PETRO KEKLEEKLE WOMI Ɔ

1 Petro, Yesu Kristo bɔfo, kɛ ya ha ma se bi nɛ a gbɛ fĩa Ponto, Galatia, Kapadokia, Asia, kɛ Bitinia a, kɛ ya ha nihi nɛ a hla mɛ 2 ngɛ níhi nɛ Mawu nɛ ji Tsɛ ɔ sɛɔ hlami leɔ ɔ nya, nɛ a kɛ mumi ɔ tsu a he, kɛ yi mi tomi ɔ kaa a bu tue, nɛ a ngɔ Yesu Kristo muɔ ɔ kɛ fĩa a nɔ ɔ:

Dloomi kɛ tue mi jɔmi nɛ hiɛ kɛ ha nyɛ.

3 A je Mawu nɛ ji wa Nyɔmtsɛ Yesu Kristo Tsɛ ɔ yi, ejakaa ngɛ e mɔbɔ nami babauu ɔ nya a, e ha nɛ a fɔ wɔ ehe kɛ ha hɛ kɛ nɔ fɔmi nɛ ngɛ hɛ ngmengmle kɛ gu si nɛ e tle Yesu Kristo kɛ je gbeje ɔ nɔ, 4 kɛ ha gbosi ní ko nɛ e puɛ we nɛ mu be he nɛ e kpa we ɔ. A ngɔ kɛ to ngɛ hiɔwe kɛ ha nyɛ, 5 nyɛ nihi nɛ a kɛ Mawu he wami ɔ ngɛ nyɛ he bue kɛ gu hemi kɛ yemi nɔ, kɛ ha yi wami hemi ko nɛ a pee klaalo nɛ a ma je kpo ngɛ nyagbe be ɔ mi ɔ. 6 Enɛ ɔ he ɔ, nyɛ ngɛ nyae wawɛɛ nitsɛ, e ngɛ mi kaa e sa nɛ ka slɔɔtohi nɛ ha nɛ nyɛɛ hao be kpiti ko mohu, 7 konɛ nyɛ hemi kɛ yemi ɔ nɛ a ka nɛ a hyɛ, nɛ́ e he jua wa pe sika tsu nɛ hɛ mi kpataa ngɛ la nɛ a kɛ ka nɛ a hyɛ* ɔ tsuo se ɔ nɛ e pee yi jemi kɛ hɛ mi nyami kɛ bumi kɛ ha nyɛ ngɛ Kristo Yesu kpo jemi ɔ mi. 8 E ngɛ mi kaa nyɛ nɛ lɛ hyɛ mohu lɛɛ, se nyɛ suɔ lɛ. E ngɛ mi kaa nyɛ nɛ lɛ amlɔ nɛ ɔ, se kɛ̃ ɔ, nyɛ heɔ lɛ yeɔ, nɛ nyɛ ngɛ nyae wawɛɛ kɛ bua jɔmi nɛ hí kalemi nɛ hɛ mi ngɛ nyami, 9 be mi nɛ nyɛ suu nyɛ hemi kɛ yemi ɔ he oti ɔ nɛ ji nyɛ yi wami hemi ɔ he ɔ.*

10 Ngɛ yi wami hemi nɛ ɔ he ɔ, gbali ɔmɛ nɛ a gba kɛ kɔ dloomi nɛ a maa dloo nyɛ ɔ he ɔ bi níhi a mi saminya, nɛ a hla níhi a mi fitsofitso. 11 A ya nɔ nɛ a hla be tutuutu aloo be nɛ mumi nɛ ngɛ a mi ɔ ngɛ tsɔɔe kɛ kɔ Kristo ɔ he, be mi nɛ mumi ɔ sɛ hlami nɛ e ye amanehluhi nɛ Kristo maa na, kɛ hɛ mi nyami nɛ maa nyɛɛ se kɛ ba a he odase ɔ. 12 A je kpo ngɔ tsɔɔ mɛ kaa pi mɛ nitsɛmɛ a he nɛ a ngɛ sɔmɔe, se nyɛ mohu nɛ a ngɛ sɔmɔe ngɛ nɔ́ nɛ amlɔ nɛ ɔ, a gu ni nɛmɛ nɛ a jaje sane kpakpa a kɛ tsɔɔ nyɛ ngɛ mumi klɔuklɔu nɛ a tsɔ kɛ je hiɔwe ɔ he wami nya a nɔ kɛ fia he adafi kɛ tsɔɔ nyɛ ɔ he je. Hiɔwe bɔfohi suɔ wawɛɛ kaa a maa le kikɛmɛ a ní nɛ ɔmɛ a mi fitsofitso.

13 Lɔ ɔ he ɔ, nyɛɛ pee nyɛ juɛmi klaalo kɛ ha ní tsumi; nyɛ hɛ nɛ hi nyɛ he nɔ saminya; nyɛɛ ngɔ nyɛ hɛ kɛ nɔ fɔmi ɔ kɛ ma dloomi nɛ a maa dloo nyɛ ngɛ Yesu Kristo kpo jemi ɔ mi ɔ nɔ. 14 Akɛnɛ nyɛ ji bimɛ nɛ a buɔ tue he je ɔ, nyɛ ha nɛ akɔnɔhi nɛ nyɛ ná be ko nɛ be benɛ nyɛ li nɔ́ ko ɔ nɛ kpa nyɛ kudɔmi,* 15 se kaa bɔ nɛ Nɔ Klɔuklɔu ɔ nɛ e tsɛ nyɛ ɔ ngɛ ɔ, nyɛɛ pee nihi nɛ a ngɛ klɔuklɔu ngɛ je mi bami tsuo mi, 16 ejakaa a ngma ke: “E sa nɛ nyɛɛ pee klɔuklɔu, ejakaa i ngɛ klɔuklɔu.”

17 Nɛ ke nyɛ ngɛ Tsɛ ɔ, nɔ nɛ e kojoɔ nɔ fɛɛ nɔ ngɛ e ní tsumihi a he nɛ e hlɛ nɔ mi ɔ tsɛe ɔ, lɛɛ nyɛɛ kɛ gbeye yemi nɛ ba nyɛ je mi ngɛ be nɛ nyɛɛ kɛ hiɔ si kaa ma se bi ɔ mi. 18 Ejakaa nyɛ le kaa pi níhi nɛ a puɛɔ, kɛ sika hiɔ aloo sika tsu nɛ a kɛ ha nɛ nyɛ ye nyɛ he* kɛ je nyɛ yaka si himi blɔ nɛ nyɛ nɛmɛ ɔmɛ ngɔ* kɛ ha nyɛ ɔ he. 19 Mohu ɔ, a kɛ muɔ nɛ he jua wa, nɛ ngɛ kaa jijɔ bi nɛ kpa ko kɛ mu ko be e he ɔ muɔ, nɛ ji Kristo nɔ́ ɔ lɛ pee jã. 20 Ngɛ anɔkuale mi ɔ, a sɛ hlami nɛ a le lɛ loko a to je ɔ sisi, se a je lɛ kpo heii ngɛ be ɔmɛ a nyagbe ɔ mi ngɛ nyɛ he je. 21 Kɛ gu e nɔ ɔ, nyɛ ba plɛ nihi nɛ a he ye ngɛ Mawu, nɔ nɛ e tle lɛ si kɛ je gbeje nɛ e wo e hɛ mi nyami ɔ mi, konɛ nyɛ hemi kɛ yemi ɔ kɛ nyɛ hɛ kɛ nɔ fɔmi ɔ nɛ hi Mawu mi.

22 Amlɔ nɛ ɔ nɛ nyɛ tsu nyɛ he* kɛ gu anɔkuale ɔ tue nɛ nyɛ bu ɔ nɔ, nɛ́ lɔ ɔ ha nɛ nyɛ ba suɔ nyɛmimɛ a sane nɛ osato be mi ɔ, nyɛɛ suɔ nyɛ sibi wawɛɛ nitsɛ kɛ je nyɛ tsui mi. 23 Ejakaa a ha nɛ a fɔ nyɛ ehe, pi kɛ gu wu* nɛ puɛɔ nɔ, se mohu kɛ gu nɔ́ nɛ e puɛ we nɔ, kɛ gu Mawu hɛ kalɔ ɔ nɛ e ngɛ kɛ yaa neneene ɔ munyu ɔ nɔ. 24 Ejakaa “he lohi* tsuo ngɛ kaa nga, nɛ a hɛ mi nyami ɔ tsuo ngɛ kaa nga nɔ mɔmɔhi; nga gbliɔ, nɛ mɔmɔ wɔleɔ, 25 se Yehowa* munyu ɔ hiɔ si kɛ yaa neneene.” Nɛ “munyu” nɛ ɔ ji sane kpakpa a nɛ a jaje kɛ tsɔɔ nyɛ ɔ nɛ.

2 Lɔ ɔ he ɔ, nyɛ je yayamihi tsuo, kɛ nɔ sisimi kɛ osato kɛ hɛkɔ kɛ nɔ he munyu yayami tumi tsuo kɛ je nyɛ he. 2 Nyɛ ha nɛ munyu ɔ nyɔ nyu nɛ a futuu we mi* ɔ nɛ jlo nyɛ kaa bimwɔwi nɛ a fɔ mɛ ehe, konɛ kɛ gu lɔ ɔ nɔ ɔ, nyɛɛ wa kɛ su yi wami hemi he, 3 ke ji kaa nyɛ sa nyɛ nya* nɛ nyɛ na kaa Nyɔmtsɛ ɔ mi mi jɔ ɔ.

4 Be mi nɛ nyɛ baa nɔ nɛ e ji tɛ nɛ e hɛ ngɛ nɛ adesahi kua lɛ, se Mawu hla lɛ kaa nɔ́ ko nɛ e he jua wa a ngɔ ɔ, 5 nyɛ nitsɛmɛ hu nyɛ ngɛ kaa tɛhi nɛ a hɛ ngɛ, nɛ a ngɛ nyɛ fiae kɛ ngɛ mumi mi we mae konɛ nyɛɛ pee osɔfohi a kuu klɔuklɔu bɔ nɛ pee nɛ nyɛɛ sã mumi mi afɔlehi nɛ Mawu kplɛɛ nɔ kɛ gu Yesu Kristo nɔ. 6 Ejakaa a de ngɛ Ngmami ɔ mi ke: “Hyɛ! i ngɛ tɛ nɛ a hla ko toe ngɛ Zion, sisi tomi kɔ̃ nya tɛ nɛ he jua wa, nɛ nɔ ko be nɛ ke e he lɛ ye ɔ nɛ e nine maa nyɛ si* ligbi ko ligbi ko.”

7 Enɛ ɔ he ɔ, nyɛ nɛ e he jua wa kɛ ha, ejakaa nyɛ ji nihi nɛ nyɛ he ye; se kɛ ha ni nɛmɛ nɛ a he we yi ɔ lɛɛ, “tɛ ɔ nɛ tsu mali ɔmɛ kua a, lɔ ɔ lɛ ba pee kɔ̃ nya tɛ titli”* 8 kɛ “tɛmi tɛ ko kɛ nane tɔ̃tɔ̃mi tɛ sa ko” ɔ nɛ. A nane ngɛ tɔ̃tɔ̃e, ejakaa a yi munyu ɔ nɔ. Jã nɛ a to ngɔ ha mɛ. 9 Se nyɛɛ lɛɛ nyɛ ji Nɔ nɛ e tsɛ nyɛ kɛ je diblii mi kɛ ba e la nɛ ngɛ nyakpɛ ɔ he ɔ “wɛtso nɛ e hla, odehe osɔfohi, je ma klɔuklɔu, nihi nɛ e ngɔ mɛ kɛ pee e nihi titli kaa e sa nɛ nyɛɛ jaje e we agboje* ɔ ngɛ he fɛɛ he.” 10 Be ko nɛ be ɔ, jinɛ pi ma ko ji nyɛ, se amlɔ nɛ ɔ, nyɛ ji Mawu we bi; be ko nɛ be ɔ, jinɛ a nɛ nyɛ mɔbɔ, se amlɔ nɛ ɔ lɛɛ a na nyɛ mɔbɔ.

11 Nihi nɛ i suɔ, i ngɛ nyɛ he wami woe kaa akɛnɛ nyɛ ji nibwɔhi kɛ ma se bi he je ɔ, nyɛɛ ya nɔ nɛ nyɛɛ hi nyɛ he yue ngɛ he lo ɔ we akɔnɔ ɔmɛ nɛ a kɛ nyɛ* ngɛ ta hwue ɔmɛ a he. 12 Nyɛɛ ya nɔ nɛ nyɛɛ ba nyɛ je mi saminya ngɛ je ma amɛ a kpɛti, konɛ ke a po nyɛ nya kaa nyɛ ji yayami peeli ɔ, a na nyɛ ní tsumi kpakpa amɛ, konɛ kɛ gu lɔ ɔ nɔ ɔ, a wo Mawu hɛ mi nyami ngɛ e níhi a mi hyɛmi ligbi ɔ nɔ.

13 Nyɔmtsɛ ɔ he je ɔ, nyɛɛ ngɔ nyɛ he kɛ wo adesa blɔ nya tomi fɛɛ adesa blɔ nya tomi* sisi, matsɛ nɛ e nɔ kuɔ jio, 14 amlaalohi nɛ e tsɔ mɛ kaa a ya gbla yayami peeli a tue, se a je ni nɛmɛ nɛ a peeɔ nɔ́ kpakpa a yi jio. 15 Ejakaa Mawu suɔmi nya ní ji kaa ke nyɛ peeɔ nɔ́ kpakpa a, nyɛ ma ha nɛ nihi nɛ a susuu we nɔ́ he nɛ a tuɔ munyu kɛkɛ ɔ nɛ a ma a nya.* 16 Nyɛɛ pee kaa nihi nɛ a ye a he, nyɛ ko ngɔ nyɛ he yemi ɔ kɛ pee nɔ́ nɛ nyɛ maa laa ngɔ wo se* kɛ hi yayami pee, mohu ɔ, kaa Mawu nyɔguɛhi. 17 Nyɛɛ bu nimli slɔɔtohi tsuo, nyɛɛ suɔ nyɛmimɛ a kuu ɔ tsuo,* nyɛɛ ye Mawu gbeye, nyɛɛ bu matsɛ ɔ.

18 Ha nɛ sɔmɔli nɛ a ba a he si kɛ ha a nyɔmtsɛmɛ* kɛ gbeye yemi nɛ sa tsuo, pi kɛ ha nimli kpakpahi kɛ ni nɛmɛ nɛ a nuɔ nɔ́ sisi ɔ pɛ, se mohu kɛ ha ni nɛmɛ nɛ a hɛ mi sami yee ɔ hulɔ. 19 Ejakaa e hi kaa nɔ ko ma fĩ si ngɛ haomihi* kɛ amanehluhi nɛ sɛ mi ngɛ he nile nɛ e ngɛ ngɛ Mawu blɔ fa mi ɔ he je. 20 Ejakaa ke nyɛ ngɛ yayami pee nɛ a ngɛ nyɛ kongoe nɛ nyɛ fĩɔ si ngɛ mi ɔ, mɛni se nami lɛ ngɛ he? Se ke nyɛ fĩɔ si ngɛ amanehlu mi ngɛ nɔ́ kpakpa nɛ nyɛ ngɛ pee ɔ he ɔ, lɔ ɔ saa Mawu hɛ mi.

21 Ngɛ anɔkuale mi ɔ, blɔ nɛ ɔ nɔ nɛ a tsɛ nyɛ kɛ ba a nɛ, ejakaa Kristo po na amanehlu ha nyɛ, nɛ e si nɔ hyɛmi nɔ́ ha nyɛ konɛ nyɛɛ nyɛɛ e nane mami he ɔmɛ a se haa. 22 E pee we yayami ko, nɛ jã kɛ̃ nɛ sisimi munyu ko hu ji e nya hyɛ. 23 Benɛ a ngɛ lɛ jɛe* ɔ, e jɛ we nɔ ko* kɛ tui nane mi. Benɛ e ngɛ amanehlu nae ɔ, e wui nɔ ko he gbeye, se mohu e tu e he kɛ wo Nɔ nɛ e kojoɔ ngɛ dami mi ɔ dɛ mi. 24 Lɛ nitsɛ e tloo wa he yayami ɔmɛ ngɛ lɛ nitsɛ e nɔmlɔ tso ɔ mi ngɛ sɛumi tso* ɔ nɔ, konɛ wa gbo kɛ ha yayamihi* nɛ waa hi wami mi kɛ ha dami. Nɛ “a gu e pa amɛ a nɔ kɛ tsa nyɛ.” 25 Ejakaa nyɛ ngɛ kaa jijɔhi nɛ a ngɛ laae, se amlɔ nɛ ɔ, nyɛ kpale kɛ ba to nɔ hyɛlɔ ɔ kɛ nyɛ susumahi* a nɔ hyɛlɔ ɔ ngɔ.

3 Jã nɔuu kɛ̃ nɛ nyɛ yigbayihi hu, nyɛɛ ba nyɛ he si kɛ ha nyɛ hunomɛ,* konɛ ke a ti ni komɛ bui munyu ɔ tue ɔ, kɛ gu a yi ɔmɛ a je mi bami nɔ ɔ, nine nɛ su a nɔ nɛ munyu tumi be mi, 2 akɛnɛ a naa nyɛ je mi bami nɛ e he tsɔ ɔ kɛ bumi nɛ mi kuɔ nɛ nyɛ jeɔ kpo ɔ he je. 3 Nyɛ ko ha nɛ nyɛ he dlami nɛ pee kpo nɔ nɔ́—yi gbɔmi kɛ sika tsu ní womi aloo tade nɛ ngɛ fɛu womi— 4 mohu ɔ, nyɛ ha nɛ e pee tsui mi nɔmlɔ nɛ a nɛ ɔ, ngɛ mumi nɛ ngɛ kpoo nɛ e he jɔ ɔ he dlami nɛ puɛ we ɔ mi, lɔ ɔ nɛ e he jua wa wawɛɛ ngɛ Mawu hɛ mi. 5 Ejakaa kikɛ nɛ ɔ ji bɔ nɛ yi klɔuklɔu ɔmɛ nɛ a hi si blema nɛ a ngɔ a hɛ kɛ fɔ Mawu nɔ ɔ dlaa a he, nɛ a ngɔ a he kɛ wo a hunomɛ a sisi, 6 kaa bɔ nɛ Sara bu Abraham tue nɛ e tsɛ lɛ ke nyɔmtsɛ ɔ. Nɛ nyɛ ba peeɔ e bimɛ ke ji kaa nyɛ yaa nɔ nɛ nyɛ peeɔ kpakpa nɛ nyɛ yi gbeye.

7 Jã nɔuu kɛ̃ nɛ nyɛ hunomɛ hu, nyɛɛ ya nɔ nɛ nyɛɛ kɛ mɛ nɛ hi si ngɛ nile mi.* Nyɛɛ hɛɛ yi ɔmɛ kɛ bumi kaa bɔ nɛ a hɛɛɔ buɛ nɛ he wɛ ɔ, ejakaa nyɛɛ kɛ mɛ tsuo ji wami ɔ he dloomi ɔ he gbosi ní yeli, konɛ a ko tsi nyɛ sɔlemihi blɔ.

8 Nyagbe ɔ, nyɛ tsuo nyɛɛ hɛɛ juɛmi kake,* nyɛɛ nu he kɛ ha nyɛ sibi, nyɛɛ suɔ nyɛ sibi a sane, nyɛ mi mi nɛ sã nyɛ ngɛ nyɛ sibi a he, nɛ nyɛɛ ba nyɛ he si. 9 Nyɛ ko ngɔ plaami kɛ to plaami nane mi, aloo jɛmi kɛ to jɛmi nane mi. Mohu ɔ, nyɛɛ ngɔ jɔɔmi kɛ to nane mi, ejakaa a tsɛ nyɛ kɛ ba blɔ nɛ ɔ nɔ, konɛ nyɛ ba ná jɔɔmi.

10 Ejakaa “nɔ fɛɛ nɔ nɛ e maa suɔ wami nɛ e maa na ligbi kpakpahi ɔ, e sa nɛ e bu e lilɛ he ngɛ nɔ́ yayami he, nɛ e bu e nya he ngɛ sisimi munyuhi a tumi he. 11 Ha nɛ e kpale kɛ je nɔ́ yayami he nɛ e pee nɔ́ kpakpa; ha nɛ e hla tue mi jɔmi se blɔ nɛ e di se. 12 Ejakaa Yehowa* hɛ ngmɛ ngɛ dali a he, nɛ e tue nuɔ a pɛɛ kpami nɛ mi wa a, se Yehowa* jeɔ e hɛ kɛ piɔ ni nɛmɛ nɛ a peeɔ ní yayamihi ɔ.”

13 Niinɛ, mɛnɔ lɛ e maa ye nyɛ awi ke nyɛ hɛ dɔɔ ngɛ nɔ́ kpakpa he? 14 Se ke e sa nɛ nyɛɛ na amanehlu ngɛ dami he je po ɔ, nyɛ ngɛ bua jɔmi. Se nyɛ ko ye níhi nɛ nihi yeɔ gbeye ɔ gbeye,* nɛ jã kɛ̃ nɛ nyɛ ko hao hulɔ. 15 Mohu ɔ, nyɛɛ tsu Kristo ɔ he kaa Nyɔmtsɛ ngɛ nyɛ tsui mi, nɛ be fɛɛ be ɔ, nyɛɛ pee klaalo kaa nyɛ maa fã nyɛ he ngɛ nɔ fɛɛ nɔ nɛ e biɔ nyɛ nɔ́ he je nɛ nyɛ ná hɛ kɛ nɔ fɔmi nɛ nyɛ ngɛ ɔ hɛ mi, se nyɛɛ pee jã kɛ he jɔmi kɛ bumi nɛ mi kuɔ.

16 Nyɛɛ ya nɔ nɛ nyɛɛ hɛɛ he nile kpakpa mi, konɛ nɔ́ fɛɛ nɔ́ mi nɛ a maa tu munyu kɛ si nyɛ ngɛ ɔ, nihi nɛ a tuɔ munyu kɛ siɔ nyɛ ɔ, zo nɛ gbe mɛ ngɛ nyɛ je mi bami kpakpa kaa Kristo se nyɛɛli ɔ he je. 17 Ejakaa e hi wawɛɛ kaa nyɛ maa na amanehlu ngɛ kpakpa nɛ nyɛ ngɛ pee ɔ he je ke Mawu suɔ nɛ e ngmɛ blɔ ɔ, pe nɛ nyɛ maa na amanehlu ngɛ yayami nɛ nyɛ ngɛ pee ɔ he je. 18 Ejakaa Kristo gbo si kake nyɔngloo ngɛ yayamihi a he je, dalɔ ɔ ngɛ nihi nɛ a dɛ ɔmɛ a nane mi, konɛ e nyɛɛ nyɛ hɛ mi kɛ ya Mawu ngɔ. A gbe lɛ ngɛ he lo mi, se a ha nɛ e ba wami mi ngɛ mumi mi. 19 Nɛ ngɛ si fɔfɔɛ nɛ ɔ mi ɔ, e ya nɛ e ya fiɛɛ kɛ tsɔɔ mumihi nɛ a wo mɛ tsu ɔ, 20 ni nɛmɛ nɛ be ko nɛ e be ɔ, a gbo tue benɛ Mawu to e tsui si nɛ e ngɛ mlɛe ngɛ Noa ligbi ɔ mi benɛ a ngɛ daka a kpɛe ɔ, nɛ́ a ngɔ nihi bɔɔ ko pɛ, nɛ ji susumahi* kpaanyɔ kɛ gu nyu ɔ mi slɔkee ɔ.

21 Amlɔ nɛ ɔ, baptisimi nɛ e kɛ enɛ ɔ sɔ ɔ ngɛ nyɛ hu nyɛ yi wami hee (pi he lo ɔ he mu jemi, se mohu e ji bimi nɛ a ngɛ Mawu bie konɛ e ha nɛ a ná he nile kpakpa), kɛ gu Yesu Kristo si tlemi ɔ nɔ. 22 E ngɛ Mawu hiɔ nɔ, ejakaa e ho hiɔwe ya, nɛ a ha nɛ hiɔwe bɔfohi kɛ blɔ nyahi kɛ he wamihi ngɔ a he kɛ wo e sisi.

4 Akɛnɛ Kristo na amanehlu ngɛ he lo ɔ mi he je ɔ, nyɛ hu nyɛɛ ngɔ jamɛ a juɛmi* ɔ nɔuu kɛ dla nyɛ he; ejakaa nɔ nɛ e na amanehlu ngɛ he lo mi ɔ je e he kɛ je yayamihi a he, 2 bɔ nɛ pee nɛ ngɛ e be ɔ nɛ e piɛ ngɛ he lo ɔ mi ɔ mi ɔ, e ko hi si kɛ ha adesahi a we akɔnɔ ɔmɛ hu, se mohu kɛ ha Mawu suɔmi nya ní peemi. 3 Ejakaa e hiɛ ha nyɛ ngɛ be nɛ be ɔ mi kaa nyɛ pee je ma amɛ a suɔmi nya ní be mi nɛ nyɛ ya nɔ nɛ nyɛɛ kɛ nyɛ he wo nɔ buimi ngmlikiti ní peepeehi,* akɔnɔhi nɛ a hí kudɔmi, dã fuu numi, okplɔɔ ngmɛmihi* nɛ ngɛ hoo, dã numi he koli simihi, kɛ wɔ jamihi nɛ mlaa ngmɛ́ blɔ mi ɔ. 4 E peeɔ mɛ nyakpɛ kaa nyɛ yɛ nɔ nɛ nyɛɛ kɛ mɛ nɛ hi fo tue ngɛ je mi bami basabasa blɔ sasɛ ɔ nɔuu nɔ hu, enɛ ɔ he ɔ, a tuɔ nyɛ he munyu yayami. 5 Se nimli nɛ ɔmɛ maa bu akɔtaa kɛ ha nɔ nɛ e pee klaalo kaa e maa kojo nihi nɛ a hɛ ngɛ kɛ ni nɛmɛ nɛ a gbo ɔ. 6 Ngɛ anɔkuale mi ɔ, enɛ ɔ he je nɛ a jaje sane kpakpa a kɛ ha ni nɛmɛ nɛ a gbo ɔ hulɔ ɔ nɛ, e ngɛ mi kaa a kojo mɛ ngɛ he lo mi ngɛ adesahi a susumi nya mohu lɛɛ, se a maa hi wami mi ngɛ mumi ɔ nya ngɛ Mawu susumi nya.

7 Se níhi tsuo a nyagbe su haa. Enɛ ɔ he ɔ, nyɛ hɛ mi nɛ ka si* kɛ ha sɔlemi. 8 Nɔ́ nɛ e pe kulaa a, nyɛɛ suɔ nyɛ sibi wawɛɛ nitsɛ, ejakaa suɔmi haa yayami babauu nɔ. 9 Nyɛɛ pee nyɛ sibi nibwɔ nɛ nyɛ ko gbigblii nyɛ mi. 10 Nike ní abɔ nɛ nɔ fɛɛ nɔ nine su nɔ ɔ, nyɛɛ ngɔ kɛ hi nyɛ sibi sɔmɔe kaa Mawu dloomi ɔ nɛ a je lɛ kpo ngɛ blɔ slɔɔtohi a nɔ ɔ he we nɔ hyɛli kpakpahi. 11 Ke nɔ ko tuɔ munyu ɔ, ha nɛ e pee jã kaa nɔ nɛ e ngɛ sɛ gbihi nɛ a je Mawu ngɔ ɔ a he munyu tue; ke nɔ ko sɔmɔɔ ɔ, ha nɛ e pee jã kaa nɔ nɛ e kɛ e he fɔ he wami nɛ Mawu haa nɔ ɔ nɔ; konɛ ngɛ níhi tsuo a mi ɔ, a wo Mawu hɛ mi nyami kɛ gu Yesu Kristo nɔ. E nɔ́ ji hɛ mi nyami kɛ he wami kɛ yaa neneene kɛ neneene. Amen.

12 Nihi nɛ i suɔ, nyɛ ko ha nɛ kahi nɛ a ngɛ tsoe kaa la nɛ nyɛɛ kɛ ngɛ kpee ɔ nɛ pee nyɛ nyakpɛ, kaa nɔ́ ko nɛ e bɛ hyɛ lɛ ngɛ nyɛ nɔ bae. 13 Mohu ɔ, nyɛɛ ya nɔ nɛ nyɛɛ hi nyae be abɔ nɛ nyɛ ngɛ Kristo amanehlu ɔmɛ a mi blɔ fa mi nɔ́ náe ɔ, nɛ́ nyɛ nya nɛ nyɛ bua nɛ jɔ kɛ be nɔ ngɛ e hɛ mi nyami ɔ he kpo jemi ɔ mi hulɔ. 14 Ke a ngɛ nyɛ hɛ mi si puee* ngɛ Kristo biɛ ɔ he ɔ, nyɛ bua jɔɔ, ejakaa hɛ mi nyami mumi ɔ, ee, Mawu mumi ɔ ngɛ nyɛ nɔ.

15 Se nyɛ ti nɔ ko nɛ e ko na amanehlu kaa nɔmlɔ gbelɔ aloo julɔ aloo yayami peelɔ aloo nɔ ko nɛ e kɛ e he woɔ ni kpahi a sanehi a mi. 16 Se ke nɔ ko naa amanehluhi kaa Kristofo no ɔ, ha nɛ e ko pee lɛ zo, mohu ɔ, ha nɛ e ya nɔ nɛ e hi Mawu hɛ mi nyami woe, be mi nɛ e ngɛ nyɛɛe ngɛ biɛ ɔ nya a. 17 Ejakaa be nɛ a to kɛ ha kojomi nɛ maa je sisi kɛ je Mawu we ɔ ji nɛ ɔ nɛ. Amlɔ nɛ ɔ, ke e maa je sisi kɛ je wa nɔ kekle ɔ, lɛɛ mɛni maa je mi kɛ ba ha ni nɛmɛ nɛ a bui Mawu sane kpakpa a tue ɔ? 18 “Nɛ ke beble* loko a ma he dalɔ yi wami ɔ, lɛɛ mɛni maa ba nɔmlɔ nɛ e yi Mawu gbeye kɛ yayami peelɔ nɔ mɔ?” 19 Ke jã a, lɛɛ ha nɛ ni nɛmɛ nɛ a ngɛ nɔ́ nae ngɛ blɔ nɛ kɛ Mawu suɔmi nya ní kɔ ɔ nɔ ɔ nɛ a ya nɔ nɛ a tu a he* kɛ ha Bɔlɔ anɔkualetsɛ ɔ be mi nɛ a ngɛ kpakpa pee ɔ.

5 Enɛ ɔ he ɔ, kaa nyɛ nyɛmi nɔkɔtɔma, Kristo amanehlu ɔmɛ a he odase yelɔ kɛ nɔ nɛ e ma ná hɛ mi nyami ɔ nɛ a ma je kpo ɔ mi blɔ fa mi nɔ́ ɔ, i ngɛ nikɔtɔma amɛ nɛ a ngɛ nyɛ kpɛti ɔ pɛɛ nɛ ɔ kpae:* 2 Nyɛɛ hyɛ Mawu to kuu ɔ nɛ a kɛ wo nyɛ dɛ ɔ nɔ, nyɛ sɔmɔ kaa a nɔ hyɛli,* pi ngɛ nɔ nyɛmi nya, se nyɛɛ je nyɛ tsui mi kɛ pee ngɛ Mawu hɛ mi; pi ngɛ se nami nɛ ngɛ zo he suɔmi he je, se mohu kɛ bua jɔmi; 3 nyɛ ko pee nyɔmtsɛmɛ ngɛ ni nɛmɛ nɛ a ji Mawu we bi* ɔmɛ a nɔ, mohu ɔ, nyɛɛ ngɔ nyɛ he kɛ pee nɔ hyɛmi níhi kɛ ha to kuu ɔ. 4 Nɛ ke a je to nɔ hyɛlɔ ngua a kpo heii ɔ, nyɛ nine maa su hɛ mi nyami jlasi nɛ e kpa we ɔ nɔ.

5 Ngɛ jamɛ a blɔ ɔ nɔ nɔuu ɔ, nyɛ nihewi ɔmɛ hu nyɛɛ ba nyɛ he si kɛ ha nyumu nikɔtɔma* amɛ.* Se nyɛ tsuo nyɛɛ wo* he si bami* ngɛ nyɛɛ kɛ nyɛ sibi a si himi mi, ejakaa Mawu teɔ si kɛ woɔ he nɔ woli, se he si bali lɛɛ, e dlooɔ mɛ.

6 Enɛ ɔ he ɔ, nyɛɛ ba nyɛ he si ngɔ wo Mawu nine nɛ he wa a sisi, konɛ e wo nyɛ nɔ ngɛ be nɛ sa mi, 7 nɛ nyɛ sake nyɛ yeyeeye peemi ɔmɛ* tsuo ngɔ fɔ e nɔ, ejakaa e susuɔ nyɛ he. 8 Nyɛ hɛ mi nɛ ka si, nɛ nyɛɛ hwɔɔ! Nyɛ he nyɛlɔ Abosiami ɔ nyɛɛɔ kɛ yaa kɛ baa kaa jata nɛ ngɛ huãe nɛ e ngɛ hlae nɛ e maa mi nɔ ko.* 9 Se nyɛɛ te si kɛ wo lɛ, nyɛ he nɛ wa ngɛ hemi kɛ yemi ɔ mi, ejakaa nyɛ le kaa kikɛmɛ a amanehlu nɛ ɔmɛ nɔuu nɛ nyɛ nyɛmimɛ a kuu ɔ tsuo* ngɛ nae ngɛ je ɔ mi. 10 Se ke nyɛ na amanehlu be bɔɔ ko ɔ, dloomi tsuo Mawu ɔ, nɔ nɛ e tsɛ nyɛ kɛ ba e neneene hɛ mi nyami ɔ mi ngɛ Kristo mi ɔ, lɛ nitsɛ e maa gbe nyɛ tsɔsemi ɔ nya. E maa waje nyɛ, e ma ha nɛ nyɛ he maa wa, e ma ha nɛ nyɛ maa pi si wawɛɛ. 11 Á ngɔ he wami ɔ kɛ ha lɛ kɛ ya neneene. Amen.

12 Kɛ gu Silvano, nɔ nɛ i buɔ lɛ kaa nyɛminyumu anɔkualetsɛ ɔ nɔ ɔ, i ngma nyɛ munyuhi bɔɔ nɛ ɔ konɛ ma kɛ wo nyɛ he wami nɛ ma ngɔ hɛdɔ kɛ ye odase kaa enɛ ɔ ji Mawu dloomi nitsɛnitsɛ ɔ nɛ. Nyɛɛ da si kpɛii ngɛ mi. 13 Yo ɔ nɛ e ngɛ Babilon ɔ, nɔ nɛ a hla lɛ kaa bɔ nɛ a hla nyɛ ɔ ke e biɔ nyɛ, nɛ Maako, ye bi ɔ hu ke e biɔ nyɛ. 14 Nyɛ fɔ nyɛ sibi kɛ suɔmi nya he fĩɔmi.

Nyɛ nihi tsuo nɛ nyɛɛ kɛ Kristo pee kake ɔ, nyɛ nine nɛ su tue mi jɔmi nɔ.