YAKOBO SƐ WOMI Ɔ

1 Yakobo, Mawu kɛ Nyɔmtsɛ Yesu Kristo a tsɔlɔ ɔ, kɛ ya ha wɛtso 12 ɔmɛ nɛ a gbɛ fĩa a:

I biɔ nyɛ!

2 Ye nyɛmimɛ, ke nyɛɛ kɛ ka slɔɔtohi ngɛ kpee ɔ, nyɛɛ na lɛ kaa bua jɔmi sɔuu, 3 ejakaa nyɛ le kaa nyɛ hemi kɛ yemi nɛ a ka nɛ a hyɛ nɛ ɔ ngɔɔ si fimi kɛ baa. 4 Se nyɛ ha nɛ si fimi nɛ gbe e ní tsumi ɔ nya, konɛ nyɛɛ hi kɛ pi si, nɛ nyɛ he nɛ su ngɛ blɔ fɛɛ blɔ nɔ, nɛ nɔ́ ko nɔ́ ko nɛ ko hia nyɛ.

5 Lɔ ɔ he ɔ, ke nyɛ ti nɔ ko hia juɛmi ɔ, ha nɛ e ya nɔ nɛ e hi Mawu bie, ejakaa e haa nihi tsuo nɔ́ faa nɛ́ hɛ mi kami be mi,* nɛ e maa ngɔ kɛ ha lɛ. 6 Se ha nɛ e ya nɔ nɛ e hi bie ngɛ hemi kɛ yemi mi, e yi mi nɛ ko pee lɛ enyɔɔnyɔ kulaa, ejakaa nɔ nɛ e yi mi peeɔ lɛ enyɔɔnyɔ ɔ ngɛ kaa wo oslɔke nɛ kɔɔhiɔ fiaa lɛ kɛ yaa kɛ baa. 7 Ngɛ anɔkuale mi ɔ, e sɛ nɛ jamɛ a nɔ ɔ nɛ e hyɛ blɔ kaa e nine maa su nɔ́ ko nɔ kɛ je Yehowa* ngɔ; 8 e ji yi mi enyɔɔnyɔtsɛ, e mimiɛɛɔ ngɛ e blɔhi tsuo a nɔ.

9 Se ha nyɛmi nɛ e be nɔ́ ko ɔ nɛ e nya* ngɛ e nɔ nɛ a wo ɔ he je, 10 nɛ niatsɛ ɔ hu nɛ e nya ngɛ e hɛ mi si puemi ɔ he je, ejakaa e ma gbo kaa nga nɔ mɔmɔ. 11 Ejakaa kaa bɔ nɛ pu jeɔ nɛ pu la a nglaa tso, nɛ e mɔmɔ wɔleɔ kɛ pueɔ si, nɛ e he fɛu ɔ laa a, jã kɛ̃ nɛ niatsɛ ɔ hu ma gbo ngɛ e níhi a se dimi ɔ mi.

12 Nɔ nɛ e yaa nɔ nɛ e hii si fĩe ngɛ ka mi ɔ ngɛ bua jɔmi, ejakaa ke Mawu bua ba jɔ e he ɔ, e nine maa su wami jlasi ɔ nɛ Yehowa* wo si kaa e ma ha nihi nɛ a maa ya nɔ ma je suɔmi kpo kɛ ha lɛ ɔ nɔ. 13 Ke nɔ ko kɛ ka ngɛ kpee ɔ, e ko de ke: “Mawu ngɛ mi kae.” Ejakaa nɔ ko be nyɛe maa ngɔ ní yayamihi kɛ ka Mawu, nɛ jã kɛ̃ nɛ lɛ nitsɛ hu e kɛ nɔ ko. 14 Se nɔ fɛɛ nɔ ɔ, lɛ nitsɛ e we akɔnɔ nɛ e hii lɛ gblae nɛ e hii lɛ sisie ɔ* nɛ e kaa lɛ. 15 Kɛkɛ ɔ, ke akɔnɔ ɔ ngɔ hɔ ɔ, e fɔɔ yayami; nɛ yayami ɔ hu ke a pee ɔ, e fɔɔ gbenɔ.

16 Ye nyɛmimɛ nɛ i suɔ, nyɛ ko ha nɛ a sisi nyɛ. 17 Nike ní kpakpa fɛɛ nike ní kpakpa, kɛ nike ní nɛ hi kɛ pi si fɛɛ nike ní nɛ hi kɛ pi si ɔ jeɔ hiɔwe, e kpleɔ si kɛ jeɔ hiɔwe kane ɔmɛ a Tsɛ ɔ ngɔ, nɔ nɛ e tsakee we nɛ e plɛ we hulɔ kaa bɔ nɛ nini peeɔ ɔ. 18 E suɔmi nya ní ji kaa e maa gu anɔkuale munyu ɔ nɔ kɛ fɔ wɔ, konɛ wa ba pee e nibɔ ní ɔmɛ a kpɛti kekle yiblii ko.

19 Ye nyɛmimɛ nɛ i suɔ, nyɛɛ le nɔ́ nɛ ɔ: Nɔ fɛɛ nɔ he nɛ e sɔ kɛ bu munyu tue, e he nɛ e ko sɔ kɛ tu munyu, e mi mi nɛ ko fu mla, 20 ejakaa adesa mi mi fumi ɔ ngɔɛ Mawu dami kɛ bɛ. 21 Enɛ ɔ he ɔ, nyɛ je mu níhi tsuo kɛ nɔ́ yayami fɛɛ nɔ́ yayami* kɛ fɔ he, nɛ nyɛɛ kɛ he jɔmi nɛ kplɛɛ munyu ɔ nɛ ma nyɛ ma he nyɛ* yi wami nɛ a du kɛ wo nyɛ mi ɔ nɔ.

22 Se nyɛ ba pee munyu ɔ nɔ yeli, se pi e nuli pɛ kɛkɛ, nɛ nyɛ ko ngɔ lakpa susumi kɛ hi nyɛ he sisie. 23 Ejakaa ke nɔ ko ji munyu ɔ nulɔ se pi e nɔ yelɔ ɔ, nɔ nɛ ɔ ngɛ kaa nɔ ko nɛ e ngɛ lɛ nitsɛ e hɛ mi hyɛe ngɛ ahuhuɛ ko mi. 24 Ejakaa e naa e he, nɛ e jeɔ kɛ yaa, nɛ oya nɔuu ɔ, e hɛ jeɔ nɔmlɔ tutuutu nɛ e ji ɔ nɔ. 25 Se nɔ nɛ e hyɛɛ mlaa nɛ hi kɛ pi si nɛ haa nɛ nɔ yeɔ e he ɔ mi fitsofitso, nɛ e yaa nɔ ngɛ mi ɔ ba pee we nɔ nɛ e nuɔ nɛ e hɛ jeɔ nɔ, mohu ɔ, e peeɔ ní tsumi ɔ tsulɔ; nɛ e bua maa jɔ ngɛ níhi nɛ e peeɔ ɔ mi.

26 Ke nɔ ko susuɔ kaa Mawu jalɔ ji lɛ, se e wui e lilɛ kpa wawɛɛ ɔ, e ngɛ lɛ nitsɛ e tsui sisie, nɛ e jami ɔ peeɔ yaka gu. 27 Jami nɛ he tsɔ, nɛ mu ko be he ngɛ wa Mawu nɛ ji Tsɛ ɔ hɛ mi ji nɛ ɔ nɛ: kaa nɔ ko maa hyɛ awusahi kɛ yalɔyihi* a nɔ ngɛ a we amanehluhi a mi, kɛ jehanɛ se hu nɛ́ nɔ ko maa hyɛ nɛ je ɔ nɛ ko wo e he mu.

2 Ye nyɛmimɛ, anɛ nyɛ hɛɛ wa Nyɔmtsɛ Yesu Kristo nɛ e hɛ mi ngɛ nyami ɔ he hemi kɛ yemi ɔ mi nɛ jamɛ a be ɔ mi nɔuu ɔ, nyɛ ngɛ nihi a mi hlae lo? 2 Ejakaa ke nyumu ko nɛ e wo sika tsu nguɛ gahi kɛ tade nɛ ngɛ fɛu saminya ba nyɛ kpe ɔ, se ohiatsɛ ko kɛ e he tade nɛ sɛ mu hu ba sɛ mi ɔ, 3 anɛ nyɛ bua jɔɔ nɔ nɛ e wo tade nɛ ngɛ fɛu saminya a he nɛ nyɛ deɔ ke, “Mo ba hi si ngɛ he kpakpa nɛ ɔ,” nɛ nyɛ deɔ ohiatsɛ ɔ ke, “Moo lɛɛ yaa nɔ nɛ o da si,” aloo “Yaa hi si ngɛ sɛ nɛ ba si pe nɔ́ nɛ i kɛ ye nane maa nɔ ɔ nɔ” lo? 4 Ke jã a, anɛ pi nɛ nyɛ ngɛ nihi a mi hlae ngɛ nyɛ kpɛti lo, nɛ pi nɛ nyɛ ba pee kojoli nɛ a ngɛ yi mi kpɔ yayami mwɔe lo?

5 Ye nyɛmimɛ nɛ i suɔ, nyɛɛ bu tue. Anɛ pi nihi nɛ je ɔ buu mɛ kaa a ji ohiatsɛmɛ ɔ nɛ Mawu hla mɛ konɛ a ba pee niatsɛmɛ ngɛ hemi kɛ yemi mi, kɛ Matsɛ Yemi ɔ nɛ e wo ni nɛmɛ nɛ a suɔ lɛ ɔ he si ɔ he gbosi ní yeli lo? 6 Se nyɛ pue ohiatsɛmɛ ɔmɛ a hɛ mi si. Anɛ pi niatsɛmɛ ɔmɛ nɛ a waa nyɛ yi mi nɛ a gblaa nyɛ kɛ yaa kojomi hehi ɔ lo? 7 Tse a bɔɔ musu kɛ siɔ biɛ kpakpa a nɛ a kɛ tsɛɔ nyɛ ɔ, aloo pi jã? 8 Ke amlɔ nɛ ɔ, nyɛ yeɔ odehe mlaa a* nɛ ngɛ ngmami ɔ mi nɛ ji, “E sa nɛ o suɔ o nyɛmi kaa bɔ nɛ o suɔ o he ɔ” nɔ ɔ, lɛɛ nyɛ ngɛ mɔde bɔe saminya. 9 Se ke nyɛ ya nɔ nɛ nyɛ ngɛ nihi a mi hlae ɔ, nyɛ ngɛ yayami pee, nɛ mlaa a buɔ nyɛ fɔ* kaa nyɛ ji mlaa nɔ tɔli.

10 Ejakaa ke nɔ ko yeɔ Mlaa a tsuo nɔ, se e tɔ̃ɔ kake nɔ ɔ, lɛɛ e ba peeɔ lɛ tsuo nɔ tɔlɔ. 11 Ejakaa nɔ nɛ e de ke, “E sɛ nɛ o puɛ gba” a, lɛ nɔuu nɛ e de ke, “E sɛ nɛ o gbe nɔmlɔ” ɔ nɛ. Enɛ ɔ he ɔ, ke o puɛ gba se o gbi nɔmlɔ ɔ, o ba plɛ mlaa nɔ tɔlɔ. 12 Nyɛɛ ya nɔ nɛ nyɛɛ hi munyu tue nɛ nyɛɛ hi nyɛ je mi bae kaa nihi nɛ a maa ngɔ he yeli a mlaa* a kɛ kojo mɛ. 13 Ejakaa nɔ nɛ e nɛ nɔ mɔbɔ ɔ, a maa kojo lɛ nɛ a be lɛ mɔbɔ nae. Mɔbɔ nami yeɔ kojomi nɔ kunimi.

14 Ye nyɛmimɛ, ke nɔ ko deɔ ke e ngɛ hemi kɛ yemi se e be ní tsumihi ɔ, mɛni se nami lɛ ngɛ he? Tse jamɛ a hemi kɛ yemi ɔ be nyɛe ma he e yi wami, aloo e ma nyɛ? 15 Ke nyɛmimɛ nyumu komɛ loo nyɛmimɛ yi komɛ be heha ní* nɛ a be niye ní nɛ maa su mɛ ngɛ ligbi ɔ mi, 16 se kɛ̃ ɔ, nyɛ ti nɔ ko de mɛ ke, nyɛɛ ya ngɛ tue mi jɔmi mi, nyɛ he nɛ dɔ la nɛ nyɛɛ tɔ saminya, se o ha we mɛ nɔ́ nɛ he hia mɛ kɛ ha a nɔmlɔ tso ɔ, mɛni se nami lɛ ngɛ he? 17 Jã nɔuu kɛ̃ nɛ hemi kɛ yemi hu ngɛ, ke ní tsumihi piɛɛ we he ɔ, e gbo.

18 Se kɛ̃ ɔ, nɔ ko ma de ke: “O ngɛ hemi kɛ yemi, nɛ imi lɛɛ i ngɛ ní tsumihi. Tsɔɔ mi o hemi kɛ yemi ɔ nɛ ní tsumihi piɛɛ we he ɔ, nɛ imi hu i kɛ ye ní tsumihi maa tsɔɔ mo ye hemi kɛ yemi ɔ.” 19 Tse nyɛ he ye kaa Mawu kake lɛ ngɛ, aloo pi jã? Nyɛ ngɛ mɔde bɔe saminya. Se kɛ̃ ɔ, daimonio ɔmɛ hu heɔ yeɔ, nɛ a he doɔ blibliibli. 20 Se Oo mo nyumu nɛ o be juɛmi, anɛ o suɔ kaa o maa le kaa se nami ko be hemi kɛ yemi nɛ ní tsumihi piɛɛ we he ɔ he lo? 21 Anɛ pi ní tsumihi a nɔ nɛ a gu kɛ bu wa tsɛ Abraham dalɔ benɛ e ngɔ e bi Isak kɛ ha ngɛ afɔle sami la tɛ ɔ nɔ ɔ se ɔ lo? 22 Nyɛ na kaa e hemi kɛ yemi ɔ ngɛ hɛ ngmengmle kɛ piɛɛ e ní tsumi ɔmɛ a he, nɛ kɛ gu e ní tsumi ɔmɛ a nɔ ɔ, e hemi kɛ yemi ɔ ye mluku, 23 nɛ ngmami ɔ nɛ e de ke: “Abraham ná hemi kɛ yemi ngɛ Yehowa* mi, nɛ a bu lɔ ɔ dami ha lɛ” ɔ ba mi, nɛ a tsɛ lɛ Yehowa* huɛ.

24 Nyɛ na kaa a buɔ adesa ko dalɔ kɛ guɔ ní tsumihi a nɔ, se pi kɛ gu hemi kɛ yemi pɛ nɔ. 25 Ngɛ jamɛ a blɔ ɔ nɔuu nɔ ɔ, anɛ pi ní tsumihi a nɔ nɛ a da kɛ bu Rahab yaholɔ* ɔ dalɔ benɛ e he tsɔli ɔmɛ atuu nɛ e pee mɛ nibwɔ, nɛ e wo mɛ blɔ kɛ gu blɔ kpa nɔ kɛ ho ɔ se ɔ lo? 26 Niinɛ, kaa bɔ nɛ nɔmlɔ tso nɛ mumi be mi* ɔ gbo ɔ, jã nɔuu kɛ̃ nɛ hemi kɛ yemi nɛ ní tsumi piɛɛ we he ɔ hu gbo.

3 Ye nyɛmimɛ, e sɛ nɛ nyɛ ti nihi fuu nɛ a ba pee tsɔɔli, akɛnɛ nyɛ le kaa wa ma ná kojomi nɛ mi wa a he je. 2 Ejakaa wɔ tsuo wa tɛɔ si* si abɔ. Ke nɔ ko nya tɛ we si ɔ, e ji adesa nɛ e ye mluku, nɛ e nyɛɔ nɛ e woɔ e nɔmlɔ tso ɔ tsuo kpa hulɔ. 3 Ke wa wo okpɔngɔhi a nya mi kpahi konɛ a bu wɔ tue ɔ, wa kudɔɔ a nɔmlɔ tso ɔ tsuo hulɔ. 4 Hyɛ melehi hulɔ: E ngɛ mi kaa a kle wawɛɛ nɛ kɔɔhiɔ nɛ nya wa lɛ tsitsɛɛɔ mɛ mohu lɛɛ, se kudɔɔ nyafii pɛ lɛ kudɔɔtsɛ ɔ kɛ kudɔɔ mɛ kɛ yaa he fɛɛ he nɛ e suɔ.

5 Jã nɔuu kɛ̃ nɛ lilɛ ɔ hu ji nɔ́ nyafii ko ngɛ nɔmlɔ tso ɔ he, se kɛ̃ ɔ, e fĩaa fĩami nguanguahi. Hyɛ kaa la nyafii pɛ lɛ sãa huetso ngua! 6 Lilɛ ɔ ji la hulɔ. Lilɛ ɔ daa si kɛ ha je ko nɛ dɛ ngɛ wa nɔmlɔ tso ɔ he ní ɔmɛ a kpɛti, ejakaa e bleɔ nɔmlɔ tso ɔ tsuo nɛ e sãa je mi si himi ɔ* tsuo, nɛ Gehena* lɛ mɛɛ he la. 7 Ejakaa e sa kaa a jɔɔ lohwe awi yelɔ fɛɛ lohwe awi yelɔ kɛ lohwe pɛlitsɛ kɛ akɔtɔku kɛ sinɔ a henɔhi* kɛ wo mi lohwehi a he, nɛ adesahi jɔɔ lohwe nɛ ɔmɛ a he. 8 Se adesa ko be nyɛe maa jɔɔ lilɛ ɔ he. E he hí jɔɔmi, nɛ e yeɔ awi nɛ gbenɔ duɔ hyi lɛ tɔ. 9 Lɔ ɔ nɛ waa kɛ jeɔ Yehowa* nɛ ji Tsɛ ɔ yi, se kɛ̃ ɔ, waa kɛ gbiɛɔ adesahi nɛ a bɔ mɛ “kaa bɔ nɛ Mawu ngɛ” ɔ. 10 Jamɛ a nya kake ɔ nɔuu mi nɛ jɔɔmi kɛ gbiɛmi jeɔ.

Ye nyɛmimɛ, e dɛ blɔ kaa níhi maa ya nɔ kikɛ nɛ ɔ. 11 Tse nyu mua* kɛ nyu nɛ doo tsa su we kɛ ji nyu hɛ ngmɛ kake mi, aloo a suɔ? 12 Ye nyɛmimɛ, tse fig tso be nyɛe maa wo oliv loo wai yiblii, aloo e ma nyɛ? Jã nɔuu kɛ̃ nɛ ngo nyu hu be nyɛe maa pee nyu mua.

13 Mɛnɔ ji juɛmitsɛ kɛ nɔ́ sisi nulɔ ngɛ nyɛ kpɛti? Ha nɛ e gu e je mi bami kpakpa a nɔ kɛ je ní tsumihi nɛ a kɛ he jɔmi nɛ jeɔ juɛmi mi kɛ ba a tsuɔ ɔ kpo. 14 Se ke hunga jemi nɛ nya wa kɛ pɛ* ngɛ o tsui mi ɔ, lɛɛ koo hi fĩae nɛ o hi lakpa yee kɛ hi anɔkuale ɔ sie. 15 Pi juɛmi ɔ nɛ jeɔ hiɔwe kɛ baa a ji nɛ ɔ; e ji zugba a nɔ nɔ́, lohwehi a nɔ́, kɛ daimoniohi a nɔ́. 16 Ejakaa he fɛɛ he nɛ hunga jemi kɛ pɛ* ngɛ ɔ, lejɛ ɔ nɛ basabasa peemi kɛ nɔ́ yayami fɛɛ nɔ́ yayami hu maa hi.

17 Se juɛmi ɔ nɛ je hiɔwe ɔ, kekleekle ɔ, e he tsɔ, lɔ ɔ se ɔ, e suɔ tue mi jɔmi, e nuɔ nɔ́ sisi, e pee klaalo kaa e maa bu tue, e hyi tɔ kɛ mɔbɔ nami kɛ yiblii kpakpahi, e hlɛ nɔ mi, e pee we osato. 18 Jehanɛ se hu ɔ, dami yiblii ɔ, tue mi jɔmi si himihi a mi nɛ a duɔ ngɛ kɛ haa nihi nɛ a kɛ tue mi jɔmi baa a.*

4 Jije ta amɛ kɛ kunɔ ɔmɛ nɛ ngɛ nyɛ kpɛti ɔ jeɔ kɛ baa? Anɛ pi nyɛ he lo ɔ we akɔnɔ ɔmɛ nɛ a kɛ nyɛ hii ta hwue ngɛ nyɛ mi ɔ* mi nɛ a jeɔ kɛ baa lo? 2 E jloɔ nyɛ, se kɛ̃ ɔ, nyɛ ná we. Nyɛ yaa nɔ nɛ nyɛ hii nimli gbee, nɛ nyɛ hɛ hii kɔe, se kɛ̃ ɔ, nyɛ nine nyɛ we nɛ e su nɔ. Nyɛ yaa nɔ nɛ nyɛ hii kunɔ nɔe nɛ nyɛ hii ta hwue. Nyɛ ná we akɛnɛ nyɛ bi we ɔ he je. 3 Ke nyɛ bi hu ɔ, nyɛ nine sui nɔ, ejakaa nyɛ ngɛ bie ngɛ yi mi tomi yayami ko he je, konɛ nyɛ kɛ ya tsu nyɛ he lo ɔ we akɔnɔ ɔmɛ a nya ní.

4 Gba puɛli,* anɛ nyɛ li kaa je ɔ kɛ huɛ bɔmi ɔ peeɔ nɔ Mawu he nyɛlɔ lo? Enɛ ɔ he ɔ, nɔ fɛɛ nɔ nɛ e suɔ kaa e maa pee je ɔ huɛ ɔ, e ngɛ e he Mawu he nyɛlɔ pee. 5 Aloo anɛ nyɛ susu kaa yaka gu nɛ ngmami ɔ deɔ ke: “Mumi ɔ nɛ ba to si ngɛ wa mi ɔ yaa nɔ nɛ e kɛ hɛkɔ jloɔ ní” ɔ lo? 6 Se dloomi ɔ nɛ Mawu ngɔɔ kɛ haa a kle pe lɔ ɔ. Enɛ ɔ he ɔ, ngmami ɔ deɔ ke: “Mawu teɔ si kɛ woɔ he nɔ woli, se he si bali lɛɛ, e dlooɔ mɛ.”

7 Enɛ ɔ he ɔ, nyɛɛ ngɔ nyɛ he kɛ wo Mawu sisi; se nyɛɛ te si kɛ wo Abosiami, nɛ e maa tu fo kɛ je nyɛ he. 8 Nyɛɛ hɛ nyɛ kɛ su Mawu he, nɛ e maa hɛ lɛ kɛ su nyɛ he. Nyɛ fɔ nyɛ dɛ, nyɛ yayami peeli, nɛ nyɛ ha nɛ nyɛ tsui mi nɛ tsɔ, nyɛ yi mi enyɔɔnyɔtsɛmɛ. 9 Nyɛɛ hao nɛ nyɛɛ ye kɔmɔ nɛ nyɛ fo ya. Nyɛ ha nɛ nyɛ muɔmi ɔ nɛ plɛ pee kɔmɔ yemi, nɛ nyɛ nyami ɔ nɛ plɛ pee tsui yemi. 10 Nyɛɛ ba nyɛ he si ngɛ Yehowa* hɛ mi, nɛ e ma wo nyɛ nɔ.

11 Nyɛmimɛ, nyɛ kpa munyu nɛ nyɛ hii tue kɛ hii nyɛ sibi sie ɔ. Nɔ fɛɛ nɔ nɛ e tuɔ munyu kɛ siɔ nyɛmi ko aloo e kojoɔ e nyɛmi ɔ, e tuɔ munyu kɛ siɔ mlaa, nɛ e kojoɔ mlaa. Ke amlɔ nɛ ɔ, o kojoɔ mlaa a, lɛɛ pi mlaa nɔ yelɔ ji mo, se mohu ɔ, kojolɔ. 12 Mlaa Wolɔ kɛ Kojolɔ kake pɛ lɛ ngɛ, nɔ nɛ lɛ nɛ e nyɛɔ heɔ nɔ yi wami nɛ e nyɛɔ kpataa nɔ hɛ mi hulɔ ɔ. Se moo lɛɛ, mɛnɔ ji mo nɛ o maa hi o nyɛmi kojoe?

13 Amlɔ nɛ ɔ, nyɛɛ ba, nyɛ nɛ nyɛ deɔ ke: “Mwɔnɛ ɔ aloo hwɔɔ ɔ, wa maa hia blɔ kɛ maa ya ma nɛ ɔ nɔ, nɛ wa ma ya ye jeha ngɛ lejɛ ɔ, nɛ wa maa ye jua, nɛ wa ma ná se” ɔ, 14 pohu nyɛ li bɔ nɛ nyɛ si himi ma ji ha hwɔɔ. Ejakaa nyɛ ji afua nɛ e woɔ be bɔɔ ko, kɛkɛ lɔ ɔ se ɔ, e laa. 15 Mohu ɔ, e sa nɛ nyɛ de ke: “Ke Yehowa* suɔ ɔ, wa maa hi wami mi nɛ wa maa pee enɛ ɔ aloo enɛ ɔ.” 16 Se amlɔ nɛ ɔ, nyɛ siɔ nyɛ gugue ngɛ nyɛ he nɔ nɛ nyɛ woɔ kɛ fĩaa a mi. Jamɛ a fĩami ɔmɛ tsuo ji yayami. 17 Enɛ ɔ he ɔ, ke nɔ ko le bɔ nɛ a peeɔ nɔ́ nɛ da ha, se kɛ̃ ɔ, e pee we ɔ, e ji yayami kɛ ha lɛ.

5 Amlɔ nɛ ɔ, nyɛ niatsɛmɛ, nyɛɛ ba, nyɛ fo ya nɛ nyɛɛ ye kɔmɔ ngɛ haomihi nɛ ma nyɛ nɔ ɔ he je. 2 Ní babauu nɛ nyɛ ná a sa, nɛ wɔyewɔye ye nyɛ heha ní ɔmɛ. 3 Nyɛ sika tsu kɛ sika hiɔ ɔmɛ nɔ kana, nɛ kana nɛ a nɔ ɔ maa ye odase kɛ si nyɛ, nɛ e maa ye nyɛ he lo ɔ. Níhi nɛ nyɛ ngɔ kɛ to ɔ maa pee kaa la ngɛ nyagbe ligbi ɔmɛ a mi. 4 Hyɛ! Ni tsuli nɛ a kpa ní ngɛ nyɛ ngmɔ ɔmɛ a mi nɛ nyɛ wui mɛ hiɔ ɔ, a hiɔwo ɔ ngɛ ya foe, nɛ Yehowa* tabohiatsɛ ɔ nu ya nɛ ní kpali ɔmɛ ngɛ foe kaa a ye bua mɛ ɔ. 5 Nyɛ hi si ngɛ ní nami kpɔtɔɔ kɛ ngɔɔmi yemi mi ngɛ zugba a nɔ. Nyɛ ha nɛ nyɛ tsui wo zɔ ngɛ hɛ mi kpatami ligbi ɔ nɔ. 6 Nyɛ bu fɔ; nyɛ gbe dalɔ ɔ. Anɛ pi nɛ e ngɛ si tee kɛ ngɛ nyɛ woe lo?

7 Enɛ ɔ he ɔ, nyɛmimɛ, nyɛɛ to nyɛ tsui si kɛ ya si Nyɔmtsɛ ɔ bami ɔ. Hyɛ! Ngmɔ hulɔ ɔ yaa nɔ nɛ e mlɛɔ zugba a yiblii nɛ e hi saminya a, nɛ e toɔ e tsui si ngɛ he kɛ ya siɔ be nɛ kekleekle hiɔmi kɛ sekpɛ hiɔmi ɔ nɛɔ. 8 Nyɛ hu nyɛɛ to nyɛ tsui si; nyɛɛ wo nyɛ tsui he wami, ejakaa Nyɔmtsɛ ɔ bami ɔ su si ta.

9 Nyɛmimɛ, nyɛ ko tu munyu huitihuiti* kɛ si nyɛ sibi, konɛ a ko ba kojo nyɛ. Hyɛ! Kojolɔ ɔ daa si ngɛ sinya amɛ a nya. 10 Nyɛmimɛ, nyɛ ha nɛ gbali ɔmɛ nɛ a tu munyu ngɛ Yehowa* biɛ ɔ mi ɔ, a nɔ́ nami ɔ kɛ a tsui si tomi ɔ nɛ pee nɔ́ hyɛmi nɔ́ kɛ ha nyɛ. 11 Hyɛ! Wa buɔ ni nɛmɛ nɛ a fĩ si ɔ kaa a ngɛ bua jɔmi.* Nyɛ nu Hiob si fimi ɔ he, nɛ nyɛ na nɔ́ nɛ Yehowa* pee kɛ ha lɛ ɔ, kaa Yehowa* mi mi hi* wawɛɛ nɛ e ji mɔbɔ nalɔ.

12 Nɔ́ nɛ pe kulaa a, ye nyɛmimɛ, nyɛ kpa kita kami, nyɛ ko kã hiɔwe aloo zugba aloo kita kpa ko. Mohu ɔ, nyɛ ha nɛ nyɛ “Ee” ɔ, nɛ pee ee, nɛ nyɛ “Dɛbi” ɔ, nɛ pee dɛbi, konɛ a ko ba kojo nyɛ.

13 Anɛ nyɛ ti nɔ ko ngɛ nɔ́ náe lo? Ha nɛ e hɛɛ sɔlemi mi. Anɛ nɔ ko bua jɔ e he lo? Ha nɛ e la lahi. 14 Anɛ nyɛ ti nɔ ko be he wami lo? Ha nɛ e tsɛ asafo ɔ mi nikɔtɔma amɛ kɛ ba e ngɔ, nɛ a sɔle kɛ pue e nɔ, nɛ a pɔ lɛ nu ngɛ Yehowa* biɛ ɔ mi. 15 Nɛ hemi kɛ yemi sɔlemi ɔ ma ha nɛ hiɔtsɛ ɔ* nɛ e ná he wami, nɛ Yehowa* ma tle lɛ si. Jehanɛ se hu ɔ, ke e pee yayamihi ɔ, a maa ngɔ kɛ pa lɛ.

16 Lɔ ɔ he ɔ, nyɛɛ jaje nyɛ he yayami ɔmɛ heii kɛ tsɔɔ nyɛ sibi nɛ nyɛɛ sɔle kɛ ha nyɛ sibi konɛ a tsa nyɛ. Dalɔ pɛɛ kpami nɛ mi wa a tsuɔ ní wawɛɛ.* 17 Eliya ji adesa nɛ e ngɛ he numihi kaa wɔ nɔuu, se kɛ̃ ɔ, benɛ e kɛ hɛdɔ sɔle kaa hiɔmi nɛ ko nɛ ɔ, hiɔmi nɛ́ kɛ pue we zugba a nɔ jeha etɛ kɛ nyɔhiɔ ekpa sɔuu. 18 Lɔ ɔ se ɔ, e kpale sɔle, nɛ hiɔmi nɛ kɛ je hiɔwe nɛ zugba a ba ní.

19 Ye nyɛmimɛ, ke a ha nɛ nyɛ ti nɔ ko tla blɔ kɛ je anɔkuale ɔ he nɛ nɔ kpa kpale lɛ kɛ ba a, 20 nyɛ ná nɛ nyɛɛ le kaa nɔ fɛɛ nɔ nɛ e kpaleɔ yayami peelɔ ko kɛ jeɔ e blɔ yayami ɔ nɔ kɛ baa a, e ma he e* yi wami kɛ je gbenɔ mi, nɛ e maa ha yayamihi babauu nɔ.