KEKLEEKLE WOMI KƐ YA HA KORINTO BI ƆMƐ

1 Paulo, nɔ nɛ ngɛ Mawu suɔmi nya a, a tsɛ lɛ kaa e ba pee Kristo Yesu bɔfo ɔ, kɛ Sostene, wa nyɛminyumu ɔ 2 kɛ ya ha Mawu asafo ɔ nɛ ngɛ Korinto ɔ, nyɛ nihi nɛ a tsu nyɛ he nɛ nyɛɛ kɛ Kristo Yesu pee kake, nɛ a tsɛ nyɛ kaa nyɛ ba pee ni klɔuklɔuhi kɛ piɛɛ nihi tsuo nɛ a ngɛ he fɛɛ he nɛ a ngɛ wa Nyɔmtsɛ Yesu Kristo, a Nyɔmtsɛ ɔ kɛ wɔ hu wa Nyɔmtsɛ ɔ biɛ ɔ tsɛe ɔmɛ a he:

3 Nyɛ nine nɛ su dloomi kɛ tue mi jɔmi nɛ je Mawu nɛ ji wa Tsɛ ɔ, kɛ Nyɔmtsɛ Yesu Kristo ngɔ ɔ nɔ.

4 Be fɛɛ be ɔ, i naa ye Mawu ɔ si ngɛ nyɛ he ngɛ dloomi nɛ Mawu dloo nyɛ ngɛ Kristo Yesu mi ɔ he je; 5 ejakaa ngɛ nɔ́ fɛɛ nɔ́ mi ɔ, a ha nɛ nyɛ ná ní babauu ngɛ e mi, nyɛmi babauu nɛ a kɛ tuɔ munyu, kɛ nile nɛ pi si 6 kaa bɔ nɛ a ha nɛ Kristo ɔ he odase ɔ pi si ngɛ nyɛ kpɛti 7 konɛ nike ní ko nɛ ko hia nyɛ kulaa, be mi nɛ nyɛɛ kɛ hɛdɔ ngɛ wa Nyɔmtsɛ Yesu Kristo kpo jemi ɔ mlɛe ɔ. 8 Lɛ hu e maa waje nyɛ kɛ ya si nyagbe, konɛ a ko po nyɛ nya ngɛ wa Nyɔmtsɛ Yesu Kristo ligbi ɔ nɔ. 9 Mawu ji anɔkualetsɛ, lɛ ji nɔ nɛ e tsɛ nyɛ konɛ nyɛɛ kɛ e Bi Yesu Kristo, wa Nyɔmtsɛ ɔ nɛ ba bɔ huɛ.*

10 Amlɔ nɛ ɔ, nyɛmimɛ, i ngɛ nyɛ he wami woe ngɛ wa Nyɔmtsɛ Yesu Kristo biɛ mi kaa e sa nɛ nyɛ tsuo nyɛ munyu nɛ pee kake, nɛ e sɛ nɛ mi gbami ko nɛ hi nyɛ kpɛti, mohu ɔ, e sa nɛ nyɛ juɛmi kɛ nyɛ susumi nɛ pee kake kɛ pi si. 11 Ejakaa ye nyɛmimɛ, Klooye we ɔ mi bimɛ ɔmɛ a ti ni komɛ ha mi lemi kaa pɛ ngɛ nyɛ kpɛti. 12 Nɔ́ nɛ i ngɛ tsɔɔe ji kaa nyɛ ti nɔ fɛɛ nɔ deɔ ke: “Paulo nɔ ji mi,” “Se imi lɛɛ Apolo nɔ ji mi,” “Se imi lɛɛ Kefa* nɔ ji mi,” “Se imi lɛɛ Kristo nɔ ji mi.” 13 Anɛ Kristo ɔ mi gba lo? Anɛ Paulo ji nɔ nɛ a gbe lɛ ngɛ tso nɔ kɛ ha nyɛ ɔ lo? Aloo anɛ a baptisi nyɛ ngɛ Paulo biɛ mi lo? 14 I naa Mawu si kaa i baptisii we nɔ ko nɔ ko kaa ja Krispo kɛ Gayo pɛ, 15 bɔ nɛ pee nɛ nɔ ko nɛ e ko de ke a baptisi nyɛ ngɛ ye biɛ mi. 16 Ee, i baptisi Stefana we ɔ mi bimɛ ɔmɛ hulɔ. Nihi nɛ piɛ ɔ lɛɛ, i li ke ji kaa i baptisi a ti nɔ kpa ko hu lo. 17 Ejakaa Kristo tsɔ mi, se pi kaa ma ya baptisi nihi, mohu ɔ, kaa ma ya jaje sane kpakpa a; nɛ pi kɛ juɛmi munyu,* konɛ Kristo sɛumi tso* ɔ nɛ e ko pee yaka.

18 Ejakaa sɛumi tso* ɔ he munyu ɔ ji kuasiahi a sane kɛ ha nihi nɛ a hɛ mi ngɛ kpatae ɔ, se kɛ ha wɔ nihi nɛ a ngɛ wa yi wami hee ɔ lɛɛ, e ji Mawu he wami. 19 Ejakaa a ngma ke: “Ma ha nɛ juɛmitsɛmɛ a juɛmi ɔ hɛ mi ma kpata, nɛ ma kua ní leli a nile ɔ.”* 20 Jije juɛmitsɛ ɔ ngɛ? Jije womi ngmalɔ ɔ* ngɛ? Jije níhi a blɔ nya tomi* nɛ ɔ mi atsinyɛ jelɔ ɔ ngɛ? Anɛ Mawu ha we nɛ je ɔ juɛmi ɔ nɛ pee kuasiahi a sane lo? 21 Ejakaa ngɛ Mawu juɛmi ɔ nya a, akɛnɛ je ɔ gui e juɛmi ɔ nɔ kɛ li Mawu he je ɔ, e sa Mawu hɛ mi kaa e maa gu kuasiahi a sane ɔ nɛ a ngɛ fiɛɛe ɔ nɔ kɛ he nihi nɛ a heɔ yeɔ ɔmɛ a yi wami.

22 Ejakaa Yuda bi ɔmɛ biɔ okadihi nɛ Hela bi ɔmɛ hlaa juɛmi; 23 se wɔɔ lɛɛ wa fiɛɛɔ Kristo nɛ a gbe lɛ ngɛ tso nɔ ɔ, nɛ enɛ ɔ ji nane tɔ̃tɔ̃mi nɔ́ kɛ ha Yuda bi ɔmɛ, se e ji kuasiahi a sane kɛ ha je ma amɛ. 24 Se kɛ ha nihi nɛ a tsɛ mɛ, nɛ ji Yuda bi kɛ Hela bi tsuo ɔ lɛɛ, Kristo ji Mawu he wami ɔ kɛ Mawu juɛmi ɔ nɛ. 25 Ejakaa Mawu nɔ́ ko nɛ a buɔ lɛ kaa e ji kuasia nɔ́ ɔ ngɛ juɛmi pe adesahi, nɛ Mawu nɔ́ nɛ e gbɔjɔ ɔ he wa pe adesahi.

26 Ejakaa nyɛmimɛ, nyɛ na kaa tsɛmi nɛ e tsɛ nyɛ ɔ, pi nyɛ kpɛti nihi fuu ji juɛmitsɛmɛ ngɛ he lo nya,* pi nyɛ kpɛti nihi fuu nɛ a he wa, pi nyɛ kpɛti nihi fuu nɛ a fɔ mɛ kaa odehehi,* 27 se Mawu hla je ɔ mi kuasia ní ɔmɛ konɛ e kɛ gbe juɛmitsɛmɛ zo; nɛ Mawu hla je ɔ mi níhi nɛ a gbɔjɔ ɔ konɛ e kɛ gbe níhi nɛ a he wa a zo; 28 nɛ Mawu hla je ɔ mi níhi nɛ a bui kɛ níhi nɛ a gbeɔ a he guɛ ɔ, níhi nɛ a be ɔ, konɛ e kɛ kpata níhi nɛ a ngɛ ɔmɛ a hɛ mi, 29 bɔ nɛ pee nɛ nɔ* ko nɛ e ko fĩa ngɛ Mawu hɛ mi. 30 Se e he je nɛ nyɛɛ kɛ Kristo Yesu ba pee kake ɔ nɛ, lɛ ji nɔ nɛ e ba pee juɛmi nɛ je Mawu ngɔ kɛ ha wɔ, kɛ jehanɛ se hu dami kɛ klɔuklɔu peemi kɛ kpɔmi nɔ́ nɛ a kɛ kpɔ̃ wɔ, 31 konɛ e pee kaa bɔ nɛ a ngma a pɛpɛɛpɛ: “Nɔ nɛ e fĩaa a, ha nɛ e fĩa ngɛ Yehowa* mi.”

2 Lɔ ɔ he ɔ, nyɛmimɛ, benɛ i ba nyɛ ngɔ ɔ, i kɛ munyu nguanguahi aloo juɛmi nɛ e nɔ be ba jaje we Mawu laami sane nɛ e ngɛ klɔuu ɔ kɛ tsɔɔ we nyɛ. 2 Ejakaa i mwɔ ye yi mi kpɔ kaa i be nɔ́ kpa ko lee ngɛ nyɛ kpɛti kaa ja Yesu Kristo, kɛ gbemi nɛ a gbe lɛ ngɛ tso nɔ ɔ pɛ. 3 Nɛ i ba nyɛ ngɔ ngɛ gbɔjɔmi kɛ gbeye yemi mi, kɛ he domi blibliibli; 4 nɛ ye munyu ɔ kɛ níhi nɛ i fiɛɛ ɔ, pi juɛmi munyuhi nɛ plɛɔ nɔ yi mi, mohu ɔ, munyuhi nɛ jeɔ mumi kɛ he wami kpo, 5 bɔ nɛ pee nɛ nyɛ hemi kɛ yemi ɔ nɛ ko hi adesahi a juɛmi mi, mohu ɔ, Mawu he wami ɔ mi.

6 Amlɔ nɛ ɔ, wa tuɔ juɛmi munyu ngɛ nihi nɛ a wa amɛ a kpɛti, se pi níhi a blɔ nya tomi* nɛ ɔ aloo níhi a blɔ nya tomi nɛ ɔ mi nɔ yeli ɔmɛ nɛ a hɛ mi ma kpata a, a juɛmi. 7 Se wa tuɔ Mawu juɛmi ɔ he munyu ngɛ laami sane nɛ e ngɛ klɔuu ko mi, juɛmi nɛ a ngɔ kɛ laa, nɛ́ Mawu hla ngɔ to kɛ ha wa hɛ mi nyami womi loko níhi a blɔ nya tomi ɔmɛ ba a. 8 Juɛmi nɛ ɔ ji nɔ́ nɛ níhi a blɔ nya tomi* nɛ ɔ mi nɔ yeli ɔmɛ a ti nɔ ko nɔ ko ba li ɔ nɛ, ejakaa kaa a le ɔ, jinɛ a ko sɛu we Nyɔmtsɛ ɔ nɛ e hɛ mi ngɛ nyami ɔ.* 9 Se kaa bɔ nɛ a ngma a: “Hɛ ngmɛ nɛ, nɛ tue nui, nɛ jã kɛ̃ nɛ níhi nɛ Mawu dla ngɔ to nihi nɛ e suɔ mɛ ɔ hu bɛ adesa ko tsui mi hyɛ.” 10 Ejakaa wɔ ji nihi nɛ Mawu gu e mumi ɔ nɔ kɛ je mɛ kpo ngɔ tsɔɔ, ejakaa mumi ɔ hlaa níhi tsuo a mi, e hlaa Mawu níhi nɛ a mi kuɔ ɔ tete po a mi.

11 Ejakaa adesahi a kpɛti mɛnɔ lɛ e le adesa ko níhi kaa ja adesa mumi nɛ ngɛ e mi ɔ? Enɛ ɔ he ɔ, jã kɛ̃ nɛ nɔ ko hu ba li Mawu níhi kaa ja Mawu mumi ɔ. 12 Amlɔ nɛ ɔ, pi je ɔ mumi ɔ nɛ wa nine su nɔ, mohu ɔ, mumi ɔ nɛ je Mawu ngɔ ɔ, konɛ waa le níhi nɛ Mawu je mi mi jɔmi mi nɛ e ngɔ kɛ ha wɔ ɔ. 13 Wa tuɔ ní nɛ ɔmɛ hu a he munyu, se pi kɛ munyuhi nɛ adesa juɛmi tsɔɔ, se kɛ munyuhi nɛ mumi ɔ tsɔɔ, be mi nɛ wa ngɔɔ mumi ɔ munyuhi kɛ tsɔɔ mumi mi sanehi a nya a.*

14 Se he lo mi nɔmlɔ lɛɛ e kplɛɛ we Mawu mumi ɔ níhi a nɔ,* ejakaa a ji kuasiahi a sane kɛ ha lɛ; nɛ e be nyɛe maa le mɛ, ejakaa mumi ɔ nɛ a kɛ hlaa a mi. 15 Se mumi mi nɔmlɔ hlaa níhi tsuo a mi, se lɛɛ lɛɛ adesa ko hla we e mi. 16 Ejakaa “mɛnɔ ba le Yehowa* juɛmi nɛ́ e maa tsɔɔ lɛ ní?” Se wɔɔ lɛɛ wa ngɛ Kristo juɛmi ɔ.

3 Lɔ ɔ he ɔ, nyɛmimɛ, i nyɛ we nɛ i kɛ nyɛ nɛ tu munyu kaa mumi mi nimli, se mohu kaa he lo mi nimli, kaa bimwɔwi ngɛ Kristo mi. 2 I ha nyɛ nyɔ nyu, se pi niye ní nɛ mi jiɔ, ejakaa nyɛ he wɛ bɔ nɛ sa lolo. Ngɛ anɔkuale mi ɔ, amlɔ nɛ ɔ po ɔ, nyɛ he wɛ bɔ nɛ sa, 3 ejakaa loloolo ɔ, he lo mi nimli ji nyɛ. Akɛnɛ hunga jemi kɛ pɛ ngɛ nyɛ kpɛti he je ɔ, anɛ pi he lo mi nimli ji nyɛ, nɛ pi nɛ nyɛ ngɛ nyɛɛe kaa bɔ nɛ adesahi nyɛɛɔ ɔ lo? 4 Ejakaa ke nɔ kake deɔ ke, “Paulo nɔ ji mi,” se nɔ kpa hu deɔ ke, “Imi lɛɛ Apolo nɔ ji mi” ɔ, anɛ pi nɛ nyɛ ngɛ nyɛ ní pee kaa bɔ nɛ nimli adesahi peeɔ a ní ɔ lo?

5 Ke jã a, lɛɛ mɛnɔ ji Apolo mɔ? Ee, mɛnɔ ji Paulo? Sɔmɔli nɛ nyɛ gu a nɔ kɛ ba he ye, kaa bɔ nɛ Nyɔmtsɛ ɔ ha nɔ fɛɛ nɔ ɔ. 6 I du, Apolo pue nɔ nyu, se Mawu ya nɔ nɛ e ha nɛ e ngɛ wae, 7 enɛ ɔ he ɔ, pi nɔ nɛ e duɔ ɔ ji nɔ́ ko, nɛ jã kɛ̃ nɛ pi nɔ nɛ e pueɔ nɔ nyu ɔ, mohu ɔ, Mawu, nɔ nɛ e haa nɛ e waa a. 8 Amlɔ nɛ ɔ, nɔ nɛ e duɔ ɔ kɛ nɔ nɛ e pueɔ nɔ nyu ɔ tsuo a sɔ,* se a ti nɔ fɛɛ nɔ nine maa su lɛ nitsɛ e hiɔwo nɔ ngɛ lɛ nitsɛ e ní tsumi ɔ he. 9 Ejakaa wa ji nihi nɛ a piɛɛ Mawu he kɛ ngɛ ní tsue. Nyɛ ji Mawu ngmɔ nɛ́ a ngɛ mi ní tsue, Mawu tsu.

10 Ngɛ Mawu dloomi ɔ nɛ a kɛ dloo mi ɔ nya a, i to tsu sisi kaa tsu malɔ nɔkɔtɔma nɛ e he be,* se nɔ kpa ngɛ fiae kɛ ngɛ nɔ mae. Se ha nɔ fɛɛ nɔ nɛ e ya nɔ nɛ e hyɛ bɔ nɛ e plɛ kɛ ngɛ fiae kɛ ngɛ nɔ mae ha a. 11 Ejakaa nɔ ko be nyɛe maa to sisi tomi kpa ko sisi ngɛ nɔ́ nɛ a to momo ɔ se, lɔ ɔ ji Yesu Kristo. 12 Jehanɛ ɔ, ke nɔ ko ngɔ sika tsu, sika hiɔ, tɛhi nɛ a he jua wa, tso, nga gbigbli, aloo go kɛ fia kɛ ma sisi tomi ɔ nɔ ɔ, 13 a ma ha nɛ nɔ fɛɛ nɔ ní tsumi ɔ maa je kpo heii, ejakaa ligbi ɔ ma je lɛ kpo, ejakaa a kɛ la ma je lɛ kpo, nɛ la a nitsɛ maa tsɔɔ ní tsumi pɔtɛɛ nɛ nɔ fɛɛ nɔ fia. 14 Ke nɔ ko ní tsumi nɛ e fia ngɔ ma nɔ ɔ da si ɔ, e nine maa su hiɔwo nɔ; 15 ke nɔ ko ní tsumi ɔ sã butuu ɔ, nɔ́ maa laa lɛ; se lɛ nitsɛ lɛɛ a ma he e yi wami; se kɛ̃ ɔ, ke e ba jã a, e maa pee kaa nɔ́ nɛ a gbla lɛ kɛ je la mi.

16 Anɛ nyɛ li kaa nyɛ nitsɛmɛ ɔ, nyɛ ji Mawu sɔlemi we nɛ Mawu mumi ɔ hiɔ nyɛ mi lo? 17 Ke nɔ ko puɛɔ Mawu sɔlemi we ɔ, Mawu ma kpata jamɛatsɛ ɔ hɛ mi; ejakaa Mawu sɔlemi we ɔ ngɛ klɔuklɔu, nɛ nyɛ ji jamɛ a sɔlemi we ɔ nɛ.

18 Nyɛ ko ha nɛ nɔ ko nɛ e sisi e he: Ke nyɛ kpɛti nɔ ko susu kaa juɛmitsɛ ji lɛ ngɛ níhi a blɔ nya tomi* nɛ ɔ mi ɔ, nyɛ ha nɛ e pee kuasia, konɛ e ba pee juɛmitsɛ. 19 Ejakaa je nɛ ɔ mi juɛmi ɔ ji kuasiahi a sane ngɛ Mawu hɛ mi, ejakaa a ngma ke: “E nuɔ juɛmitsɛmɛ ngɛ mɛ nitsɛmɛ a ga tsɔmi ɔmɛ a mi.” 20 Nɛ jehanɛ hu ɔ: “Yehowa* le kaa juɛmitsɛmɛ ɔmɛ a susumi ɔmɛ peeɔ yaka.” 21 Enɛ ɔ he ɔ, nyɛ ko ha nɛ nɔ ko nɛ e fĩa ngɛ adesahi a mi; ejakaa nyɛ níhi ji níhi tsuo, 22 Paulo jio, Apolo jio, Kefa jio, je ɔ jio, wami jio, gbenɔ jio, níhi nɛ a ngɛ amlɔ nɛ ɔ jio, níhi nɛ maa ba jio, nyɛ níhi ji níhi tsuo; 23 jã kɛ̃ nɛ Kristo hu níhi ji nyɛ; nɛ jã kɛ̃ nɛ Mawu hu nɔ́ ji Kristo.

4 E sa nɛ adesa nɛ e bu wɔ kaa Kristo tsɔli* kɛ we nɔ hyɛli nɛ a tu Mawu laami sanehi nɛ a ngɛ klɔuu ɔ ngɔ wo a dɛ. 2 Enɛ ɔ he ɔ, nɔ́ nɛ a hyɛɛ blɔ ngɛ we nɔ hyɛli a dɛ ji kaa a maa ye anɔkuale. 3 Jehanɛ ɔ, ngɛ ye blɔ fa mi ɔ, e he hia we mi tsɔ kaa nyɛ maa hyɛ ye sane mi, aloo a maa kojo mi ngɛ adesa kojomi he* ko. Ngɛ anɔkuale mi ɔ, imi nitsɛ po i hyɛ we ye sane mi. 4 Ejakaa i li nɔ́ yayami ko nɛ i pee, se pi lɔ ɔ nɛ maa tsɔɔ kaa dalɔ ji mi; nɔ nɛ e hyɛɛ ye sane mi ji Yehowa.* 5 Enɛ ɔ he ɔ, nyɛ ko kojo nɔ́ ko nɔ́ ko loko be nɛ a to ɔ nɛ su, kɛ yaa si be nɛ Nyɔmtsɛ ɔ maa ba. E ma je diblii mi laami níhi kpo kɛ ba la nya, nɛ e ma je tsui mi susumihi hu kpo, kɛkɛ ɔ, nɔ fɛɛ nɔ nine maa su e yi jemi nɔ kɛ je Mawu ngɔ.

6 Jehanɛ ɔ, nyɛmimɛ, i ngɔ ní nɛ ɔmɛ kɛ to imi nitsɛ kɛ Apolo wa he konɛ e hi ha nyɛ, bɔ nɛ pee nɛ kɛ gu wa nɔ ɔ, nyɛ maa kase mlaa a: “Nyɛ ko be níhi nɛ a ngma a he,” konɛ nyɛ ko wo nyɛ he nɔ nɛ́ nyɛ ba bu nɔ ko pe nɔ ko. 7 Ejakaa mɛnɔ pee mo slɔɔto ngɛ ni kpahi a he? Ngɛ anɔkuale mi ɔ, mɛni o ngɛ nɛ pi nɛ o nine su nɔ? Ke niinɛ nɛ o nine su nɔ ɔ, lɛɛ mɛni he je nɛ o fĩaa kaa nɔ́ nɛ pi nɛ o nine su nɔ ɔ?

8 Anɛ nyɛ tsui nɔ nyɛ mi momo lo? Anɛ niatsɛmɛ ji nyɛ momo lo? Anɛ nyɛ bɔni nɔ yemi kaa matsɛmɛ si wɔ lo? Ngɛ anɔkuale mi ɔ, i ná nɛ nyɛ bɔni nɔ yemi kaa matsɛmɛ konɛ wɔ hu waa piɛɛ nyɛ he kɛ ye nɔ kaa matsɛmɛ. 9 Ejakaa e peeɔ mi kaa Mawu ngɔ wɔ nɛ wa ji bɔfo ɔmɛ ɔ kɛ pee nyagbe nihi nɛ a je mɛ kpo ngɔ tsɔɔ kaa nihi nɛ a bu mɛ gbenɔ fɔ, ejakaa wa ba pee nihi nɛ a ngɛ mɛ hyɛe ngɛ fiɛmi he kɛ ha je ɔ kɛ hiɔwe bɔfohi kɛ adesahi. 10 Kristo he je ɔ, wa pee kuasiahi, se nyɛɛ lɛɛ, nyɛ ji juɛmitsɛmɛ ngɛ Kristo mi; wa gbɔjɔ, se nyɛɛ lɛɛ nyɛ he wa; nihi buɔ nyɛ, se wɔɔ lɛɛ a bui wɔ. 11 Kɛ ba si ngmlɛfia nɛ ɔ mi ɔ, loloolo ɔ, hwɔ ngɛ wɔ yee, nɛ kuma hu ngɛ wɔ yee, nɛ wa hɛɛ wa he gu, nɛ a ngɛ wɔ kongoe,* nɛ wa be hi he 12 nɛ wa gboɔ dengme, nɛ waa kɛ wɔ nitsɛmɛ wa ninehi ngɛ ní tsue. Ke a jɛ wɔ ɔ, wɔɔ lɛɛ wa jɔɔ mɛ; ke a wa wɔ yi mi ɔ, wa toɔ wa tsui si kɛ daa nya; 13 ke a puɛ wa biɛ ɔ, waa kɛ gbi blɛuu haa heto;* wa pee kaa kuku kɛ ha je ɔ, kɛ níhi tsuo a mi dwɔmi kɛ ba si amlɔ nɛ ɔ.

14 I ngɛ nyɛ ní nɛ ɔmɛ ngmae, pi kaa ma kɛ gbe nyɛ zo, se mohu konɛ ma kɛ wo nyɛ ga kaa ye bimɛ nɛ i suɔ. 15 Ejakaa eko ɔ, nyɛ ma ná nɔ hyɛli* 10,000 ngɛ Kristo mi, se ngɛ anɔkuale mi ɔ, nyɛ be tsɛmɛ fuu; ejakaa ngɛ Kristo Yesu mi ɔ, i ba plɛ nyɛ tsɛ kɛ gu sane kpakpa a nɔ. 16 Enɛ ɔ he ɔ, i ngɛ nyɛ he wami woe kaa nyɛɛ kase mi. 17 Lɔ ɔ he je nɛ i ngɛ Timoteo tsɔe kɛ ba nyɛ ngɔ ɔ nɛ, ejakaa e ji ye bi nɛ i suɔ lɛ nɛ e yeɔ anɔkuale ngɛ Nyɔmtsɛ ɔ mi. E ma ba kai nyɛ blɔhi a nɔ nɛ i guɔ kɛ peeɔ níhi ngɛ Kristo Yesu mi ɔ, kaa bɔ nɛ i ngɛ ní tsɔɔe ngɛ he fɛɛ he ngɛ asafo fɛɛ asafo mi ɔ.

18 Ni komɛ ngɛ a he nɔ woe kaa nɔ́ nɛ i be nyɛ ngɔ bae. 19 Se ke Yehowa* suɔ ɔ, e be kɛe kulaa nɛ ma ba nyɛ ngɔ, nɛ ma ba le he wami nɛ nihi nɛ a ngɛ a he nɔ woe ɔ ngɛ, se pi munyuhi nɛ a ngɛ tue ɔ. 20 Ejakaa Mawu Matsɛ Yemi ɔ, pi munyu tumi sane, se mohu he wami. 21 Te nɔ́ nɛ nyɛ suɔ nɛɛ? Anɛ e sa kaa ma ngɔ kpa kɛ ba nyɛ ngɔ lo, aloo ma ngɔ suɔmi kɛ he jɔmi mumi kɛ ba?

5 Ngɛ anɔkuale mi ɔ, a ngɛ dee ke ajuama bɔmi* ngɛ nɔ yae ngɛ nyɛ kpɛti, nɛ jamɛ a ajuama bɔmi* ɔ yɛ nɔ ngɛ je ma amɛ po a kpɛti, lɔ ɔ ji kaa nyumu ko kɛ e tsɛ yo ngɛ.* 2 Nɛ anɛ nyɛ ngɔ enɛ ɔ kɛ ngɛ fĩae lo? Anɛ pi kɔmɔ mohu nɛ e sa kaa nyɛɛ ye konɛ a je nyumu ɔ nɛ e pee nɔ́ nɛ ɔ kɛ je nyɛ kpɛti lo? 3 E ngɛ mi kaa i be nyɛ ngɔ ngɛ nɔmlɔ tso mi mohu lɛɛ, se i ngɛ nyɛ ngɔ ngɛ mumi mi, nɛ i kojo nyumu ɔ nɛ e pee nɔ́ nɛ ɔ momo kaa nɔ́ nɛ ngɛ anɔkuale mi ɔ, i kɛ nyɛ ngɛ. 4 Ke nyɛ bua nyɛ he nya ngɛ wa Nyɔmtsɛ Yesu biɛ mi nɛ nyɛ le kaa i kɛ nyɛ ngɛ ngɛ mumi mi, nɛ wa Nyɔmtsɛ Yesu he wami ɔ hu kɛ nyɛ ngɛ ɔ, 5 lɛɛ e sa nɛ nyɛɛ tu jamɛ a nyumu ɔ ngɔ wo Satan dɛ kɛ ha he lo ɔ hɛ mi kpatami, konɛ a he mumi ɔ yi wami ngɛ Nyɔmtsɛ ɔ ligbi ɔ nɔ.

6 Fĩami nɛ nyɛ ngɛ fĩae ɔ hí. Anɛ nyɛ li kaa masa nyafii haa nɛ ma a tsuo gboɔ* lo? 7 Nyɛɛ ngɔ masa momo ɔ kɛ pue he konɛ nyɛɛ pee ma ehe,* be abɔ nɛ masa ko be nyɛ mi ɔ. Ejakaa ngɛ anɔkuale mi ɔ, a ngɔ Kristo nɛ ji wa He Tsɔmi jijɔ bi ɔ kɛ sã afɔle. 8 Lɛɛ enɛ ɔ he ɔ, nyɛ ha nɛ waa ye gbijlɔ ɔ, pi kɛ masa momo aloo yayami kɛ yi wu tso ní peepee masa, mohu ɔ, kɛ tsui nɛ mi tsɔ kɛ anɔkuale abolo nɛ masa be mi.

9 Ngɛ ye sɛ womi ɔ mi ɔ, i ngma nyɛ kaa nyɛɛ kɛ nihi nɛ a bɔɔ ajuama* a nɛ kpa bɔmi, 10 pi nɛ i ngɛ tsɔɔe kaa nyɛɛ kɛ je nɛ ɔ mi ajuama bɔli,* aloo hɛ tsuli, aloo ojo fiali, aloo wɔ jali nɛ kpa bɔmi kulaa. Kaa jã nɛ i ngɛ tsɔɔe ɔ, jinɛ ngɛ anɔkuale mi ɔ, e ma bi nɛ nyɛɛ je je ɔ mi. 11 Mohu ɔ, amlɔ nɛ ɔ, i ngɛ nyɛ ngmae kaa nyɛɛ kɛ nɔ fɛɛ nɔ ko nɛ a tsɛɔ lɛ nyɛmi nɛ e ji ajuama bɔlɔ,* aloo hɛ tsulɔ, aloo wɔ jalɔ, aloo nɔ jɛlɔ,* aloo dã delɔ, aloo ojo fialɔ ɔ nɛ kpa bɔmi, nyɛɛ kɛ jamɛ a nɔ ɔ nɛ ko ye ní tete po. 12 Ejakaa nihi nɛ a ngɛ se ɔ, mɛni a kojomi kɔɔ ngɛ ye he? Anɛ pi nyɛ nɛ nyɛ kojoɔ nihi nɛ a ngɛ mi ɔ, 13 be mi nɛ Mawu kojoɔ nihi nɛ a ngɛ se ɔ lo? “Nyɛ je nɔmlɔ yayami ɔ kɛ je nyɛ kpɛti.”

6 Ke nyɛ ti nɔ ko kɛ nɔ ko ná sane ɔ, anɛ e jeɔ blɔ nɛ e ngɔɔ sane ɔ kɛ yaa kojomi he ngɛ nihi nɛ a dɛ ɔmɛ a hɛ mi mohu pe ni klɔuklɔu ɔmɛ a hɛ mi lo? 2 Aloo anɛ nyɛ li kaa ni klɔuklɔu ɔmɛ maa kojo je ɔ lo? Nɛ ke nyɛ lɛ nyɛ maa kojo je ɔ, anɛ nyɛ he sui kɛ ha sane tsɔwitsɔwihi a mi hyɛmi lo? 3 Anɛ nyɛ li kaa wa maa kojo hiɔwe bɔfohi lo? Ke jã a, lɛɛ mɛni he je nɛ nyɛ be nyɛe maa kojo si himi nɛ ɔ mi sanehi ɔ? 4 Lɛɛ ke si himi nɛ ɔ mi sanehi ngɛ nɛ́ e sa kaa nyɛɛ ye ɔ, anɛ nyumuhi nɛ asafo ɔ bui mɛ ɔ ji nihi nɛ nyɛ hlaa mɛ kaa a kojo lo? 5 I ngɛ munyu tue konɛ ma kɛ gbe nyɛ zo. Anɛ juɛmitsɛ kake ngmelu po be nyɛ kpɛti nɛ e ma nyɛ maa kojo e nyɛmimɛ a kpɛti sanehi lo? 6 Mohu ɔ, nyɛmi ngɔɔ nyɛmi kɛ yaa kojomi he, e ngɔɔ lɛ kɛ yaa nihi nɛ a he we yi ɔmɛ po a hɛ mi!

7 Ngɛ anɔkuale mi ɔ, ke nyɛɛ kɛ nyɛ nyɛmimɛ ngɛ sane yee ngɛ mlaa nya a, lɔ ɔ po tsɔɔ kaa nyɛ gbee si momo. Mɛni he je nɛ nyɛ ha we nɛ a tɔ̃ nyɛ nɔ mohu ɔ? Mɛni he je nɛ nyɛ ha we nɛ a sisi nyɛ mohu ɔ? 8 Se nyɛ mohu lɛ nyɛ ngɛ tɔ̃e nɛ nyɛ ngɛ nihi sisie, nɛ nyɛ ngɛ nyɛ nyɛmimɛ po jã pee!

9 Aloo anɛ nyɛ li kaa nihi nɛ a dɛ ɔ, a nine be Mawu Matsɛ Yemi ɔ nɔ sue lo? Nyɛ ko ha nɛ a sisi nyɛ. Ajuama bɔli,* wɔ jali, gba puɛli, nyumuhi nɛ a ngɔɔ a he kɛ haa nyumu kɛ nyumu a bɔmi nami ní peepeehi, nyumuhi nɛ a kɛ nyumuhi naa bɔmi,* 10 juli, hɛ tsuli, dã deli, nɔ jɛli,* kɛ ojo fiali a nine be Mawu Matsɛ Yemi ɔ nɔ sue. 11 Se kɛ̃ ɔ, jinɛ jã ji bɔ nɛ nyɛ ti ni komɛ ngɛ. Se a fɔ nyɛ he nɛ nyɛ he tsɔ; a tsu nyɛ he; a bu nyɛ dali ngɛ Nyɔmtsɛ Yesu Kristo biɛ mi kɛ wa Mawu ɔ mumi ɔ mi.

12 Mlaa ngmɛɔ mi blɔ* kaa ma pee níhi tsuo, se pi níhi tsuo nɛ se nami ngɛ he. Mlaa ngmɛɔ mi blɔ kaa ma pee níhi tsuo, se i be hae nɛ nɔ́ ko nɔ́ ko nɛ kudɔ mi.* 13 Niye ní ngɛ kɛ ha mi mi, nɛ mi mi hu ngɛ kɛ ha niye ní, se Mawu ma ha nɛ mɛ tsuo a se maa po. Nɔmlɔ tso ɔ be kɛ ha ajuama bɔmi,* mohu ɔ, kɛ ha Nyɔmtsɛ ɔ, nɛ Nyɔmtsɛ ɔ hu ngɛ kɛ ha nɔmlɔ tso ɔ. 14 Ejakaa Mawu tle Nyɔmtsɛ ɔ si, nɛ wɔ hu e maa gu e he wami ɔ nɔ kɛ tle wɔ si kɛ je gbeje.

15 Anɛ nyɛ li kaa nyɛ nɔmlɔ tso ɔmɛ ji Kristo he níhi lo? Lɛɛ anɛ e sa kaa ma ngɔ Kristo he ní ɔmɛ kɛ ho nɛ ma ya tsa mɛ kɛ wo yaholɔ* ko he lo? Dɛbi! 16 Anɛ nyɛ li kaa nɔ fɛɛ nɔ nɛ a tsa lɛ kɛ wo yaholɔ* ko he ɔ, e kɛ yaholɔ* ɔ ba peeɔ nɔmlɔ tso kake lo? Ejakaa e de ke, “mɛ ni enyɔ ɔmɛ a maa pee he lo kake.” 17 Se nɔ fɛɛ nɔ nɛ a tsa lɛ kɛ wo Nyɔmtsɛ ɔ he ɔ, e kɛ lɛ pee kake ngɛ mumi mi. 18 Nyɛɛ tu ajuama bɔmi* nya fo! Yayami kpahi nɛ adesa peeɔ ɔ ngɛ e nɔmlɔ tso ɔ se, se nɔ fɛɛ nɔ nɛ e bɔɔ ajuama a lɛɛ, e ngɛ yayami pee kɛ ngɛ lɛ nitsɛ e nɔmlɔ tso ɔ sie. 19 Anɛ nyɛ li kaa nyɛ nɔmlɔ tso ɔ ji mumi klɔuklɔu ɔ nɛ ngɛ nyɛ mi nɛ nyɛ nine su nɔ kɛ je Mawu ngɔ ɔ sɔlemi we lo? Jehanɛ se hu ɔ, nyɛ be nyɛ nitsɛmɛ nyɛ dɛ he, 20 ejakaa a he nyɛ kɛ jua wawɛ. Lɔ ɔ he ɔ, e sa nɛ nyɛɛ wo Mawu hɛ mi nyami ngɛ nyɛ nɔmlɔ tso ɔ mi.

7 Jehanɛ ɔ, kɛ kɔ níhi nɛ nyɛ ngma a he ɔ, e hi wawɛɛ kaa nyumu be yo he tae;* 2 se akɛnɛ ajuama bɔmi* pɔ he wawɛɛ he je ɔ, nyɛ ha nɛ nyumu fɛɛ nyumu nɛ e ná lɛ nitsɛ e yo, nɛ yo fɛɛ yo nɛ e ná lɛ nitsɛ e huno. 3 Huno ɔ nɛ e ngɔ nɔ́ nɛ ji e yo ɔ blɔ nya nɔ́ ɔ kɛ ha lɛ, nɛ yogbayo ɔ hu nɛ e pee jã nɔuu kɛ ha e huno ɔ. 4 Yogbayo ɔ be he wami ngɛ lɛ nitsɛ e nɔmlɔ tso ɔ nɔ, se e huno ɔ lɛ e ngɛ he wami ngɛ nɔ; jã kɛ̃ nɛ huno ɔ hu be he wami ngɛ lɛ nitsɛ e nɔmlɔ tso ɔ nɔ, se e yo ɔ lɛ e ngɛ he wami ngɛ nɔ. 5 Nyɛ kó ha nɛ e bɔ nyɛ sibi kaa ja nyɛ tsuo nyɛ kplɛɛ nɔ kɛ ya si be nɛ nyɛ maa to, konɛ nyɛ ná be kɛ ha sɔlemi nɛ nyɛ ba bla ekohu, bɔ nɛ pee nɛ he nɔ yemi nɛ nyɛ be ɔ he je ɔ, Satan nɛ ko ya nɔ nɛ e hi nyɛ kae. 6 Se nɔ́ nɛ i ngɛ dee nɛ ɔ ji he blɔ kɛkɛ nɛ i ngɛ nyɛ hae, se pi kita. 7 Se i ná nɛ nyumuhi tsuo ngɛ kaa imi. Se kɛ̃ ɔ, nɔ fɛɛ nɔ ngɛ lɛ nitsɛ e nike ní nɛ e ná kɛ je Mawu ngɔ, nɔ kake nɔ́ ngɛ kikɛ nɛ ɔ, nɛ nɔ kpa hu nɔ́ ngɛ kikɛ nɛ ɔ.

8 Jehanɛ ɔ, i ngɛ nihi nɛ a sɛ we gba si himi mi kɛ yalɔyihi* dee kaa ke a ya nɔ nɛ a hi si kaa bɔ nɛ i ngɛ nɛ ɔ, e maa hi ha mɛ saminya. 9 Se ke a be he nɔ yemi ɔ, ha nɛ a sɛ gba si himi mi, ejakaa e hi saminya kaa a maa sɛ gba si himi mi pe nɛ akɔnɔ ma hyi mɛ tɔtɔɔtɔ.

10 Kɛ ha nihi nɛ a sɛ gba si himi mi ɔ, i ngɔ blɔ tsɔɔmi kɛ ngɛ mɛ hae, pi imi, se mohu Nyɔmtsɛ ɔ, kaa yogbayo nɛ e kó je e huno he. 11 Se ke e ná nɛ e je ɔ, ha nɛ e ya nɔ nɛ e hi si nɛ e ko gba, ke pi jã a, lɛɛ e kɛ e huno ɔ nɛ a ya dla; nɛ e sɛ nɛ huno hu nɛ e je e yo he.

12 Se kɛ ha ni kpa amɛ ɔ, i ngɛ dee ke, ee, imi, pi Nyɔmtsɛ ɔ: Ke nyɛminyumu ko ngɛ yo nɛ e he we yi, nɛ yo ɔ kplɛɛ kaa e kɛ lɛ maa hi si ɔ, e ko je e he; 13 nɛ ke yo ko hu ngɛ huno nɛ e he we yi nɛ e huno ɔ kplɛɛ kaa e kɛ lɛ maa hi si ɔ, e ko je e he. 14 Ejakaa a tsu huno ɔ nɛ e he we yi ɔ he kɛ gu e yo ɔ nɔ, nɛ a tsu yogbayo ɔ nɛ e he we yi ɔ hu he kɛ gu nyɛminyumu ɔ nɔ; ke pi jã a, jinɛ nyɛ bimɛ a he be tsɔe, se amlɔ nɛ ɔ lɛɛ a ngɛ klɔuklɔu. 15 Se ke nɔ nɛ e he we yi ɔ ma e juɛmi nya si kaa e maa je* ɔ, lɛɛ ha nɛ e ya; ngɛ si fɔfɔɛ kaa jã mi ɔ, nɔ́ ko fi we nyɛminyumu ko aloo nyɛmiyo ko, mohu ɔ, Mawu tsɛ nyɛ kɛ ha tue mi jɔmi. 16 Ejakaa yogbayo, kɛ o ma plɛ kɛ le ke ji kaa o ma he o huno ɔ yi wami? Aloo huno, kɛ o ma plɛ kɛ le ke ji kaa o ma he o yo ɔ yi wami?

17 Se kɛ̃ ɔ, kaa bɔ nɛ Yehowa* susu kɛ ha nɔ fɛɛ nɔ ɔ, nyɛ ha nɛ nɔ fɛɛ nɔ nɛ e nyɛɛ kaa bɔ nɛ e ngɛ nɛ Mawu kɛ tsɛ lɛ ɔ. Nɛ enɛ ɔ he ɔ, i kɛ blɔ tsɔɔmi ngɛ asafo ɔmɛ tsuo hae. 18 Benɛ a ma tsɛ nyumu ko ɔ, anɛ a po lɛ momo lo? E ko pee e he mɔmlɔtɔtsɛ hu. A tsɛ nɔ ko be mi nɛ e ji mɔmlɔtɔtsɛ lo? E ko ha nɛ a po lɛ. 19 Pi nɔ́ ko ji nɔ pomi, nɛ jã kɛ̃ nɛ ke a pui nɔ ko hu ɔ, pi nɔ́ ko; Mawu kita amɛ a nɔ yemi mohu ji nɔ́ nɛ e he hia. 20 Si fɔfɔɛ fɛɛ si fɔfɔɛ mi nɛ nɔ fɛɛ nɔ ngɛ nɛ a kɛ tsɛ lɛ ɔ, ha nɛ e hi mi jã. 21 Anɛ benɛ a ma tsɛ mo ɔ, o ji nyɔguɛ lo? Ko ha nɛ e hao mo; se ke o ma nyɛ maa ye o he ɔ, lɛɛ ngɔɔ he blɔ ɔ kɛ pee jã. 22 Ejakaa nɔ fɛɛ nɔ nɛ a tsɛ lɛ ngɛ Nyɔmtsɛ ɔ mi be mi nɛ e ji nyɔguɛ ɔ, e ji nyumu nɛ e ye e he nɛ e ngɛ kɛ ha Nyɔmtsɛ ɔ; jã kɛ̃ nɛ nɔ fɛɛ nɔ nɛ a tsɛ lɛ be mi nɛ e ji nyumu nɛ a ngmɛɛ e he ɔ, e ji Kristo nyɔguɛ. 23 A he nyɛ kɛ jua wawɛ; nyɛ kpa nyɔguɛ peemi kɛ ha adesahi. 24 Nyɛmimɛ, si fɔfɔɛ fɛɛ si fɔfɔɛ mi nɛ nɔ fɛɛ nɔ ngɛ nɛ a kɛ tsɛ lɛ ɔ, ha nɛ e hi mi jã ngɛ Mawu hɛ mi.

25 Jehanɛ ɔ, ngɛ nihi nɛ a sɛ we gba si himi mi hyɛ* ɔ a blɔ fa mi ɔ, i be kita ko nɛ je Nyɔmtsɛ ɔ ngɔ, se i ngɛ ye juɛmi tsɔɔe kaa nɔ ko nɛ Nyɔmtsɛ ɔ na lɛ mɔbɔ konɛ e ye anɔkuale. 26 Enɛ ɔ he ɔ, i susu kaa nɔ́ nɛ hi pe kulaa ji kaa nyumu ko maa ya nɔ maa hi si kaa bɔ nɛ e ngɛ ɔ ngɛ he hiami nɛ ngɛ amlɔ nɛ ɔ he je. 27 Anɛ a fĩ mo kɛ mɛtɛ yogbayo he lo? Ko hla kaa a pɛne mo. Anɛ o ye o he ngɛ yogbayo he lo? Jɔɔ yo nɛ o maa ngɔ hlami. 28 Se ke o ná nɛ o sɛ gba si himi mi po ɔ, o pee we yayami. Nɛ ke nɔ ko nɛ e sɛ we gba si himi mi sɛ gba si himi mi ɔ, jamɛ a nɔ ɔ pee we yayami. Se ni nɛmɛ nɛ a maa pee jã a maa na amanehlu ngɛ a he lo mi. Se i ngɛ mɔde bɔe kaa ma ha nɛ nyɛɛ ye nyɛ he.

29 Jehanɛ se hu ɔ, nyɛmimɛ, nɔ́ nɛ i ngɛ dee ji kaa be ɔ nɛ piɛ ɔ pi hu. Kɛ je amlɔ nɛ ɔ kɛ yaa a, nyɛ ha nɛ nihi nɛ a ngɛ yihi ɔ nɛ a pee kaa nɔ́ nɛ a be eko, 30 nɛ nihi nɛ a foɔ ya a nɛ a pee kaa ni nɛmɛ nɛ a fo we ya, nɛ nihi nɛ a nyaa a nɛ a pee kaa ni nɛmɛ nɛ a nya we, nɛ nihi nɛ a heɔ níhi ɔ nɛ a pee kaa ni nɛmɛ nɛ a be nɔ́ ko, 31 nɛ nihi nɛ a kɛ je ɔ ngɛ ní tsue ɔ nɛ a pee kaa ni nɛmɛ nɛ a kɛ tsu we ní kɛ pí si; ejakaa níhi nɛ yaa nɔ ngɛ je nɛ ɔ mi ɔ ngɛ tsakee. 32 Ngɛ anɔkuale mi ɔ, i suɔ kaa nyɛɛ ye nyɛ he ngɛ yeyeeye peemi he. Nyumu nɛ e ngɔɛ yo ɔ peeɔ yeyeeye ngɛ Nyɔmtsɛ ɔ níhi a he, bɔ nɛ e maa pee ha kɛ sa Nyɔmtsɛ ɔ hɛ mi. 33 Se nyumu nɛ e ngɔ yo ɔ peeɔ yeyeeye ngɛ je ɔ mi níhi a he, nɔ́ nɛ e maa pee kɛ sa e yo ɔ hɛ mi, 34 nɛ e juɛmi ngɛ ní enyɔ a nɔ. Jehanɛ se hu ɔ, yo nɛ e sɛ we gba si himi mi aloo yo nɛ e li nyumu ɔ peeɔ yeyeeye ngɛ Nyɔmtsɛ ɔ níhi a he kaa e maa pee klɔuklɔu ngɛ e nɔmlɔ tso ɔ mi kɛ e mumi ɔ mi hulɔ. Se yo nɛ e sɛ gba si himi mi ɔ peeɔ yeyeeye ngɛ je ɔ mi níhi a he, nɔ́ nɛ e maa pee kɛ sa e huno ɔ hɛ mi. 35 Se i ngɛ enɛ ɔ dee konɛ e hi ha nyɛ nitsɛmɛ, pi kaa ma tsi nyɛ nya,* mohu ɔ, ma wo nyɛ he wami konɛ nyɛɛ pee nɔ́ nɛ sa, nɛ nyɛ sɔmɔ Nyɔmtsɛ ɔ be fɛɛ be nɛ nɔ́ ko nɛ ko je nyɛ juɛmi ngɛ nɔ.

36 Se ke nɔ ko susuɔ kaa akɛnɛ e sɛ we gba si himi mi* he je ɔ, bɔ nɛ e ngɛ e ní pee ha a hí ɔ, ke ji kaa e be nihewi* a we akɔnɔ be ɔ nya a, lɛɛ nɔ́ nɛ e sa kaa e ba ji nɛ ɔ nɛ: Nyɛ ha nɛ e pee nɔ́ nɛ e suɔ; e pee we yayami. Ha nɛ a sɛ gba si himi mi. 37 Se ke nɔ ko ma nya si ngɛ e tsui mi nɛ nɔ́ ko nyɛ we e nɔ, se e ngɛ nɔ́ nɛ e suɔ kaa e maa pee ɔ nɔ he wami, nɛ e ma nya si ngɛ e tsui mi kaa e maa hi si nɛ e be gba si himi mi sɛe* ɔ, e maa hi ha lɛ. 38 Jã kɛ̃ nɛ nɔ fɛɛ nɔ nɛ e maa sɛ gba si himi mi ɔ hu ma ná he se, se nɔ fɛɛ nɔ nɛ e be gba si himi mi sɛe ɔ, e ma ná he se saminya.

39 Be abɔ nɛ yogbayo ko huno ngɛ wami mi ɔ, mlaa fĩ lɛ. Se ke e huno ɔ nɔ gbenɔ mahe mi ɔ, lɛɛ e ngɛ he blɔ nɛ e kɛ nɔ fɛɛ nɔ nɛ e suɔ ɔ sɛɔ gba si himi mi, se ngɛ Nyɔmtsɛ ɔ mi pɛ. 40 Se ngɛ ye susumi nya a, ke e hi si kaa bɔ nɛ e ngɛ ɔ, e bua maa jɔ wawɛɛ; nɛ ngɛ anɔkuale mi ɔ, i susu kaa imi hu i ngɛ Mawu mumi ɔ.

8 Jehanɛ ɔ, ngɛ niye ní nɛ a kɛ sã afɔle kɛ ha wɔhi ɔ blɔ fa mi ɔ: Wa le kaa wɔ tsuo wa ngɛ nile. Nile woɔ e he nɔ, se suɔmi fiaa nɔ kɛ maa si. 2 Ke nɔ ko susuɔ kaa e le nɔ́ ko ɔ, e li jamɛ a nɔ́ ɔ kaa bɔ nɛ e sa kaa e le ɔ lolo. 3 Se ke nɔ ko suɔ Mawu ɔ, Mawu hu le jamɛ a nɔ ɔ.

4 Jehanɛ ɔ, ngɛ niye ní nɛ a kɛ sã afɔle kɛ ha wɔhi a yemi blɔ fa mi ɔ, wa le kaa wɔ be he wami ko kulaa ngɛ je ɔ mi, nɛ Mawu ko be kaa nɔ kake pɛ. 5 Ejakaa e ngɛ mi kaa ní komɛ ngɛ nɛ a tsɛɔ mɛ mawuhi ngɛ hiɔwe aloo zugba a nɔ, kaa bɔ nɛ “mawuhi” fuu kɛ “nyɔmtsɛmɛ” fuu ngɛ ɔ mohu lɛɛ, 6 se ngɛ wɔɔ lɛɛ wa blɔ fa mi ɔ, ngɛ anɔkuale mi ɔ, Mawu kake lɛ ngɛ, Tsɛ ɔ, nɔ nɛ e mi lɛ níhi nɛ ngɛ ɔ tsuo je, nɛ wa ngɛ kɛ ha lɛ ɔ; nɛ Nyɔmtsɛ kake lɛ ngɛ, Yesu Kristo, nɔ nɛ e nɔ lɛ níhi nɛ ngɛ ɔ tsuo gu kɛ ba, nɛ e nɔ lɛ wɔ hu wa gu kɛ ba.

7 Se pi nihi tsuo nɛ a ngɛ nile nɛ ɔ. Se ni komɛ lɛɛ akɛnɛ be ko nɛ be ɔ a ja wɔhi he je ɔ, a yeɔ niye ní kaa nɔ́ ko nɛ a kɛ sã afɔle kɛ ha wɔ, nɛ akɛnɛ a he nile gbɔjɔ he je ɔ, lɔ ɔ bleɔ a he nile ɔ. 8 Se niye ní be wɔ ngɔe kɛ su Mawu he haa; ke wa yi ɔ, wa gbee we si, nɛ ke wa ye hu ɔ, wa ná we nɔ́ ko tsɔ. 9 Se nyɛɛ ya nɔ nɛ nyɛɛ hyɛ nɛ hi nɛ he blɔ nɛ nyɛ ngɛ nɛ nyɛɛ kɛ mwɔɔ nyɛ yi mi kpɔ ɔ nɛ ko pee tɛmi tɛ kɛ ha nihi nɛ a gbɔjɔ ɔ. 10 Ejakaa mo nɛ o ngɛ nile ɔ, ke nɔ ko na mo nɛ o ngɛ ní yee ngɛ wɔ tsu ko mi ɔ, anɛ nɔ nɛ e gbɔjɔ ɔ, e he nile be gboe hluu po kaa e ma ya ye niye ní nɛ a kɛ sã afɔle kɛ ha wɔhi lo? 11 Enɛ ɔ he ɔ, o kɛ o nile ɔ ngɛ nɔmlɔ nɛ e gbɔjɔ ɔ hɛ mi kpatae, o nyɛmi ɔ nɛ Kristo ba gbo ngɛ e he ɔ. 12 Ke nyɛ pee yayami kɛ si nyɛ nyɛmimɛ ngɛ blɔ nɛ ɔ nɔ, nɛ nyɛ plaa a he nile nɛ gbɔjɔ ɔ, nyɛ ngɛ yayami pee kɛ ngɛ Kristo sie. 13 Lɔ ɔ he ɔ, ke niye ní haa nɛ ye nyɛmi nane tɔ̃tɔ̃ɔ ɔ, i be muɔ lo yee hu gblegbleegble konɛ ma ko ha nɛ ye nyɛmi ɔ nane nɛ tɔ̃tɔ̃.

9 Anɛ pi nɔ nɛ e ye e he ji mi lo? Anɛ pi bɔfo ji mi lo? Anɛ i nɛ Yesu wa Nyɔmtsɛ ɔ lo? Anɛ pi nyɛ ji ye ní tsumi ngɛ Nyɔmtsɛ ɔ mi lo? 2 Ke pi bɔfo ji mi kɛ ha ni kpahi po ɔ, niinɛ, ngɛ anɔkuale mi ɔ, i ji bɔfo kɛ ha nyɛ! Ejakaa nyɛ ji nya sɔumi nɔ́ nɛ maa ye bɔfo ní tsumi ɔ nɔ mi ngɛ Nyɔmtsɛ ɔ mi.

3 Nya jemi nɛ i ngɛ kɛ ha nihi nɛ a ngɛ ye sane mi hyɛe ɔ lɛ nyɛɛ se nɛ ɔ nɛ: 4 Anɛ wa be he blɔ kaa wa yeɔ ní nɛ wa nuɔ ní lo? 5 Anɛ wa be he blɔ kaa waa kɛ yo ko nɛ e he ye* nɛ e ji wa yo nyɛɛɔ kaa bɔ nɛ e ji ngɛ bɔfo kpa amɛ, kɛ Nyɔmtsɛ ɔ nyɛminyumu ɔmɛ, kɛ Kefa* a blɔ fa mi ɔ lo? 6 Aloo anɛ i kɛ Banaba pɛ lɛ wa be he blɔ kaa wa jɔɔ ní nɛ wa tsuɔ kɛ hyɛɛ wa he ɔ tsumi lo? 7 Ta bulɔ te nɛɛ lɛ e jeɔ lɛ nitsɛ e kotoku mi kɛ sɔmɔɔ? Mɛnɔ peeɔ wai ngmɔ nɛ e yi e mi yiblii ɔ eko? Aloo to nɔ hyɛlɔ te nɛɛ lɛ e hyɛɛ tohi a nɔ nɛ e nui to ɔmɛ a nyɔ nyu ɔ eko?

8 Anɛ adesahi a susumi nya nɛ i ngɛ enɛ ɔ dee ngɛ lo? Aloo anɛ Mlaa a hu tui ní nɛ ɔmɛ a he munyu lo? 9 Ejakaa a ngma ngɛ Mose Mlaa a mi ke: “Ke o kɛ na ku ngɛ ngma mi sae ɔ, e sɛ nɛ o fi e nya.” Anɛ na kuhi a he nɛ Mawu ngɛ susue lo? 10 Aloo anɛ pi wa he tutuutu nɛ e de jã ngɛ ɔ lo? Niinɛ, wa he je nɛ a ngma ngɛ, ejakaa nyumu nɛ e kɛ na kpakplaa huɔ kɛ nyumu nɛ e saa ngma mi ɔ, e sa nɛ a pee jã kɛ hɛ kɛ nɔ fɔmi kaa a nine maa su eko nɔ.

11 Ke wa du mumi mi níhi ngɛ nyɛ kpɛti nɛ wa kpa he lo nya yemi kɛ buami kɛ je nyɛ ngɔ ɔ, anɛ wa pee nɔ́ ko tsɔ lo? 12 Ke nyumu kpahi ngɛ he blɔ nɛ ɔ kaa a ngɔɔ níhi ngɛ nyɛ dɛ ɔ, lɛɛ anɛ wa be jamɛ a he blɔ ɔ pi mɛ lo? Se kɛ̃ ɔ, waa kɛ he blɔ nɛ ɔ tsu we ní, se wa ngɛ si fĩe ngɛ nɔ́ fɛɛ nɔ́ mi, konɛ wa ko tsi Kristo he sane kpakpa a nya ngɛ blɔ ko blɔ ko nɔ. 13 Anɛ nyɛ li kaa nyumuhi nɛ a ngɛ ní tsumihi nɛ a ngɛ klɔuu tsue ɔ yeɔ sɔlemi we ɔ ní ɔ eko, nɛ ni nɛmɛ nɛ a ngɛ sɔmɔe be fɛɛ be ngɛ afɔle sami la tɛ ɔ he ɔ, afɔle sami la tɛ ɔ nɔ ní ɔmɛ eko nɛ mɛ hu a nine suɔ nɔ lo? 14 Jã kɛ̃ nɛ Nyɔmtsɛ ɔ fã ke ni nɛmɛ nɛ a ngɛ sane kpakpa a jajee ɔ nɛ a gu sane kpakpa a nɔ kɛ hyɛ a he.

15 Se imi lɛɛ i ngɔɛ he blɔ nɛ ɔmɛ ekoeko kɛ tsu we ní. Ngɛ anɔkuale mi ɔ, pi nɛ i ngma ní nɛ ɔmɛ konɛ a pee nɔ́ nɛ ɔ kɛ ha mi, ejakaa e maa hi wawɛɛ kaa ma gbo mohu pe nɛ—nɔ ko be nyɛe ma kpɔ̃ níhi nɛ i daa nɔ kɛ fĩaa a ngɛ ye dɛ! 16 Jehanɛ ɔ, ke i ngɛ sane kpakpa a jajee ɔ, pi lɔ ɔ nɛ ma kɛ fĩa, ejakaa e ji ye blɔ nya ní tsumi kaa ma pee jã. Niinɛ, ke i jaje we sane kpakpa a, musu tloo mi! 17 Ke i pee nɔ́ nɛ ɔ ngɛ ye suɔmi nya a, i ngɛ hiɔ womi; se ke pi ye suɔmi nya po nɛ i pee ɔ, loloolo ɔ, i ngɛ we nɔ hyɛmi ní tsumi ko nɛ a tu ngɔ wo ye dɛ. 18 Ke jã a, lɛɛ mɛni ji ye hiɔ womi mɔ? Kaa be mi nɛ i ngɛ sane kpakpa a jajee ɔ, ma ngɔ sane kpakpa a kɛ ha nɛ́ hiɔ womi ko be he, konɛ ma ko ngɔ he blɔ nɛ i ngɛ ngɛ sane kpakpa a mi ɔ kɛ tsu ní ngɛ blɔ nɛ dɛ nɔ.

19 Ejakaa e ngɛ mi kaa i ye ye he ngɛ nihi tsuo a he mohu lɛɛ, se i pee ye he nyɔguɛ kɛ ha nihi tsuo, bɔ nɛ pee nɛ ye nine nɛ nyɛ nɛ e su nihi babauu a nɔ. 20 I ba pee kaa Yuda no kɛ ha Yuda bi konɛ ye nine nɛ su Yuda bi a nɔ; i ba pee kaa nɔ ko nɛ e ngɛ mlaa sisi kɛ ha ni nɛmɛ nɛ a ngɛ mlaa sisi ɔ konɛ ye nine nɛ su a nɔ, pohu imi nitsɛ lɛɛ i be mlaa sisi. 21 I ba pee kaa nɔ ko nɛ e be mlaa kɛ ha ni nɛmɛ nɛ a be mlaa a konɛ ye nine nɛ su a nɔ, pohu pi kaa i be mlaa ngɛ Mawu blɔ fa mi, se i ngɛ mlaa sisi ngɛ Kristo blɔ fa mi. 22 I ba pee kaa nɔ ko nɛ e gbɔjɔ kɛ ha ni nɛmɛ nɛ a gbɔjɔ ɔ, konɛ ye nine nɛ su nihi nɛ a gbɔjɔ ɔmɛ a nɔ. I ba plɛ níhi tsuo kɛ ha nimli slɔɔtoslɔɔtohi tsuo, konɛ ma gu blɔ fɛɛ blɔ nɛ ma nyɛ nɔ kɛ he a ti ni komɛ a yi wami. 23 Se i peeɔ níhi tsuo ngɛ sane kpakpa a he je, konɛ ma fiɛɛ kɛ ha ni kpahi.

24 Anɛ nyɛ li kaa nihi nɛ a kaa fo ɔ, mɛ tsuo a tuɔ fo ɔ, se nɔ kake pɛ lɛ e nine suɔ kunimi yemi jlasi ɔ nɔ lo? Nyɛɛ tu fo ɔ bɔ nɛ nyɛ nine maa su nɔ. 25 Jehanɛ ɔ, nɔ fɛɛ nɔ nɛ e kɛ e he woɔ koli simi mi* ɔ, e yeɔ e he nɔ ngɛ níhi tsuo a mi. Ngɛ anɔkuale mi ɔ, a peeɔ jã konɛ a nine nɛ su jlasi nɛ ma nyɛ ma puɛ nɔ, se wɔɔ lɛɛ, jlasi nɛ puɛ we. 26 Enɛ ɔ he ɔ, blɔ nɔ nɛ i gu kɛ ngɛ fo ɔ tue ɔ, i tui kaa nɔ ko nɛ e kɛ oti ko mɛ e hɛ mi; blɔ nɔ nɛ i gu kɛ ngɛ ye kɔ̃ ɔmɛ fiae ɔ, i ngɛ fiae bɔ nɛ pee nɛ ma ko hi kɔɔhiɔ mi fiaae; 27 mohu ɔ, i waa ye nɔmlɔ tso ɔ yi mi* nɛ i hɛɛɔ lɛ kaa nyɔguɛ, bɔ nɛ pee nɛ ke i fiɛɛ ha ni kpahi ta a, imi nitsɛ lɛɛ, ma ko ba pee nɔ ko nɛ e sɛ* ngɛ blɔ ko blɔ ko nɔ.

10 Jehanɛ ɔ, nyɛmimɛ, i suɔ nɛ nyɛɛ le kaa wa nɛmɛ ɔmɛ tsuo hi bɔku ɔ sisi nɛ mɛ tsuo a gu wo ɔ mi 2 nɛ a gu bɔku ɔ kɛ wo ɔ nɔ kɛ baptisi mɛ tsuo kɛ wo Mose mi, 3 nɛ mɛ tsuo a ye mumi mi niye ní kake too ɔ nɔuu, 4 nɛ mɛ tsuo a nu mumi mi nyu kake too ɔ nɔuu. Ejakaa jinɛ a nuɔ nyu nɛ jeɔ mumi mi tɛ sa a nɛ e nyɛɛ a se ɔ mi ɔ, nɛ jamɛ a tɛ sa a daa si kɛ ha* Kristo. 5 Se kɛ̃ ɔ, Mawu bua jɔɛ a ti nihi babauu a he, lɔ ɔ he ɔ, a fiaa mɛ ní kɛ pue si ngɛ nga a nɔ.

6 Amlɔ nɛ ɔ, ní nɛ ɔmɛ ba pee nɔ hyɛmi níhi kɛ ha wɔ konɛ wa ko ná ní yayamihi a he akɔnɔ, kaa bɔ nɛ mɛɛ a ná he akɔnɔ ɔ. 7 Jã kɛ̃ nɛ wa ko ba pee wɔ jali kaa bɔ nɛ a ti ni komɛ pee ɔ; kaa bɔ nɛ a ngma a: “Ni ɔmɛ hi si nɛ a ye ní nɛ a nu ní. Kɛkɛ nɛ a te si nɛ a je a hɛja.” 8 Jã kɛ̃ nɛ nyɛ ko ha nɛ waa bɔ ajuama* kaa bɔ nɛ a ti ni komɛ bɔ ajuama* nɛ nɔ́ nɛ je mi kɛ ba ji kaa a kpɛti nihi 23,000 sɔuu nɔ ngɛ ligbi kake pɛ mi ɔ. 9 Jã kɛ̃ nɛ nyɛ ko ha nɛ waa ka Yehowa* kaa bɔ nɛ a ti ni komɛ ka lɛ nɛ nɔ́ nɛ je mi kɛ ba ji kaa sinɔhi kpata a hɛ mi ɔ. 10 Jã kɛ̃ nɛ wa ko pee nihi nɛ a tuɔ níhi a he munyu nyanyaanya kaa bɔ nɛ a ti ni komɛ tu níhi a he munyu nyanyaanya nɛ nɔ́ nɛ je mi kɛ ba ji kaa hɛ mi kpatalɔ ɔ kpata a hɛ mi ɔ. 11 Amlɔ nɛ ɔ, ní nɛ ɔmɛ ba a nɔ kaa nɔ hyɛmi níhi, nɛ a ngma konɛ a kɛ bɔ wɔ nihi nɛ níhi a blɔ nya tomi nɛ ɔmɛ a nyagbe ɔ ba ná wɔ ɔ kɔkɔ.

12 Enɛ ɔ he ɔ, ha nɛ nɔ nɛ e susu kaa e daa si ɔ nɛ e hyɛ nɛ hi konɛ e ko nɔ si. 13 Ka ko bɛ nyɛ nɔ hyɛ kaa ja nɔ́ nɛ baa adesahi a nɔ ɔ pɛ. Se anɔkualetsɛ ji Mawu, nɛ e be hae nɛ a ka nyɛ pe bɔ nɛ nyɛ ma nyɛ maa da nya, mohu ɔ, ngɛ ka a mi ɔ, lɛ hu e ma je blɔ nɛ́ nyɛ ma nyɛ maa gu nɔ kɛ je mi, konɛ nyɛ nyɛ nɛ nyɛɛ da nya.

14 Enɛ ɔ he ɔ, nihi nɛ i suɔ, nyɛɛ tu wɔ jami nya fo. 15 I kɛ nyɛ ngɛ munyu tue kaa bɔ nɛ a kɛ nihi nɛ a kɔɔ nɔ́ se tuɔ munyu ɔ; nyɛ nitsɛmɛ nyɛɛ kojo nɔ́ nɛ i ngɛ dee ɔ. 16 Jɔɔmi kplu ɔ nɛ wa jɔɔ nɔ ɔ, anɛ pi ní nɛ wa ngɛ dlae ngɛ Kristo muɔ ɔ mi lo? Abolo ɔ nɛ wa kuɔ mi ɔ, anɛ pi ní nɛ wa ngɛ dlae ngɛ Kristo nɔmlɔ tso ɔ mi lo? 17 Akɛnɛ abolo kake lɛ ngɛ he je ɔ, e ngɛ mi kaa wa he hiɛ fuu mohu lɛɛ, se wa ji nɔmlɔ tso kake, ejakaa wɔ tsuo wa ngɛ jamɛ a abolo kake ɔ yee.

18 Hyɛ Israel ngɛ he lo blɔ fa mi: Nihi nɛ a yeɔ afɔle ɔmɛ ɔ, anɛ pi nɛ a kɛ afɔle sami la tɛ ɔ ngɛ ní dlae lo? 19 Ke jã a, lɛɛ mɛni i ngɛ tsɔɔe ɔ? Anɛ i ngɛ tsɔɔe kaa nɔ́ nɛ a kɛ sã afɔle ha wɔ ko ɔ ji nɔ́ ko lo, aloo kaa wɔ ji nɔ́ ko? 20 Dɛbi; mohu ɔ, i ngɛ dee ke afɔle nɛ je ma amɛ sãa a, a sãa kɛ haa daimoniohi, se pi Mawu; nɛ i sume kaa nyɛ ma ba pee nihi nɛ a kɛ daimoniohi dlaa ní. 21 Nyɛ be nyɛe maa hi Yehowa* kplu ɔ nya nue nɛ nyɛ maa hi daimonio ɔmɛ a kplu ɔ hu nya nue; nyɛ be nyɛe maa hi “Yehowa* we okplɔɔ ɔ” nɔ ní yee nɛ nyɛ maa hi daimonio ɔmɛ hu a we okplɔɔ ɔ nɔ ní yee. 22 Aloo ‘anɛ wa ngɛ hlae nɛ Yehowa* nɛ e je hunga lo’? Anɛ wa he wa pe lɛ lo?

23 Mlaa ngmɛɔ níhi tsuo blɔ,* se pi níhi tsuo nɛ se nami ngɛ a he. Mlaa ngmɛɔ níhi tsuo blɔ, se pi níhi tsuo nɛ fiaa nɔ kɛ maa si. 24 Ha nɛ nɔ fɛɛ nɔ nɛ e ya nɔ nɛ e hla nɔ́ nɛ maa hi kɛ ha nɔ kpa, se pi kɛ ha lɛ nitsɛ e he.

25 Nyɛɛ ye nɔ́ fɛɛ nɔ́ nɛ a juaa ngɛ muɔ lo jua nɔ ɔ, nɛ nyɛ ko bi he sane ngɛ nyɛ he nile he je, 26 ejakaa “Yehowa* nɔ́ ji zugba a kɛ nɔ́ fɛɛ nɔ́ nɛ ngɛ mi ɔ.” 27 Ke nɔ ko nɛ e he we yi fɔ nyɛ nine nɛ nyɛ suɔ kaa nyɛ maa ya a, nyɛɛ ye nɔ́ fɛɛ nɔ́ nɛ a kɛ maa ma nyɛ hɛ mi ɔ, nɛ nyɛ ko bi he sane ngɛ nyɛ he nile he je. 28 Se ke nɔ ko de nyɛ ke, “Nɔ́ nɛ ɔ ji nɔ́ ko nɛ a kɛ sã afɔle” ɔ, lɛɛ nyɛ ko ye, ngɛ nɔ nɛ e de nyɛ ɔ kɛ he nile he je. 29 Pi nyɛ nitsɛmɛ nyɛ he nile nɛ i ngɛ tsɔɔe ɔ, mohu ɔ, nɔ kpa a he nile. Ejakaa mɛni he je nɛ e sa kaa nɔ kpa he nile nɛ kojo ye he yemi ɔ? 30 Ke i na si loko i ngɛ yee ɔ, lɛɛ mɛni he je nɛ e sa nɛ a tu munyu kɛ si mi ngɛ nɔ́ nɛ i na he si ɔ he ɔ?

31 Lɔ ɔ he ɔ, ní nɛ nyɛ ngɛ yee jio, ní nɛ nyɛ ngɛ nue jio, nɔ́ kpa ko nɛ nyɛ ngɛ pee jio, nyɛɛ pee níhi tsuo kɛ wo Mawu hɛ mi nyami. 32 Nyɛ ko ba pee nane tɔ̃tɔ̃mi nɔ́ kɛ ha Yuda bi kɛ Hela bi kɛ Mawu asafo ɔ, 33 kaa bɔ nɛ i ngɛ mɔde bɔe kaa ma sa nihi tsuo a hɛ mi ngɛ níhi tsuo a mi, nɛ i hla we nɔ́ nɛ maa hi kɛ ha imi nitsɛ, se mohu kɛ ha nihi fuu konɛ a nyɛ nɛ a he a yi wami ɔ.

11 Nyɛɛ pee nihi nɛ a kaseɔ mi kaa bɔ nɛ imi hu i kaseɔ Kristo ɔ.

2 I ngɛ nyɛ yi jee, ejakaa ngɛ níhi tsuo a mi ɔ, nyɛ kaiɔ mi, nɛ nyɛ hɛɛ kusumi ɔmɛ a mi kpɛii kaa bɔ nɛ i ngɔ kɛ ha nyɛ ɔ. 3 Se i suɔ nɛ nyɛɛ le kaa nyumu fɛɛ nyumu yi ji Kristo; nɛ yo hu yi ji nyumu; nɛ Kristo hu yi ji Mawu. 4 Nyumu fɛɛ nyumu nɛ nɔ́ ko hiɔ e yi nɔ nɛ e kɛ sɔleɔ aloo e kɛ gbaa a, e pueɔ e yi ɔ hɛ mi si; 5 se yo fɛɛ yo nɛ e ngɔɛ nɔ́ kɛ hɛ e yi nɔ nɛ e kɛ sɔleɔ aloo e kɛ gbaa a, e pueɔ e yi ɔ hɛ mi si, ejakaa e ngɛ kaa yo nɛ e kpa e yi* ɔ nɔuu. 6 Ejakaa ke yo ko ngɔɛ nɔ́ kɛ hɛ e he ɔ, lɛɛ e sa nɛ e ha nɛ a sɛ e yi ɔ; se ke e ji zo kɛ ha yo kaa e ma ha nɛ a sɛ e yi aloo e ma ha nɛ a kpa e yi* ɔ, lɛɛ e sa nɛ e ngɔ nɔ́ kɛ ha e he.

7 Ejakaa e sɛ nɛ nyumu nɛ e ha e yi nɔ nɔ́, akɛnɛ e ji Mawu henɔ kɛ e hɛ mi nyami ɔ he je, se yo lɛɛ e ji nyumu hɛ mi nyami. 8 Ejakaa pi yo mi nɛ nyumu je kɛ ba, se yo lɛɛ, nyumu mi nɛ e je kɛ ba. 9 Nɛ jehanɛ se hu ɔ, pi yo he je nɛ a bɔ nyumu ngɛ, mohu ɔ, nyumu he je nɛ a bɔ yo ngɛ. 10 Enɛ ɔ he je nɛ e sa kaa yo nɛ e ná he wami he okadi ko ngɛ e yi ɔ nɔ ɔ nɛ, ngɛ hiɔwe bɔfo ɔmɛ a he je.

11 Jehanɛ ɔ, ngɛ Nyɔmtsɛ ɔ blɔ fa mi ɔ, ke nyumu be ɔ, yo be, nɛ jã kɛ̃ nɛ ke yo be ɔ, nyumu hu be. 12 Ejakaa kaa bɔ nɛ yo je nyumu mi ɔ, jã kɛ̃ nɛ nyumu hu gu yo nɔ kɛ ba; se níhi tsuo je Mawu ngɔ. 13 Nyɛ nitsɛmɛ nyɛɛ kojo nɛ nyɛɛ hyɛ: Anɛ e da blɔ kaa yo ko maa sɔle kɛ ha Mawu be mi nɛ e hɛ e yi nɔ nɔ́ lo? 14 Anɛ adebɔ nitsɛ tsɔɔ we nyɛ kaa yi bwɔmi gagaaga wui nyumu hɛ mi nyami, 15 se ke yo ngɛ yi bwɔmi gagaaga a, e ji e hɛ mi nyami lo? Ejakaa a ha lɛ e yi bwɔmi ɔ ngɛ he hami nɔ́ nane mi. 16 Se ke nɔ ko suɔ kaa e kɛ atsinyɛ jemi ma fĩ kusumi kpa ko se ɔ, wɔɔ lɛɛ wa be nɔ́ kpa ko, nɛ Mawu asafo ɔmɛ hu jã nɔuu.

17 Se be mi nɛ i kɛ blɔ tsɔɔmi nɛ ɔmɛ ngɛ hae ɔ, i je we nyɛ yi, ejakaa ke nyɛ kpe ɔ, nɔ́ kpakpa ji mi kɛ bɛ, mohu ɔ, nɔ́ nɛ hí kulaa lɛ jeɔ mi kɛ baa. 18 Ejakaa kekleekle ɔ, i nu kaa ke nyɛ nya ba bua kaa asafo ɔ, mi gbamihi ngɛ nyɛ kpɛti; nɛ ngɛ blɔ ko nɔ ɔ, i heɔ yeɔ. 19 Ejakaa ngɛ anɔkuale mi ɔ, jami kuuhi hu maa hi nyɛ kpɛti, bɔ nɛ pee nɛ ni nɛmɛ nɛ a sa a nɛ a je kpo heii.

20 Ke nyɛ nya ba bua ngɛ he kake ɔ, pi ngɛ Nyɔmtsɛ ɔ Gbɔkuɛ Niye Ní ɔ yemi tutuutu he je. 21 Ejakaa ke nyɛ ngɛ ní ɔ yee ɔ, nyɛ ti nɔ fɛɛ nɔ sɛɔ hlami nɛ e yeɔ lɛ nitsɛ e gbɔkuɛ niye ní, kɛkɛ ɔ, benɛ hwɔ ngɛ nɔ ko yee ɔ, nɔ kpa hu de dã. 22 Anɛ nyɛ be wehi nɛ nyɛ yeɔ ní nɛ nyɛ nuɔ ní ngɛ a mi lo? Aloo anɛ nyɛ gbeɔ Mawu asafo ɔ he guɛ, nɛ nyɛ haa nɛ ni nɛmɛ nɛ a be nɔ́ ko ɔmɛ a hɛ mi pueɔ si lo? Mɛni ma nyɛ ma de nyɛ? Anɛ e sa kaa ma je nyɛ yi lo? Ngɛ enɛ ɔ mi ɔ, i be nyɛ yi jee.

23 Ejakaa nɔ́ nɛ ye nine su nɔ kɛ je Nyɔmtsɛ ɔ ngɔ ɔ nɛ imi hu i ngɔ kɛ ha nyɛ ɔ nɛ, kaa nyɔ ɔ mi nɛ a maa tsɔɔ Nyɔmtsɛ Yesu se blɔ ɔ, e kɛ̃ abolo, 24 nɛ benɛ e na Mawu si ta a, e ku mi nɛ e de ke: “Enɛ ɔ daa si kɛ ha ye nɔmlɔ tso ɔ nɛ e ngɛ ngɛ nyɛ he ɔ. Nyɛɛ ya nɔ nɛ nyɛɛ pee enɛ ɔ nɛ nyɛ kɛ kai mi.” 25 Benɛ a ye gbɔkuɛ ní ɔ ta a, e wo kplu ɔ hu nɛ e pee jã nɔuu, nɛ e de ke: “Kplu nɛ ɔ daa si kɛ ha somi he ɔ nɛ a gu ye muɔ ɔ nɔ kɛ so ɔ. Nyɛɛ ya nɔ nɛ nyɛɛ pee enɛ ɔ, be fɛɛ be nɛ nyɛ maa nu ɔ, nyɛ kɛ kai mi.” 26 Ejakaa be fɛɛ be nɛ nyɛ maa ye abolo nɛ ɔ nɛ nyɛ maa nu kplu nɛ ɔ nya a, nyɛɛ ya nɔ nɛ nyɛɛ hi Nyɔmtsɛ ɔ gbenɔ ɔ jajee kɛ yaa si be nɛ e maa ba.

27 Enɛ ɔ he ɔ, nɔ fɛɛ nɔ nɛ e yeɔ abolo ɔ aloo e nuɔ Nyɔmtsɛ ɔ kplu ɔ nya bɔ nɛ e sɛ ɔ, e maa ye Nyɔmtsɛ ɔ nɔmlɔ tso ɔ kɛ e muɔ ɔ he fɔ. 28 Kekleekle ɔ, ha nɛ adesa nɛ e hyɛ e mi, nɛ lɛ nitsɛ e kplɛɛ nɔ, nɛ lɔ ɔ se loko e ye abolo ɔ nɛ́ e nu kplu ɔ nya. 29 Ejakaa nɔ nɛ e yeɔ nɛ e nuɔ nɛ e yɔse we nɔmlɔ tso ɔ, kojomi e yeɔ nɛ e nuɔ kɛ siɔ lɛ nitsɛ e he ɔ nɛ. 30 Enɛ ɔ he je nɛ nyɛ kpɛti nihi babauu gbɔjɔ nɛ a be he wami, nɛ nihi fuu nɔ gbenɔ mahe* mi ɔ nɛ. 31 Se ke ji kaa wa ma yɔse nimli nɛ wɔ nitsɛmɛ wa ji ɔ, lɛɛ a be wɔ kojoe. 32 Se ke a kojo wɔ ɔ, lɛɛ Yehowa* ma tsɔse wɔ, bɔ nɛ pee nɛ a ko bu wɔ fɔ kɛ piɛɛ je ɔ he. 33 Enɛ ɔ he ɔ, ye nyɛmimɛ, ke nyɛ nya ba bua konɛ nyɛɛ ye ɔ, nyɛɛ mlɛ nyɛ sibi. 34 Ke hwɔ ngɛ nɔ ko yee ɔ, ha nɛ e ye ní ngɛ we mi, bɔ nɛ pee nɛ nyɛ he nya buami ɔ nɛ ko ba plɛ pee kojomi. Se ní nɛmɛ nɛ piɛ ɔ lɛɛ, ke i ba a, ma ba dla mɛ ngɔ to blɔ nɔ.

12 Jehanɛ ɔ, nyɛmimɛ, ngɛ mumi mi nike ní ɔmɛ a he ɔ, i sume kaa nɔ́ ko nɛ laa nyɛ. 2 Nyɛ le kaa benɛ nyɛ ji je ma amɛ a mi bimɛ ɔ,* wɔhi nɛ a tu we munyu ɔ sisi nyɛ nɛ a ha nɛ nyɛ tla blɔ, nɛ nyɛ nyɛɛɔ a se kɛ yaa he fɛɛ he. 3 Jehanɛ ɔ, ma ha nɛ nyɛɛ le kaa nɔ ko nɔ ko be nɛ ke Mawu mumi ɔ ha nɛ e ngɛ munyu tue ɔ, e deɔ ke: “A gbiɛ Yesu!” nɛ nɔ ko nɔ ko hu be nyɛe ma de ke: “Yesu ji Nyɔmtsɛ!” kaa ja mumi klɔuklɔu ɔ tsɔɔ lɛ.

4 Jehanɛ ɔ, nike ní slɔɔtoslɔɔtohi lɛ ngɛ, se mumi kake too ɔ nɔuu lɛ ngɛ; 5 nɛ sɔmɔmi slɔɔtoslɔɔtohi lɛ ngɛ, se kɛ̃ ɔ, Nyɔmtsɛ kake too ɔ nɔuu lɛ ngɛ; 6 nɛ ní tsumi slɔɔtoslɔɔtohi lɛ ngɛ, se kɛ̃ ɔ, Mawu kake too ɔ nɔuu lɛ e tsuɔ mɛ tsuo ngɛ nɔ fɛɛ nɔ mi. 7 Se a ngɔ mumi ɔ kpo jemi ɔ kɛ ha nɔ fɛɛ nɔ ngɛ yi mi tomi kpakpa ko he je. 8 Ejakaa a gu mumi ɔ nɔ kɛ ha nɔ kake juɛmi munyu tumi,* nɔ kpa hu, a gu jamɛ a mumi ɔ nɔuu nɔ kɛ ha lɛ nile munyu tumi, 9 a gu jamɛ a mumi ɔ nɔuu nɔ kɛ ha nɔ kpa hu hemi kɛ yemi, nɛ a gu jamɛ a mumi kake too ɔ nɔuu nɔ kɛ ha nɔ kpa hu hiɔ tsami nike níhi, 10 nɛ jã kɛ̃ nɛ a ha nɔ kpa hu he wami ní tsumihi a tsumi, nɔ kpa hu gbami, nɛ nɔ kpa hu mumi mi munyuhi a se kɔmi, nɛ nɔ kpa hu lilɛ* slɔɔtohi, nɛ nɔ kpa hu lilɛ slɔɔtohi a sisi tsɔɔmi. 11 Se jamɛ a mumi kake too ɔ nɔuu lɛ e tsuɔ ní tsumi nɛ ɔmɛ tsuo, nɛ e gbaa lɛ bɔ nɛ e suɔ, nɔ fɛɛ nɔ kɛ e nɔ́.

12 Ejakaa e ngɛ mi kaa nɔmlɔ tso ɔ ji nɔ́ kake mohu lɛɛ, se e ngɛ he níhi fuu, nɛ kaa bɔ nɛ jamɛ a nɔmlɔ tso ɔ he ní ɔmɛ tsuo a he hiɛ se a ji nɔmlɔ tso kake ɔ, jã kɛ̃ nɛ Kristo ɔ hu ngɛ. 13 Ejakaa a gu mumi kake nɔ kɛ baptisi wɔ tsuo kɛ wo nɔmlɔ tso kake mi, Yuda bi jio, Hela bi jio, nyɔguɛhi jio, nihi nɛ a ye a he jio, a ha nɛ wɔ tsuo wa nu mumi kake.

14 Ejakaa ngɛ anɔkuale mi ɔ, pi nɔ́ kake pɛ nɛ ngɛ nɔmlɔ tso ɔ he, mohu ɔ, níhi fuu. 15 Ke nanewɛɛ de ke, “Akɛnɛ pi nine ji mi he je ɔ, i piɛɛ we nɔmlɔ tso ɔ he” ɔ, lɔ ɔ tsɔɔ we kaa e piɛɛ we nɔmlɔ tso ɔ he. 16 Nɛ ke tue de ke, “Akɛnɛ pi hɛ ngmɛ ji mi he je ɔ, i piɛɛ we nɔmlɔ tso ɔ he” ɔ, lɔ ɔ tsɔɔ we kaa e piɛɛ we nɔmlɔ tso ɔ he. 17 Ke nɔmlɔ tso ɔ tsuo ji hɛ ngmɛ ɔ, jije nɔ́ nɛ a kɛ nuɔ munyu ɔ maa hi? Ke nɔmlɔ tso ɔ tsuo ji nɔ́ nɛ a kɛ nuɔ munyu ɔ, jije nɔ́ nɛ a kɛ nuɔ nɔ́ he fu kɛ nɔ́ he via a maa hi? 18 Se amlɔ nɛ ɔ, Mawu ngɔ nɔmlɔ tso ɔ he ní ɔmɛ eko fɛɛ eko kɛ to he nɛ e suɔ.

19 Ke nɔ́ kake too ɔ nɔuu ji mɛ tsuo ɔ, jije nɔmlɔ tso ɔ maa hi? 20 Se amlɔ nɛ ɔ, a ji he níhi fuu, se kɛ̃ ɔ, nɔmlɔ tso kake. 21 Hɛ ngmɛ be nyɛe ma de nine ke, “O he hia we mi,” nɛ jã kɛ̃ nɛ yi hu be nyɛe ma de nanewɛɛ ɔmɛ ke, “Nyɛ he hia we mi.” 22 Mohu ɔ, nɔmlɔ tso ɔ he ní ɔmɛ nɛ a naa mɛ kaa a he wɛ ɔ, a he hia, 23 nɛ nɔmlɔ tso ɔ hehi nɛ wa susuɔ kaa a hɛ mi be nyami ɔ, wa woɔ a hɛ mi nyami babauu, nɛ wa hehi nɛ a be fɛu ɔ, wa haa nɛ a peeɔ fɛu wawɛɛ, 24 be mi nɛ wa hehi nɛ a ngɛ fɛu ɔ lɛɛ a hia we nɔ́ ko. Se kɛ̃ ɔ, Mawu pee nɔmlɔ tso ɔ, nɛ hehi nɛ a hɛ mi be nyami ɔ, e wo a hɛ mi nyami babauu, 25 bɔ nɛ pee nɛ mi gbami nɛ ko hi nɔmlɔ tso ɔ mi, mohu ɔ, konɛ e he ní ɔmɛ nɛ a susu a sibi a he. 26 Ke nɔmlɔ tso ɔ he nɔ́ kake ngɛ nɔ́ nae ɔ, ekpa amɛ tsuo hu naa nɔ́ kɛ piɛɛɔ e he; nɛ jã kɛ̃ nɛ ke a wo nɔmlɔ tso ɔ he nɔ́ kake hɛ mi nyami ɔ, nɔmlɔ tso ɔ he ní kpa amɛ tsuo kɛ lɛ nyaa.

27 Amlɔ nɛ ɔ, nyɛ ji Kristo nɔmlɔ tso ɔ nɛ, nɛ nyɛ ti nɔ fɛɛ nɔ ji e he nɔ́ ko. 28 Nɛ Mawu ngɔ ní tsumi kɛ wo nɔ fɛɛ nɔ nɛ e ngɛ asafo ɔ mi ɔ dɛ: kekleekle ɔ, bɔfohi; enyɔne ɔ, gbali; etɛne ɔ, tsɔɔli; lɔ ɔ se ɔ, he wami ní tsumihi; lɔ ɔ se ɔ, hiɔ tsami nike níhi; níhi nɛ a tsuɔ kɛ yeɔ bua; nyɛmihi nɛ a kɛ tsɔɔ blɔ; lilɛ slɔɔtohi. 29 Tse pi nihi tsuo ji bɔfohi, aloo? Tse pi nihi tsuo ji gbali, aloo? Tse pi nihi tsuo ji tsɔɔli, aloo? Tse pi nihi tsuo nɛ a tsuɔ he wami ní tsumihi, aloo? 30 Tse pi nihi tsuo nɛ a ngɛ hiɔ tsami nike níhi, aloo? Tse pi nihi tsuo nɛ a tuɔ lilɛ slɔɔtohi, aloo? Tse pi nihi tsuo ji gbi sisi tsɔɔli, aloo? 31 Se nyɛɛ ya nɔ nɛ nyɛɛ bɔ nike ní nguangua amɛ a he mɔde.* Se kɛ̃ ɔ, ma tsɔɔ nyɛ blɔ ko nɛ e hi pe kulaa.

13 Ke i kɛ adesahi kɛ hiɔwe bɔfohi a lilɛ tuɔ munyu, se i be suɔmi ɔ, i plɛ pee gɔgɔ nɛ ngɛ pɛe gegeege aloo ayawa nɛ ngɛ jijee kɛkɛ. 2 Nɛ ke i ngɛ gbami nike ní, nɛ i nuɔ laami sanehi nɛ a ngɛ klɔuu ɔ tsuo kɛ nile tsuo sisi, nɛ ke i ngɛ hemi kɛ yemi tsuo nɛ ma nyɛ ma hia yokuhi, se i be suɔmi ɔ, pi nɔ́ ko kulaa ji mi.* 3 Nɛ ke i ngɔɔ níhi nɛ i ngɛ ɔ tsuo kɛ lɛɔ ni kpahi, nɛ ke i ngɔɔ ye nɔmlɔ tso ɔ kɛ haa bɔ nɛ pee nɛ ma nyɛ ma fĩa, se i be suɔmi ɔ, i be he se náe kulaa.

4 Suɔmi toɔ e tsui si, nɛ e mi mi hi. Suɔmi ji hunga. E fĩɛ, e pee we pupuupu, 5 e pee we e ní ngɛ blɔ nɛ e sɛ nɔ,* e fo we lɛ pɛ e nɔ́ mi, e mi mi wui la. E kɛ tɔmi wui e mi. 6 E nya we ngɛ nɔ́ nɛ dɛ he, mohu ɔ, e nyaa ngɛ anɔkuale he. 7 E daa níhi tsuo a nya, e heɔ níhi tsuo yeɔ, e ngɔɔ e hɛ kɛ fɔɔ níhi tsuo a nɔ, e fĩɔ si ngɛ níhi tsuo a mi.

8 Suɔmi se pui gblegbleegble. Se ke gbami nike níhi ngɛ ɔ, a se maa po; ke lilɛhi ngɛ ɔ,* a maa ba nyagbe; ke nile ngɛ ɔ, e se maa po. 9 Ejakaa wa ngɛ nile fã kɛ fã, nɛ wa gbaa fã kɛ fã, 10 se ke nɔ́ nɛ hi kɛ pi si ɔ ba a, nɔ́ nɛ ji fã kɛ fã a se maa po. 11 Benɛ i ji jokuɛ ɔ, jinɛ i tuɔ munyu kaa jokuɛ, i susuɔ ye yi mi kaa jokuɛ, i susuɔ níhi a he kaa jokuɛ; se amlɔ nɛ ɔ nɛ i ba pee nyumu tɛtetsɛ ɔ, i kpa jokuɛwi a ní peemi. 12 Ejakaa amlɔ nɛ ɔ, wa naa níhi kusuu* ngɛ dade ahuhuɛ mi, se jamɛ a be ɔ mi lɛɛ, e maa pee hɛ mi kɛ hɛ mi. Amlɔ nɛ ɔ, i le fã kɛ fã, se jamɛ a be ɔ mi lɛɛ ma le saminya,* kaa bɔ nɛ a le mi saminya a. 13 Se amlɔ nɛ ɔ, ní etɛ nɛ ɔmɛ maa hi si: hemi kɛ yemi, hɛ kɛ nɔ fɔmi, suɔmi; se nɔ́ nɛ pe ní nɛ ɔmɛ tsuo ji suɔmi.

14 Nyɛɛ di suɔmi se, se kɛ̃ ɔ, nyɛɛ ya nɔ nɛ nyɛɛ bɔ mɔde konɛ nyɛ ná* mumi mi nike ní ɔmɛ, se titli ɔ, kaa nyɛ maa gba. 2 Ejakaa nɔ nɛ e tuɔ lilɛ slɔɔto ko ɔ, pi nɔmlɔ nɛ e tuɔ kɛ tsɔɔ, se mohu Mawu, ejakaa nɔ ko bui tue, se mumi ɔ haa nɛ e tuɔ laami sanehi nɛ a ngɛ klɔuu ɔmɛ a he munyu. 3 Se nɔ nɛ e gbaa a, e ngɔɔ e munyu ɔ kɛ fiaa adesahi kɛ maa si, nɛ e woɔ mɛ he wami, nɛ e woɔ a bua. 4 Nɔ nɛ e tuɔ lilɛ slɔɔto ko ɔ fiaa lɛ nitsɛ e he kɛ maa si, se nɔ nɛ e gbaa a lɛɛ, e fiaa asafo kɛ maa si. 5 Amlɔ nɛ ɔ, jinɛ i ko suɔ kaa nyɛ tsuo nyɛ ko tu lilɛ slɔɔtohi, se i suɔ mohu kaa nyɛɛ gba. Ngɛ anɔkuale mi ɔ, nɔ nɛ e gbaa a nɔ kuɔ pe nɔ nɛ e tuɔ lilɛ slɔɔtohi ɔ, lɛɛ ja nɔ ɔ tsɔɔ sisi konɛ e fia asafo ɔ kɛ ma si. 6 Se ngɛ be nɛ ɔ mi ɔ, nyɛmimɛ, ke i ba nyɛ ngɔ nɛ i ba ngɛ lilɛ slɔɔtohi tue, se i gui kpo jemi, aloo ní lemi, aloo gbami ko, aloo tsɔɔmi ko nɔ kɛ tui munyu kɛ tsɔɔ we nyɛ ɔ, mɛni se nyɛ ma ná?

7 E ngɛ kaa bɔ nɛ níhi nɛ wami be a mi ɔ pɛɛɔ ɔ pɛpɛɛpɛ, bɛ jio, saku jio. Ke a pɛmi ɔmɛ ji ekpa ngɛ a sibi a he ɔ, kɛ a ma plɛ kɛ le bɛ ɔ pɛmi kɛ saku ɔ pɛmi mi tso ha kɛɛ? 8 Ejakaa ke titimati ɔ pɛ, se e pɛ́ saminya a, mɛnɔ lɛ e maa pee klaalo kɛ ha ta hwumi? 9 Jã nɔuu kɛ̃ nɛ nyɛ hu ke a nui lilɛ slɔɔto nɛ nyɛ tuɔ ɔ sisi saminya a, kɛ nɔ ko ma plɛ kɛ le nɔ́ nɛ nyɛ ngɛ dee ɔ ha kɛɛ? Ngɛ anɔkuale mi ɔ, nyɛ maa hi munyu tue kɛ maa hi kɔɔhiɔ mi woe. 10 E ma nyɛ maa pee kaa gbi slɔɔtoslɔɔtohi babauu ngɛ je ɔ mi, se kɛ̃ ɔ, ekoeko be nɛ e hɛɛ we sisi numi. 11 Ejakaa ke i nui juɛmi nɛ ngɛ munyu ɔ mi ɔ sisi ɔ, ma pee kaa ma se no kɛ ha nɔ nɛ e ngɛ munyu ɔ tue ɔ, nɛ nɔ nɛ e ngɛ munyu ɔ tue ɔ hu maa pee kaa ma se no kɛ ha mi. 12 Jã kɛ̃ nɛ e ji ngɛ nyɛ blɔ fa mi, akɛnɛ nyɛ suɔ wawɛɛ kaa nyɛ ma ná mumi ɔ nike ní ɔmɛ he je ɔ, nyɛɛ bɔ mɔde kaa nyɛ ma ná nike níhi nɛ fiaa asafo ɔ kɛ maa si ɔ kɛ be nɔ.

13 Enɛ ɔ he ɔ, nyɛ ha nɛ nɔ nɛ e tuɔ lilɛ slɔɔto ko ɔ nɛ e sɔle konɛ e nyɛ nɛ e tsɔɔ sisi. 14 Ejakaa ke i ngɛ sɔlee ngɛ lilɛ slɔɔto ko mi ɔ, ye nike ní nɛ mumi ɔ ha mi ɔ lɛ ngɛ sɔlee, se ye juɛmi ɔ lɛɛ e wui yiblii. 15 Lɛɛ mɛni lɛ e sa peemi mɔ? Ma ngɔ mumi ɔ nike ní ɔ kɛ sɔle, se ma ngɔ ye juɛmi hu kɛ sɔle. Ma ngɔ mumi ɔ nike ní ɔ kɛ la yi jemi la, se ma ngɔ ye juɛmi hu kɛ la yi jemi la. 16 Ke pi jã a, lɛɛ ke o kɛ mumi ɔ nike ní ɔ ngɛ Mawu yi jee ɔ, akɛnɛ nɔ kpa nɛ e ngɛ nyɛ kpɛti ɔ li nɔ́ nɛ o ngɛ dee ɔ he je ɔ, kɛ e ma plɛ kɛ he o si nami ɔ nɔ ke, “Amen” kɛɛ? 17 Ngɛ anɔkuale mi ɔ, o ngɛ si nae ngɛ blɔ kpakpa nɔ mohu lɛɛ, se e fiɛ nɔ kpa a kɛ mɛ si. 18 I naa Mawu si kaa i tuɔ lilɛ slɔɔtohi fuu pe bɔ nɛ nyɛ tsuo nyɛ tuɔ ɔ. 19 Se kɛ̃ ɔ, ngɛ asafo ko mi ɔ, i kɛ ye juɛmi* maa tu munyungu kakaaka enuɔ, konɛ ma kɛ tsɔɔ ni kpahi ní* mohu pe nɛ ma tu munyungu kakaaka akpe nyɔngma ngɛ lilɛ slɔɔto ko mi.

20 Nyɛmimɛ, nyɛ ko pee nyɛ he jokuɛ tsɔwi ngɛ nyɛ nɔ́ sisi numi mi, mohu ɔ, nyɛɛ pee nyɛ he jokuɛ tsɔwi ngɛ yayami blɔ fa mi; nɛ nyɛɛ pee nyɛ he nihi nɛ a wa saminya ngɛ nyɛ nɔ́ sisi numi mi. 21 A ngma ngɛ Mlaa a mi ke: “Yehowa* de ke, ‘Ma ngɔ ma se bi a lilɛhi kɛ nibwɔhi a nyahi kɛ tu munyu kɛ tsɔɔ nimli nɛ ɔmɛ, nɛ ngɛ lɔ ɔ mi po ɔ, a be mi tue bue.’” 22 Enɛ ɔ he ɔ, lilɛ slɔɔtohi pee we okadi kɛ ha we nihi nɛ a he ye ɔ, mohu ɔ, kɛ ha nihi nɛ a he we yi ɔ, jã kɛ̃ nɛ gbami hu pi kɛ ha nihi nɛ a he we yi ɔ, mohu ɔ, kɛ ha nihi nɛ a he ye ɔ. 23 Enɛ ɔ he ɔ, ke asafo ɔ tsuo nya ba bua ngɛ he kake nɛ mɛ tsuo a ngɛ lilɛ slɔɔtohi tue, nɛ ni kpa amɛ aloo nihi nɛ a he we yi ɔ ba lejɛ ɔ, anɛ a be dee ke nyɛ yi puɛ lo? 24 Se ke nyɛ tsuo nyɛ ngɛ gbae nɛ nɔ ko nɛ e he we yi aloo nɔ kpa ko ba mi ɔ, mɛ tsuo a ma kã e hɛ mi, nɛ a maa hyɛ e mi saminya. 25 Kɛkɛ ɔ, e tsui mi laami sane ɔmɛ maa je kpo heii, nɛ e ma kpla si nɛ e maa ngɔ e hɛ mi kɛ bu si nɛ e ma ja Mawu, nɛ e maa hi jajee ke: “Mawu ngɛ nyɛ kpɛti niinɛ.”

26 Lɛɛ nyɛmimɛ, mɛni lɛ e sa peemi mɔ? Ke nyɛ nya ba bua a, nɔ kake ngɛ la ko, nɔ kpa ngɛ tsɔɔmi ko, nɔ kpa hu ngɛ kpo jemi ko, nɔ kpa ngɛ lilɛ slɔɔto ko, nɛ nɔ kpa hu ngɛ gbi sisi tsɔɔmi ko. Nyɛ ha nɛ níhi tsuo nɛ maa ya nɔ ɔ nɛ fia nɔ kɛ ma si. 27 Nɛ ke nɔ ko tuɔ lilɛ slɔɔto ko ɔ, nyɛ ha nɛ e pee ni enyɔ pɛ, nɛ ke a he hiɛ hluu ɔ, a pee ni etɛ, nɛ nɔ kake nɛ e gbe nya loko nɔ kpa hu nɛ e tu e nɔ́, nɛ e sa kaa nɔ ko nɛ e tsɔɔ sisi. 28 Se ke sisi tsɔɔlɔ ko be ɔ, lɛɛ e sa nɛ e ma e nya ngɛ asafo ɔ mi nɛ e tu kɛ tsɔɔ lɛ nitsɛ e he kɛ Mawu. 29 Nyɛ ha nɛ gbali enyɔ aloo etɛ nɛ a tu munyu, nɛ nyɛ ha nɛ ni kpa amɛ nɛ a kɔ se. 30 Se ke nɔ kpa ko nine su kpo jemi ko nɔ be mi nɛ e hii si ngɛ lejɛ ɔ, lɛɛ ha nɛ kekleekle munyu tulɔ ɔ nɛ e ma e nya. 31 Ejakaa nyɛ tsuo nyɛ ma nyɛ maa gba, se nɔ kake nɛ e gbe nya loko nɔ kpa nɛ e je sisi, bɔ nɛ pee nɛ nyɛ tsuo nyɛɛ kase ní, nɛ a wo nyɛ tsuo he wami. 32 Nɛ gbali ɔmɛ a mumi ɔ nike ní ɔmɛ ɔ, gbali ɔmɛ lɛ e sa kaa a kudɔ mɛ. 33 Ejakaa Mawu ɔ, pi Mawu nɛ e peeɔ e ní basabasa, se mohu ɔ, e ji tue mi jɔmi Mawu.

Kaa bɔ nɛ e ji ngɛ ni klɔuklɔu ɔmɛ a we asafo ɔmɛ tsuo a mi ɔ, 34 ha nɛ yi ɔmɛ nɛ a ma a nya ngɛ asafo ɔmɛ a mi, ejakaa a ngmɛ́ mɛ blɔ kaa a tu munyu. Mohu ɔ, ha nɛ a ba a he si kɛ ha nyumuhi* kaa bɔ nɛ Mlaa a hu tsɔɔ ɔ. 35 Ke a suɔ kaa a maa kase nɔ́ ko ɔ, nyɛ ha nɛ a bi a hunomɛ ngɛ we mi, ejakaa e ji zo kaa yo maa tu munyu ngɛ asafo ɔ mi.

36 Anɛ nyɛ ngɔ nɛ Mawu munyu ɔ je lo, aloo nyɛ ngɔ pɛ nɛ e ba su?

37 Ke nɔ ko susu kaa gbalɔ ji lɛ, aloo a kɛ mumi ɔ dloo lɛ ɔ, e sa nɛ e kplɛɛ nɔ kaa níhi nɛ i ngɛ nyɛ ngmae ɔ ji Nyɔmtsɛ ɔ kita. 38 Se ke nɔ ko bui nɔ́ nɛ ɔ, lɛ hu a be lɛ bue.* 39 Enɛ ɔ he ɔ, ye nyɛmimɛ, nyɛɛ ya nɔ nɛ nyɛɛ hi mɔde bɔe kaa nyɛ maa gba, se kɛ̃ ɔ, nyɛ ko tsi lilɛ slɔɔtohi a tumi nya. 40 Se nyɛ ha nɛ níhi tsuo nɛ ya nɔ ngɛ blɔ nɛ e he tsɔ nɔ, kɛ blɔ nya tomi nya.*

15 Jehanɛ ɔ, nyɛmimɛ, i ngɛ nyɛ sane kpakpa a nɛ i jaje ngɔ tsɔɔ nyɛ ɔ kaie, nɔ́ nɛ nyɛ hu nyɛ kplɛɛ nɔ, nɛ nyɛ pɛtɛ he wawɛɛ ɔ. 2 Kɛ gu lɔ ɔ nɔ ɔ, a ngɛ nyɛ yi wami hu hee ke nyɛ hɛɛ sane kpakpa a nɛ i jaje ngɔ tsɔɔ nyɛ ɔ mi wawɛɛ ɔ, lɛɛ ja nyɛ ba pee nihi nɛ a he ye yaka gu.

3 Ejakaa nɔ́ nɛ piɛɛ kekleekle níhi nɛ i ngɔ kɛ ha nyɛ ɔ he ji nɔ́ nɛ imi hu ye nine su nɔ ɔ, kaa Kristo gbo ngɛ wa he yayami ɔmɛ a he kaa bɔ nɛ Ngmami ɔ tsɔɔ ɔ; 4 nɛ a pu lɛ, ee, a tle lɛ si ngɛ ligbi etɛne ɔ nɔ kaa bɔ nɛ Ngmami ɔ tsɔɔ ɔ; 5 nɛ e je e he kpo ngɔ tsɔɔ Kefa,* nɛ lɔ ɔ se ɔ, kɛ tsɔɔ Ni Nyɔngma Kɛ Enyɔ ɔmɛ. 6 Lɔ ɔ se ɔ, e je e he kpo ngɔ tsɔɔ nyɛmimɛ nɛ a he hiɛ pe 500 ngɛ be kake mi, a ti nihi babauu kɛ wɔ ngɛ loloolo, se a ti ni komɛ lɛɛ a nɔ gbenɔ mahe mi. 7 Lɔ ɔ se ɔ, e je e he kpo ngɔ tsɔɔ Yakobo, nɛ lɔ ɔ se ɔ, kɛ tsɔɔ bɔfo ɔmɛ tsuo. 8 Se nyagbe kulaa a, imi hu e je e he kpo ngɔ tsɔɔ mi kaa nɔ ko nɛ a kpatu fɔ lɛ.

9 Ejakaa imi ji bɔfo ɔmɛ a kpɛti nɔ nyafii pe kulaa, nɛ i sɛ kaa a tsɛɔ mi bɔfo, ejakaa i wa Mawu asafo ɔ yi mi. 10 Se Mawu dloomi ɔ lɛ ha nɛ i ngɛ kaa bɔ nɛ i ngɛ nɛ ɔ nɛ. Nɛ dloomi nɛ e dloo mi ɔ pee we yaka, se mohu ɔ, i tsu ní wawɛɛ pe mɛ tsuo; se kɛ̃ ɔ, pi imi, mohu ɔ, Mawu dloomi ɔ nɛ́ e kɛ mi ngɛ ɔ. 11 Lɔ ɔ he ɔ, imi jio, mɛ jio, blɔ nɔ nɛ wa guɔ kɛ fiɛɛɔ ɔ ji nɛ ɔ nɛ, nɛ blɔ nɔ nɛ nyɛ gu kɛ he ye ɔ ji nɛ ɔ nɛ.

12 Jehanɛ ɔ, ke a ngɛ fiɛɛe kaa a tle Kristo si kɛ je gbeje ɔ, lɛɛ mɛni he je mɔ nɛ nyɛ kpɛti ni komɛ deɔ ke gbogboehi a si tlemi ko be ɔ? 13 Ngɛ anɔkuale mi ɔ, ke gbogboehi a si tlemi ko be ɔ, lɛɛ a tle we Kristo hu si mɔ. 14 Se ke a tle we Kristo si ɔ, lɛɛ ngɛ anɔkuale mi ɔ, fiɛɛmi nɛ wa ngɛ fiɛɛe ɔ peeɔ yaka, nɛ wa hemi kɛ yemi ɔ hu peeɔ yaka. 15 Jehanɛ se hu ɔ, a maa na wɔ hu kaa Mawu he lakpa odase yeli, ejakaa wa yeɔ odase kɛ siɔ Mawu kaa e tle Kristo si, nɔ nɛ ke niinɛ nɛ gbogboehi a si tlemi be ɔ, lɛɛ e tle we lɛ si ɔ. 16 Ejakaa ke a be gbogboehi a si tlee ɔ, lɛɛ Kristo hu a tle we lɛ si. 17 Jehanɛ se hu ɔ, ke a tle we Kristo si ɔ, lɛɛ se nami ko be nyɛ hemi kɛ yemi ɔ he; nyɛ ngɛ nyɛ he yayami ɔmɛ a mi. 18 Nɛ jã kɛ̃ nɛ nihi nɛ a nɔ gbenɔ mahe mi ngɛ Kristo mi ɔ hu a hɛ mi kpata. 19 Ke wami nɛ ɔ mi pɛ kɛkɛ nɛ wa ngɔ wa hɛ kɛ fɔ Kristo nɔ ngɛ ɔ, lɛɛ wa ní ngɛ mɔbɔ pe nɔ fɛɛ nɔ.

20 Se amlɔ nɛ ɔ, a tle Kristo si kɛ je gbeje, lɛ ji kekle yiblii ngɛ nihi nɛ a nɔ gbenɔ mahe mi ɔmɛ a kpɛti. 21 Ejakaa akɛnɛ gbenɔ gu adesa nɔ kɛ ba he je ɔ, gbogboehi a si tlemi hu maa gu adesa nɔ kɛ ba. 22 Ejakaa kaa bɔ nɛ nihi tsuo ngɛ gboe ngɛ Adam mi ɔ, jã kɛ̃ nɛ a ma ha nɛ nihi tsuo maa ba wami mi ngɛ Kristo mi. 23 Se nɔ fɛɛ nɔ ngɛ lɛ nitsɛ e blɔ he nɛ sa: Kristo ji kekle yiblii, lɔ ɔ se ɔ, nihi nɛ a ji Kristo níhi ngɛ be nɛ e ba a mi. 24 Lɔ ɔ se ɔ, nyagbe ɔ, benɛ e maa ngɔ Matsɛ Yemi ɔ kɛ ha e Mawu nɛ ji e Tsɛ ɔ, benɛ e ma kpata nɔ yemihi tsuo kɛ he blɔhi tsuo kɛ he wami a hɛ mi ɔ. 25 Ejakaa e sa nɛ e ye matsɛ kɛ yaa si be nɛ Mawu maa ngɔ he nyɛli tsuo ngɔ wo e nane si. 26 Gbenɔ ji nyagbe he nyɛlɔ nɛ a ma kpata e hɛ mi. 27 Ejakaa Mawu “ngɔ níhi tsuo kɛ wo e nane si.” Se benɛ e de ke ‘a ngɔ níhi tsuo kɛ wo e sisi’ ɔ, e ngɛ heii kaa Nɔ nɛ e ngɔ níhi tsuo kɛ wo e sisi ɔ piɛɛ we he. 28 Se ke a ná nɛ a ngɔ níhi tsuo kɛ wo e sisi ɔ, kɛkɛ ɔ, Bi ɔ nitsɛ hu maa ngɔ e he kɛ wo nɔ nɛ e ngɔ níhi tsuo kɛ wo e sisi ɔ sisi, nɛ Mawu ma plɛ níhi tsuo kɛ ha nɔ fɛɛ nɔ.

29 Ke pi jã a, lɛɛ mɛni lɛ nihi nɛ a ngɛ mɛ baptisie kɛ yi mi tomi kaa a ma ba pee ni gbogboehi ɔ maa pee? Ke a be gbogboehi a si tlee kulaa a, mɛni he je nɛ mɛ hu a ngɛ mɛ baptisie kɛ yi mi tomi kaa a ma ba pee jã a? 30 Mɛni he je nɛ wɔ hu ngmlɛfia fɛɛ ngmlɛfia a,* wa ngɛ oslaa mi ɔ? 31 Daa ligbi ɔ, i kɛ gbenɔ kpeɔ hɛ mi kɛ hɛ mi. Nyɛmimɛ, enɛ ɔ ngɛ kaa nyami nɛ i nyaa ngɛ nyɛ he ngɛ Kristo Yesu wa Nyɔmtsɛ ɔ mi ɔ nɔuu. 32 Ke i kɛ lohwe awi yeli nɔ kunɔ ngɛ Efeso kaa bɔ nɛ nimli kpahi peeɔ ɔ,* mɛni se nami lɛ ngɛ he kɛ ha mi? Ke a be gbogboe ɔmɛ si tlee ɔ, lɛɛ “nyɛ ha nɛ waa ye ní nɛ waa nu ní, ejakaa hwɔɔ wa ma gbo.” 33 Nyɛ ko ha nɛ a sisi nyɛ. Huɛ yayami bɔmi puɛɔ je mi bami kpakpa.* 34 Nyɛ hɛ nɛ ba nyɛ he nɔ ngɛ dami blɔ nɔ, nɛ nyɛ ko hi yayami pee, ejakaa ni komɛ be Mawu he nile. I ngɛ enɛ ɔ dee konɛ zo nɛ gbe nyɛ.

35 Se kɛ̃ ɔ, nɔ ko ma bi ke: “Mɛni blɔ nɔ a maa gu kɛ tle gbogboe ɔmɛ si? Ee, mɛni nɔmlɔ tso nɛ a kɛ maa ba?” 36 Mo nɛ o susuu we níhi a he! Nɔ́ nɛ o du ɔ, kekleekle ɔ, ja e gbo loko e maa ba wami mi. 37 Nɛ nɔ́ nɛ o du ɔ, pi nɔmlɔ tso ɔ nɛ e maa wa a nɛ o du ɔ, mohu ɔ, wu ɔ pɛ nɛ o du, ngma jio, wu kpa ko jio; 38 se Mawu haa lɛ nɔmlɔ tso bɔ nɛ e sa e hɛ mi, nɛ e haa wu ɔmɛ eko fɛɛ eko lɛ nitsɛ e nɔmlɔ tso. 39 He lohi tsuo hɛɛ we he lo kake, adesa nɔ́ ngɛ, nahi a he lo hu ngɛ, lohwe pɛlitsɛmɛ a he lo hu ngɛ, nɛ pa mi lohi a nɔ́ hu ngɛ. 40 Hiɔwe nɔmlɔ tsohi ngɛ nɛ zugba a nɔ nɔmlɔ tsohi hu ngɛ; se e slo hiɔwe nɔmlɔ tso ɔmɛ a hɛ mi nyami ngɛ zugba a nɔ nɔmlɔ tso ɔmɛ a nɔ́ ɔ he. 41 E slo pu ɔ hɛ mi nyami, nɛ e slo nyɔhiɔ ɔ hu hɛ mi nyami, nɛ e slo dodoe ɔmɛ hu a hɛ mi nyami; ngɛ anɔkuale mi ɔ, e slo dodoe kake hɛ mi nyami ngɛ dodoe kpa nɔ́ he.

42 Jã kɛ̃ nɛ e ji ngɛ gbogboehi a si tlemi ɔ hu blɔ fa mi. A duɔ nɔ́ nɛ e puɛɔ; a tleɔ nɔ́ nɛ e puɛ we si. 43 A duɔ nɔ́ nɛ e hɛ mi be nyami; a tleɔ nɔ́ nɛ e hɛ mi ngɛ nyami si. A duɔ nɔ́ nɛ e gbɔjɔ; a tleɔ nɔ́ nɛ e ngɛ he wami si. 44 A duɔ he lo nɔmlɔ tso; a tleɔ mumi nɔmlɔ tso si. Ke he lo nɔmlɔ tso ngɛ ɔ, lɛɛ mumi nɔ́ hu ngɛ. 45 Lɔ ɔ he ɔ, a ngma ke: “Kekleekle adesa nɛ ji Adam ɔ ba pee adesa* hɛngmengmletsɛ.” Nyagbe Adam ɔ ba pee mumi nɛ e haa nɔ wami. 46 Se pi mumi nɔ́ ɔ ji kekleekle nɔ́. He lo nɔ́ ɔ ji kekleekle nɔ́, nɛ lɔ ɔ se loko mumi nɔ́ ɔ. 47 Kekleekle adesa a je zugba a nɔ, nɛ zu a kɛ bɔ lɛ; adesa enyɔne ɔ je hiɔwe. 48 Kaa bɔ nɛ nɔ nɛ a kɛ zu bɔ lɛ ɔ ngɛ ɔ, jã kɛ̃ nɛ nihi nɛ a kɛ zu bɔ mɛ ɔ hu ngɛ; nɛ kaa bɔ nɛ hiɔwe nɔ ɔ ngɛ ɔ, jã kɛ̃ nɛ nihi nɛ a ngɛ hiɔwe ɔ hu ngɛ. 49 Nɛ kaa bɔ nɛ wa ji nɔ nɛ a kɛ zu bɔ lɛ ɔ henɔ ɔ, jã kɛ̃ nɛ wa maa pee hiɔwe nɔ ɔ hu henɔ.

50 Se nyɛmimɛ, i ngɛ nyɛ nɔ́ nɛ ɔ dee kaa he lo kɛ muɔ nine be nyɛe maa su Mawu Matsɛ Yemi ɔ nɔ, nɛ jã kɛ̃ nɛ nɔ́ nɛ e puɛɔ ɔ hu nine be nyɛe maa su nɔ́ nɛ e puɛ we ɔ nɔ. 51 Hyɛ! i ngɛ nyɛ laami sane nɛ e ngɛ klɔuu ko dee: Wɔ tsuo wa be gbenɔ mahe mi nɔe, mohu ɔ, a ma tsake wɔ tsuo 52 si kake too, kaa a fiaa hɛ ngmɛ ɔ, ngɛ nyagbe titimati ɔ nɔ. Ejakaa titimati ɔ maa pɛ, nɛ a ma tle gbogboe ɔmɛ si nɛ a be puɛe gblegbleegble, nɛ wɔɔ lɛɛ a ma tsake wɔ. 53 Ejakaa e sa kaa nɔ́ nɛ ɔ nɛ e puɛɔ ɔ nɛ e wo nɔ́ nɛ e puɛ we, nɛ e sa kaa nɔ́ nɛ ɔ nɛ e gboɔ ɔ nɛ e wo nɔ́ nɛ e gbo we. 54 Se ke nɔ́ nɛ ɔ nɛ e puɛɔ ɔ wo nɔ́ nɛ e puɛ we, nɛ nɔ́ nɛ ɔ nɛ e gboɔ ɔ wo nɔ́ nɛ e gbo we ɔ, lɛɛ munyu nɛ a ngma a maa ba mi: “A maa mi gbenɔ kɛ maa ya neneene.” 55 “Gbenɔ, jije o kunimi yemi ɔ ngɛ? Gbenɔ jije nɔ́ nɛ o kɛ tsɛ̃ɔ nɔ ɔ ngɛ?” 56 Nɔ́ nɛ e tsɛ̃ɔ nɔ nɛ ngɔɔ gbenɔ kɛ baa a ji yayami, nɛ Mlaa a ji yayami he wami.* 57 Se sina ha Mawu, ejakaa e haa nɛ wa yeɔ kunimi kɛ guɔ wa Nyɔmtsɛ Yesu Kristo nɔ!

58 Enɛ ɔ he ɔ, ye nyɛmimɛ nɛ i suɔ, nyɛɛ da si kpɛii, nyɛɛ du si, be fɛɛ be ɔ, nyɛ tsu babauu ngɛ Nyɔmtsɛ ɔ ní tsumi ɔ mi, ejakaa nyɛ le kaa nyɛ dengme gbomi ɔ be yaka pee ngɛ Nyɔmtsɛ ɔ mi.

16 Jehanɛ ɔ, ngɛ tsumi nɛ a tsuɔ kɛ ya haa ni klɔuklɔu ɔmɛ ɔ he ɔ, nyɛ ma nyɛ maa ngɔ blɔ tsɔɔmihi nɛ i kɛ ha asafohi nɛ a ngɛ Galatia a kɛ tsu ní. 2 Ngɛ kekleekle ligbi ngɛ otsi fɛɛ otsi mi ɔ nɔ ɔ, e sa nɛ nyɛ ti nɔ fɛɛ nɔ nɛ e da níhi nɛ e ngɛ ɔ nɔ kɛ je nɔ́ ko ngɔ to, konɛ ke i ba a, a ko tsu nɔ ko. 3 Se ke i ba a, ma tsɔ nyumuhi nɛ nyɛ ma je a yi ngɛ sɛ womihi a mi ɔ, konɛ a ngɔ nyɛ nike ní nɛ nyɛ je mi mi jɔmi mi nɛ nyɛɛ kɛ ha a kɛ ya Yerusalɛm. 4 Se ke e he maa hia kaa imi hu ma ya a, lɛɛ a maa piɛɛ ye he kɛ ya lejɛ ɔ.

5 Se ke i ya gu Makedonia a, ma ba nyɛ ngɔ, ejakaa ma ya gu Makedonia; 6 nɛ eko ɔ, ma ba hi nyɛ ngɔ, aloo ma ba ye ahlabata be ɔ po ngɛ nyɛ ngɔ konɛ nyɛ je mi blɔ bɔɔ kɛ ya he nɛ ma ya a. 7 Ejakaa amlɔ nɛ ɔ, i sume kaa ke i bee ɔ, ma ba na nyɛ be kpiti ko pɛ kɛkɛ, ejakaa i to kaa ke Yehowa* maa ngmɛ blɔ ɔ, ma ba ye be saii ngɛ nyɛ ngɔ. 8 Se ma hi Efeso kɛ yaa si Pentekoste Gbijlɔ ɔ nɔ, 9 ejakaa a bli sinya ngua ko nya kɛ ha mi nɛ e ma ha nɛ ma tsu ní, se nihi nɛ a teɔ si kɛ woɔ nɔ babauu hu ngɛ.

10 Jehanɛ ɔ, ke Timoteo ba a, nyɛɛ hyɛ nɛ nyɛ ko pee nɔ́ ko nɛ ma ha nɛ e ye gbeye ngɛ nyɛ kpɛti, ejakaa e ngɛ Yehowa* ní tsumi tsue kaa bɔ nɛ i ngɛ pee ɔ. 11 Enɛ ɔ he ɔ, nyɛ ko ha nɛ nɔ ko nɛ e nyafi lɛ. Nyɛɛ wo lɛ blɔ ngɛ tue mi jɔmi mi konɛ e nyɛ nɛ e ba ye ngɔ, ejakaa i ngɛ lɛ blɔ hyɛe kɛ piɛɛ nyɛmimɛ ɔmɛ a he.

12 Jehanɛ ɔ, kɛ kɔ wa nyɛmi Apolo he ɔ, i wo lɛ he wami wawɛɛ kaa e kɛ nyɛmimɛ ɔmɛ nɛ a ba nyɛ ngɔ. E pee we e juɛmi kaa e maa ba piɔ, se ke e ná he blɔ ɔ, e maa ba.

13 Nyɛ ko hwɔ mahe, nyɛɛ da si kpɛii ngɛ hemi kɛ yemi ɔ mi, nyɛɛ ya nɔ nɛ nyɛɛ pee nyɛ ní kaa nyumuhi,* nyɛ he nɛ wa. 14 E sa nɛ nyɛɛ kɛ suɔmi nɛ pee nɔ́ fɛɛ nɔ́.

15 Jehanɛ ɔ, nyɛmimɛ, i ngɛ nyɛ he wami woe: Nyɛ le kaa Stefana we ɔ mi bimɛ ɔmɛ ji kekle yiblii ngɛ Akaya, nɛ a tu a he ngɔ ha ni klɔuklɔu ɔmɛ a sɔmɔmi. 16 Nyɛ hu nyɛɛ ya nɔ nɛ nyɛɛ ba nyɛ he si kɛ ha nihi kaa jã a, kɛ nihi tsuo nɛ mɛ hu a yeɔ bua nɛ a tsuɔ ní wawɛɛ ɔ. 17 Se benɛ Stefana kɛ Fotunato kɛ Akaiko ba a, i nya, ejakaa akɛnɛ nyɛ be hiɛ ɔ he je ɔ, a ba da nyɛ nane mi. 18 Ejakaa a ba ha nɛ ye mumi ɔ kɛ nyɛ hu nyɛ ní ɔmɛ ná he jɔmi. Enɛ ɔ he ɔ, nyɛ je bumi kpo kɛ ha nihi kaa jã a.

19 Asia asafo ɔmɛ ke a biɔ nyɛ. Akuila kɛ Priska kɛ asafo ɔ nɛ ngɛ a we ɔ mi ɔ hu je a tsui mi nɛ a ke a biɔ nyɛ ngɛ Nyɔmtsɛ ɔ mi. 20 Nyɛmimɛ ɔmɛ tsuo ke a biɔ nyɛ. Nyɛ fɔ nyɛ sibi kɛ nya he fiɔmi nɛ ngɛ klɔuklɔu.

21 Imi Paulo nɛ́ i kɛ imi nitsɛ ye nine ngma sɛ womi nɛ ɔ hu ke i biɔ nyɛ.

22 Ke nɔ ko sume Nyɔmtsɛ ɔ sane ɔ, a gbiɛ lɛ. Oo wa Nyɔmtsɛ, moo ba! 23 Nyɔmtsɛ Yesu dloomi ɔ kɛ nyɛ nɛ hi si. 24 Ye suɔmi ɔ kɛ nyɛ tsuo nɛ hi si ngɛ Kristo Yesu mi.