WOMI ENYƆNE KƐ YA HA TƐSALONIKA BI ƆMƐ

1 Paulo, Silvano,* kɛ Timoteo, kɛ ya ha Tɛsalonika bi asafo ɔ nɛ e kɛ Mawu nɛ ji wa Tsɛ ɔ kɛ Nyɔmtsɛ Yesu Kristo pee kake ɔ:

2 Nyɛ nine nɛ su dloomi kɛ tue mi jɔmi nɛ je Mawu nɛ ji Tsɛ ɔ kɛ Nyɔmtsɛ Yesu Kristo ngɔ ɔ nɔ.

3 Nyɛmimɛ, e ji wa blɔ nya ní tsumi kaa be fɛɛ be ɔ, wa maa na Mawu si kɛ ha nyɛ. Enɛ ɔ sa saminya, ejakaa nyɛ hemi kɛ yemi ɔ ngɛ wae wawɛɛ nitsɛ, nɛ suɔmi nɛ nyɛ ti nɔ fɛɛ nɔ ngɛ kɛ ha e sibi ɔ ngɛ hiɛe. 4 Enɛ ɔ ha nɛ wɔ nitsɛmɛ wa fĩaa ngɛ nyɛ he ngɛ Mawu asafo ɔmɛ a kpɛti, ngɛ si nɛ nyɛ fĩ kɛ hemi kɛ yemi nɛ nyɛ je kpo ngɛ yi mi wamihi tsuo kɛ nɔ́ namihi* nɛ nyɛɛ kɛ ngɛ kpee ɔmɛ a mi* ɔ he je. 5 Enɛ ɔ ji Mawu dami kojomi ɔ nɔ mi mami nɛ ma ha nɛ a bu nyɛ kaa nihi nɛ a sa kɛ ha Mawu Matsɛ Yemi ɔ, nɛ́ ngɛ anɔkuale mi ɔ, nyɛ ngɛ nɔ́ nae ngɛ he ɔ nɛ.

6 Enɛ ɔ he ɔ, e da ngɛ Mawu blɔ fa mi kaa nihi nɛ a ngɔɔ amanehlu kɛ baa nyɛ nɔ ɔ, lɛ hu e kɛ amanehlu maa ba a nɔ kɛ to mɛ nane mi. 7 Se nyɛ nihi nɛ nyɛ ngɛ amanehlu nae ɔ, e ma ha nyɛ he mi jɔmi kɛ piɛɛ wa he ngɛ Nyɔmtsɛ Yesu kɛ e bɔfohi nɛ a ngɛ he wami ɔmɛ a kpo jemi kɛ maa je hiɔwe 8 ngɛ la nɛ ngɛ tsoe gegeege ɔ mi, be mi nɛ e kɛ nihi nɛ a li Mawu kɛ nihi nɛ a bui wa Nyɔmtsɛ Yesu Kristo sane kpakpa a tue ɔ maa to ní ɔ. 9 Nimli nɛ ɔmɛ ma ná kojomi tue gblami nɛ ji neneene hɛ mi kpatami kɛ je Nyɔmtsɛ ɔ hɛ mi, kɛ e hɛ mi nyami he wami ɔ mi, 10 be nɛ e maa ba konɛ a wo e kɛ e ni klɔuklɔu ɔmɛ a hɛ mi nyami ɔ, nɛ ngɛ jamɛ a ligbi ɔ nɔ ɔ, a maa na kaa e he ngɛ nyakpɛ ngɛ nihi tsuo nɛ a he ye ɔmɛ a kpɛti, ejakaa odase nɛ wa ye ɔ, nyɛɛ kɛ hemi kɛ yemi pɛtɛ he.

11 Enɛ ɔ he ɔ, wa sɔleɔ kɛ haa nyɛ be fɛɛ be, konɛ wa Mawu ɔ nɛ bu nyɛ kaa nihi nɛ a sa e tsɛmi ɔ, nɛ e ngɔ e he wami ɔ kɛ tsu ní kpakpahi tsuo nɛ saa e hɛ mi kɛ hemi kɛ yemi ní tsumi fɛɛ hemi kɛ yemi ní tsumi kɛ pi si. 12 Bɔ nɛ pee nɛ a wo wa Nyɔmtsɛ Yesu biɛ ɔ hɛ mi nyami ngɛ nyɛ mi, kɛ nyɛ hu ngɛ e mi, ngɛ wa Mawu ɔ kɛ Nyɔmtsɛ Yesu Kristo dloomi ɔ nya.

2 Se nyɛmimɛ, ngɛ wa Nyɔmtsɛ Yesu Kristo bami ɔ kɛ wa nya nɛ a ma bua kɛ ya e ngɔ ɔ he ɔ, wa ngɛ nyɛ pɛɛ kpae 2 kaa nyɛ ko ha nɛ munyu ko nɛ je mumi mi* aloo nya mi munyu ko, aloo sɛ womi ko nɛ e ngɛ kaa nɔ́ nɛ e je wa ngɔ ɔ nɛ e tsake nyɛ juɛmi amlɔ nɔuu, aloo e wo nyɛ he gbeye kaa Yehowa* ligbi ɔ ba.

3 Nyɛ ko ha nɛ nɔ ko nɔ ko nɛ e ha nɛ nyɛɛ tla blɔ* ngɛ blɔ ko blɔ ko nɔ, ejakaa e be bae kaa ja hemi kɛ yemi kuami ɔ ba kekle, nɛ a je nɔ nɛ e yi mlaa nɔ ɔ, nɛ ji hɛ mi kpatami bi ɔ kpo. 4 E teɔ si kɛ woɔ nɔ́ fɛɛ nɔ́ nɛ a tsɛɔ ke mawu aloo nɔ́ ko nɛ a jaa a,* nɛ e woɔ e he nɔ ngɛ e nɔ, konɛ e hi si ngɛ Mawu sɔlemi we ɔ, nɛ e ngɔ e he kɛ hi tsɔɔe kaa mawu ko ji lɛ. 5 Anɛ nyɛ kai we kaa benɛ i kɛ nyɛ ngɛ ɔ, i pɔɔ nyɛ ní nɛ ɔmɛ demi lo?

6 Nɛ amlɔ nɛ ɔ, nyɛ le nɔ́ nɛ ngɛ ní tsue kaa nya tsimi nɔ́ ɔ, bɔ nɛ pee nɛ a je lɛ kpo ngɛ lɛ nitsɛ e be nɛ sa mi. 7 Ngɛ anɔkuale mi ɔ, mlaa nɔ nɛ a yi nɛ ɔ he laami sane ɔ ngɛ ní tsue momo, se ja nɔ nɛ amlɔ nɛ ɔ, e ngɛ ní tsue kaa nya tsimi nɔ́ ɔ je blɔ mi kekle. 8 Lɔ ɔ se ɔ, ngɛ anɔkuale mi ɔ, a ma je nɔ nɛ e yi mlaa nɔ ɔ kpo, nɔ nɛ Nyɔmtsɛ Yesu maa ngɔ mumi ɔ nɛ ngɛ e nya mi ɔ kɛ gbe lɛ, nɛ́ e maa gu e bami ɔ he kpo jemi ɔ nɔ kɛ kpata e hɛ mi pɛsɛpɛsɛ ɔ. 9 Se nɔ nɛ e yi mlaa nɔ ɔ bami ɔ maa gu Satan ní tsumi, kɛ he wami ní tsumi fɛɛ he wami ní tsumi, kɛ lakpa okadihi, kɛ nyakpɛ níhi,* 10 kɛ nɔ́ nɛ dɛ fɛɛ nɔ́ nɛ dɛ nɛ a kɛ sisiɔ nɔ kɛ ha ni nɛmɛ nɛ a hɛ mi ngɛ kpatae ɔ kaa tue gblami nɔ́ ɔ nɔ kɛ ba, ejakaa a kplɛɛ we anɔkuale ɔ suɔmi ɔ nɔ konɛ a he a yi wami. 11 Enɛ ɔ he je ɔ, Mawu ha nɛ susumi nɛ dɛ sisi mɛ konɛ a ba he lakpa a nɛ a ye, 12 bɔ nɛ pee nɛ a kojo mɛ tsuo, ejakaa a he we anɔkuale ɔ yi, mohu ɔ, a bua ya jɔ nɔ́ nɛ dɛ he.

13 Se nyɛmimɛ nɛ Yehowa* suɔ, blɔ nya ní tsumi fɔɔ si ngɛ wa nɔ kaa waa na Mawu si be fɛɛ be ha nyɛ, ejakaa kɛ je sisije ɔ, Mawu hla nyɛ kɛ ha yi wami hemi nɛ e kɛ e mumi ɔ kɛ hemi kɛ yemi nɛ nyɛ ngɛ ngɛ anɔkuale ɔ mi ɔ ha nɛ nyɛ he tsɔ. 14 E tsɛ nyɛ kɛ ba enɛ ɔ he kɛ gu sane kpakpa a nɛ wa jaje ɔ nɔ, konɛ nyɛ ba ná wa Nyɔmtsɛ Yesu Kristo hɛ mi nyami ɔ. 15 Enɛ ɔ he ɔ, jehanɛ ɔ, nyɛmimɛ, nyɛɛ da si kpɛii nɛ nyɛɛ ya nɔ nɛ nyɛɛ pɛtɛ kusumihi nɛ a tsɔɔ nyɛ ɔmɛ a he, a tsɔɔ nyɛ kɛ gu nya mi munyu nɔ jio, kɛ gu sɛ womi ko nɛ je wa ngɔ nɔ jio. 16 Jehanɛ se hu ɔ, wa Nyɔmtsɛ Yesu Kristo nitsɛ kɛ Mawu nɛ ji wa Tsɛ ɔ, nɔ nɛ e suɔ wɔ nɛ e ha wɔ neneene bua womi kɛ hɛ kɛ nɔ fɔmi kpakpa kɛ gu dloomi nɔ ɔ 17 nɛ́ e to nyɛ tsui nɔ nine, nɛ́ e ha nɛ nyɛ he nɛ wa* ngɛ nɔ́ kpakpa peemi fɛɛ nɔ́ kpakpa peemi kɛ munyu tumi mi.

3 Nyagbe ɔ, nyɛmimɛ, nyɛɛ ya nɔ nɛ nyɛɛ sɔle ha wɔ konɛ Yehowa* munyu ɔ nɛ ya nɔ nɛ e gbɛ kɛ fĩa mlamlaamla nɛ a hi e hɛ mi nyami woe, kaa bɔ nɛ e ji ngɛ nyɛ blɔ fa mi ɔ, 2 konɛ a kpɔ̃ wɔ kɛ je awi yeli kɛ nimli yayamihi a dɛ mi, ejakaa pi nihi tsuo nɛ a ngɛ hemi kɛ yemi. 3 Se anɔkualetsɛ ji Nyɔmtsɛ ɔ nɛ, nɛ e maa wo nyɛ he wami, nɛ e maa po nyɛ he piɛ kɛ je nɔ yayami ɔ he. 4 Jehanɛ se hu ɔ, wa ngɛ nɔ mi mami ngɛ Nyɔmtsɛ ɔ mi ngɛ nyɛ he kaa nyɛ ngɔ wa blɔ tsɔɔmi ɔmɛ kɛ ngɛ ní tsue, nɛ nyɛ maa ya nɔ nɛ nyɛɛ kɛ ma tsu ní. 5 Nyɔmtsɛ ɔ nɛ e ya nɔ nɛ e kudɔ nyɛ tsui saminya kɛ ya Mawu suɔmi ɔ kɛ si fimi ngɛ Kristo he ɔ he.

6 Jehanɛ ɔ, nyɛmimɛ, waa kɛ blɔ tsɔɔmi ngɛ nyɛ hae ngɛ wa Nyɔmtsɛ Yesu Kristo biɛ ɔ mi, kaa nyɛ je nyɛ he kɛ je nyɛmi fɛɛ nyɛmi nɛ e ngɛ nyɛɛe basabasa nɛ e nyɛɛ we ngɛ kusumihi* nɛ nyɛ* nine su nɔ kɛ je wa ngɔ ɔmɛ a nya a he. 7 Ejakaa nyɛ nitsɛmɛ nyɛ le bɔ nɛ e sa kaa nyɛɛ kase wɔ ha, ejakaa wa bɛ wa je mi ngɛ blɔ basabasa nɔ ngɛ nyɛ kpɛti, 8 jã kɛ̃ nɛ wa yi nɔ ko nɔ ko niye ní yaka gu.* Se mohu waa kɛ dengme kɛ pɔtɔ tsuɔ ní nyɔ kɛ pia bɔ nɛ pee nɛ wa ko pee tloomi ha nyɛ ti nɔ ko nɛ́ e ba puɛ sika fuu ngɛ wa he. 9 Pi kaa wa be he blɔ, se mohu wa suɔ kaa wa maa ngɔ wa he kɛ ha kaa nɔ hyɛmi nɔ́ kɛ ha nyɛ konɛ nyɛɛ kase wɔ. 10 Ngɛ anɔkuale mi ɔ, benɛ waa kɛ nyɛ ngɛ ɔ, waa kɛ fami nɛ ɔ pɔɔ nyɛ hami: “Ke nɔ ko sume kaa e ma tsu ní ɔ, lɛɛ eko ye ní hulɔ.” 11 Ejakaa wa nu kaa ni komɛ ngɛ nyɛɛe basabasa ngɛ nyɛ kpɛti nɛ a tsu we ní kulaa, se mohu a kɛ a he ngɛ sanehi nɛ kɔ we a he mi woe. 12 Ngɛ jamɛatsɛmɛ ɔmɛ a he ɔ, waa kɛ fami kɛ ga womi nɛ ɔ ngɛ hae ngɛ Nyɔmtsɛ Yesu Kristo mi kaa a tsu ní kpoo, nɛ a ye niye ní nɛ mɛ nitsɛmɛ a tsu ní kɛ ná a.

13 Nyɛmimɛ, ngɛ nyɛ blɔ fa mi ɔ, nyɛ kɔni nɛ ko gbo ngɛ kpakpa peemi he. 14 Se ke nɔ ko bui wa munyu ɔ nɛ ngɛ sɛ womi nɛ ɔ mi ɔ tue ɔ, nyɛɛ to jamɛ a nɔ ɔ he so, nɛ nyɛɛ kɛ lɛ nɛ jɔɔ bɔmi, bɔ nɛ pee nɛ zo nɛ gbe lɛ. 15 Se kɛ̃ ɔ, nyɛ ko bu lɛ kaa he nyɛlɔ, mohu ɔ, nyɛɛ ya nɔ nɛ nyɛɛ hi lɛ ga woe kaa nyɛmi.

16 Jehanɛ ɔ, tue mi jɔmi Nyɔmtsɛ ɔ nitsɛ nɛ e ha nyɛ tue mi jɔmi be fɛɛ be ngɛ blɔ fɛɛ blɔ nɔ. Nyɔmtsɛ ɔ kɛ nyɛ tsuo nɛ hi si.

17 Imi Paulo nɛ́ i kɛ imi nitsɛ ye nine ngma sɛ womi nɛ ɔ ke i biɔ nyɛ, nɛ e ji okadi ngɛ sɛ womi fɛɛ sɛ womi mi; kikɛ nɛ ɔ ji bɔ nɛ i ngmaa ní.

18 Wa Nyɔmtsɛ Yesu Kristo dloomi ɔ kɛ nyɛ tsuo nɛ hi si.