ZAKARIA
1 Ngɛ Darius nɔ yemi ɔ jeha enyɔne ɔ we nyɔhiɔ kpaanyɔne ɔ mi ɔ, Yehowa kɛ gbalɔ Zakaria,* nɛ ji Ido bi Berekia bi ɔ tu munyu, nɛ e de lɛ ke: 2 “Yehowa muklii mi fu nyɛ tsɛmɛ ɔmɛ wawɛɛ.
3 “Mo de mɛ ke, ‘Nɔ́ nɛ Yehowa tabohiatsɛ ɔ de ji nɛ ɔ nɛ: “‘Nyɛɛ kpale kɛ ba ye ngɔ,’ Yehowa tabohiatsɛ ɔ lɛ de, ‘nɛ imi hu ma kpale kɛ ba nyɛ ngɔ,’ Yehowa tabohiatsɛ ɔ lɛ de.”’
4 “‘Nyɛ ko pee kaa nyɛ tsɛmɛ ɔmɛ nɛ́ gbali ɔmɛ nɛ a hi si blema a de mɛ ke: “Nɔ́ nɛ Yehowa tabohiatsɛ ɔ de ji nɛ ɔ nɛ, ‘I kpa nyɛ pɛɛ, nyɛɛ kpale kɛ je nyɛ blɔ yaya amɛ a nɔ, nɛ́ nyɛ kpa nyɛ yiwutso ní peepee ɔmɛ.’”’
“‘Se a nui, nɛ a bui mi tue hulɔ’ ɔ, Yehowa lɛ de.
5 “‘Jije nyɛ tsɛmɛ ɔmɛ ngɛ piɔ? Nɛ gbali ɔmɛ hu nɛɛ, a hi si kɛ ya neneene lo? 6 Se ye munyu ɔmɛ kɛ ye fami ɔmɛ nɛ i kɛ ha ye sɔmɔli ɔmɛ nɛ ji gbali ɔmɛ ɔ, anɛ a bɛ mi ngɛ nyɛ tsɛmɛ ɔmɛ a nɔ lo?’ Enɛ ɔ he ɔ, a kpale kɛ ba ye ngɔ nɛ a de ke: ‘Yehowa tabohiatsɛ ɔ kɛ wɔ ye ngɛ wa blɔ ɔmɛ a nɔ kɛ wa ní peepee ɔmɛ a nya, kaa bɔ nɛ e to kaa e maa pee ɔ.’”
7 Ngɛ Darius nɔ yemi ɔ jeha enyɔne ɔ we nyɔhiɔ 11, nɛ ji shebat* nyɔhiɔ ɔ we ligbi 24 ɔ nɔ ɔ, Yehowa kɛ gbalɔ Zakaria, nɛ ji Ido bi Berekia bi ɔ tu munyu, nɛ e de lɛ ke: 8 “I na nina ko nyɔ ɔ mi. I na nyumu ko nɛ e hii si ngɛ okpɔngɔ tsutsuutsu ko nɔ, nɛ e da si ngɛ mɔmɔ tso ɔmɛ a kpɛti ngɛ dɔ nɛ mi kuɔ ɔ mi; nɛ okpɔngɔhi etɛ ngɛ e se, kekleekle nɔ́ ɔ ngɛ tsutsu, enyɔne ɔ ngɛ tsutsu nɛ́ hɛ mi ngɛ tuu, nɛ etɛne ɔ ngɛ futaa.”
9 Lɔ ɔ he ɔ, i bi ke: “Ye nyɔmtsɛ, mɛnɔmɛ ji nɛ ɔ!”
Bɔfo ɔ nɛ e kɛ mi ngɛ munyu ɔ tue ɔ de mi ke: “Ma tsɔɔ mo nihi nɛ a ji.”
10 Kɛkɛ nɛ nyumu ɔ nɛ daa si ngɛ mɔmɔ tso ɔmɛ a kpɛti ɔ de mi ke: “Nimli nɛ ɔmɛ ji nihi nɛ Yehowa tsɔ mɛ nɛ́ a ya kpa zugba a nɔ.” 11 Nɛ a de Yehowa bɔfo ɔ nɛ daa si ngɛ mɔmɔ tso ɔmɛ a kpɛti ɔ ke: “Wa ya kpa zugba a tsuo nɔ, nɛ hyɛ! zugba a nɔ tsuo pee dii nɛ tue mi jɔmi ngɛ nɔ.”
12 Kɛkɛ nɛ Yehowa bɔfo ɔ de ke: “Oo Yehowa tabohiatsɛ, mɛni be o maa na Yerusalem kɛ Yuda ma amɛ nɛ o mi mi fu mɛ jeha 70 sɔuu ɔ mɔbɔ?”
13 Yehowa kɛ mi mi jɔmi kɛ bua womi munyu ha bɔfo ɔ nɛ kɛ mi ngɛ munyu tue ɔ heto. 14 Kɛkɛ nɛ bɔfo ɔ nɛ kɛ mi ngɛ munyu tue ɔ de mi ke: “Mo kpa ngmlaa ke, ‘Nɔ́ nɛ Yehowa tabohiatsɛ ɔ de ji nɛ ɔ nɛ: “Ye hɛ dɔ ngɛ Yerusalem kɛ Zion a he wawɛɛ. 15 Ye muklii mi fu je ma amɛ nɛ a he mi jɔ mɛ ɔ wawɛɛ nitsɛ, ejakaa ye muklii mi fu bɔɔ pɛ, se a ha nɛ ye ma a nɔ́ nami ɔ nya wa wawɛɛ.”’
16 “Enɛ ɔ he ɔ, nɔ́ nɛ Yehowa de ji nɛ ɔ nɛ: ‘“I kɛ mɔbɔ nami maa kpale kɛ ya Yerusalem, nɛ a maa ma imi nitsɛ ye we ɔ ngɛ e mi, nɛ a kɛ susumi kpa ma susu Yerusalem,” Yehowa tabohiatsɛ ɔ lɛ de.’
17 “Mo kpa ngmlaa ekohu nɛ o de ke, ‘Nɔ́ nɛ Yehowa tabohiatsɛ ɔ de ji nɛ ɔ nɛ: “Ní kpakpahi ma hyi kɛ be nɔ ekohu ngɛ ye ma amɛ a mi; nɛ Yehowa maa kpale wo Zion bua, nɛ e maa hla Yerusalem ekohu.”’”
18 Kɛkɛ nɛ i wo ye yi nɔ nɛ i na koli eywiɛ komɛ. 19 Lɔ ɔ he ɔ, i bi bɔfo ɔ nɛ e kɛ mi ngɛ munyu tue ɔ ke: “Mɛni níhi ji nɛ ɔ?” E ha mi heto ke: “Ní nɛ ɔmɛ ji kolihi nɛ a gbɛ Yuda, Israel kɛ Yerusalem kɛ fĩa a nɛ.”
20 Jehanɛ ɔ, Yehowa tsɔɔ mi ga ní tsuli eywiɛ komɛ. 21 I bi ke: “Mɛni nimli nɛ ɔmɛ ma peemi?
E de ke: “Ní nɛ ɔmɛ ji kolihi nɛ a gbɛ Yuda kɛ fĩa hluu kaa nɔ ko nyɛ we nɛ e wo e yi nɔ ɔ nɛ. Nimli nɛ ɔmɛ hu ma ba wo a he gbeye, nɛ a maa ku je ma amɛ a koli ɔmɛ nɛ a wo nɔ kɛ si Yuda zugba a, nɛ́ a kɛ gbɛ lɛ kɛ fĩa a.”
2 Nɛ i wo ye yi nɔ nɛ i na nyumu ko nɛ e hɛɛ susumi kpa. 2 Lɔ ɔ he ɔ, i bi lɛ ke: “Jije o yaa?”
E he nɔ ke: “I yaa susu Yerusalem, konɛ ma na e blimi kɛ e kami.”
3 Nɛ hyɛ! bɔfo ɔ nɛ kɛ mi ngɛ munyu ɔ tue ɔ je kpo, nɛ bɔfo kpa ko ba ná lɛ. 4 Kɛkɛ nɛ e de lɛ ke: “Moo tu fo kɛ ho lejɛ ɔ ya nɛ o ya de jamɛ a niheyo ɔ ke, ‘“Nihi maa hi Yerusalem kaa ma nɛ a fiɛ gbogbo kɛ wui he, akɛnɛ nimli kɛ lohwehi hiɛ ngɛ mi ɔ he je. 5 Nɛ ma pee kaa la gbogbo kɛ bɔle lɛ” Yehowa lɛ de, “nɛ ma ha nɛ ye hɛ mi nyami ma hyi lejɛ ɔ.”’”
6 “Nyɛɛ ba! Nyɛɛ ba! Nyɛɛ tu fo kɛ je yiti je zugba a nɔ,” Yehowa lɛ de.
“Ejakaa i gbɛ nyɛ kɛ fĩa hiɔwe kɔɔhiɔ eywiɛ ɔmɛ a mi,” Yehowa lɛ de.
7 “Zion, moo ba! Moo tu fo, mo nɛ o kɛ Babilon biyo ɔ ngɛ ɔ. 8 Ejakaa nɔ́ nɛ Yehowa tabohiatsɛ ɔ, nɔ nɛ benɛ a wo e hɛ mi nyami se ɔ,* e tsɔ mi kɛ ya je ma amɛ nɛ a ngɛ nyɛ ní hae ɔ a ngɔ ɔ de ji nɛ ɔ nɛ: ‘Nɔ fɛɛ nɔ nɛ maa ta nyɛ he ɔ, ta ye hɛngmɛ nɔ anani* he.* 9 Ejakaa amlɔ nɛ ɔ, ma fɔ ye nine kɛ wo mɛ, nɛ mɛ nitsɛmɛ a nyɔguɛ ɔmɛ maa ha a ní.’ Nɛ bɔ fɛɛ bɔ nɛ ji ɔ, nyɛ maa le kaa, Yehowa tabohiatsɛ ɔ lɛ tsɔ mi.
10 “Oo Zion biyo, mo he ose; ejakaa i ma nɛ ma ba hi o mi,” Yehowa lɛ de. 11 Jamɛ a ligbi ɔ, je mahi babauu kɛ a he maa mɛtɛ Yehowa he, nɛ a ma ba pee ye we bi; nɛ ma hi o mi.” Nɛ o maa le kaa Yehowa tabohiatsɛ ɔ lɛ tsɔ mi o ngɔ. 12 Yehowa maa ngɔ Yuda kaa e blɔ fa mi nɔ́ ngɛ zugba klɔuklɔu ɔ nɔ, nɛ e maa hla Yerusalem ekohu. 13 He lohi* tsuo nɛ́ a pee dii ngɛ Yehowa hɛ mi, ejakaa e ngɛ níhi a he ní tsue kɛ je e hi he klɔuklɔu ɔ.
3 Nɛ e tsɔɔ mi osɔfo nɔkɔtɔma Yoshua nɛ daa si ngɛ Yehowa bɔfo ɔ hɛ mi, nɛ Satan daa si ngɛ e hiɔ nɔ konɛ e te si kɛ wo lɛ. 2 Kɛkɛ nɛ Yehowa bɔfo ɔ de Satan ke: “Oo Satan, Yehowa nɛ kã o hɛ mi, ee, Yehowa, nɔ nɛ hla Yerusalem ɔ nɛ kã o hɛ mi! Anɛ pi tso nɛ a je kɛ je la mi ji nɛ ɔ lo?”
3 Jamɛ a be ɔ, Yoshua wo tade nɛ sɛ mu, nɛ e daa si ngɛ bɔfo ɔ hɛ mi. 4 Bɔfo ɔ de nihi nɛ daa si ngɛ e hɛ mi ɔ ke, “Nyɛ je e tade nɛ sɛ mu ɔ ngɛ e he.” Kɛkɛ nɛ e de lɛ ke, “Hyɛ, i ha nɛ o tɔmi* ɔ je o he kɛ ho, nɛ a kɛ tade kpakpa* maa wo mo.”
5 Lɔ ɔ he ɔ, i de ke: “Ha nɛ a ngɔ yi fimi nɔ́ nɛ he tsɔ kɛ fĩ e yi.” Nɛ a ngɔ yi fimi nɔ́ nɛ he tsɔ ɔ kɛ fĩ e yi, nɛ a wo tadehi ha lɛ; nɛ Yehowa bɔfo ɔ daa si ngɛ lejɛ ɔ. 6 Kɛkɛ nɛ Yehowa bɔfo ɔ de Yoshua ke: 7 “Nɔ́ nɛ Yehowa tabohiatsɛ ɔ de ji nɛ ɔ nɛ, ‘Ke o maa nyɛɛ ngɛ ye blɔ ɔmɛ a nɔ, nɛ o ma tsu ní tsumihi nɛ i kɛ wo o dɛ ɔ, lɛɛ o ma sɔmɔ kaa kojolɔ ngɛ ye we ɔ mi, nɛ o maa hyɛ ye yale ɔ nɔ;* nɛ ma ha nɛ o ná he blɔ kɛ ba da ye hɛ mi kaa nihi nɛ a daa si ngɛ hiɛ ɔ.’
8 “‘Osɔfo Nɔkɔtɔma Yoshua, i kpa mo pɛɛ, moo bu tue, mo kɛ o huɛmɛ nɛ a hii si ngɛ o hɛ mi ɔ, ejakaa nyumu nɛ ɔmɛ daa si kɛ ha okadi; hyɛ! i kɛ ye sɔmɔlɔ nɛ ji Tso Nɛ Tsɛ̃ ɔ ma! 9 Hyɛ tɛ nɛ i kɛ ma si ngɛ Yoshua hɛ mi ɔ! Hɛngmɛ kpaago ngɛ tɛ kake nɛ ɔ nɔ; nɛ ma kpɛ́ ningma ko ngɛ nɔ, nɛ ma je jamɛ a zugba a tɔmi ɔ kɛ je ngɛ ligbi kake mi,’ Yehowa tabohiatsɛ ɔ lɛ de.
10 “‘Jamɛ a ligbi ɔ, nɔ fɛɛ nɔ maa fɔ nɔ nɛ ngɛ e kasa mi ɔ nine kɛ ba e wai tso kɛ e fig tso sisi,’” Yehowa tabohiatsɛ ɔ lɛ de.
4 Bɔfo ɔ nɛ kɛ mi tu munyu ɔ ba ekohu, nɛ e ba tsɛ̃ɛ mi kaa bɔ nɛ a tsɛ̃ɛɔ nɔ ngɛ mahe mi ɔ. 2 Kɛkɛ nɛ e bi mi ke: “Mɛni o na?”
Nɛ i de ke: “Hyɛ! i na kane tso nɛ a kɛ sika tsu sɔuu lɛ pee, nɛ tsesi maa si ngɛ e yi mi. Kane kpaago maa si ngɛ nɔ, ee, kpaago, nɛ kane kpaago ɔmɛ nɛ a maa si ngɛ nɔ ɔ ngɛ paipi kpaago. 3 Nɛ oliv tso enyɔ ngɛ e kasa mi, kake ngɛ tsesi ɔ hiɔ nɔ nɛ kake ngɛ muɔ nɔ.”
4 Kɛkɛ nɛ i bi bɔfo ɔ nɛ kɛ mi ngɛ munyu tue ɔ ke: “Ye nyɔmtsɛ, mɛni nɛ ní nɛ ɔmɛ tsɔɔ?” 5 Lɔ ɔ he ɔ, bɔfo ɔ nɛ kɛ mi ngɛ munyu tue ɔ bi mi ke: “Anɛ o li nɔ́ nɛ ní nɛ ɔmɛ tsɔɔ lo?”
I ha heto ke: “Dɛbi, ye nyɔmtsɛ.”
6 Kɛkɛ nɛ e de mi ke: “Nɔ́ nɛ Yehowa de Zerubabel ji nɛ ɔ nɛ: “Tsa pi tabuli a he wami loo adesahi a he wami nya, se mohu ngɛ ye mumi ɔ nya nɛ ní nɛ ɔmɛ tsuo maa ya nɔ,” Yehowa tabohiatsɛ ɔ lɛ de. 7 Mo yoku ngua, mɛnɔ ji mo? O maa pee kaa zugba nɛ fɔɔ si tɛtlɛɛ ngɛ Zerubabel hɛ mi. Nɛ e kɛ tɛ ɔ nɛ ngɛ yi mi ɔ maa ba nɛ a maa hi ose hee ke: “E ngɛ fɛu wawɛɛ! E ngɛ fɛu wawɛɛ!”’”
8 Yehowa kɛ mi tu munyu ekohu nɛ e de mi ke: 9 “Zerubabel nine lɛ to we nɛ ɔ sisi, nɛ lɛ nɔuu kɛ̃ e nine lɛ maa gbe nya. Nɛ nyɛ maa le kaa Yehowa tabohiatsɛ ɔ lɛ tsɔ mi nyɛ ngɔ. 10 Mɛnɔ lɛ gbe ligbi nɛ níhi je sisi bɔɔbɔɔbɔɔ ɔ he guɛ ɔ? Ejakaa a ma nya, nɛ a maa na kpa nɛ sumui ngɛ nya* ngɛ Zerubabel dɛ mi. Hɛngmɛ kpaago nɛ ɔmɛ ji Yehowa hɛngmɛhi nɛ a ngɛ si bɔlee ngɛ zugba a nɔ ɔ nɛ.”
11 Kɛkɛ nɛ i bi lɛ ke: “Oliv tso enyɔ nɛ ɔmɛ nɛ a maa si ngɛ kane tso ɔ hiɔ nɔ kɛ muɔ nɔ ɔ, mɛni ji a sisi?” 12 I kpale bi lɛ ke: Mɛni lɛ oliv tso kɔni enyɔ nɛ a tsɛ̃* nɛ a ngɛ nu nɛ e kɔla ngɛ kaa sika tsu ɔ plɛe kɛ ngɛ sika tsu paipi ɔ mi gue ɔ tsɔɔ?”
13 Lɔ ɔ he ɔ, e bi mi ke: “Anɛ o li nɔ́ nɛ ní nɛ ɔmɛ tsɔɔ lo?”
I ha heto ke: “Dɛbi, ye nyɔmtsɛ.”
14 E de mi ke: “Nimli enyɔ nɛ ɔmɛ ji nihi nɛ a pɔ mɛ nu nɛ́ a daa si ngɛ zugba a tsuo Nyɔmtsɛ ɔ kasa nya a nɛ.”
5 I wo ye yi nɔ ekohu nɛ i na womi kpo ko nɛ ngɛ tee. 2 E bi mi ke: “Mɛni o na?”
I ha heto ke: “I na womi kpo ko nɛ ngɛ tee, e kami ji kɔni fã 20,* nɛ e blimi ji kɔni fã 10.”
3 Kɛkɛ nɛ e de mi ke: “Enɛ ɔ ji gbiɛmi nɛ je kpo kɛ yaa zugba a nɔ tsuo ɔ nɛ, ejakaa womi kpo ɔ fã kake tu munyu kɛ si jumi, se nihi tsuo nɛ juɔ ɔ, a gblɛ a tue; nɛ womi kpo ɔ fã kake hu tu munyu kɛ si kita kami, se nihi tsuo nɛ kãa kita a, a gblɛ a tue. 4 Yehowa tabohiatsɛ ɔ de ke, ‘I tsɔ lɛ kɛ ho, nɛ e ma ya sɛ julɔ ɔ we ɔ mi, kɛ nɔ nɛ kɛ ye biɛ kãa lakpa kita a hu we ɔ mi, nɛ e maa hi jamɛ a we ɔ mi nɛ e ma kpata e tso ɔmɛ kɛ e tɛ ɔmɛ a hɛ mi.’”
5 Kɛkɛ nɛ bɔfo ɔ nɛ kɛ mi ngɛ munyu tue ɔ ba e hɛ mi nɛ e de mi ke: “I kpa mo pɛɛ, wo o yi nɔ nɛ o hyɛ nɔ́ nɛ je kpo kɛ yaa a.”
6 Lɔ ɔ he ɔ, i bi lɛ ke: “Mɛni ji lɔ ɔ?”
E ha heto ke: Efa susumi nɔ́ ɔ* lɛ je kpo kɛ yaa a nɛ.” E tsa nɔ ke: “Bɔ nɛ a ngɛ ha ngɛ zugba a tsuo nɔ ɔ ji nɛ ɔ nɛ.” 7 I na kaa a wo e nya nɔ́ ɔ nɛ a kɛ sumui pee ɔ nɔ, nɛ yo ko hii si ngɛ susumi nɔ́ ɔ mi. 8 Enɛ ɔ he ɔ, e de ke: “Yo nɛ ɔ daa si ha Yiwutso.” Kɛkɛ nɛ e nyɛ e nɔ kɛ wo efa susumi nɔ́ ɔ mi, nɛ e kɛ e nya nɔ́ ɔ nɛ a kɛ sumui pee nɛ e mi jiɔ ɔ bu nya.
9 Kɛkɛ nɛ i wo ye yi nɔ nɛ i na yihi enyɔ komɛ nɛ a ngɛ tee ngɛ kɔɔhiɔ mi kɛ ma. A ngɛ pɛlihi kaa bɔ nɛ aklawa pɛlihi ngɛ ɔ, nɛ a wo susumi nɔ́ ɔ nɔ kɛ ho kɔɔhiɔ mi ya. 10 Lɔ ɔ he ɔ, i bi bɔfo ɔ nɛ kɛ mi ngɛ munyu tue ɔ ke: “Jije a wo efa susumi nɔ́ ɔ kɛ yaa?”
11 E ha heto ke: “A kɛ yaa Shinar* zugba a nɔ konɛ a ya ma we ha lɛ; nɛ ke a ma we ɔ ta a, a kɛ lɛ maa wo lejɛ ɔ ngɛ e sihi he nɛ sa lɛ ɔ.”
6 Kɛkɛ nɛ i hyɛ hiɔwe ekohu nɛ i na ta zugba lɛ eywiɛ nɛ a je yokuhi enyɔ a kpɛ kɛ ma, nɛ a kɛ akɔblee lɛ pee yoku ɔmɛ. 2 Okpɔngɔhi nɛ a tsuɔ ngɛ kekleekle ta zugba lɛ ɔ gblae, nɛ okpɔngɔ yumuhi ngɛ ta zugba lɛ enyɔne ɔ gblae. 3 Okpɔngɔ futaahi ngɛ ta zugba lɛ etɛne ɔ gblae, nɛ okpɔngɔ tuubɛtuubɛhi* kɛ okpɔngɔ huatahuatahi lɛ a ngɛ ta zugba lɛ eywiɛne ɔ gblae.
4 I bi bɔfo ɔ nɛ kɛ mi ngɛ munyu tue ɔ ke: “Ye nyɔmtsɛ, mɛni níhi ji nɛ ɔ?”
5 Bɔfo ɔ ha mi heto ke: “A ji mumi eywiɛ nɛ a ngɛ hiɔwe ɔ, nɛ a ngɛ kpo jee kɛ yaa benɛ a ba da si ngɛ zugba a tsuo Nyɔmtsɛ ɔ hɛ mi se ɔ. 6 Nɔ́* nɛ okpɔngɔ yumu ɔmɛ ngɛ gblae ɔ bee kɛ yaa yiti je zugba a nɔ; nɛ nɔ́ nɛ okpɔngɔ futaa amɛ ngɛ gblae ɔ bee kɛ yaa wo ɔ se; nɛ nɔ́ nɛ okpɔngɔ tuubɛtuubɛ* ɔmɛ ngɛ gblae ɔ yaa woyi je zugba a nɔ. 7 Nɛ okpɔngɔ huatahuata amɛ ngɛ hlae wawɛɛ nɛ a je kpo kɛ nyɛɛ kɛ be ngɛ zugba a nɔ.” Kɛkɛ nɛ e de ke: “Nyɛɛ ho, nyɛ ya nyɛɛ kɛ be ngɛ zugba a nɔ.” Nɛ a bɔni nyɛɛmi kɛ bɔni zugba a nɔ kpami.
8 Kɛkɛ nɛ e kpa ngmlaa kɛ tsɛ mi nɛ e de ke: “Hyɛ, ní nɛmɛ nɛ a bee kɛ yaa yiti je zugba a nɔ ɔ ha nɛ Yehowa mumi ɔ jɔɔ e he ngɛ yiti je zugba a nɔ.”
9 Yehowa kɛ mi tu munyu ekohu nɛ e de mi ke: 10 Moo ngɔ nɔ́ nɛ Heldai, Tobiya, kɛ Yedaya kɛ je nihi nɛ a ngɛ nyɔguɛ tso mi ɔ a ngɔ kɛ ba a ngɛ a dɛ; o kɛ nihi nɛ a je Babilon kɛ ba a nɛ ho Yosia nɛ ji Zefania bi ɔ we ɔ mi ya ngɛ jamɛ a ligbi ɔ nɔ. 11 Ngɔɔ sika hiɔ kɛ sika tsu kɛ pee jlasi* nɛ o kɛ bu Yehozadak bi Yoshua, nɛ ji osɔfo nɔkɔtɔma a yi. 12 Nɛ o de lɛ ke,
“‘Nɔ́ nɛ Yehowa tabohiatsɛ ɔ de ji nɛ ɔ nɛ: “Nyumu ɔ nɛ a tsɛɔ lɛ ke Tso Nɛ Tsɛ̃ ɔ ji nɛ ɔ nɛ. E ma tsɛ̃ kɛ je lɛ nitsɛ e hi he ɔ, nɛ e maa ma Yehowa sɔlemi we ɔ. 13 Lɛ ji nɔ nɛ maa ma Yehowa sɔlemi we ɔ, nɛ lɛ ji nɔ nɛ maa ngɔ agboje ɔ nɛ. E maa hi si ngɛ e matsɛ sɛ ɔ nɔ, nɛ e maa ye osɔfo hulɔ ngɛ e matsɛ sɛ ɔ nɔ, nɛ tue mi jɔmi maa hi blɔ nya enyɔ ɔmɛ a kpɛti.* 14 Nɛ jlasi ɔ* maa pee kaimi nɔ́ kɛ ha Helem, Tobiya, Yedaya kɛ Hen, nɛ ji Zefania bi ɔ ngɛ Yehowa sɔlemi we ɔ. 15 Nɛ nihi nɛ a ngɛ tsitsaa a maa ba nɛ a ma ba ye bua kɛ ma Yehowa sɔlemi we ɔ.” Nɛ nyɛ maa le kaa Yehowa tabohiatsɛ ɔ lɛ tsɔ mi nyɛ ngɔ. Nɛ ke nyɛ bu Yehowa nyɛ Mawu ɔ gbi tue ɔ, munyu nɛ ɔ maa ba mi.’”
7 Ngɛ Matsɛ Darius nɔ yemi jeha nɛ ji eywiɛne ɔ mi ɔ, Yehowa kɛ Zakaria tu munyu ngɛ nyɔhiɔ nɛɛne ɔ nɛ ji Kislev* nyɔhiɔ ɔ we ligbi eywiɛne ɔ nɔ. 2 Nihi nɛ a ngɛ Betel ɔ tsɔ Sharezer kɛ Regem Melek kɛ e nyumu ɔmɛ konɛ a ya kpa Yehowa pɛɛ nɛ́ e na mɛ mɔbɔ, 3 nɛ́ a ya de osɔfo ɔmɛ kɛ gbali ɔmɛ nɛ a ngɛ Yehowa tabohiatsɛ ɔ we ɔ* mi ɔ ke: “Anɛ ma fo ya ngɛ nyɔhiɔ enuɔne ɔ nɔ nɛ ma ko ye ní kaa bɔ nɛ i pee jehahi babauu ji nɛ ɔ lo?”
4 Yehowa kɛ mi tu munyu ekohu nɛ e de mi ke: 5 “Mo bi zugba a nɔ bi ɔmɛ tsuo kɛ osɔfo ɔmɛ ke, ‘Benɛ nyɛ ha hwɔ nɛ nyɛ fo ya ngɛ nyɔhiɔ enuɔne ɔ kɛ nyɔhiɔ kpaagone ɔ mi jeha 70 sɔuu ɔ, anɛ imi lɛ nyɛ ha hwɔ ha lo? 6 Nɛ benɛ nyɛ ye ní nɛ nyɛ nu ní ɔ, anɛ pi nyɛ nitsɛmɛ nyɛ he nɛ nyɛ ye ní nɛ nyɛ nu ní ha lo? 7 Anɛ e sɛ nɛ nyɛɛ bu munyuhi nɛ Yehowa tu kɛ gu gbali nɛ a hi si blema a a nɔ ɔ tue lo? Jamɛ a be ɔ mi ɔ, Yerusalem kɛ mahi nɛ bɔle lɛ ɔ ngɛ tue mi jɔmi, nɛ nihi ngɛ mi, nɛ nihi hu ngɛ Negeb kɛ Shefela ma a mi.’”
8 Yehowa kɛ Zakaria tu munyu ekohu nɛ e de lɛ ke: 9 “Nɔ́ nɛ Yehowa tabohiatsɛ ɔ de ji nɛ ɔ nɛ, ‘Nyɛɛ kɛ dami sane yemi nɛ kojo, nɛ nyɛ je suɔmi nɛ se pui kpo kɛ tsɔɔ nyɛ sibi nɛ́ nyɛɛ na nyɛ sibi mɔbɔ. 10 Nyɛ ko sisi yalɔyo* aloo awusa,* nubwɔ aloo ohiatsɛ; nɛ nyɛ ko to nyɛ sibi a he ga yaya ngɛ nyɛ tsui mi.’ 11 Se a kua kaa a maa bu tue, a kplii a tsui,* nɛ a tsi a tue konɛ a ko nu nɔ́. 12 A pee a tsui kaa tslɛbo* nɛ a bui mlaa* nɛ Yehowa tabohiatsɛ ɔ kɛ ha, kɛ munyuhi nɛ e gu e mumi ɔ nɔ kɛ ha nɛ gbali nɛ a hi si blema a tu ɔ tue. Enɛ ɔ he ɔ, Yehowa tabohiatsɛ ɔ mi mi fumi nɛ nya wa a ba a nɔ.”
13 “‘Kaa bɔ nɛ i tsɛ* mɛ nɛ a bui tue ɔ, jã nɔuu nɛ ke mɛ hu a tsɛ mi ɔ, i be mɛ tue bue,’ Yehowa tabohiatsɛ ɔ lɛ de. 14 ‘I ngɔ ahumi kɛ gbɛ mɛ kɛ fĩa je mahi nɛ a li nɔ ɔ a nɔ, nɛ zugba a pee ma doku ngɛ a se, nɛ nɔ ko gui lejɛ ɔ kɛ be kɛ ho aloo e kpale e se kɛ ba gu nɔ; ejakaa a plɛ zugba kpakpa a kɛ pee he gbeye womi nɔ́.’”
8 Yehowa tabohiatsɛ ɔ tu munyu ekohu nɛ e de ke: 2 “Nɔ́ nɛ imi Yehowa tabohiatsɛ ɔ de ji nɛ ɔ nɛ, ‘Ye hɛ maa dɔ ngɛ Zion he wawɛɛ, nɛ i kɛ abofu nɛ nya wa ma fã e he nɛ ma po e he piɛ.’”
3 “Nɔ́ nɛ Yehowa de ji nɛ ɔ nɛ, ‘Ma kpale kɛ ba Zion, nɛ ma ba hi Yerusalem; nɛ a ma tsɛ Yerusalem ke anɔkuale ma, nɛ a ma tsɛ Yehowa tabohiatsɛ ɔ yoku ɔ hu ke, yoku klɔuklɔu.’”
4 “Nɔ́ nɛ Yehowa tabohiatsɛ ɔ de ji nɛ ɔ nɛ, ‘Nimowi kɛ yimowi maa hi Yerusalem ma a he nya buami he ɔmɛ ekohu, nɛ a ti nɔ fɛɛ nɔ maa hɛɛ e dɛma tso ngɛ e dɛ mi akɛnɛ e wa ngɛ jeha mi ɔ he je.* 5 Nɛ ma a he nya buami he ɔmɛ ma hyi tɔ kɛ nyumuwi kɛ yiwi nɛ a ngɛ fiɛe.’”
6 “Nɔ́ nɛ Yehowa tabohiatsɛ ɔ de ji nɛ ɔ nɛ, ‘Eko ɔ, ngɛ jamɛ a be ɔ mi ɔ, e maa pee kaa nɔ́ nɛ e he wa kɛ ha ma nɛ ɔ mi bi ɔmɛ nɛ a piɛ ɔ mohu lɛɛ, se anɛ imi hu e he maa wa kɛ ha mi lo?’ Yehowa tabohiatsɛ ɔ lɛ de.”
7 “Nɔ́ nɛ Yehowa tabohiatsɛ ɔ de ji nɛ ɔ nɛ, ‘Hyɛ, ma he ye ma a mi bi ɔmɛ a yi wami kɛ je puje he kɛ pusinɔ he zugba amɛ a nɔ.* 8 Nɛ ma ngɔ mɛ kɛ ba, nɛ a ma ba hi Yerusalem; nɛ a maa pee ye we bi, nɛ ma pee a Mawu nɛ́ e yeɔ anɔkuale nɛ́ e da.’”
9 “Nɔ́ nɛ Yehowa tabohiatsɛ ɔ de ji nɛ ɔ nɛ, ‘Nyɛ ha nɛ nyɛ nine mi nɛ wa,* nyɛ nɛ́ amlɔ nɛ ɔ, nyɛ nu munyu nɛ ɔmɛ kɛ je gbali ɔmɛ a nya a, munyu nɛ ɔ nɔuu lɛ a tu ligbi ɔ nɛ a fia Yehowa tabohiatsɛ ɔ we ɔ sisi tomi ɔ konɛ a ma sɔlemi we ɔ nɛ. 10 Ejakaa loko jamɛ a be ɔ ke suɔ ɔ, hiɔwo ko be kɛ ha adesa ko aloo lohwe ko; nɛ nɔ ko nyɛ we nɛ e ya loo e ba slɔkee ngɛ he nyɛlɔ ɔ he je, ejakaa i ha nɛ adesahi tsuo te si kɛ wo a sibi.’
11 “‘Se amlɔ nɛ ɔ, i kɛ ma nɛ ɔ mi bi ɔmɛ nɛ a piɛ ɔ be yee kaa be ko nɛ be ɔ,’ Yehowa tabohiatsɛ ɔ lɛ de. 12 ‘Ejakaa a ma du tue mi jɔmi wu ɔ; wai tso ɔ maa wo yiblii, nɛ zugba a maa ba ní, nɛ hiɔwe ɔ ma ha nɛ bɔ́ maa nɛ; nɛ ma ha nɛ ní nɛ ɔmɛ tsuo maa pee ma nɛ ɔ mi bi ɔmɛ nɛ a piɛ ɔ a nɔ́. 13 Oo Yuda we kɛ Israel we, kaa bɔ nɛ nyɛ ba pee gbiɛmi nɔ́ ngɛ je ma amɛ a kpɛti ɔ, jã nɔuu kɛ̃ nɛ ma he nyɛ yi wami nɛ nyɛ ma ba pee jɔɔmi. Nyɛ ko ye gbeye! Nyɛ ha nɛ nyɛ nine ɔmɛ a mi nɛ wa.’*
14 Ejakaa nɔ́ nɛ Yehowa tabohiatsɛ ɔ de ji nɛ ɔ nɛ, ‘“Kaa bɔ nɛ i to kaa i kɛ amanehlu maa ba nyɛ nɔ akɛnɛ nyɛ nɛmɛ ɔmɛ wo ye mi mi la, nɛ́ i pia we ye he he je ɔ,” Yehowa tabohiatsɛ ɔ de ke, 15 “jã nɔuu kɛ̃ nɛ amlɔ nɛ ɔ, i to kaa ma pee Yerusalem kɛ Yuda we ɔ kpakpa. Lɔ ɔ he ɔ, nyɛ ko ye gbeye!”’
16 “‘Níhi nɛ e sa nɛ nyɛɛ pee ji nɛ ɔ nɛ: Nyɛɛ tu nyɛ sibi anɔkuale, nɛ nyɛɛ kɛ anɔkuale yemi kɛ tue mi jɔmi nɛ kojo ngɛ nyɛ ma a agbo ɔmɛ a mi. 17 Nyɛ kpɛti nɔ ko nɛ ko to e nyɛmi he ga yaya ngɛ e tsui mi, nɛ nyɛ ko suɔ lakpa kita kami; ejakaa ní nɛ ɔmɛ tsuo ji níhi nɛ i hiɔ,’ Yehowa lɛ de.”
18 Yehowa tabohiatsɛ ɔ kɛ mi tu munyu ekohu nɛ e de mi ke: 19 Nɔ́ nɛ Yehowa tabohiatsɛ ɔ de ji nɛ ɔ nɛ, ‘hwɔ hami ngɛ nyɔhiɔ eywiɛne ɔ nɔ, hwɔ hami ngɛ nyɔhiɔ enuɔne ɔ nɔ, hwɔ hami ngɛ nyɔhiɔ kpaagone ɔ nɔ, kɛ hwɔ hami ngɛ nyɔhiɔ nyɔngmane ɔ nɔ ɔ maa pee nyami kɛ bua jɔmi gbijlɔhi kɛ ha Yuda we ɔ. Lɔ ɔ he ɔ, nyɛɛ ye anɔkuale nɛ nyɛɛ di tue mi jɔmi se.’
20 “Nɔ́ nɛ Yehowa tabohiatsɛ ɔ de ji nɛ ɔ nɛ, ‘Be maa ba nɛ nihi kɛ je mahi babauu a mi bimɛ maa ba; 21 nɛ je ma kake mi bimɛ maa ya je ma kpa mi bimɛ a ngɔ nɛ a ma de ke: “Nyɛ he nɛ sɔ, nyɛ ha nɛ waa ya Yehowa ngɔ nɛ wa ya kpa lɛ pɛɛ nɛ e na wɔ mɔbɔ, nɛ́ wa hla Yehowa tabohiatsɛ ɔ se blɔ. Imi hu ma ya eko.” 22 Nɛ nihi babauu kɛ je mahi nɛ a he wa maa ba nɛ a ma ba hla Yehowa tabohiatsɛ ɔ se blɔ ngɛ Yerusalem, nɛ a ma kpa Yehowa pɛɛ nɛ́ e na mɛ mɔbɔ.’
23 “Nɔ́ nɛ Yehowa tabohiatsɛ ɔ de ji nɛ ɔ nɛ, ‘Ngɛ jamɛ a be ɔ mi ɔ, nyumuhi nyɔngma nɛ a je je ma amɛ tsuo a mi nɛ a tuɔ gbi slɔɔtohi tsuo ɔ maa pɛtɛ Yudano* kake tade* he, ee, a maa pɛtɛ he wawɛɛ nɛ a ma de ke: “Wa suɔ nɛ waa kɛ nyɛ nɛ ya, ejakaa wa nu kaa Mawu kɛ nyɛ ngɛ.”’”
9 Kojomi sɛ gbi ji nɛ ɔ nɛ:
“Yehowa tu munyu kɛ si Hadrak zugba a,
Nɛ e maa sa Damasko he titli*
Ejakaa Yehowa hɛngmɛ ngɛ adesahi a he
Nɛ e hɛngmɛ ngɛ Israel wɛtso ɔmɛ tsuo hu a he.
2 Nɛ e tu munyu kɛ si Hamat nɛ́ e kɛ lɛ wo huzu ɔ,
Nɛ e tu munyu kɛ si Tiro kɛ Sidon, ejakaa a ngɛ nile wawɛɛ.
3 Tiro fia ta hwumi kpoku* kɛ ha e he.
Nɛ e bua sika hiɔ nya glekugleku kaa zu
Nɛ e bua sika tsu hu nya kaa mɔsɔ ngɛ gbɛjegbɛ nɔ.
5 Ashkelon maa na, nɛ e maa ye gbeye;
Gaza ma pii wawɛɛ,
Ekron hu ma pii ejakaa a pue nɔ́ nɛ e kɛ e hɛ fɔ nɔ ɔ hɛ mi si.
Matsɛ ko hɛ mi ma kpata ngɛ Gaza,
Nɛ nɔ ko nɔ ko be Ashkelon hie hu.
6 Nubwɔ maa hi Ashdod,
Nɛ ma je Filistibi ɔmɛ a he nɔ womi ɔ.
7 Ma je níhi nɛ muɔ tlɔ a mi ɔ kɛ je e nya mi
Nɛ ma je níhi nɛ a ngɛ tai ɔ kɛ je e lungu kpɛ,
Nɛ a ma si lɛ kɛ ha wa Mawu ɔ;
Nɛ e maa pee kaa Sheik* ngɛ Yuda,
Nɛ Ekron maa pee kaa Yebusno.
8 Ma pee kaa bulɔ* nɛ ma bu ye we ɔ he,
Konɛ nɔ ko nɛ ko be ngɛ mi kɛ ho, nɛ nɔ ko hu nɛ ko kpale e se kɛ ba be ngɛ mi;
Nɛ nɔ nɛ nyɛɔ nihi a nɔ nɛ a tsuɔ ní ɔ* be bee ngɛ mi hu,
Ejakaa amlɔ nɛ ɔ, i na paa kɛ imi nitsɛ ye hɛngmɛ.*
9 Oo Zion biyo, mo nya wawɛɛ.
Oo Yerusalem biyo, mo he ose.
Hyɛ! O matsɛ ɔ ma o ngɔ.
Dalɔ ji lɛ, nɛ e kɛ yi wami hemi* ma,
E baa e he si, nɛ e hii si ngɛ teji nɔ,
E hii si ngɛ teji bi nɔ, ee, e hii si ngɛ teji eyo bi ko nɔ.
10 Ma je ta zugba lɛ ɔ kɛ je Efraim
Nɛ ma je okpɔngɔ ɔ kɛ je Yerusalem
A ma je ta hwumi kɛ̃ɛ̃ ɔ kɛ je
Nɛ e maa jaje tue mi jɔmi sɛ gbi kɛ ha je ma amɛ
E maa ye nɔ kɛ je wo nya kake kɛ ya wo nya kpa
Nɛ e maa ye nɔ kɛ je Pa a* nya kɛ ya zugba a nyagbe he ɔ tsuo.
11 Se mo yo, ma gu o muɔ ɔ somi ɔ nɔ
Kɛ je o nihi nɛ a wo mɛ tsu ɔ kɛ je muɔ ɔ nɛ nyu be mi ɔ mi.
12 Nyɛ nihi nɛ a wo nyɛ tsu nɛ nyɛ ngɛ hɛnɔkami, nyɛɛ kpale kɛ ya nyɛ wesa he ɔ.
I ngɛ mo dee mwɔnɛ ɔ ke,
Mo yo, ma to mo nane mi kɛ bɔ he enyɔ.
13 Ejakaa ma dɔ Yuda mi* kaa ye kɛ̃ɛ̃ ɔ.
I kɛ Efraim maa wo kɛ̃ɛ̃ ɔ mi*
Nɛ mo Zion, ma tsɛ̃ɛ̃ o binyumu ɔmɛ,
Nɛ mo Hela, a kɛ o binyumu ɔmɛ maa hwu,
Nɛ ma pee mo kaa tabulɔ klaate.’
14 A maa na Yehowa ngɛ a yi nɔ,
Nɛ e kɛ̃ɛ̃ mi bi ɔ maa je kpo kaa oslabai.
Nyɔmtsɛ Matsɛ Yehowa ma kpa titimati ɔ,*
Nɛ e kɛ woyi je ahumi ɔ maa je kpo.
15 Yehowa tabohiatsɛ ɔ maa po a he piɛ,
Nɛ a ma kpata amlami tɛ ɔmɛ a hɛ mi nɛ a maa ye a nɔ kunimi.
A maa nu ní nɛ a maa pee gidigidi kaa nɔ́ nɛ a nu wai;
Nɛ a ma hyi tɔ kaa tsesi,
Nɛ a maa pee kaa muɔ nɛ a plɛ kɛ pue afɔle sami latɛ ɔ koli ɔmɛ a nɔ.
16 Yehowa a Mawu ɔ ma he a yi wami ngɛ jamɛ a ligbi ɔ nɔ
Kaa bɔ nɛ to hyɛlɔ heɔ e tohi a yi wami ɔ;
Ejakaa a maa pee kaa jlasi* he tɛ nɛ he jua wa nɛ́ e ngɛ kpɛe ngɛ e zugba a nɔ.
17 Hyɛ bɔ nɛ e kpakpa peemi ɔ kle ha,
Nɛ hyɛ bɔ nɛ e he ngɛ fɛu wawɛɛ ha!
Ngma* ma ha nɛ nihewi ɔmɛ ma plɔke,
Nɛ wai ehe ma ha nɛ yihewi nɛ a li nyumu ɔmɛ hu ma plɔke.”
10 “Nyɛ bi Yehowa nɛ e ha nɛ hiɔmi nɛ́ e nɛ ngɛ gbiɛ be mi.
Yehowa ji nɔ nɛ e haa nɛ bɔku yuɔ tuu,
Nɛ́ e haa nɛ hiɔmi nɛɔ kɛ haa adesahi,
Nɛ́ e haa nɛ nɔ fɛɛ nɔ náa niye ní.
A tuɔ nlamihi nɛ se nami be a he ɔ he munyu,
Nɛ a bɔɔ mɔde kaa a maa wo nihi a bua, se lɛ tsuo peeɔ yaka.
Lɔ ɔ he je nɛ a maa hi lalaalo woe kaa jijɔhi ɔ nɛ.
A maa na nɔ́, ejakaa a be nɔ hyɛlɔ ko.
3 Ye mi mi fu to hyɛli ɔmɛ,
Nɛ ma ha nɛ nɔ hyɛli nɛ a yi mi wa a* nɛ a bu akɔtaa;
Ejakaa Yehowa tabohiatsɛ ɔ ngɔ e juɛmi kɛ ba e to kuu ɔ kɛ Yuda we ɔ nɔ,
Nɛ e pee mɛ kaa okpɔngɔ nɛ hɛ mi ngɛ nyami ngɛ ta mi.
4 E mi lɛ hɛ mi nyɛɛlɔ* ɔ maa je kɛ ba,
E mi lɛ nɔ yelɔ nɛ e ji yemi kɛ bualɔ* ɔ maa je kɛ ba,
E mi lɛ ta hwumi kɛ̃ɛ̃ ɔ maa je kɛ ba;
E mi lɛ nɔ hyɛlɔ fɛɛ nɔ hyɛlɔ* maa je kɛ ya, mɛ tsuo pɛpɛɛpɛ.
5 Nɛ a maa pee kaa tabuli,
Nɛ a maa naa mɔsɔ nɛ ngɛ gbɛjegbɛ ɔmɛ a nɔ ɔ mi ngɛ ta mi.
A maa hwu ta, ejakaa Yehowa kɛ mɛ ngɛ;
Nɛ a ma pue okpɔngɔ nɔ hili ɔmɛ a hɛ mi si.
6 Ma ha nɛ Yuda we ɔ nɔ maa kuɔ wawɛɛ,
Nɛ ma he Yosef we ɔ yi wami.
Ma kpale mɛ kɛ ba,
Ejakaa ma na mɛ mɔbɔ;
Nɛ a maa pee kaa nɔ́ nɛ i sakee we mɛ kɛ pue we he hyɛ;
Ejakaa imi ji Yehowa a Mawu ɔ nɛ, nɛ ma bu mɛ tue.
7 Nihi nɛ a ngɛ Efraim we ɔ mi ɔ maa pee kaa tabuli katsɛmɛ,
Nɛ a tsui ma nya kaa nɔ́ nɛ a nu wai.
A bimɛ maa na enɛ ɔ nɛ a ma nya;
A tsui ma nya ngɛ Yehowa mi.
8 ‘Ma kpa nyagba kɛ tsɛ mɛ nɛ ma bua a nya;
Ejakaa ma kpɔ̃ mɛ, nɛ a he maa hiɛ,
Nɛ a maa ya nɔ nɛ a he maa hyɛ.
9 E ngɛ mi kaa ma gbɛ mɛ kɛ fĩa je ma amɛ a mi kaa dumi wu mohu lɛɛ,
Se a ma kai mi be mi nɛ a ngɛ hehi nɛ a kɛ ɔ po;
A kɛ a bimɛ ɔmɛ ma ná he wami ekohu nɛ a maa kpale kɛ ba.
10 Ma kpale mɛ kɛ je Egipt zugba a nɔ kɛ ba
Nɛ ma bua a nya kɛ je Asiria;
Ma ngɔ mɛ kɛ ba Gilead kɛ Lebanon zugba a nɔ,
Nɛ a be blɔ nae ha mɛ ngɛ lejɛ ɔ po.
11 E kɛ haomi maa gu wo ɔ mi kɛ be;
Nɛ e maa fiaa oslɔke ɔmɛ ní ngɛ wo ɔ mi;
Nilo Pa a hehi nɛ a mi kuɔ ɔ ma gbli.
A maa ba Asiria he nɔ womi ɔ si,
Nɛ Egipt matsɛ tso ɔ maa je kɛ ho.
12 Ma wo a nɔ gojoo ngɛ Yehowa mi,
Nɛ a maa nyɛɛ ngɛ e biɛ ɔ mi,’ Yehowa lɛ de.”
11 “Oo Lebanon, bli o sinya amɛ,
Konɛ la nɛ sã o seda tso ɔmɛ.
2 Moo ye kɔmɔ, mo junipa tso, ejakaa seda tso ɔ nɔ si;
A kpata tso ngua amɛ a hɛ mi!
Nyɛ Bashan oak tsohi, nyɛɛ ye kɔmɔ,
Ejakaa hue tso nɛ mi ti ɔ hɛ mi kpata!
3 Nyɛɛ bu tue! To hyɛli ɔmɛ ngɛ awe nyae,
Ejakaa a kpata a hɛ mi nyami ɔ hɛ mi.
Nyɛɛ bu tue! Jata wawi ɔmɛ* ngɛ huãe,
Ejakaa a kpata hue tsohi nɛ a mi ti nɛ a ngɛ Yordan Pa a he ɔ a hɛ mi.
4 “Nɔ́ nɛ Yehowa ye Mawu ɔ de ji nɛ ɔ nɛ, ‘Nyɛɛ hyɛ to kuu ɔ nɛ a yaa gbe mɛ ɔ a nɔ, 5 to kuu ɔ nɛ́ nihi nɛ a heɔ mɛ ɔ gbeɔ mɛ nɛ nɔ ko bui mɛ fɔ, nɛ́ nihi nɛ a juaa mɛ ɔ hu deɔ ke, “A je Yehowa yi, ejakaa ma pee niatsɛ ɔ.” Nɛ a nɔ hyɛli ɔmɛ be mi mi sami ko kulaa ha mɛ.’
6 “‘Ejakaa ye mi mi be mi sãe ngɛ nihi nɛ a ngɛ zugba a nɔ ɔ a he hu,’ Yehowa lɛ de. ‘Enɛ ɔ he ɔ, i kɛ nɔ fɛɛ nɔ maa wo e nyɛmi dɛ mi, kɛ e matsɛ dɛ mi; nɛ a ma kpata zugba a hɛ mi, nɛ i be mɛ kpɔ̃e kɛ je a dɛ mi.’”
7 Nɛ i bɔni to kuu ɔ nɛ a yaa gbe mɛ ɔ a nɔ hyɛmi ha nyɛ, nyɛ to kuu nɛ nyɛ sane ngɛ mɔbɔ ɔ. Lɔ ɔ he ɔ, i ngɔ tso enyɔ nɛ i wo kake biɛ ke Dloomi, nɛ i wo ekpa a hu biɛ ke Kake Peemi, nɛ i bɔni to kuu ɔ nɔ hyɛmi. 8 Nɛ i fie to hyɛli etɛ ngɛ nyɔhiɔ kake mi, ejakaa i nyɛ we nɛ ma to ye tsui si* ha mɛ hu, nɛ mɛ hu a* hiɔ mi. 9 Nɛ i de ke: “I be nɔ yae nɛ ma hyɛ nyɛ nɔ hu. Ha nɛ nɔ nɛ ngɛ gboe ɔ nɛ gbo, nɛ́ nɔ nɛ hɛ mi ngɛ kpatae ɔ hɛ mi nɛ kpata. Ni nɛmɛ nɛ piɛ ɔ lɛɛ, á tsɔtslɔɔ a sibi a mi.” 10 Enɛ ɔ he ɔ, i wo ye tso ɔ nɛ́ i wo lɛ biɛ ke Dloomi ɔ, nɛ i po mi, i pee jã kɛ ku somi ɔ nɛ i kɛ je ma amɛ so ɔ mi. 11 Lɔ ɔ he je ɔ, a ku mi jamɛ a ligbi ɔ, nɛ to kuu ɔ nɛ sane ngɛ mɔbɔ nɛ́ a ngɛ mi hyɛe ɔ ná le kaa Yehowa munyu ji nɛ ɔ nɛ.
12 Kɛkɛ nɛ i de mɛ ke: “Ke e sa nyɛ hɛ mi ɔ, nyɛ ha mi ye hiɔ womi ɔ; ke pi jã a hu ɔ, lɛɛ e hi si.” Nɛ a ha mi* ye hiɔ womi ɔ, sika hiɔ 30.
13 Kɛkɛ nɛ Yehowa de mi ke: “Sake kɛ pue sika to he ɔ; blɔɔ ye he jua nɛ se be ji nɛ ɔ nɛ. Lɔ ɔ he ɔ, i ngɔ sika hiɔ 30 ɔ nɛ i ya sake kɛ pue sika to he ɔ nɛ ngɛ Yehowa we ɔ.
14 Kɛkɛ nɛ i po ye tso enyɔne ɔ, nɛ ji Kake Peemi ɔ hu mi, i pee jã kɛ tsɔɔ kaa Yuda kɛ Israel pi nyɛmimɛ hu.
15 Kɛkɛ nɛ Yehowa de mi ke: “Jehanɛ ɔ, mo wo to hyɛlɔ nɛ se nami ko be e he ɔ ní tsumi dade ɔmɛ. 16 Ejakaa i kɛ to hyɛlɔ ko maa ba zugba a nɔ. E be tohi nɛ a hɛ mi ngɛ kpatae ɔ a nɔ hyɛe; e be to wawi ɔmɛ a se blɔ hlae, e be ní nɛmɛ nɛ a plaa a tsae, nɛ e be ní nɛmɛ nɛ a ngɛ he wami ɔ hu ní hae. Mohu ɔ, e maa ye ní nɛmɛ nɛ wo zɔ ɔ, nɛ e ma kpɔ a nane kokloto ɔmɛ.
17 Musu tloo ye to hyɛlɔ nɛ he be se nami, nɛ́ e jeɔ to ɔmɛ a he ɔ!
Klaate ma ja e kɔni kɛ e hiɔ nɔ hɛngmɛ.
E kɔni ma gbo kulaa,
Nɛ e hiɔ nɔ hɛngmɛ ɔ hu ma yu kulaa.”*
12 Kojomi sɛ gbi ji nɛ ɔ nɛ:
“Yehowa munyu nɛ kɔɔ Israel he ji nɛ ɔ nɛ.” Nɔ́ nɛ Yehowa,
Nɔ nɛ bli hiɔwe ɔ mi,
Nɛ́ e fia zugba a sisi tomi ɔ,
Nɛ́ e pee mumi* nɛ ngɛ nɔmlɔ mi ɔ de ji nɛ ɔ nɛ.
2 “Hyɛ, ma pee Yerusalem kaa kplu* nɛ ma ha nɛ je ma amɛ tsuo nɛ bɔle si ɔ maa dede; nɛ a maa wo Yuda kɛ Yerusalem he ka. 3 Jamɛ a ligbi ɔ, ma ha nɛ Yerusalem maa pee kaa tɛ nɛ jiɔ* kɛ ha je ma amɛ tsuo. Nihi nɛ a ma wo nɔ ɔ tsuo maa plaa wawɛɛ; nɛ je ma amɛ nɛ a ngɛ zugba a nɔ tsuo ma bua a he nya kɛ wo lɛ. 4 Yehowa de ke, “jamɛ a ligbi ɔ, ma ha nɛ sawale maa nu okpɔngɔhi tsuo, nɛ a nɔ hili ɔmɛ tsuo maa nu godo. Ye hɛngmɛ maa hi Yuda we ɔ he, se ma ha nɛ je ma amɛ a we okpɔngɔ ɔmɛ tsuo a hɛngmɛ ma yu. 5 Nɛ Yuda sheik* ɔmɛ ma de ngɛ a tsui mi ke, ‘nihi nɛ a ngɛ Yerusalem ɔ ji ye he wami ngɛ Yehowa tabohiatsɛ nɛ ji a Mawu ɔ he je.’ 6 Jamɛ a ligbi ɔ, ma pee Yuda sheik ɔmɛ kaa buɛ nɛ ngɛ tsoe ngɛ tsohi a kpɛti, kɛ jatɛ nɛ ngɛ tsoe ngɛ ngma nɛ a poo nɛ́ e pueɔ si ɔ mi, nɛ a maa sã ma amɛ tsuo nɛ bɔle mɛ ngɛ a hiɔ nɔ kɛ a muɔ nɔ ɔ; nɛ Yerusalembi ɔmɛ maa hi a hi he* ekohu ngɛ Yerusalem.
7 “Nɛ Yehowa ma he Yuda bo tsu ɔmɛ a yi wami kekle, bɔ nɛ pee nɛ David we ɔ he fɛu ɔ* kɛ Yerusalembi ɔmɛ a he fɛu ɔ* nɔ nɛ ko kuɔ tsɔ̃ pe Yuda. 8 Jamɛ a ligbi ɔ, Yehowa ma plɛ pee he piɛ pomi nɔ́ kɛ ha nihi nɛ a ngɛ Yerusalem ɔ; jamɛ a ligbi ɔ, nɔ nɛ e nane maa tɔ̃tɔ̃ ɔ* maa pee kaa David, nɛ David we ɔ maa pee kaa Mawu, nɛ e maa pee kaa Yehowa bɔfo ɔ nɛ e nyɛɛ a hɛ mi ɔ hulɔ. 9 Jamɛ a ligbi ɔ, bɔ fɛɛ bɔ nɛ ji ɔ, ma kpata je ma amɛ nɛ a ma ba tua Yerusalem ɔ a hɛ mi.
10 “Ma plɛ dloomi kɛ pɛɛ kpami mumi ɔ kɛ pue David we ɔ kɛ Yerusalembi ɔmɛ a nɔ, nɛ a maa hyɛ nɔ nɛ a gbɔ lɛ nɔ́ ɔ, nɛ a ma nya awe kɛ ha lɛ kaa bɔ nɛ a nyaa awe kɛ haa bi kake too nɛ e gbo ɔ, nɛ a ma fo ya wawɛɛ kɛ ha lɛ kaa bɔ nɛ a foɔ ya wawɛɛ kɛ haa bitɛte nɛ e gbo ɔ. 11 Jamɛ a ligbi ɔ, a ma nya awe wawɛɛ nitsɛ ngɛ Yerusalem, kaa bɔ nɛ a nya awe ngɛ Hadadrimon ngɛ Megido nga a nɔ ɔ. 12 Zugba a tsuo ma fo ya wawɛɛ, weku fɛɛ weku ma fo e ya; David we ɔ weku ɔ ma fo e ya, nɛ a yi ɔmɛ hu ma fo a ya; Natan we ɔ weku ɔ ma fo e ya, nɛ a yi ɔmɛ hu ma fo a ya; 13 Levi we ɔ weku ɔ ma fo e ya, nɛ a yi ɔmɛ hu ma fo a ya; Shimeibi ɔmɛ a weku ɔ ma fo a ya, nɛ a yi ɔmɛ hu ma fo a ya; 14 nɛ weku ɔmɛ tsuo nɛ a piɛ ɔ ma fo a ya, weku fɛɛ weku ma fo e ya, nɛ a yi ɔmɛ hu ma fo a ya.
13 “Jamɛ a ligbi ɔ, a ma bli vu ko nya kɛ ha David we ɔ kɛ Yerusalembi ɔmɛ, konɛ a kɛ tsu a he kɛ je a yayami ɔmɛ kɛ a mu ɔmɛ a he.
2 Yehowa tabohiatsɛ ɔ de ke, “jamɛ a ligbi ɔ, ma gbɛ a we amaga amɛ a biɛ kɛ je zugba a nɔ, nɛ a be mɛ kaie hu; nɛ ma je gbali ɔmɛ kɛ mumi nɛ he tsɔ we ɔ kɛ je zugba a nɔ. 3 Nɛ ke nɔ ko gba ekohu ɔ, e tsɛ kɛ e nyɛ nɛ a fɔ lɛ ɔ ma de lɛ ke, ‘o ma gbo, ejakaa o tu lakpa munyuhi ngɛ Yehowa biɛ mi.’ Nɛ e tsɛ kɛ e nyɛ nɛ a fɔ lɛ ɔ kɛ nɔ́ maa gbɔ lɛ ngɛ gbami nɛ e gba a he je.
4 “Jamɛ a ligbi ɔ, e maa pee gbalɔ fɛɛ gbalɔ zo kaa e ma de nina nɛ e na a; nɛ a be a tade* nɛ a kɛ lohwe he bwɔmi pee ɔ woe kɛ sisi nɔ ko hu. 5 Nɛ e ma de ke, ‘Tsa pi gbalɔ ji mi. Ngmɔ hulɔ ji mi, ejakaa nyumu ko he mi benɛ i ji jokuɛyo ɔ.’ 6 Nɛ ke nɔ ko bi lɛ ke, ‘Mɛni pahi lɛ a ngɛ o he womi nɔ ɔ?’* E ma ha heto ke, ‘I ná pa nɛ ɔmɛ kɛ je ye huɛ komɛ a we mi.’”*
7 “Oo klaate, tee si kɛ wo ye to hyɛlɔ ɔ,
Tee si kɛ wo ye huɛ ɔ,
“Fiaa to hyɛlɔ ɔ nɔ́, nɛ́ o ha nɛ to kuu ɔ nɛ gbɛ fĩa;
Nɛ ma wo ye nine nɔ kɛ si nihi nɛ a ba si ɔ,” Yehowa tabohiatsɛ ɔ lɛ de.
8 “Nɛ ngɛ zugba a nɔ tsuo ɔ,
A ma gba nihi nɛ a ngɛ nɔ ɔ mi etɛ nɛ a maa poo e mi enyɔ ngɔ pue he nɛ a hɛ mi ma kpata;*
Nɛ e mi kake nɛ piɛ ɔ maa hi zugba a nɔ,” Yehowa lɛ de.
9 “Nɛ ma ngɔ e mi kake nɛ piɛ ɔ kɛ gu la mi;
Nɛ ma tsu a he kaa bɔ nɛ a tsuɔ sika hiɔ he ɔ,
Nɛ ma ka mɛ kaa bɔ nɛ a kaa sika tsu ɔ.
A ma tsɛ ye biɛ,
Nɛ ma he nɔ.
Ma de mɛ ke, ‘A ji ye ma,’
Nɛ a ma de ke, ‘Yehowa ji wa Mawu.’”
14 “Hyɛ, ligbi ɔ ma, e ji Yehowa ligbi, nɛ́ ta yibu ní nɛ a ná kɛ je o* mi ɔ, a ma gba ngɛ o mi. 2 Ma bua je ma amɛ tsuo a nya kɛ wo Yerusalem he kɛ ha ta; nɛ a maa ngɔ ma a, a maa ha ní ngɛ we ɔmɛ a mi nɛ a ma tua yi ɔmɛ abonua. A maa ngɔ nihi nɛ a ngɛ ma a mi ɔ a mi fã kɛ ya nyɔguɛ tso mi, se nihi nɛ a maa piɛ ɔ lɛɛ, a be mɛ poe kɛ je ma a mi kɛ fɔ he.
3 “Yehowa maa je kpo nɛ e kɛ je ma amɛ ma ya hwu kaa bɔ nɛ e hwuɔ ta ngɛ ta ligbi nɔ ɔ. 4 Jamɛ a ligbi ɔ, e nane maa ma Oliv Yoku ɔ nɛ e hɛ mi tsɔɔ Yerusalem ɔ nɔ, ngɛ puje he blɔ ɔ; nɛ Oliv Yoku ɔ mi ma gba enyɔ kɛ je puje he* kɛ ya pusinɔ he,* nɛ dɔgba agbo maa hi kpɛ; nɛ yoku ɔ fã maa hɛ kɛ ya yiti je, nɛ fã maa hɛ kɛ ya woyi je. 5 Nyɛ maa tu fo kɛ ya dɔgba nɛ ngɛ ye yoku ɔmɛ a kpɛti ɔ mi, ejakaa dɔgba a maa be hluu kɛ ya Azel tɔɔ. E sa nɛ nyɛɛ tu fo kaa bɔ nɛ nyɛ tu fo benɛ zugba mimiɛ ngɛ Yuda matsɛ Uziah ligbi ɔmɛ a mi ɔ. Nɛ Yehowa ye Mawu ɔ maa ba, nɛ ni klɔuklɔu ɔmɛ tsuo maa piɛɛ e he.
6 “Jamɛ a ligbi ɔ, la nɛ hɛ mi ngɛ nyami be kpɛe, nɔ́ ko nɔ́ ko be ní tsue.* 7 Nɛ e ma ba pee ligbi kake nɛ́ e ji Yehowa ligbi. Je be nae ngɛ lejɛ ɔ, nɛ je be jɔe ngɛ lejɛ ɔ; nɛ ke gbɔkuɛ su po ɔ, je mi ma tsɔ. 8 Jamɛ a ligbi ɔ, wami nyuhi maa be kɛ je Yerusalem, fã maa be kɛ ho puje he blɔ wo ɔ* he ya, nɛ fã maa be kɛ ho woyi je wo ɔ* he ya. E maa ba mi ngɛ mawulɛ kɛ ahlabata be mi. 9 Nɛ Yehowa maa pee Matsɛ ngɛ zugba a tsuo nɔ. Jamɛ a ligbi ɔ, Yehowa maa pee kake nɛ e biɛ hu maa pee kake.
10 “Zugba a tsuo maa pee kaa Araba, kɛ je Geba kɛ ya Rimon ngɛ Yerusalem woyi je; nɛ e maa te si, nɛ nihi ma ba hi e mi kɛ je Benyamin Agbo ɔ nya kɛ ya si he nɛ Kekle Agbo ɔ ngɛ ɔ, nɛ e maa be kɛ ho Kɔ nya Agbo ɔ he ya, nɛ e ma tsa nɔ kɛ je Hanenel Mɔ ɔ he kɛ ya si matsɛ ɔ wai ngami muɔ* ɔmɛ a he. 11 Nɛ nihi maa hi e mi nɛ nɔ ko be lɛ gbiɛe kɛ kpata e hɛ mi hu, nɛ nihi maa hi Yerusalem ngɛ tue mi jɔmi mi.
12 “Amanehlu nɛ Yehowa kɛ maa ba nihi tsuo nɛ a hwuɔ ta kɛ siɔ Yerusalem ɔ a nɔ ji nɛ ɔ nɛ: A he lo maa sa be mi nɛ a daa si ngɛ a nane nɔ, a hɛngmɛ maa sa ngɛ toto ɔ mi, nɛ a lilɛ maa sa ngɛ a nya mi.
13 “Jamɛ a ligbi ɔ, Yehowa ma ha nɛ basabasa peemi maa sɛ a kpɛti, nɛ nɔ fɛɛ nɔ maa nu e huɛ nine, nɛ e ma wo e nine nɔ ngɛ e huɛ ɔ nɔ.* 14 Yuda hu kɛ e he maa wo ta nɛ ngɛ nɔ yae ngɛ Yerusalem ɔ mi, nɛ a ma bua je mahi tsuo nɛ a bɔle si ɔ a ní nɛ a ngɛ, nɛ ji sika tsu, sika hiɔ kɛ tadehi babauu nitsɛ ɔ a nya.
15 “Nɛ amanehlu nɛ e ngɛ kaa jã nɔuu maa ba okpɔngɔ ɔmɛ, teji okpɔngɔ ɔmɛ, afukpɔngɔ ɔmɛ, teji ɔmɛ kɛ lohwehi nɛ a ngɛ jamɛ a sito he ɔmɛ ɔ hu a nɔ.
16 “Nihi tsuo nɛ a maa piɛ ngɛ je ma amɛ tsuo nɛ a kɛ Yerusalem hwu ɔ a mi ɔ maa kuɔ kɛ ba daa jeha konɛ a ba kplã si kɛ ha* Matsɛ ɔ, nɛ ji Yehowa tabohiatsɛ ɔ, nɛ́ a ye Gbahi A Sisi Himi* Gbijlɔ ɔ. 17 Se ke nɔ ko nɛ e ngɛ wekuhi nɛ a ngɛ zugba a nɔ ɔ eko mi ɔ kuɛ kɛ yɛ Yerusalem nɛ́ e ya kplã si kɛ ha Matsɛ ɔ, nɛ ji Yehowa tabohiatsɛ ɔ, hiɔmi be nɛe ha mɛ. 18 Nɛ ke Egipt weku ɔ kuɛ kɛ bɛ konɛ a ba sɛ mi ɔ, hiɔmi be nɛe ha mɛ. Mohu ɔ, amanehlu nɛ Yehowa kɛ ba je ma amɛ nɛ a kuɛ kɛ bɛ nɛ́ a ba ye Gbahi A Sisi Himi Gbijlɔ ɔ a nɔ ɔ maa ba a nɔ. 19 Enɛ ɔ maa pee Egipt yayami ɔ he tue gblami kɛ je mahi tsuo nɛ a kuɛ kɛ ba nɛ́ a ba ye Gbahi A Sisi Himi Gbijlɔ ɔ hu a yayami ɔ he tue gblami.
20 “Jamɛ a ligbi ɔ, a maa ngma munyu nɛ ji ‘Klɔuklɔu ji Yehowa!’ a ngɛ okpɔngɔ ɔmɛ a ngmlɛ ɔmɛ a he. Nɛ ní hoomi buɛ* ɔmɛ nɛ a ngɛ Yehowa we ɔ mi ɔ maa pee kaa tsesi ɔmɛ nɛ a maa si ngɛ afɔle sami latɛ ɔ hɛ mi ɔ. 21 Nɛ ní hoomi buɛ fɛɛ ní hoomi buɛ* nɛ ngɛ Yerusalem kɛ Yuda a maa pee klɔuklɔu, nɛ a ma ba pee Yehowa tabohiatsɛ ɔ níhi, nɛ nihi tsuo nɛ a ngɛ afɔle sãe ɔ maa ba mi nɛ a ma ba ngɔ eko kɛ hoo ní. Jamɛ a ligbi ɔ, Kanaanno* ko be Yehowa tabohiatsɛ ɔ we ɔ mi hie hu.”
E sisi ji “Yehowa Kai.”
Hyɛ Mi Tsɔɔmi Munyu B15.
Ngɛ Hebri gbi mi ɔ, “ngɛ hɛ mi nyami se ɔ.”
Aloo “hɛngmɛ nɔ lasiɛtɛ.”
Aloo “ta ye hɛngmɛ he.”
Aloo “adesahi.”
Aloo “fɔ yemi.”
Aloo “gbijlɔ tade.”
Aloo “o maa bu ye yale ɔ he.”
Ngɛ Hebri gbi mi ɔ, “tɛ ɔ, sanyla a.”
Nɛ ji, tso ɔ kɔni he nɛ woɔ yiblii ɔ.
Kɔni fã kake peeɔ sɛntimita 44.5 (intsisi 17.5). Hyɛ Mi Tsɔɔmi Munyu B14.
Ngɛ Hebri gbi mi ɔ, “efa a.” Efa nɛ a tu e he munyu ngɛ hiɛ ɔ daa si kɛ ha susumi nɔ́ aloo kusii nɛ a kɛ susuɔ nɔ ngɛ efa nya. Lita 22 peeɔ efa kake. Hyɛ Mi Tsɔɔmi Munyu B14.
Nɛ ji, Babilonia.
Aloo “tuutɛtuutɛhi.”
Nɛ ji, ta zugba lɛ ɔ.
Aloo “tuutɛtuutɛ.”
Aloo “jlasi ngua.”
Nɛ tsɔɔ kaa, tue mi jɔmi maa hi e blɔ nya kaa nɔ yelɔ kɛ osɔfo ɔ a kpɛti.
Aloo “jlasi ngua a.”
Hyɛ Mi Tsɔɔmi Munyu B15.
Aloo “sɔlemi we ɔ.”
Aloo “ahoyo.”
Ngɛ Hebri gbi mi ɔ, “bi nɛ e be tsɛ.”
Aloo “a kplii a tsui nɛ a plɛ a se.”
Baiblo komɛ de ke “tɛ nɛ he wa,” kaa emeri tɛ.
Aloo “blɔ tsɔɔmi.”
Ngɛ Hebri gbi mi ɔ, “e tsɛ.”
Ngɛ Hebri gbi mi ɔ, “akɛnɛ e ligbi ɔmɛ hiɛ ɔ he je.”
Aloo “kɛ je zugba nɛ ngɛ he nɛ pu teɔ si ngɛ kɛ zugba nɛ ngɛ he nɛ pu nɔɔ si ngɛ ɔ a nɔ.”
Aloo “Nyɛɛ pee kã.”
Aloo “Nyɛɛ pee kã.”
Ngɛ Hebri gbi mi ɔ, “Yudano nɛ e ji nyumu.”
Aloo “tade ɔ nya a.”
Ngɛ Hebri gbi mi ɔ, “Damasko ji e he jɔɔmi he.”
Aloo “gbogbo nɛ he wa.”
Baiblo komɛ de ke “ngɛ wo ɔ nɔ.”
Sheik ji biɛ nɛ a kɛ tsɛɔ wɛtso nyatsɛ.
Aloo “tabulɔ.”
Aloo “yi mi walɔ.”
E ngɛ heii kaa yi mi nɛ a ngɛ e maa wae ɔ.
Aloo “kunimi yemi; kpɔmi.”
Nɛ ji, Yufrate Pa a.
Ngɛ Hebri gbi mi ɔ, “ma naa Yuda nɔ.”
Nɛ tsɔɔ kaa, Efraim maa pee kaa kɛ̃ɛ̃ mi bi.”
Ngɛ Hebri gbi mi ɔ, “koli ɔ.”
Aloo “matsɛ jlasi.”
Ngma nɛ a ngɛ tsɔɔe ngɛ hiɛ ɔ ji hwiit, blɛfo kɛ a henɔ ɔmɛ.
Aloo “we mi mawuhi; wɔhi.”
Aloo “nyakpɛ níhi a he munyu; kunya tsumi níhi a he munyu.”
Ngɛ Hebri gbi mi ɔ, “akpakpo ɔmɛ.”
Ngɛ Hebri gbi mi ɔ, “kɔ nya mɔ,” e peeɔ nɔ ko nɛ e he hia wawɛɛ ɔ he foni; nɔkɔtɔma.
Ngɛ Hebri gbi mi ɔ, “tso plɛɛko,” e peeɔ nɔ ko nɛ e ji yemi kɛ bualɔ ɔ he foni; nɔ yelɔ.
Aloo “nihi tsuo nɛ a nyɛɔ nihi a nɔ nɛ a tsuɔ ní.”
Aloo “jata ku wawi kɛ a kuɛ he bwɔmi.”
Aloo “ye klaa nyɛ we nɛ e to e tsui si.”
Aloo “nɛ a klaa.”
Ngɛ Hebri gbi mi ɔ, “a ngmɛ.”
Ngɛ Hebri gbi mi ɔ, “maa pee tsuu.”
Aloo “mumi nɛ́ a woɔ.”
Aloo “tsesi.”
Aloo “tloomi.”
Sheik ji biɛ nɛ a kɛ tsɛɛ wɛtso nyatsɛ.”
Aloo “a blɔ he nɛ sa mɛ.”
Aloo “hɛ mi nyami ɔ.”
Aloo “hɛ mi nyami ɔ.”
Aloo “nɔ nɛ gbɔjɔ pe kulaa ngɛ a kpɛti ɔ.”
Aloo “gbalɔ tade.”
Ngɛ Hebri gbi mi ɔ, “o nine ɔmɛ a kpɛ?” Nɛ ji, o gugue nɔ aloo o se mi.
Aloo “ni komɛ nɛ a suɔ mi ɔ a we mi.”
Aloo “a ma gbo.”
Nɛ ji, ma a nɛ a tu he munyu ngɛ kuku 2 ɔ mi ɔ.
Aloo “kɛ je he nɛ pu teɔ si ngɛ.”
Ngɛ Hebri gbi mi ɔ, “wo ɔ he.”
Aloo “nɔ́ ko nɔ́ ko be nyɛɛe,” kaa nɔ́ nɛ fĩɛ ha nɛ a wlua.
Nɛ ji, Wo Gbogboe ɔ.
Nɛ ji, Mediterenia Wo ɔ.
Aloo “wai tɛ muɔ.”
Aloo “nihi ma tua a sibi.”
Aloo “a ba ja.”
Aloo “Gbahi Nɛ A Maa Nɛ A Hiɔ Sisi Be Kpiti Ko.”
Aloo “buɛhi nɛ a nya kle agbo.”
Aloo “buɛhi nɛ a nya kle agbo.”
Baiblo komɛ de ke “jua yelɔ.”