MALAKI

1 Kojomi sɛ gbi:

Sɛ gbi nɛ Yehowa kɛ gu Malaki* nɔ kɛ ha Israelbi ɔmɛ ji nɛ ɔ nɛ:

2 Yehowa ke: “I je suɔmi kpo kɛ tsɔɔ nyɛ.”

Se nyɛ deɔ ke: “Mɛni lɛ o peeɔ kɛ tsɔɔ kaa o suɔ wɔ?”

Yehowa ke: “Anɛ pi Yakob nyɛminyumu ji Esau lo? Se i suɔ Yakob 3 nɛ Esau lɛɛ, i sume lɛ; nɛ i ha nɛ e yoku ɔmɛ a nɔ fɔ si gu, nɛ i ngɔ e weto ní ɔ kɛ ha nga mi gbehi.”

4 E ngɛ mi kaa Edom ngɛ dee ke, ‘a ywia wa ma a mohu lɛɛ, se wa maa kpale ya ma ekohu,’ nɔ́ nɛ Yehowa tabohiatsɛ ɔ ngɛ dee ji nɛ ɔ nɛ, ‘A maa ma, se ma ku lɛ ngɔ pue si, nɛ a ma tsɛ mɛ ke “yiwutsotsɛmɛ a zugba” kɛ “nihi nɛ Yehowa bu mɛ fɔ kɛ yaa neneene.” 5 Nyɛ nitsɛmɛ nyɛ maa na kɛ nyɛ hɛngmɛ, nɛ nyɛ ma de ke: “Á je Yehowa yi ngɛ Israel zugba a tsuo nɔ.”’”

6 Yehowa tabohiatsɛ ɔ ngɛ nyɛ osɔfohi nɛ nyɛ ngɛ e biɛ ɔ he guɛ gbee ɔ dee ke: “‘Bi buɔ e tsɛ, nɛ sɔmɔlɔ hu buɔ e nyɔmtsɛ. Ke tsɛ ji mi ɔ, mɛni he je nɛ nyɛ bui mi ɔ? Nɛ ke nyɔmtsɛ* ji mi ɔ, mɛni he je nɛ nyɛ yi mi gbeye ɔ?’*

“‘Se nyɛ deɔ ke: “Kɛ wa plɛ kɛ gbe o biɛ ɔ he guɛ kɛɛ?”’

7 “‘Nyɛ ngɔɔ niye ní* nɛ e he tsɔ we kɛ baa ye we afɔle sami latɛ ɔ nɔ.’

“‘Nɛ nyɛ biɔ ke: “Kɛ wa plɛ kɛ wo o he mu kɛɛ?”’

“‘Lɔ ɔ ji kaa nyɛ deɔ ke: “Yehowa okplɔɔ ɔ ji nɔ́ ko nɛ se nami ko be he.” 8 Nɛ ke nyɛ ngɔ lohwe hɛ yuyuilɔ kɛ ba sã afɔle ɔ, nyɛ deɔ ke: “Tsa pi nɔ́ yayami.” Nɛ ke nyɛ ngɔ lohwe glɔtsɛ loo nɔ́ nɛ e be he wami kɛ ba a, nyɛ deɔ ke: “Tsa pi nɔ́ yayami.”’”

Ke nyɛ suɔ ɔ, nyɛɛ ngɔ kɛ ya ha nyɛ amlaalo ɔ nɛ nyɛɛ hyɛ. Anɛ e bua maa jɔ nyɛ he, aloo e maa pee nyɛ hiami níhi ha nyɛ lo?” Yehowa tabohiatsɛ ɔ lɛ de.

9 “Amlɔ nɛ ɔ, i kpa nyɛ pɛɛ, nyɛ kpa Mawu pɛɛ kaa e maa na wɔ mɔbɔ lo. Ke nyɛ hɛɛ ní nɛ ɔmɛ ngɛ nyɛ dɛ mi kɛ ma afɔle sami ɔ, anɛ e bua maa jɔ nyɛ ti nɔ ko he lo?” Yehowa tabohiatsɛ ɔ lɛ de.

10 “Nyɛ kpɛti mɛnɔ maa je e tsui mi nɛ e ma nga sinya amɛ?* Ejakaa nyɛ slɛ we la ngɛ ye we afɔle sami latɛ ɔ nɔ nɛ́ nyɛ he we nɔ́ ko. Ye bua jɔɛ nyɛ he, nɛ ye bua jɔɛ nike ní afɔle nɛ nyɛ ba sãã a ekoeko he.” Yehowa tabohiatsɛ ɔ lɛ de.

11 “Kɛ je puje he kɛ ya si pusinɔ he ɔ, ye biɛ ɔ nɔ maa kuɔ ngɛ je ma amɛ a kpɛti. A maa sã afɔle ngɛ he fɛɛ he, nɛ a maa sã afɔle kɛ ha ye biɛ ɔ kaa nike ní nɛ he tsɔ; ejakaa ye biɛ ɔ nɔ maa kuɔ ngɛ je ma amɛ a kpɛti,” Yehowa tabohiatsɛ ɔ lɛ de.

12 Se nyɛ ngɛ ye biɛ ɔ he guɛ gbee,* nɛ nyɛ deɔ ke, ‘A wo Yehowa okplɔɔ ɔ he mu, nɛ tso yiblii nɛ ji niye ní nɛ ngɛ nɔ ɔ, se nami ko be he.’ 13 Nyɛ deɔ hu ke, ‘Hyɛ! Mɛni haomi po ji nɛ ɔ!’ nɛ nyɛ tuɔ nyɛ hɛ mi ngɔ woɔ nɔ́ nɛ ɔ,” Yehowa tabohiatsɛ ɔ lɛ de. “Nyɛ ngɔɔ lohwehi nɛ nyɛ ya ju, lohwe glɔtsɛmɛ, kɛ lohwehi nɛ a be he wami kɛ baa. Ee, nyɛ ngɔɔ jamɛ a ní ɔmɛ kɛ baa kaa nike ní! Anɛ ní nɛ ɔmɛ lɛ nyɛ ngɛ hlae nɛ ma ngɔ ɔ lo?” Yehowa lɛ de.

14 Á gbiɛ nɔ nɛ e pee e he nɛ e hɛ mi tsɔ, nɛ́ e ngɛ lohwe eku nɛ e ngɛ he wami, nɛ́ ke e wo si ɔ, e ngɔɔ lohwe nɛ e je kpa kɛ ba sãã afɔle ha Yehowa. Matsɛ ngua ji mi, nɛ je ma amɛ tsuo maa ye ye biɛ ɔ gbeye,” Yehowa tabohiatsɛ ɔ lɛ de.

2 “Amlɔ nɛ ɔ, nyɛ osɔfohi, mlaa nɛ i ngɛ nyɛ woe ji nɛ ɔ nɛ. 2 Ke nyɛ bui tue, nɛ nyɛ ha we nɛ e hi nyɛ tsui nɔ kaa nyɛ maa wo ye biɛ ɔ hɛ mi nyami ɔ,” nɔ́ nɛ Yehowa tabohiatsɛ ɔ ngɛ dee ji nɛ ɔ nɛ, “ma nɛ gbiɛmi ngɔ pue nyɛ nɔ, nɛ ma ha nɛ nyɛ jɔɔmi ɔ ma plɛ pee gbiɛmi. Ee, i plɛ nyɛ jɔɔmi ɔmɛ ngɔ pee gbiɛmi momo, ejakaa nyɛ ha we nɛ e hi nyɛ tsui nɔ.”

3 “Hyɛ, ma kpata* wuhi nɛ nyɛ du ɔmɛ a hɛ mi ngɛ nyɛ he je, nɛ ma ngɔ nyɛ fĩ kɛ kpa nyɛ hɛ mi, nyɛ gbijlɔ ɔmɛ a fĩ ɔ; Nɛ a maa ngɔ nyɛ kɛ ho lejɛ* ɔ ya. 4 Kɛkɛ nyɛ maa le kaa i ngɔ mlaa nɛ ɔmɛ kɛ ha nyɛ konɛ somi nɛ ngɛ i kɛ Levi wa kpɛti ɔ nɛ tsa nɔ,” Yehowa tabohiatsɛ ɔ lɛ de.

5 Somi nɛ i kɛ lɛ so ɔ ma ha nɛ e ná wami kɛ tue mi jɔmi, i kɛ ha lɛ bɔ nɛ pee nɛ é ye mi gbeye.* E ye mi gbeye, ee, e ye ye biɛ ɔ gbeye. 6 Anɔkuale mlaa* ngɛ e nya mi, nɛ e kɛ e nya tu we munyu nɛ dɛ. E kɛ mi nyɛɛ ngɛ tue mi jɔmi mi kɛ ngɛ dami nya, nɛ e ha nɛ nihi fuu kpa yayami peemi. 7 E sa kaa osɔfo nya nɛ baa nile yi, nɛ́ nihi nɛ a hla mlaa a* kɛ je e nya mi, ejakaa e ji Yehowa tabohiatsɛ ɔ tsɔlɔ.

8 Se nyɛ nitsɛmɛ lɛɛ nyɛ gba kɛ je blɔ ɔ nɔ. Nyɛ ha nɛ nihi fuu a nane tɔtɔ ngɛ mlaa a* he je. Nyɛ puɛ somi nɛ i kɛ Levi so ɔ,” Yehowa tabohiatsɛ ɔ lɛ de. 9 “Lɔ ɔ he ɔ, ma ha nɛ nyɛ maa pee nihi nɛ se nami ko be a he nɛ́ a ba si ngɛ ni ɔmɛ a hɛ mi, ejakaa nyɛ yi ye blɔ tsɔɔmi ɔmɛ a nɔ, nɛ nyɛ hyɛɔ nɔ hɛ mi ngɛ mlaa kɛ ní tsumi mi.”

10 “Anɛ pi tsɛ kake nɛ wɔ tsuo wa ngɛ lo? Nɛ pi Mawu kake too ɔ nɛ bɔ wɔ lo? Lɛɛ mɛni he je nɛ wa sisiɔ wa sibi kɛ woɔ somi nɛ ngɛ Mawu kɛ wa nɛmɛ ɔmɛ a kpɛti ɔ he mu ɔ? 11 Yuda yi anɔkuale, nɛ nɔ́ hiemi nɔ́ ko ngɛ nɔ yae ngɛ Israel kɛ Yerusalem; ejakaa Yuda wo Yehowa klɔuklɔu peemi* nɛ e fiɛ we he ɔ he mu, nɛ e ya ngɔ ma se mawu ko bi kɛ pee e yo. 12 Yehowa ma kpata nɔ fɛɛ nɔ nɛ e peeɔ nɔ́ nɛ ɔ hɛ mi kɛ je Yakob bo tsu ɔ mi, nɔ ko fɛɛ nɛ e ji ɔ,* e ma kpata e hɛ mi, ke e ngɔɔ nike ní kɛ ba haa Yehowa tabohiatsɛ ɔ po.”

13 “Nɔ́ kpa* ko hu ngɛ nɛ nyɛ peeɔ nɛ ha nɛ nyɛ ngɔ vonyu kɛ ya fomi kɛ huu peemi kɛ ha Yehowa afɔle sami latɛ ɔ nɔ, nɛ enɛ ɔ ha nɛ e hyɛ we nyɛ nike ní afɔle ɔ, nɛ nyɛ dɛ mi nɔ́ ko hu be nɛ e bua jɔ he. 14 Nyɛ biɔ ke, ‘Mɛni he je?’ Ejakaa Yehowa ji odase ngɛ o kɛ o nihe mi yo ɔ nyɛ kpɛti, yo nɛ o yi lɛ anɔkuale ɔ, pohu lɛ ji o he piɛɛlɔ kɛ o yo nɛ o kɛ lɛ so.* 15 Se nɔ ko ngɛ nɛ lɛɛ e pee we jã, ejakaa e ngɛ Mawu mumi ɔ.* Nɛ mɛni jamɛ a nɔ ɔ ngɛ hlae? Mawu nina.* Lɔ ɔ he ɔ, nyɛɛ hyɛ mumi nɛ nyɛ jeɔ kpo ɔ saminya, nɛ́ nyɛɛ ye nyɛ nihe mi yi ɔmɛ anɔkuale. 16 Ejakaa i sume* gba mi pomi kulaa,” Yehowa Israel Mawu ɔ lɛ de. “I hiɔ nɔ nɛ e kɛ yiwutso ní peemi peeɔ tade nɛ e woɔ,”* Yehowa tabohiatsɛ ɔ lɛ de. “Nyɛɛ hyɛ mumi nɛ nyɛ jeɔ kpo ɔ saminya, nɛ nyɛ ko sisi nyɛ sibi.

17 Nyɛɛ kɛ nyɛ munyu ɔmɛ wo Yehowa pɔtɔ. Se nyɛ biɔ ke, “Kɛ wa plɛ kɛ wo lɛ pɔtɔ kɛɛ? Bɔ nɛ nyɛ plɛɔ kɛ peeɔ jã ji, nyɛ deɔ ke: ‘nɔ fɛɛ nɔ nɛ e peeɔ nɔ́ yayami ɔ, e hi ngɛ Yehowa hɛ mi, nɛ e bua jɔɔ e he.’ Jehanɛ hu ɔ, nyɛ deɔ ke, ‘Jije Mawu nɛ e yeɔ dami sane ɔ ngɛ?’”

3 “Hyɛ! I ngɛ ye tsɔlɔ ɔ tsɔe, nɛ e ma ba dla blɔ ngɔ to mi. Nɛ si kake too ɔ, anɔkuale Nyɔmtsɛ ɔ nɛ nyɛ ngɛ e se blɔ hlae ɔ maa ba e sɔlemi we ɔ; nɛ somi ɔ he tsɔlɔ ɔ nɛ nyɛ bua jɔ e he ɔ maa ba. Hyɛ! E maa ba kokooko,” Yehowa tabohiatsɛ ɔ lɛ de.

2 “Se ligbi ɔ nɛ e maa ba a, mɛnɔ lɛ ma nyɛ maa da nya, nɛ ke e ba hia si ɔ, mɛnɔ lɛ ma nyɛ maa da si? Ejakaa e maa pee kaa la nɛ a kɛ tsuɔ dade he, kɛ jale nɛ a kɛ fɔɔ nɔ́ he. 3 Nɛ e ma ba hi si kaa sika hiɔ he tsulɔ kɛ e he fɔlɔ, nɛ e maa tsu Levibi ɔmɛ a he; E ma ha nɛ a he ma tsɔ* kaa sika tsu kɛ sika hiɔ, nɛ a ma ba pee nihi nɛ a maa ngɔ nike ní afɔle kɛ ha Yehowa ngɛ dami mi. 4 Nɛ nike ní afɔle nɛ maa je Yuda kɛ Yerusalem ɔ maa sa Yehowa hɛ mi, kaa bɔ nɛ e ji blema lokoo ɔ, kaa jeha komɛ nɛ be ɔ.

5 “Ma ba nyɛ ngɔ nɛ ma ba kojo nyɛ, nɛ ye he maa sɔ kɛ ye odase kɛ si kunya yeli, gba puɛli, nihi nɛ a kãa lakpa kita, nihi nɛ a sisiɔ ní tsuli, yalɔyihi, awusahi,* kɛ nihi nɛ yi bua nibwɔhi.* Nimli nɛ ɔmɛ yi mi gbeye,” Yehowa tabohiatsɛ ɔ lɛ de.

6 “Ejakaa imi ji Yehowa; i tsakee we. Nɛ nyɛ ji Yakob bimɛ; lɔ ɔ he je nɛ a kpataa we nyɛ hɛ mi lolo ɔ nɛ. 7 Kɛ je nyɛ nɛmɛ ɔmɛ a yi nɔ nɛ nyɛ gba kɛ je ye blɔ tsɔɔmi ɔmɛ a he nɛ nyɛɛ kɛ tsu we ní. Nyɛɛ kpale kɛ ba ye ngɔ, nɛ imi hu ma kpale kɛ ba nyɛ ngɔ,” Yehowa tabohiatsɛ ɔ lɛ de.

Se nyɛ biɔ ke: “Kɛ wa ma plɛ kɛ kpale kɛ ba kɛɛ?”

8 “Anɛ nɔmlɔ adesa ma nyɛ maa ju Mawu lo? Se nyɛ ngɛ mi jue.”

Nɛ nyɛ biɔ ke: “Kɛ wa plɛ kɛ ju mo kɛɛ?”

“Nyɛ juɔ mi ngɛ mi dlami nyɔngmanyɔngma mi kakaaka a kɛ yemi kɛ buamihi nɛ a kɛ baa a mi. 9 A gbiɛ nyɛ,* ejakaa nyɛ ngɛ mi jue. Ee, ma a tsuo ngɛ mi jue. 10 Nyɛɛ ngɔ mi dlami nyɔngmanyɔngma mi kakaaka a tsuo kɛ ba níto he ɔ, konɛ niye ní nɛ hi ye we ɔ, i kpa nyɛ pɛɛ, nyɛɛ ngɔ nɔ́ nɛ ɔ kɛ ka mi nɛ nyɛɛ hyɛ, kaa i be hiɔwe agbo ɔmɛ blie nɛ ma ha nɛ jɔɔmi nɛ nɛ ngɔ pue nyɛ nɔ kɛ ya si nɔ́ ko be nyɛ hiae lo,” Yehowa tabohiatsɛ ɔ lɛ de.

11 “Nɛ ma kã nɔ́ puɛlɔ* nɛ ngɛ nyɛ kpɛti ɔ hɛ mi, nɛ e be tso yiblii nɛ ngɛ nyɛ zugba a nɔ ɔ puɛe, nɛ wai yiblii be wai tsohi nɛ a ngɛ nyɛ ngmɔ ɔmɛ a mi ɔ nɔ tae,” Yehowa tabohiatsɛ ɔ lɛ de.

12 “Je ma amɛ tsuo ma de ke nyɛ ngɛ bua jɔmi, ejakaa nyɛ ma ba pee zugba nɛ haa nɔ bua jɔmi,” Yehowa tabohiatsɛ ɔ lɛ de.

13 Yehowa ke: “Munyu nɛ nyɛ tu kɛ si mi ɔ nya wa.”

Nɛ nyɛ deɔ ke: “Mɛni wa de nɛ lɔ ɔ tsɔɔ kaa wa tu munyu kɛ si mo?”

14 “Nyɛ deɔ ke: ‘Se nami ko be Mawu jami he. Benɛ wa ye Yehowa tabohiatsɛ ɔ mlaa amɛ a nɔ, nɛ wa nyɛɛ mɔbɔmɔbɔ ngɛ e hɛ mi ɔ, mɛni se lɛ wa ná? 15 Amlɔ nɛ ɔ, wa buɔ nihi nɛ a woɔ a he nɔ ɔ kaa a ngɛ bua jɔmi. Jehanɛ hu ɔ, nihi nɛ a peeɔ yiwutso ní ɔ yeɔ manye. A jeɔ blɔ, nɛ a kaa Mawu, se nɔ́ ko pee we mɛ.’”

16 Jamɛ a be ɔ, nihi nɛ a yeɔ Yehowa gbeye ɔ kɛ a sibi tu munyu, nɔ fɛɛ nɔ kɛ e nyɛmi tu munyu, nɛ Yehowa ngɛ tue bue, nɛ e ngɛ nɔ́ nɛ a ngɛ dee ɔ nue. Nɛ a ngma nihi nɛ a yeɔ Yehowa gbeye, kɛ nihi nɛ a pueɔ a yi mi tɛ ngɛ e biɛ* ɔ he ɔ a biɛ ngɛ kaimi womi ɔ mi ngɛ e hɛ mi.

17 Yehowa tabohiatsɛ ɔ ke: “A ma ba pee ye nɔ́ ngɛ ligbi nɛ i kɛ mɛ maa pee ye weto ní klɛdɛɛ ɔ* nɔ. Ye mi mi maa sã mi ngɛ a he, kaa bɔ nɛ tsɛ mi mi sãã lɛ ngɛ e bi nɛ sɔmɔɔ lɛ he ɔ. 18 Nɛ nyɛ maa kpale na slɔɔto nɛ ngɛ dalɔ kɛ yiwutsotsɛ a kpɛti, kɛ slɔɔto nɛ ngɛ nɔ nɛ jaa Mawu kɛ nɔ nɛ ja we Mawu ɔ a kpɛti.”

4 Yehowa tabohiatsɛ ɔ ke: “Hyɛ! be ko ma, e ngɛ tsoe kaa flɔɔnɔɔ mi la. Jamɛ a ligbi ɔ, nihi nɛ a woɔ a he nɔ, kɛ yayami peeli tsuo maa pee kaa nga.* A ma kpata a hɛ mi kokooko ngɛ ligbi ɔ nɛ ma a nɔ, nɛ a sipoku loo a kɔni po be piɛe. 2 Se nyɛ nɛ nyɛ woɔ ye biɛ ɔ hɛ mi nyami ɔ,* dami pu la* nɛ tsaa nɔ ɔ ma kpɛ kɛ pue nyɛ nɔ; nɛ nyɛ maa tuu kaa na bimɛ nɛ a wo zɔ.”

3 “Ligbi ɔ nɛ ma tsu nɔ́ nɛ ɔ, nyɛ maa naa yiwutsotsɛmɛ a nɔ, nɛ a maa pee kaa bunyuku ngɛ nyɛ nane si,” Yehowa tabohiatsɛ ɔ lɛ de.

4 “Nyɛ kai ye tsɔlɔ Mose Mlaa a, blɔ tsɔɔmihi, kɛ kojomihi nɛ i fã ngɛ Horeb kaa Israelbi ɔmɛ tsuo nɛ a ye nɔ ɔ.

5 Hyɛ! I ngɛ gbalɔ Eliya tsɔe kɛ ba nyɛ ngɔ loko Yehowa ligbi ngua nɛ ngɛ gbeye ɔ nɛ ba. 6 E ma ba plɛ tsɛmɛ a tsui kɛ ba bimɛ a he, kɛ bimɛ hu a tsui kɛ ba tsɛmɛ a he, bɔ nɛ pee nɛ ma ko ba fia zugba a nɔ́, nɛ ma kpata hɛ mi.”

(Hebri kɛ Aram ngmami ɔ sisi tsɔɔmi ɔ nyagbe, Kristofohi A Hela Ngmami ɔ tsa nɔ)