KƐ YA HA ROMA BI ƆMƐ

1 Paulo, Kristo Yesu nyɔguɛ ɔ nɛ a tsɛ lɛ konɛ e ba pee bɔfo, nɛ a je lɛ ngɔ to kɛ ha Mawu sane kpakpa a 2 nɛ e wo he si kɛ gu e gbali ɔmɛ a nɔ ngɛ Ngmami klɔuklɔu ɔ mi, 3 nɛ e kɔɔ e Bi ɔ, nɔ nɛ e je David nina a* mi ngɛ he lo nya a he, 4 se nɔ nɛ a kɛ he wami jaje kaa Mawu Bi ngɛ mumi ɔ nɛ ngɛ klɔuklɔu ɔ nya kɛ gu si nɛ a tle lɛ kɛ je gbeje ɔ nɔ ɔ—ee, Yesu Kristo wa Nyɔmtsɛ ɔ. 5 Kɛ gu e nɔ nɛ wa nine su dloomi kɛ bɔfo ní tsumi ɔ nɔ, konɛ waa gu hemi kɛ yemi nɔ kɛ bu tue ngɛ je ma amɛ tsuo a kpɛti ngɛ e biɛ ɔ he je. 6 Je ma nɛ ɔmɛ a kpɛti nɛ nyɛ hu a tsɛ nyɛ kɛ je, konɛ nyɛ ba pee Yesu Kristo níhi— 7 kɛ ya ha nihi tsuo nɛ a ngɛ Roma nɛ Mawu suɔ mɛ, nɛ e tsɛ mɛ kaa a ba pee ni klɔuklɔuhi ɔ:

Nyɛ nine nɛ su dloomi kɛ tue mi jɔmi nɛ je Mawu nɛ ji wa Tsɛ ɔ kɛ Nyɔmtsɛ Yesu Kristo ngɔ ɔ nɔ.

8 Kekleekle ɔ, kɛ gu Yesu Kristo nɔ ɔ, i naa ye Mawu ɔ si ngɛ nyɛ tsuo nyɛ he, ejakaa a tuɔ nyɛ hemi kɛ yemi ɔ he munyu ngɛ je ɔ mi tsuo. 9 Ejakaa Mawu, nɔ nɛ i kɛ ye mumi ɔ sɔmɔɔ lɛ ngɛ blɔ klɔuu nɔ ngɛ e Bi ɔ he sane kpakpa a he ɔ ji ye we odase, kaa be fɛɛ be ɔ, i kpa we nyɛ ta womi ngɛ ye sɔlemi mi, 10 nɛ i hii pɛɛ kpae kaa jehanɛ lɛɛ ke e maa hi ɔ, ma ba nyɛ ngɔ ngɛ Mawu suɔmi nya. 11 Ejakaa ye hɛ ngɛ jae wawɛɛ ngɛ nyɛ he kaa ma na nyɛ, konɛ ma ha nyɛ mumi mi nike ní bɔ nɛ pee nɛ nyɛ he nɛ wa; 12 aloo mohu ɔ, nɛ́ waa ngɔ hemi kɛ yemi nɛ wa ti nɔ fɛɛ nɔ ngɛ ɔ kɛ wo wa sibi he wami, i kɛ nyɛ tsuo.

13 Se nyɛmimɛ, i suɔ nɛ nyɛɛ le kaa i to ye yi mi si abɔ kaa ma ba nyɛ ngɔ konɛ ma ba ná yiblii ngɛ nyɛ hu nyɛ ngɔ kaa bɔ nɛ i ná ngɛ ni nɛmɛ nɛ a ngɛ je ma amɛ a mi ɔmɛ a ngɔ ɔ, se a tsi ye nya hluu kɛ ba si amlɔ nɛ ɔ. 14 I hɛɛ Hela bi kɛ ma se bi* tsuo, juɛmitsɛmɛ kɛ nihi nɛ a be juɛmi tsuo hiɔ; 15 enɛ ɔ he ɔ, i suɔ wawɛɛ kaa ma ba jaje sane kpakpa a ngɔ tsɔɔ nyɛ nihi hu nɛ nyɛ ngɛ Roma a. 16 Ejakaa sane kpakpa a he zo pee we mi; ngɛ anɔkuale mi ɔ, e ji Mawu he wami nɛ e kɛ heɔ nɔ fɛɛ nɔ nɛ e ngɛ hemi kɛ yemi ɔ yi wami, Yuda no kekle, kɛ lɔ ɔ se hu ɔ, Hela no. 17 Ejakaa lɔ ɔ mi nɛ a jeɔ Mawu dami ɔ kpo ngɛ kɛ guɔ hemi kɛ yemi nɔ, kɛ jehanɛ se hu kɛ ha hemi kɛ yemi, kaa bɔ nɛ a ngma ke: “Se dalɔ ɔ maa hi wami mi ngɛ hemi kɛ yemi he je” ɔ.

18 Ejakaa a ngɛ Mawu mi mi fumi ɔ kpo jee kɛ ngɛ hiɔwe jee kɛ ngɛ nihi tsuo nɛ a yi Mawu gbeye, kɛ nihi nɛ a peeɔ níhi nɛ dɛ nɛ a ngɛ anɔkuale ɔ si nyɛe ngɛ blɔ nɛ dɛ nɔ ɔ sie, 19 ejakaa níhi nɛ a ma nyɛ maa le ngɛ Mawu he ɔ ngɛ heii ngɛ a kpɛti, ejakaa Mawu ha nɛ e pee heii ha mɛ. 20 Ejakaa kɛ je be nɛ e bɔ je ɔ kɛ ma nɛ ɔ, a naa e suhi nɛ a nɛ kɛ hɛ ngmɛ ɔ heii, ejakaa a naa mɛ kɛ guɔ níhi nɛ a bɔ ɔmɛ a nɔ, a naa e he wami nɛ ngɛ daa a po kɛ Mawu nɛ e ji ɔ, lɔ ɔ he ɔ, a be nya jemi ko. 21 Ejakaa e ngɛ mi kaa a le Mawu mohu lɛɛ, se a wui e hɛ mi nyami kaa Mawu, nɛ a nɛ lɛ si hulɔ, mohu ɔ, a susuɔ níhi a he kaa nihi nɛ a be juɛmi, nɛ a tsui nɛ li nɔ́ ko nɔ́ ko ɔ hu mi wo diblii. 22 E ngɛ mi kaa a deɔ ke a ngɛ juɛmi mohu lɛɛ, se a ba plɛ pee kuasiahi, 23 nɛ a tsake Mawu nɛ e puɛ we ɔ hɛ mi nyami ɔ kɛ pee nɔ́ ko nɛ e puɛɔ he amaga kaa adesa kɛ lohwe pɛlitsɛmɛ kɛ lohwe nane eywiɛɛywiɛtsɛmɛ kɛ akɔtɔku kɛ sinɔ a henɔhi.*

24 Enɛ ɔ he ɔ, akɛnɛ a suɔ kaa a maa pee a tsui nya ní he je ɔ, Mawu ngmɛɛ a he kɛ ha mu ní tsumihi, konɛ a pue a nɔmlɔ tso ɔmɛ a hɛ mi si ngɛ a kpɛti. 25 A ngɔ Mawu anɔkuale ɔ kɛ tsake lakpa, nɛ a ja adebɔ níhi nɛ a sɔmɔ mɛ ngɛ blɔ klɔuu nɔ mohu pe Bɔlɔ ɔ, nɔ nɛ e sa yi jemi kɛ yaa neneene ɔ. Amen. 26 Enɛ ɔ he je nɛ Mawu ngmɛɛ a he ngɔ ha bɔmi nami he akɔnɔ nɛ́ e nɔ hí yemi ɔ nɛ, ejakaa a yi ɔmɛ tsake nɔ́ nɛ a to kaa a pee ngɛ adebɔ nya a hɛ mi, nɛ a peeɔ nɔ́ nɛ kɛ adebɔ blɔ nya tomi kɔ we; 27 jã kɛ̃ nɛ nyumu ɔmɛ hu je nɔ́ nɛ a to ngɛ adebɔ nya kaa nyumuhi kɛ yihi nɛ a pee* ɔ se, nɛ a sibi a he akɔnɔ nɛ nya wa hyi mɛ tɔtɔɔtɔ, nɛ nyumuhi kɛ nyumuhi ngɛ yakayaka níhi pee, nɛ mɛ nitsɛmɛ a ngɛ a tɔmi ɔ he tue gblami* nɛ sa mɛ ɔ náe.

28 Kaa bɔ nɛ a nɛ kaa e he hia nɛ a le Mawu ɔ,* Mawu hu ngmɛɛ a he ngɔ ha juɛmi nɛ sɛ, konɛ a pee níhi nɛ sɛ. 29 Nɛ a hyi tɔ kɛ níhi tsuo nɛ dɛ, yi wu tso ní peepee, hɛ tsumi, kɛ ní yayamihi, nɛ a hyi tɔ kɛ hɛkɔ, nɔmlɔ gbemi, pɛ, nɔ sisimi, kɛ nɔ he guɛ gbemi, nɛ a ji munyu huitihuiti tuli,* 30 nihi a biɛ puɛli, nihi nɛ a sume Mawu sane, nihi nɛ a bui nɔ, he nɔ woli, fiali, ga yayami toli, nihi nɛ a bui a fɔli, 31 nihi nɛ a nui nɔ́ sisi, nihi nɛ a yi somihi a nɔ, nihi nɛ a be mi mi sami, kɛ nihi nɛ a nɛ nɔ mɔbɔ. 32 E ngɛ mi kaa nimli nɛ ɔmɛ le Mawu mlaa nɛ da a saminya mohu lɛɛ—kaa nihi nɛ a peeɔ ní nɛ ɔmɛ ɔ sa gbenɔ—se pi jamɛ a ní ɔmɛ kɛkɛ nɛ a peeɔ, mohu ɔ, a bua jɔɔ nihi nɛ a peeɔ jamɛ a ní ɔmɛ ɔ a he hulɔ.

2 Enɛ ɔ he ɔ, Oo adesa, ngɛ nɔ nɛ o ji ɔ tsuo se ɔ, ke o kojo ɔ, o be nya jemi ko; ejakaa ke o kojo nɔ kpa a, o bu mo nitsɛ o he fɔ, ejakaa mo nɛ o kojoɔ ɔ, o peeɔ jamɛ a ní ɔmɛ nɔuu. 2 Jehanɛ ɔ, wa le kaa kojomi nɛ Mawu kojoɔ kɛ siɔ nihi nɛ a peeɔ jamɛ a ní ɔmɛ ɔ kɛ anɔkuale ɔ kɔ.

3 Se Oo adesa, mo nɛ o kojoɔ nihi nɛ a peeɔ jamɛ a ní ɔmɛ, se kɛ̃ ɔ, mo hu o peeɔ jamɛ a ní ɔmɛ nɔuu ɔ, anɛ o susu kaa o ma nyɛ maa tu Mawu kojomi ɔ nya fo lo? 4 Aloo o ngɛ e mi mi himi babauu ɔ, kɛ e nɔ he tsui nami ɔ, kɛ e tsui si tomi ɔ he guɛ gbee, akɛnɛ o li kaa Mawu je e mi mi himi ɔ mi nɛ e ngɛ mɔde bɔe kaa e maa ye bua mo nɛ o tsake o tsui ɔ he je lo? 5 Se ngɛ o nɔ buimi kɛ o tsui nɛ o tsakee we ɔ he je ɔ, o ngɛ mi mi fumi nya buae kɛ ngɛ mo nitsɛ o he hae ngɛ mi mi fumi ligbi ɔ kɛ ligbi nɛ a ma je Mawu dami kojomi ɔ kpo ɔ nɔ. 6 Nɛ e maa wo nɔ fɛɛ nɔ hiɔ ngɛ e ní tsumi ɔmɛ a nya: 7 ni nɛmɛ nɛ a ngɛ hɛ mi nyami, kɛ bumi, kɛ nɔmlɔ tso nɛ puɛ we hlae kɛ gu si nɛ a fĩ ngɛ ní tsumi kpakpa mi ɔ nɔ ɔ, e ma ha mɛ neneene wami; 8 se ni nɛmɛ nɛ a suɔ pɛ nɛ a bui anɔkuale ɔ tue, se mohu a buɔ níhi nɛ dɛ tue ɔ lɛɛ, mi mi fumi kɛ abofu lɛ maa ba a nɔ. 9 Amanehlu kɛ he hiami maa ba nɔ fɛɛ nɔ* nɛ e tsuɔ awi yemi ní tsumihi ɔ nɔ, Yuda bi kekle, nɛ lɔ ɔ se ɔ, Hela bi hulɔ; 10 se hɛ mi nyami kɛ bumi kɛ tue mi jɔmi ha nɔ fɛɛ nɔ nɛ e tsuɔ ní tsumi kpakpahi ɔ, Yuda bi kekle, nɛ lɔ ɔ se ɔ, Hela bi hulɔ. 11 Ejakaa Mawu hlɛ nɔ mi.

12 Ejakaa nihi tsuo nɛ a be mlaa nɛ a pee yayami ɔ, a hɛ mi ma kpata nɛ́ a be mlaa; se nihi tsuo nɛ a pee yayami ngɛ mlaa sisi ɔ, a kɛ mlaa nɛ maa kojo mɛ. 13 Ejakaa pi nihi nɛ a nuɔ mlaa a ji dali ngɛ Mawu hɛ mi, mohu ɔ, nihi nɛ a yeɔ mlaa nɔ ɔ ji nihi nɛ a maa bu mɛ dali. 14 Ejakaa ke nihi nɛ a ngɛ je ma amɛ a mi nɛ a be mlaa a peeɔ níhi nɛ mlaa a tsɔɔ ngɛ a bɔ su nya a, e ngɛ mi kaa nimli nɛ ɔmɛ be mlaa mohu lɛɛ, se a ji mlaa kɛ ha mɛ nitsɛmɛ a he. 15 Mɛ nitsɛmɛ nɔuu nɛ a tsɔɔ kaa a ngma níhi nɛ ngɛ mlaa a mi ɔ ngɔ wo a tsui mi be mi nɛ a he nile piɛɛ a he kɛ ngɛ odase yee ɔ, nɛ mɛ nitsɛmɛ a susumihi poɔ a nya aloo e jeɔ a nya po. 16 Nɔ́ nɛ ɔ maa ba mi ngɛ ligbi ɔ nɛ Mawu maa gu Kristo Yesu nɔ kɛ kojo adesahi a laami mi níhi, ngɛ sane kpakpa a nɛ i jajeɔ ɔ nya.

17 Jehanɛ ɔ, ke a tsɛɔ mo Yuda no, nɛ o ngɔɔ o hɛ kɛ fɔɔ mlaa a nɔ, nɛ o fĩaa kɛ fɔɔ Mawu nɔ, 18 nɛ o le e suɔmi nya ní, nɛ o kplɛɛ níhi nɛ a hi saminya amɛ a nɔ akɛnɛ a kɛ Mlaa a tsɔse mo* ɔ he je, 19 nɛ o ngɛ nɔ mi mami kaa o ji blɔ tsɔɔlɔ kɛ ha hɛ yuyuili, la kɛ ha nihi nɛ a ngɛ diblii mi, 20 nihi nɛ a susuu we níhi a he a dlalɔ, jokuɛ tsɔwi a tsɔɔlɔ, nɛ o ngɛ nile ɔ kɛ Mlaa a mi anɔkuale ɔ he foni ɔ— 21 se mo nɛ o ngɛ nɔ kpa ní tsɔɔe ɔ, anɛ o tsɔɔ we mo nitsɛ o he ní lo? Mo nɛ o ngɛ fiɛɛe ke, “Koo ju” ɔ, anɛ o juɔ lo? 22 Mo nɛ o ngɛ dee ke, “Ko puɛ gba” a, anɛ o puɛɔ gba lo? Mo nɛ wɔhi a he peeɔ mo tai ɔ, anɛ o juɔ níhi ngɛ sɔlemi wehi a mi lo? 23 Mo nɛ o kɛ mlaa fĩaa a, anɛ o tɔ̃ɔ Mlaa a nɔ kɛ pueɔ Mawu hɛ mi si lo? 24 Ejakaa kaa bɔ nɛ a ngma a, “nyɛ he ɔ, a ngɛ musu bɔe kɛ ngɛ Mawu biɛ ɔ sie ngɛ je ma amɛ a kpɛti.”

25 Ngɛ anɔkuale mi ɔ, ja o yeɔ mlaa a nɔ loko nɔ pomi he ngɛ se nami; se ke o tɔ̃ɔ mlaa a nɔ ɔ, pomi nɛ a po mo ɔ ba plɛ pee mɔmlɔtɔ. 26 Se ke nɔ ko nɛ a pui lɛ ɔ yeɔ níhi nɛ da nɛ Mlaa a biɔ kaa a pee ɔ nɔ ɔ, e ngɛ mi kaa mɔmlɔtɔtsɛ ji lɛ mohu lɛɛ, se anɛ a be lɛ bue kaa nɔ ko nɛ a po lɛ lo? 27 Nɛ nɔ nɛ e ji mɔmlɔtɔtsɛ ngɛ he lo nya nɛ e yeɔ Mlaa a nɔ ɔ kojoɔ mo nɛ o tɔ̃ɔ Mlaa a nɔ ɔ, e ngɛ mi kaa mlaa a nɛ a ngma a ngɛ o dɛ, nɛ a po mo mohu. 28 Ejakaa pi Yuda no ji lɛ ngɛ kpo nɔ blɔ, nɛ jã kɛ̃ nɛ nɔ pomi ɔ hu pi ngɛ kpo nɔ blɔ, ngɛ he lo nya. 29 Mohu ɔ, Yuda no ji lɛ ngɛ mi mi blɔ, nɛ e pomi ɔ ji tsui mi nɔ́ kɛ gu mumi ɔ nɔ, se pi kɛ gu mlaa ko nɛ a ngma nɔ. Jamɛatsɛ ɔ yi jemi jeɔ Mawu ngɔ, se pi nimli a ngɔ.

3 Lɛɛ mɛni Yuda no kɛ pã ni kpahi, aloo mɛni se nami nɛ ngɛ nɔ pomi he? 2 A hiɛ wawɛɛ nitsɛ ngɛ blɔ fɛɛ blɔ nɔ. Kekleekle ɔ, a dɛ mi nɛ a tu Mawu sɛ gbi klɔuklɔu ɔ ngɔ wo. 3 Lɛɛ mɛni ji sane ɔ mɔ? Ke ni komɛ be hemi kɛ yemi ɔ, anɛ hemi kɛ yemi nɛ a be ɔ ma tsake anɔkuale nɛ Mawu yeɔ ɔ lo? 4 Ohoo! Mohu ɔ, ha nɛ a na Mawu kaa anɔkualetsɛ, ke a maa na adesa fɛɛ adesa kaa lakpatsɛ po, kaa bɔ nɛ a ngma ke: “Konɛ o tsɔɔ kaa o ji dalɔ ngɛ o munyuhi a mi, nɛ ke a kojo mo ɔ, o maa ye nguɔ.” 5 Se ke nɔ́ nɛ dɛ nɛ wa peeɔ ɔ haa nɛ Mawu dami ɔ jeɔ kpo ɔ, mɛni wa ma de? Ke Mawu je e mi mi fumi ɔ kpo ɔ, anɛ e yi dami sane lo? (I ngɛ munyu tue kaa bɔ nɛ adesahi tuɔ munyu ɔ.) 6 Dɛbi! Ejakaa ke jã a, lɛɛ mɛni blɔ nɔ Mawu maa gu kɛ kojo je ɔ?

7 Se ke ye lakpa a jeɔ Mawu anɔkuale ɔ kpo heii nɛ e woɔ e hɛ mi nyami ɔ, lɛɛ mɛni he je hu nɛ a ngɛ mi kojoe kaa yayami peelɔ mɔ? 8 Lɛɛ mɛni he je nɛ nyɛ de we kaa bɔ nɛ nyumu komɛ po lakpa ngɔ fɔ wa nɔ kaa wa de ɔ, “Nyɛ ha nɛ waa pee ní yayamihi konɛ ní kpakpahi nɛ ba”? Kojomi nɛ ngɛ kɛ ha jamɛ a nyumu ɔmɛ kɛ dami sane yemi kɔ.

9 Lɛɛ kɛ ji lɛ kɛɛ? Anɛ wa hi pe ni kpahi lo? Ohoo! Wa sɛ hlami nɛ wa de kaa Yuda bi kɛ Hela bi tsuo ngɛ yayami sisi; 10 kaa bɔ nɛ a ngma ke: “Dalɔ ko be, nɔ kake ngmelu po be; 11 nɔ ko be nɛ e kɔɔ nɔ́ se; nɔ ko be nɛ e hlaa Mawu se blɔ. 12 Adesahi tsuo tla blɔ, se nami ko be mɛ tsuo a he; a ti nɔ ko nɔ ko be nɛ e jeɔ mi mi jɔmi kpo, nɔ kake ngmelu po be.” 13 “A kuɛ si ji yɔkɔ nɛ a bli nya; a ngɔɔ a lilɛhi kɛ sisiɔ nihi.” “Sanga duɔ ngɛ a nya mi.” 14 “Nɛ gbiɛmi kɛ doomi hyi a nya mi tɔ.” 15 “A nanehi a he sɔɔ kɛ muɔ si puemi.” 16 “Hɛ mi kpatami kɛ haomi ngɛ a blɔhi a nɔ, 17 nɛ a li tue mi jɔmi blɔ ɔ.” 18 “Mawu gbeye yemi be a hɛ ngmɛ nɔ.”

19 Jehanɛ ɔ, wa le kaa níhi tsuo nɛ Mlaa a deɔ ɔ, nihi nɛ a ngɛ Mlaa a sisi ɔ nɛ e deɔ, konɛ nya fɛɛ nya nɛ pee kɔ̃, konɛ je ɔ tsuo nɛ pee nihi nɛ Mawu maa gbla a tue. 20 Enɛ ɔ he ɔ, nɔ ko nɔ ko* be nɛ a maa bu lɛ dalɔ ngɛ e hɛ mi kɛ gu mlaa nya ní tsumihi a nɔ, ejakaa kɛ gu mlaa a nɔ nɛ a leɔ yayami saminya.

21 Se amlɔ nɛ ɔ, a je mlaa a se, nɛ a je Mawu dami ɔ kpo kaa bɔ nɛ Mlaa a kɛ Gbali ɔmɛ ye he odase ɔ, 22 ee, Mawu dami ɔ nɛ́ a gu hemi kɛ yemi ngɛ Yesu Kristo mi ɔ nɔ kɛ ha nihi tsuo nɛ a ngɛ hemi kɛ yemi ɔ. Ejakaa slɔɔto ko be mi. 23 Ejakaa nihi tsuo pee yayami nɛ a sui Mawu hɛ mi nyami ɔ he, 24 nɛ e ji nike ní nɛ a ná faa kaa e bu mɛ dali kɛ gu e dloomi ɔ kɛ kpɔmi nɔ́ ɔ nɛ Kristo Yesu kɛ ha nɛ́ e kɛ kpɔ̃ mɛ ɔ nɔ. 25 Mawu ngɔ lɛ kɛ ha kaa kpatami afɔle* kɛ gu e muɔ ɔ mi hemi kɛ yemi ɔ nɔ. Mawu pee enɛ ɔ konɛ e kɛ je lɛ nitsɛ e dami ɔ kpo, ejakaa e ná nihi a he tsui nɛ e ngɔ yayamihi nɛ a pee blema a kɛ pa. 26 E pee enɛ ɔ konɛ e kɛ je lɛ nitsɛ e dami ɔ kpo ngɛ be nɛ wa ngɛ mi nɛ ɔ mi, konɛ ke e ngɛ nɔ nɛ e ná hemi kɛ yemi ngɛ Yesu mi ɔ bue dalɔ po ɔ, lɛ hu a bu lɛ dalɔ.

27 Ke jã a, lɛɛ jije fĩami ɔ ngɛ mɔ? Nɔ́ ko be nɛ wa maa da nɔ kɛ fĩa. Kɛ gu mɛni mlaa nɔ? Ní tsumihi a nɔ lo? Ohoo, mohu ɔ, kɛ gu hemi kɛ yemi mlaa a nɔ. 28 Ejakaa wa susu kaa a buɔ nɔ ko dalɔ kɛ guɔ hemi kɛ yemi nɔ, se pi mlaa nya ní tsumihi a nɔ. 29 Aloo anɛ e ji Yuda bi pɛ a Mawu lo? Anɛ pi nihi nɛ a ngɛ je ma amɛ a mi ɔ hu a Mawu ji lɛ lo? Ee, nihi nɛ a ngɛ je ma amɛ a mi ɔ hu a Mawu ji lɛ. 30 Akɛnɛ nɔ kake ji Mawu he je ɔ, e maa bu nihi nɛ a po mɛ ɔ dali kɛ gu hemi kɛ yemi nɔ, nɛ e maa bu mɔmlɔtɔtsɛmɛ ɔmɛ hu dali kɛ gu a hemi kɛ yemi ɔ nɔ. 31 Lɛɛ anɛ wa guɔ wa hemi kɛ yemi ɔ nɔ kɛ poɔ mlaa a mi lo? Ohoo! Mohu ɔ, wa fĩɔ mlaa a se.

4 Ke jã a, lɛɛ mɛni wa ma de kaa wa nɛnɛ Abraham ná ngɛ he lo nya? 2 Kaa nɔ hyɛmi nɔ́ ɔ, ke ní tsumihi a he je nɛ a bu Abraham dalɔ ɔ, jinɛ e ko ná nɔ́ ko nɛ e ko da nɔ kɛ ko fĩa, se pi ngɛ Mawu blɔ fa mi. 3 Se mɛni ngmami ɔ de? “Abraham ná hemi kɛ yemi ngɛ Yehowa* mi, nɛ a bu lɔ ɔ dami ha lɛ.” 4 Jehanɛ ɔ, nɔ nɛ e tsuɔ ní ɔ, a bui e hiɔwo ɔ kaa dloomi nɔ́ ko, mohu ɔ, kaa hiɔ nɛ a ye lɛ. 5 Se adesa nɛ e tsu we ní, se mohu e heɔ Nɔ nɛ e buɔ nɔ nɛ e yi Mawu gbeye ɔ dalɔ ɔ yeɔ ɔ, a buɔ e hemi kɛ yemi ɔ kaa dami. 6 Kaa bɔ nɛ David hu tuɔ bua jɔmi nɛ adesa nɛ Mawu buɔ lɛ dalɔ, se pi ngɛ ní tsumihi a he ɔ náa a he munyu ɔ: 7 “Nihi nɛ a ngɔ a mlaa nɔ tɔmi ní peepeehi kɛ pa mɛ nɛ́ a ha a yayamihi a nɔ ha mɛ* ɔ ngɛ bua jɔmi; 8 adesa nɛ Yehowa* be e yayami he akɔtaa bue ɔ ngɛ bua jɔmi.”

9 Lɛɛ anɛ nihi nɛ a po mɛ ɔ pɛ nɛ a náa bua jɔmi nɛ ɔ lo, aloo mɔmlɔtɔtsɛmɛ ɔmɛ hu piɛɛ he? Ejakaa wa deɔ ke: “A bu Abraham hemi kɛ yemi ɔ kaa dami kɛ ha lɛ.” 10 Lɛɛ ngɛ mɛni si fɔfɔɛ mi nɛ a bu lɔ ɔ dami ɔ? Benɛ a po lɛ ɔ, aloo benɛ a pui lɛ ɔ? Jamɛ a be ɔ mi ɔ, a pui lɛ lolo, mohu ɔ, e ji mɔmlɔtɔtsɛ. 11 Nɛ e nine su okadi ko nɔ—lɔ ɔ ji, nɔ pomi—kaa dalɔ nɛ e ji kɛ gu hemi kɛ yemi nɛ e ná a nɔ benɛ a pui lɛ ɔ he nya sɔumi nɔ́,* konɛ e ba pee tsɛ kɛ ha nihi tsuo nɛ a ngɛ hemi kɛ yemi benɛ a ji mɔmlɔtɔtsɛmɛ ɔ, bɔ nɛ pee nɛ a bu mɛ dali; 12 konɛ e nyɛ nɛ e pee tsɛ kɛ ha nina nɛ a po mɛ, pi kɛ ha nihi nɛ a fĩɔ nɔ pomi se ɔ pɛ, se mohu kɛ ha nihi hu nɛ a nyɛɛɔ wa tsɛ Abraham hemi kɛ yemi nɛ e ná benɛ e ji mɔmlɔtɔtsɛ ɔ nane mami he ɔmɛ a se pɛpɛɛpɛ ɔ.

13 Ejakaa pi mlaa nɔ nɛ a gu kɛ wo Abraham aloo e nina a* si kaa e sa nɛ e nine nɛ su je ko nɔ kaa gbosi ní, mohu ɔ, hemi kɛ yemi nɔ nɛ́ a da kɛ bu lɛ dalɔ ɔ he je. 14 Ejakaa ke nihi nɛ a fĩɔ mlaa se ji gbosi ní yeli ɔ, lɛɛ se nami ko be hemi kɛ yemi he mɔ, nɛ si womi ɔ hu peeɔ yaka. 15 Ngɛ anɔkuale mi ɔ, Mlaa a ngɔɔ mi mi fumi kɛ baa, se he nɛ mlaa be ɔ, mlaa nɔ tɔmi ko hu be lejɛ ɔ.

16 Enɛ ɔ he je nɛ kɛ gu hemi kɛ yemi nɔ ɔ nɛ, konɛ e nyɛ nɛ e pee ngɛ dloomi nya, bɔ nɛ pee nɛ si womi ɔ nɛ ba mi kɛ ha e nina a* tsuo, pi kɛ ha nihi nɛ a fĩɔ Mlaa a se ɔ pɛ kɛkɛ, se mohu kɛ ha nihi nɛ a fĩ Abraham, nɔ nɛ e ji wɔ tsuo wa tsɛ ɔ hemi kɛ yemi ɔ se ɔ. 17 (Kikɛ nɛ ɔ pɛpɛɛpɛ ji bɔ nɛ a ngma a nɛ: “I ngɔ mo kɛ pee tsɛ kɛ ha je mahi fuu.”) Enɛ ɔ ba ngɛ Mawu, nɔ nɛ e ná hemi kɛ yemi ngɛ e mi ɔ hɛ mi, nɔ nɛ e haa nɛ ni gbogboehi baa wami mi, nɛ e tsɛɔ níhi nɛ a be ɔ kaa níhi nɛ a ngɛ ɔ.* 18 E ngɛ mi kaa hɛ kɛ nɔ fɔmi ko be mohu lɛɛ, se kɛ̃ ɔ, ngɛ hɛ kɛ nɔ fɔmi nɛ e ngɛ ɔ he je ɔ, e ná hemi kɛ yemi kaa e ma ba pee tsɛ kɛ ha je mahi fuu ngɛ nɔ́ nɛ a de ɔ nya: “Jã nɛ o nina* maa pee.” 19 Nɛ e ngɛ mi kaa e hemi kɛ yemi ɔ mi gbɔjɔɔ we mohu lɛɛ, se jamɛ a be ɔ mi ɔ, e bu lɛ nitsɛ e nɔmlɔ tso ɔ kaa nɔ́ ko nɛ e gbo (akɛnɛ e ye jeha 100 he je), nɛ jã kɛ̃ nɛ e bu Sara fɔmi kotoku ɔ hu kaa nɔ́ gbogboe.* 20 Se ngɛ Mawu si womi ɔ nya a, e hemi kɛ yemi ɔ mimiɛɛ we; mohu ɔ, e hemi kɛ yemi ɔ ha nɛ e ná he wami, nɛ e wo Mawu hɛ mi nyami 21 nɛ e ná nɔ mi mami nɛ mi wa kaa nɔ́ nɛ Mawu wo he si ɔ, Mawu ma nyɛ maa pee hulɔ. 22 Enɛ ɔ he ɔ, “a bu lɔ ɔ dami kɛ ha lɛ.”

23 Se munyu nɛ ji, ‘a bu lɔ ɔ kɛ ha lɛ’ ɔ, pi e he pɛ nɛ a ngma ngɛ, 24 mohu ɔ, a ngma ngɛ wɔ hu wa he, wɔ nihi nɛ wɔ hu a maa bu lɔ ɔ kɛ ha wɔ, akɛnɛ wa heɔ Mawu, nɔ nɛ e tle Yesu nɛ ji wa Nyɔmtsɛ ɔ si kɛ je gbeje ɔ yeɔ ɔ he je. 25 A ngɔ lɛ kɛ ha ngɛ wa yayami ɔmɛ a he, nɛ a tle lɛ si ngɛ dali nɛ a maa bu wɔ ɔ he je.

5 Lɔ ɔ he ɔ, amlɔ nɛ ɔ nɛ a gu hemi kɛ yemi nɔ kɛ bu wɔ dali ɔ, nyɛ ha nɛ waa kɛ Mawu nɛ hi si ngɛ tue mi jɔmi mi* kɛ gu wa Nyɔmtsɛ Yesu Kristo nɔ, 2 nɔ nɛ kɛ gu e nɔ ɔ, wɔ hu wa ná he blɔ kɛ gu hemi kɛ yemi nɔ kɛ sɛ dloomi nɛ ɔ nɛ lɔ ɔ mi nɛ amlɔ nɛ ɔ wa daa si ngɛ ɔ mi; nɛ nyɛ ha nɛ wa nya* ngɛ Mawu hɛ mi nyami ɔ he hɛ kɛ nɔ fɔmi ɔ he je. 3 Pi lɔ ɔ pɛ kɛkɛ, se mohu nyɛ ha nɛ wa nya* be mi nɛ wa ngɛ amanehluhi a mi, ejakaa wa le kaa amanehlu ngɔɔ si fimi kɛ baa; 4 si fimi hu ngɔɔ si himi nɛ a kplɛɛ nɔ kɛ baa; si himi nɛ a kplɛɛ nɔ ɔ hu ngɔɔ hɛ kɛ nɔ fɔmi kɛ baa, 5 nɛ hɛ kɛ nɔ fɔmi ha we nɛ nɔ nine nyɛɔ si; ejakaa a plɛ Mawu suɔmi ɔ ngɔ wo wa tsui mi kɛ gu mumi klɔuklɔu ɔ nɛ a kɛ ha wɔ ɔ nɔ.

6 Ejakaa ngɛ anɔkuale mi ɔ, be mi nɛ loloolo ɔ wa gbɔjɔ ɔ, Kristo gbo ngɛ be nɛ a to ɔ nya kɛ ha nihi nɛ a yi Mawu gbeye ɔ. 7 Ejakaa e he maa wa wawɛɛ kaa nɔ ko ma gbo kɛ ha dalɔ; e ngɛ mi kaa eko ɔ, nɔ ko ma si e gugue kaa e ma gbo kɛ ha nɔmlɔ kpakpa mohu. 8 Se Mawu je lɛ nitsɛ e suɔmi ɔ kpo kɛ tsɔɔ wɔ, kaa be mi nɛ loloolo ɔ wa ji yayami peeli ɔ, Kristo gbo kɛ ha wɔ. 9 Lɛɛ nɔ́ nɛ pe enɛ ɔ, akɛnɛ amlɔ nɛ ɔ a gu e muɔ ɔ nɔ kɛ bu wɔ dali he je ɔ, a maa gu e nɔ kɛ he wa yi wami kɛ je mi mi fumi mi. 10 Ejakaa ke be mi nɛ wa ji he nyɛli ɔ, a gu Mawu Bi ɔ gbenɔ ɔ nɔ kɛ dla waa kɛ Mawu wa kpɛti ɔ, lɛɛ amlɔ nɛ ɔ nɛ a dla waa kɛ lɛ wa kpɛti ɔ, a maa gu e wami ɔ nɔ kɛ he wa yi wami hluu tsɔ. 11 Pi lɔ ɔ pɛ kɛkɛ, se mohu wa gu wa Nyɔmtsɛ Yesu Kristo nɔ kɛ ngɛ nyae ngɛ Mawu mi hulɔ, nɔ nɛ kɛ gu e nɔ ɔ, amlɔ nɛ ɔ a dla waa kɛ Mawu wa kpɛti ɔ.

12 Enɛ ɔ he je nɛ kaa bɔ nɛ kɛ gu adesa kake nɔ ɔ, yayami ba je ɔ mi, nɛ gbenɔ gu yayami nɔ kɛ ba, nɛ lɔ ɔ he ɔ, gbenɔ sã adesahi tsuo, ejakaa mɛ tsuo a pee yayami—. 13 Ejakaa yayami ngɛ je ɔ mi loko Mlaa a ba, se ke mlaa be ɔ, a bui nɔ ko kaa e pee yayami. 14 Se kɛ̃ ɔ, gbenɔ ye matsɛ kɛ je Adam nɔ kɛ ba su Mose nɔ, nɛ e ye nihi nɛ a tɔ̃ we mlaa nɔ kaa bɔ nɛ Adam, nɔ nɛ e je nɔ nɛ e maa ba a tɔ̃ mlaa nɔ ɔ po a nɔ.

15 Se nike ní ɔ be kaa tɔmi ɔ. Ejakaa ke ji kaa kɛ gu adesa kake tɔmi nɔ ɔ, nihi babauu gbo ɔ, lɛɛ Mawu dloomi ɔ kɛ e nike ní nɛ e kɛ ha faa kɛ gu nɔmlɔ kake nɛ ji Yesu Kristo dloomi ɔ nɔ ɔ maa hiɛ kɛ be nɔ* hluu tsɔ kɛ ha nihi babauu! 16 Jehanɛ se hu ɔ, e slo níhi nɛ je nike ní nɛ a kɛ haa faa a mi kɛ ba a ngɛ níhi nɛ je yayami nɛ adesa kake pee ɔ mi kɛ ba a he. Ejakaa nɔ́ nɛ je tɔmi kake ɔ he kojomi ɔ mi kɛ ba ji fɔ bumi, se nike ní nɛ ba ngɛ tɔmihi babauu a se ɔ ji bumi nɛ a bu nihi dali. 17 Ejakaa ke ji kaa kɛ gu adesa kake ɔ tɔmi ɔ nɔ ɔ, gbenɔ gu jamɛ a nɔ ɔ nɔ kɛ ye matsɛ ɔ, lɛɛ nihi nɛ a ná dloomi babauu kɛ dami nike ní nɛ a kɛ haa faa a maa ye nɔ kaa matsɛmɛ ngɛ wami mi kɛ gu nɔ kake ɔ, nɛ ji Yesu Kristo nɔ hluu tsɔ!

18 Lɔ ɔ he ɔ, jehanɛ ɔ, kaa bɔ nɛ kɛ gu tɔmi kake nɔ nɛ a bu adesa slɔɔtohi tsuo fɔ ɔ, jã kɛ̃ nɛ kɛ gu dami ní peemi kake nɔ ɔ, a ngɛ adesa slɔɔtohi tsuo dali bue kɛ ha wami. 19 Ejakaa kaa bɔ nɛ kɛ gu adesa kake ɔ tue gbomi ɔ nɔ nɛ nihi babauu ba plɛ yayami peeli ɔ, jã nɔuu kɛ̃ nɛ kɛ gu nɔ kake ɔ tue bumi ɔ nɔ ɔ, nihi babauu ma ba plɛ dali. 20 Jehanɛ ɔ, Mlaa a ba konɛ tɔmi nɛ hiɛ. Se he nɛ yayami hiɛ babauu ngɛ ɔ, dloomi hiɛ kɛ be nɔ babauu ngɛ lejɛ ɔ. 21 Mɛni he je? Konɛ kaa bɔ nɛ yayami kɛ gbenɔ ye matsɛ ɔ, jã kɛ̃ nɛ dloomi hu maa ye matsɛ kɛ gu dami nɔ kɛ ya neneene wami mi, kɛ gu Yesu Kristo, wa Nyɔmtsɛ ɔ nɔ.

6 Lɛɛ mɛni wa ma de mɔ? Anɛ e sa nɛ waa ya nɔ nɛ waa hi yayami mi konɛ dloomi nɛ hiɛ babauu lo? 2 Ohoo! Akɛnɛ wa na kaa wa gbo ngɛ yayami blɔ fa mi he je ɔ, mɛni he je nɛ wa maa ya nɔ maa hi mi mɔ? 3 Aloo anɛ nyɛ li kaa wɔ tsuo nɛ́ a baptisi wɔ kɛ wo Kristo Yesu mi ɔ, a baptisi wɔ kɛ wo e gbenɔ ɔ mi lo? 4 Enɛ ɔ he ɔ, a pu wɔ kɛ piɛɛ e he kɛ gu baptisimi nɛ a baptisi wɔ kɛ wo e gbenɔ ɔ mi ɔ nɔ, konɛ kaa bɔ nɛ a tle Kristo si kɛ je gbeje kɛ gu Tsɛ ɔ hɛ mi nyami ɔ nɔ ɔ, wɔ hu e sa nɛ waa nyɛɛ ngɛ wami ehe mi. 5 Ke waa kɛ lɛ pee kake ngɛ gbenɔ nɛ ngɛ kaa e nɔ́ ɔ mi ɔ, lɛɛ bɔ fɛɛ bɔ nɛ ji ɔ, waa kɛ lɛ maa pee kake ngɛ si nɛ́ a tle lɛ kɛ je gbeje ɔ hu mi. 6 Ejakaa wa le kaa a ka wa su momo ɔ kɛ wo tso he kɛ piɛɛ e he, konɛ a ha nɛ wa yayami nɔmlɔ tso ɔ nɛ ko ná he wami hu, bɔ nɛ pee nɛ wa ko ya nɔ nɛ waa pee yayami nyɔguɛhi hu. 7 Ejakaa nɔ nɛ e gbo ɔ, a ha nɛ e ye e he ngɛ e yayami he.*

8 Jehanɛ se hu ɔ, ke waa kɛ Kristo gbo ɔ, wa he ye kaa waa kɛ lɛ maa hi wami mi hulɔ. 9 Ejakaa wa le kaa amlɔ nɛ ɔ nɛ a tle Kristo si kɛ je gbeje ɔ, e be gboe hu gblegbleegble; gbenɔ yi e nɔ nyɔmtsɛ hu. 10 Ejakaa gbomi nɛ e gbo ɔ, e gbo ngɛ yayami blɔ fa mi* si kake nyɔngloo, se wami mi nɛ e ngɛ ɔ, e ngɛ wami mi ngɛ Mawu blɔ fa mi. 11 Jã kɛ̃ nɛ nyɛ hu e sa nɛ nyɛɛ bu nyɛ he kaa nihi nɛ a gbo ngɛ yayami blɔ fa mi, se a ngɛ wami mi kɛ ha Mawu kɛ gu Kristo Yesu nɔ.

12 Enɛ ɔ he ɔ, nyɛ ko ha nɛ yayami nɛ ya nɔ nɛ e ye matsɛ ngɛ nyɛ nɔmlɔ tsohi nɛ a gboɔ ɔ nɔ konɛ nyɛ ko bu a we akɔnɔ ɔmɛ tue. 13 Jã kɛ̃ nɛ nyɛ ko ya nɔ nɛ nyɛɛ ngɔ nyɛ nɔmlɔ tso* ɔmɛ kɛ ha yayami kaa nɔ́ nɛ dɛ he ta hwumi níhi, mohu ɔ, nyɛɛ ngɔ nyɛ he kɛ ha Mawu kaa nihi nɛ a je gbeje kɛ ba wami mi, nɛ nyɛɛ ngɔ nyɛ nɔmlɔ tso* ɔmɛ hu kɛ ha Mawu kaa dami he ta hwumi níhi. 14 Ejakaa e sɛ nɛ yayami nɛ pee nyɔmtsɛ ngɛ nyɛ nɔ, akɛnɛ nyɛ na kaa nyɛ be mlaa sisi se mohu nyɛ ngɛ dloomi sisi ɔ he je.

15 Mɛni nyɛɛ se? Anɛ e sa kaa waa pee yayami akɛnɛ wa be mlaa sisi, se mohu wa ngɛ dloomi sisi ɔ he je lo? Ohoo! 16 Anɛ nyɛ li kaa ke nyɛ ngɔ nyɛ he kɛ ha nɔ ko kaa nyɔguɛhi nɛ a buɔ tue ɔ, yayami nɛ kɛ nɔ yaa gbenɔ mi jio, tue bumi nɛ kɛ nɔ yaa dami mi jio, nyɛ ji nɔ nɛ nyɛ buɔ lɛ tue ɔ e nyɔguɛhi lo? 17 Se sina ha Mawu kaa e ngɛ mi kaa be ko nɛ be ɔ, nyɛ ji yayami nyɔguɛhi mohu lɛɛ, se nyɛ je nyɛ tsui mi nɛ nyɛ bu jamɛ a tsɔɔmi henɔ ɔ nɛ a ngɔ kɛ ha nyɛ ɔ tue. 18 Ee, akɛnɛ a ha nɛ nyɛ ye nyɛ he kɛ je yayami he he je ɔ, nyɛ ba pee dami nyɔguɛhi. 19 Akɛnɛ nyɛ he lo ɔ gbɔjɔ he je ɔ, i ngɛ munyu tue kaa bɔ nɛ adesahi tuɔ munyu ɔ; ejakaa kaa bɔ nɛ nyɛ ngɔ nyɛ he ní ɔmɛ kɛ pee nyɔguɛhi kɛ ha mu níhi kɛ mlaa nɔ nɛ a yi nɛ kɛ nɔ yaa mlaa nɔ nɛ a yi ɔ mi ɔ, amlɔ nɛ ɔ lɛɛ, nyɛɛ ngɔ nyɛ he ní ɔmɛ kɛ pee nyɔguɛhi kɛ ha dami nɛ kɛ nɔ yaa klɔuklɔu peemi mi. 20 Ejakaa benɛ nyɛ ji yayami nyɔguɛhi ɔ, nyɛ ye nyɛ he ngɛ dami he.

21 Lɛɛ mɛni ji yiblii nɛ nyɛ woɔ ngɛ jamɛ a be ɔ mi? Níhi nɛ amlɔ nɛ ɔ, zo peeɔ nyɛ ngɛ a he ɔ. Ejakaa jamɛ a ní ɔmɛ a nyagbe ji gbenɔ. 22 Se amlɔ nɛ ɔ nɛ a ha nɛ nyɛ ye nyɛ he kɛ je yayami he nɛ nyɛ ba pee Mawu nyɔguɛhi ɔ, nyɛ ngɛ nyɛ yiblii ɔ woe ngɛ klɔuklɔu peemi blɔ fa mi, nɛ e nyagbe ji neneene wami. 23 Ejakaa hiɔ nɛ yayami woɔ ji gbenɔ, se nike ní nɛ Mawu kɛ haa ji neneene wami kɛ gu Kristo Yesu, wa Nyɔmtsɛ ɔ nɔ.

7 Nyɛmimɛ, anɛ e ma nyɛ maa ba kaa nyɛ li kaa (ejakaa i kɛ nihi nɛ a le mlaa nɛ ngɛ munyu tue) Mlaa a ji nɔmlɔ adesa nyɔmtsɛ be abɔ nɛ e ngɛ wami mi ɔ lo? 2 Kaa nɔ hyɛmi nɔ́ ɔ, mlaa fĩɔ yogbayo kɛ mɛtɛɔ e huno he be abɔ nɛ e huno ɔ ngɛ wami mi; se ke e huno ɔ gbo ɔ, e yeɔ e he ngɛ e huno ɔ mlaa a he. 3 Enɛ ɔ he ɔ, ke e ya pee nyumu kpa yo be mi nɛ e huno ɔ ngɛ je mi ɔ, lɛɛ a ma tsɛ lɛ ke gba puɛlɔ. Se ke e huno ɔ gbo ɔ, e ye e he ngɛ e huno ɔ mlaa a he, lɔ ɔ he ɔ, ke e ya pee nyumu kpa yo ɔ, pi gba puɛlɔ ji lɛ.

4 Lɔ ɔ he ɔ ye nyɛmimɛ, nyɛ hu a ha nɛ nyɛ gbo kɛ ha Mlaa a kɛ gu Kristo nɔmlɔ tso ɔ nɔ konɛ nyɛ ba pee nɔ kpa, nɔ nɛ a tle lɛ si kɛ je gbeje ɔ níhi, konɛ waa wo yiblii kɛ ha Mawu. 5 Ejakaa benɛ wa hi si ngɛ he lo ɔ nya a, yayami akɔnɔhi nɛ Mlaa a tle si ɔ tsu ní ngɛ wa nɔmlɔ tso* ɔmɛ a mi konɛ e wo yiblii kɛ ha gbenɔ. 6 Se amlɔ nɛ ɔ, a ha nɛ wa ye wa he kɛ je Mlaa a he, ejakaa wa gbo kɛ ha nɔ́ nɛ e tsi wa nya a konɛ waa pee nyɔguɛhi ngɛ sisi numi ehe nya kɛ gu mumi ɔ nɔ, se pi ngɛ sisi numi momo ɔ nya kɛ gu mlaa a nɛ a ngma a nɔ.

7 Lɛɛ mɛni wa ma de? Anɛ Mlaa a ji yayami lo? Ohoo! Ngɛ anɔkuale mi ɔ, kaa tsa pi Mlaa a he ɔ, jinɛ i ko ba li yayami. Kaa nɔ hyɛmi nɔ́ ɔ, ke pi nɛ Mlaa a de ke: “E sɛ nɛ o hɛ nɛ kɔ̃” ɔ, jinɛ i ko li nɔ́ nɛ ji hɛkɔ. 8 Se yayami ngɔ he blɔ nɛ kita a ha lɛ ɔ kɛ tsu hɛkɔ ní tsumi slɔɔtohi tsuo ngɛ ye mi, ejakaa ke mlaa be ɔ, yayami gbo. 9 Ngɛ anɔkuale mi ɔ, be ko ɔ, i ngɛ wami mi nɛ i be mlaa. Se benɛ kita a ba a, yayami ba wami mi ekohu, se imi lɛɛ i gbo. 10 Nɛ kita a nɛ jinɛ e ko ngɔ nɔ kɛ ya wami mi ɔ, imi lɛɛ i na kaa e kɛ nɔ ya gbenɔ mi mohu. 11 Ejakaa yayami ngɔ he blɔ nɛ kita a ha lɛ ɔ kɛ sisi mi, nɛ e gu nɔ kɛ gbe mi. 12 Enɛ ɔ he ɔ, Mlaa a nitsɛ ngɛ klɔuklɔu, nɛ kita a hu ngɛ klɔuklɔu, nɛ e da, nɛ e ji nɔ́ kpakpa.

13 Enɛ ɔ he ɔ, anɛ nɔ́ kpakpa a gbe mi lo? Ohoo! Se yayami pee jã, konɛ lɔ ɔ nɛ tsɔɔ kaa yayami gu nɔ́ kpakpa nɔ kɛ ngɛ mi gbee, bɔ nɛ pee nɛ kɛ gu kita a nɔ ɔ, yayami nɛ je kpo heii kaa nɔ́ ko nɛ e hí kulaa. 14 Ejakaa wa le kaa Mlaa a, mumi mi nɔ́, se imi lɛɛ he lo mi nɔmlɔ ji mi, nɛ a jua mi ngɔ wo yayami sisi. 15 Ejakaa i nui nɔ́ nɛ i ngɛ pee ɔ sisi. Ejakaa níhi nɛ i suɔ ɔ, pi lɔ ɔmɛ nɛ i peeɔ, mohu ɔ, i peeɔ níhi nɛ i hiɔ. 16 Se ke níhi nɛ i sume lɛ i peeɔ ɔ, lɛɛ i kplɛɛ nɔ kaa Mlaa a hi. 17 Se amlɔ nɛ ɔ, pi imi ji nɔ nɛ e ngɛ pee hu, mohu ɔ, yayami ɔ nɛ ngɛ ye mi ɔ. 18 Ejakaa i le kaa ngɛ ye mi, nɛ ji ye he lo ɔ mi ɔ, nɔ́ kpakpa ko be; ejakaa i suɔ wawɛɛ kaa ma pee nɔ́ nɛ hi, se i be nyɛmi nɛ ma kɛ pee. 19 Ejakaa kpakpa nɛ i suɔ ɔ, i pee we, se yayami nɛ i sume ɔ, lɔ ɔ mohu nɛ i peeɔ. 20 Ke pi nɔ́ nɛ i suɔ ɔ nɛ i peeɔ ɔ, lɛɛ pi imi ji nɔ nɛ e ngɛ pee hu mɔ, se mohu yayami ɔ nɛ ngɛ ye mi ɔ.

21 Lɛɛ i naa mlaa nɛ ɔ ngɛ ye blɔ fa mi: Ke i suɔ kaa ma pee nɔ́ nɛ da a, nɔ́ yayami mohu lɛ e baa ye hɛ mi. 22 Ngɛ nɔmlɔ nɛ i ji ngɛ ye mi ɔ blɔ fa mi ɔ, ye bua jɔɔ Mawu mlaa a he wawɛɛ nitsɛ, 23 se i naa mlaa kpa ko ngɛ ye nɔmlɔ tso ɔ* mi nɛ e ngɛ hwue kɛ ngɛ ye juɛmi mlaa a sie, nɛ e ngɛ mi nyɔguɛ ngɔe kɛ ngɛ yayami mlaa nɛ ngɛ ye nɔmlɔ tso ɔ* mi ɔ hae. 24 I ji nɔmlɔ nɛ e ní ngɛ mɔbɔ! Mɛnɔ ma kpɔ̃ mi kɛ je nɔmlɔ tso nɛ e kɛ mi ngɛ gbenɔ nɛ ɔ mi woe ɔ dɛ mi? 25 Sina ha Mawu kɛ gu Yesu Kristo wa Nyɔmtsɛ ɔ nɔ! Enɛ ɔ he ɔ, imi nitsɛ i ngɔ ye juɛmi ɔ kɛ pee nyɔguɛ kɛ ha Mawu mlaa a, se ye he lo ɔ lɛɛ, kɛ ha yayami mlaa a.

8 Lɔ ɔ he ɔ, fɔ bumi ko be kɛ ha nihi nɛ a kɛ Kristo Yesu pee kake ɔ. 2 Ejakaa mumi ɔ mlaa a nɛ e haa wami nɛ e kɛ Kristo Yesu pee kake ɔ ha nɛ nyɛ ye nyɛ he kɛ je yayami kɛ gbenɔ mlaa a he. 3 Nɔ́ nɛ Mlaa a nyɛ we nɛ e pee ngɛ gbɔjɔmi nɛ he lo ɔ ha nɛ e gbɔjɔ ɔ he ɔ, Mawu pee kɛ gu lɛ nitsɛ e Bi ɔ nɛ e tsɔ kɛ ba kaa bɔ nɛ yayami he lo ngɛ ɔ, kɛ jehanɛ se hu, ngɛ yayami he je, nɛ e ngɛ yayami fɔ bue ngɛ he lo ɔ mi, 4 konɛ dami níhi nɛ Mlaa a biɔ ɔ nɛ e ba mi ngɛ wa mi, wɔ nihi nɛ wa nyɛɛɔ ngɛ mumi ɔ nya, se pi ngɛ he lo ɔ nya a. 5 Ejakaa nihi nɛ a hiɔ si ngɛ he lo ɔ nya a ngɔɔ a juɛmi kɛ maa he lo ɔ níhi a nɔ, se nihi nɛ a hiɔ si ngɛ mumi ɔ nya a lɛɛ a ngɔɔ a juɛmi kɛ maa mumi ɔ níhi a nɔ. 6 Ejakaa juɛmi nɛ a kɛ maa he lo ɔ nɔ ɔ peeɔ gbenɔ, se juɛmi nɛ a kɛ maa mumi ɔ nɔ ɔ peeɔ wami kɛ tue mi jɔmi; 7 ejakaa juɛmi nɛ a kɛ maa he lo ɔ nɔ ɔ peeɔ nɔ Mawu he nyɛlɔ, ejakaa e ngɔɛ e he kɛ wui Mawu mlaa a sisi, nɛ ngɛ anɔkuale mi hu ɔ, e be nyɛe maa pee jã. 8 Enɛ ɔ he ɔ, nihi nɛ a peeɔ he lo ɔ nya ní ɔ be nyɛe maa sa Mawu hɛ mi.

9 Se ke Mawu mumi ɔ ngɛ nyɛ mi niinɛ ɔ, lɛɛ pi he lo ɔ nya ní nɛ nyɛ peeɔ, mohu ɔ, mumi ɔ nya ní. Se ke nɔ ko be Kristo mumi ɔ, pi Kristo nɔ ji jamɛ a nɔ ɔ. 10 Se ke Kristo kɛ nyɛ pee kake ɔ, lɛɛ nɔmlɔ tso ɔ gbo ngɛ yayami he je, se mumi ɔ ji wami ngɛ dami he je. 11 Ke amlɔ nɛ ɔ, nɔ nɛ e tle Yesu si kɛ je gbeje ɔ mumi ɔ ngɛ nyɛ mi ɔ, nɔ nɛ e tle Kristo Yesu si kɛ je gbeje ɔ ma ha nɛ wami maa ba nyɛ hu nyɛ nɔmlɔ tso nɛ gboɔ ɔ mi kɛ gu e mumi ɔ nɛ ngɛ nyɛ mi ɔ nɔ.

12 Enɛ ɔ he ɔ, jehanɛ ɔ, nyɛmimɛ, a ha wɔ blɔ nya ní tsumi ko, se pi he lo ɔ nɛ ha wɔ nɛ́ wa maa hi si ngɛ he lo ɔ nya; 13 ejakaa ke nyɛ hi si ngɛ he lo ɔ nya a, bɔ fɛɛ bɔ nɛ ji ɔ, nyɛ ma gbo; se ke nyɛ ngɔ mumi ɔ kɛ gbe he lo ɔ ní tsumi ɔmɛ ɔ, nyɛ maa hi wami mi. 14 Ejakaa nihi tsuo nɛ Mawu mumi ɔ nyɛɛɔ a hɛ mi ɔ ji Mawu bimɛ niinɛ. 15 Ejakaa pi nyɔguɛ mumi nɛ nyɛ ná nɛ nyɛ maa hi gbeye yee ekohu, mohu ɔ, nyɛ ná bi ngɔmi mumi kaa binyumuhi, nɛ kɛ gu mumi nɛ ɔ nɔ ɔ, wa kpaa ngmlaa ke: “Abba,* Tsaatsɛ!” 16 Mumi ɔ nitsɛ yeɔ odase kɛ piɛɛɔ wa mumi ɔ he kaa wa ji Mawu bimɛ. 17 Jehanɛ ɔ, ke wa ji bimɛ ɔ, lɛɛ wa ji gbosi ní yeli hulɔ—niinɛ, Mawu we gbosi ní yeli, se Kristo he piɛɛli gbosi ní yeli—ke ji kaa waa kɛ lɛ pee kake kɛ na nɔ́ konɛ a wo waa kɛ lɛ wa hɛ mi nyami kɛ bla.

18 Ejakaa ke i ngɔ amanehluhi nɛ wa naa ngɛ be nɛ ɔ mi ɔ kɛ to hɛ mi nyami nɛ a ma je kpo ngɛ wa mi ɔ he ɔ, i buɔ amanehlu ɔmɛ kaa a sui nɔ́ ko kulaa. 19 Ejakaa adebɔ ní ɔmɛ ngɛ mlɛe nɛ a ngɛ Mawu binyumu ɔmɛ a kpo jemi ɔ blɔ hyɛe wawɛɛ nitsɛ. 20 Ejakaa a ngɔ adebɔ ní ɔmɛ kɛ wo yaka níhi a sisi, pi ngɛ mɛ nitsɛmɛ a suɔmi nya, se ngɛ nɔ nɛ e ngɔ mɛ kɛ wo sisi ɔ suɔmi nya, ngɛ hɛ kɛ nɔ fɔmi he je, 21 konɛ a ha nɛ adebɔ ní ɔmɛ nitsɛmɛ hu nɛ a ye a he kɛ je puɛmi nyɔguɛ yemi ɔ mi, nɛ́ a ná Mawu bimɛ ɔmɛ a hɛ mi nyami he yemi ɔ. 22 Ejakaa wa le kaa adebɔ ní ɔmɛ tsuo bla kɛ ngɛ kɛmɛe, nɛ a bla kɛ ngɛ piie kɛ ba si amlɔ nɛ ɔ. 23 Pi lɔ ɔ pɛ kɛkɛ, se wɔ nitsɛmɛ hu nɛ wa ngɛ kekle yiblii ɔmɛ, nɛ ji mumi ɔ, ee, wɔ nitsɛmɛ wa kɛmɛɔ ngɛ wa mi be mi nɛ waa kɛ hɛdɔ ngɛ bi ngɔmi kaa binyumuhi ɔ mlɛe ɔ, nɛ ji kpɔmi nɔ́ nɛ a kɛ ma je wɔ kɛ je wa nɔmlɔ tso ɔ mi ɔ. 24 Ejakaa a he wa yi wami ngɛ hɛ kɛ nɔ fɔmi nɛ ɔ mi; se hɛ kɛ nɔ fɔmi nɛ a naa a, pi hɛ kɛ nɔ fɔmi, ejakaa ke adesa ko naa nɔ́ ko ɔ, anɛ e pa hyɛɔ jamɛ a nɔ́ ɔ blɔ lo? 25 Se ke waa kɛ wa hɛ fɔ nɔ́ ko nɛ wa nɛ nɔ ɔ, wa yaa nɔ nɛ waa kɛ si fimi mlɛɔ jamɛ a nɔ́ ɔ wawɛɛ.

26 Jã kɛ̃ nɛ mumi ɔ hu yeɔ bua wɔ ngɛ wa gbɔjɔmi ɔmɛ a mi; ejakaa nyagba a ji kaa wa li nɔ́ nɛ e sa kaa waa sɔle kɛ bi kaa bɔ nɛ e he hia kaa waa pee ɔ, se mumi ɔ nitsɛ kpaa pɛɛ kɛ haa wɔ kɛ kɛmɛmihi nɛ ji kpo.* 27 Se nɔ nɛ e hlaa tsuihi a mi ɔ nu mumi ɔ sisi, ejakaa e ngɛ pɛɛ kpae ha ni klɔuklɔu ɔmɛ kaa bɔ nɛ Mawu suɔ ɔ.

28 Wa le kaa Mawu haa nɛ e ní tsumi ɔmɛ tsuo peeɔ kake konɛ e hi kɛ ha nihi nɛ a suɔ Mawu ɔ, nihi nɛ mɛ ji nihi nɛ a tsɛ ngɛ e yi mi tomi ɔ nya a; 29 ejakaa nihi nɛ e ngɔ e juɛmi kɛ ya a nɔ kekleekle ɔ, e hla mɛ ngɔ to hulɔ konɛ e ha nɛ a su nɛ́ hi kaa e Bi ɔ nɔ́ ɔ, bɔ nɛ pee nɛ e pee kekleekle bi ngɛ nyɛmimɛ fuu a kpɛti. 30 Jehanɛ se hu ɔ, nihi nɛ e hla mɛ ngɔ to ɔ, mɛ nɔuu ji nihi nɛ e tsɛ hulɔ; nɛ nihi nɛ e tsɛ mɛ ɔ, mɛ nɔuu ji nihi nɛ e bu mɛ dali hulɔ. Nyagbenyagbe ɔ, nihi nɛ e bu mɛ dali ɔ, mɛ nɔuu ji nihi nɛ e wo a hɛ mi nyami hulɔ.

31 Lɛɛ mɛni wa ma de ngɛ ní nɛ ɔmɛ a he mɔ? Ke Mawu ngɛ kɛ ha wɔ ɔ, lɛɛ mɛnɔ maa te si kɛ wo wɔ? 32 Akɛnɛ e nɛ lɛ nitsɛ e Bi ɔ po mɔbɔ, se e ngɔ lɛ kɛ ha ngɛ wɔ tsuo wa he he je ɔ, lɛɛ anɛ e be mi mi jɔmi mi jee konɛ e ngɔ ní kpahi tsuo kɛ piɛɛ e Bi ɔ he kɛ ha wɔ lo? 33 Mɛnɔ maa po nihi nɛ Mawu hla amɛ a nya? Mawu ji Nɔ nɛ e buɔ mɛ dali. 34 Mɛnɔ maa bu mɛ fɔ? Kristo Yesu ji nɔ nɛ e gbo, ee, pi lɔ ɔ pɛ kɛkɛ, lɛ ji nɔ nɛ a tle lɛ si, nɔ nɛ e ngɛ Mawu hiɔ nɔ, nɔ nɛ e kpaa pɛɛ kɛ haa wɔ hulɔ.

35 Mɛnɔ ma je wɔ kɛ je Kristo ɔ suɔmi ɔ he? Amanehlu, aloo haomi, aloo yi mi wami, aloo hwɔ, aloo he gu hɛɛmi, aloo oslaa, aloo klaate lo? 36 Kaa bɔ nɛ a ngma a: “O he ɔ, ngɛ ligbi mluku ɔ tsuo mi ɔ, a ngɛ wa yi tanee; a bu wɔ kaa jijɔhi nɛ a yaa mɛ gbemi.” 37 Se ngɛ ní nɛ ɔmɛ tsuo a mi ɔ, kɛ gu nɔ nɛ e suɔ wɔ ɔ nɔ ɔ, wa yeɔ kunimi kɛ piɔ si. 38 Ejakaa i ngɛ nɔ mi mami kaa gbenɔ jio, wami jio, hiɔwe bɔfohi jio, nɔ yemihi jio, níhi nɛ ngɛ hiɛ ɔ amlɔ nɛ ɔ jio, níhi nɛ maa ba jio, he wamihi jio, 39 nɔ́ ko nɛ ngɛ hiɔwe jio, nɔ́ ko nɛ ngɛ sisi jio, adebɔ nɔ́ kpa ko jio, ní nɛ ɔmɛ ekoeko be nyɛe ma je wɔ kɛ je Mawu suɔmi ɔ nɛ ngɛ Kristo Yesu, wa Nyɔmtsɛ ɔ mi ɔ he kɔkɔɔkɔ.

9 I ngɛ anɔkuale tue ngɛ Kristo mi; pi lakpa nɛ i ngɛ yee kaa bɔ nɛ ye he nile piɛɛ ye he kɛ ngɛ odase yee ngɛ mumi klɔuklɔu mi ɔ, 2 kaa i ngɛ aywilɛho yee wawɛɛ, nɛ nɔ́ dɔdɔɛ nɛ i ngɛ he nue ngɛ ye tsui mi ɔ hu se pui. 3 Ejakaa imi nitsɛ ɔ, i ná nɛ a je mi kɛ je Kristo he kaa nɔ ko nɛ a gbiɛ lɛ ngɛ ye nyɛmimɛ kɛ ye weku li ngɛ he lo nya a he je, 4 a ji Israel bi. A nɔ́ ji bi ngɔmi kaa binyumuhi ɔ kɛ hɛ mi nyami ɔ kɛ somi ɔmɛ kɛ Mlaa a hami ɔ kɛ sɔmɔmi nɛ a sɔmɔɔ ngɛ blɔ klɔuu nɔ ɔ kɛ si womi ɔmɛ ɔ nɛ. 5 A nihi ji wa nɛmɛ ɔmɛ, nɛ mɛ hu a mi nɛ Kristo ɔ je nɛ e kple si kɛ ba ngɛ he lo nya. A je Mawu, nɔ nɛ e ngɛ níhi tsuo a nɔ he wami ɔ yi kɛ ya neneene. Amen.

6 Se pi kaa Mawu munyu ɔ pee yaka. Ejakaa tsa pi nihi tsuo nɛ a kple si kɛ je Israel mi kɛ ba a ji “Israel bi” nitsɛnitsɛmɛ. 7 Jã kɛ̃ nɛ pi mɛ tsuo ji bimɛ akɛnɛ a ji Abraham nina a* he je; mohu ɔ, “Nɔ nɛ a ma tsɛ lɛ ke o nina a* maa gu Isak nɔ kɛ ba.” 8 Enɛ ɔ tsɔɔ kaa bimɛ ngɛ he lo mi ɔ, a pi Mawu bimɛ nitsɛnitsɛmɛ, mohu ɔ, bimɛ nɛ a gu si womi ɔ nɔ kɛ fɔ ɔ ji nihi nɛ a buɔ mɛ kaa nina a* nɛ. 9 Ejakaa si womi ɔ lɛ e nyɛɛ se nɛ ɔ nɛ: “Ma ba ngɛ be nɛ ɔ mi nɛ Sara ma ná binyumu.” 10 Pi jamɛ a be ɔ mi pɛ, se mohu benɛ nyumu kake nɛ ji Isak, wa nɛnɛ ɔ wo Rebeka hawi a hɔ ɔ; 11 ejakaa benɛ a ná we nɛ a fɔ mɛ nɛ a maa pee nɔ́ kpakpa aloo nɔ́ yayami lolo ɔ, bɔ nɛ pee nɛ Mawu yi mi nɛ e to ngɛ hlami ɔ he ɔ nɛ ko da ní tsumihi a nɔ, se mohu Nɔ nɛ e tsɛɔ ɔ nɔ ɔ, 12 e de Rebeka ke: “Nɔkɔtɔma a maa pee nyɔguɛ kɛ ha jokuɛ ɔ.” 13 Kaa bɔ nɛ a ngma ke: “I suɔ Yakɔb, se Esau lɛɛ, i nyɛ lɛ” ɔ.

14 Lɛɛ mɛni wa ma de mɔ? Anɛ Mawu yi dami sane lo? Ohoo! 15 Ejakaa e de Mose ke: “Nɔ fɛɛ nɔ ko nɛ ma na lɛ mɔbɔ ɔ, lɛ nɛ ma na lɛ mɔbɔ, nɛ nɔ fɛɛ nɔ ko nɛ ye mi mi maa sã mi ngɛ e he ɔ, lɛ nɛ ye mi mi maa sã mi ngɛ e he.” 16 Lɛɛ enɛ ɔ he ɔ, e dɛ si ngɛ nɔ́ nɛ nɔ ɔ suɔ wawɛɛ ɔ nɔ, aloo nɔ ɔ mɔde bɔmi nɔ,* mohu ɔ, e daa si ngɛ Mawu, nɔ nɛ e ngɛ mɔbɔ nami ɔ nɔ. 17 Ejakaa ngmami ɔ de ngɛ Farao he ke: “Ejakaa yi mi tomi tutuutu he je nɛ i ha nɛ o ngɛ wami mi ɔ ji nɛ ɔ nɛ: konɛ ma je ye he wami ɔ kpo ngɛ o blɔ fa mi, bɔ nɛ pee nɛ ma ha nɛ a jaje ye biɛ ɔ ngɛ zugba a nɔ tsuo.” 18 Lɛɛ enɛ ɔ he ɔ, nɔ fɛɛ nɔ nɛ e suɔ kaa e maa na lɛ mɔbɔ ɔ, e naa lɛ mɔbɔ, se e ngmɛɔ nɔ fɛɛ nɔ nɛ e suɔ kaa e maa kplii e tsui ɔ blɔ nɛ e kpliiɔ e tsui.

19 Enɛ ɔ he ɔ, o ma bi mi ke: “Lɛɛ mɛni he je nɛ loloolo ɔ, e naa tɔmi ɔ? Ejakaa mɛnɔ lɛ e nyɛ nɛ e tsi e suɔmi nya ní peemi nya?” 20 Se Oo adesa, mɛnɔ ji mo nɛ o maa hi Mawu munyu nya jee? Anɛ nɔ́ nɛ a puɛ ɔ biɔ e puɛlɔ ɔ ke: “Mɛni he je nɛ o pee mi kikɛ nɛ ɔ lo?” 21 Mɛni? Anɛ buɛ puɛlɔ ɔ be he wami ngɛ zu ɔ nɔ kaa e maa ngɔ zu kake ɔ nɛ e pɔtɔ ɔ nɔuu kɛ puɛ buɛ nɛ a kɛ tsuɔ nɔ́ nɛ bumi ngɛ he, nɛ́ e ngɔ eko kɛ puɛ buɛ nɛ a kɛ tsuɔ nɔ́ nɛ bumi be he hulɔ lo? 22 Lɛɛ ke Mawu suɔ kaa e ma je e we abofu ɔ kɛ e he wami ɔ kpo, nɛ e to e tsui si wawɛɛ kɛ ha abofu buɛhi nɛ a sa hɛ mi kpatami ɔ hu nɛɛ? 23 Nɛ ke e pee enɛ ɔ konɛ e ha nɛ a le e hɛ mi nyami babauu ɔ nɛ ngɛ mɔbɔ nami buɛhi nɛ e dla ngɔ to kɛ ha hɛ mi nyami ɔ a nɔ, 24 nɛ́ lɔ ɔ ji wɔ nihi nɛ e tsɛ, pi kɛ je Yuda bi pɛ a kpɛti, se kɛ je je ma amɛ hu a kpɛti ɔ, lɔ ɔ hu nɛɛ? 25 E ngɛ kaa nɔ́ nɛ e de ngɛ Hosea a. E de ke: “Nihi nɛ pi ye we bi ji mɛ ɔ, ma tsɛ mɛ ‘ye we bi,’ nɛ yo nɛ a sume lɛ ɔ, ma tsɛ lɛ ‘suɔlɔ’; 26 nɛ ngɛ he nɛ a de mɛ ngɛ ke, ‘Pi ye we bi ji nyɛ ɔ,’ a ma tsɛ mɛ ngɛ lejɛ ɔ ke ‘Mawu hɛ kalɔ ɔ binyumuhi.’”

27 Jehanɛ se hu ɔ, Yesaya kpa ngmlaa kɛ de ngɛ Israel he ke: “E ngɛ mi kaa Israel binyumu ɔmɛ maa hiɛ kaa wo nya zia mohu lɛɛ, se nihi nɛ a maa piɛ ɔ, mɛ pɛ a yi wami nɛ a ma he. 28 Ejakaa Yehowa* ma ba hyɛ akɔtaa mi ngɛ zugba a nɔ, nɛ e maa gbe nya, nɛ e maa po nɔ kpiti.”* 29 Jehanɛ se hu ɔ, kaa bɔ nɛ Yesaya de to ɔ: “Kaa tsa pi nɛ Yehowa* tabohiatsɛ ɔ si nina* ko kɛ ha wɔ ɔ, jinɛ wa ko pee kaa Sodom, nɛ wa ko ba plɛ kaa Gomora.”

30 Lɛɛ mɛni wa ma de mɔ? E ngɛ mi kaa nihi nɛ a je je ma amɛ a mi ɔ dí dami se mohu lɛɛ, se a ná dami, nɛ ji dami nɛ jeɔ hemi kɛ yemi mi ɔ; 31 se e ngɛ mi kaa Israel diɔ dami mlaa a se mohu lɛɛ, se e ná we jamɛ a mlaa a. 32 Mɛni he je? Ejakaa pi hemi kɛ yemi nɛ e kɛ di se, mohu ɔ, ní tsumihi. A tɛ “tɛmi tɛ” ɔ; 33 kaa bɔ nɛ a ngma ke: “Hyɛ! i kɛ tɛmi tɛ ko, kɛ nane tɔ̃tɔ̃mi tɛ sa ko ngɛ Zion mae, se nɔ nɛ e maa ngɔ e hemi kɛ yemi kɛ fɔ nɔ ɔ, e nine be si nyɛe” ɔ.

10 Nyɛmimɛ, ngɛ anɔkuale mi ɔ, a yi wami hemi ji nɔ́ nɛ ye tsui suɔ nɛ i kpaa Mawu pɛɛ wawɛɛ kɛ haa mɛ ngɛ he. 2 Ejakaa i yeɔ a he odase kaa a hɛ dɔɔ ngɛ Mawu he, se a li lɛ saminya. 3 Ejakaa akɛnɛ a li Mawu dami ɔ, se mohu a ngɛ hlae nɛ a ngɔ mɛ nitsɛmɛ a nɔ́ kɛ ma si he je ɔ, a bɛ a he si kɛ ha we Mawu dami ɔ. 4 Ejakaa Kristo ji Mlaa a nyagbe, konɛ nɔ fɛɛ nɔ nɛ e heɔ yeɔ ɔ nɛ e ná dami.

5 Ejakaa Mose ngma ngɛ dami nɛ jeɔ Mlaa a mi ɔ he ke: “Adesa nɛ peeɔ ní nɛ ɔmɛ ɔ maa hi wami mi kɛ gu a nɔ.” 6 Se dami nɛ je hemi kɛ yemi mi ɔ deɔ ke: “Ko de ngɛ o tsui mi ke, ‘Mɛnɔ maa kuɔ kɛ ya hiɔwe?’ lɔ ɔ ji kaa a, konɛ e ya ngɔ Kristo kɛ kple si kɛ ba, 7 aloo, ‘Mɛnɔ ma kple si kɛ ya muɔ voo ɔ mi?’ lɔ ɔ ji kaa a, konɛ e ya ngɔ Kristo kɛ je gbeje kɛ kuɔ kɛ ba.” 8 Se mɛni e ngɛ dee? “Munyu ɔ ngɛ o kasa nya haa, ngɛ mo nitsɛ o nya mi kɛ mo nitsɛ o tsui mi”; lɔ ɔ ji, hemi kɛ yemi “munyu ɔ” nɛ wa ngɛ fiɛɛe ɔ nɛ. 9 Ejakaa ke o kɛ o nya jajeɔ ngɛ ma hɛ mi kaa Yesu ji Nyɔmtsɛ, nɛ o heɔ yeɔ ngɛ o tsui mi kaa Mawu tle lɛ si kɛ je gbeje ɔ, a ma he o yi wami. 10 Ejakaa tsui nɛ nɔ kɛ heɔ yeɔ kɛ yaa dami mi, se nya nɛ nɔ kɛ jajeɔ ngɛ ma hɛ mi kɛ yaa yi wami hemi mi.

11 Ejakaa ngmami ɔ deɔ ke: “Nɔ ko be nɛ e ngɔɔ e hemi kɛ yemi ɔ kɛ fɔɔ e nɔ nɛ e nine maa nyɛ si.” 12 Ejakaa slɔɔto ko be Yuda no kɛ Hela no a kpɛti. Nyɔmtsɛ kake lɛ mɛ tsuo a ngɛ, nɛ e ji niatsɛ kɛ ha nihi tsuo nɛ a tsɛɔ lɛ ɔ.* 13 Ejakaa “nɔ fɛɛ nɔ nɛ e tsɛɔ Yehowa* biɛ ɔ, a ma he e yi wami.” 14 Se ke a ná we hemi kɛ yemi ngɛ e mi ɔ, kɛ a ma plɛ kɛ tsɛ lɛ kɛɛ? Jehanɛ ɔ, kɛ a ma plɛ kɛ ná hemi kɛ yemi ngɛ nɔ nɛ a nui e he sane ko hyɛ ɔ mi kɛɛ? Jehanɛ ɔ, ke nɔ ko be nɛ e maa fiɛɛ ɔ, kɛ a ma plɛ kɛ nu kɛɛ? 15 Nɛ jehanɛ ɔ, ke a tsɔ we mɛ ɔ, kɛ a ma plɛ kɛ ya fiɛɛ kɛɛ? Kaa bɔ nɛ a ngma ke: “Hyɛ bɔ nɛ ní kpakpahi a he sane kpakpa jajeli ɔmɛ a nanehi a he ngɛ fɛu ha!”

16 Se mɛ tsuo a bui sane kpakpa a tue. Ejakaa Yesaya de ke: “Yehowa,* mɛnɔ he nɔ́* nɛ a nu kɛ je wa ngɔ ɔ ye?” 17 Enɛ ɔ he ɔ, hemi kɛ yemi nyɛɛɔ nɔ́ nɛ a nu ɔ se. Nɛ nɔ́ nɛ a nu ɔ guɔ Kristo he munyu ɔ nɔ. 18 Se i ngɛ bie ke, Anɛ nuimi nɛ a nui lo? Hyɛ, ngɛ anɔkuale mi ɔ, “a gbi ɔ jije kɛ kpa zugba a tsuo nɔ, nɛ a sɛ gbi ɔ ya su zugba a* nyagbe he ɔmɛ.” 19 Se i ngɛ bie ke, anɛ limi nɛ Israel li lo? Kekleekle ɔ, Mose de ke: “Ma gu nɔ́ ko nɛ pi je ma ko ɔ nɔ kɛ ha nɛ nyɛɛ je hunga; nɛ ma gu ma nɛ be juɛmi nɔ kɛ wo nyɛ abofu wawɛɛ.” 20 Se Yesaya náa kã wawɛɛ nɛ e deɔ ke: “Nihi nɛ a hla we ye se blɔ ɔ, a na mi; nihi nɛ a bi we ye si ɔ, a ba le mi.” 21 Se e deɔ ngɛ Israel he ke: “Ngɛ ligbi mluku ɔ tsuo mi ɔ, i gbɛ ye dɛ mi ha nihi nɛ a tue gbo nɛ a tsui hu kplii ɔ.”

11 Lɛɛ i ngɛ bie ke, anɛ Mawu kua e we bi lo? Dɛbi, ejakaa imi hu Israel no ji mi, nɛ i ji Abraham nina,* nɛ i je Benyamin wɛtso ɔ mi. 2 Mawu kua we e we bi, nihi nɛ e ngɔ e juɛmi kɛ ya a nɔ kekleekle ɔ. Anɛ nyɛ li nɔ́ nɛ ngmami ɔ de ngɛ Eliya he benɛ e kpa Mawu pɛɛ kɛ si Israel ɔ lo? 3 “Yehowa,* a gbe o gbali ɔmɛ, nɛ a tsua o we afɔle sami la tɛ ɔmɛ kɛ pue si, nɛ imi nɔ kake too pɛ lɛ i piɛ, nɛ amlɔ nɛ ɔ, a ngɛ hlae nɛ a maa ngɔ ye wami ɔ.”* 4 Se kɛ̃ ɔ, mɛni Mawu de lɛ? “I si nyumuhi 7,000 ha ye he nɛ mɛɛ lɛɛ a kpla we si kɛ ha we Baal.” 5 Enɛ ɔ he ɔ, jã nɔuu kɛ̃ nɛ ngɛ wa piɔ be nɛ ɔ mi hu ɔ, e piɛ ni komɛ nɛ a hla mɛ ngɛ dloomi nya. 6 Jehanɛ ɔ, ke dloomi nya a, lɛɛ tsa pi kɛ gu ní tsumi nɔ hu; kaa kɛ gu ní tsumi nɔ ɔ, lɛɛ jinɛ dloomi ɔ be dloomi pee hu.

7 Lɛɛ mɛni mɔ? Nɔ́ tutuutu nɛ Israel kɛ hɛdɔ ngɛ hlae ɔ, e nine sui nɔ́, se nihi nɛ a hla mɛ ɔ lɛɛ a nine su nɔ. Ni nɛmɛ nɛ piɛ ɔ, a ha nɛ a juɛmi nya la gbo, 8 kaa bɔ nɛ a ngma ke: “Mawu ha mɛ mahe nɛ mi kuɔ mumi, hɛ ngmɛhi nɛ a hyɛ we nɔ́, kɛ tuehi nɛ a nui nɔ́, kɛ ba si mwɔnɛ ɔ ligbi nɛ ɔ.” 9 Jehanɛ hu ɔ, David de ke: “Ha nɛ a we okplɔɔ ɔ nɛ e pee kpã nɛ e duɔ nɔ kɛ klama kɛ nane tɔ̃tɔ̃mi nɔ́ kɛ tue gblami nɔ́ kɛ ha mɛ. 10 Ha nɛ a hɛ ngmɛ nɔ nɛ wo diblii konɛ a ko nyɛ nɛ a hyɛ nɔ́, nɛ be fɛɛ be ɔ, ha nɛ a dɔ a mi.”

11 Enɛ ɔ he ɔ, i ngɛ bie ke, Tse a tsa tɛ we si nɛ a maa nɔ si butuu, aloo? Ohoo! Se kɛ gu nane yaya nɛ a hia a nɔ ɔ, yi wami hemi ngɛ kɛ ha nihi nɛ a je je ma amɛ a mi ɔ, konɛ lɔ ɔ nɛ ha nɛ a je hunga. 12 Jehanɛ ɔ, ke nane yaya nɛ a hia a peeɔ ní nami kɛ ha je ɔ nɛ a si gbeemi ɔ peeɔ ní nami kɛ ha nihi nɛ a je je ma amɛ a mi ɔ, lɛɛ a yibɔ ɔ tsuo hu maa pee jã hluu tsɔ!

13 Jehanɛ ɔ, i ngɛ munyu tue kɛ ngɛ nyɛ nihi nɛ nyɛ je je ma amɛ a mi ɔ tsɔɔe, akɛnɛ i ji bɔfo kɛ ha je ma amɛ he je ɔ, i woɔ ye sɔmɔmi ní tsumi ɔ hɛ mi nyami* 14 konɛ ma hyɛ kaa eko ɔ, ma ha nɛ imi nitsɛ ye we bi* ɔmɛ nɛ a je hunga, nɛ́ ma he a ti ni komɛ a yi wami kɛ je a mi. 15 Ejakaa ke kuami nɛ a kua mɛ ɔ peeɔ kpatami kɛ ha je ɔ, lɛɛ tse ngɔmi nɛ a maa ngɔ mɛ ɔ maa pee wami nɛ a ma ná kɛ je gbeje mɔ? 16 Jehanɛ se hu ɔ, ke má a fã nɛ a ngɔ kɛ pee kekleekle yiblii ɔ ngɛ klɔuklɔu ɔ, lɛɛ má a tsuo hu ngɛ klɔuklɔu; nɛ ke sipoku ɔ ngɛ klɔuklɔu ɔ, tso kɔni ɔmɛ hu jã nɔuu.

17 Se ke tso kɔni ɔmɛ ekomɛ ku kɛ pue si, nɛ mo nɛ jinɛ o ji oliv ku ɔ, a ngɔ mo kɛ ba mɛtɛ tso ɔ he ngɛ a kpɛti konɛ mo hu o ná oliv tso ɔ sipoku ɔ mi ní kpakpa amɛ eko ɔ, 18 ko wo o he nɔ* ngɛ tso kɔni ɔmɛ a nɔ, se ke o wo o he nɔ* ngɛ a nɔ ɔ, mo kai kaa tsa pi mo nɛ o hɛɛ sipoku ɔ, mohu ɔ, sipoku ɔ lɛ hɛɛ mo. 19 Lɛɛ o ma de ke: “A ku tso kɔnihi kɛ pue si konɛ a nyɛ nɛ a ngɔ mi kɛ mɛtɛ tso ɔ he.” 20 E ji anɔkuale! Ejakaa akɛnɛ a be hemi kɛ yemi he je ɔ, a ku mɛ kɛ pue si, se nyɛɛ lɛɛ hemi kɛ yemi lɛ ha nɛ nyɛ daa si ɔ nɛ. Nyɛ ko wo nyɛ he nɔ, mohu ɔ, nyɛɛ ye gbeye. 21 Ejakaa ke Mawu baa we tso ɔ nitsɛ e kɔni ɔmɛ a yi ɔ, lɛɛ nyɛ hu e be nyɛ yi bae. 22 Enɛ ɔ he ɔ, nyɛ susu Mawu mi mi himi ɔ kɛ e tue gblami ɔ he. Tue gblami ngɛ kɛ ha ni nɛmɛ nɛ a nɔ si ɔ, se Mawu mi mi himi ɔ ngɛ kɛ ha nyɛ, ke ji kaa nyɛ ya nɔ nɛ nyɛ hi si ngɛ e mi mi himi ɔ mi, ke pi jã a, lɛɛ nyɛ hu e maa po nyɛ kɛ pue si. 23 Nɛ mɛ hu ke a yɛ nɔ nɛ a hí si ngɛ hemi kɛ yemi nɛ a be ɔ mi ɔ, a maa ngɔ mɛ kɛ mɛtɛ tso ɔ he, ejakaa Mawu ma nyɛ maa ngɔ mɛ kɛ mɛtɛ tso ɔ he ekohu. 24 Ejakaa ke a po nyɛ kɛ je oliv tso ɔ nɛ ji tso ku ngɛ adebɔ nya a he, nɛ a ngɔ nyɛ kɛ ba mɛtɛ abɔɔ ɔ mi oliv tso ɔ he ngɛ blɔ nɛ kɛ adebɔ blɔ nya tomi kɔ we ɔ nya a, lɛɛ a maa ngɔ ni nɛ ɔmɛ nɛ mɛɛ a ji tso ɔ nitsɛ e kɔni ɔmɛ ɔ kɛ ba mɛtɛ mɛ nitsɛmɛ a we oliv tso ɔ he ekohu hluu tsɔ!

25 Ejakaa nyɛmimɛ, i sume nɛ laami sane nɛ e ngɛ klɔuu nɛ ɔ nɛ laa nyɛ, konɛ nyɛ ko pee juɛmitsɛmɛ ngɛ nyɛ nitsɛmɛ nyɛ hɛ mi: Juɛmi nɛ e nya la gbo bɔɔ ba Israel nɔ kɛ ya si be nɛ nihi nɛ a je je ma amɛ a mi nɛ a ba mi ɔmɛ a yibɔ ɔ su, 26 nɛ blɔ nɛ ɔ nɔ nɛ a maa gu kɛ he Israel tsuo yi wami. Kaa bɔ nɛ a ngma ke: “Kpɔlɔ ɔ* maa je Zion kɛ ba, nɛ e ma je ní peepee yayamihi kɛ je Yakɔb mi. 27 Nɛ somi nɛ i kɛ mɛ maa so benɛ ma je a he yayami ɔmɛ kɛ je ɔ ji nɛ ɔ nɛ.” 28 Ngɛ anɔkuale mi ɔ, ngɛ sane kpakpa a blɔ fa mi ɔ, a ji he nyɛli ngɛ nyɛ he je; se ngɛ Mawu nɔ hlami ɔ blɔ fa mi ɔ, a ji nihi nɛ Mawu suɔ mɛ ngɛ a nɛmɛ ɔmɛ a he je. 29 Ejakaa nike ní ɔmɛ kɛ Mawu nɔ tsɛmi ɔ ji níhi nɛ e be e he piae ngɛ a he. 30 Ejakaa kaa bɔ nɛ be ko ɔ, nyɛ gbo Mawu tue se amlɔ nɛ ɔ a na nyɛ mɔbɔ ngɛ a tue gbomi ɔ he ɔ, 31 jã kɛ̃ nɛ ni nɛ ɔmɛ hu amlɔ nɛ ɔ, a gbo tue nɛ lɔ ɔ ba pee mɔbɔ nami kɛ ha nyɛ, konɛ amlɔ nɛ ɔ, mɛ nitsɛmɛ hu a na mɛ mɔbɔ. 32 Ejakaa Mawu bla mɛ tsuo nɛ e tsi a nya ngɛ tue gbomi mi bɔ nɛ pee nɛ e na mɛ tsuo mɔbɔ.

33 Oo ní babauu nɛ Mawu ngɛ ɔ, kɛ e juɛmi ɔ, kɛ e nile ɔ mi kuɔ wawɛɛ nitsɛ! A be nyɛe ma hla e kojomi ɔmɛ a mi, nɛ e blɔ ɔmɛ hu, a be nyɛe hiɔmi!* 34 Ejakaa “mɛnɔ ba le Yehowa* juɛmi ɔ, aloo e ba plɛ e ga wolɔ?” 35 Aloo “mɛnɔ nɛ e sɛ hlami nɛ e ha lɛ nɔ́ ko nɛ́ e sa kaa e to lɛ nane mi?” 36 Ejakaa e mi lɛ níhi tsuo je, nɛ e nɔ lɛ a gu kɛ ba, nɛ a ngɛ kɛ ha lɛ. A wo e hɛ mi nyami kɛ ya neneene. Amen.

12 Enɛ ɔ he ɔ, nyɛmimɛ, i kɛ Mawu mi mi sami babauu ɔ ngɛ nyɛ pɛɛ kpae kaa nyɛɛ ngɔ nyɛ nɔmlɔ tso ɔmɛ kɛ ha kaa afɔle nɛ e hɛ ngɛ, nɛ e ngɛ klɔuklɔu nɛ e saa Mawu hɛ mi, lɔ ɔ ji sɔmɔmi nɛ nyɛ sɔmɔɔ ngɛ blɔ klɔuu nɔ nɛ́ nyɛɛ kɛ nyɛ juɛmi toɔ he ɔ nɛ. 2 Nɛ nyɛ ha nɛ níhi a blɔ nya tomi* nɛ ɔ nɛ jɔɔ nyɛ kudɔmi,* mohu ɔ, nyɛ ha nɛ a tsake nyɛ kɛ gu nyɛ juɛmi nɛ nyɛ maa hi tsakee ɔ nɔ, konɛ nyɛ nitsɛmɛ nyɛ ná Mawu suɔmi nya ní nɛ e ye mluku, nɛ e hi, nɛ e sa e hɛ mi ɔ nɔ mi mami.

3 Ejakaa kɛ gu dloomi nɛ a dloo mi ɔ nɔ ɔ, i ngɛ nɔ fɛɛ nɔ nɛ e ngɛ nyɛ kpɛti ngɛ lejɛ ɔ dee kaa e ko bu e he pe bɔ nɛ e sa kaa e bu e he, mohu ɔ, e susu níhi a he konɛ e ná juɛmi nɛ mi tsɔ, nɔ fɛɛ nɔ nɛ e pee jã ngɛ hemi kɛ yemi nɛ Mawu susu kɛ ha* lɛ ɔ nya. 4 Ejakaa kaa bɔ nɛ wa ngɛ he níhi fuu ngɛ nɔmlɔ tso kake mi, se he ní ɔmɛ tsuo tsu we nɔ́ kake ɔ, 5 jã kɛ̃ nɛ wɔ hu e ngɛ mi kaa wa he hiɛ mohu lɛɛ, se wa ji nɔmlɔ tso kake nɛ waa kɛ Kristo pee kake, se kaa ni kakaakahi ɔ, wa ji wa sibi a he níhi. 6 Ke jã a, lɛɛ ngɛ dloomi nɛ a dloo wɔ ɔ nya a, wa ngɛ nike ní slɔɔtoslɔɔtohi, ke e ji gbami ɔ, nyɛ ha nɛ waa da hemi kɛ yemi nɛ a susu kɛ ha wɔ ɔ nɔ kɛ gba; 7 aloo ke sɔmɔmi ko ɔ, nyɛ ha nɛ waa hi sɔmɔmi nɛ ɔ nɔ; aloo nɔ nɛ e tsɔɔ ní ɔ, ha nɛ e hi e ní tsɔɔmi ɔ nɔ; 8 aloo nɔ nɛ e woɔ nihi he wami ɔ, ha nɛ e wo nihi he wami; nɔ nɛ e gbaa níhi kɛ haa nihi ɔ, ha nɛ e pee jã faa; nɔ nɛ e hyɛɔ nihi a nɔ* ɔ, ha nɛ e pee jã saminya;* nɔ nɛ e naa nɔ mɔbɔ ɔ, ha nɛ e kɛ bua jɔmi nɛ pee jã.

9 Nyɛ ko ha nɛ osato peemi nɛ hi nyɛ suɔmi ɔ mi. Nyɛ ha nɛ nɔ́ yayami he nɛ pee nyɛ tai; nyɛɛ mɛtɛ nɔ́ kpakpa he. 10 Ngɛ nyɛmi suɔmi blɔ fa mi ɔ, nyɛɛ suɔ nyɛ sibi a sane. Ngɛ bumi nɛ e sa kaa nyɛɛ bu nyɛ sibi ɔ blɔ fa mi ɔ, nyɛɛ sɛ hlami kɛ pee jã.* 11 Nyɛ hɛ mi nɛ wa kɛ ní tsumi,* nyɛ ko pee hejɔ̃.* Nyɛ ha nɛ mumi ɔ nɛ wo nyɛ kã.* Nyɛɛ pee nyɔguɛhi kɛ ha Yehowa.* 12 Nyɛ nya ngɛ hɛ kɛ nɔ fɔmi ɔ mi. Nyɛ fĩ si ngɛ amanehlu mi. Nyɛɛ hɛɛ sɔlemi mi. 13 Nyɛɛ da ni klɔuklɔu ɔmɛ a hiami níhi a nɔ nɛ nyɛ ha mɛ níhi nɛ nyɛ ngɛ ɔ eko. Nyɛɛ nyɛɛ nibwɔ peemi blɔ ɔ nɔ. 14 Nyɛɛ ya nɔ nɛ nyɛɛ jɔɔ nihi nɛ a waa nɔ yi mi ɔ; nyɛɛ jɔɔ nihi, nɛ nyɛ ko gbiɛ nihi. 15 Nyɛɛ kɛ nihi nɛ a ngɛ nyae ɔ nɛ nya; nyɛɛ kɛ nihi nɛ a ngɛ ya foe ɔ nɛ fo. 16 Nyɛɛ kɛ ni kpahi nɛ hi si kaa bɔ nɛ nyɛɛ kɛ nyɛ nitsɛmɛ nyɛ sibi hiɔ si ɔ; nyɛ ko ngɔ nyɛ juɛmi kɛ ma ní gojoogojoohi a nɔ,* mohu ɔ, nyɛ ha nɛ níhi nɛ a ba si ɔ nɛ kudɔ nyɛ. Nyɛ ko pee nyɛ he juɛmitsɛmɛ ngɛ nyɛ nitsɛmɛ nyɛ hɛ mi.

17 Nyɛ ko pee nɔ ko yayami kɛ to yayami nane mi. Nyɛ susu nɔ́ nɛ hi ngɛ adesahi tsuo a hɛ mi ɔ he. 18 Ke e maa hi ɔ, nyɛɛ bɔ mɔde wawɛɛ nɛ nyɛɛ kɛ adesahi tsuo nɛ hi si ngɛ tue mi jɔmi mi. 19 Nihi nɛ i suɔ, nyɛ ko ye nyɛ nitsɛmɛ nyɛ he lue, se nyɛɛ ngmɛ mi mi fumi ɔ* blɔ; ejakaa a ngma ke: “Yehowa* de ke, ‘Ye nɔ́ ji lue yemi; ma to nane mi.’” 20 Se “ke hwɔ ngɛ o he nyɛlɔ yee ɔ, ha lɛ ní nɛ e ye; ke kuma ngɛ lɛ yee ɔ, ha lɛ nɔ́ ko nɛ e nu; ejakaa ke o peeɔ jã a, o ma bua la ngu hɛuu nya ngɔ pue e yi mi.”* 21 Nyɛ ko ha nɛ yayami nɛ ye nyɛ nɔ kunimi, mohu ɔ, nyɛɛ ya nɔ nɛ nyɛɛ ngɔ kpakpa kɛ ye yayami nɔ kunimi.

13 Ha nɔ fɛɛ nɔ* nɛ e ba e he si kɛ ha blɔ nyahi nɛ a nɔ kuɔ ɔ,* ejakaa blɔ nya ko be nɛ pi Mawu ngɔ nɛ e je; Mawu lɛ e ngɔ blɔ nyahi tsuo nɛ ngɛ ɔ kɛ da a blɔ hehi ngɛ e sisi. 2 Enɛ ɔ he ɔ, nɔ fɛɛ nɔ nɛ e teɔ si kɛ woɔ blɔ nya a, e teɔ si kɛ siɔ Mawu blɔ nya tomi ɔ; nihi nɛ a te si kɛ wo lɛ ɔ maa ngɔ kojomi kɛ ba mɛ nitsɛmɛ a nɔ. 3 Ejakaa jamɛ a nɔ yeli ɔmɛ a he ngɛ gbeye, pi ngɛ nɔ́ kpakpa peemi he je, mohu ɔ, ngɛ nɔ́ yayami he je. Anɛ o suɔ kaa blɔ nya a he nɛ ko pee mo gbeye lo? Yaa nɔ nɛ o pee nɔ́ kpakpa, nɛ o ma ná yi jemi kɛ je e ngɔ; 4 ejakaa e ji Mawu sɔmɔlɔ kɛ ha mo konɛ e hi ha mo. Se ke o ngɛ nɔ́ yayami pee ɔ, lɛɛ moo ye gbeye, ejakaa e hɛɛ we klaate ɔ yaka gu. E ji Mawu sɔmɔlɔ, lue yelɔ, konɛ e je abofu kpo kɛ si nɔ nɛ e ngɛ nɔ́ yayami pee ɔ.*

5 Enɛ ɔ he ɔ, bɔ fɛɛ bɔ nɛ ji ɔ, e sa kaa nyɛɛ ba nyɛ he si kɛ ha mɛ,* pi ngɛ jamɛ a abofu ɔ he je kɛkɛ, mohu ɔ, ngɛ nyɛ he nile hu he je. 6 Lɔ ɔ he je nɛ nyɛ woɔ tóhi hulɔ ɔ nɛ; ejakaa a ji Mawu sɔmɔli kɛ ha nihi, nɛ daa nɛ ɔ, a ngɛ yi mi tomi nɛ ɔ nɔuu he ní tsue. 7 Nɔ́ nɛ sa mɛ tsuo ɔ, nyɛɛ ngɔ kɛ ha mɛ: nɔ nɛ e biɔ tó ɔ, nyɛɛ wo tó ɔ; nɔ nɛ e biɔ ke nyɛɛ wo ma hiɔ nɛ a po kɛ ha nyɛ ɔ, nyɛɛ wo; nɔ nɛ e sa gbeye yemi ɔ, nyɛɛ ngɔ jamɛ a gbeye yemi ɔ kɛ ha lɛ; nɔ nɛ e sa bumi ɔ, nyɛɛ ngɔ jamɛ a bumi ɔ kɛ ha lɛ.

8 Nyɛ ko hɛɛ nɔ ko nɔ ko nɔ́ ko he hiɔ kaa ja suɔmi nɛ nyɛ maa suɔ nyɛ sibi ɔ pɛ; ejakaa nɔ fɛɛ nɔ nɛ e suɔ e nyɛmi nɔmlɔ ɔ, e ye mlaa a nɔ.* 9 Ejakaa mlaa nɛ ji, “E sɛ nɛ o puɛ gba, e sɛ nɛ o gbe nɔmlɔ, e sɛ nɛ o ju, e sɛ nɛ o hɛ nɛ kɔ̃,” ke kita kpa ko hu ngɛ ɔ, e kpiti pomi ji: “E sa nɛ o suɔ o nyɛmi kaa bɔ nɛ o suɔ o he ɔ.” 10 Suɔmi pee we yayami kɛ si we nɔ nyɛmi; enɛ ɔ he ɔ, suɔmi ji mlaa a nɔ yemi.*

11 Nɛ nyɛɛ pee enɛ ɔ, ejakaa nyɛ le be ɔ, kaa ngmlɛfia a nɛ e sa kaa nyɛ hɛ nɛ tsɛ̃ kɛ je mahe mi ɔ su momo, ejakaa wa yi wami hemi ɔ su si ta haa pe be nɛ wa ba pee nihi nɛ a he ye ɔ. 12 Nyɔ ɔ kuɛ se mi kuɔ; e piɛ bɔɔ nɛ je maa na. Enɛ ɔ he ɔ, nyɛ ha nɛ wa sake diblii mi ní tsumi ɔmɛ kɛ pue he, nɛ nyɛ ha nɛ waa wo la a he ta hwumi ní ɔmɛ. 13 Nyɛ ha nɛ waa nyɛɛ ngɛ he tsɔmi mi kaa bɔ nɛ a nyɛɛɔ piani ɔ, pi ngɛ okplɔɔ ngmɛmihi* nɛ ngɛ hoo kɛ dã demi mi, pi ngɛ ajuama bɔmi kɛ nɔ buimi ngmlikiti* mi, pi ngɛ pɛ kɛ hunga jemi mi. 14 Mohu ɔ, nyɛɛ wo Nyɔmtsɛ Yesu Kristo ɔ, nɛ nyɛ ko hi níhi nɛ peeɔ he lo ɔ akɔnɔ ɔmɛ a he blɔ nya toe kɛ fɔ si.

14 Nyɛ he nɔmlɔ nɛ e hemi kɛ yemi ɔ mi wɛ ɔ atuu, se nyɛ ko kojo susumi slɔɔtoslɔɔtohi.* 2 Nɔ ko ngɛ hemi kɛ yemi nɛ e kɛ yeɔ nɔ́ fɛɛ nɔ́, se nɔ nɛ e gbɔjɔ ɔ lɛɛ, e yeɔ bahi kɛ ngmɔ ní tsɔwihi pɛ. 3 Ha nɛ nɔ nɛ e ngɛ yee ɔ nɛ e ko gbe nɔ nɛ e yi ɔ he guɛ, nɛ ha nɛ nɔ nɛ e yi ɔ hu nɛ e ko kojo nɔ nɛ e ngɛ yee ɔ, ejakaa Mawu he lɛ atuu. 4 Mɛnɔ ji mo nɛ o maa kojo nɔ ko sɔmɔlɔ? Lɛ nitsɛ e nyɔmtsɛ ɔ nɛ e daa si aloo e nɔɔ si kɛ haa. Ngɛ anɔkuale mi ɔ, a ma ha nɛ e maa da si, ejakaa Yehowa* ma nyɛ ma ha nɛ e da si.

5 Nɔ ko buɔ ligbi kake kaa e hi pe ligbi kpa; nɔ kpa hu buɔ ligbi kake kaa bɔ nɛ e buɔ ligbi kpa amɛ tsuo ɔ; nyɛ ha nɛ nɔ fɛɛ nɔ nɛ e ná nɔ mi mami nɛ pi si ngɛ lɛ nitsɛ e juɛmi mi. 6 Nɔ nɛ e yeɔ ligbi ɔ, e yeɔ kɛ haa Yehowa.* Jehanɛ se hu ɔ, nɔ nɛ e yeɔ ní ɔ, e yeɔ kɛ haa Yehowa,* ejakaa e naa Mawu si; nɛ nɔ nɛ e yi ní ɔ hu e yi kɛ ha we Yehowa,* se kɛ̃ ɔ, e naa Mawu si. 7 Ngɛ anɔkuale mi ɔ, wa ti nɔ kake po be nɛ e ngɛ wami mi ngɛ lɛ nitsɛ e dɛ he, nɛ nɔ ko be nɛ e gbo nɛ e ngɛ lɛ nitsɛ e dɛ he. 8 Ejakaa ke wa ngɛ wami mi ɔ, wa ngɛ wami mi kɛ ha Yehowa,* nɛ ke wa gbo hu ɔ, wa gbo kɛ ha Yehowa.* Enɛ ɔ he ɔ, wa ngɛ wami mi jio, wa gbo jio, Yehowa* nihi ji wɔ. 9 Ejakaa enɛ ɔ he je nɛ Kristo gbo nɛ e kpale ba wami mi ekohu ɔ nɛ, konɛ e pee Nyɔmtsɛ ngɛ ni gbogboehi kɛ nihi nɛ a hɛ ngɛ ɔ tsuo a nɔ.

10 Se mɛni he je nɛ o kojoɔ o nyɛmi ɔ? Aloo mɛni he je nɛ o gbeɔ o nyɛmi he guɛ hulɔ ɔ? Ejakaa wɔ tsuo wa maa da si ngɛ Mawu kojomi sɛ ɔ hɛ mi. 11 Ejakaa a ngma ke: “Yehowa* de ke, ‘be abɔ nɛ i ngɛ nɛ ɔ, imi nɛ nakutso fɛɛ nakutso ma kpla si kɛ ha, nɛ lilɛ fɛɛ lilɛ maa jaje Mawu ngɔ tsɔɔ heii.’” 12 Lɛɛ enɛ ɔ he ɔ, wa ti nɔ fɛɛ nɔ maa bu lɛ nitsɛ e he akɔtaa kɛ ha Mawu.

13 Lɔ ɔ he ɔ, nyɛ ko ha nɛ waa kojo wa sibi hu, se mohu ɔ, nyɛ ha nɛ waa fia wa pɛɛ si kaa wa be nane tɔ̃tɔ̃mi nɔ́ ko aloo blɔ tsimi nɔ́ ko ngɔe kɛ fɔ nyɛmi ko hɛ mi. 14 l le nɛ i ngɛ nɔ mi mami hu ngɛ Nyɔmtsɛ Yesu ɔ mi kaa nɔ́ ko be nɛ a ma de ke jamɛ a nɔ́ ɔ he tsɔ we; ke nɔ ko buɔ nɔ́ ko kaa e he tsɔ we ɔ, lɛ nɛ e he tsɔ we ha. 15 Ejakaa ke niye ní haa nɛ o nyɛmi haoɔ ɔ, lɛɛ pi suɔmi nya nɛ o ngɛ nyɛɛe ngɛ hu. Koo ngɔ o niye ní ɔ kɛ kpata jamɛ a nɔ ɔ nɛ e he nɛ Kristo ba gbo ngɛ ɔ hɛ mi. 16 Enɛ ɔ he ɔ, nyɛ ko ha nɛ a tu kpakpa nɛ nyɛ peeɔ ɔ he munyu kaa e ji yayami. 17 Ejakaa Mawu Matsɛ Yemi ɔ, pi ní yemi kɛ ní numi, mohu ɔ, e ji dami kɛ tue mi jɔmi kɛ bua jɔmi nɛ mumi klɔuklɔu piɛɛ he. 18 Ejakaa nɔ fɛɛ nɔ nɛ e peeɔ nyɔguɛ kɛ haa Kristo ngɛ blɔ nɛ ɔ nɔ ɔ, e saa Mawu hɛ mi nɛ adesahi hu a bua jɔɔ e he.

19 Enɛ ɔ he ɔ, jehanɛ ɔ, nyɛ ha nɛ waa di níhi nɛ ngɔɔ tue mi jɔmi kɛ baa, kɛ níhi nɛ waa kɛ maa fia wa sibi kɛ ma si ɔmɛ a se. 20 Nyɛ kpa Mawu ní tsumi ɔ gbɛmi kɛ pue si ngɛ niye ní he je. Ngɛ anɔkuale mi ɔ, nɔ́ fɛɛ nɔ́ he tsɔ, se e ji yayami kaa nɔ ko maa ye nɔ́ ko nɛ ma ha nɛ nihi a nane maa tɔ̃tɔ̃. 21 Nɔ́ nɛ hi pe kulaa ji kaa o be muɔ lo yee aloo o be wai nue aloo o be nɔ́ kpa ko nɛ maa tɔ̃tɔ̃ o nyɛmi nane ɔ pee. 22 Hemi kɛ yemi nɛ o ngɛ ɔ, baa yi kɛ ha mo nitsɛ o he ngɛ Mawu hɛ mi. Adesa nɛ e dɛ nɔ́ nɛ lɛ nitsɛ e suɔ nɔ kɛ kojo we e he ɔ ngɛ bua jɔmi. 23 Se ke e yi mi peeɔ lɛ enyɔɔnyɔ ɔ, lɛɛ ke e ye ɔ, a bu lɛ fɔ momo, ejakaa pi hemi kɛ yemi nya nɛ e ye ngɛ. Ngɛ anɔkuale mi ɔ, nɔ́ fɛɛ nɔ́ nɛ a kɛ dɛ hemi kɛ yemi nɔ ɔ ji yayami.

15 Se kɛ̃ ɔ, wɔ nihi nɛ wa he wa a, e sa nɛ waa tloo nihi nɛ a be he wami ɔmɛ a gbɔjɔmi ɔmɛ, nɛ́ wa ko sa wɔ nitsɛmɛ wa hɛ mi. 2 Nyɛ ha nɛ wa ti nɔ fɛɛ nɔ nɛ e sa e nyɛmi hɛ mi konɛ e hi ha lɛ, nɛ e fia lɛ kɛ ma si. 3 Ejakaa Kristo ɔ po sɛ lɛ nitsɛ e hɛ mi, se kaa bɔ nɛ a ngma a: “O hɛ mi si nɛ nihi ngɛ puee ɔ ba ye nɔ.” 4 Ejakaa níhi tsuo nɛ a ngma ngɔ to ɔ, a ngma kɛ ha wɔ ní tsɔɔmi, konɛ kɛ gu wa si fimi kɛ jehanɛ se hu, kɛ gu bua womi nɛ jeɔ Ngmami ɔ mi ɔ nɔ ɔ, wa ná hɛ kɛ nɔ fɔmi. 5 Jehanɛ ɔ, Mawu nɛ e haa nɔ si fimi kɛ bua womi ɔ nɛ e ha nɛ nyɛ hu nyɛ ná juɛmi nɛ Kristo Yesu ná a nɔuu ngɛ nyɛ kpɛti, 6 konɛ nyɛɛ pee kake nɛ nyɛɛ ngɔ gbi* kake kɛ wo Mawu kɛ wa Nyɔmtsɛ Yesu Kristo Tsɛ ɔ hɛ mi nyami.

7 Lɔ ɔ he ɔ, nyɛ he nyɛ sibi atuu* kaa bɔ nɛ Kristo hu he nyɛ atuu ɔ, konɛ nyɛ kɛ wo Mawu hɛ mi nyami. 8 Ejakaa i ngɛ nyɛ dee ke Kristo ba pee sɔmɔlɔ kɛ ha nihi nɛ a po mɛ ɔ ngɛ Mawu anɔkuale yemi ɔ he je, konɛ e kɛ ma sihi nɛ Mawu wo a nɛmɛ ɔmɛ ɔ nɔ mi 9 bɔ nɛ pee nɛ je ma amɛ nɛ a wo Mawu hɛ mi nyami ngɛ e mɔbɔ nami ɔ he je. Kaa bɔ nɛ a ngma ke: “Enɛ ɔ he je nɛ ma jaje mo kɛ tsɔɔ heii ngɛ je ma amɛ a mi ɔ nɛ, nɛ ma la yi jemi lahi kɛ ha o biɛ ɔ.” 10 Nɛ e de ekohu ke: “Nyɛ je mahi, nyɛɛ piɛɛ e we bi ɔmɛ a he kɛ nya.” 11 Nɛ jehanɛ hu ɔ: “Nyɛ je mahi tsuo, nyɛ je Yehowa* yi, nɛ nyɛ ha nɛ ni ɔmɛ tsuo nɛ a je e yi.” 12 Nɛ Yesaya hu de ke: “Jɛse sipoku ɔ maa ba, nɔ nɛ e ngɛ si tee konɛ e ba ye je ma amɛ a nɔ ɔ; e nɔ nɛ je ma amɛ tsuo maa ngɔ a hɛ kɛ fɔ.” 13 Mawu, nɔ nɛ e haa nɔ hɛ kɛ nɔ fɔmi ɔ nɛ e ha nɛ bua jɔmi tsuo kɛ tue mi jɔmi nɛ hyi nyɛ tɔ kɛ gu nyɛ hɛ nɛ nyɛɛ kɛ fɔ e nɔ ɔ nɔ, konɛ hɛ kɛ nɔ fɔmi kɛ mumi klɔuklɔu ɔ he wami ɔ nɛ hiɛ kɛ be nɔ ha nyɛ.

14 Jehanɛ ɔ, ye nyɛmimɛ, imi nitsɛ i ngɛ nɔ mi mami ngɛ nyɛ mi kaa nyɛ nitsɛmɛ hu ɔ, kpakpa peemi hyi nyɛ tɔ, nɛ nile tsuo hu hyi nyɛ tɔtɔɔtɔ, nɛ nyɛ nyɛɔ woɔ nyɛ sibi ga.* 15 Se i ngma nyɛ ngɛ ní komɛ a he, nɛ i laa we nyɛ nɔ́ ko nɔ́ ko nɔ, konɛ ma kai nyɛ ekohu ngɛ dloomi ɔ nɛ a kɛ dloo mi kɛ je Mawu ngɔ 16 konɛ ma pee Kristo Yesu sɔmɔlɔ kɛ ha je ma amɛ ɔ he je. I ngɛ Mawu sane kpakpa a he ní tsumi klɔuklɔu ɔ tsue, konɛ je ma nɛ ɔmɛ nɛ a ba pee afɔle nɛ sa, nɛ a kɛ mumi klɔuklɔu tsu he.

17 Enɛ ɔ he ɔ, ngɛ níhi nɛ kɔɔ Mawu he ɔmɛ a blɔ fa mi ɔ, i ngɛ nɔ́ nɛ ma da nɔ kɛ nya ngɛ Kristo Yesu mi. 18 Ejakaa i be ye yi mi poe kɛ tu nɔ́ kpa ko he munyu pe nɔ́ nɛ Kristo gu ye nɔ kɛ tsu konɛ je ma amɛ nɛ a bu tue ɔ pɛ, e gu ye nya mi munyu kɛ ye ní peepee, 19 kɛ okadihi kɛ nyakpɛ níhi* a he wami, kɛ Mawu mumi ɔ he wami ɔ nɔ, nɛ i fiɛɛ Kristo he sane kpakpa a kɛ pi si kɛ je Yerusalɛm kɛ bɔle si hluu kɛ ya si Ilirikum tɔɔ. 20 Ngɛ anɔkuale mi ɔ, ngɛ blɔ nɛ ɔ nɔ ɔ, oti nɛ i kɛ ma ye hɛ mi ji kaa i be sane kpakpa a jajee ngɛ hehi nɛ a ha nɛ nihi le Kristo biɛ ngɛ momo ɔ, bɔ nɛ pee nɛ ma ko fia kɛ ma nɔ kpa ko sisi tomi nɔ; 21 mohu ɔ, kaa bɔ nɛ a ngma a: “Nihi nɛ a nine sui e he amaniɛ bɔmi ko nɔ ɔ maa na, nɛ nihi nɛ a nui ɔ, a maa nu sisi.”

22 Enɛ ɔ hu he je nɛ a tsi mi blɔ si abɔ kaa ma ko ba nyɛ ngɔ ɔ nɛ. 23 Se amlɔ nɛ ɔ, i be zugba kpɔ ko nɛ a tsu we mi ní ngɛ kpokpa nɛ ɔmɛ a mi hu, nɛ jehahi babauu* ji nɛ ɔ nɛ ye hɛ ngɛ jae ngɛ nyɛ he nɛ i suɔ kaa ma ba nyɛ ngɔ. 24 Lɔ ɔ he ɔ, ke i ngɛ blɔ nɔ kɛ yaa Spania a, i he ye kaa ma na nyɛ, nɛ ke i kɛ nyɛ hi lejɛ ɔ be bɔɔ ɔ, lɔ ɔ se ɔ, nyɛ ma je mi blɔ bɔɔ. 25 Se amlɔ nɛ ɔ, e be kɛe nɛ ma hia blɔ kɛ ya Yerusalɛm konɛ ma ya sɔmɔ ni klɔuklɔu ɔmɛ. 26 Ejakaa nihi nɛ a ngɛ Makedonia kɛ Akaya a, a bua jɔ he kaa a maa ngɔ níhi nɛ a ngɛ ɔ eko kɛ ye bua ohiatsɛmɛ nɛ a ngɛ ni klɔuklɔu ɔmɛ nɛ a ngɛ Yerusalɛm a kpɛti ɔ. 27 Ngɛ anɔkuale mi ɔ, a bua jɔ he kaa a maa pee jã, nɛ niinɛ, a hɛɛ mɛ hiɔ; ejakaa ke je ma amɛ ná mumi mi níhi nɛ a ngɛ ɔ eko ɔ, lɛɛ mɛ hu a blɔ nya ní tsumi ji kaa a maa ngɔ he lo nya níhi nɛ a ngɛ ɔ kɛ sɔmɔ mɛ. 28 Enɛ ɔ he ɔ, ke i gbe enɛ ɔ nya nɛ i ngɔ níhi* nɛ a ha a kɛ ya ha mɛ slɔkee ɔ, ma je nɛ ma ba gu nyɛ ngɔ kɛ ya Spania. 29 Jehanɛ se hu ɔ, i le kaa ke i ná nɛ i ba su nyɛ ngɔ ɔ, i kɛ jɔɔmi babauu nitsɛ nɛ je Kristo ngɔ maa ba.

30 Amlɔ nɛ ɔ, nyɛmimɛ, i gu wa Nyɔmtsɛ Yesu Kristo nɔ kɛ jehanɛ se hu mumi ɔ suɔmi ɔ nɔ kɛ ngɛ nyɛ he wami woe kaa nyɛɛ piɛɛ ye he konɛ nyɛɛ kɛ hɛdɔ nɛ sɔle ha Mawu ngɛ ye he, 31 konɛ a kpɔ̃ mi ngɛ nihi nɛ a ngɛ Yudea nɛ a he we yi ɔmɛ a dɛ mi, konɛ sɔmɔmi nɛ i ngɛ sɔmɔe ngɛ Yerusalɛm nane mi ɔ nɛ sa ni klɔuklɔu ɔmɛ a hɛ mi, 32 bɔ nɛ pee nɛ ngɛ Mawu suɔmi nya a, ma ba nyɛ ngɔ kɛ bua jɔmi, konɛ i kɛ nyɛ tsuo wa he mi nɛ jɔ wɔ. 33 Mawu ɔ nɛ e haa tue mi jɔmi ɔ kɛ nyɛ tsuo nɛ hi si. Amen.

16 I ngɛ wa nyɛmiyo Fiibi, nɛ e ji sɔmɔlɔ ngɛ Kenkrea asafo ɔ mi ɔ yi jee kɛ ngɛ nyɛ hae, 2 konɛ nyɛ nyɛ nɛ nyɛ he lɛ atuu ngɛ Nyɔmtsɛ ɔ mi bɔ nɛ sa ni klɔuklɔu ɔmɛ, nɛ nɔ́ fɛɛ nɔ́ nɛ he maa hia lɛ ɔ, nyɛ ha lɛ, ejakaa lɛ nitsɛ hu e tsɔɔ kaa e ji nihi fuu a yemi kɛ bualɔ, nɛ imi hu i piɛɛ he.

3 Nyɛ de Priska kɛ Akuila, nɛ a ji ye nyɛmimɛ nɛ i kɛ mɛ tsuɔ ní ngɛ Kristo Yesu mi ɔ ke i biɔ mɛ, 4 mɛ ji nihi nɛ a ngɔ a kuɛ kɛ wo oslaa mi ngɛ ye* he, nɛ pi imi pɛ nɛ i ngɛ mɛ si nae, se mohu asafo ɔmɛ tsuo nɛ a ngɛ je ma amɛ a mi ɔ hu ngɛ mɛ si nae. 5 Jehanɛ hu ɔ, i biɔ asafo ɔ nɛ ngɛ a we ɔ mi ɔ hulɔ. I biɔ ye suɔlɔ Epeneto, nɛ e ji kekle yiblii ngɛ Asia kɛ ha Kristo ɔ. 6 I biɔ Maria, nɔ nɛ e tsu ní wawɛɛ ha nyɛ ɔ. 7 I biɔ Androniko kɛ Yunia, ye weku li nɛ a wo i kɛ mɛ tsu ɔ, nyumuhi nɛ bɔfo ɔmɛ le mɛ saminya, nɛ a kɛ Kristo ba pee kake be kɛkɛɛ si imi ɔ.

8 Nyɛ de Ampliato, ye suɔlɔ ngɛ Nyɔmtsɛ ɔ mi ɔ ke i biɔ lɛ. 9 I biɔ Yubano, wa nyɛmi nɛ waa kɛ lɛ tsuɔ ní ngɛ Kristo mi ɔ, kɛ ye suɔlɔ Staki. 10 I biɔ Apele, anɔkualetsɛ ngɛ Kristo mi ɔ. I biɔ Aristobulo we ɔ mi bimɛ ɔmɛ. 11 I biɔ Hɛrodio, ye weku no ɔ. I biɔ Nakiso we ɔ mi bimɛ ɔmɛ nɛ a ngɛ Nyɔmtsɛ ɔ mi ɔ. 12 I biɔ Traifaina kɛ Traifosa, yihi nɛ a ngɛ ní tsue wawɛɛ ngɛ Nyɔmtsɛ ɔ mi ɔ. I biɔ Pɛɛsis, wa suɔlɔ ɔ, ejakaa e tsu ní wawɛɛ ngɛ Nyɔmtsɛ ɔ mi. 13 I biɔ Rufo, nɔ nɛ a hla lɛ ngɛ Nyɔmtsɛ ɔ mi ɔ, kɛ e yayo kɛ imi hu ye yayo ɔ. 14 I biɔ Asinkrito, Flegon, Hɛmes, Patroba, Hɛmas, kɛ nyɛmimɛ ɔmɛ nɛ a kɛ mɛ ngɛ ɔ. 15 I biɔ Filologo kɛ Yulia, Neriɔs kɛ e nyɛmiyo ɔ, kɛ Olimpa, kɛ ni klɔuklɔu ɔmɛ tsuo nɛ a kɛ mɛ ngɛ ɔ. 16 Nyɛ fɔ nyɛ sibi kɛ nya he fiɔmi nɛ ngɛ klɔuklɔu. Kristo ɔ we asafo ɔmɛ tsuo ke a biɔ nyɛ.

17 Jehanɛ ɔ, nyɛmimɛ, i ngɛ nyɛ he wami woe kaa nihi nɛ a ngɔɔ mi gbamihi kɛ nane tɔ̃tɔ̃mi níhi nɛ kɛ tsɔɔmi ɔ nɛ nyɛ kase ɔ kɔ we ɔ baa a, nyɛ hɛ nɛ hi a he, nɛ nyɛɛ yu nyɛ he ngɛ a he. 18 Ejakaa nihi kaa jã a, a ji nyɔguɛhi, pi kɛ ha wa Nyɔmtsɛ Kristo, mohu ɔ, kɛ ha mɛ nitsɛmɛ a mi mi, nɛ a kɛ munyu dɔkɔɔ kɛ sisimi munyuhi sisiɔ nihi nɛ a hɛ be a he nɔ ɔ a tsui. 19 Nyɛ tue bumi ɔ, nihi tsuo le, nɛ enɛ ɔ he ɔ, ye bua jɔ nyɛ he. Se i suɔ nɛ nyɛɛ pee nyɛ he juɛmitsɛmɛ ngɛ nɔ́ kpakpa he, se nihi nɛ a li nɔ́ ko ngɛ nɔ́ yayami blɔ fa mi. 20 Ejakaa ngɛ Mawu, nɔ nɛ e haa tue mi jɔmi ɔ blɔ fa mi ɔ, e be kɛe kulaa nɛ e maa ywia Satan ngɛ nyɛ nane si. Wa Nyɔmtsɛ Yesu dloomi ɔ kɛ nyɛ nɛ hi si.

21 Timoteo, ye nyɛmi nɛ i kɛ lɛ tsuɔ ní ɔ ke e biɔ nyɛ, nɛ jã kɛ̃ nɛ ye weku li Lusio, Yasin, kɛ Sosipatro hu ke a biɔ nyɛ.

22 Imi Tɛtiɔs, nɔ nɛ e ngma sɛ womi nɛ ɔ biɔ nyɛ ngɛ Nyɔmtsɛ ɔ mi.

23 Gayo, nɔ nɛ i kɛ asafo ɔ tsuo wa ngɛ e we ɔ mi ɔ ke e biɔ nyɛ. Erasto, ma a sika nɔ hyɛlɔ* ɔ biɔ nyɛ, nɛ jã kɛ̃ nɛ e nyɛminyumu Kuato hu ke e biɔ nyɛ. 24 ——

25 Jehanɛ ɔ, Nɔ nɛ e ma nyɛ ma ha nɛ nyɛ he nɛ wa ngɛ sane kpakpa a nɛ i jajeɔ kɛ fiɛɛmi nɛ i fiɛɛɔ Yesu Kristo ɔ nya kaa bɔ nɛ laami sane nɛ e ngɛ klɔuu nɛ a ngɔ kɛ laa nɛ a nui he kɛ je blema lokoo ɔ kpo jemi ɔ tsɔɔ, 26 se amlɔ nɛ ɔ lɛɛ a ha nɛ e pee heii,* nɛ a gu gbami Ngmami ɔ nɔ nɛ a ha nɛ a le ngɛ je ma amɛ tsuo a mi, ngɛ neneene Mawu ɔ fami ɔ nya, konɛ e ha nɛ a bu tue kɛ gu hemi kɛ yemi nɔ; 27 Mawu ɔ, nɔ nɛ lɛ nɔ kake too pɛ ji juɛmitsɛ ɔ, a gu Yesu Kristo nɔ kɛ wo e hɛ mi nyami kɛ ya neneene. Amen.