HAGAI

1 Matsɛ Darius yi nɔ jeha enyɔne ɔ mi, ngɛ nyɔhiɔ ekpane ɔ we kekleekle ligbi ɔ nɔ ɔ, Yehowa ngɔ sɛ gbi kɛ gu gbalɔ Hagai* nɔ kɛ ya ha Sheatiel bi Zerubabel, nɛ ji Yuda amlaalo ɔ kɛ Yehozadak bi Yoshua nɛ ji osɔfo nɔkɔtɔma a ke:

2 “Nɔ́ nɛ Yehowa tabohiatsɛ ɔ de ji nɛ ɔ nɛ, ‘Nimli nɛ ɔmɛ ngɛ dee ke, “Be sui lolo nɛ a maa ma* Yehowa we* ɔ.”’”

3 Yehowa kɛ sɛ gbi ha gbalɔ Hagai ekohu ke: 4 “Anɛ be nɛ ɔ mi ji be nɛ e sa kaa nyɛɛ hi nyɛ wehi nɛ a kɛ tsohi nɛ a ngɛ fɛu pee ɔ a mi, be mi nɛ ye we ɔ ku pue si ɔ lo? 5 Jehanɛ ɔ, nɔ́ nɛ Yehowa tabohiatsɛ ɔ de ji nɛ ɔ nɛ, ‘Nyɛ susu nɔ́ nɛ nyɛ ngɛ pee ɔ he saminya. 6 Nyɛ duɔ ní fuu, se bɔbɔyoo pɛ nɛ nyɛ kpaa. Nyɛ yeɔ ní, se nyɛ tɔɛ. Nyɛ nuɔ wai, se e sui nyɛ. Nyɛ woɔ tade, se nyɛ ti nɔ ko nɔ ko he mi pee we kulɔɔ. Nɔ nɛ yeɔ apaa nɛ́ a woɔ lɛ hiɔ ɔ kɛ e hiɔwo ɔ woɔ kotoku kɛ e sisi puɔhi fuu mi.’”

7 “Nɔ́ nɛ Yehowa tabohiatsɛ ɔ de ji nɛ ɔ nɛ, ‘Nyɛ susu nɔ́ nɛ nyɛ ngɛ pee ɔ he saminya.’

8 “‘Nyɛɛ kuɔ kɛ ya yoku ɔ nɔ nɛ nyɛ ya poo tsohi kɛ ba, nɛ́ nyɛ ba ma ye we ɔ, konɛ ma ná he bua jɔmi nɛ a wo ye hɛ mi nyami,’ Yehowa lɛ de.”

9 “Yehowa tabohiatsɛ ɔ de ke: ‘Nyɛ ngɛ blɔ hyɛe kaa nyɛ ma kpa ní fuu se bɔbɔyoo pɛ nɛ nyɛ ná; nɛ ke nyɛɛ kɛ ba we mi ɔ, i fliɔ lɛ kɛ pueɔ he. Mɛni he je? Ejakaa ye we ɔ ku kɛ pue si be mi nɛ nyɛ ti nɔ fɛɛ nɔ hɛ dɔ kɛ ngɛ lɛ nitsɛ e we nɔ hyɛe saminya. 10 Enɛ ɔ he ɔ, bɔ́ nɛ́ kɛ ji hiɔwe hu, nɛ zugba a tsi e niba ní ɔ nya. 11 Nɛ i ha nɛ sapu ba zugba a kɛ yoku ɔmɛ a nɔ, nɛ e sa ngma* amɛ, wai ehe ɔmɛ, nu ɔmɛ, níhi nɛ a puɛɔ ngɛ zugba a nɔ, nimli adesa amɛ kɛ lohwe ɔmɛ, kɛ nyɛ nine nya ní tsumi ɔmɛ tsuo a he.’”

12 Sheatiel bi Zerubabel kɛ Yehozadak bi Yoshua nɛ ji osɔfo nɔkɔtɔma a, kɛ ni ɔmɛ tsuo bu Yehowa a Mawu ɔ kɛ gbalɔ Hagai gbi tue, ejakaa Yehowa a Mawu ɔ ji nɔ nɛ tsɔ lɛ; nɛ ni ɔmɛ bɔni Yehowa gbeye yemi.

13 Kɛkɛ nɛ Hagai nɛ ji Yehowa tsɔlɔ ɔ kɛ sɛ gbi nɛ ɔ ha ni ɔmɛ ngɛ ní tsumi nɛ Yehowa kɛ wo e dɛ ɔ nya ke: “‘I kɛ nyɛ ngɛ,’ Yehowa lɛ de.”

14 Lɔ ɔ he ɔ, Yehowa wo Sheatiel bi Zerubabel nɛ ji Yuda amlaalo ɔ, kɛ Yehozadak bi Yoshua nɛ ji osɔfo nɔkɔtɔma a kɛ ni ɔmɛ tsuo he wami nɛ a ba nɛ a ba bɔni a Mawu nɛ ji Yehowa tabohiatsɛ ɔ we ɔ he ní tsumi. 15 Nɔ́ nɛ ɔ ya nɔ ngɛ Matsɛ Darius yi nɔ jeha nɛ ji enyɔ ɔ, nyɔhiɔ ekpane ɔ we ligbi 24 ɔ nɔ.

2 Ngɛ nyɔhiɔ kpaagone ɔ we ligbi nɛ ji 21 ɔ nɔ ɔ, Yehowa kɛ sɛ gbi ha gbalɔ Hagai ke, 2 “I kpa mo pɛɛ nɛ o bi Sheatiel bi Zerubabel nɛ ji Yuda amlaalo ɔ, kɛ Yehozadak bi Yoshua nɛ ji osɔfo nɔkɔtɔma a, kɛ ma bi ɔmɛ nɛ a piɛ ɔ ke: 3 ‘Nyɛ ti mɛnɔ lɛ na bɔ nɛ kekle sɔlemi we ɔ hɛ mi ngɛ nyami ha? Kɛ nyɛ naa lɛ kɛɛ amlɔ nɛ ɔ? Ke nyɛɛ kɛ to kekle nɔ́ ɔ he ɔ, tse e peeɔ nyɛ kaa enɛ ɔ pi nɔ́ ko kulaa?’

4 “‘Se amlɔ nɛ ɔ, mo Zerubabel,’ nɔ́ nɛ Yehowa de ji nɛ ɔ nɛ, ‘moo pee kã, nɛ mo Yehozadak bi Yoshua nɛ ji osɔfo nɔkɔtɔma a, moo pee kã.’

“‘Nɛ nyɛ nihi tsuo nɛ nyɛ ngɛ zugba a nɔ,’ nɔ́ nɛ Yehowa de ji nɛ ɔ nɛ, ‘nyɛɛ pee kã nɛ nyɛ tsu ní.’

“‘Ejakaa i kɛ nyɛ ngɛ,’ Yehowa tabohiatsɛ ɔ lɛ de. 5 ‘Nyɛ kai si nɛ i wo nyɛ benɛ nyɛ je Egipt ɔ, nɛ nyɛ ná nɔ mi mami kaa loloolo ɔ, ye mumi ɔ kɛ nyɛ ngɛ.* Nyɛ ko ye gbeye.’”

6 “Ejakaa nɔ́ nɛ Yehowa tabohiatsɛ ɔ de ji nɛ ɔ nɛ, ‘E be kɛe kulaa nɛ ma mimiɛɛ hiɔwe kɛ zugba kɛ wo kɛ zugba gbigbli ɔ si kake ekohu.’

7 “‘Nɛ ma mimiɛɛ je ma amɛ tsuo, nɛ je ma amɛ a mi níhi nɛ a he jua wa a* maa ba we nɛ ɔ mi, nɛ ma ha hɛ mi nyami ma hyi we nɛ ɔ tɔ,’ Yehowa tabohiatsɛ ɔ lɛ de.

8 “‘Sika hiɔ ɔ ye nɔ́, nɛ sika tsu ɔ hu ye nɔ́,’ Yehowa tabohiatsɛ ɔ lɛ de.

9 “‘We nɛ ɔ hɛ mi maa ba nyami wawɛɛ hwɔɔ se pe blema nɔ́ ɔ,’ Yehowa tabohiatsɛ ɔ lɛ de.

“‘Nɛ ma ha nɛ tue mi jɔmi maa hi hiɛ ɔ,’ Yehowa tabohiatsɛ ɔ lɛ de.”

10 Darius nɔ yemi ɔ we jeha enyɔne ɔ, ngɛ nyɔhiɔ nɛɛne ɔ we ligbi 24 ɔ nɔ ɔ, Yehowa kɛ sɛ gbi ha gbalɔ Hagai ke: 11 “Nɔ́ nɛ Yehowa tabohiatsɛ ɔ de ji nɛ ɔ nɛ, ‘I kpa mo pɛɛ, bi osɔfo ɔmɛ sane ngɛ nɔ́ nɛ mlaa a de ɔ he, bi mɛ ke: 12 “Ke nɔ ko ngɔ lo klɔuklɔu kɛ wo e tade mi, nɛ e tade ɔ sa abolo loo flɔɔ loo wai loo nu loo niye ní kpa ko he ɔ, anɛ nɔ́ ɔ maa pee klɔuklɔu lo?”’”

Osɔfo ɔmɛ ha lɛ heto ke: “Dɛbi!”

13 Jehanɛ ɔ, Hagai bi ke: “Ke nɔ ko nɛ e he tsɔ we akɛnɛ e ya ta gbogboe* he ɔ ta ní nɛ ɔmɛ a he ɔ, anɛ ní ɔmɛ maa pee níhi nɛ a he tsɔ we lo?”

Osɔfo ɔmɛ ha lɛ heto ke: “Ní ɔmɛ a he be tsɔe.”

14 Lɔ ɔ he ɔ, Hagai de ke: “Nɔ́ nɛ Yehowa de ji nɛ ɔ nɛ, ‘jã pɛ nɛ nimli nɛ ɔmɛ ngɛ, nɛ jã pɛ nɛ ma nɛ ɔ ngɛ ngɛ́ ye hɛ mi, nɛ jã nɛ a nine nya ní tsumihi tsuo ngɛ; nɔ́ fɛɛ nɔ́ nɛ a kɛ ba sãa afɔle ɔ he tsɔ we.’

15 “‘Se amlɔ nɛ ɔ, i kpa nyɛ pɛɛ, kɛ je mwɔnɛ ɔ kɛ yaa a, nyɛ susu nɔ́ nɛ ɔ he saminya: Loko a ma bɔni Yehowa we ɔ mami ekohu ɔ, 16 kɛ níhi ya nɔ ha kɛɛ? Ke nɔ ko ba ngma* nɛ a bua nya he, nɛ e ngɛ blɔ hyɛe kaa e ma ná susumi nɔ́ 20 ɔ, 10 pɛ nɛ e ná a; nɛ ke nɔ ko ba wai ngami nɔ́ he nɛ e ngɛ blɔ hyɛe kaa e ma ná susumi nɔ́ 50 ɔ, 20 pɛ e ná a; 17 I ngɔ kɔɔhiɔ nɛ mi dɔ la wawɛɛ kɛ tsohi a he hiɔ kɛ gbiɛ ngo ngu kɛ gbla nyɛ tue, se kɛ̃ ɔ, nyɛ ti nɔ ko nɔ ko kpale we kɛ bɛ ye ngɔ,’ Yehowa lɛ de.

18 “‘I kpa nyɛ pɛɛ, nyɛ susu nɔ́ nɛ ɔ he saminya kɛ je mwɔnɛ ɔ ligbi nɛ ɔ kɛ yaa, kɛ je nyɔhiɔ nɛɛne ɔ we ligbi 24 ɔ, kɛ je ligbi nɛ a fia Yehowa sɔlemi we ɔ sisi tomi ɔ; nyɛ susu nɔ́ nɛ ɔ he saminya: 19 Anɛ loloolo ɔ, wu nɛ a duɔ ngɛ nito he ɔ* lo? Wai tso ɔmɛ, fig tso ɔmɛ, pomegranet tso ɔmɛ kɛ oliv tso ɔmɛ wui yiblii lolo, aloo pi jã? Kɛ je mwɔnɛ ɔ kɛ yaa a, ma jɔɔ nyɛ.’”

20 Yehowa kɛ sɛ gbi ha Hagai si enyɔne ngɛ nyɔhiɔ ɔ we ligbi 24 ɔ nɔ ke: 21 “De Zerubabel nɛ ji Yuda amlaalo ɔ ke, ‘I ma hiɔwe kɛ zugba a mimiɛɛmi. 22 Ma butu nɔ yeli ɔmɛ a sɛ ɔmɛ, nɛ ma kpɔ̃ je ma amɛ a nɔ yemi ɔmɛ a he wami ɔmɛ ngɛ a dɛ; ma tsɛ̃ a zugba lɛ ɔmɛ kɛ a nɔ hili ɔmɛ ngɔ ko si, okpɔngɔ ɔmɛ tsuo ma gbo, nɛ a nɔ hili ɔmɛ kɛ klaate maa gbe a sibi.’”

23 “Yehowa tabohiatsɛ ɔ de ke, ‘jamɛ a ligbi ɔ, ma ngɔ mo ye tsɔlɔ Sheatiel bi Zerubabel kɛ pee nya sɔumi ga,’ Yehowa lɛ de, ‘ejakaa mo ji nɔ nɛ i hla,’ Yehowa tabohiatsɛ ɔ lɛ de.”