ a mi enyɔ.

14 Yehowa fã kɛ kɔ o* he ke,

‘O biɛ be si hie hu.

Ma je amagahi nɛ a hlɔ, kɛ dade amaga amɛ* kɛ je o mawu ɔmɛ a we ɔ mi.*

Ma tsua yɔkɔ ha mo, ejakaa o he ngɛ tãi.’

15 Hyɛ! Nɔ nɛ ngɔ sane kpakpa kɛ ma a je yoku ɔmɛ a nɔ kɛ ma,

Nɔ nɛ e ngɛ tue mi jɔmi jajee ɔ.

Oo Yuda, moo ye o gbijlɔ ɔmɛ, nɛ́ o ye o si womi ɔmɛ a nɔ,

Ejakaa yaka nɔmlɔ ɔ be o mi gue kɛ be hu gblegbleegble.

A ma kpata e hɛ mi pɛsɛpɛsɛ.”

2 Nɔ nɛ gbɛɔ nihi kɛ fĩaa a ba tua mo.*

Buu mahi nɛ a fia gbogbo kɛ wo a he ɔ he.

Buu blɔ ɔ he.

Nyɛ dla nyɛ he,* nɛ nyɛ ha nɛ nyɛ he nɛ wa wawɛɛ.

 2 Ejakaa Yehowa maa kpale Yakob anunyami ɔ kɛ ha lɛ ekohu,

Nɛ e kɛ Israel anunyami ɔ hu ma ha lɛ,

Ejakaa hɛ mi kpatali ɔmɛ kpata a hɛ mi;

Nɛ a kpata a tso kɔnihi nɛ a ngɛ tsɛ̃e ɔmɛ a hɛ mi.

 3 A wo e nyumuhi katsɛmɛ a tsɛ̃i ɔmɛ kɔla tsutsu,

E tabuli ɔmɛ wo tadehi nɛ́ a tsuɔ.

Ligbi ɔ nɛ e dla e he kɛ ha ta a

Dadehi nɛ a ngɛ e ta zugba lɛ ɔmɛ a he ɔ kpɛ kaa la,

Nɛ a huanyaa akplɔhi nɛ́ a kɛ junipa tsohi pee ɔ.

 4 Ta zugba lɛ ɔmɛ tuɔ fo gidigidi ngɛ gbɛjegbɛ ɔmɛ a nɔ.

A saa fo kɛ yaa kɛ baa ngɛ ma a he nya buami he ɔmɛ.

A kpɛɔ kaa jatɛ, nɛ a saa fo kaa oslabai.

 5 E ma tsɛ e nikɔtɔma amɛ kɛ ba.

Ke a ngɛ nyɛɛe kɛ ma a, a ma tɛ nɔ́.

A ma sa fo kɛ ya e gbogbo ɔ he;

A maa ma he piɛ pomi níhi.

 6 A ma bli pa a agbo ɔmɛ,

Nɛ matsɛ we ɔ maa sile.*

 7 A ma sane ɔ nya si: A kpa e he bo,

Nɛ a ngɔ lɛ kɛ ho,

E mawayi ɔmɛ ngɛ ya foe kaa beleku lahuɛ;

Nɛ a ngɛ a gugue* ma gbae.

 8 Ngɛ Nineve ligbi ɔmɛ tsuo a mi ɔ, e pee kaa taku,

Se amlɔ nɛ ɔ, a ngɛ fo tue.

“Nyɛɛ da si! Nyɛɛ da si!”

Se nɔ ko nɔ ko kpale we e se.

 9 Nyɛɛ ha sika hiɔ, nyɛɛ ha sika tsu!

Juetli ɔ be tae.

E hyi tɔ kɛ níhi nɛ a he jua wa slɔɔtoslɔɔtohi.

10 Nɔ ko nɔ ko be ma a mi, e hɛ mi kpata nɛ e pee ma doku!

Gbeye yemi ha nɛ a tsui po, a nakutsohi a mi jɔ nɛ a gbonguhi ngɛ kpokpoe;

A hɛ mi tsuo pee mɔbɔmɔbɔ.

11 Jije jatahi a hi he ɔ ngɛ, he nɛ jata wawi* yeɔ ní ngɛ ɔ,

He nɛ jata nyɛɛɔ e bi hɛ mi kɛ jeɔ kpo ngɛ,

Nɛ́ nɔ ko nɔ ko nyɛ we nɛ e wo a he gbeye ɔ?

12 Jata tsɔtslɔɔ lohwehi a mi kɛ haa e bimɛ

Nɛ e gbeɔ lohwehi kɛ haa jata eyi ɔmɛ.

E haa nɛ e muɔ ɔ mi hyiɔ tɔ kɛ lohwehi nɛ e gbe,

Nɛ e hi he ɔ hyiɔ tɔ kɛ lohwehi nɛ e tsɔtslɔɔ a mi.

13 Yehowa tabohiatsɛ ɔ de ke, “Hyɛ! I kɛ mo ná,

Ma sã o ta zugba lɛ ɔmɛ kulaa,

Nɛ klaate ma kpata o jata wawi* ɔmɛ a hɛ mi.

Ma po lohwehi nɛ o gbeɔ nɛ o yeɔ ɔ se ngɛ zugba a nɔ.

Nɛ a be o tsɔli ɔmɛ a gbi nue hu.”

3 Musu tloo ma nɛ pueɔ muɔ si ɔ!

Nɔ sisimi kɛ jumi hyi lɛ tɔ.

Be fɛɛ be ɔ, e kpɔ̃ɔ níhi ngɛ nihi a dɛ!

 2 I nu kpa kɛ ta zugba lɛ nanehi a pɛmi he,

Nɛ i na okpɔngɔhi nɛ a hɛɛ fo kɛ ta zugba lɛhi nɛ a ngɛ tuue kɛ fo.

 3 Okpɔngɔ nɔ hilɔ ɔ ma, klaate ngɛ la pãe nɛ akplɔ ngɛ kpɛe,

Nihi babauu gbo nɛ a gbogboe ɔmɛ pueɔ si glekuuglekuu

Nihi nɛ a gbo ɔmɛ a yibɔ be hie kanemi.

A ngɛ gbogboe ɔmɛ tɛe.

 4 Enɛ ɔ tsuo je tuutuu polɔ ɔ we ajuama bɔmi ɔ,

Yo nɛ he ngɛ fɛu wawɛɛ, kunya yeli a manyɛ ɔ,

E kɛ e tuutuu pomi ɔ tsɔ̃ je ma amɛ klama, nɛ e kɛ e kunya yemi hu tsɔ̃ wekuhi klama.

 5 Yehowa tabohiatsɛ ɔ de ke, “Hyɛ! I kɛ mo* ná,

Ma wo o tade ɔ nɔ kɛ ha o hɛ mi;

Ma ha nɛ je ma amɛ maa na o he gu ɔ,

Nɛ matsɛ yemihi maa na o hɛ mi si puemi ɔ.

 6 Nɛ ma plɛ níhi nɛ a sɛ mu kɛ pue o nɔ

Ma pue o hɛ mi si kpɔtɔɔ;

Ma ha nɛ nihi maa hyɛ mo gaa.

 7 Nɔ fɛɛ nɔ nɛ maa na mo ɔ maa tu fo nɛ e ma de ke,

‘A kpata Nineve hɛ mi!

Mɛnɔ maa ye kɔmɔ ha lɛ?’

Jije ma na bua woli ngɛ kɛ ha mo?

 8 Anɛ o hi pe No-amon* nɛ́ ngɛ Nilo nyu dɔ ɔmɛ a he ɔ lo?

Nyuhi bɔle lɛ;

Wo ɔ ji ní nɛ e ná, nɛ wo ɔ nɔuu ji e gbogbo.

 9 Etiopia kɛ Egipt ji he nɛ e náa e he wami ɔ kɛ jeɔ.

Put kɛ Libiabi ɔmɛ ji o yemi kɛ buali.

10 Se kɛ̃ ɔ, a nu lɛ nyɔguɛ;

E ho nyɔguɛ tso mi ya.

A fiaa e bimɛ ɔmɛ ní nɛ a gbe mɛ ngɛ blɔ ɔmɛ a he.*

A fɔ sɔ ngɛ e nyumuhi nɛ a hɛ mi ngɛ nyami ɔ a nɔ,

Nɛ e nyumuhi nɛ a he biɛ ɔ tsuo ɔ, a bɔ mɛ pã.

11 Mo hu o maa de dã;

O ma ya laa o he.

Nɛ o ma ya hla wesa he ngɛ o he nyɛli ɔmɛ a ngɔ.

12 O mahi nɛ a fia gbogbo kɛ wo a he ɔ ngɛ kaa fig tsohi kɛ a nɔ kekle yiblii nɛ a fu;

Ke a huanya mɛ ɔ, a ma tsɔ kɛ nɔɔ yeli a nya mi.

13 Hyɛ! O tabuli ɔmɛ ngɛ kaa yihi.

A ma bli o ma agbo ɔmɛ gbajaa kɛ fɔ si ha o he nyɛli ɔmɛ.

La maa sã agbo se lami ní ɔmɛ.

14 Nyɛɛ yɛ nyu kɛ to ke a ba sa nyɛ yi.

Ha nɛ́ o mahi nɛ a fia gbogbo kɛ wo a he ɔ he nɛ wa.

Kple si kɛ ya mɔsɔ ɔ mi nɛ o ya nyɛɛ zu ɔ nɔ;

Moo pɛtɛ daka nɛ a kɛ poɔ blikisi ɔ he.

15 Lejɛ ɔ po, la maa sã mo.

Klaate maa po mo kɛ fɔ si.

E ma kpata o hɛ mi kaa bɔ nɛ baalɛ tsɔwi peeɔ ɔ.

Ha nɛ o he nɛ hiɛ kaa baalɛ tsɔwi!

Ee, ha nɛ o he nɛ hiɛ kaa baalɛhi.

16 O ha nɛ o jua yeli ɔmɛ a he hiɛ kulaa pe dodoehi nɛ a ngɛ hiɔwe ɔ.

Baalɛ wayoo kpɔɔ e he womi ɔ nɛ e teɔ kɛ jeɔ.

17 O buli ɔmɛ ngɛ kaa baalɛhi,

Nɛ o nikɔtɔma amɛ ngɛ kaa baalɛhi a kuu.

A buaa a he nya ngɛ to tsuhi nɛ a kɛ tɛ pee ɔ a mi ngɛ fĩɛ ligbi nɔ,

Se ke pu je kpo ɔ, a teɔ kɛ jeɔ;

Nɛ nɔ ko nɔ ko li he nɛ a ngɛ.

18 Oo Asiria matsɛ, o to hyɛli ɔmɛ ngɛ kɔnɛɛ dee;

O we odehe ɔmɛ ngɛ a we ɔmɛ a mi.

O ma a mi bi ɔmɛ gbɛ fĩa yoku ɔmɛ a nɔ,

Nɛ nɔ ko bua we a nya.

19 O be he jɔmi ko náe ngɛ o amanehlu ɔ mi.

O pa a be gboe.