WOMI ENYƆNE KƐ YA HA KORINTO BI ƆMƐ

1 Paulo, Kristo Yesu bɔfo ngɛ Mawu suɔmi nya, kɛ wa nyɛminyumu Timoteo kɛ ya ha Mawu asafo ɔ nɛ ngɛ Korinto ɔ, kɛ ni klɔuklɔu ɔmɛ tsuo nɛ a ngɛ Akaya a tsuo hulɔ:

2 Nyɛ nine nɛ su dloomi kɛ tue mi jɔmi nɛ je Mawu nɛ ji wa Tsɛ ɔ, kɛ Nyɔmtsɛ Yesu Kristo ngɔ ɔ nɔ.

3 Á je Mawu nɛ ji wa Nyɔmtsɛ Yesu Kristo Tsɛ ɔ yi, Tsɛ mɔbɔ nalɔ, kɛ bua womi tsuo Mawu ɔ, 4 nɔ nɛ e woɔ wa bua* ngɛ wa kahi* tsuo a mi konɛ wa nyɛ nɛ waa ngɔ bua womi nɛ wa nine suɔ nɔ kɛ jeɔ Mawu ngɔ ɔ kɛ wo ni kpahi a bua ngɛ ka* saisaa mi ɔ. 5 Ejakaa kaa bɔ nɛ amanehluhi nɛ wa naa ngɛ Kristo he ɔ hiɛ kɛ be nɔ ngɛ wa mi ɔ, jã kɛ̃ nɛ bua womi nɛ wa nine suɔ nɔ kɛ guɔ Kristo nɔ ɔ hu hiɛ kɛ be nɔ. 6 Jehanɛ ɔ, ke waa kɛ kahi* ngɛ kpee ɔ, nyɛ bua womi kɛ nyɛ yi wami hemi he je; nɛ ke a ngɛ wa bua woe ɔ, e woɔ nyɛ hu nyɛ bua, nɛ e haa nɛ nyɛ daa amanehluhi nɛ wɔ hu waa kɛ kpeɔ ɔ nɔuu nya. 7 Nɛ hɛ kɛ nɔ fɔmi nɛ wa ngɛ ngɛ nyɛ mi ɔ mimiɛɛ we, ejakaa wa le kaa bɔ nɛ nyɛ hu nyɛ naa amanehlu ɔmɛ eko ɔ, jã kɛ̃ nɛ nyɛ ma ná bua womi ɔ hu eko.

8 Ejakaa nyɛmimɛ, wa sume kaa wa maa ngɔ amanehlu nɛ waa kɛ kpe ngɛ Asia kpokpa a mi ɔ kɛ laa nyɛ. Wa yi fĩ wawɛɛ nitsɛ pe bɔ nɛ wɔ nitsɛmɛ wa he wami ko nyɛ ko da nya, nɛ jinɛ wa hɛ be nɔ po kaa wa maa hi wami mi. 9 Ngɛ anɔkuale mi ɔ, wa nu he kaa a bu wɔ gbenɔ fɔ. E ba mi jã konɛ wa ko ngɔ wa he kɛ fɔ wɔ nitsɛmɛ wa nɔ, mohu ɔ, waa ngɔ wa hɛ kɛ fɔ Mawu, nɔ nɛ e tleɔ gbogboehi a si ɔ nɔ. 10 Niinɛ, e kpɔ̃ wɔ kɛ je oslaa ngua ko nɛ jinɛ e kɛ wɔ ko ya gbenɔ mi ɔ mi, nɛ e ma kpɔ̃ wɔ, nɛ wa ngɛ hɛ kɛ nɔ fɔmi ngɛ e mi kaa e maa ya nɔ nɛ e ma kpɔ̃ wɔ ekohu. 11 Nyɛ hu nyɛ ma nyɛ maa ye bua wɔ kɛ gu pɛɛ nɛ mi wa nɛ nyɛ ma kpa ha wɔ ɔ nɔ, konɛ nihi fuu nɛ a na Mawu si ha wɔ ngɛ dloomi nɛ wa nine su nɔ ngɛ sɔlemi nɛ nihi babauu sɔle ha wɔ nɛ a ha heto ɔ he je.

12 Ejakaa nɔ́ nɛ wa fĩaa ngɛ he ɔ ji nɛ ɔ nɛ, wa he nile yeɔ odase kaa wa ba wa je mi ngɛ klɔuklɔu peemi, kɛ Mawu jami mi anɔkuale yemi mi ngɛ je ɔ mi, kɛ titli ɔ, ngɛ nyɛ kpɛti, pi kɛ he lo nya juɛmi, mohu ɔ, kɛ Mawu dloomi ɔ. 13 Ejakaa ngɛ anɔkuale mi ɔ, pi nɔ́ kpa ko nɛ wa ngɛ nyɛ ngmae kaa ja níhi nɛ nyɛ ma nyɛ maa kane* nɛ nyɛ maa nu sisi ɔ pɛ, nɛ i he ye kaa nyɛ maa ya nɔ nɛ nyɛ maa nu ní nɛ ɔmɛ a sisi kɛ pi si,* 14 kaa bɔ nɛ nyɛ hu nyɛ nu sisi kɛ ya su he ko kaa wɔ ji nihi nɛ nyɛɛ kɛ fĩaa a, jã kɛ̃ nɛ nyɛ hu nyɛ maa pee kɛ ha wɔ ngɛ wa Nyɔmtsɛ Yesu ligbi ɔ nɔ.

15 Enɛ ɔ he ɔ, ngɛ nɔ mi mami nɛ ɔ he je ɔ, jinɛ i to kaa ma ba nyɛ ngɔ kekle, konɛ nyɛ ná he blɔ enyɔne kɛ ná bua jɔmi;* 16 ejakaa jinɛ i to kaa ke i ngɛ blɔ nɔ kɛ yaa Makedonia a, ma ba slaa nyɛ, nɛ ke i je Makedonia kɛ ma hu ɔ, ma ba gu nyɛ ngɔ, nɛ ma ha nɛ nyɛ maa wo mi blɔ kɛ ya Yudea. 17 Lɛɛ, benɛ i pee ye juɛmi jã a, anɛ i bu sane ɔ kaa nɔ́ ko nɛ e he hia we lo? Aloo anɛ i peeɔ juɛmi ngɛ níhi a he ngɛ he lo nya bɔ nɛ pee nɛ ke i ngɛ dee ke “Ee, ee” ɔ, kɛkɛ ɔ, “Dɛbi, dɛbi” lo? 18 Se nyɛ ma nyɛ ma he Mawu maa ye kaa nɔ́ nɛ wa deɔ nyɛ ɔ, pi “ee,” se kɛ̃ ɔ, “dɛbi.” 19 Ejakaa Mawu bi Yesu Kristo nɛ a gu imi kɛ Silvano* kɛ Timoteo wa nɔ kɛ fiɛɛ e he sane ngɛ nyɛ kpɛti ɔ ba pee we “ee,” se kɛ̃ ɔ, “dɛbi,” mohu ɔ, “ee” ba pee “ee” ngɛ e blɔ fa mi. 20 Ejakaa ngɛ bɔ nɛ Mawu si womi ɔmɛ hiɛ babauu ha tsuo se ɔ, kɛ gu e nɔ ɔ, a ba pee “ee.” Enɛ ɔ he ɔ, kɛ gu e nɔ hulɔ ɔ, a deɔ Mawu ke “Amen,” nɛ lɔ ɔ woɔ e hɛ mi nyami kɛ guɔ wa nɔ. 21 Se Mawu ji nɔ nɛ e maa nɔ mi kaa Kristo níhi ji nyɛɛ kɛ wɔ tsuo, nɛ lɛ nɔuu nɛ e pɔ wɔ nu. 22 E ngɔ e nya sɔumi nɔ́ ɔ hu kɛ sɔu wa nya nɛ e ha wɔ nɔ́ nɛ maa ba a he okadi,* lɔ ɔ ji, mumi ɔ nɛ ngɛ wa tsui mi ɔ nɛ.

23 Amlɔ nɛ ɔ, i ngɛ Mawu tsɛe konɛ e ba ye odase kɛ si mi* kaa mɔbɔ nɛ i suɔ kaa ma na nyɛ ɔ he je nɛ i bɛ Korinto lolo ɔ nɛ. 24 Pi kaa wa ji nyɔmtsɛmɛ ngɛ nyɛ hemi kɛ yemi ɔ nɔ, mohu ɔ, wa ji nihi nɛ a piɛɛ nyɛ he kɛ ngɛ ní tsue ngɛ nyɛ bua jɔmi nami he je, ejakaa nyɛ hemi kɛ yemi ɔ lɛ ha nɛ nyɛ daa si ɔ nɛ.

2 Ejakaa i pee ye juɛmi kaa i be nyɛ ngɔ bae ngɛ aywilɛho mi hu. 2 Ejakaa ke i ha nɛ nyɛ ye aywilɛho ɔ, mɛnɔ lɛ pa ngɛ nɛ e maa wo ye bua kaa ja nɔ nɛ i wo lɛ aywilɛho ɔ nɔuu? 3 I ngma nɔ́ nɛ i ngma a bɔ nɛ pee nɛ ke i ba a, ma ko ba ye aywilɛho ngɛ ni nɛmɛ nɛ e sa kaa ma nya ngɛ a he ɔ he je, ejakaa i ngɛ nɔ mi mami kaa nɔ́ nɛ haa mi bua jɔmi ɔ haa nyɛ tsuo jamɛ a bua jɔmi ɔ nɔuu. 4 Ejakaa i ngɛ amanehlu babauu kɛ tsui yemi mi nɛ i kɛ ngma nyɛ womi nɛ ɔ kɛ ye hɛ mi vo nyu babauu, pi kaa ma kɛ wo nyɛ aywilɛho, mohu ɔ, konɛ ma ha nɛ nyɛɛ le bɔ nɛ suɔmi nɛ i ngɛ kɛ ha nyɛ ɔ mi kuɔ ha.

5 Amlɔ nɛ ɔ, ke nɔ ko ha nɛ aywilɛho ba a, pi imi aywilɛho nɛ e wo, se ngɛ blɔ ko nɔ ɔ, nyɛ tsuo—i sume kaa ma tu nɔ́ nɛ ɔ he munyu veveeve tsɔ. 6 Jamɛ a nyumu ɔ hɛ mi nɛ nihi hiɛhiɛɛ kã a hiɛ ha lɛ; 7 amlɔ nɛ ɔ, e sa nɛ nyɛɛ je mi mi himi mi nɛ nyɛɛ ngɔ kɛ pa lɛ mohu, nɛ́ nyɛɛ wo e bua, konɛ aywilɛho yemi sɔuu nɛ ko ba gbe lɛ.* 8 Enɛ ɔ he ɔ, i ngɛ nyɛ he wami woe kaa nyɛɛ ma nyɛ suɔmi ɔ nɔ mi kɛ ha lɛ. 9 Ejakaa enɛ ɔ hu he je nɛ i ngma nyɛ ɔ nɛ: konɛ ma kɛ hyɛ kaa nyɛ maa tsɔɔ kaa nyɛ buɔ tue ngɛ níhi tsuo a mi lo. 10 Ke nyɛ ngɔ nɔ́ ko kɛ pa nɔ ko ɔ, imi hu i pee jã. Ngɛ anɔkuale mi ɔ, nɔ́ fɛɛ nɔ́ nɛ i ngɔ kɛ pa a, (ke i ngɔ nɔ́ ko kɛ pa a) nyɛ he je nɛ i pee jã ngɛ ngɛ Kristo hɛ mi 11 bɔ nɛ pee nɛ Satan nine nɛ ko su wa nɔ,* ejakaa pi kaa wa li e ga tsɔmi ɔmɛ.*

12 Jehanɛ ɔ, benɛ i ba su Troya nɛ ma jaje sane kpakpa a nɛ kɔɔ Kristo he ɔ nɛ́ a bli sinya ko ha mi ngɛ Nyɔmtsɛ ɔ mi ɔ, 13 ye mumi ɔ ná we he jɔmi ko kulaa, ejakaa i nɛ ye nyɛminyumu Tito. Enɛ ɔ he ɔ, i kɛ mɛ ye sɛ nɛ i je kɛ ho Makedonia ya.

14 Se sina ha Mawu, nɔ nɛ be fɛɛ be ɔ, e nyɛɛɔ wa hɛ mi ngɛ kunimi yemi he ako nɛ waa kɛ Kristo pee kake kɛ ngɛ sie ɔ mi, nɛ́ e guɔ wa nɔ nɛ e haa nɛ e he ní lemi ɔ he via a suɔ he fɛɛ he* ɔ! 15 Ejakaa wa ji Kristo he via liliili kɛ ha Mawu ngɛ ni nɛmɛ nɛ a ngɛ a yi wami hee ɔmɛ a kpɛti, kɛ ni nɛmɛ nɛ a hɛ mi ngɛ kpatae ɔ hu a kpɛti; 16 se kɛ ha ni nɛmɛ nɛ a hɛ mi ngɛ kpatae ɔ, wa ji gbenɔ he fu nɛ kɛ nɔ yaa gbenɔ mi, se kɛ ha ni nɛmɛ nɛ a ngɛ a yi wami hee ɔ lɛɛ, wa ji wami he via nɛ kɛ nɔ yaa wami mi. Nɛ mɛnɔmɛ nɛ a he su bɔ nɛ sa kɛ ha ní nɛ ɔmɛ? 17 Wɔ, ejakaa wɔɔ lɛɛ tsa pi Mawu munyu ɔ he jua yeli ji wɔ kaa bɔ nɛ nyumuhi fuu ji ɔ, se wa jeɔ wa tsui mi kɛ tuɔ munyu kaa nihi nɛ a tsɔ mɛ kɛ je Mawu ngɔ, ee, ngɛ Mawu hɛ mi, kɛ jehanɛ ɔ, ngɛ waa kɛ Kristo wa kake peemi ɔ mi.

3 Anɛ wa kpale bɔni wɔ nitsɛmɛ wa yi jemi ekohu lo? Aloo kaa bɔ nɛ e ji ngɛ nyumu komɛ a blɔ fa mi ɔ, anɛ e he hia nɛ wa ha nyɛ yi jemi sɛ womihi lo, aloo waa ngɔ kɛ je nyɛ ngɔ? 2 Nyɛ nitsɛmɛ ji wa sɛ womi, a ngma ngɛ wa tsui nɔ, nɛ adesahi tsuo le, nɛ a ngɛ kanee. 3 Ejakaa a je nyɛ ngɔ tsɔɔ kaa nyɛ ji Kristo sɛ womi nɛ wa ngma kaa sɔmɔli, pi ní ngmami nyu nɛ a kɛ ngma, mohu ɔ, Mawu hɛ kalɔ ɔ mumi ɔ, nɛ pi tɛ tɛtlɛɛhi a nɔ nɛ a ngma ngɛ, mohu ɔ, ngɛ he lo tɛtlɛɛhi a nɔ, ngɛ tsuihi a nɔ.

4 Wa ngɛ kikɛmɛ a hɛ kɛ nɔ fɔmi nɛ ɔ ngɛ Mawu mi kɛ gu Kristo nɔ. 5 Pi kaa wɔ nitsɛmɛ lɛ wa ha nɛ wa he su bɔ nɛ sa nɛ́ wa ma susu kaa nɔ́ ko je wa ngɔ, mohu ɔ, wa he nɛ su bɔ nɛ sa a je Mawu ngɔ, 6 nɔ nɛ ngɛ anɔkuale mi ɔ, e ha nɛ wa he su bɔ nɛ sa konɛ waa pee somi ehe ɔ he sɔmɔli, pi ngɛ mlaa ko nɛ a ngma nya, mohu ɔ, e ji mumi mi nɔ́; ejakaa mlaa nɛ a ngma a buɔ nɔ gbenɔ fɔ, se mumi ɔ lɛɛ e haa nɔ wami.

7 Jehanɛ ɔ, ke mlaa a nɛ ngɔɔ gbenɔ kɛ baa nɛ a kpɛ́ ngɛ ningma okadihi a mi ngɛ tɛhi a nɔ ɔ ba kɛ hɛ mi nyami kaa kikɛ nɛ ɔ, nɛ́ lɔ ɔ ha nɛ Israel bi ɔmɛ nyɛ we nɛ a hyɛ Mose hɛ mi ngɛ e hɛ mi nyami ɔ he je, hɛ mi nyami nɛ e se maa po ɔ, 8 lɛɛ mɛni he je nɛ e sɛ nɛ mumi ɔ ní tsumi ɔ nɛ e ngɔ hɛ mi nyami nɛ e pe lɔ ɔ po kɛ ba a? 9 Ejakaa ke mlaa a nɛ buɔ nɔ fɔ ɔ hɛ mi ngɛ nyami ɔ, lɛɛ dami ɔ ní tsumi ɔ hɛ mi maa hi nyami hluu po pe lɔ ɔ! 10 Ngɛ anɔkuale mi ɔ, nɔ́ nɛ e hɛ mi ngɛ nyami be ko nɛ be ɔ po ɔ, a kpɔ hɛ mi nyami ɔ ngɛ he, ejakaa hɛ mi nyami ko pe lɛ. 11 Ejakaa ke a ngɔ nɔ́ nɛ e se maa po ɔ kɛ ba kɛ hɛ mi nyami ɔ, lɛɛ nɔ́ nɛ maa hi si ɔ hɛ mi maa hi nyami hluu po pe lɔ ɔ!

12 Akɛnɛ wa ngɛ kikɛmɛ a hɛ kɛ nɔ fɔmi nɛ ɔ he je ɔ, wa ngɛ munyu tue faa nitsɛ, 13 nɛ wa pee we nɔ́ nɛ Mose pee benɛ e ngɔ hɛ mi hami nɔ́ kɛ ha e hɛ mi konɛ Israel bi ɔmɛ nɛ a ko hyɛ nɔ́ nɛ se maa po ɔ nya gbemi ɔ totooto ɔ. 14 Se a juɛmi nya ba si. Ejakaa kɛ ba si mwɔnɛ ɔ ligbi nɛ ɔ, ke a kane somi momo ɔ, jamɛ a hɛ mi hami nɔ́ ɔ ngɛ loloolo nɛ a je we, ejakaa Kristo nɔ pɛ nɛ a guɔ kɛ jeɔ kɛ yaa. 15 Ngɛ anɔkuale mi ɔ, kɛ ba si mwɔnɛ ɔ ligbi nɛ ɔ, be fɛɛ be nɛ a maa kane Mose ɔ, hɛ mi hami nɔ́ ko ha a tsui nɔ. 16 Se ke nɔ ko kpale kɛ ba Yehowa* ngɔ ɔ, a jeɔ hɛ mi hami nɔ́ ɔ kɛ yaa. 17 Jehanɛ ɔ, Yehowa* ji Mumi ɔ nɛ, nɛ he nɛ Yehowa* mumi ɔ ngɛ ɔ, he yemi ngɛ lejɛ ɔ. 18 Nɛ be mi nɛ nɔ́ ko hɛ wa hɛ mi ɔ, wɔ tsuo wa jeɔ Yehowa* hɛ mi nyami ɔ kpo kaa ahuhuɛhi, nɛ a tsakeɔ wɔ kɛ peeɔ jamɛ a henɔ ɔ nɔuu kɛ jeɔ hɛ mi nyami kake mi kɛ yaa ekpa mi,* kaa bɔ nɛ Yehowa* nɛ ji Mumi* ɔ peeɔ ɔ pɛpɛɛpɛ.

4 Enɛ ɔ he ɔ, akɛnɛ wa ná sɔmɔmi nɛ ɔ kɛ gu mɔbɔ nɛ a na wɔ ɔ nɔ he je ɔ, wa kɔni mi wui nyu. 2 Se wa kua zo níhi nɛ a peeɔ ngɛ laami mi ɔ, wa nyɛɛ we ngɛ ga yayami tomi nya, nɛ jã kɛ̃ nɛ wa tsakee we Mawu munyu ɔ hɛ mi; se kɛ gu anɔkuale ɔ nɛ wa haa nɛ e jeɔ kpo heii ɔ nɔ ɔ, wa jeɔ wɔ nitsɛmɛ wa yi kɛ haa adesa fɛɛ adesa he nile ngɛ Mawu hɛ mi. 3 Ngɛ anɔkuale mi ɔ, ke a ha sane kpakpa a nɛ wa jajeɔ ɔ hɛ mi ɔ, a ha hɛ mi ngɛ nihi nɛ a hɛ mi ngɛ kpatae ɔmɛ a kpɛti, 4 a kpɛti nɛ níhi a blɔ nya tomi* nɛ ɔ mi mawu ɔ yu nihi nɛ a he we yi ɔmɛ a juɛmi konɛ sane kpakpa a nɛ hɛ mi ngɛ nyami nɛ kɔɔ Kristo nɛ e ji Mawu henɔ ɔ he ɔ kpɛmi ɔ* nɛ ko kpɛ kɛ gu a mi. 5 Ejakaa sɛ gbi nɛ wa ngɛ fiɛɛe ɔ, pi wɔ nitsɛmɛ wa he nɛ e kɔɔ, mohu ɔ, e kɔɔ Yesu Kristo he kaa e ji Nyɔmtsɛ, nɛ wɔ nitsɛmɛ lɛɛ wa fiɛɛɔ kaa wa ji nyɛ nyɔguɛhi ngɛ Yesu he je. 6 Ejakaa Mawu ji nɔ nɛ e de ke: “Ha nɛ la a nɛ kpɛ kɛ je diblii mi” ɔ nɛ, nɛ e ha nɛ Mawu he ní lemi nɛ e hɛ mi ngɛ nyami ɔ kpɛ kɛ gu Kristo hɛ mi kɛ pue wa tsui ɔmɛ a nɔ konɛ a kpɛ.

7 Se wa ngɛ juetli nɛ ɔ ngɛ zu buɛhi a mi, konɛ he wami nɛ pe adesahi a nɔ́ ɔ nɛ pee Mawu nɔ́, se pi wɔɔ wa nɔ́. 8 Wa he fiɔ wɔ wawɛɛ ngɛ blɔ fɛɛ blɔ nɔ, se wa he fi we wɔ pi bɔ nɛ wa be nyɛe maa po wa he; wa juɛmi gbɛɔ, se pi kaa wa nyɛ we he nɔ́ ko peemi kulaa;* 9 a waa wɔ yi mi, se a kua we wɔ; a fiaa wɔ si, se wa hɛ mi kpataa we. 10 Be fɛɛ be ɔ, wɔ hu wa daa yi wu tso níhi nɛ ma nyɛ maa gbe nɔ nɛ a pee Yesu ɔ nya ngɛ wa nɔmlɔ tso ɔ mi, konɛ Yesu wami ɔ hu nɛ je kpo heii ngɛ wa nɔmlɔ tso ɔ mi. 11 Ejakaa wɔ nihi nɛ wa ngɛ wami mi ɔ, Yesu he je ɔ, a haa nɛ waa kɛ gbenɔ kpeɔ hɛ mi kɛ hɛ mi, konɛ Yesu wami ɔ hu nɛ je kpo heii ngɛ wa he lo nɛ e gboɔ ɔ mi. 12 Enɛ ɔ he ɔ, gbenɔ ngɛ ní tsue ngɛ wa mi, se nyɛɛ lɛɛ wami ngɛ ní tsue ngɛ nyɛ mi.

13 Jehanɛ ɔ, akɛnɛ wa ngɛ hemi kɛ yemi mumi ɔ nɔuu kaa bɔ nɛ a ngma ke: “I he ye, enɛ ɔ he ɔ, i tu munyu” he je ɔ; wɔ hu wa heɔ yeɔ, enɛ ɔ he ɔ, wa tuɔ munyu, 14 ejakaa wa le kaa Nɔ nɛ e tle Yesu si ɔ ma tle wɔ hu si kɛ piɛɛ Yesu he, nɛ e maa ngɔ wɔ kɛ piɛɛ nyɛ he kɛ tsɔɔ. 15 Ejakaa nyɛ he je nɛ a ngɛ ní nɛ ɔmɛ tsuo pee ɔ nɛ, konɛ dloomi ɔ nɛ ngɛ hiɛe ɔ nɛ e hiɛ kɛ be nɔ po pe kekle ɔ, ejakaa nihi babauu ba ngɛ si nae kɛ ngɛ Mawu hɛ mi nyami woe.

16 Enɛ ɔ he ɔ, wa kɔni mi wui nyu, se ke nɔmlɔ nɛ wa ji ngɛ kpo nɔ blɔ ɔ ngɛ puɛe po ɔ, ngɛ anɔkuale mi ɔ, nɔmlɔ nɛ wa ji ngɛ mi mi blɔ ɔ ngɛ ehe pee daa ligbi. 17 Ejakaa e ngɛ mi kaa amanehlu ɔ* se be kɛe nɛ e mi jiɔ we mohu lɛɛ, se e peeɔ hɛ mi nyami babauu nɛ ngɛ hiɛe babauu nitsɛ* kɛ haa wɔ, nɛ e ngɛ kɛ yaa neneene; 18 be mi nɛ pi níhi nɛ a naa amɛ a he nɛ wa hɛ ngmɛ ngɛ, se mohu níhi nɛ a nɛ ɔ. Ejakaa níhi nɛ a naa a hí si daa, se níhi nɛ a nɛ ɔ lɛɛ, a ngɛ kɛ yaa neneene.

5 Ejakaa wa le kaa ke a ku* wa zugba nɛ ɔ nɔ we, nɛ ji bo tsu nɛ ɔ kɛ pue si ɔ, wa ma ná tsu ko kɛ je Mawu ngɔ, we nɛ pi ninehi nɛ a kɛ pee, nɛ e maa hi si kɛ maa ya neneene ngɛ hiɔwe. 2 Ejakaa ngɛ anɔkuale mi ɔ, wa kɛmɛɔ ngɛ we* nɛ ɔ mi, nɛ wa suɔ wawɛɛ kaa wa maa wo wa nɔ́* ɔ nɛ e je hiɔwe* ɔ, 3 konɛ ke wa wo ɔ, a ko na kaa wa hɛɛ wa he gu. 4 Ngɛ anɔkuale mi ɔ, wɔ nɛ́ wa ngɛ bo tsu nɛ ɔ mi ɔ, wa kɛmɛɔ, nɛ wa haoɔ wawɛɛ, ejakaa wa sume nɛ wa ma je enɛ ɔ kɛ fɔ si, se kɛ̃ ɔ, wa suɔ kaa wa maa wo kaketsɛ ɔ, bɔ nɛ pee nɛ wami ɔ nɛ e mi nɔ́ nɛ gboɔ ɔ. 5 Jehanɛ ɔ, nɔ nɛ e dla wɔ kɛ ha kikɛmɛ a nɔ́ nɛ ɔ ji Mawu, nɔ nɛ e ha wɔ mumi ɔ kaa nɔ́ nɛ maa ba a he okadi ɔ.*

6 Enɛ ɔ he ɔ, be fɛɛ be ɔ, wa nɔ gbagba teɔ, nɛ wa le kaa be mi nɛ nɔmlɔ tso ɔ ji wa we mi ɔ, wa be Nyɔmtsɛ ɔ ngɔ, 7 ejakaa wa ngɛ nyɛɛe ngɛ hemi kɛ yemi nya, se pi ngɛ níhi nɛ a naa a nya. 8 Se wa nɔ gbagba teɔ, nɛ wa ná nɛ jinɛ wa be nɔmlɔ tso ɔ mi, konɛ waa kɛ Nyɔmtsɛ ɔ nɛ hi we mi. 9 Enɛ ɔ he ɔ, waa kɛ lɛ ngɛ we mi jio, wa be e ngɔ jio, oti nɛ waa kɛ ma wa hɛ mi ji kaa wa maa sa e hɛ mi. 10 Ejakaa e sa nɛ wɔ tsuo wa ya je kpo* ngɛ Kristo kojomi sɛ ɔ hɛ mi, konɛ nɔ fɛɛ nɔ nɛ ná níhi nɛ e pee be mi nɛ e ngɛ nɔmlɔ tso ɔ mi ɔ he hiɔwo, kpakpa jio, yayami* jio.

11 Enɛ ɔ he ɔ, akɛnɛ wa le Nyɔmtsɛ ɔ gbeye yemi ɔ he je ɔ, wa yaa nɔ nɛ wa plɛɔ nihi a yi mi, se Mawu le wɔ saminya.* Se kɛ̃ ɔ, i he ye kaa nyɛ he nile ɔmɛ hu le wɔ saminya.* 12 Pi nɛ wa kpale ngɛ wa yi jee kɛ ngɛ nyɛ hae, mohu ɔ, wa ngɛ nyɛ he wami womi nɔ́ ko hae nɛ́ nyɛɛ da nɔ kɛ fĩa ngɛ wa he, konɛ nyɛ ná heto kɛ ha nihi nɛ a fĩaa ngɛ kpo nɔ blɔ níhi a he, se pi ngɛ tsui mi níhi a he ɔ. 13 Ejakaa ke wa yi puɛ ɔ, e puɛ kɛ ha Mawu; ke wa juɛmi mi tsɔ ɔ, e mi tsɔ kɛ ha nyɛ. 14 Ejakaa suɔmi nɛ Kristo ngɛ ɔ nyɛɔ wa nɔ, ejakaa bɔ nɛ wa ma nya si ha ji nɛ ɔ nɛ, kaa adesa kake gbo kɛ ha nihi tsuo; enɛ ɔ he ɔ, nihi tsuo gbo. 15 Nɛ e gbo kɛ ha nihi tsuo konɛ nihi nɛ a ngɛ wami mi ɔ nɛ a ko hi wami mi kɛ ha mɛ nitsɛmɛ a he hu, se mohu kɛ ha nɔ nɛ e gbo kɛ ha mɛ nɛ a tle lɛ si ɔ.

16 Enɛ ɔ he ɔ, kɛ je piɔ kɛ yaa a, ngɛ he lo blɔ fa mi ɔ, wa li adesa ko. Ke be ko nɛ be ɔ wa le Kristo ngɛ he lo nya po ɔ, ngɛ anɔkuale mi ɔ, amlɔ nɛ ɔ lɛɛ wa li lɛ ngɛ jamɛ a blɔ ɔ nɔ hu. 17 Lɔ ɔ he ɔ, ke nɔ ko kɛ Kristo pee kake ɔ, nɔ ɔ ji adebɔ nɔ́ ehe; ní momo ɔmɛ be kɛ ho; hyɛ! ní ehehi lɛ a ba. 18 Se níhi tsuo je Mawu ngɔ, nɔ nɛ e gu Kristo nɔ kɛ dla waa kɛ lɛ wa kpɛti nɛ e ngɔ nihi kɛ lɛ a kpɛti dlami he sɔmɔmi ɔ kɛ wo wa dɛ ɔ, 19 lɔ ɔ ji kaa Mawu ngɛ e kɛ je ko a kpɛti dlae kɛ gu Kristo nɔ, e bui a tɔmi ɔmɛ a he akɔtaa kɛ si we mɛ, nɛ e ngɔ kpɛti dlami ɔ he sɛ gbi ɔ kɛ wo wa dɛ.

20 Enɛ ɔ he ɔ, wa ji nane mi dali nɛ wa daa si ngɛ Kristo nane mi, kaa nɔ́ nɛ Mawu gu wa nɔ kɛ ngɛ pɛɛ kpae. Akɛnɛ wa ji nihi nɛ a daa si ngɛ Kristo nane mi he je ɔ, wa kpaa pɛɛ ke: “Nyɛ ba dla nyɛɛ kɛ Mawu nyɛ kpɛti.” 21 Nɔ nɛ e li yayami ɔ, wa he ɔ, a ha nɛ e plɛ yayami,* konɛ kɛ gu e nɔ ɔ, wa ba plɛ Mawu dami ɔ.

6 Be mi nɛ waa kɛ lɛ pee kake kɛ ngɛ ní tsue nɛ ɔ, wa ngɛ nyɛ he wami woe hu kaa ke nyɛ kplɛɛ Mawu dloomi ɔ nɔ ɔ, nyɛ ko ha nɛ yi mi tomi nɛ ngɛ he ɔ nɛ pee yaka. 2 Ejakaa e deɔ ke: “Ngɛ be nɛ sa mi ɔ, i bu mo tue, nɛ ngɛ yi wami hemi ligbi ko nɔ ɔ, i ye bua mo.” Hyɛ! Amlɔ nɛ ɔ ji be nɛ sa saminya a nɛ. Hyɛ! Amlɔ nɛ ɔ ji yi wami hemi ligbi ɔ nɛ.

3 Wa pee we nɔ́ ko ngɛ blɔ ko nɔ nɛ maa tɔ̃tɔ̃ nɔ ko nane, konɛ a ko na tɔmi ko ngɛ wa sɔmɔmi ɔ he; 4 se ngɛ blɔ fɛɛ blɔ nɔ ɔ, wa jeɔ wɔ nitsɛmɛ wa yi kaa Mawu sɔmɔli, kɛ gu si nɛ wa fĩɔ ngɛ níhi fuu a mi ɔ nɔ, ngɛ amanehluhi a mi, ngɛ fimi behi a mi, ngɛ haomihi a mi, 5 ngɛ kongomihi a mi, ngɛ tsu womihi a mi, ngɛ basabasa peemihi a mi, ngɛ ní tsumi wawɛɛ mi, ngɛ nyɔ fɔmihi a mi, ngɛ hwɔ hamihi a mi; 6 ngɛ he tsɔmi mi, ngɛ nile mi, ngɛ tsui si tomi mi, ngɛ mi mi jɔmi mi, ngɛ mumi klɔuklɔu mi, ngɛ suɔmi nɛ osato be mi ɔ mi, 7 ngɛ anɔkuale munyu tumi mi, ngɛ Mawu he wami mi; kɛ gu dami ta hwumi níhi ngɛ hiɔ nine* mi kɛ muɔ nɔ* ɔ nɔ, 8 kɛ gu hɛ mi nyami kɛ hɛ mi si puemi nɔ, kɛ gu amaniɛ bɔmi yayami kɛ amaniɛ bɔmi kpakpa nɔ. A buɔ wɔ kaa nihi nɛ a sisiɔ nɔ, se kɛ̃ ɔ, anɔkualetsɛmɛ ji wɔ, 9 kaa nihi nɛ a li mɛ, se kɛ̃ ɔ, a le wa mi tso, kaa nihi nɛ a ngɛ gboe,* se kɛ̃ ɔ, hyɛ! wa ngɛ wami mi, kaa nihi nɛ a gbla a tue,* se kɛ̃ ɔ, a ngɔɛ wɔ kɛ wui gbenɔ dɛ mi, 10 kaa nihi nɛ a ngɛ kɔmɔ yee, se kɛ̃ ɔ, wa nyaa daa, kaa ohiatsɛmɛ, se kɛ̃ ɔ, wa ha nɛ nihi babauu ngɛ niatsɛmɛ pee, kaa nihi nɛ a be nɔ́ ko, se kɛ̃ ɔ, wa ngɛ níhi tsuo.   

11 Korinto bi, wa pa wa nya mi konɛ waa tu munyu kɛ tsɔɔ nyɛ,* nɛ wa bli wa tsui mi gbajaa. 12 Wa nga we wa tsui nya* ngɛ nyɛ sane nɛ wa suɔ ɔ he je, se nyɛɛ lɛɛ nyɛ nga nyɛ tsui nya ngɛ wa sane nɛ nyɛ maa suɔ ɔ he. 13 Enɛ ɔ he ɔ, nɔ́ nɛ i ngɛ dee ji kaa—i kɛ nyɛ ngɛ munyu tue kaa ye bimɛ—nyɛ hu nyɛ bli nyɛ tsui mi gbajaa.*

14 Nihi nɛ a he we yi ɔ kɛ nyɛ sɔɛ, nyɛɛ kɛ mɛ nɛ ko tloo kuɛpã tso.* Ejakaa mɛni huɛ bɔmi lɛ ngɛ dami kɛ mlaa nɔ tɔmi a kpɛti? Aloo mɛni ní dlami lɛ ngɛ la kɛ diblii a kpɛti? 15 Jehanɛ se hu ɔ, mɛni kake peemi lɛ ngɛ Kristo kɛ Belia* a kpɛti? Aloo mɛni lɛ nɔ nɛ e he ye ɔ* kɛ nɔ nɛ e he we yi ɔ ngɛ peemi?* 16 Nɛ mɛni gbi kpami lɛ ngɛ Mawu sɔlemi we ɔ kɛ wɔhi a kpɛti? Ejakaa wa ji Mawu hɛ kalɔ ɔ sɔlemi we; kaa bɔ nɛ Mawu de ɔ: “Ma hi a kpɛti nɛ ma nyɛɛ ngɛ a kpɛti, nɛ ma pee a Mawu, nɛ a maa pee ye we bi.” 17 “Yehowa* ke, ‘Enɛ ɔ he ɔ, nyɛɛ je kpo kɛ je a kpɛti nɛ nyɛ tsɔ nyɛ he banee, nɛ nyɛ kpa nɔ́ nɛ he tsɔ we ɔ he tami’”; “‘nɛ ma he nyɛ atuu.’” 18 “Yehowa* Ope ɔ ke, ‘Nɛ ma ba pee nyɛ tsɛ, nɛ nyɛ ma ba pee ye binyumuhi kɛ ye biyihi.’”

7 Enɛ ɔ he ɔ, nihi nɛ i suɔ, akɛnɛ wa ná si womi nɛ ɔmɛ he je ɔ, nyɛ ha nɛ wa fɔ he lo mi kɛ mumi mi mu fɛɛ mu ngɛ wa he, nɛ wa ha nɛ wa klɔuklɔu peemi ɔ nɛ ye mluku ngɛ Mawu gbeye yemi mi.

2 Nyɛ ná blɔ kɛ ha wɔ ngɛ nyɛ tsui mi. Wa tɔ̃ we nɔ ko nɔ, wa puɛ we nɔ ko, nɛ wa sisi we nɔ ko. 3 I de we enɛ ɔ nɛ ma kɛ bu nyɛ fɔ. Ejakaa i de hyɛ kaa nyɛ ngɛ wa tsui mi konɛ nyɛɛ kɛ wɔ nɛ bla kɛ gbo nɛ nyɛɛ kɛ wɔ nɛ bla kɛ hi wami mi. 4 I nyɛɔ nɛ i tuɔ nyɛ he munyu faa nitsɛ. I fĩaa wawɛɛ ngɛ nyɛ he. Bua womi hyi mi tɔtɔɔtɔ; bua jɔmi hyi mi kɛ be nɔ ngɛ wa piimi ɔ tsuo mi.

5 Ngɛ anɔkuale mi ɔ, benɛ wa ba su Makedonia a, wa nɔmlɔ tso* ɔmɛ a he jɔɛ mɛ kulaa, mohu ɔ, a ya nɔ nɛ a pii wɔ ngɛ blɔ fɛɛ blɔ nɔ—ngɛ kpo nɔ blɔ ɔ, kunɔ nɔmihi, ngɛ mi mi blɔ ɔ, gbeye sɔuu. 6 Se Mawu, nɔ nɛ e woɔ nihi nɛ a kɔni mi jɔ̃ ɔmɛ a bua a wo wa bua benɛ Tito ba a; 7 nɛ pi bami nɛ e ba a pɛ kɛkɛ, se mohu ngɛ bua womi nɛ e ná ngɛ nyɛ he ɔ hu he je, benɛ e ba bɔ wɔ amaniɛ kaa nyɛ hɛ ngɛ jae ngɛ ye he, nɛ nyɛ ngɛ aywilɛho yee wawɛɛ, nɛ nyɛ ngɛ tsui yee* ngɛ ye he ɔ; enɛ ɔ he ɔ, i nya pe kekle ɔ po.

8 Ejakaa ke ye sɛ womi ɔ ha nɛ nyɛ ye aywilɛho po ɔ, lɔ ɔ si we mi kpu. Ke sisije ɔ i ye aywilɛho po ɔ (akɛnɛ i na kaa sɛ womi ɔ ha nɛ nyɛ ye aywilɛho be bɔɔ ko ɔ he je ɔ), 9 amlɔ nɛ ɔ lɛɛ i ngɛ nyae, pi ngɛ aywilɛho nɛ nyɛ ye ɔ kɛkɛ he je, mohu ɔ, akɛnɛ aywilɛho nɛ nyɛ ye ɔ ha nɛ nyɛ tsake nyɛ tsui ɔ he je. Ejakaa nyɛ ye aywilɛho ngɛ blɔ nɛ sa Mawu hɛ mi nɔ, konɛ nɔ́ ko nɛ ko ye nyɛ awi ngɛ wa he je. 10 Ejakaa aywilɛho nɛ a yeɔ ngɛ blɔ nɛ saa Mawu hɛ mi nɔ ɔ ngɔɔ tsui tsakemi kɛ baa, nɛ lɔ ɔ kɛ nɔ yaa yi wami hemi mi, he piami ko be mi; se aywilɛho nɛ a yeɔ nɛ saa je ɔ hɛ mi ɔ lɛɛ, e ngɔɔ gbenɔ kɛ baa. 11 Ejakaa nyɛɛ hyɛ nɔ́ nɛ nyɛ tsui mi tɔɔ nɛ nyɛ je kɛ ye aywilɛho ngɛ blɔ nɛ sa Mawu hɛ mi nɔ ɔ ha nɛ nyɛ ná, ee, e ha nɛ nyɛ dla nyɛ blɔ, ee, e ha nɛ nyɛ mi mi fu, ee, e ha nɛ nyɛ ye gbeye, ee, e ha nɛ nyɛ suɔ wawɛɛ, ee, e ha nɛ nyɛ hɛ dɔ, ee, e ha nɛ nyɛ dla tɔmi ɔ! Ngɛ blɔ fɛɛ blɔ nɔ ɔ, nyɛ tsɔɔ kaa nyɛ he tsɔ* ngɛ sane nɛ ɔ mi. 12 E ngɛ mi kaa i ngma nyɛ mohu lɛɛ, se i pee we jã ngɛ nɔ nɛ e tɔ̃ ɔ he, aloo nɔ nɛ a tɔ̃ e nɔ ɔ he, mohu ɔ, konɛ bumi nitsɛnitsɛ nɛ nyɛ ngɛ kɛ ha wɔ ɔ nɛ je kpo heii ngɛ nyɛ kpɛti, ngɛ Mawu hɛ mi. 13 Enɛ ɔ lɛ wo wa bua a nɛ.

Se ngɛ bua womi nɛ wa ná a se ɔ, wa nya wawɛɛ ngɛ bua jɔmi nɛ Tito ná a he je, ejakaa nyɛ tsuo nyɛ ha nɛ e mumi ɔ ná he jɔmi. 14 Ejakaa ke i fĩa ngɛ nyɛ he kɛ tsɔɔ lɛ ɔ, zo gbi mi; se kaa bɔ nɛ níhi tsuo nɛ wa de nyɛ ɔ ji anɔkuale ɔ, jã kɛ̃ nɛ fĩami nɛ wa fĩa kɛ tsɔɔ Tito ɔ hu ji anɔkuale. 15 Jehanɛ se hu ɔ, e suɔ nyɛ sane wawɛɛ nitsɛ, ejakaa e kaiɔ tue nɛ nyɛ tsuo nyɛ buɔ ɔ, kɛ bɔ nɛ nyɛɛ kɛ gbeye yemi kɛ he domi blibliibli he lɛ atuu ha a. 16 I nyaa kaa ngɛ blɔ fɛɛ blɔ nɔ ɔ, ma nyɛ ma ngɔ ye hɛ kɛ fɔ nyɛ nɔ.*

8 Jehanɛ ɔ, nyɛmimɛ, wa suɔ nɛ nyɛɛ le Mawu dloomi ɔ nɛ a kɛ ha Makedonia asafo ɔmɛ ɔ he nɔ́ ko. 2 Benɛ a kɛ ka ngua ko ngɛ kpee ngɛ piimi mi ɔ, bua jɔmi babauu nɛ a ná kɛ ohia nɛ mi kuɔ nɛ ye mɛ ɔ ha nɛ a nɔ nɔ́ hami faa a hiɛ babauu kɛ be nɔ.* 3 Ejakaa a ha ngɛ nɔ́ nɛ a ngɛ ɔ nya, ee, i ngɛ odase yee, a ha pe bɔ nɛ a ngɛ ɔ po, 4 be mi nɛ ngɛ mɛ nitsɛmɛ a suɔmi nya a, a ya nɔ nɛ a ngɛ wɔ pɛɛ kpae wawɛɛ kaa wa ha mɛ he blɔ nɛ a je mi mi jɔmi mi kɛ ha nɔ́ ko, konɛ a ná ni klɔuklɔu ɔmɛ a nɔ pɛnemi sɔmɔmi ɔ mi blɔ fa mi nɔ́ ɔ. 5 Nɛ pi bɔ nɛ wa hyɛ blɔ ɔ kɛkɛ, se kekleekle ɔ, a ngɔ a he kɛ ha Nyɔmtsɛ ɔ kɛ wɔ hulɔ ngɛ Mawu suɔmi nya. 6 Enɛ ɔ he ɔ, wa wo Tito he wami kaa kaa bɔ nɛ e je ní tsumi nɛ ɔ sisi ngɛ nyɛ kpɛti ɔ, e sa nɛ e gbe mi mi jɔmi mi nɔ́ hami nɛ ɔ nɔuu hu nya ngɛ nyɛ blɔ fa mi. 7 Se kɛ̃ ɔ, kaa bɔ nɛ nyɛ ngɛ nɔ́ fɛɛ nɔ́ kɛ be nɔ, nɛ ji hemi kɛ yemi kɛ munyu tumi kɛ nile kɛ gɛjɛmi tsuo kɛ suɔmi nɛ wa ngɛ ha nyɛ ɔ, nyɛ ná mi mi jɔmi mi nɔ́ hami nɛ ɔ hu kɛ be nɔ.

8 I ngɛ enɛ ɔ dee, pi kita nɛ i ngɛ nyɛ woe, mohu ɔ, konɛ ma kɛ ha nɛ nyɛɛ le mɔde nɛ ni kpahi ngɛ bɔe, nɛ́ ma kɛ ka nyɛ suɔmi ɔ nɛ ma hyɛ kaa e ji nitsɛnitsɛ lo. 9 Ejakaa nyɛ le wa Nyɔmtsɛ Yesu Kristo dloomi ɔ, kaa e ngɛ mi kaa niatsɛ ji lɛ mohu lɛɛ, se e ba plɛ ohiatsɛ ngɛ nyɛ he je, konɛ nyɛ ba pee niatsɛmɛ kɛ gu e we ohia a nɔ.

10 Nɛ ngɛ enɛ ɔ mi ɔ, i ngɛ ye juɛmi tsɔɔe: Enɛ ɔ he ngɛ se nami kɛ ha nyɛ, akɛnɛ jeha nɛ be ɔ, pi kaa nyɛ je e peemi sisi kɛkɛ, se mohu nyɛ tsɔɔ hu kaa nyɛ suɔ kaa nyɛ maa pee ɔ he je. 11 Enɛ ɔ he ɔ, amlɔ nɛ ɔ, nyɛɛ gbe nɔ́ nɛ nyɛ je sisi ɔ hu nya konɛ nyɛɛ je níhi nɛ nyɛ ngɛ ɔ mi kɛ gbe nɔ́ nɛ nyɛ suɔ wawɛɛ kaa nyɛ maa pee ɔ nya. 12 Ejakaa kekleekle ɔ, ke nɔ ko suɔ wawɛɛ nɛ e je nɔ́ nɛ e ngɛ ɔ mi kɛ ha se pi nɔ́ nɛ e be ɔ mi ɔ, lɔ ɔ lɛ saa nɔ hɛ mi saminya. 13 Ejakaa i sume nɛ ma ha nɛ e pee gbɔjɔɔ kɛ ha ni kpahi nɛ nyɛɛ lɛɛ níhi a mi nɛ wa kɛ ha nyɛ; 14 mohu ɔ, bɔ nɛ pee nɛ a sɔ fiee ɔ, nyɛ nɔ́ nɛ e be nɔ amlɔ nɛ ɔ nɛ e tsu a hiami ɔ he ní, konɛ mɛ hu a nɔ́ nɛ e be nɔ ɔ nɛ e tsu nɔ́ nɛ nyɛ be ɔ he ní, bɔ nɛ pee nɛ a sɔ fiee. 15 Kaa bɔ nɛ a ngma a: “Nɔ nɛ e ngɛ babauu ɔ, e ná we babauu tsɔ, nɛ nɔ nɛ e ngɛ bɔɔ ɔ, pi kaa e nɔ́ ɔ pi kulaa.”

16 Amlɔ nɛ ɔ, sina ha Mawu kaa e ngɔ nyɛ he susumi nɛ mi wa nɛ ɔ nɔuu kɛ wo Tito tsui mi, 17 ejakaa ngɛ anɔkuale mi ɔ, e pee he wami womi ɔ he nɔ́ ko, se akɛnɛ e suɔ wawɛɛ he je ɔ, e ma nyɛ ngɔ ngɛ lɛ nitsɛ e suɔmi nya. 18 Se wa ngɛ nyɛminyumu ko tsɔe kɛ piɛɛ e he, nyɛminyumu nɛ ɔ yi jemi ngɛ sane kpakpa a he ɔ gbɛ fĩa asafo ɔmɛ tsuo a mi. 19 Pi lɔ ɔ pɛ kɛkɛ, se mohu asafo ɔmɛ hla lɛ hu kaa e piɛɛ wa he ngɛ wa blɔ hiami ɔ mi be mi nɛ wa ngɔ mi mi jɔmi nike ní nɛ ɔ kɛ ngɛ hae konɛ wa kɛ wo Nyɔmtsɛ ɔ hɛ mi nyami, nɛ́ wa kɛ ma nɔ mi kaa wa suɔ wawɛɛ kaa wa maa ye bua a. 20 Wa pee jã konɛ adesa ko nɛ e ko na tɔmi ko ngɛ wa he ngɛ nɔ́ nɛ nihi je a tsui mi nɛ a kɛ ha faa nɛ wa ngɛ gbae nɛ ɔ he. 21 Ejakaa wa ‘tsuɔ nɔ́ fɛɛ nɔ́ he ní ngɛ anɔkuale yemi mi, pi ngɛ Yehowa* hɛ mi pɛ kɛkɛ, se mohu, ngɛ adesahi hu a hɛ mi.’

22 Jehanɛ se hu ɔ, wa ngɛ wa nyɛminyumu nɛ wa ka lɛ si abɔ nɛ wa na kaa e bɔɔ mɔde ngɛ sanehi fuu a mi ɔ tsɔe kɛ ngɛ a he piɛɛe, se amlɔ nɛ ɔ, e bɔɔ mɔde wawɛɛ pe kekle ɔ ngɛ e hɛ nɛ e kɛ fɔ nyɛ nɔ wawɛɛ ɔ he je. 23 Se ke nyɛ ngɛ sane bimi ko ngɛ Tito he ɔ, e ji ye he piɛɛlɔ* kɛ nyɛmi nɛ i kɛ lɛ tsuɔ ní konɛ e hi ha nyɛ; aloo ke nyɛ ngɛ sane bimihi ngɛ wa nyɛminyumu ɔmɛ a he ɔ, a ji asafohi a bɔfohi kɛ Kristo hɛ mi nyami. 24 Enɛ ɔ he ɔ, nyɛ ha nɛ a na níhi nɛ tsɔɔ kaa nyɛ suɔ mɛ ɔ, nɛ nyɛɛ tsɔɔ asafo ɔmɛ nɔ́ he je nɛ wa fĩa ngɛ nyɛ he ɔ.

9 Jehanɛ ɔ, ngɛ ni klɔuklɔu ɔmɛ a sɔmɔmi ɔ he ɔ, e he hia we kulaa kaa ma ngma nyɛ, 2 ejakaa i le kaa nyɛ suɔ wawɛɛ, nɛ i ngɛ fĩae ngɛ lɔ ɔ he kɛ ngɛ Makedonia bi ɔmɛ tsɔɔe kaa jeha ji nɛ ɔ nɛ Akaya pee klaalo, nɛ kã nɛ nyɛ ngɛ ɔ wo a kpɛti nihi hiɛhiɛɛ he wami. 3 Se i ngɛ nyɛminyumu ɔmɛ tsɔe, konɛ fĩami nɛ wa ngɛ fĩae ngɛ nyɛ he ɔ nɛ ko pee yaka ngɛ enɛ ɔ blɔ fa mi, nɛ kaa nyɛ maa pee klaalo nitsɛnitsɛ hulɔ kaa bɔ nɛ i de ke nyɛ maa pee ɔ. 4 Ke pi jã a, lɛɛ ke e ba mi kaa Makedonia bi ɔmɛ piɛɛ ye he kɛ ba nɛ a ba na kaa nyɛ pee we klaalo ɔ, zo maa gbe wɔ—pe i be dee ke nyɛ hu zo maa gbe nyɛ—ngɛ wa hɛ nɛ wa ngɔ kɛ fɔ nyɛ nɔ ɔ he je. 5 Enɛ ɔ he ɔ, i susu kaa e he hia nɛ ma wo nyɛminyumu ɔmɛ he wami nɛ a ba nyɛ ngɔ mla, konɛ a dla nyɛ nike ní babauu ɔ nɛ nyɛ wo he si ɔ ngɔ to bɔ nɛ pee nɛ enɛ ɔ nɛ pee klaalo kaa nike ní nɛ a ha faa, nɛ e ko pee kaa nɔ́ ko nɛ a gu ojo fiami nɔ kɛ ná.

6 Se ngɛ enɛ ɔ blɔ fa mi ɔ, nɔ fɛɛ nɔ nɛ e kplɛɔ* nɔ́ he kɛ duɔ ɔ, e ma kpa ngɛ he kplɛmi* mi, nɛ nɔ fɛɛ nɔ nɛ e duɔ babauu ɔ ma kpa babauu. 7 Nyɛ ha nɛ nɔ fɛɛ nɔ nɛ e pee kaa bɔ nɛ e ma nya si ngɛ e tsui mi ɔ, pi ngɛ mi gbigblimi mi aloo nɔ nyɛmi nya, ejakaa Mawu suɔ nɔ nɛ e haa nɔ́ kɛ bua jɔmi.

8 Jehanɛ se hu ɔ, Mawu ma nyɛ ma ha nɛ e dloomi ɔ tsuo nɛ hiɛ kɛ be nɔ kɛ ha nyɛ konɛ be fɛɛ be ɔ, ngɛ nɔ́ fɛɛ nɔ́ mi ɔ, nyɛɛ hi nɔ́ fɛɛ nɔ́ bɔ nɛ e maa su nyɛ, nɛ nyɛ ná babauu kɛ ha ní tsumi kpakpa fɛɛ ní tsumi kpakpa hulɔ. 9 (Kaa bɔ nɛ a ngma a: “E gba kɛ ha nihi fuu;* e ha ohiatsɛmɛ ní. E dami ɔ ngɛ kɛ yaa neneene.” 10 Jehanɛ ɔ, Nɔ nɛ e haa ní dulɔ wu babauu kɛ abolo nɛ a yeɔ ɔ, e ma ha nyɛ wu nɛ e maa bɔ he kɛ ha nyɛ konɛ nyɛ du, nɛ e ma ha nɛ nyɛ dami ní kpami ɔ maa hiɛ.) 11 Ngɛ nɔ́ fɛɛ nɔ́ mi ɔ, a ngɛ nyɛ ní woe konɛ nyɛ ha nɔ nɔ́ faa ngɛ blɔ slɔɔtohi a nɔ, nɛ lɔ ɔ haa nɛ a guɔ wa nɔ kɛ naa Mawu si; 12 ejakaa sɔmɔmi nɛ wa sɔmɔɔ nɛ nihi náa he se nɛ ɔ, pi kɛ ha ni klɔuklɔu ɔmɛ a hiami níhi a he ní tsumi pɛ he je, se mohu konɛ e yi hu nɛ bli ngɛ sina babauu nɛ a kɛ ma ha Mawu ɔ mi. 13 Kɛ gu nɔ mi mami nɛ nɔ pɛnemi ní tsumi nɛ ɔ kɛ haa a nɔ ɔ, a woɔ Mawu hɛ mi nyami, ejakaa nyɛ baa nyɛ he si kɛ haa sane kpakpa a nɛ kɔɔ Kristo he ɔ, kaa bɔ nɛ nyɛ jaje ngɛ ma hɛ mi ɔ, nɛ jehanɛ se hu akɛnɛ nyɛ je nyɛ tsui mi faa nɛ nyɛ ha waa kɛ mɛ tsuo ní ɔ he je. 14 Nɛ a kpaa pɛɛ wawɛɛ kɛ haa nyɛ kɛ tsɔɔ kaa a suɔ nyɛ sane ngɛ Mawu dloomi ɔ nɛ e nɔ be, nɛ e ngɛ nyɛ nɔ ɔ he je.

15 Sina ha Mawu ngɛ e nike ní nɛ e kɛ haa faa nɛ e hí kalemi ɔ he.

10 Amlɔ nɛ ɔ, imi Paulo nitsɛ, i kɛ Kristo he jɔmi ɔ kɛ e mi mi himi ɔ ngɛ nyɛ pɛɛ kpae, e ngɛ mi kaa ke i ngɛ nyɛ kpɛti hɛ mi kɛ hɛ mi ɔ, i ba si mohu lɛɛ, se ke i be nyɛ kpɛti ɔ, i hiaa kã kɛ woɔ nyɛ. 2 I ngɛ pɛɛ kpae kaa ke i ba a, e ko ba mi kaa ma ba pee kã kaa bɔ nɛ i ngɛ blɔ hyɛe ɔ, nɛ́ i kɛ ni komɛ nɛ a buɔ wɔ kaa wa nyɛɛɔ ngɛ he lo nya a nɛ ba to ní. 3 Ejakaa e ngɛ mi kaa wa nyɛɛɔ ngɛ he lo mi mohu lɛɛ, se wa hwui ta kaa bɔ nɛ wa ngɛ ha ngɛ he lo mi ɔ. 4 Ejakaa wa ta hwumi ní ɔmɛ ɔ, pi he lo nya níhi, mohu ɔ, Mawu ha nɛ a ngɛ he wami konɛ wa kɛ plɛ níhi nɛ a du si wawɛɛ ɔmɛ a hɛ mi kɛ bu si. 5 Ejakaa wa ngɛ susumihi kɛ nɔ́ fɛɛ nɔ́ nɛ ngɛ gojoo nɛ a wo nɔ kɛ si Mawu nile ɔ hɛ mi plɛe kɛ ngɛ si bue, nɛ wa ngɛ susumi fɛɛ susumi hu nyɔguɛ ngɔe konɛ wa ha nɛ e bu Kristo ɔ tue; 6 nɛ wa dlaa wa he kaa ke nyɛ nitsɛmɛ nyɛ tue bumi ɔ ná nɛ e pi si pɛ ɔ, wa maa gbla tue gbomi fɛɛ tue gbomi tue.

7 Nyɛ hyɛɔ níhi bɔ nɛ a ngɛ ha ngɛ kpo nɔ blɔ. Ke nɔ ko ngɛ nɔ mi mami ngɛ lɛ nitsɛ e mi kaa Kristo nɔ́ ji lɛ ɔ, nyɛ ha nɛ e susu anɔkuale munyu nɛ ɔ he ekohu: Kaa bɔ nɛ Kristo nɔ́ ji lɛ ɔ, jã kɛ̃ nɛ e ji ngɛ wɔ hu wa blɔ fa mi. 8 Ejakaa ke e sa kaa ma fĩa kɛ be nɔ bɔɔ ngɛ he blɔ nɛ Nyɔmtsɛ ɔ ha wɔ kaa waa fia nyɛ kɛ ma si nɛ wa ko ku nyɛ kɛ pue si ɔ he po ɔ, zo be mi gbee. 9 Ejakaa i sume nɛ e pee kaa nɔ́ nɛ i ngɛ mɔde bɔe kaa ma ngɔ ye sɛ womi ɔmɛ kɛ wo nyɛ he gbeye. 10 Ejakaa a deɔ ke: “E sɛ womi ɔmɛ a mi jiɔ, nɛ he wami ngɛ mi, se ke lɛ nɔmlɔ ɔ nitsɛ e ngɛ hiɛ ɔ, e he jɔ, nɛ e munyu ɔmɛ hu a be hanɔ.” 11 Nyɛ ha nɛ jamɛ a nɔmlɔ ɔ nɛ e le kaa níhi nɛ wa deɔ* kɛ guɔ sɛ womihi a nɔ ke wa be ɔ, jamɛ a ní ɔmɛ nɔuu nɛ ke wa ba a wa maa pee.* 12 Ejakaa wa bɔɛ mɔde kaa wa maa piɛɛ ni komɛ nɛ a jeɔ mɛ nitsɛmɛ a yi ɔ he aloo waa kɛ wa he maa to a he. Se ke a ngɔ mɛ nitsɛmɛ a he kɛ susu mɛ nitsɛmɛ a he nɛ a ngɔ mɛ nitsɛmɛ a he kɛ to mɛ nitsɛmɛ a he ɔ, lɛɛ a be nɔ́ sisi numi.

13 Se wa be fĩae ngɛ huzuhi nɛ a po kɛ ha wɔ ɔ se, mohu ɔ, ngɛ zugba kpɔ ɔ nɛ Mawu susu kɛ ha wɔ* ɔ mi, nɛ e bli mi kɛ ba su nyɛ ngɔ tɔɔ po. 14 Ngɛ anɔkuale mi ɔ, wa kpã we wa mi tsɔ kaa nɔ́ nɛ wa sui nyɛ he, ejakaa wɔ ji kekleekle nihi nɛ wa ngɔ sane kpakpa a nɛ kɔɔ Kristo he ɔ kɛ ba su nyɛ ngɔ tɔɔ. 15 Ohoo, wa fĩɛ ngɛ nɔ kpa ko ní tsumihi a he ngɛ huzuhi nɛ a po ha wɔ ɔ se, mohu ɔ, wa ngɛ hɛ kɛ nɔ fɔmi kaa be mi nɛ nyɛ hemi kɛ yemi ɔ ya nɔ nɛ e mi ngɛ wae ɔ, a ma ha nɛ nɔ́ nɛ wa tsu ɔ maa hiɛ ngɛ wa zugba kpɔ ɔ mi. Kɛkɛ ɔ, wa maa be nɔ babauu pe kekle ɔ, 16 bɔ nɛ pee nɛ waa jaje sane kpakpa a kɛ ha mahi nɛ a ngɛ nyɛ se ɔ, konɛ wa ko fĩa ngɛ nɔ́ nɛ a tsu momo ngɛ nɔ kpa ko zugba kpɔ mi ɔ he. 17 “Se nɔ nɛ e fĩaa a, ha nɛ e fĩa ngɛ Yehowa* mi.” 18 Ejakaa pi nɔ nɛ e jeɔ lɛ nitsɛ e yi ɔ nɛ a bua jɔɔ e he, se mohu nɔ nɛ Yehowa* jeɔ e yi ɔ.

11 I ná nɛ nyɛ ná ye he tsui ngɛ níhi a he nɛ i susuu we kpakpa ko ɔ he. Se ngɛ anɔkuale mi ɔ, nyɛ ngɛ ye he tsui náe! 2 Ejakaa i kɛ Mawu hunga jemi* lɛ ngɛ nyɛ he hunga jee, ejakaa imi nitsɛ i bi nyɛ si kɛ ha huno kake konɛ ma ngɔ nyɛ kɛ ha Kristo ɔ kaa yo nɛ e li nyumu nɛ e he tsɔ. 3 Se i ngɛ gbeye yee kaa ngɛ blɔ ko nɔ ɔ, kaa bɔ nɛ sinɔ ɔ gu ga blɔ nɔ kɛ sisi Hawa a, a ma puɛ nyɛ hu nyɛ juɛmi ngɛ tsui nɛ mi tsɔ kɛ he tsɔmi nɛ sa Kristo ɔ he. 4 Ejakaa kaa bɔ nɛ e ji ɔ, ke nɔ ko ba nyɛ ngɔ nɛ e ba fiɛɛ Yesu kpa ko ngɛ nɔ nɛ wa fiɛɛ e he sane ɔ se, aloo nyɛ nine su mumi kpa ko nɔ ngɛ nɔ́ nɛ nyɛ nine su nɔ momo ɔ se, aloo nyɛ nine su sane kpakpa kpa ko nɔ ngɛ nɔ́ nɛ nyɛ pɛtɛ he ɔ se ɔ, nyɛ náa e he tsui oya nɔuu. 5 Ejakaa i susu kaa i bɛ si pi nyɛ bɔfo ɔmɛ nɛ a hi pe kulaa a ngɛ nɔ́ kake ngmelu po mi. 6 Se ke i li munyu tumi po ɔ, ngɛ anɔkuale mi ɔ, pi ngɛ ní lemi mi; niinɛ wa ha nɛ lɔ ɔ pee heii kɛ ha nyɛ ngɛ blɔ fɛɛ blɔ nɔ ngɛ nɔ́ fɛɛ nɔ́ mi hulɔ.

7 Aloo i pee yayami kaa i ba ye he si konɛ a wo nyɛ nɔ, akɛnɛ i kɛ bua jɔmi jaje Mawu he sane kpakpa a kɛ ha nyɛ nɛ i he we nyɛ nɔ́ ko ɔ he je lo? 8 I ha nɛ níhi bɔ* asafo kpahi kɛ gu a níhi* nɛ i ngɔ konɛ ma kɛ sɔmɔ nyɛ ɔ nɔ. 9 Se kɛ̃ ɔ, benɛ i ngɛ nyɛ ngɔ nɛ e fĩ mi ɔ, i pee we tlomi ngɛ nɔ ko nɔ, ejakaa nyɛmimɛ ɔmɛ nɛ a je Makedonia kɛ ba a ba ha mi ye hiami níhi babauu. Ee, ngɛ blɔ fɛɛ blɔ nɔ ɔ, i ha we nɛ ma ba pee tlomi kɛ ha nyɛ, nɛ ma ya nɔ nɛ ma pee jã. 10 Be abɔ nɛ Kristo he anɔkuale ɔ ngɛ ye mi nɛ ɔ, i be kpae fĩami ngɛ Akaya kpokpa amɛ a mi. 11 Ngɛ mɛni yi mi tomi he je? Anɛ akɛnɛ i sume nyɛ he je lo? Mawu le kaa i suɔ nyɛ.

12 Se nɔ́ nɛ i ngɛ pee ɔ, ma ya nɔ nɛ ma pee, konɛ ma kɛ fia nya jemi nɛ nihi nɛ a ngɛ nɔ́* ko hlae nɛ a da nɔ kɛ tsɔɔ kaa a kɛ wɔ sɔ ngɛ níhi* nɛ a fĩaa ngɛ he ɔ kɛ haa a ngɔ fɔ he. 13 Ejakaa jamɛ a nyumu ɔmɛ ji lakpa bɔfohi, ní tsuli nɛ a sisiɔ nɔ, nɛ a tsakeɔ a he kɛ peeɔ kaa Kristo bɔfohi. 14 Nɛ enɛ ɔ be nyakpɛ, ejakaa Satan nitsɛ yaa nɔ nɛ e tsakeɔ e he kɛ peeɔ kaa la bɔfo. 15 Enɛ ɔ he ɔ, ke e sɔmɔli ɔmɛ hu yaa nɔ nɛ a tsakeɔ mɛ nitsɛmɛ a he kɛ peeɔ kaa a ji dami he sɔmɔli ɔ, pi nɔ́ ko nɛ ngɛ nyakpɛ. Se a nyagbe ɔ maa pee kaa bɔ nɛ a ní tsumi ɔmɛ ngɛ ɔ.

16 I ngɛ dee ekohu ke: Nɔ ko nɛ e ko de ke i susuu we níhi a he. Se ke jã a po ɔ, nyɛɛ bu mi kaa i ji nɔ nɛ e susuu we níhi a he, konɛ imi hu ma fĩa bɔɔ. 17 Nɔ́ nɛ i ngɛ dee amlɔ nɛ ɔ, i ngɛ dee kaa nɔ nɛ e he e he ye nɛ e ngɛ fĩae, se pi Nyɔmtsɛ ɔ nɔ hyɛmi nɔ́ ɔ se nɛ i ngɛ nyɛɛe, mohu ɔ, kaa nɔ nɛ e susuu we níhi a he. 18 Akɛnɛ nihi fuu ngɛ fĩae ngɛ he lo nya* he je ɔ, imi hu ma fĩa. 19 Akɛnɛ nyɛ “susuɔ níhi a he” wawɛɛ he je ɔ, nyɛɛ kɛ bua jɔmi náa nihi nɛ a susuu we níhi a he ɔmɛ a he tsui. 20 Ngɛ anɔkuale mi ɔ, nyɛ náa nɔ fɛɛ nɔ nɛ e ngɔɔ nyɛ nyɔguɛ, nɔ fɛɛ nɔ nɛ e miɔ nyɛ weto níhi, nɔ fɛɛ nɔ nɛ e kpɔ̃ɔ níhi nɛ nyɛ ngɛ ɔ ngɛ nyɛ dɛ, nɔ fɛɛ nɔ nɛ e woɔ e he nɔ ngɛ nyɛ nɔ, kɛ nɔ fɛɛ nɔ nɛ e gbaa nyɛ hɛ mi ma a he tsui.

21 I ngɛ enɛ ɔ dee kɛ pue wa hɛ mi si, akɛnɛ e maa pee kaa nɔ́ nɛ wa pee wa ní ngɛ gbɔjɔmi mi ɔ he je.

Se ke ni kpahi pee kã a—i ngɛ munyu tue kaa nɔ nɛ e susuu we níhi a he—imi hu i peeɔ kã. 22 Anɛ Hebri bi ji mɛ lo? Imi hu eko ji mi. Anɛ Israel bi ji mɛ lo? Imi hu eko ji mi. Anɛ Abraham nina* ji mɛ lo? Imi hu eko ji mi. 23 Anɛ Kristo sɔmɔli ji mɛ lo? I ngɛ heto hae kaa godotsɛ, imi hu i ji eko ngɛ blɔ nɛ pe kulaa nɔ: I tsu ní tsumihi fuu, a wo mi tsu kpitikpiti si abɔ, a kongo mi si abɔ nɛ́ i be nyɛe ma kane, nɛ i ya gbenɔ muɔ nya nɛ i ba si abɔ. 24 Yuda bi ɔmɛ fiaa mi kpa si enuɔ, nɛ ngɛ eko fɛɛ eko mi ɔ, e piɛ kake nɛ e maa pee 40, 25 a fiaa mi tso si etɛ, a fiaa mi tɛ si kake, i kɛ mele butu si etɛ, i ye nyɔ kɛ pia ngɛ wo mi; 26 ngɛ blɔ hiami kpitikpiti mi, ngɛ pahi a nɔ oslaahi a mi, ngɛ juli a dɛ mi oslaahi a mi, ngɛ imi nitsɛ ye we bi a dɛ mi oslaahi a mi, ngɛ je mahi a dɛ mi oslaahi a mi, ngɛ mahi a mi oslaahi a mi, ngɛ nga nɔ oslaahi a mi, ngɛ wo nɔ oslaahi a mi, ngɛ nyɛmimɛ lakpatsɛmɛ a kpɛti oslaahi a mi, 27 ngɛ dengme kɛ pɔtɔtɔɛ mi, ngɛ nyɔ fɔmi kpitikpiti mi, ngɛ hwɔ kɛ kuma mi, ngɛ hwɔ hami kpitikpiti mi, ngɛ fĩɛ kɛ he gu hɛɛmi mi.

28 Ngɛ kpo nɔ blɔ ní nɛ ɔmɛ tsuo a se ɔ, nɔ́ kpa ko hu ngɛ nɛ e tuaa mi daa ligbi:* yeyeeye nɛ i peeɔ ngɛ asafo ɔmɛ tsuo a he ɔ. 29 Mɛnɔ gbɔjɔ, nɛ imi lɛɛ i gbɔjɔɔ we, mɛnɔ lɛ e nane tɔ̃tɔ̃, nɛ imi lɛɛ ye mi mi fu we?

30 Ke e sa nɛ ma fĩa a, ma fĩa ngɛ níhi nɛ haa nɛ ye gbɔjɔmi ɔ jeɔ kpo ɔmɛ a he. 31 Mawu nɛ ji Nyɔmtsɛ Yesu Tsɛ ɔ, Nɔ nɛ e sa kaa a je e yi kɛ ya neneene ɔ le kaa pi lakpa nɛ i ngɛ yee. 32 Ngɛ Damasko ɔ, amlaalo ɔ nɛ e ngɛ Matsɛ Areta sisi ɔ ngɛ Damasko bi ɔmɛ a ma ngua a he bue konɛ e nu mi, 33 se a ngɔ mi kɛ wo kusii* mi nɛ a kɛ mi kple si kɛ gu gbogbo nɛ bɔle ma a he ɔ saflɛ ɔ mi, nɛ i tu fo kɛ je e dɛ.

12 E sa nɛ ma fĩa. Se nami be he, mohu ɔ, ma ya Nyɔmtsɛ ɔ he nyakpɛ nina amɛ kɛ kpo jemi ɔmɛ a nɔ. 2 I le nyumu ko nɛ e kɛ Kristo pee kake, nɔ nɛ jeha 14 nɛ be ɔ—e ngɛ nɔmlɔ tso ɔ mi jio, e je nɔmlɔ tso ɔ mi jio, imi lɛɛ i li; Mawu lɛ e le—a sa lɛ kɛ ho hiɔwe etɛne ɔ ya. 3 Ee, i le jamɛ a nyumu ɔ—e ngɛ nɔmlɔ tso ɔ mi jio, e je nɔmlɔ tso ɔ mi jio, imi lɛɛ i li; Mawu lɛ e le— 4 nɔ nɛ a sa lɛ kɛ ho paradeiso mi ya nɛ e ya nu munyuhi nɛ be hie tumi nɛ mlaa ngmɛ́ blɔ kaa adesa ko deɔ ɔ. 5 Ma fĩa ngɛ jamɛ a nyumu ɔ he, se i be fĩae ngɛ imi nitsɛ ye he kaa ja ye gbɔjɔmi ɔmɛ a he pɛ. 6 Ejakaa ke i suɔ kaa ma fĩa po ɔ, lɔ ɔ tsɔɔ we kaa i susuu we níhi a he, ejakaa ma tu anɔkuale. Se i pee we jã, bɔ nɛ pee nɛ nɔ ko nɛ e ko je ye yi pe nɔ́ nɛ e na ngɛ ye mi, aloo nɔ́ nɛ e nu kɛ je ye nya, 7 akɛnɛ ye nine su jamɛ a nyakpɛ kpo jemi ɔmɛ a nɔ ɔ he je.

Bɔ nɛ pee nɛ ma ko ba wo ye he nɔ tsɔ he je ɔ, a ha mi mio ko ngɛ ye he lo ɔ mi, Satan bɔfo ko, konɛ e hi mi ma gbae* bɔ nɛ pee nɛ ma ko wo ye he nɔ tsɔ. 8 I kpa Nyɔmtsɛ ɔ pɛɛ ngɛ nɔ́ nɛ ɔ he si etɛ sɔuu kaa nɔ́ nɛ ɔ nɛ je ye nɔ kɛ ho. 9 Se e de mi ke: “Ye dloomi ɔ hiɛ bɔ nɛ sa ha mo, ejakaa a ha nɛ ye he wami ɔ ngɛ mluku yee ngɛ gbɔjɔmi mi.” Lɛɛ i kɛ bua jɔmi nɛ pe kulaa maa fĩa ngɛ ye gbɔjɔmi ɔmɛ a he, bɔ nɛ pee nɛ Kristo ɔ he wami ɔ nɛ ya nɔ nɛ e hi ye nɔ kaa bo tsu. 10 Enɛ ɔ he ɔ, ye bua jɔɔ ngɛ gbɔjɔmihi a mi, ngɛ jɛmihi a mi, ngɛ fimi behi a mi, ngɛ yi mi wamihi kɛ haomihi a mi kɛ ha Kristo. Ejakaa ke i gbɔjɔ ɔ, kɛkɛ i ná he wami.

11 I ba plɛ pee nɔ nɛ e susuu we níhi a he. Nyɛ lɛ nyɛ nyɛ ye nɔ nɛ i pee jã, ejakaa jinɛ e sa kaa nyɛ ko je ye yi. Ejakaa i bɛ si pi nyɛ bɔfo ɔmɛ nɛ a hi pe kulaa a ngɛ nɔ́ kake ngmelu po mi, ke pi nɔ ko ji mi po. 12 Ngɛ anɔkuale mi ɔ, bɔfo okadi ɔmɛ je kpo ngɛ nyɛ kpɛti kɛ gu si fimi wawɛɛ nɔ, nɛ kɛ gu okadihi kɛ nyakpɛ níhi* kɛ he wami ní tsumihi hu a nɔ. 13 Ejakaa mɛni tsɔɔ kaa nyɛ ná we he blɔ nɛ asafo kpa amɛ ná a, kaa ja tlomi nɛ imi nitsɛ i ba pee we kɛ ha we nyɛ ɔ pɛ? Nyɛɛ je mi mi jɔmi mi nɛ nyɛɛ ngɔ tɔmi nɛ ɔ kɛ pa mi.

14 Hyɛ! Enɛ ɔ ji si etɛne nɛ i pee klaalo kaa ma ba nyɛ ngɔ, nɛ i ba be tlomi pee. Ejakaa pi níhi nɛ nyɛ ngɛ ɔ nɛ i ngɛ hlae, se mohu nyɛ; ejakaa a hyɛ we blɔ kaa bimɛ nɛ a ngɔ níhi kɛ to si ngɛ a fɔli a he je, se mohu a hyɛɛ blɔ kaa fɔli nɛ a ngɔ níhi kɛ to si ngɛ a bimɛ a he je. 15 Ejakaa ngɛ ye blɔ fa mi ɔ, ye bua maa jɔ wawɛɛ kaa ma ngɔ níhi kɛ ha nɛ́ a ngɔ imi hu kɛ ha kulaa ngɛ nyɛ he.* Ke i suɔ nyɛ wawɛɛ kikɛ nɛ ɔ, anɛ e sa nɛ nyɛɛ suɔ mi bɔɔ pɛ lo? 16 Se kaa bɔ nɛ e ji ɔ, i ngɔɛ tlomi ko kɛ fɔ we nyɛ nɔ. Se kɛ̃ ɔ, nyɛ deɔ ke ye “hɛ mi tɛ̃,” nɛ i “gu ga blɔ nɔ” nɛ ye nine su nyɛ nɔ. 17 Tse i gui nihi nɛ i tsɔ mɛ nyɛ ngɔ ɔmɛ a ti nɔ ko nɔ kɛ ná we nyɛ he se, aloo? 18 I wo Tito he wami nɛ i tsɔ nyɛminyumu ɔ kɛ piɛɛ e he. Tse Tito ná we nyɛ he se ko kulaa, aloo? Anɛ pi jamɛ a mumi ɔ nɔuu mi nɛ wa nyɛɛ ngɛ lo? Anɛ pi jamɛ a nane mami he ɔmɛ nɔuu a se nɛ nyɛ nyɛɛ lo?

19 Jamɛ a be ɔ mi tsuo ɔ, anɛ nyɛ hii susue kaa wa nya kɛkɛ nɛ wa ngɛ jee lo? Waa kɛ Kristo pee kake kɛ ngɛ munyu tue ngɛ Mawu hɛ mi. Se nihi nɛ i suɔ, níhi tsuo nɛ wa peeɔ ɔ, wa peeɔ konɛ wa kɛ fia nyɛ kɛ ma si. 20 Ejakaa i ngɛ gbeye yee kaa ke i ba a, eko ɔ, i ba be nyɛ nae kaa bɔ nɛ i suɔ, nɛ imi hu eko ɔ, i be hie kaa bɔ nɛ nyɛ suɔ, se mohu pɛ, hunga jemi, mi mi fumi, mi gbami, nɔ he munyu yayami tumi, munyu kusikusi tumi,* he nɔ womi, kɛ basabasa peemi nɛ ma ba na. 21 Eko ɔ, ke i kpale kɛ ba a, ye Mawu ɔ ma pue ye hɛ mi si ngɛ nyɛ hɛ mi, nɛ ma ba ye aywilɛho ngɛ nihi fuu nɛ be ko nɛ be ɔ, a pee yayami, se a tsakee we a tsui ngɛ mu ní tsumi kɛ ajuama bɔmi* kɛ nɔ buimi ngmlikiti* nɛ a kɛ a he wo mi ɔ he.

13 Enɛ ɔ ji si etɛne nɛ i ma nyɛ ngɔ. “Ngɛ odase yeli enyɔ aloo etɛ a nya mi munyu nya a, e sa nɛ a ma sane tsuaa sane nya si.” 2 E ngɛ mi kaa amlɔ nɛ ɔ, i be nyɛ ngɔ mohu lɛɛ, se e ngɛ kaa nɔ́ nɛ i ngɛ nyɛ ngɔ si enyɔne, nɛ i ngɛ hlami sɛe kɛ ngɛ nihi nɛ a pee yayami be ko nɛ be ɔ kɛ ni kpahi tsuo kɔkɔ bɔe, kaa ke i ná nɛ i ba ekohu ɔ, i be mɛ mɔbɔ nae, 3 akɛnɛ nyɛ ngɛ odase nɛ tsɔɔ kaa Kristo, nɔ nɛ e gbɔjɔɔ we ngɛ nyɛ blɔ fa mi, se mohu e he wa ngɛ nyɛ kpɛti ɔ ngɛ munyu tue kɛ ngɛ ye nɔ gue niinɛ ɔ he je. 4 Ejakaa niinɛ, a gbe lɛ ngɛ tso nɔ ngɛ gbɔjɔmi he je, se e ngɛ wami mi ngɛ Mawu he wami ɔ he je. Ngɛ anɔkuale mi ɔ, wɔ hu waa kɛ lɛ gbɔjɔ, se waa kɛ lɛ ma bla kɛ hi wami mi ngɛ Mawu he wami nɛ ngɛ nyɛ nɔ ɔ he je.

5 Nyɛɛ ya nɔ nɛ nyɛɛ hi nyɛ he kae nɛ nyɛɛ hi hyɛe kaa nyɛ ngɛ hemi kɛ yemi ɔ mi lo; nyɛɛ ya nɔ nɛ nyɛɛ hi nyɛ mi kpae konɛ nyɛ kɛ tsɔɔ nimli nɛ nyɛ nitsɛmɛ nyɛ ji. Aloo anɛ nyɛ yɔse we kaa Yesu Kristo kɛ nyɛ pee kake lo? Lɛɛ ja nyɛ sɛ. 6 Ngɛ anɔkuale mi ɔ, i ngɛ hɛ kɛ nɔ fɔmi kaa nyɛ ma yɔse kaa pi nihi nɛ a sɛ ji wɔ.

7 Jehanɛ ɔ, wa sɔleɔ ha Mawu kaa nyɛ ko pee nɔ́ yayami ko, pi nɛ́ a na wɔ kaa nihi nɛ a sa, mohu ɔ, kaa nyɛ maa pee nɔ́ nɛ hi, ke a maa na wɔ kaa wa sɛ po. 8 Ejakaa wa be nyɛe maa pee nɔ́ ko nɔ́ ko kɛ si anɔkuale ɔ, mohu ɔ, kɛ ha anɔkuale ɔ pɛ. 9 Ngɛ anɔkuale mi ɔ, be fɛɛ be nɛ wa gbɔjɔ nɛ nyɛɛ lɛɛ nyɛ he wa a, wa nyaa. Dlami nɛ a ma dla nyɛ ɔ ji nɔ́ nɛ wa ngɛ sɔlee ngɛ he. 10 Lɔ ɔ he je nɛ i ngma ní nɛ ɔmɛ be nɛ i be nyɛ ngɔ ɔ nɛ, konɛ ke i ba a, i kɛ nyɛ nɛ ko ba ye wawɛɛ ngɛ he blɔ ɔ nɛ Nyɔmtsɛ ɔ ha mi kaa ma fia nyɛ kɛ ma si nɛ ma ko ku nyɛ kɛ pue si ɔ nya.

11 Nyagbe ɔ, nyɛmimɛ, nyɛɛ ya nɔ nɛ nyɛ nya, nyɛ ha nɛ a dla nyɛ, nyɛ ha nɛ a wo nyɛ bua, nyɛ juɛmi nɛ pee kake, nyɛɛ hi si ngɛ tue mi jɔmi mi; nɛ suɔmi kɛ tue mi jɔmi Mawu ɔ kɛ nyɛ maa hi si. 12 Nyɛ fɔ nyɛ sibi kɛ nya he fiɔmi nɛ ngɛ klɔuklɔu. 13 Ni klɔuklɔu ɔmɛ tsuo ke a biɔ nyɛ.

14 Nyɔmtsɛ Yesu Kristo dloomi ɔ kɛ Mawu suɔmi ɔ kɛ mumi klɔuklɔu ɔ mi ní dlami ɔ kɛ nyɛ tsuo nɛ hi si.