KƐ YA HA EFESO BI ƆMƐ

1 Paulo, Kristo Yesu bɔfo ngɛ Mawu suɔmi nya a, kɛ ya ha ni klɔuklɔu ɔmɛ nɛ a ngɛ Efeso nɛ a ji anɔkualetsɛmɛ nɛ a kɛ Kristo Yesu pee kake ɔ:

2 Nyɛ nine nɛ su dloomi kɛ tue mi jɔmi nɛ je Mawu nɛ ji wa Tsɛ ɔ, kɛ Nyɔmtsɛ Yesu Kristo ngɔ ɔ nɔ.

3 Á je Mawu nɛ ji wa Nyɔmtsɛ Yesu Kristo Tsɛ ɔ yi, ejakaa e jɔɔ wɔ kɛ mumi mi jɔɔmi fɛɛ mumi mi jɔɔmi nɛ ngɛ hiɔwe ní ɔmɛ a mi ɔ ngɛ Kristo mi. 4 E hla wɔ kaa waa kɛ lɛ* nɛ pee kake loko a to je ɔ sisi, kaa e sa nɛ waa pee wa he klɔuklɔu nɛ piami ko nɛ ko hi wa he ngɛ e hɛ mi ngɛ suɔmi mi. 5 Ejakaa e hla wɔ ngɔ to konɛ e ngɔ wɔ kɛ pee lɛ nitsɛ e binyumuhi kɛ gu Yesu Kristo nɔ, kaa bɔ nɛ e sa e hɛ mi ngɛ e suɔmi nya a, 6 bɔ nɛ pee nɛ a je e dloomi nɛ hɛ mi ngɛ nyami ɔ yi, nɔ́ nɛ e je mi mi jɔmi mi nɛ e kɛ dloo wɔ kɛ gu nɔ nɛ e suɔ lɛ ɔ nɔ ɔ. 7 Kɛ gu jamɛ a nɔ ɔ muɔ ɔ nɔ nɛ wa ná kpɔmi ɔ kɛ gu kpɔmi nɔ́ ɔ nɔ, ee, wa tɔmihi kɛ pami ngɛ e dloomi babauu ɔ he je.

8 E ha nɛ dloomi nɛ ɔ hiɛ kɛ be nɔ kɛ ha wɔ ngɛ juɛmi kɛ níhi a sisi numi tsuo mi 9 kɛ gu e suɔmi nya ní peemi he laami sane nɛ e ngɛ klɔuu ɔ nɛ e ha nɛ wa le ɔ nɔ. Enɛ ɔ sa e hɛ mi nɛ lɛ nitsɛ e to e yi mi 10 kɛ ha blɔ nya tomi ko ngɛ behi nɛ a to ɔ nyagbe, konɛ e kɛ bua níhi tsuo a nya kɛ pee kake ngɛ Kristo mi, níhi nɛ a ngɛ hiɔwe ɔ kɛ níhi nɛ a ngɛ zugba a nɔ ɔ. Ee, ngɛ e mi, 11 nɔ nɛ waa kɛ lɛ pee kake nɛ a hla waa kɛ lɛ kaa gbosi ní yeli ɔ. A hla wɔ ngɔ to ngɛ nɔ nɛ e tsuɔ níhi tsuo ɔ yi mi tomi ɔ nya kaa bɔ nɛ e mwɔɔ e yi mi kpɔ ngɛ e suɔmi nya a, 12 konɛ wɔ nihi nɛ wa ná hɛ kɛ nɔ fɔmi ngɛ Kristo mi kekle ɔ, wa sɔmɔ kɛ ha e hɛ mi nyami ɔ yi jemi. 13 Se benɛ nyɛ nu anɔkuale munyu ɔ, nɛ ji sane kpakpa a nɛ kɔɔ nyɛ yi wami hemi he ɔ se ɔ, nyɛ hu nyɛ ná hɛ kɛ nɔ fɔmi ngɛ e mi. Benɛ nyɛ he ye se ɔ, a gu e nɔ nɛ a ngɔ mumi klɔuklɔu nɛ a wo he si ɔ kɛ sɔu nyɛ nya, 14 enɛ ɔ ji wa gbosi ní yemi ɔ he okadi nɛ a sɛ hlami nɛ a kɛ ha,* kɛ yi mi tomi ɔ kaa a kɛ ma kpɔ̃ Mawu nitsɛ e níhi kɛ gu kpɔmi nɔ́ ko nɔ kɛ ha e hɛ mi nyami ɔ yi jemi ɔ nɛ.

15 Enɛ ɔ he je nɛ imi hu kɛ je be nɛ i nu hemi kɛ yemi nɛ nyɛ ngɛ ngɛ Nyɔmtsɛ Yesu mi, kɛ suɔmi nɛ nyɛ je kpo kɛ tsɔɔ ni klɔuklɔu ɔmɛ tsuo ɔ he ɔ, 16 i jɔɔ we si nami ha nyɛ ɔ nɛ. I yaa nɔ nɛ i woɔ nyɛ ta ngɛ ye sɔlemihi a mi 17 kaa wa Nyɔmtsɛ Yesu Kristo Mawu ɔ, Tsɛ ɔ nɛ e hɛ mi ngɛ nyami ɔ nɛ́ e ha nyɛ juɛmi kɛ kpo jemi mumi ngɛ e he nile nitsɛnitsɛ ɔ mi. 18 E ha nɛ nyɛ tsui hɛ ngmɛ ɔmɛ a nɔ tsɔ konɛ nyɛɛ le hɛ kɛ nɔ fɔmi he je nɛ e tsɛ nyɛ ngɛ ɔ, hɛ mi nyami babauu nɛ e ngɛ kɛ ha ni klɔuklɔu ɔmɛ kaa gbosi ní, 19 kɛ bɔ nɛ e he wami ɔ kle kɛ be nɔ ha kɛ ha wɔ nihi nɛ wa he ye ɔ. E he wami ngua a ní tsumi ɔ jeɔ kpo 20 ngɛ bɔ nɛ e kɛ tsu ní ngɛ Kristo blɔ fa mi, benɛ e tle lɛ si kɛ je gbeje nɛ e ngɔ lɛ kɛ hi si ngɛ e hiɔ nɔ ngɛ hiɔwe ní ɔmɛ a mi, 21 ngɛ he nɛ nɔ kuɔ kulaa pe nɔ yemi fɛɛ nɔ yemi kɛ he blɔ fɛɛ he blɔ kɛ he wami fɛɛ he wami kɛ nyɔmtsɛ yemi fɛɛ nyɔmtsɛ yemi kɛ biɛ fɛɛ biɛ nɛ a wo, pi ngɛ níhi a blɔ nya tomi* nɛ ɔ mi kɛkɛ, se mohu ngɛ nɔ́ nɛ maa ba a hu mi. 22 Jehanɛ se hu ɔ, e ngɔ níhi tsuo kɛ wo e nane si nɛ e pee lɛ níhi tsuo yi kɛ ha asafo ɔ, 23 nɛ ji e nɔmlɔ tso ɔ, nɔ nɛ e hyimi ɔ woɔ níhi tɔtɔɔtɔ ngɛ níhi tsuo a mi ɔ.

2 Jehanɛ se hu ɔ, e ngɛ mi kaa nyɛ gbo ngɛ nyɛ tɔmi ɔmɛ kɛ nyɛ he yayami ɔmɛ a mi mohu lɛɛ, se Mawu ha nɛ nyɛ ba wami mi. 2 Nyɛ tɔmi ɔmɛ kɛ nyɛ he yayami ɔmɛ a mi nɛ be ko nɛ e be ɔ, nyɛ nyɛɛɔ ngɛ ngɛ je nɛ ɔ níhi a blɔ nya tomi ɔ nya,* ngɛ kɔɔhiɔ ɔ he wami ɔ nɔ yelɔ ɔ suɔmi nya, mumi ɔ nɛ amlɔ nɛ ɔ, e ngɛ ní tsue ngɛ tue gbomi bimɛ ɔmɛ a mi ɔ. 3 Ee, be ko nɛ e be ɔ, wɔ tsuo wa ba wa je mi ngɛ wa he lo ɔ we akɔnɔ ɔmɛ a nya ngɛ a kpɛti, wa peeɔ níhi nɛ he lo ɔ kɛ wa susumihi suɔ, nɛ wa ji mi mi fumi bimɛ kɛ je fɔmi mi kaa ni kpa amɛ nɔuu. 4 Se akɛnɛ Mawu mɔbɔ nami ɔ hiɛ babauu ngɛ e suɔmi agbo nɛ e kɛ suɔ wɔ ɔ he je ɔ, 5 be mi nɛ wa gbo ngɛ tɔmihi a mi po ɔ, e ha nɛ wa ba wami mi kɛ piɛɛ Kristo ɔ he—kɛ gu dloomi nɔ ɔ, a he nyɛ yi wami. 6 Jehanɛ se hu ɔ, e tle wɔ si kɛ bla nɛ e ngɔ wɔ kɛ hi si kɛ bla ngɛ hiɔwe ní ɔmɛ a mi ngɛ Kristo Yesu mi, 7 konɛ ngɛ níhi a blɔ nya tomi* ɔmɛ nɛ ma a mi ɔ, ngɛ e mi mi himi* ɔ nya a, e je e dloomi nɛ hiɛ babauu kɛ be nɔ ɔ kpo kɛ tsɔɔ wɔ ngɛ Kristo Yesu mi.

8 Kɛ gu dloomi nɛ ɔ nɔ ɔ, a he nyɛ yi wami kɛ gu hemi kɛ yemi nɔ, nɛ enɛ ɔ, pi nyɛ nitsɛmɛ nɛ nyɛ pee; mohu ɔ, e ji Mawu nike ní. 9 Ohoo, pi ngɛ ní tsumihi a he je, konɛ nɔ ko nɛ e ko ná nɔ́ ko nɛ e da nɔ kɛ fĩa. 10 Wa ji Mawu nine nya ní tsumi* nɛ a bɔ ngɛ Kristo Yesu mi kɛ ha ní tsumi kpakpahi, níhi nɛ Mawu dla ngɔ to konɛ waa nyɛɛ ngɛ a mi ɔ.

11 Enɛ ɔ he ɔ, nyɛ kai kaa be ko nɛ e be ɔ, nyɛ nɛ nyɛ ji je ma amɛ a mi bimɛ ngɛ he lo nya a, nihi nɛ a tsɛɔ mɛ ke “nɔ pomi” nɛ́ adesahi a nine nɛ a kɛ pee ngɛ he lo mi ɔ tsɛɔ nyɛ ke “mɔmlɔtɔtsɛmɛ.” 12 Jamɛ a be ɔ mi ɔ, nyɛ be Kristo, nɛ nyɛ je nyɛ he kɛ je Israel ma a he, nɛ nyɛ ji si womi ɔ he somi ɔmɛ a he nibwɔhi; jinɛ nyɛ be hɛ kɛ nɔ fɔmi ko, nɛ nyɛ be Mawu ko ngɛ je ɔ mi. 13 Se amlɔ nɛ ɔ, akɛnɛ nyɛɛ kɛ Kristo Yesu pee kake he je ɔ, nyɛ nihi nɛ be ko nɛ e be ɔ, nyɛ ngɛ se lokoo ɔ, nyɛ ba hɛ mi kɛ gu Kristo muɔ ɔ nɔ. 14 Ejakaa lɛ ji wa tue mi jɔmi, nɔ nɛ e pee kuu enyɔ ɔmɛ tsuo kake, nɛ e ku gbogbo ɔ nɛ jinɛ e ngɛ a kpɛti nɛ e kɛ po a he piɛ ɔ kɛ pue si ɔ. 15 Kɛ gu e he lo ɔ nɔ ɔ, e je ninyɛ ɔ, nɛ ji Mlaa a kita amɛ nɛ famihi ngɛ a mi ɔ, konɛ e pee kuu enyɔ ɔmɛ nɛ a kɛ lɛ pee kake ɔ nɔmlɔ ehe kake nɛ e ha nɛ tue mi jɔmi nɛ ba, 16 konɛ e dla nihi enyɔ ɔmɛ a kpɛti kɛ pi si ngɛ nɔmlɔ tso kake mi kɛ ha Mawu kɛ gu sɛumi tso* ɔ nɔ, ejakaa e ngɔ lɛ nitsɛ e he kɛ gbe ninyɛ ɔ. 17 Nɛ e ba nɛ e ba jaje tue mi jɔmi he sane kpakpa a kɛ tsɔɔ nyɛ nihi nɛ nyɛ ngɛ se lokoo ɔ, kɛ tue mi jɔmi kɛ ha nihi nɛ a he kɛ we ɔ, 18 ejakaa kɛ gu e nɔ ɔ, wɔ ni enyɔ ɔmɛ tsuo wa nyɛɔ yaa Tsɛ ɔ ngɔ faa kɛ guɔ mumi kake nɔ.

19 Enɛ ɔ he ɔ, pi nibwɔhi kɛ ma se bi ji nyɛ hu, mohu ɔ, nyɛɛ kɛ ni klɔuklɔu ɔmɛ ba peeɔ ma mi bi kɛ Mawu we ɔ mi bimɛ, 20 nɛ a fia nyɛ ngɔ ma bɔfo ɔmɛ kɛ gbali ɔmɛ a sisi tomi ɔ nɔ, nɛ Kristo Yesu nitsɛ ji sisi tomi ɔ kɔ̃ nya tɛ ɔ nɛ. 21 Ngɛ e mi ɔ, a ngɛ tsu ɔ tsuo tsae pɛpɛɛpɛ kɛ pee kake, nɛ e ngɛ wae kɛ ngɛ Yehowa* sɔlemi we klɔuklɔu ko pee. 22 Ngɛ e mi ɔ, nyɛ hu a ngɛ nyɛ fiae kɛ ma si kɛ bla kɛ pee he ko nɛ Mawu maa gu e mumi ɔ nɔ kɛ hi.

3 Enɛ ɔ he ɔ, imi Paulo, nɔ nɛ a wo lɛ tsu ngɛ Kristo Yesu he ngɛ nyɛ nihi nɛ nyɛ je je ma amɛ a mi ɔ nyɛ he je ɔ— 2 ke niinɛ ɔ, nyɛ nu Mawu dloomi ɔ he nɔ hyɛmi ní tsumi ɔ nɛ a kɛ ha mi ngɛ nyɛ he je ɔ he, 3 kaa kpo jemi nɔ nɛ a gu kɛ ha nɛ i le laami sane nɛ e ngɛ klɔuu ɔ nɛ i ngma nyɛ bɔɔ ko be ko nɛ e be ɔ. 4 Enɛ ɔ he ɔ, ke nyɛ kane enɛ ɔ, nyɛ ma nyɛ maa na bɔ nɛ i nu Kristo he laami sane nɛ e ngɛ klɔuu ɔ sisi ha. 5 Ngɛ yi nɔ kpahi a mi ɔ, a ha we nɛ adesahi a bimɛ nɛ a le laami sane nɛ ɔ kaa bɔ nɛ a gu mumi ɔ nɔ kɛ je kpo amlɔ nɛ ɔ kɛ ha e bɔfo klɔuklɔu ɔmɛ kɛ gbali ɔmɛ ɔ, 6 lɔ ɔ ji kaa ngɛ Kristo Yesu mi ɔ, e sa nɛ nihi nɛ a je je ma amɛ a mi ɔ nɛ a gu sane kpakpa a nɔ nɛ a ba piɛɛ wa he kɛ ye gbosi ní, nɛ a kɛ wɔ nɛ pee nɔmlɔ tso ɔ he níhi, kɛ nihi nɛ a kɛ wɔ ma ná si womi ɔ mi blɔ fa mi nɔ́. 7 I ba plɛ enɛ ɔ he sɔmɔlɔ kɛ gu e he wami ɔ ní tsumi ɔ nɔ ngɛ Mawu dloomi nike ní nɛ e kɛ haa faa a nɛ a ngɔ kɛ ha mi ɔ nya.

8 Imi nɛ i ji nɔmlɔ nyafii pe kulaa ngɛ ni klɔuklɔu ɔmɛ a kpɛti ɔ, a ngɔ dloomi nɛ ɔ kɛ ha mi konɛ ma jaje Kristo ɔ ní nami nɛ mi kuɔ ɔ he sane kpakpa a kɛ tsɔɔ je ma amɛ, 9 nɛ́ ma ha nɛ nɔ fɛɛ nɔ nɛ e na laami sane nɛ e ngɛ klɔuu ɔ he blɔ nya tomi ɔ nɛ a ngɔ kɛ laa yi nɔhi nɛ be ɔ, ngɛ Mawu, nɔ nɛ e bɔ níhi tsuo ɔ mi ɔ. 10 Enɛ ɔ ba mi jã konɛ amlɔ nɛ ɔ, kɛ gu asafo ɔ nɔ ɔ, a ha nɛ nɔ yemihi kɛ blɔ nyahi nɛ a ngɛ hiɔwe ní ɔmɛ a mi ɔ nɛ a le Mawu juɛmi nɛ jeɔ kpo ngɛ blɔ slɔɔtoslɔɔtohi babauu a nɔ ɔ. 11 Enɛ ɔ kɛ neneene yi mi nɛ e to ngɛ Kristo ɔ, nɛ ji Yesu wa Nyɔmtsɛ ɔ he ɔ kɔ, 12 kɛ gu e nɔ ɔ, wa tuɔ munyu faa kikɛ nɛ ɔ nɛ waa kɛ kã yaa Mawu hɛ mi faa kɛ gu hemi kɛ yemi nɛ wa ngɛ ngɛ e mi ɔ nɔ. 13 Enɛ ɔ he ɔ, i ngɛ nyɛ pɛɛ kpae kaa nyɛ kɔni mi nɛ ko wo nyu ngɛ amanehluhi nɛ i kɛ ngɛ kpee ngɛ nyɛ he ɔmɛ a he je, ejakaa enɛ ɔmɛ ji hɛ mi nyami kɛ ha nyɛ.

14 Yi mi tomi nɛ ɔ he ɔ, i kplaa si kɛ haa Tsɛ ɔ, 15 nɔ nɛ e ngɔ lɛ weku fɛɛ weku nɛ e ngɛ hiɔwe kɛ zugba a nɔ ɔ náa e biɛ kɛ jeɔ ɔ. 16 I sɔleɔ kaa kɛ gu e hɛ mi nyami nɛ hiɛ babauu ɔ nɔ ɔ, e ha nɛ nɔmlɔ nɛ nyɛ ji ngɛ mi mi blɔ ɔ he nɛ wa kɛ gu e mumi ɔ he wami ɔ nɔ, 17 konɛ kɛ gu nyɛ hemi kɛ yemi ɔ nɔ ɔ, nyɛ ha nɛ Kristo nɛ e hi nyɛ tsui mi kɛ suɔmi. Nyɛ sipoku nɛ ya zu mi nɛ nyɛɛ du sisi tomi ɔ nɔ, 18 bɔ nɛ pee nɛ nyɛɛ kɛ ni klɔuklɔu ɔmɛ tsuo nɛ nyɛ nyɛ nɛ nyɛɛ nu nɔ́ nɛ ji e blimi kɛ e kami kɛ e hiɔwe yami kɛ e mi kuɔmi ɔ tsuo sisi saminya, 19 nɛ nyɛɛ le Kristo ɔ suɔmi ɔ nɛ e pã nile ɔ, konɛ nyɛ hyi tɔtɔɔtɔ kɛ hyimi ɔ tsuo nɛ Mawu kɛ haa a.

20 Jehanɛ ɔ, nɔ nɛ e ma nyɛ maa pee nɔ́ nɛ hiɛ pe babauu nitsɛ kɛ be níhi tsuo nɛ wa biɔ aloo wa susuɔ ɔ nɔ, ngɛ e he wami ɔ nɛ e ngɛ ní tsue ngɛ wa mi ɔ nya a, 21 lɛ nɛ a gu asafo ɔ kɛ Kristo Yesu nɔ nɛ a ngɔ hɛ mi nyami kɛ ha ngɛ yi nɔhi tsuo a mi kɛ ya neneene kɛ neneene. Amen.

4 Enɛ ɔ he ɔ, imi nɛ a wo mi tsu ngɛ Nyɔmtsɛ ɔ mi ɔ, i ngɛ nyɛ pɛɛ kpae kaa nyɛɛ nyɛɛ bɔ nɛ sa ngɛ tsɛmi nɛ a tsɛ nyɛ ɔ nya, 2 kɛ he si bami* tsuo kɛ he jɔmi, kɛ tsui si tomi, nɛ nyɛ ná nyɛ sibi a he tsui ngɛ suɔmi mi, 3 nyɛɛ bɔ mɔde wawɛɛ nɛ nyɛɛ hɛɛ mumi ɔ kake peemi ɔ mi ngɛ tue mi jɔmi nɛ fĩɔ nyɛ kɛ peeɔ kake ɔ mi. 4 Nɔmlɔ tso kake lɛ ngɛ, kɛ mumi kake kaa bɔ nɛ a tsɛ nyɛ kɛ ba nyɛ tsɛmi ɔ he hɛ kɛ nɔ fɔmi kake ɔ mi ɔ; 5 Nyɔmtsɛ kake, hemi kɛ yemi kake, baptisimi kake; 6 Mawu kake nɛ ji níhi tsuo a Tsɛ ɔ, nɔ nɛ e ngɛ níhi tsuo a nɔ he wami, nɛ e gu níhi tsuo a nɔ, nɛ e ngɛ níhi tsuo a mi ɔ.

7 Jehanɛ ɔ, kaa bɔ nɛ Kristo ɔ susu nike ní nɛ a kɛ haa faa a, jã nɛ a ha wa ti nɔ fɛɛ nɔ dloomi ɔ nɛ. 8 Ejakaa e deɔ ke: “Benɛ e kuɔ kɛ ho hiɔwe ya a, e ngɔ nyɔguɛhi kɛ ho; e ngɔ nike níhi kɛ ha ngɛ adesahi a mi.” 9 Jehanɛ ɔ, mɛni ji munyu nɛ ji “e kuɔ” ɔ sisi ke ji kaa e kple we kɛ yɛ sisi ní ɔmɛ a mi, nɛ ji zugba a nɔ ɔ? 10 Nɔ nɛ e kple ɔ, lɛ nɔuu kɛ̃ ji nɔ nɛ e kuɔ kɛ ya hiɔwe ɔmɛ tsuo a se lokoo ɔ nɛ, konɛ e ha nɛ níhi tsuo nɛ a hyi tɔtɔɔtɔ.

11 Nɛ e ngɔ ni komɛ kɛ ha kaa bɔfohi, ni komɛ kaa gbali, ni komɛ kaa sane kpakpa fiɛɛli,* ni komɛ kaa to nɔ hyɛli kɛ tsɔɔli, 12 kɛ ha ni klɔuklɔu ɔmɛ a dlami,* kɛ ha sɔmɔmi ní tsumi ɔ, konɛ e kɛ fia Kristo ɔ nɔmlɔ tso ɔ kɛ ma si 13 kɛ yaa si be nɛ wɔ tsuo wa maa su hemi kɛ yemi ɔ kake peemi ɔ kɛ Mawu Bi ɔ he nile nitsɛnitsɛ ɔ he, nɛ́ waa pee nyumuhi nɛ a wa ta, nɛ waa hi Kristo ɔ kami kɛ e blimi ɔ tsuo he sue. 14 Enɛ ɔ he ɔ, e sɛ nɛ waa pee jokuɛwi nɛ tsɔɔmi kɔɔhiɔ fɛɛ tsɔɔmi kɔɔhiɔ mimiɛɛɔ mɛ kaa oslɔke nɛ e fiaa mɛ kɛ yaa kɛ baa kɛ guɔ nimli a ga yayami tomi nɔ, kɛ guɔ sisimi ga tsɔmihi a nɔ. 15 Mohu ɔ, be mi nɛ wa tuɔ anɔkuale ɔ, nyɛ ha nɛ waa gu suɔmi nɔ kɛ wa ngɛ níhi tsuo a mi kɛ wo nɔ nɛ ji yi ɔ, nɛ ji Kristo ɔ mi. 16 Nɔmlɔ tso ɔ tsuo je e mi nɛ e tsa pɛpɛɛpɛ kɛ pee kake, nɛ a guɔ kpɔji nya fɛɛ kpɔji nya nɛ e haa nɔ́ nɛ e he hia a nɔ kɛ haa nɛ e peeɔ kake. Ke e he ní ɔmɛ eko fɛɛ eko tsuɔ ní saminya a, lɔ ɔ haa nɛ nɔmlɔ tso ɔ waa be mi nɛ e fiaa lɛ nitsɛ e he kɛ maa si ngɛ suɔmi mi ɔ.

17 Enɛ ɔ he ɔ, nɔ́ nɛ i deɔ nɛ i yeɔ he odase ngɛ Nyɔmtsɛ ɔ mi ɔ ji kaa e sɛ nɛ nyɛɛ ya nɔ nɛ nyɛɛ hi nyɛɛe kaa bɔ nɛ je ma amɛ hu nyɛɛɔ ngɛ a yaka juɛmi* ɔmɛ a mi ɔ hu. 18 A juɛmi ɔ mi wo diblii, nɛ a je a he kɛ je wami ɔ nɛ ji Mawu nɔ́ ɔ he, ngɛ nɔ́ limi nɛ ngɛ a mi ɔ he je, ngɛ a tsui nɛ nui nɔ́ he ɔ* he je. 19 Akɛnɛ nɔ́ ko nɔ́ ko pee we mɛ zo hu he je ɔ, a ngɔ a he kɛ ha nɔ buimi ngmlikiti* konɛ a kɛ hɛ tsumi nɛ tsu mu ní tsumi slɔɔtohi tsuo.

20 Se pi jã nɛ nyɛ kase kaa Kristo ɔ ngɛ, 21 ke niinɛ ɔ, nyɛ nu e he nɛ e nɔ lɛ a gu kɛ tsɔɔ nyɛ ní kaa bɔ nɛ anɔkuale nɛ ngɛ Yesu mi ɔ ngɛ ɔ. 22 A tsɔɔ nyɛ kaa nyɛ je su momo ɔ nɛ kɛ nyɛ blema je mi bami ɔ kɔ, nɛ́ e ngɛ puɛe ngɛ e we akɔnɔhi nɛ sisiɔ nɔ ɔ nya a ngɔ fɔ he. 23 Nɛ e sa kaa nyɛɛ ya nɔ nɛ nyɛ ha nɛ a pee nyɛ ehe ngɛ he wami nɛ e kudɔɔ nyɛ juɛmi* ɔ mi, 24 nɛ e sa kaa nyɛɛ wo su ehe ɔ nɛ a bɔ ngɛ Mawu suɔmi nya ngɛ dami nitsɛnitsɛ kɛ se fimi nitsɛnitsɛ mi ɔ.

25 Enɛ ɔ he ɔ, amlɔ nɛ ɔ nɛ nyɛ je lakpa kɛ fɔ he nɛ ɔ, nyɛ ti nɔ fɛɛ nɔ nɛ e kɛ e nyɛmi nɛ tu anɔkuale, ejakaa wa ji wa sibi a he níhi. 26 Nyɛ mi mi nɛ fu, se nyɛ ko pee yayami; nyɛ ko ha nɛ pu nɛ nɔ si be mi nɛ nyɛ mi mi fu loloolo; 27 nyɛ ko ha Abosiami blɔ.* 28 Ha nɔ nɛ e juɔ ɔ nɛ e ko ju hu; mohu ɔ, ha nɛ e tsu ní tsumi nɛ he wa, e ngɔ e ninehi kɛ tsu ní tsumi kpakpa, konɛ e nyɛ nɛ e na nɔ́ ko nɛ e kɛ nɔ ko nɛ e fĩ lɛ ɔ nɛ a dla. 29 Nyɛ ko ha nɛ munyu sasɛ ko nɛ je kpo ngɛ nyɛ nya, mohu ɔ, nɔ́ nɛ e hi nɛ e maa fia nɔ kɛ ma si kaa bɔ nɛ hiami ɔ ma ji ɔ, konɛ e he nɛ ba se nami kɛ ha nihi nɛ a nuɔ ɔ. 30 Jehanɛ se hu ɔ, nyɛ ko hi Mawu mumi klɔuklɔu ɔ nɔdɔ nɔ́ pee,* nɔ́ nɛ a kɛ sɔu nyɛ nya kɛ ha he ngmɛɛmi ligbi ko kɛ gu kpɔmi nɔ́ nɔ ɔ.

31 Nyɛ je ninyɛ nɛ nya wa fɛɛ ninyɛ nɛ nya wa, abofu, mi mi la, ngmlaa kpami kɛ nɔ jɛmi munyuhi, kɛ nɔ́ fɛɛ nɔ́ nɛ yeɔ nɔ awi ɔ kɛ je nyɛ he ngɔ fɔ he. 32 Mohu ɔ, nyɛ mi mi nɛ jɔ kɛ ha nyɛ sibi nɛ nyɛ mi mi nɛ sã nyɛ ngɛ nyɛ sibi a he, nɛ nyɛɛ ngɔ kɛ pa nyɛ sibi faa kaa bɔ nɛ Mawu hu gu Kristo nɔ nɛ e ngɔ kɛ pa nyɛ faa a.

5 Enɛ ɔ he ɔ, akɛnɛ nyɛ ji bimɛ nɛ a suɔ he je ɔ, nyɛɛ pee nihi nɛ a kaseɔ Mawu, 2 nɛ nyɛɛ ya nɔ nɛ nyɛɛ nyɛɛ ngɛ suɔmi mi kaa bɔ nɛ Kristo ɔ hu suɔ wɔ,* nɛ e ngɔ lɛ nitsɛ e he kɛ ha kaa nɔke nɔ́ kɛ afɔle nɛ jeɔ via liliili ha Mawu ngɛ wa* he ɔ.

3 Nyɛ ko ha nɛ a wo ajuama bɔmi* kɛ mu ní tsumi slɔɔtohi tsuo aloo hɛ tsumi ta po ngɛ nyɛ kpɛti kaa bɔ nɛ e sa nihi nɛ a ngɛ klɔuklɔu ɔ; 4 jã kɛ̃ nɛ a ko wo zo ní peepee aloo kuasia munyuhi aloo yakayaka munyuhi nɛ a kɛ woɔ nɔ nya muɔ—níhi nɛ a sɛ—a ta ngɛ nyɛ kpɛti, se mohu si nami. 5 Ejakaa nyɛ le enɛ ɔ, nɛ nyɛ nitsɛmɛ nyɛ ná le kaa ajuama bɔlɔ ko* aloo nɔ ko nɛ e he tsɔ we aloo nɔ ko nɛ e hɛ tsuɔ, nɛ tsɔɔ kaa e ji wɔ jalɔ ɔ be gbosi ní ko ngɛ Kristo kɛ Mawu a Matsɛ Yemi ɔ mi.

6 Nyɛ ko ha nɛ adesa ko nɛ e ngɔ yaka munyu ko kɛ sisi nyɛ, ejakaa ní nɛ ɔmɛ a he je nɛ Mawu mi mi fumi ɔ ma tue gbomi bimɛ ɔmɛ a nɔ ɔ nɛ. 7 Enɛ ɔ he ɔ, nyɛɛ kɛ mɛ nɛ ko pee jamɛ a ní ɔmɛ; 8 ejakaa be ko nɛ e be ɔ, diblii ji nyɛ, se amlɔ nɛ ɔ, la ji nyɛ ngɛ Nyɔmtsɛ ɔ mi. Nyɛɛ ya nɔ nɛ nyɛɛ nyɛɛ kaa la bimɛ, 9 ejakaa la a yiblii ɔ ji kpakpa peemi slɔɔtohi tsuo kɛ dami kɛ anɔkuale. 10 Nyɛɛ ya nɔ nɛ nyɛɛ le nɔ́ tutuutu nɛ sa Nyɔmtsɛ ɔ hɛ mi; 11 nɛ nyɛ kpa diblii mi ní tsumihi nɛ wui yiblii nɛ nyɛ hu nyɛ tsuɔ ɔ tsumi; mohu ɔ, nyɛ je bɔ nɛ a ngɛ ha tutuutu ɔ kpo heii. 12 Ejakaa níhi nɛ a peeɔ ngɛ laami mi ɔ ji zo níhi nɛ e sɛ kaa a woɔ ta po. 13 Amlɔ nɛ ɔ, níhi tsuo nɛ a ngɛ mɛ kpo jee* ɔ, la a ha nɛ a ngɛ mɛ nae heii, ejakaa nɔ́ fɛɛ nɔ́ nɛ a ha nɛ a ngɛ nae heii ɔ ji la. 14 Lɔ ɔ he ɔ, a de ke: “Oo mo nɛ o ngɛ mahe mi, o hɛ nɛ tsɛ̃ nɛ́ o te si kɛ je gbeje, nɛ Kristo ɔ ma kpɛ kɛ pue o nɔ.”

15 Enɛ ɔ he ɔ, nyɛɛ hyɛ nɛ hi saminya konɛ bɔ nɛ nyɛ nyɛɛɔ ha a nɛ e ko pee kaa nihi nɛ a be juɛmi, se mohu kaa juɛmitsɛmɛ, 16 nyɛɛ kɛ nyɛ be nɛ tsu ní ngɛ blɔ nɛ hi pe kulaa nɔ,* ejakaa ligbi ɔmɛ ji ligbi yayamihi. 17 Enɛ ɔ he ɔ, nyɛɛ jɔɔ nyɛ he peemi kaa nihi nɛ a susuu we nɔ́ he, mohu ɔ, nyɛɛ ya nɔ nɛ nyɛ yɔse nɔ́ nɛ ji Yehowa* suɔmi nya ní ɔ. 18 Jehanɛ se hu ɔ, nyɛ ko de kɛ wai, lɔ ɔ mi nɛ basabasa peemi ngɛ, mohu ɔ, mumi ɔ nɛ hi nyɛ hyie. 19 Nyɛɛ tu munyu kɛ tsɔɔ nyɛ sibi* kɛ lahi, Mawu yi jemi lahi, kɛ mumi mi lahi, nɛ nyɛɛ hi la fiae ha Yehowa* ngɛ nyɛ tsui mi, 20 be fɛɛ be ɔ, nyɛɛ hi wa Mawu nɛ ji Tsɛ ɔ si nae ngɛ nɔ́ fɛɛ nɔ́ he ngɛ wa Nyɔmtsɛ Yesu Kristo biɛ ɔ mi.

21 Nyɛɛ ba nyɛ he si kɛ ha nyɛ sibi* ngɛ Kristo gbeye yemi mi. 22 Ha yigbayihi nɛ a ba a he si kɛ ha a hunomɛ* kaa nɔ́ nɛ Nyɔmtsɛ ɔ lɛ a ngɛ pee ha, 23 ejakaa huno ji e yo ɔ yi kaa bɔ nɛ Kristo ɔ ji asafo ɔ yi ɔ, lɛ nɛ e heɔ nɔmlɔ tso nɛ ɔ yi wami. 24 Ngɛ anɔkuale mi ɔ, kaa bɔ nɛ asafo ɔ ngɛ Kristo ɔ sisi ɔ, jã nɔuu kɛ̃ nɛ e sa kaa yigbayihi hu nɛ a pee kɛ ha a hunomɛ ngɛ nɔ́ fɛɛ nɔ́ mi. 25 Hunomɛ, nyɛɛ ya nɔ nɛ nyɛɛ suɔ nyɛ yi ɔmɛ kaa bɔ nɛ Kristo ɔ hu suɔ asafo ɔ nɛ e ngɔ lɛ nitsɛ e he kɛ ha ngɛ asafo ɔ he ɔ, 26 konɛ e ha nɛ asafo ɔ he nɛ tsɔ, kɛ gu asafo ɔ he nɛ e ngɛ fɔe ngɛ nyu nɛ ji munyu ɔ mi ɔ nɔ, 27 bɔ nɛ pee nɛ e ngɔ asafo ɔ nɛ he ngɛ fɛu ɔ kɛ ha lɛ nitsɛ e he, be mi nɛ mu ko aloo hɛ mi kuãmi aloo níhi kaa jã a ekoeko be he, se mohu e ngɛ klɔuklɔu nɛ piami ko be he ɔ.

28 Jã nɔuu kɛ̃ nɛ e sa kaa hunomɛ hu nɛ a suɔ a yi ɔmɛ kaa mɛ nitsɛmɛ a nɔmlɔ tso ɔmɛ. Nyumu nɛ e suɔ e yo ɔ suɔ lɛ nitsɛ e he, 29 ejakaa nyumu ko be nɛ e nyɛɔ lɛ nitsɛ e nɔmlɔ tso,* mohu ɔ, e haa lɛ niye ní nɛ e fiɛ we e he, kaa bɔ nɛ Kristo ɔ hu peeɔ asafo ɔ, 30 ejakaa wa ji e nɔmlɔ tso ɔ he níhi. 31 “Enɛ ɔ he je nɛ nyumu ma si e tsɛ kɛ e nyɛ, nɛ e ma ya mɛtɛ e yo he,* nɛ mɛ ni enyɔ ɔmɛ a maa pee he lo kake ɔ nɛ.” 32 Laami sane nɛ e ngɛ klɔuu nɛ ɔ kle. Amlɔ nɛ ɔ, munyu nɛ i ngɛ tue ɔ kɔɔ Kristo kɛ asafo ɔ he. 33 Se kɛ̃ ɔ, e sa kaa nyɛ ti nɔ fɛɛ nɔ nɛ e suɔ e yo kaa bɔ nɛ e suɔ lɛ nitsɛ e he ɔ; se e sa kaa yogbayo nɛ e je bumi nɛ mi kuɔ kpo kɛ ha e huno.

6 Bimɛ, nyɛɛ bu nyɛ fɔli ɔmɛ tue ngɛ Nyɔmtsɛ ɔ mi, ejakaa enɛ ɔ da. 2 Kekleekle kita nɛ si womi piɛɛ he ji: “Buu o tsɛ kɛ o nyɛ, 3 konɛ e hi ha mo* nɛ o se nɛ kɛ ngɛ zugba a nɔ.” 4 Nɛ tsɛmɛ, nyɛ ko hi nyɛ bimɛ ɔmɛ a mi mi la woe, mohu ɔ, nyɛɛ ya nɔ nɛ nyɛɛ hi mɛ lɛe ngɛ Yehowa* tsɔsemi kɛ e ga womi* mi.

5 Nyɔguɛhi, nyɛɛ bu nyɛ nyɔmtsɛmɛ ɔmɛ nɛ a ji adesahi ɔ* tue kɛ gbeye yemi kɛ he domi blibliibli ngɛ tsui nɛ mi tsɔ mi, kaa nɔ́ nɛ Kristo ɔ lɛ nyɛ ngɛ pee ha, 6 pi be mi nɛ a ngɛ nyɛ hyɛe pɛ, konɛ nyɛ kɛ sa adesahi a hɛ mi* kɛkɛ, se mohu kaa Kristo nyɔguɛhi nɛ a kɛ a susuma* tsuo ngɛ Mawu suɔmi nya ní pee. 7 Nyɛɛ kɛ juɛmi kpakpa nɛ sɔmɔ, kaa nɔ́ nɛ Yehowa* lɛ nyɛ ngɛ pee ha, se pi adesahi, 8 ejakaa nyɛ le kaa kpakpa fɛɛ kpakpa nɛ nɔ fɛɛ nɔ peeɔ ɔ, Yehowa* maa to lɛ nane mi, nyɔguɛ ji lɛ jio, nɔ nɛ e ye e he ji lɛ jio. 9 Jehanɛ se hu ɔ, nyɛ nyɔmtsɛmɛ, nyɛɛ ya nɔ nɛ nyɛɛ kɛ mɛ nɛ hi si jã nɔuu kɛ̃, nyɛ ko hi a he gbeye woe, ejakaa a Nyɔmtsɛ ɔ nɛ e ji nyɛ hu nyɛ Nyɔmtsɛ ɔ ngɛ hiɔwe, nɛ nɔ mi hlami be e mi.

10 Nyagbe ɔ, nyɛɛ ya nɔ nɛ nyɛɛ hi he wami náe ngɛ Nyɔmtsɛ ɔ mi, kɛ jehanɛ se hu ngɛ e he wami ngua a mi. 11 Nyɛɛ wo ta buli a he piɛ pomi ní ɔmɛ tsuo nɛ je Mawu ngɔ ɔ konɛ nyɛ nyɛ nɛ nyɛɛ da si kpɛii kɛ si Abosiami ga ní tsumi* ɔmɛ; 12 ejakaa wa ngɛ atlibo ko fiae,* pi waa kɛ he lo kɛ muɔ, se mohu waa kɛ nɔ yemihi, kɛ blɔ nyahi, kɛ je ɔ mi nɔ yeli nɛ a ngɛ diblii nɛ ɔ mi ɔ, kɛ mumi mi he wami yayamihi nɛ a ngɛ hiɔwe ní ɔmɛ a mi ɔ. 13 Enɛ ɔ he je ɔ, nyɛɛ ngɔ ta buli a he piɛ pomi ní ɔmɛ tsuo nɛ je Mawu ngɔ ɔ konɛ nyɛ nyɛ nɛ nyɛɛ hwu ta ngɛ ligbi yayami ɔ mi, konɛ ke nyɛ gbe nɔ́ fɛɛ nɔ́ nya a, nyɛɛ da si kpɛii.

14 Lɔ ɔ he ɔ, nyɛɛ da si kpɛii nɛ nyɛɛ ngɔ anɔkuale nɛ ji mlɛmi fimi nɔ́ ɔ kɛ fĩ nyɛ mlɛmi, nɛ nyɛɛ wo dami nɛ ji gugue nɔ dama a, 15 nɛ nyɛɛ wo tokota nɛ nyɛɛ pee klaalo kaa nyɛ maa jaje tue mi jɔmi he sane kpakpa a. 16 Ngɛ ní nɛ ɔmɛ tsuo a se ɔ, nyɛɛ ngɔ hemi kɛ yemi nɛ ji tsɛ̃i ngua a, lɔ ɔ nɛ nyɛɛ kɛ ma nyɛ maa gbe nɔ yayami ɔ kɛ̃ɛ̃ mi bihi* nɛ a ngɛ tsoe ɔ tsuo. 17 Jehanɛ se hu ɔ, nyɛɛ ngɔ yi wami hemi nɛ ji dade pɛɛ ɔ, kɛ mumi ɔ klaate ɔ nɛ ji Mawu munyu ɔ, 18 konɛ nyɛɛ gu sɔlemi slɔɔto ɔmɛ eko fɛɛ eko, kɛ pɛɛ kpami nɛ mi wa nɔ kɛ hi sɔlee be fɛɛ be ngɛ mumi mi. Yi mi tomi nɛ ɔ he je ɔ, nyɛ ko hwɔ mahe, nyɛɛ hɛɛ pɛɛ kpami nɛ mi wa mi kɛ ha ni klɔuklɔu ɔmɛ tsuo daa. 19 Nyɛɛ sɔle ha imi hulɔ, konɛ ke i pã ye nya mi ɔ, a ha mi munyuhi bɔ nɛ pee nɛ ma nyɛ ma tu munyu kɛ kã, nɛ́ ma ha nɛ a le sane kpakpa a he laami sane nɛ e ngɛ klɔuu ɔ, 20 lɔ ɔ he nɛ i ngɛ ní tsue ngɛ kaa nɔ yelɔ ko nane mi dalɔ ngɛ kɔsɔkɔsɔhi a mi ɔ nɛ, konɛ ma tu he munyu kɛ kã kaa bɔ nɛ e sa kaa ma tu munyu ɔ.

21 Jehanɛ ɔ, bɔ nɛ pee nɛ nyɛɛ le ye he sanehi kɛ bɔ nɛ i ngɛ ha hu he je ɔ, Tikiko, nɛ ji nyɛmi nɛ wa suɔ lɛ nɛ e ji sɔmɔlɔ anɔkualetsɛ ngɛ Nyɔmtsɛ ɔ mi ɔ ma ha nɛ nyɛ maa le nɔ́ fɛɛ nɔ́. 22 I ngɛ lɛ nyɛ ngɔ tsɔe ngɛ yi mi tomi nɛ ɔ he je, konɛ nyɛɛ le bɔ nɛ wa ngɛ ha nɛ́ e to nyɛ tsui nɔ nine hulɔ.

23 Nyɛmimɛ ɔmɛ a nine nɛ su tue mi jɔmi kɛ suɔmi kɛ hemi kɛ yemi nɛ je Mawu nɛ ji Tsɛ ɔ, kɛ Nyɔmtsɛ Yesu Kristo a ngɔ ɔ nɔ. 24 Dloomi ɔ kɛ nihi tsuo nɛ a kɛ suɔmi nɛ puɛ we suɔ wa Nyɔmtsɛ Yesu Kristo ɔ nɛ hi si.