WOMI ENYƆNE KƐ YA HA TIMOTEO

1 Paulo, Kristo Yesu bɔfo ngɛ Mawu suɔmi nya, ngɛ wami ɔ nɛ guɔ Kristo Yesu nɔ ɔ he si womi ɔ nya, 2 kɛ ya ha Timoteo, bi nɛ a suɔ ɔ:

O nine nɛ su dloomi, mɔbɔ nami, kɛ tue mi jɔmi nɛ je Mawu nɛ ji Tsɛ ɔ kɛ Kristo Yesu, wa Nyɔmtsɛ ɔ ngɔ ɔ nɔ.

3 I naa Mawu si, nɔ nɛ i ngɛ lɛ sɔmɔe ngɛ blɔ klɔuu nɔ kaa bɔ nɛ ye nɛmɛ ɔmɛ pee ɔ, kɛ he nile nɛ e he tsɔ, nɛ i jɔɔ we nyɛ kaimi ngɛ pɛɛhi nɛ a mi wa nɛ i kpaa nyɔ kɛ pia amɛ a mi. 4 Ke i kai o vo nyu ɔ, kɛkɛ ye hɛ ngɛ jae ngɛ o he nɛ i suɔ kaa ma na mo, konɛ ye bua nɛ jɔ. 5 Ejakaa i kaiɔ o hemi kɛ yemi nɛ osato be mi nɛ kekleekle ɔ, e hi o na Lɔis kɛ o yayo Yunis a mi ɔ, se i ngɛ nɔ mi mami kaa e ngɛ mo hu o mi.

6 Enɛ ɔ he je ɔ, i ngɛ mo kaie kaa o klɛ Mawu nike ní ɔ nɛ e ngɛ o mi kɛ gu ye ninehi nɛ i ngɔ kɛ pue o nɔ ɔ mi, kaa bɔ nɛ a klɛɔ la mi ɔ. 7 Ejakaa Mawu ha we wɔ gbeye yemi mumi, se mohu he wami mumi, suɔmi mumi, kɛ juɛmi nɛ mi tsɔ mumi. 8 Enɛ ɔ he ɔ, zo nɛ ko pee mo ngɛ wa Nyɔmtsɛ ɔ he odase yemi ɔ aloo imi nɛ i ji nɔ nɛ a wo lɛ tsu ngɛ e he ɔ he, se mohu moo na sane kpakpa a he amanehlu ɔ eko kɛ gu o he nɛ o kɛ maa fɔ Mawu he wami ɔ nɔ ɔ nɔ. 9 E he wa yi wami nɛ e tsɛ wɔ kɛ tsɛmi klɔuklɔu, pi ngɛ wa ní tsumihi a he je, se mohu ngɛ lɛ nitsɛ e yi mi tomi kɛ e dloomi ɔ he je. A ngɔ enɛ ɔ kɛ ha wɔ kɛ gu Kristo Yesu nɔ kɛ je blema lokoo, 10 se amlɔ nɛ ɔ, a ha nɛ e pee heii kɛ gu wa Yi Wami Helɔ ɔ, nɛ ji Kristo Yesu kpo jemi ɔ nɔ, nɔ nɛ e po gbenɔ se, nɛ e gu sane kpakpa a nɔ nɛ e ha nɛ la kpɛ ngɛ wami kɛ nɔ́ nɛ puɛ we nɔ ɔ, 11 sane kpakpa a he je nɛ a hla mi fiɛɛlɔ kɛ bɔfo kɛ tsɔɔlɔ ɔ nɛ.

12 Enɛ ɔ he je nɛ i ngɛ amanehlu nɛ ɔmɛ hu nae ɔ nɛ, se zo pee we mi. Ejakaa i le Nɔ nɛ i he lɛ ye ɔ, nɛ i ngɛ nɔ mi mami kaa e ma nyɛ maa bu nɔ́ nɛ i tu kɛ wo e dɛ ɔ he kɛ yaa si jamɛ a ligbi ɔ. 13 Yaa nɔ nɛ o hɛɛ munyu kpakpahi* nɛ o nu kɛ je ye ngɔ ɔ he nɔ hyɛmi nɔ́ ɔ, kɛ hemi kɛ yemi kɛ suɔmi nɛ jeɔ Kristo Yesu mi ɔ mi. 14 Moo gu mumi klɔuklɔu ɔ nɛ e ngɛ wa mi ɔ nɔ kɛ bu juetli kpakpa nɛ ɔ he.

15 O le kaa nihi tsuo nɛ a ngɛ Asia kpokpa a mi ɔ kpale ngɛ ye se, nɛ Fijelo kɛ Hɛmojines hu piɛɛ a he. 16 Nyɔmtsɛ ɔ nɛ e na Onesiforo we ɔ mi bimɛ ɔmɛ mɔbɔ, ejakaa e ba ha mi he jɔmi si abɔ, nɛ tsu kɛ kɔsɔkɔsɔhi nɛ a wo mi ɔ he zo pee we lɛ. 17 Se benɛ e ba Roma a, e ba hla mi saminya nɛ e na mi. 18 Nyɔmtsɛ ɔ nɛ e ha nɛ Yehowa* nɛ e na lɛ mɔbɔ ngɛ jamɛ a ligbi ɔ nɔ. Nɛ o le níhi tsuo nɛ e pee kɛ sɔmɔmi ngɛ Efeso ɔ saminya.

2 Enɛ ɔ he ɔ, ye bi, yaa nɔ nɛ o hi he wami náe ngɛ dloomi nɛ ngɛ Kristo Yesu mi ɔ mi; 2 nɛ níhi nɛ o nu kɛ je ye ngɔ nɛ odasefohi babauu fĩ se ɔ, tuu ní nɛ ɔmɛ ngɔ wo nyumuhi anɔkualetsɛmɛ a dɛ, kɛkɛ ɔ, mɛ hu a he maa su bɔ nɛ sa, nɛ a maa tsɔɔ ni kpahi. 3 Akɛnɛ o ji Kristo Yesu ta bulɔ kpakpa he je ɔ, mo hu moo na amanehlu. 4 Adesa ko be nɛ e ngɛ sɔmɔe kaa ta bulɔ nɛ e ngɔɔ e he kɛ woɔ jua yemi mi,* ejakaa e suɔ kaa e maa sa nɔ nɛ e ngɔ lɛ kaa ta bulɔ ɔ hɛ mi. 5 Nɛ ngɛ fiɛmihi a mi po ɔ, a ha we nɔ ko nɛ e siɔ koli ɔ kunimi yemi jlasi ɔ kaa ja e si koli ɔ ngɛ mlaa amɛ a nya. 6 Ngmɔ hulɔ nɛ e tsuɔ ní wawɛɛ ɔ, lɛ ji kekleekle nɔ nɛ e sa kaa e ye yiblii ɔ eko. 7 Susu nɔ́ nɛ i ngɛ mo dee ɔ he be fɛɛ be; Nyɔmtsɛ ɔ ma ha mo nɔ́ sisi numi* ngɛ níhi tsuo a mi.

8 Mo kai kaa a tle Yesu Kristo si kɛ je gbeje, nɛ e ji David nina,* ngɛ sane kpakpa a nɛ i fiɛɛɔ 9 nɛ́ lɔ ɔ he je i ngɛ nɔ́ nae nɛ a wo mi tsu kaa yayami peelɔ ɔ nya. Se kɛ̃ ɔ, Mawu munyu ɔ lɛɛ a wui lɛ tsu. 10 Enɛ ɔ he je ɔ, i yaa nɔ nɛ i fĩɔ si ngɛ níhi tsuo a mi ngɛ nihi nɛ a hla amɛ a he je, konɛ mɛ hu a nine nɛ su yi wami hemi nɛ guɔ Kristo Yesu nɔ kɛ baa a nɔ kɛ piɛɛ neneene hɛ mi nyami he. 11 Munyu nɛ ɔ ji anɔkuale: Ke niinɛ nɛ waa kɛ lɛ tsuo gbo ɔ, lɛɛ waa kɛ lɛ tsuo maa hi wami mi hulɔ; 12 ke wa yaa nɔ nɛ wa fĩɔ si ɔ, lɛɛ waa kɛ lɛ tsuo maa ye nɔ hulɔ kaa matsɛmɛ; ke wa kua a, lɛɛ lɛ hu e ma kua wɔ; 13 ke wa yi anɔkuale ɔ, lɛɛ lɛɛ e maa ya nɔ nɛ e maa ye anɔkuale, ejakaa e be nyɛe maa ye lakpa kɛ si lɛ nitsɛ e he.

14 Yaa nɔ nɛ o hi mɛ ní nɛ ɔmɛ kaie, hii mɛ ní tsɔɔe* ngɛ Mawu hɛ mi kaa a ko nɔ kunɔ ngɛ munyunguhi a he, e ji nɔ́ ko nɛ se nami be he kulaa, ejakaa e yeɔ ni nɛmɛ nɛ a ngɛ tue bue ɔ awi.* 15 Bɔɔ mɔde wawɛɛ nitsɛ konɛ o ngɔ o he kɛ ha kaa nɔ nɛ Mawu bua jɔ e he, ní tsulɔ nɛ nɔ́ ko be nɛ zo maa gbe lɛ ngɛ he, nɛ e hɛɛɔ anɔkuale munyu ɔ mi ngɛ blɔ nɛ da nɔ. 16 Se kua munyuhi nɛ se nami be he nɛ bleɔ nɔ́ nɛ ngɛ klɔuklɔu ɔ, ejakaa a ma ha nɛ buimi nɛ a bui Mawu ɔ maa hi nɔ yae wawɛɛ, 17 nɛ a munyu ɔ maa gbɛ kɛ fĩa kaa pa yaya. Himeneo kɛ Fileto piɛɛ a he. 18 Nyumu nɛ ɔmɛ gba kɛ je anɔkuale ɔ he, a ngɛ dee ke gbogboehi a si tlemi ɔ ba momo, nɛ a ngɛ ni komɛ a hemi kɛ yemi puɛe. 19 Ngɛ enɛ ɔ tsuo se ɔ, Mawu sisi tomi ɔ nɛ he wa a daa si loloolo, nɛ nya sɔumi nɔ́ nɛ ɔ ngɛ nɔ, “Yehowa* le nihi nɛ a ji e nihi,” kɛ, “Ha nɔ fɛɛ nɔ nɛ e tsɛɔ Yehowa* biɛ ɔ nɛ e kua nɔ́ nɛ e dɛ peemi.”

20 Jehanɛ ɔ, ngɛ we ngua mi ɔ, pi níhi* nɛ a kɛ sika tsu kɛ sika hiɔ pee pɛ nɛ ngɛ mi, mohu ɔ, tso níhi kɛ zu níhi hu ngɛ mi, nɛ a kɛ ekomɛ tsuɔ níhi nɛ a hɛ mi ngɛ nyami, se ekomɛ lɛɛ, a kɛ tsuɔ níhi nɛ a hɛ mi be nyami. 21 Enɛ ɔ he ɔ, ke nɔ ko yu e he ngɛ sekpɛ ní ɔmɛ a he ɔ, e maa pee nɔ́* nɛ a kɛ tsuɔ nɔ́ nɛ hɛ mi ngɛ nyami, nɛ́ a tsu he, nɛ́ e he ngɛ se nami kɛ ha e nyɔmtsɛ ɔ, nɛ́ a dla lɛ kɛ ha ní tsumi kpakpa fɛɛ ní tsumi kpakpa. 22 Lɔ ɔ he ɔ, tuu nihewi* a we akɔnɔhi a nya fo, se moo di dami, hemi kɛ yemi, suɔmi, tue mi jɔmi se kɛ piɛɛ nihi nɛ a tsɛɔ Nyɔmtsɛ ɔ kɛ tsui nɛ mi tsɔ ɔ, a he.

23 Jehanɛ se hu ɔ, kua kuasiahi kɛ nihi nɛ a li nɔ́ ko ɔ, a we atsinyɛ jemi ɔmɛ, ejakaa o le kaa a ngɔɔ kunɔ kɛ baa. 24 Ejakaa e he hia we nɛ Nyɔmtsɛ ɔ nyɔguɛ ko nɛ nɔ kunɔ, mohu ɔ, e he hia nɛ e kɛ nihi tsuo nɛ a hi si kpoo,* e he nɛ su nɛ e nyɛ nɛ e tsɔɔ ní, nɔ nɛ ke a tɔ̃ e nɔ ɔ, e nyɛɔ nɛ e yeɔ e he nɔ, 25 e kɛ he jɔmi nɛ hi nihi nɛ a be su kpakpa a ní tsɔɔe. Eko ɔ, Mawu ma ha nɛ a tsake a tsui* konɛ a ná anɔkuale ɔ he nile nitsɛnitsɛ, 26 nɛ́ a hɛ nɛ ba a he nɔ nɛ a je Abosiami klama a mi, ejakaa e nu mɛ hɛ ngmengmle konɛ a pee e suɔmi nya ní.

3 Se ná nɛ o le enɛ ɔ, kaa ngɛ nyagbe ligbi ɔmɛ a mi ɔ, behi nɛ a mi wa nɛ a nya dami maa ye maa ba. 2 Ejakaa adesahi maa pee nihi nɛ a suɔ mɛ nitsɛmɛ a he, sika suɔli, fĩali, he nɔ woli, musu bɔli, nihi nɛ a bui a fɔli, nihi nɛ a li sina, nihi nɛ a jeɔ nɔ se, 3 nihi nɛ a nui nɔ́ he hí nɔ, nihi nɛ a hí kɛ somi ko somi, nɔ he guɛ gbeli, nihi nɛ a be he nɔ yemi, nihi nɛ a hɛ mi jɔɛ, nihi nɛ a sume nɔ́ kpakpa, 4 nɔ se blɔ tsɔɔli, nihi nɛ a peeɔ a tsui nya ní, pupuupu peeli, nihi nɛ a suɔ níhi nɛ haa nɔ bua jɔmi pe bɔ nɛ a suɔ Mawu, 5 a naa mɛ kaa Mawu jali, se a kua e mi he wami ɔ; nɛ ni nɛ ɔmɛ ɔ, je o he kɛ je a he. 6 Nimli nɛ ɔmɛ a kpɛti nɛ nyumuhi nɛ a guɔ blɔ nigii nɔ kɛ sɛɔ wehi a mi nɛ a ya sisiɔ yihi nɛ a gbɔjɔ, nɛ́ yayamihi pee tlomi ngɛ a nɔ nɛ e ngɛ mɛ gbee, nɛ́ akɔnɔ slɔɔtohi ngɛ mɛ kudɔe ɔ teɔ si ngɛ, 7 be fɛɛ be ɔ, a ngɛ ní kasee, se kɛ̃ ɔ, a nyɛ we nɛ a ná anɔkuale ɔ he nile nitsɛnitsɛ.

8 Jehanɛ ɔ, kaa bɔ nɛ Yane kɛ Yambre te si kɛ wo Mose ɔ, jã nɔuu kɛ̃ nɛ ni nɛ ɔmɛ hu yaa nɔ nɛ a teɔ si kɛ woɔ anɔkuale ɔ. Kikɛmɛ a nimli nɛ ɔmɛ a juɛmi puɛ kulaa, nɛ se nami ko be a he ngɛ hemi kɛ yemi ɔ blɔ fa mi. 9 Se kɛ̃ ɔ, a be a hɛ mi yae hu, ejakaa nihi tsuo maa na a biɛɛmi* ɔ heii, kaa bɔ nɛ e ba ngɛ jamɛ a nyumu enyɔ ɔmɛ a blɔ fa mi ɔ. 10 Se moo lɛɛ o nyɛɛ ní nɛ ɔmɛ a se haa: ye tsɔɔmi ɔ, ye je mi bami ɔ, ye yi mi tomi ɔ, ye hemi kɛ yemi ɔ, ye tsui si tomi ɔ, ye suɔmi ɔ, ye si fimi ɔ, 11 yi mi nɛ a wa mi kɛ amanehluhi nɛ i na a, kaa ní nɛmɛ nɛ i na ngɛ Antiokia, ngɛ Ikoniom, ngɛ Listra a. I fĩ si ngɛ yi mi wami nɛ ɔmɛ a mi, nɛ Nyɔmtsɛ ɔ je mi kɛ je mɛ tsuo a mi. 12 Ngɛ anɔkuale mi ɔ, nihi tsuo nɛ a suɔ wawɛɛ kaa a maa hi si ngɛ Mawu gbeye yemi nya ngɛ Kristo Yesu mi ɔ, mɛ hu a maa wa mɛ yi mi. 13 Se nimli yayamihi kɛ nɔ sisili maa hi a hɛ mi yae ngɛ yayami peemi mi wawɛɛ, nɛ a maa hi nihi sisie nɛ nihi hu maa hi mɛ sisie.

14 Se moo lɛɛ, níhi nɛ o kase nɛ a plɛ o yi mi nɛ o he ye ɔ, yaa nɔ ngɛ a mi, ejakaa o le nihi nɛ o kase jamɛ a ní ɔmɛ ngɛ a ngɔ ɔ, 15 nɛ kɛ je o bimwɔyo mi tɔɔ nɛ o le ngmami klɔuklɔu ɔmɛ, níhi nɛ ma nyɛ ma ha nɛ o pee juɛmitsɛ konɛ a he o yi wami kɛ gu hemi kɛ yemi ngɛ Kristo Yesu mi ɔ nɔ ɔ. 16 Ngmami ɔ tsuo je Mawu mumi mi nɛ se nami ngɛ he kɛ ha ní tsɔɔmi, kɛ ha hɛ mi kami, kɛ ha níhi a dlami tlɔmɔɔ, kɛ ha tsɔsemi ngɛ dami mi, 17 bɔ nɛ pee nɛ Mawu nɔmlɔ ɔ he nɛ su saminya, nɛ a dla lɛ kɛ pi si kɛ ha ní tsumi kpakpa fɛɛ ní tsumi kpakpa.

4 I kɛ hɛdɔ ngɛ mo fãe ngɛ Mawu hɛ mi, kɛ Kristo Yesu, nɔ nɛ e maa kojo hɛ kali kɛ ni gbogboe ɔmɛ hu hɛ mi, nɛ i kɛ e kpo jemi ɔ kɛ e Matsɛ Yemi ɔ hu ngɛ mo fae ke: 2 Fiɛɛ munyu ɔ; hii fiɛɛe kɛ hɛdɔ ngɛ be kpakpahi kɛ behi nɛ a mi wa a mi; kã hɛ mi, o kɛ nihi nɛ tu munyu kɛ hɛdɔ, wo ga ngɛ tsui si tomi nitsɛnitsɛ mi kɛ ní tsɔɔmi he ga lemi. 3 Ejakaa be ko maa su nɛ a be tsɔɔmi kpakpa a* tue bue, mohu ɔ, a ma bua tsɔɔli a nya kɛ bɔle mɛ nitsɛmɛ a he ngɛ mɛ nitsɛmɛ a we akɔnɔhi a nya, konɛ a ta a tue mi kɛ ha mɛ.* 4 A be anɔkuale ɔ tue bue hu nɛ a ma ya bu nyaziahi mohu tue. 5 Se moo lɛɛ, o hɛ nɛ hi o he nɔ ngɛ níhi tsuo a mi, fĩ si ngɛ haomihi a mi, tsu sane kpakpa fiɛɛlɔ ní tsumi ɔ,* nɛ o tsu o sɔmɔmi ní tsumi ɔ kɛ pi si.

6 Ejakaa a ngɛ mi plɛe kɛ ngɛ si puee momo po kaa dã afɔle, nɛ be nɛ a maa ngmɛɛ ye he ɔ su ta. 7 I hwu ta kpakpa a, i tu fo ɔ kɛ gbe nya, i nyɛɛ ngɛ hemi kɛ yemi ɔ nya. 8 Kɛ je be nɛ ɔ mi kɛ yaa a, a ngɔ dami he kunimi yemi jlasi ɔ kɛ to ha mi, nɔ́ nɛ Nyɔmtsɛ ɔ, nɛ ji kojolɔ nɛ e da a kɛ ma ha mi kaa ye hiɔwo ngɛ jamɛ a ligbi ɔ nɔ ɔ, se kɛ̃ ɔ, pi imi pɛ nɛ e ma ha, mohu ɔ, e ma ha nihi tsuo nɛ a suɔ e kpo jemi ɔ.

9 Bɔɔ mɔde wawɛɛ nitsɛ nɛ o ba ye ngɔ ngɛ be kpiti mi. 10 Ejakaa Dema kua mi akɛnɛ e suɔ níhi a blɔ nya tomi* nɛ ɔ he je, nɛ e je kɛ ho Tɛsalonika ya, Kreske hu ho Galatia ya, nɛ Tito hu ho Dalmatia ya. 11 Luka pɛ nɛ e ngɛ ye ngɔ. Ngɔɔ Maako kɛ piɛɛ o he kɛ ba, ejakaa e yeɔ bua mi ngɛ sɔmɔmi ɔ mi. 12 Se i tsɔ Tikiko kɛ ho Efeso ya. 13 Ke o ma a, ngɔɔ tade klɔii ɔ nɛ i je he ngɛ Kapo ngɔ ngɛ Troya a, kɛ womi kpo ɔmɛ kɛ ba, titli ɔ, ní nɛmɛ nɛ a ngɔ lohwe he womi kɛ pee ɔ.*

14 Alɛksanda nɛ ji akɔblee sɔ̃lɔ ɔ ye mi awi wawɛɛ. Yehowa* maa to lɛ nane mi ngɛ e ní peepee ɔmɛ a nya. 15 Mo hu e sa nɛ o hyɛ o he nɛ hi ngɛ e he, ejakaa e te si kɛ wo wa sɛ gbi ɔ kɛ be nɔ wawɛɛ nitsɛ.

16 Ngɛ ye kekleekle nya jemi ɔ mi ɔ, nɔ ko nɔ ko ba fĩ we ye se, mohu ɔ, mɛ tsuo a kua mi—a kɛ mɛ nɛ ko ye ngɛ lɔ ɔ he. 17 Se Nyɔmtsɛ ɔ ba da si ngɛ ye kasa nya nɛ e wo mi he wami, konɛ fiɛɛmi ɔ nɛ pi si kɛ gu ye nɔ, bɔ nɛ pee nɛ je ma amɛ tsuo nɛ a nu; nɛ a kpɔ̃ mi kɛ je jata a nya mi. 18 Nyɔmtsɛ ɔ ma kpɔ̃ mi kɛ je ní tsumi yayami fɛɛ ní tsumi yayami mi, nɛ e ma he ye yi wami kɛ ha e hiɔwe Matsɛ Yemi ɔ. Á wo e hɛ mi nyami kɛ ya neneene kɛ neneene. Amen.

19 Mo de Priska kɛ Akuila kɛ Onesiforo we ɔ mi bimɛ ɔmɛ ke i biɔ mɛ.

20 Erasto tlɔ Korinto, se i je Trofimo he ngɛ Mileto, ejakaa e be he wami. 21 Bɔɔ mɔde wawɛɛ nitsɛ nɛ o ba su loko ahlabata be ɔ nɛ su.

Yubulo ke e biɔ mo, nɛ jã kɛ̃ nɛ Pude kɛ Lino kɛ Klɔɔdia kɛ nyɛmimɛ ɔmɛ tsuo hu ke a biɔ mo.

22 Nyɔmtsɛ ɔ kɛ mumi ɔ nɛ o jeɔ kpo ɔ nɛ hi si. E dloomi ɔ kɛ mo nɛ hi si.