KEKLEEKLE WOMI KƐ YA HA TƐSALONIKA BI ƆMƐ

1 Paulo, Silvano,* kɛ Timoteo, kɛ ya ha Tɛsalonika bi asafo ɔ nɛ e kɛ Mawu nɛ ji Tsɛ ɔ kɛ Nyɔmtsɛ Yesu Kristo pee kake ɔ:

Nyɛ nine nɛ su dloomi kɛ tue mi jɔmi nɔ.

2 Ngɛ wa sɔlemihi a mi ɔ, wa naa Mawu si be fɛɛ be nɛ wa woɔ nyɛ tsuo nyɛ ta, 3 ejakaa wa kaiɔ nyɛ anɔkuale yemi ní tsumi ɔ, nyɛ suɔmi dengme gbomi ɔ, kɛ nyɛ si fimi ngɛ hɛ kɛ nɔ fɔmi nɛ nyɛ ngɛ ngɛ wa Nyɔmtsɛ Yesu Kristo mi ngɛ wa Mawu nɛ ji Tsɛ ɔ hɛ mi ɔ. 4 Ejakaa nyɛmimɛ nɛ Mawu suɔ nyɛ, wa le hlami nɛ e hla nyɛ ɔ, 5 ejakaa sane kpakpa a nɛ wa fiɛɛɔ ɔ bɛ nyɛ ngɔ ngɛ munyu tumi mi pɛ, se mohu ngɛ he wami kɛ mumi klɔuklɔu kɛ nɔ mi mami nɛ mi wa mi, kaa bɔ nɛ nyɛ le nimli tutuutu nɛ wa ba plɛ ngɛ nyɛ kpɛti ngɛ nyɛ he je ɔ. 6 Nɛ nyɛ ba pee nihi nɛ a kaseɔ waa kɛ Nyɔmtsɛ ɔ, ejakaa wa na kaa nyɛɛ kɛ mumi klɔuklɔu mi bua jɔmi ɔ kplɛɛ munyu ɔ nɔ ngɛ amanehlu babauu mi, 7 nɛ enɛ ɔ ha nɛ nyɛ ba pee nɔ hyɛmi nɔ́ kɛ ha nihi tsuo nɛ a he ye ngɛ Makedonia kɛ Akaya a.

8 Anɔkuale ɔ ji kaa, tsa pi kaa Yehowa* munyu ɔ pɛ kɛ je nyɛ ngɔ ngɛ Makedonia kɛ Akaya pɛ kɛkɛ, se mohu nyɛ hemi kɛ yemi ngɛ Mawu mi ɔ gbɛ fĩa he fɛɛ he, nɛ enɛ ɔ he ɔ, e he hia we nɛ wa de nɔ́ ko. 9 Ejakaa mɛ nitsɛmɛ a yaa nɔ nɛ a sɛɛɔ bɔ nɛ wa na nyɛ kekleekle ɔ, kɛ bɔ nɛ nyɛ kpale kɛ je nyɛ wɔ ɔmɛ a se kɛ ba Mawu ngɔ konɛ nyɛ ba ye nyɔguɛ kɛ ha anɔkuale Mawu nɛ e hɛ ngɛ ɔ, 10 nɛ́ nyɛɛ mlɛ e Bi ɔ nɛ e je hiɔwe ɔ, nɔ nɛ e tle lɛ si kɛ je gbeje nɛ ji Yesu, nɔ nɛ e kpɔ̃ wɔ kɛ je mi mi fumi nɛ ma a mi ɔ.

2 Nyɛmimɛ, nyɛ nitsɛmɛ nyɛ le kaa slaami nɛ wa ba slaa nyɛ ɔ pee we yaka. 2 Ejakaa e ngɛ mi kaa kaa bɔ nɛ nyɛ le ɔ, kekleekle ɔ, wa na nɔ́, nɛ a pee wɔ níhi nɛ sɛ ngɛ Filipi mohu lɛɛ, se wa pee kã kɛ gu wa Mawu ɔ nɔ, nɛ wa de nyɛ Mawu he sane kpakpa a ngɛ si nɛ a te kɛ wo wɔ wawɛɛ ɔ tsuo se.* 3 Ejakaa he wami womi nɛ waa kɛ haa a, pi tɔmi mi, aloo mu ní tsumi mi, aloo sisimi mi nɛ e jeɔ, 4 mohu ɔ, kaa bɔ nɛ Mawu bua jɔ wa he nɛ e tu sane kpakpa a kɛ wo wa dɛ ɔ, jã nɛ wa tuɔ munyu konɛ wa kɛ sa Mawu, nɔ nɛ e hyɛɔ wa tsui mi ɔ hɛ mi, se pi adesahi.

5 Ngɛ anɔkuale mi ɔ, nyɛ le kaa wa tu we nya mi ngɔngɔɛ munyu hyɛ, jã kɛ̃ nɛ waa kɛ hɛkɔ juɛmi pee we osato; Mawu ji odase! 6 Jã kɛ̃ nɛ wa hla we adesahi a hɛ mi nyami, wa hla we ngɛ nyɛ ngɔ aloo ni kpahi a ngɔ, e ngɛ mi kaa akɛnɛ Kristo bɔfohi ji wɔ he je ɔ, jinɛ wa ko nyɛ pee tlomi ha nyɛ nɛ nyɛ ko puɛ sika fuu ngɛ wa he. 7 Se wa pee wa he kpoo ngɛ nyɛ kpɛti kaa bɔ nɛ bimwɔyo nyɛ hɛɛɔ lɛ nitsɛ e bimɛ dɔdɔɔdɔ ɔ.* 8 Lɔ ɔ he ɔ, akɛnɛ wa suɔ nyɛ sane he je ɔ, wa fia wa pɛɛ si* kaa pi Mawu he sane kpakpa a pɛ nɛ waa kɛ ma ha nyɛ, se mohu wɔ nitsɛmɛ wa he* hulɔ, ejakaa nyɛ ba pee nihi nɛ wa suɔ mɛ saminya.

9 Nyɛmimɛ, ngɛ anɔkuale mi ɔ, nyɛ kai wa dengme kɛ wa pɔtɔ ɔ. Benɛ wa ngɛ Mawu he sane kpakpa a fiɛɛe kɛ ngɛ nyɛ tsɔɔe ɔ, wa tsuɔ ní nyɔ kɛ pia bɔ nɛ pee nɛ wa ko pee tlomi kɛ ha nyɛ nɛ nyɛ ba puɛ sika fuu ngɛ wa he. 10 Nyɛɛ kɛ Mawu tsuo ji wa we odasehi kaa wa ba wa je mi ngɛ nyɛ nihi nɛ nyɛ he ye ɔ nyɛ kpɛti kaa nihi nɛ a fĩ nyɛ se nɛ a da nɛ piami ko be a he. 11 Nyɛ le wawɛɛ kaa wa ya nɔ nɛ wa wo nyɛ he wami, nɛ wa wo nyɛ bua, nɛ wa ye nyɛ ti nɔ fɛɛ nɔ odase kaa bɔ nɛ tsɛ peeɔ kɛ haa e bimɛ ɔ, 12 konɛ nyɛɛ ya nɔ nɛ nyɛɛ nyɛɛ bɔ nɛ sa Mawu, nɔ nɛ e ngɛ nyɛ tsɛe kɛ ngɛ e Matsɛ Yemi ɔ kɛ e hɛ mi nyami ɔ mi bae ɔ.

13 Niinɛ, lɔ ɔ he je nɛ wɔ hu wa naa Mawu si daa a nɛ, ejakaa benɛ nyɛ nine su Mawu munyu ɔ nɛ nyɛ nu kɛ je wa ngɔ ɔ nɔ ɔ, nyɛ pɛtɛ he, pi kaa adesahi a munyu, se mohu kaa Mawu munyu, kaa bɔ nɛ e ji ngɛ anɔkuale mi ɔ, nɛ e ngɛ ní hu tsue ngɛ nyɛ nihi nɛ nyɛ he ye ɔ nyɛ mi. 14 Ejakaa, nyɛmimɛ, nyɛɛ pee nihi nɛ a kaseɔ Mawu asafo ɔmɛ nɛ a ngɛ Yudea nɛ a kɛ Kristo Yesu pee kake ɔ, ejakaa amanehluhi nɛ nyɛ na ngɛ nyɛ nitsɛmɛ nyɛ ma mi bi ɔmɛ a dɛ mi ɔ, lɔ ɔmɛ nɔuu nɛ mɛ hu a ngɛ nae ngɛ Yuda bi ɔmɛ a dɛ mi, 15 mɛ lɛ a gbe Nyɔmtsɛ Yesu po kɛ gbali ɔmɛ ɔ nɛ, nɛ a wa wɔ hu yi mi. Jehanɛ se hu ɔ, a sɛ Mawu hɛ mi, mohu ɔ, a teɔ si kɛ woɔ níhi nɛ a he ngɛ se nami kɛ ha adesahi tsuo, 16 be mi nɛ a bɔɔ mɔde kaa a maa tsi wa nya bɔ nɛ pee nɛ wa ko tu munyu kɛ tsɔɔ nihi nɛ a je je ma amɛ a mi ɔ konɛ a he a yi wami ɔ. Ngɛ blɔ nɛ ɔ nɔ ɔ, be fɛɛ be ɔ, a woɔ a yayami ɔmɛ nɛ a hyiɔ tɔ. Se nyagbenyagbe ɔ, e mi mi fumi ɔ ba a nɔ.

17 Se nyɛmimɛ, benɛ waa kɛ nyɛ wa mi gba* be kpiti ko ɔ (ngɛ he lo mi, se pi ngɛ wa tsui mi), akɛnɛ wa suɔ wawɛɛ he je ɔ, wa bɔ mɔde wawɛɛ kaa wa maa na nyɛ hɛ mi. 18 Enɛ ɔ he je ɔ, wa suɔ kaa wa maa ba nyɛ ngɔ, ee, imi Paulo, i bɔ mɔde, pi si kake, se si enyɔ sɔuu; se kɛ̃ ɔ, Satan po wɔ blɔ. 19 Ejakaa mɛni ji wa hɛ kɛ nɔ fɔmi aloo wa bua jɔmi aloo wa fĩami jlasi ngɛ wa Nyɔmtsɛ Yesu hɛ mi ngɛ e bami ɔ mi ɔ? Ngɛ anɔkuale mi ɔ, anɛ pi nyɛ lo? 20 Niinɛ, nyɛ ji wa hɛ mi nyami kɛ bua jɔmi.

3 Enɛ ɔ he ɔ, benɛ wa nyɛ we nɛ waa da nya hu ɔ, wa susu kaa e maa hi wawɛɛ kaa wɔ pɛ wa maa hi Atene; 2 nɛ wa tsɔ Timoteo, wa nyɛminyumu nɛ e ji Mawu sɔmɔlɔ* ngɛ sane kpakpa a nɛ kɔɔ Kristo he ɔ mi ɔ, konɛ e ba ha nɛ nyɛ he nɛ wa* nɛ e wo nyɛ bua ngɛ nyɛ hemi kɛ yemi ɔ he, 3 bɔ nɛ pee nɛ amanehlu nɛ ɔmɛ nɛ a ko ha nɛ nɔ ko nɛ e mimiɛɛ.* Ejakaa nyɛ nitsɛmɛ nyɛ le kaa wa be nyɛe maa tu nɔ́ nami kaa kikɛ nɛ ɔmɛ a nya fo.* 4 Ejakaa benɛ waa kɛ nyɛ ngɛ ɔ, wa de nyɛ ngɔ to kaa wa maa na amanehlu, nɛ kaa bɔ nɛ nyɛ le ɔ, lɔ ɔ lɛ ba mi ɔ nɛ. 5 Enɛ ɔ he je nɛ benɛ i nyɛ we nɛ ma da nya hu ɔ, i tsɔ konɛ ma le nyɛ we anɔkuale yemi ɔ, kaa alini Nɔ Kalɔ ɔ ba ka nyɛ nɛ wa dengme gbomi ɔ pee yaka lo.

6 Se piɔ pɛ nɛ Timoteo je nyɛ ngɔ nɛ e ba su wa ngɔ, nɛ e ba bɔ wɔ sane kpakpa a nɛ kɔɔ nyɛ we anɔkuale yemi ɔ kɛ suɔmi ɔ he ɔ he amaniɛ, kaa be fɛɛ be ɔ, nyɛ yaa nɔ nɛ nyɛɛ kɛ bua jɔmi kaiɔ wɔ, nɛ nyɛ hɛ ngɛ jae ngɛ wa he kaa bɔ nɛ e ji ngɛ wɔ hu wa blɔ fa mi ɔ. 7 Nyɛmimɛ, enɛ ɔ he je nɛ ngɛ wa fimi* kɛ wa we amanehlu ɔ tsuo mi ɔ, nyɛ nitsɛmɛ, kɛ anɔkuale yemi nɛ nyɛ je kpo ɔ ha nɛ wa ná bua womi ɔ nɛ. 8 Ejakaa ke nyɛ daa si kpɛii ngɛ Nyɔmtsɛ ɔ mi ɔ, wa náa he wami ehe.* 9 Ejakaa kɛ wa ma plɛ kɛ na Mawu si ngɛ nyɛ he, ngɛ bua jɔmi babauu nɛ wa náa ngɛ Mawu hɛ mi ngɛ nyɛ he ɔ he ha kɛɛ? 10 Nyɔnyɔɔnyɔ kɛ piapiaapia a, wa kpaa pɛɛ nɛ mi wa babauu kɛ wa tsui tsuo konɛ waa na nyɛ hɛ mi, nɛ nɔ́ nɛ piɛ nyɛ ngɛ nyɛ hemi kɛ yemi ɔ he ɔ, wa ha nyɛ.

11 Jehanɛ ɔ, wa Mawu nɛ ji Tsɛ ɔ nitsɛ kɛ wa Nyɔmtsɛ Yesu nɛ́ a fiaa blɔ mi tso ha wɔ konɛ waa ba nyɛ ngɔ. 12 Jehanɛ se hu ɔ, Nyɔmtsɛ ɔ nɛ e ha nɛ suɔmi nɛ nyɛ ngɛ kɛ ha nyɛ sibi kɛ nihi tsuo ɔ nɛ e hiɛ, ee, nɛ e be nɔ kaa bɔ nɛ wa peeɔ ha nyɛ ɔ, 13 konɛ e wo nyɛ tsui he wami, nɛ piami ko nɛ ko hi nyɛ he ngɛ klɔuklɔu peemi mi ngɛ wa Mawu nɛ ji Tsɛ ɔ hɛ mi, ngɛ wa Nyɔmtsɛ Yesu bami ɔ nɛ e ni klɔuklɔu ɔmɛ tsuo piɛɛ e he ɔ mi.

4 Nyagbe ɔ, nyɛmimɛ, kaa bɔ nɛ nyɛ nine su blɔ tsɔɔmi nɔ kɛ je wa ngɔ ngɛ bɔ nɛ e sa kaa nyɛɛ nyɛɛ ha konɛ nyɛɛ sa Mawu hɛ mi ɔ he ɔ, ngɛ anɔkuale mi ɔ, kaa bɔ nɛ nyɛ ngɛ nyɛɛe ɔ, wa ngɛ nyɛ bie, nɛ waa kɛ Nyɔmtsɛ Yesu ngɛ nyɛ pɛɛ kpae kaa nyɛɛ ya nɔ nɛ nyɛɛ pee kɛ pi si pe jã po. 2 Ejakaa nyɛ le blɔ tsɔɔmihi* nɛ wa ngɔ kɛ ha nyɛ kɛ gu Nyɔmtsɛ Yesu nɔ ɔ.

3 Ejakaa enɛ ɔ ji Mawu suɔmi nya ní, kaa e sa nɛ nyɛɛ pee nyɛ he klɔuklɔu nɛ nyɛɛ yu nyɛ he ngɛ ajuama bɔmi* he. 4 E sa nɛ nyɛ ti nɔ fɛɛ nɔ nɛ e le bɔ nɛ e ma kudɔ lɛ nitsɛ e nɔmlɔ tso* ɔ ha ngɛ klɔuklɔu peemi kɛ bumi mi, 5 pi kɛ hɛkɔ, kɛ bɔmi nami he akɔnɔ nɛ́ e nɔ hí yemi nɛ je ma amɛ nɛ a li Mawu ɔ ngɛ ɔ. 6 E sɛ nɛ nɔ ko nɛ e be huzuhi nɛ a sa amɛ a he, nɛ́ e sisi e nyɛmi ngɛ sane nɛ ɔ mi, ejakaa Yehowa* gblaa nihi a tue ngɛ ní nɛ ɔmɛ tsuo a he kaa bɔ nɛ wa de nyɛ be ko nɛ be ɔ, nɛ́ wa bɔ nyɛ kɔkɔ wawɛɛ hulɔ ɔ. 7 Ejakaa Mawu tsɛ wɔ, pi kɛ ha mu ní tsumi, se mohu kɛ ha klɔuklɔu peemi. 8 Lɛɛ enɛ ɔ he ɔ, adesa nɛ e bui nɔ́ nɛ ɔ, pi adesa nɛ e bui ɔ, se mohu Mawu, nɔ nɛ e haa nyɛ e mumi klɔuklɔu ɔ.

9 Se ngɛ nyɛmi suɔmi blɔ fa mi ɔ, e he hia we nɛ waa ngma nyɛ, ejakaa Mawu tsɔɔ nyɛ kaa nyɛɛ suɔ nyɛ sibi. 10 Ngɛ anɔkuale mi ɔ, nyɛ ngɛ jã pee kɛ ngɛ nyɛmimɛ ɔmɛ tsuo hae ngɛ Makedonia tsuo. Se nyɛmimɛ, wa ngɛ nyɛ he wami woe kaa nyɛɛ ya nɔ nɛ nyɛɛ pee babauu pe jã. 11 Oti nɛ e sa kaa nyɛ kɛ ma nyɛ hɛ mi ji kaa nyɛ maa hi si kpoo, nɛ nyɛ maa ye nyɛ nitsɛmɛ nyɛ kɔmɔ, nɛ nyɛɛ kɛ nyɛ ninehi ma tsu ní kaa bɔ nɛ wa tsɔɔ nyɛ ɔ, 12 konɛ nyɛɛ nyɛɛ ngɛ blɔ nɛ e he tsɔ nɔ ngɛ nihi nɛ a ngɛ se ɔmɛ a hɛ mi, nɛ́ nɔ́ ko nɔ́ ko nɛ ko hia nyɛ.

13 Jehanɛ se hu ɔ, nyɛmimɛ, wa sume nɛ nyɛɛ pee kaa nihi nɛ a li nɔ́ ko ngɛ ni nɛmɛ nɛ a nɔ gbenɔ mahe mi ɔmɛ a he, konɛ nyɛ ko ye kɔmɔ kaa bɔ nɛ ni kpa amɛ nɛ a be hɛ kɛ nɔ fɔmi ɔ peeɔ ɔ. 14 Ejakaa ke wa ngɛ hemi kɛ yemi kaa Yesu gbo nɛ e te si ekohu ɔ, lɛɛ jã kɛ̃ nɛ Mawu hu maa ngɔ nihi nɛ a nɔ gbenɔ mahe mi ngɛ Yesu mi ɔ kɛ piɛɛ e he kɛ ba. 15 Ejakaa enɛ ɔ ji nɔ́ nɛ wa deɔ nyɛ kɛ guɔ Yehowa* munyu ɔ nɔ ɔ nɛ, kaa wɔ nihi nɛ wa ngɛ wami mi nɛ wa be gboe kɛ yaa si Nyɔmtsɛ ɔ bami ɔ, wa be ni nɛmɛ nɛ a nɔ gbenɔ mahe mi ɔmɛ a hlami sɛe ngɛ blɔ ko blɔ ko nɔ; 16 ejakaa Nyɔmtsɛ ɔ nitsɛ ma kple si kɛ je hiɔwe nɛ e ma tsɛ kɛ gbi nɛ he wa, bɔfo nɔkɔtɔma gbi kɛ Mawu titimati ɔ, nɛ ni nɛmɛ nɛ a gbo ngɛ Kristo mi ɔ maa te si kekle. 17 Lɔ ɔ se ɔ, a ma sa wɔ nihi nɛ wa ngɛ wami mi nɛ wa gbo we ɔ kɛ piɛɛ a he kɛ ho ngɛ bɔku ɔmɛ a mi, nɛ waa kɛ Nyɔmtsɛ ɔ ma ya kpe ngɛ kɔɔhiɔ mi; kɛkɛ ɔ, waa kɛ Nyɔmtsɛ ɔ maa hi si daa. 18 Enɛ ɔ he ɔ, nyɛɛ ya nɔ nɛ nyɛɛ hi nyɛ sibi a bua woe kɛ munyu nɛ ɔmɛ.

5 Jehanɛ ɔ, nyɛmimɛ, ngɛ be ɔmɛ kɛ be nɛ a to ɔmɛ a he ɔ, e he hia we nɛ a ngma nyɛ nɔ́ ko. 2 Ejakaa nyɛ nitsɛmɛ nyɛ le saminya kaa Yehowa* ligbi ɔ ma kaa bɔ nɛ julɔ baa nyɔ mi ɔ pɛpɛɛpɛ. 3 Be mi nɛ a maa hi dee ke, “Tue mi jɔmi kɛ slɔkee si himi ba!” a, kɛkɛ si kake too ɔ, hɛ mi kpatami maa ba a nɔ tlukaa, kaa bɔ nɛ yohɔyo nuɔ kɔɔmi ɔ, nɛ a he be mi jee kɔkɔɔkɔ. 4 Se nyɛmimɛ, nyɛɛ lɛɛ nyɛ be diblii mi nɛ́ ligbi ɔ ma ba ti nyɛ si kaa e maa pee juli ɔ, 5 ejakaa la bimɛ kɛ piani bimɛ ji nyɛ tsuo. Pi nyɔ aloo diblii níhi ji wɔ.

6 Lɛɛ enɛ ɔ he ɔ, nyɛ ko ha nɛ waa hi mahe mi kaa ni kpa amɛ, mohu ɔ, nyɛ ha nɛ waa fɔ nyɔ nɛ wa hɛ nɛ hi wa he nɔ. 7 Ejakaa ni nɛmɛ nɛ a hwɔɔ mahe ɔ, nyɔ mi nɛ a hwɔɔ mahe, nɛ ni nɛmɛ nɛ a deɔ dã a, nyɔ mi nɛ a deɔ dã. 8 Se wɔ ni nɛmɛ nɛ piani níhi ji wɔ ɔ lɛɛ, nyɛ ha nɛ wa hɛ nɛ hi wa he nɔ nɛ waa wo suɔmi kɛ hemi kɛ yemi he gugue nɔ dama a, nɛ wa bu yi wami hemi he hɛ kɛ nɔ fɔmi ɔ kaa dade pɛɛ, 9 ejakaa pi mi mi fumi nɛ Mawu hla wɔ kɛ ha, se mohu e hla wɔ konɛ wa ná yi wami hemi kɛ gu wa Nyɔmtsɛ Yesu Kristo nɔ. 10 E gbo kɛ ha wɔ, konɛ wa hɛ ngɛ jio, wa hwɔ mahe* jio, waa kɛ lɛ tsuo nɛ hi si. 11 Enɛ ɔ he ɔ, nyɛɛ ya nɔ nɛ nyɛɛ hi nyɛ sibi he wami woe,* nɛ nyɛɛ hi nyɛ sibi fiae kɛ hi si mae, kaa bɔ nɛ ngɛ anɔkuale mi ɔ, nyɛ ngɛ pee ɔ.

12 Jehanɛ ɔ, nyɛmimɛ, wa ngɛ nyɛ pɛɛ kpae kaa nyɛɛ bu ni nɛmɛ nɛ a ngɛ ní tsue wawɛɛ ngɛ nyɛ kpɛti nɛ a ngɛ nyɛ nɔ hyɛe ngɛ Nyɔmtsɛ ɔ mi nɛ a ngɛ nyɛ ga woe ɔ; 13 nɛ nyɛɛ bu mɛ wawɛɛ nitsɛ ngɛ suɔmi mi ngɛ a ní tsumi ɔ he je. Nyɛɛ kɛ nyɛ sibi nɛ hi si ngɛ tue mi jɔmi mi. 14 Se nyɛmimɛ, wa ngɛ nyɛ he wami woe kaa nyɛɛ bɔ nihi nɛ a peeɔ a ní basabasa a kɔkɔ,* nyɛɛ tu bua womi munyu kɛ tsɔɔ ni nɛmɛ nɛ a hao* ɔ, nyɛɛ ye bua ni nɛmɛ nɛ a gbɔjɔ ɔ, nyɛɛ to nyɛ tsui si kɛ ha nihi tsuo. 15 Nyɛɛ hyɛ nɛ nɔ ko nɛ e ko plaa nɔ ko kɛ to plaami nane mi, se be fɛɛ be ɔ, nyɛɛ di nɔ́ kpakpa se ngɔ ha nyɛ sibi kɛ ni kpahi tsuo.

16 Be fɛɛ be ɔ, nyɛɛ hi nyae. 17 Nyɛɛ sɔle be fɛɛ be. 18 Nyɛɛ na si ngɛ nɔ́ fɛɛ nɔ́ he. Enɛ ɔ ji Mawu suɔmi nya ní kɛ ha nyɛ ngɛ Kristo Yesu mi. 19 Nyɛ ko gbe mumi ɔ la a. 20 Nyɛ ko gbe gbamihi a he guɛ. 21 Nyɛ ná níhi tsuo a nɔ mi mami; nyɛɛ pɛtɛ nɔ́ nɛ hi he wawɛɛ. 22 Nyɛɛ yu nyɛ he ngɛ yayami slɔɔtohi tsuo a he.

23 Tue mi jɔmi Mawu ɔ nitsɛ nɛ e ha nɛ nyɛ he nɛ tsɔ kɛ pi si. Nɛ nyɛmimɛ, a baa nyɛ mumi ɔ kɛ nyɛ susuma* kɛ nyɛ nɔmlɔ tso ɔ nɛ e hi kɛ pi si ngɛ blɔ fɛɛ blɔ nɔ ɔ yi, konɛ piami ko nɛ ko hi he ngɛ wa Nyɔmtsɛ Yesu Kristo bami ɔ mi. 24 Nɔ nɛ e ngɛ nyɛ tsɛe ɔ ji anɔkualetsɛ, nɛ e maa pee jã kokooko.

25 Nyɛmimɛ, nyɛɛ ya nɔ nɛ nyɛɛ hi sɔlee ha wɔ.

26 Nyɛ fɔ nyɛmimɛ ɔmɛ tsuo kɛ nya he fiɔmi nɛ ngɛ klɔuklɔu.

27 I kɛ blɔ nya ní tsumi nɛ hɛdɔ ngɛ he ngɛ nyɛ nɔ fɔe ngɛ Nyɔmtsɛ ɔ mi kaa nyɛ ha nɛ a kane sɛ womi nɛ ɔ kɛ ha nyɛmimɛ ɔmɛ tsuo.

28 Wa Nyɔmtsɛ Yesu Kristo dloomi ɔ kɛ nyɛ nɛ hi si.