KƐ YA HA FILIPI BI ƆMƐ

1 Paulo kɛ Timoteo, Kristo Yesu nyɔguɛhi, kɛ ya ha ni klɔuklɔu ɔmɛ tsuo nɛ a kɛ Kristo Yesu pee kake ɔ, kɛ nɔ hyɛli kɛ sɔmɔli nɛ a ngɛ Filipi ɔ:

2 Nyɛ nine nɛ su dloomi kɛ tue mi jɔmi nɛ je Mawu nɛ ji wa Tsɛ ɔ, kɛ Nyɔmtsɛ Yesu Kristo ngɔ ɔ nɔ.

3 Be fɛɛ be nɛ ma kai nyɛ ɔ, i naa ye Mawu ɔ si 4 ngɛ pɛɛ nɛ mi wa fɛɛ pɛɛ nɛ mi wa nɛ i kpaa kɛ haa nyɛ tsuo ɔ mi. I kɛ bua jɔmi lɛ kpaa pɛɛ nɛ mi wa nɛ ɔ eko fɛɛ eko, 5 ngɛ nɔ́ nɛ nyɛ hu nyɛ pee ngɛ sane kpakpa a he* kɛ je kekleekle ligbi ɔ nɔ kɛ ba si amlɔ nɛ ɔ he je. 6 Ejakaa i ngɛ nɔ mi mami ngɛ nɔ́ nɛ ɔ nɔuu mi, kaa nɔ nɛ e je ní tsumi kpakpa sisi ngɛ nyɛ mi ɔ maa ngɔ kɛ ba nyagbe kɛ yaa si Kristo Yesu ligbi ɔ. 7 Akɛnɛ nyɛ ngɛ ye tsui mi he je ɔ, e da blɔ kɛ ha mi kaa ma susu nɔ́ nɛ ɔ ngɛ nyɛ tsuo nyɛ he, nyɛ nihi nɛ i kɛ nyɛ ná blɔ fa mi nɔ́ ngɛ dloomi ɔ mi ngɛ tsuhi nɛ a wo mi, kɛ sane kpakpa a he fami kɛ e ngɔmi kɛ si mami ngɛ mlaa nya a tsuo mi ɔ.

8 Ejakaa Mawu ji ye we odase kaa ye hɛ ngɛ jae ngɛ nyɛ tsuo nyɛ he, ejakaa i suɔ nyɛ sane kaa bɔ nɛ Kristo Yesu hu suɔ wa sane ɔ. 9 Nɛ enɛ ɔ ji nɔ́ nɛ i yaa nɔ nɛ i sɔleɔ ngɛ he, kaa nyɛ suɔmi ɔ maa ya nɔ maa hiɛ kɛ be nɔ babauu nitsɛ pe kekle ɔ kɛ nile nitsɛnitsɛ kɛ nɔ́ se kɔmi nɛ pi si; 10 konɛ nyɛɛ le níhi nɛ a he hia wawɛɛ ɔ, bɔ nɛ pee nɛ sé ko nɛ ko hi nyɛ he nɛ nyɛ ko hi ni kpahi a nane tɔ̃tɔ̃e kɛ yaa si Kristo ligbi ɔ; 11 konɛ dami yiblii nɛ guɔ Yesu Kristo nɔ ɔ nɛ hyi nyɛ tɔ kɛ ha Mawu hɛ mi nyami womi kɛ e yi jemi.

12 Jehanɛ ɔ, nyɛmimɛ, i suɔ nɛ nyɛɛ le kaa ngɛ anɔkuale mi ɔ, ye si fɔfɔɛ ɔ ha nɛ sane kpakpa a ya nɔ mohu, 13 nɛ lɔ ɔ ha nɛ Matsɛ Ngua a He Buli* ɔmɛ kɛ ni kpahi tsuo ba le tsuhi nɛ a wo mi ngɛ Kristo he ɔ. 14 Jehanɛ ɔ, nyɛmimɛ ɔmɛ ngɛ Nyɔmtsɛ ɔ mi ɔ, a ti nihi babauu ba ná kã ngɛ tsuhi nɛ a wo mi ɔ he je, nɛ a ngɛ kã babauu kpo jee pe kekle ɔ kɛ ngɛ Mawu munyu ɔ fiɛɛe nɛ́ a yi gbeye.

15 Niinɛ, ni komɛ kɛ hɛkɔ kɛ pɛ lɛ ngɛ Kristo ɔ fiɛɛe, se ni kpahi lɛɛ a kɛ juɛmi kpakpa lɛ ngɛ jã pee. 16 Ni nɛmɛ nɛ a kɛ juɛmi kpakpa lɛ ngɛ jã pee ɔ je suɔmi mi nɛ a ngɛ Kristo ɔ jajee, ejakaa a le kaa a hla mi konɛ ma fã sane kpakpa a he; 17 se ni kpa amɛ lɛɛ a kɛ pɛ lɛ ngɛ jã pee, se pi juɛmi kpakpa, ejakaa a ngɛ a yi mi toe kaa a ma gba ye nya ngɛ tsuhi nɛ a wo mi ɔ mi. 18 Mɛni je mi kɛ ba? Lɔ ɔ pɛ ji kaa ngɛ blɔ fɛɛ blɔ nɔ ɔ, osato mi jio, anɔkuale mi jio, a ngɛ Kristo ɔ jajee, nɛ i nyaa ngɛ enɛ ɔ he. Ngɛ anɔkuale mi ɔ, imi hu ma ya nɔ nɛ ma hi nyae, 19 ejakaa i le kaa enɛ ɔ ma ha nɛ a ma he ye yi wami kɛ gu nyɛ pɛɛ kpami nɛ mi wa a kɛ Yesu Kristo mumi ɔ yemi kɛ buami ɔ nɔ. 20 Enɛ ɔ kɛ nɔ́ nɛ i ngɛ blɔ hyɛe wawɛɛ ɔ kɛ ye hɛ kɛ nɔ fɔmi kaa zo be mi gbee ngɛ blɔ ko blɔ ko nɔ ɔ kɔ, se mohu ma tu munyu faa wawɛɛ nitsɛ, konɛ ngɛ wami mi jio, gbenɔ mi jio, a gu ye nɔmlɔ tso ɔ nɔ kɛ wo Kristo nɔ gojoo amlɔ nɛ ɔ kaa bɔ nɛ a peeɔ daa a.

21 Ejakaa ngɛ ye blɔ fa mi ɔ, ke ma hi wami mi ɔ, Kristo, nɛ ke ma gbo ɔ, se nami. 22 Amlɔ nɛ ɔ ke ma hi wami mi ngɛ he lo mi ɔ, lɔ ɔ ji yiblii nɛ ye ní tsumi ɔ wo; se kɛ̃ ɔ, nɔ́ nɛ ma hla a lɛɛ, i be hae nɛ nɔ ko nɛ e le. 23 I ngɛ ní enyɔ nɛ ɔmɛ a kpɛti, ejakaa i ná nɛ a ngmɛɛ ye he nɛ i ya piɛɛ Kristo he, nɛ ngɛ anɔkuale mi ɔ, lɔ ɔ hi wawɛɛ. 24 Se e he hia wawɛɛ kaa ma ya nɔ nɛ ma hi he lo ɔ mi ngɛ nyɛ he je. 25 Enɛ ɔ he ɔ, akɛnɛ i ngɛ nɔ mi mami ngɛ enɛ ɔ mi he je ɔ, i le kaa ma hi si, nɛ i kɛ nyɛ tsuo maa ya nɔ maa hi si kɛ ha nyɛ nɔ yami kɛ nyɛ bua jɔmi nami ngɛ hemi kɛ yemi ɔ mi, 26 konɛ ke i ba nyɛ ngɔ ekohu ɔ, nyɛ nyami ɔ nɛ be nɔ ngɛ Kristo Yesu mi ngɛ ye he je.

27 Nɔ́ kɛkɛ nɛ nyɛɛ pee ji kaa nyɛɛ ba nyɛ je mi* bɔ nɛ sa Kristo he sane kpakpa a, konɛ ke i ba nɛ i ba na nyɛ jio, i bɛ jio, ma nu nyɛ he nɛ ma le kaa nyɛ daa si kpɛii ngɛ mumi kake mi, kɛ susuma kake,* nɛ nyɛ pee kake kɛ ngɛ mɔde bɔe kɛ ha sane kpakpa a he hemi kɛ yemi ɔ, 28 nɛ nyɛ ko ha nɛ nihi nɛ a teɔ si kɛ woɔ nyɛ ɔ nɛ a wo nyɛ he gbeye ngɛ blɔ ko blɔ ko nɔ. Nɔ́ nɛ ɔ nɔuu ji odase nɛ tsɔɔ kaa a ma kpata a hɛ mi, se lɔ ɔ ji yi wami hemi kɛ ha nyɛ; nɛ nɔ́ nɛ ɔ je Mawu ngɔ. 29 Ejakaa a ha nyɛ he blɔ ɔ ngɛ Kristo he je, pi hemi kɛ yemi nɛ nyɛ ma ná ngɛ e mi ɔ kɛkɛ, se mohu konɛ nyɛɛ na amanehlu ngɛ e he hulɔ. 30 Ejakaa kunɔ nɛ nyɛ na kaa i nɔ, nɛ amlɔ nɛ ɔ nyɛ ngɛ nue kaa loloolo ɔ i ngɛ nɔe ɔ, lɔ ɔ nɔuu nɛ nyɛ hu nyɛ ngɛ nɔe ɔ nɛ.

2 Lɛɛ ke he wami womi ko ngɛ ngɛ Kristo mi ɔ, ke suɔmi bua womi ko ngɛ ɔ, ke mumi mi huɛ bɔmi ko ngɛ ɔ, ke nɔ sane suɔmi kɛ mi mi sami ko ngɛ ɔ, 2 nyɛ ha nɛ ye bua jɔmi ɔ nɛ hyi tɔ kɛ gu juɛmi kake kɛ suɔmi kake nɛ nyɛ maa hɛɛ ɔ nɔ, kɛ gu kake nɛ nyɛ maa pee kɛ pi si* ɔ nɔ, kɛ gu susumi kake nɛ nyɛ maa hɛɛ ngɛ juɛmi mi ɔ nɔ. 3 Nyɛ ko ngɔ pɛ aloo yaka hɛ mi nyami hlami kɛ pee nɔ́ ko nɔ́ ko, mohu ɔ, nyɛɛ je he si bami mi* nɛ nyɛɛ bu ni kpahi kaa a nɔ kuɔ pe nyɛ, 4 be mi nɛ nyɛ fo we nyɛ nitsɛmɛ pɛ nyɛ nɔ́ mi, se mohu nyɛ foɔ ni kpahi hu a nɔ́ mi ɔ.

5 Nyɛ ha nɛ juɛmi nɛ ɔ nɛ ngɛ Kristo Yesu mi ɔ nɛ ya nɔ nɛ e hi nyɛ hu nyɛ mi, 6 e ngɛ mi kaa e hɛɛ Mawu su mohu, se e susuu we gblegbleegble kaa e ma gblɔ nɔ́ ko, nɛ ji kaa e kɛ Mawu maa sɔ. 7 Ohoo, mohu ɔ, e ngmɛɛ níhi tsuo a he nɛ e ngɔ nyɔguɛ su kɛ fɔ e nɔ nɛ e ba pee adesa.* 8 Nɔ́ nɛ pã lɔ ɔ, benɛ e ba kaa adesa a,* e ba e he si nɛ e bu tue hluu kɛ ya su gbenɔ mi, ee, sɛumi tso* nɔ gbenɔ. 9 Enɛ ɔ nɔuu he je ɔ, Mawu wo e nɔ nɛ e ha lɛ blɔ nya nɛ e nɔ kuɔ, nɛ e je mi mi jɔmi mi nɛ e ha lɛ biɛ nɛ e nɔ kuɔ pe biɛ fɛɛ biɛ, 10 bɔ nɛ pee nɛ ngɛ Yesu biɛ ɔ mi ɔ, nakutso fɛɛ nakutso nɛ kpla si—nihi nɛ a ngɛ hiɔwe kɛ nihi nɛ a ngɛ zugba a nɔ kɛ nihi nɛ a ngɛ zugba a sisi ɔ— 11 nɛ́ lilɛ fɛɛ lilɛ nɛ jaje heii kaa Yesu Kristo ji Nyɔmtsɛ kɛ wo Mawu nɛ ji Tsɛ ɔ hɛ mi nyami.

12 Enɛ ɔ he ɔ, nihi nɛ i suɔ, kaa bɔ nɛ nyɛ buɔ tue be fɛɛ be, pi be nɛ i ngɛ nyɛ ngɔ pɛ, se mohu titli ɔ, amlɔ nɛ ɔ nɛ i be nyɛ ngɔ nɛ ɔ hu ɔ, nyɛɛ kɛ gbeye yemi kɛ he domi blibliibli nɛ hi nyɛ nitsɛmɛ nyɛ yi wami hemi ɔ he ní tsue. 13 Ejakaa Mawu ji nɔ nɛ woɔ nyɛ he wami ngɛ lɛ nitsɛ e suɔmi nya, nɛ e ngɛ nyɛ suɔmi ɔ kɛ he wami ɔ hae konɛ nyɛ kɛ pee. 14 Nyɛɛ ya nɔ nɛ nyɛɛ pee níhi tsuo konɛ munyu nyanyaanya tumi kɛ atsinyɛ jemi nɛ ko hi mi, 15 bɔ nɛ pee nɛ nyɛ ba pee nihi nɛ piami ko kɛ sane ko be a he, Mawu bimɛ nɛ mu ko be a he ngɛ yi nɔ ko nɛ e kpɛ̃ nɛ e be e hanɔ ɔ mi, ni nɛmɛ nɛ a kpɛti nɛ nyɛ ngɛ kpɛe kaa lahi ngɛ je ɔ mi ɔ, 16 nɛ́ nyɛɛ ya nɔ nɛ nyɛɛ pɛtɛ wami munyu ɔ he wawɛɛ. Kɛkɛ ɔ, ma na nɔ́ ko nɛ ma da nɔ kɛ nya ngɛ Kristo ligbi ɔ mi, akɛnɛ i le kaa i tui fo ɔ yaka gu aloo i tsu we ní wawɛɛ yaka gu ɔ he je. 17 Se ke a ngɛ mi plɛe kaa dã afɔle kɛ ngɛ afɔle ɔ kɛ sɔmɔmi klɔuklɔu* ɔ nɛ nyɛ hemi kɛ yemi ɔ ngɔ nyɛ kɛ ba he ɔ nɔ puee po ɔ, ye bua jɔ, nɛ i kɛ nyɛ tsuo ngɛ nyae. 18 Jã kɛ̃ nɛ e sa kaa nyɛ hu nyɛ bua nɛ jɔ konɛ nyɛɛ kɛ mi nɛ nya.

19 Jehanɛ ɔ, i ngɛ hɛ kɛ nɔ fɔmi ngɛ Nyɔmtsɛ Yesu ɔ mi kaa e be kɛe nɛ ma tsɔ Timoteo nyɛ ngɔ, bɔ nɛ pee nɛ ke i nu nyɛ he ɔ, ma ná he wami womi. 20 Ejakaa i be nɔ kpa ko hu nɛ e su ngɛ kaa e nɔ́ ɔ, nɔ ko nɛ e maa je e tsui mi kɛ susu nyɛ hiami níhi a he. 21 Ejakaa ni kpa amɛ tsuo ngɛ mɛ nitsɛmɛ a nɔ́ mi foe, se pi Yesu Kristo nɔ́ mi. 22 Se nyɛ le odase nɛ e ye ngɛ lɛ nitsɛ e he ɔ, e piɛɛ ye he kɛ sɔmɔ kaa bi kɛ e tsɛ konɛ sane kpakpa a nɛ ya nɔ. 23 Enɛ ɔ he ɔ, lɛ ji nɔ nɛ i to kaa ke i na bɔ nɛ níhi maa ya nɔ ha mi pɛ ɔ, ma tsɔ lɛ. 24 Niinɛ, i ngɛ hɛ kɛ nɔ fɔmi ngɛ Nyɔmtsɛ ɔ mi kaa imi nitsɛ hu e be kɛe nɛ ma ba.

25 Se amlɔ nɛ ɔ lɛɛ, i susu kaa e he hia nɛ ma tsɔ Epafrodito kɛ ba nyɛ ngɔ, e ji ye nyɛminyumu, nyɛmi nɛ i kɛ lɛ tsuɔ ní, ye nyɛmi ta bulɔ, kɛ nyɛ tsɔlɔ kɛ sɔmɔlɔ nɛ tsuɔ ye hiami níhi a he ní, 26 ejakaa e hɛ ngɛ jae ngɛ nyɛ tsuo nyɛ he, nɛ e hao, ejakaa nyɛ nu kaa e ba be he wami. 27 Niinɛ, e nu hiɔ nɛ e su gbenɔ muɔ nya haa; se Mawu na lɛ mɔbɔ, ngɛ anɔkuale mi ɔ, pi lɛ pɛ, se imi hulɔ, konɛ ma ko ye aywilɛho ngɔ to aywilɛho nɔ. 28 Enɛ ɔ he ɔ, i kɛ oya yemi nɛ pe kulaa ngɛ lɛ tsɔe, bɔ nɛ pee nɛ ke nyɛ na lɛ ɔ, nɛ nyɛ nya ekohu, nɛ imi hu i be yeyeeye pee tsɔ hu. 29 Enɛ ɔ he ɔ, nyɛɛ kɛ bua jɔmi tsuo nɛ he lɛ atuu kaa bɔ nɛ nyɛ peeɔ ngɛ Nyɔmtsɛ ɔ mi ɔ, nɛ nyɛɛ ya nɔ nɛ nyɛɛ bu nyumuhi kaa jã a saminya, 30 ejakaa e piɛ ngɔɛ nya nɛ e ko gbo ngɛ Kristo ní tsumi* ɔ he je, nɛ e ngɔ e wami* kɛ wo oslaa mi konɛ e ba sɔmɔ mi ngɛ nyɛ nane mi akɛnɛ nyɛ be hiɛ ɔ he je.

3 Nyagbe ɔ, ye nyɛmimɛ, nyɛɛ ya nɔ nɛ nyɛ nya ngɛ Nyɔmtsɛ ɔ mi. E gba we ye nya kaa ma ngma nyɛ ní nɛ ɔmɛ nɔuu, nɛ i ngɛ ngmae ngɛ nyɛ he piɛ pomi he je.

2 Nyɛɛ hyɛ nyɛ he ngɛ gbe ɔmɛ a he; nyɛɛ hyɛ nyɛ he ngɛ ni nɛmɛ nɛ a plaa nɔ ɔmɛ a he; nyɛɛ hyɛ nyɛ he ngɛ ni nɛmɛ nɛ a poɔ he lo ɔ, a he. 3 Ejakaa wɔ ji nihi nɛ a po mɛ nitsɛnitsɛ ɔ nɛ, wɔ nihi nɛ wa gu Mawu mumi ɔ nɔ kɛ ngɛ sɔmɔe ngɛ blɔ klɔuu nɔ nɛ wa ngɛ fĩae ngɛ Yesu Kristo mi nɛ pi he lo ɔ mi nɛ wa hɛ kɛ nɔ fɔmi ɔ ngɛ ɔ, 4 e ngɛ mi kaa ke nɔ ko ngɛ nɔ́ ko nɛ e maa da nɔ kɛ ná hɛ kɛ nɔ fɔmi ngɛ he lo ɔ mi ɔ, lɛɛ imi.

Ke adesa kpa ko susuɔ kaa e ngɛ nɔ́ ko nɛ e maa da nɔ kɛ ná hɛ kɛ nɔ fɔmi ngɛ he lo ɔ mi ɔ, i ngɛ nɔ́ nɛ pe jã: 5 a po mi ngɛ ligbi nɛ ji kpaanyɔ ɔ nɔ, Israel no ji mi, i je Benyamin wɛtso ɔ mi, i ji Hebri no, nɛ Hebri bi lɛ a fɔ mi; ngɛ mlaa nya a, Farisi no ji mi; 6 ngɛ mɔde bɔmi blɔ fa mi ɔ, i wa asafo ɔ yi mi, ngɛ dami nɛ a kɛ da mlaa a nɔ ɔ nya a, i ji nɔ ko nɛ e tsɔɔ kaa piami ko be e he. 7 Se kɛ̃ ɔ, níhi nɛ jinɛ a ji ní nami kɛ ha mi ɔ, i bu mɛ kaa níhi nɛ laa* ngɛ Kristo ɔ he je. 8 Nɛ nɔ́ nɛ pe kulaa a, ngɛ anɔkuale mi ɔ, i buɔ níhi tsuo kaa níhi nɛ a laa ngɛ Kristo Yesu, ye Nyɔmtsɛ ɔ he nile nɛ he jua wa pe nɔ́ fɛɛ nɔ́ ɔ he je. E he je ɔ, i ha nɛ níhi tsuo bɔ mi, nɛ i buɔ mɛ kaa dwɔmi babauu,* bɔ nɛ pee nɛ ma ná Kristo, 9 konɛ a na mi kaa i kɛ lɛ pee kake, pi ngɛ imi nitsɛ ye dami ngɛ mlaa a se nyɛɛmi he je, se mohu ngɛ dami ɔ nɛ e guɔ Kristo mi hemi kɛ yemi nɔ ɔ he je, dami ɔ nɛ jeɔ Mawu ngɔ nɛ daa si ngɛ hemi kɛ yemi nɔ ɔ. 10 Oti nɛ i kɛ ma ye hɛ mi ji kaa ma le lɛ kɛ e gbogboehi a si tlemi he wami ɔ, nɛ ma ná e we amanehlu ɔmɛ eko, nɛ ma ngɔ ye he kɛ ha gbenɔ nɛ ngɛ kaa e nɔ́ ɔ, 11 nɛ ma hyɛ kaa ke e hí kulaa a, ma ná gbogboehi a si tlemi nɛ sɛ hlami ɔ lo.

12 Pi kaa ye nine su nɔ momo, aloo a ha nɛ i ye mluku momo, se mohu, i ngɛ ye hɛ mi yae konɛ ma nyɛ nɛ ma pɛtɛ nɔ́ nɛ Kristo Yesu hla mi* ngɛ he ɔ he hulɔ. 13 Nyɛmimɛ, i bui ye he kaa ye nine su nɔ, mohu ɔ, nɔ́ kake nɛ i ngɛ nɔ mi mami ngɛ he ji: Níhi nɛ ngɛ se ɔ, ye hɛ maa hi a nɔ jee, nɛ níhi nɛ ngɛ hɛ mi ɔ, ma hi ye mi kpãe kɛ hi a he sue, 14 i ngɛ ye hɛ mi yae kɛ ya su oti ɔ nɛ ji Mawu hiɔwe tsɛmi ɔ kɛ gu Kristo Yesu nɔ ɔ he kunimi yemi jlasi ɔ he. 15 Enɛ ɔ he ɔ, wɔ nihi nɛ wa wa a, nyɛ ha nɛ waa hɛɛ juɛmi nɛ ɔ, nɛ ke nyɛɛ lɛɛ nyɛ hɛɛ susumi kpa ko ngɛ blɔ ko nɔ ɔ, Mawu ma je su ɔ nɛ i tu he munyu kɛ sɛ hlami ɔ kpo kɛ tsɔɔ nyɛ. 16 Bɔ fɛɛ bɔ nɛ ji ɔ, he nɛ wa ya wa hɛ mi kɛ su ɔ, nyɛ ha nɛ waa ya nɔ nɛ waa nyɛɛ pɛpɛɛpɛ ngɛ blɔ nɛ ɔ nɔuu nɔ.

17 Nyɛmimɛ, nyɛɛ pee kake kɛ kase mi, nɛ nyɛɛ hi nihi nɛ a nyɛɛmi kɛ nɔ hyɛmi nɔ́ nɛ wa pee kɛ ha nyɛ ɔ kɔ ɔ hyɛe. 18 Ejakaa nihi fuu ngɛ—jinɛ i pɔɔ a ta womi, se amlɔ nɛ ɔ, i kɛ ya fomi lɛ woɔ a ta—nɛ́ a ngɛ nyɛɛe kaa Kristo sɛumi tso* ɔ he he nyɛli. 19 A nyagbe ji hɛ mi kpatami, nɛ a mawu ji a mi mi, nɛ ngɛ anɔkuale mi ɔ, a zo ji a hɛ mi nyami, nɛ a ha nɛ a juɛmi ngɛ zugba a nɔ níhi a nɔ. 20 Se ma nɛ e mi bimɛ ji wɔ ɔ ngɛ hiɔwe, nɛ wa ngɛ kpɔlɔ ko nɛ je lejɛ ɔ mlɛe wawɛɛ, lɛ ji Nyɔmtsɛ Yesu Kristo, 21 nɔ nɛ e ma tsake wa nɔmlɔ tso nɛ e ba si ɔ konɛ e pee kaa lɛ nitsɛ e nɔmlɔ tso nɛ e hɛ mi ngɛ nyami ɔ* kɛ gu e he wami ngua a nɛ ha nɛ e nyɛ nɛ e ngɔ níhi tsuo kɛ wo lɛ nitsɛ e sisi ɔ nɔ.

4 Enɛ ɔ he ɔ, ye nyɛmimɛ nɛ i suɔ nɛ ye hɛ ngɛ jae ngɛ nyɛ he, ye bua jɔmi kɛ ye jlasi, nihi nɛ i suɔ, nyɛɛ da si kpɛii ngɛ blɔ nɛ ɔ nɔ ngɛ Nyɔmtsɛ ɔ mi.

2 I ngɛ Yodia he wami woe, nɛ i ngɛ Sintike hu he wami woe kaa a hɛɛ juɛmi kake ngɛ Nyɔmtsɛ ɔ mi. 3 Ee, akɛnɛ o ji nyɛmi anɔkualetsɛ nɛ i kɛ lɛ tsuɔ ní* he je ɔ, i ngɛ mo pɛɛ kpae kaa o ya nɔ nɛ o ye bua yi nɛ ɔmɛ nɛ i kɛ mɛ pee kake kɛ bɔ sane kpakpa a he mɔde wawɛɛ ɔ, kɛ Klɛmɛnt, kɛ ye nyɛmimɛ kpahi nɛ i kɛ mɛ tsuɔ ní nɛ a biɛ ngɛ wami womi ɔ mi ɔ.

4 Be fɛɛ be ɔ, nyɛ nya ngɛ Nyɔmtsɛ ɔ mi. Ma de ekohu ke nyɛ nya! 5 Nyɛ ha nɛ nihi tsuo nɛ a le kaa nyɛ susuɔ nɔ́ he. Nyɔmtsɛ ɔ su si ta. 6 Nyɛ ko pee yeyeeye ngɛ nɔ́ ko nɔ́ ko he, se mohu ngɛ nɔ́ fɛɛ nɔ́ mi ɔ, nyɛɛ gu sɔlemi kɛ pɛɛ kpami nɛ mi wa kɛ sina nɔ kɛ ha nɛ Mawu nɛ e le nyɛ ní bimi ɔmɛ; 7 nɛ Mawu tue mi jɔmi ɔ nɛ pã níhi a sisi numi tsuo ɔ maa bu nyɛ tsui kɛ nyɛ juɛmi* he kɛ gu Kristo Yesu nɔ.

8 Nyagbe ɔ, nyɛmimɛ, nɔ́ fɛɛ nɔ́ nɛ ji anɔkuale, nɔ́ fɛɛ nɔ́ nɛ hɛ mi ngɛ nyami, nɔ́ fɛɛ nɔ́ nɛ da, nɔ́ fɛɛ nɔ́ nɛ he tsɔ, nɔ́ fɛɛ nɔ́ nɛ a suɔ, kɛ nɔ́ fɛɛ nɔ́ nɛ a tuɔ he munyu kpakpa, nɔ́ fɛɛ nɔ́ nɛ ji je mi bami nɛ sa, kɛ nɔ́ fɛɛ nɔ́ nɛ sa yi jemi ɔ, nyɛɛ ya nɔ nɛ nyɛɛ hi ní nɛ ɔmɛ a he susue.* 9 Níhi nɛ nyɛ kase nɛ nyɛ kplɛɛ nɔ nɛ nyɛ nu nɛ nyɛ na ngɛ ye he ɔ, nyɛɛ pee ní nɛ ɔmɛ, nɛ tue mi jɔmi Mawu ɔ kɛ nyɛ maa hi si.

10 I nyaa wawɛɛ ngɛ Nyɔmtsɛ ɔ mi kaa jehanɛ ɔ lɛɛ nyɛ kpale bɔni ye he susumi. E ngɛ mi kaa nyɛ susuɔ ye he mohu lɛɛ, se nyɛ ná we he blɔ nɛ nyɛ kɛ tsɔɔ jã. 11 Pi nɛ e fĩ mi he je nɛ i ngɛ enɛ ɔ dee, ejakaa i kase kaa ngɛ si fɔfɔɛ fɛɛ ko mi ɔ, ye bua maa jɔ ye níhi a he.* 12 Ke nɔ́ ko bɔɔ pɛ lɛ ngɛ ye dɛ ɔ, i le bɔ nɛ i hiɔ si ha, nɛ ke i ngɛ níhi babauu hu ɔ, i le bɔ nɛ i hiɔ si ha. Ngɛ nɔ́ fɛɛ nɔ́ mi kɛ si fɔfɔɛhi tsuo a mi ɔ, i kase laami sane ɔ nɛ kɔɔ bɔ nɛ a tɔɔ ha kɛ bɔ nɛ a haa hwɔ ha, bɔ nɛ a náa níhi babauu ha kɛ bɔ nɛ a hiɔ si ha ke nɔ́ ko be nɔ dɛ ɔ he. 13 Ejakaa i nyɛɔ peeɔ níhi tsuo kɛ gu nɔ nɛ e woɔ mi he wami ɔ nɔ.

14 Se kɛ̃ ɔ, nyɛ bɔ mɔde kaa nyɛ piɛɛ ye he ngɛ ye we amanehlu ɔ mi. 15 Ngɛ anɔkuale mi ɔ, nyɛ Filipi bi ɔmɛ hu nyɛ le kaa benɛ nyɛ kase sane kpakpa a kekleekle ɔ se, benɛ i je Makedonia a, asafo ko asafo ko be nɛ e kɛ mi bɔ huɛ ngɛ nɔ́ hami kɛ nɔ́ ngɔmi blɔ fa mi kaa ja nyɛ pɛ; 16 ejakaa benɛ i ngɛ Tɛsalonika a, nyɛ mane mi nɔ́ ko ngɛ ye hiami níhi a he je, pi si kake pɛ, se si enyɔ sɔuu. 17 Pi kaa i ngɛ nike ní ko blɔ hyɛe, se mohu i ngɛ yiblii nɛ woɔ nyɛ kpɛɛ ɔ mi ní fuu ɔ hlae. 18 Se i ngɛ nɔ́ fɛɛ nɔ́ nɛ i hia, nɛ e be nɔ po. Nɔ́ ko he hia we mi hu amlɔ nɛ ɔ nɛ ye nine su níhi nɛ nyɛɛ kɛ tsɔ Epafrodito ɔ nɔ ɔ, e ngɛ via jee liliili, e ji afɔle nɛ sa, nɛ́ Mawu bua jɔ he wawɛɛ. 19 Ye Mawu ɔ hu ma ha nyɛ nyɛ hiami níhi tsuo pɛpɛɛpɛ ngɛ e ní babauu ɔ nya ngɛ hɛ mi nyami mi kɛ gu Kristo Yesu nɔ. 20 Jehanɛ ɔ, a wo wa Mawu nɛ ji Tsɛ ɔ hɛ mi nyami kɛ ya neneene kɛ neneene. Amen.

21 Nyɛ de nɔ klɔuklɔu fɛɛ nɔ klɔuklɔu ngɛ Kristo Yesu mi ɔ ke i biɔ lɛ. Nyɛmimɛ nyumuhi nɛ a kɛ mi ngɛ hiɛ ɔ hu ke a biɔ nyɛ. 22 Ni klɔuklɔu ɔmɛ tsuo, titli ɔ, Kaisare we ɔ mi bimɛ ɔmɛ ke a biɔ nyɛ.

23 Nyɔmtsɛ Yesu Kristo dloomi ɔ kɛ mumi ɔ nɛ nyɛ jeɔ kpo ɔ nɛ hi si.