KPO JEMI KO NƐ A KƐ HA YOHANE

1 Kpo jemi ko* nɛ Mawu ngɔ kɛ ha Yesu Kristo kaa e tsɔɔ e nyɔguɛ ɔmɛ níhi nɛ e sa kaa a ba mi ngɛ be kpiti mi. Nɛ Yesu hu tsɔ e bɔfo ɔ, nɛ e gu e bɔfo ɔ nɔ nɛ e kɛ tsɔɔ e nyɔguɛ Yohane ngɛ okadihi a mi, 2 nɔ nɛ e ye munyu nɛ Mawu ngɔ kɛ ha kɛ odase nɛ Yesu Kristo ye, ee, níhi tsuo nɛ e na amɛ a he odase ɔ. 3 Nɔ nɛ e woɔ e gbi nɔ kɛ kaneɔ gbami nɛ ɔ mi munyu ɔmɛ, kɛ ni nɛmɛ nɛ a nuɔ nɛ a yeɔ níhi nɛ a ngma ngɛ mi ɔmɛ a nɔ ɔ ngɛ bua jɔmi, ejakaa be nɛ a to ɔ su ta.

4 Yohane, kɛ ya ha asafo kpaago ɔmɛ nɛ a ngɛ Asia kpokpa a mi ɔ:

Nyɛ nine nɛ su dloomi kɛ tue mi jɔmi nɔ kɛ je “Nɔ nɛ e ngɛ ɔ, nɛ e ngɛ momo ɔ, nɛ e ma a,” kɛ mumi kpaago ɔmɛ nɛ a ngɛ e matsɛ sɛ ɔ hɛ mi ɔ, 5 kɛ Yesu Kristo, “Odasefo No Anɔkualetsɛ ɔ,” “kekleekle bi kɛ je gbogboehi a kpɛti,” kɛ “zugba a nɔ matsɛmɛ ɔmɛ a Nɔ Yelɔ ɔ” a ngɔ.

Nɔ nɛ e suɔ wɔ nɛ e ha nɛ wa ye wa he kɛ je wa he yayami ɔmɛ a he kɛ gu lɛ nitsɛ e muɔ ɔ nɔ ɔ— 6 nɛ́ e ngɔ wɔ kɛ pee matsɛ yemi, osɔfohi kɛ ha e Mawu nɛ ji Tsɛ ɔ—ee, lɛ nɛ á ngɔ hɛ mi nyami kɛ he wami kɛ ha kɛ ya neneene. Amen.

7 Hyɛ! E kɛ bɔku ɔmɛ ma, nɛ hɛ ngmɛ fɛɛ hɛ ngmɛ maa na lɛ, kɛ ni nɛmɛ nɛ a gbɔ lɛ nɔ́ ɔ; nɛ wɛtsohi nɛ a ngɛ zugba a nɔ ɔ tsuo ma fo ya boboobo ngɛ e he je. Ee, Amen.

8 Yehowa* Mawu de ke: “Imi ji Alfa a kɛ Omega a* nɛ, Nɔ nɛ e ngɛ ɔ, nɛ e ngɛ momo ɔ, nɛ e ma a, Ope ɔ.”

9 Imi Yohane, nyɛ nyɛminyumu ɔ nɛ e kɛ nyɛ ná amanehlu kɛ matsɛ yemi kɛ si fimi mi blɔ fa mi nɔ́ ngɛ waa kɛ Yesu wa huɛ bɔmi ɔ mi ɔ, i ngɛ zugba kpɔ ko nɛ nyu bɔle lɛ nɛ a tsɛɔ ke Patmɔs ɔ nɔ ngɛ Mawu he munyu nɛ i ngɛ tue kɛ Yesu he odase nɛ i ngɛ yee ɔ he je. 10 Ngɛ mumi ɔ he wami nya a, i ya je Nyɔmtsɛ ɔ ligbi ɔ mi nɛ i nu gbi ko nɛ e he wa nɛ e ngɛ kaa titimati pɛmi ngɛ ye se, 11 nɛ e ngɛ dee ke: “Nɔ́ nɛ o na a, ngmaa kɛ wo womi kpo ɔ mi nɛ o kɛ mane asafo kpaago ɔmɛ: ngɛ Efeso, ngɛ Simɛɛna, ngɛ Pɛgamo, ngɛ Tiatira, ngɛ Saadis, ngɛ Filadelfia, kɛ ngɛ Laodikea.”

12 I plɛ ye he konɛ ma hyɛ nɔ nɛ e kɛ mi ngɛ munyu ɔ tue ɔ, nɛ benɛ i plɛ ye he ɔ, i na sika tsu kane tsohi kpaago, 13 nɛ ngɛ kane tso ɔmɛ a kpɛti ɔ, i na nɔ ko nɛ e ngɛ kaa nɔmlɔ bi, nɛ e wo tade nɛ kple si kɛ su e nane si, nɛ e ngɔ sika tsu mi mi fimi nɔ́ kɛ fĩ e gugue. 14 Jehanɛ se hu ɔ, e yi kɛ e yi bwɔmi hiɛ futaa kaa lohwe he bwɔmi futaa, kaa snoo, nɛ e hɛ ngmɛhi ngɛ kaa la nɛ ngɛ tsoe, 15 nɛ e nanewɛɛhi ngɛ kaa akɔblee kpakpa nɛ e tsu ngɛ flɔɔnɔɔ mi, nɛ e gbi ngɛ kaa nyu babauu pɛmi. 16 Nɛ dodoehi kpaago ngɛ e hiɔ nine mi, nɛ klaate nya enyɔtsɛ nɛ nya ba ngɛ kpo jee ngɛ e nya mi, nɛ e hɛ mi ngɛ kaa pu nɛ ngɛ tsoe wawɛɛ nitsɛ. 17 Benɛ i na lɛ ɔ, i nɔ si ngɛ e nane nya kaa nɔ gbogboe.

Nɛ e ngɔ e hiɔ nine kɛ fɔ ye nɔ nɛ e de ke: “Koo ye gbeye. Imi ji Kekleekle ɔ kɛ Nyagbe ɔ, 18 kɛ nɔ nɛ e ngɛ wami mi ɔ nɛ, nɛ i ba gbo, se hyɛ! i ngɛ wami mi kɛ yaa neneene kɛ neneene, nɛ i ngɛ gbenɔ kɛ Gbeje* nya safe ɔmɛ. 19 Lɔ ɔ he ɔ, ngmaa níhi nɛ o na a, kɛ níhi nɛ a ngɛ ɔ, kɛ níhi nɛ maa ya nɔ ngɛ ní nɛ ɔmɛ a se ɔ kɛ fɔ si. 20 Ngɛ dodoe kpaago ɔmɛ nɛ o na ngɛ ye hiɔ nine mi ɔ kɛ sika tsu kane tso kpaago ɔmɛ a he laami sanehi nɛ a ngɛ klɔuu ɔmɛ a he ɔ: Dodoe kpaago ɔmɛ daa si kɛ ha asafo kpaago ɔmɛ a bɔfo ɔmɛ, nɛ kane tso kpaago ɔmɛ hu daa si kɛ ha asafo kpaago ɔmɛ.

2 “Ngmaa kɛ ya ha Efeso asafo ɔ bɔfo ɔ ke: Níhi nɛ nɔ nɛ e hɛɛ dodoe kpaago ɔmɛ ngɛ e hiɔ nine mi nɛ e nyɛɛɔ ngɛ sika tsu kane tso kpaago ɔmɛ a kpɛti ɔ ngɛ dee ji nɛ ɔ nɛ: 2 ‘I le o ní peepee ɔmɛ, kɛ o dengme gbomi ɔ kɛ o si fimi ɔ, nɛ i le kaa o be nyɛe ma ná nimli yayamihi a he tsui, nɛ o kaa ni nɛmɛ nɛ a deɔ ke bɔfohi ji mɛ, se pohu pi bɔfohi ji mɛ ɔ, nɛ o naa mɛ kaa a ji lakpatsɛmɛ. 3 Jehanɛ se hu ɔ, o ngɛ si fĩe nɛ o ngɛ o hɛ mi miae ngɛ ye biɛ ɔ he je nɛ pɔ tɔɛ o he. 4 Se kɛ̃ ɔ, i ngɛ enɛ ɔ kɛ si mo, kaa o ngmɛɛ suɔmi nɛ o ngɛ kekle ɔ he.

5 “‘Lɔ ɔ he ɔ, kai he nɛ o je kɛ nɔ si ɔ, nɛ o tsake o tsui nɛ o pee níhi nɛ o pee kekle ɔ. Ke o pee we jã a, ma ba o ngɔ nɛ ma ba je o kane tso ɔ kɛ je he nɛ e ngɛ ɔ, lɛɛ ja o tsake o tsui. 6 Se kɛ̃ ɔ, o bɔɔ mɔde ngɛ enɛ ɔ mi: kaa o hiɔ Nikolao jami kuu ɔ ní peepee ɔmɛ nɛ́ imi hu i hiɔ ɔ. 7 Ha nɔ nɛ e ngɛ tue ɔ nɛ e nu nɔ́ nɛ mumi ɔ ngɛ asafo ɔmɛ dee ɔ: Nɔ nɛ e yeɔ kunimi ɔ, ma ha lɛ he blɔ konɛ e ye wami tso ɔ nɛ ngɛ Mawu paradeiso ɔ mi ɔ.’

8 “Nɛ ngmaa kɛ ya ha Simɛɛna asafo ɔ bɔfo ɔ ke: Níhi nɛ nɔ nɛ e ji ‘Kekleekle ɔ kɛ Nyagbe ɔ,’ nɔ nɛ e gbo nɛ e ba wami mi ekohu ɔ ngɛ dee ji nɛ ɔ nɛ: 9 ‘I le o we amanehlu kɛ o we ohia—se o ji niatsɛ—kɛ musu nɛ ni nɛmɛ nɛ a tsɛɔ a he ke Yuda bi se ngɛ anɔkuale mi ɔ, pi eko ji mɛ se a ji Satan kpe he ɔ ngɛ bɔe ɔ. 10 Koo ye amanehluhi nɛ e be kɛe nɛ o maa na a gbeye. Hyɛ! Abosiami maa ya nɔ nɛ e maa hi nyɛ ti ni komɛ tsu woe konɛ a ka nyɛ kɛ pi si, nɛ nyɛ maa na amanehlu ligbi nyɔngma. Nyɛɛ tsɔɔ kaa nyɛ ji anɔkualetsɛmɛ kɛ yaa su gbenɔ mi po, nɛ ma ha nyɛ wami jlasi ɔ. 11 Ha nɔ nɛ e ngɛ tue ɔ nɛ e nu nɔ́ nɛ mumi ɔ ngɛ asafo ɔmɛ dee ɔ: Nɔ nɛ e yeɔ kunimi ɔ, gbenɔ enyɔne ɔ be lɛ awi yee kɔkɔɔkɔ.’

12 “Ngmaa kɛ ya ha Pɛgamo asafo ɔ bɔfo ɔ ke: Níhi nɛ nɔ nɛ e ngɛ klaate gagaaga nya enyɔtsɛ nɛ nya ba a ngɛ dee ji nɛ ɔ nɛ: 13 ‘I le he nɛ o ngɛ ɔ, nɛ ji he nɛ Satan matsɛ sɛ ɔ ngɛ ɔ; se kɛ̃ ɔ, o ya nɔ nɛ o pɛtɛ ye biɛ ɔ he wawɛɛ, nɛ o kua we hemi kɛ yemi nɛ o ngɛ ngɛ ye mi ngɛ Antipa ligbi ɔmɛ a mi ɔ po, nɔ nɛ e ji ye we odasefo no anɔkualetsɛ nɛ a gbe lɛ ngɛ nyɛ kasa nya ngɛ he nɛ Satan ngɛ ɔ.

14 “‘Se kɛ̃ ɔ, i ngɛ ní bɔɔ komɛ kɛ si mo, kaa o ngɛ nihi ngɛ lejɛ ɔ nɛ a fĩ Baalam tsɔɔmi ɔ se, nɔ nɛ e tsɔɔ Balak kaa e ngɔ tɛmi tɛ kɛ fɔ Israel bi ɔmɛ a hɛ mi konɛ a ye níhi nɛ a ngɔ kɛ sã afɔle kɛ ha wɔhi nɛ́ a bɔ ajuama a.* 15 Ngɛ jamɛ a blɔ ɔ nɔ nɔuu ɔ, o ngɛ ni komɛ hu nɛ a fĩ Nikolao jami kuu ɔ tsɔɔmi ɔ se. 16 Lɔ ɔ he ɔ, tsake o tsui. Ke o pee we jã a, i ma o ngɔ oya nɔuu, nɛ i kɛ mɛ maa hwu kɛ ye nya mi klaate gagaaga a.

17 “‘Ha nɔ nɛ e ngɛ tue ɔ nɛ e nu nɔ́ nɛ mumi ɔ ngɛ asafo ɔmɛ dee ɔ: Nɔ nɛ e yeɔ kunimi ɔ, ma ha lɛ mana a nɛ a ngɔ kɛ laa a eko, nɛ ma ha lɛ tɛ nyafii futaa ko, nɛ nɔ́ nɛ a ngma ngɛ tɛ nyafii ɔ nɔ ɔ ji biɛ ehe ko nɛ́ nɔ ko nɔ ko li kaa ja nɔ nɛ e nine maa su nɔ ɔ pɛ.’

18 “Ngmaa kɛ ya ha Tiatira asafo ɔ bɔfo ɔ ke: Níhi nɛ Mawu Bi ɔ, nɔ nɛ e hɛ ngmɛhi ngɛ kaa la nɛ ngɛ tsoe, nɛ e nanewɛɛhi ngɛ kaa akɔblee kpakpa a ngɛ dee ji nɛ ɔ nɛ: 19 ‘I le o ní peepee ɔmɛ kɛ o suɔmi ɔ, kɛ o hemi kɛ yemi ɔ, kɛ o sɔmɔmi ɔ, kɛ o si fimi ɔ, nɛ i le kaa o sekpɛ ní peepee ɔmɛ pe o kekle ní ɔmɛ.

20 “‘Se kɛ̃ ɔ, i ngɛ enɛ ɔ kɛ si mo, kaa o náa yo Jezebɛl ɔ he tsui, nɔ nɛ e tsɛɔ e he ke gbalɔyo, nɛ e tsɔɔ ye nyɔguɛ ɔmɛ ní nɛ e sisiɔ mɛ kaa a bɔ ajuama* nɛ a ye níhi nɛ a ngɔ kɛ sã afɔle kɛ ha wɔhi ɔ. 21 Nɛ i ha lɛ be konɛ e kɛ tsake e tsui, se e sume kaa e ma tsake e tsui ngɛ e we ajuama bɔmi* ɔ he. 22 Hyɛ! e be kɛe nɛ ma tsɛ̃ lɛ ngɔ fɔ hiɔ sa nɔ, nɛ ma tsɛ̃ ni nɛmɛ nɛ a kɛ lɛ ngɛ gba puɛe ɔ hu kɛ wo amanehlu ngua mi, lɛɛ ja a tsake a tsui ngɛ e ní peepee ɔmɛ a he. 23 Nɛ ma ngɔ gbenɔ hiɔ kɛ gbe e bimɛ, bɔ nɛ pee nɛ asafo ɔmɛ tsuo nɛ a ná nɛ a le kaa imi ji nɔ nɛ e hlaa susumihi nɛ a mi kuɔ* kɛ tsuihi a mi, nɛ ma ngɔ kɛ ha nyɛ ti nɔ fɛɛ nɔ ngɛ nyɛ ní peepee ɔmɛ a nya.

24 “‘Se i ngɛ nyɛ ni nɛmɛ nɛ piɛ ngɛ Tiatira, nɛ ji nihi tsuo nɛ a nyɛɛ we tsɔɔmi nɛ ɔ se, kɛ ni nɛmɛ nɛ a ná we nɛ a le nɔ́ nɛ a ke a tsɛɔ ke “Satan níhi nɛ a mi kuɔ” ɔ dee ke: Pi nɛ i kɛ tlomi kpa ko ngɛ nyɛ nɔ fɔe. 25 Se kɛ̃ ɔ, nyɛɛ ya nɔ nɛ nyɛɛ pɛtɛ nɔ́ nɛ nyɛ ngɛ ɔ he wawɛɛ kɛ yaa si be nɛ ma ba. 26 Nɛ nɔ nɛ e yeɔ kunimi nɛ e hɛɛɔ ye ní peepee ɔmɛ a mi kɛ ya siɔ nyagbe ɔ, ma ha lɛ he blɔ ngɛ je ma amɛ a nɔ, 27 kaa bɔ nɛ imi hu ye nine su nɔ kɛ je Tsɛ ɔ ngɔ ɔ, nɛ e kɛ dade tso maa hyɛ ni ɔmɛ a nɔ konɛ a ywia wɔtsɔwɔtsɔ kaa zu buɛhi. 28 Nɛ ma ha lɛ mɔtu dodoe ɔ. 29 Ha nɔ nɛ e ngɛ tue ɔ nɛ e nu nɔ́ nɛ mumi ɔ ngɛ asafo ɔmɛ dee ɔ.’

3 “Ngmaa kɛ ya ha Saadis asafo ɔ bɔfo ɔ ke: Níhi nɛ nɔ nɛ e ngɛ Mawu mumi kpaago ɔmɛ kɛ dodoe kpaago ɔmɛ ɔ ngɛ dee ji nɛ ɔ nɛ: ‘I le o ní peepee ɔmɛ kaa o ngɛ biɛ kaa o ngɛ wami mi, se o gbo. 2 O hɛ nɛ hi o he nɔ, nɛ o wo níhi nɛ piɛ nɛ a pee klaalo kaa a ma gbo ɔ he wami, ejakaa i nɛ kaa o tsu o ní tsumi ɔmɛ kɛ pi si kulaa* ngɛ ye Mawu ɔ hɛ mi. 3 Enɛ ɔ he ɔ, yaa nɔ nɛ o kai nɔ́ nɛ o nine su nɔ ɔ,* kɛ nɔ́ nɛ o nu ɔ, nɛ o ya nɔ nɛ o baa yi, nɛ o tsake o tsui. Lɛɛ ja o hɛ tsɛ̃, se ke pi jã a, kokooko ɔ, ma ba kaa julɔ nɛ o be ngmlɛfia tutuutu nɛ ma ba o nɔ ɔ lee kulaa.

4 “‘Se kɛ̃ ɔ, o ngɛ ni kakaaka* komɛ ngɛ Saadis nɛ mɛɛ lɛɛ a ble we a tade ɔmɛ, nɛ a kɛ mi maa nyɛɛ ngɛ tade hiɔhi a mi, ejakaa a sa. 5 Nɔ nɛ e yeɔ kunimi ɔ, a maa wo lɛ tade hiɔhi, nɛ i be e biɛ tsue* ngɛ wami womi ɔ mi, mohu ɔ, ma wo e biɛ ta ngɛ ye Tsɛ ɔ kɛ e bɔfo ɔmɛ a hɛ mi. 6 Ha nɔ nɛ e ngɛ tue ɔ nɛ e nu nɔ́ nɛ mumi ɔ ngɛ asafo ɔmɛ dee ɔ.’

7 “Ngmaa kɛ ya ha Filadelfia asafo ɔ bɔfo ɔ ke: Níhi nɛ nɔ nɛ e ngɛ klɔuklɔu, nɔ nɛ e ji anɔkualetsɛ, nɔ nɛ David safe ɔ ngɛ e dɛ, nɔ nɛ e bliɔ bɔ nɛ pee nɛ nɔ ko nɛ e ko nga nɛ e ngaa bɔ nɛ pee nɛ nɔ ko nɛ e ko bli ɔ ngɛ dee ji nɛ ɔ nɛ: 8 ‘I le o ní peepee ɔmɛ—hyɛ! i ngɔ sinya ko nɛ a bli kɛ ma o hɛ mi nɛ nɔ ko be nyɛe ma nga. Nɛ i le kaa o ngɛ he wami bɔɔ, nɛ o ye ye munyu ɔ nɔ, nɛ o ji ye biɛ ɔ se. 9 Hyɛ! ma pee nihi nɛ a je Satan kpe he ɔ nɛ a deɔ ke Yuda bi ji mɛ, se pohu pi jã se a ngɛ lakpa yee ɔ—hyɛ! ma ha nɛ a ma ba kpla si* ngɛ o nane nya, nɛ ma ha nɛ a maa le kaa i suɔ mo. 10 Akɛnɛ o ye ye si fimi munyu ɔ nɔ* he je ɔ, imi hu ma je mo kɛ je ka ngmlɛfia a mi, nɔ́ nɛ maa ba zugba a nɔ hehi tsuo nɛ nimli ngɛ ɔ, nɛ́ ma kɛ ka nihi nɛ a ngɛ zugba a nɔ ɔ. 11 I ma oya nɔuu. Yaa nɔ nɛ o pɛtɛ nɔ́ nɛ o ngɛ ɔ he wawɛɛ, konɛ nɔ ko nɛ e ko ngɔ o jlasi ɔ.

12 “‘Nɔ nɛ e yeɔ kunimi ɔ—ma pee lɛ titima ngɛ ye Mawu ɔ sɔlemi we ɔ, nɛ e be kpo jee ngɛ mi hu gblegbleegble, nɛ ma ngma ye Mawu ɔ biɛ ɔ, kɛ ye Mawu ɔ ma a, Yerusalɛm Ehe ɔ nɛ kpleɔ si kɛ jeɔ hiɔwe ngɛ ye Mawu ɔ ngɔ ɔ biɛ, kɛ imi nitsɛ ye biɛ ehe ɔ ngɛ e nɔ. 13 Ha nɔ nɛ e ngɛ tue ɔ nɛ e nu nɔ́ nɛ mumi ɔ ngɛ asafo ɔmɛ dee ɔ.’

14 “Ngmaa kɛ ya ha Laodikea asafo ɔ bɔfo ɔ ke: Níhi nɛ Amen ɔ, anɔkualetsɛ kɛ odasefo no nitsɛnitsɛ ɔ, Mawu adebɔ níhi a sisije ɔ ngɛ dee ji nɛ ɔ nɛ: 15 ‘I le o ní peepee ɔmɛ kaa o be yluduu nɛ o dɔɛ la hulɔ. I ná nɛ o ngɛ yluduu aloo o dɔ la mohu. 16 Lɔ ɔ he ɔ, akɛnɛ o ngɛ kulɔkulɔ nɛ o dɔɛ la nɛ o be yluduu hu he je ɔ, ma vie mo kɛ je ye nya mi kɛ pue he. 17 Ejakaa o deɔ ke, “Niatsɛ ji mi, nɛ i ná ní, nɛ nɔ́ ko nɔ́ ko he hia we mi,” se o li kaa o ngɛ haomi mi, nɛ o ní ngɛ mɔbɔ, nɛ o ji ohiatsɛ, kɛ hɛ yuyuilɔ, nɛ o hɛɛ o he gu, 18 i ngɛ mo ga woe nɛ o ba he sika tsu nɛ a kɛ la tsu he ngɛ ye dɛ konɛ o pee niatsɛ, kɛ tade hiɔhi konɛ o pee nɔ nɛ e dla e he bɔ nɛ pee nɛ o he gu nɛ ngɛ zo ɔ nɛ ko je kpo, kɛ hɛ ngmɛ tsopa nɛ o kɛ kpa o hɛ ngmɛ ɔmɛ a nɔ, konɛ o hyɛ nɔ́.

19 “‘Nihi tsuo nɛ i suɔ a sane ɔ, i kãa a hɛ mi nɛ i tsɔseɔ mɛ. Lɔ ɔ he ɔ, o hɛ nɛ dɔ nɛ o tsake o tsui. 20 Hyɛ! i daa si ngɛ sinya a nya nɛ i ngɛ sie. Ke nɔ ko nu ye gbi nɛ e bli sinya a, ma ba e we ɔ mi nɛ i kɛ lɛ ma ba ye gbɔkuɛ ní ɔ, nɛ lɛ hu e kɛ mi maa ye. 21 Nɔ nɛ e yeɔ kunimi ɔ, ma ha lɛ he blɔ konɛ e kɛ mi nɛ hi si ngɛ ye matsɛ sɛ ɔ nɔ kaa bɔ nɛ i ye kunimi nɛ i kɛ ye Tsɛ ɔ hi si ngɛ e matsɛ sɛ ɔ nɔ ɔ. 22 Ha nɔ nɛ e ngɛ tue ɔ nɛ e nu nɔ́ nɛ mumi ɔ ngɛ asafo ɔmɛ dee ɔ.’”

4 Enɛ ɔ se ɔ, i na, nɛ hyɛ! sinya ko nɛ a bli ngɛ hiɔwe, nɛ kekleekle gbi nɛ i nu nɛ e kɛ mi ngɛ munyu tue ɔ ngɛ kaa titimati pɛmi, nɛ e de ke: “Kuɔɔ kɛ ba hiɛ ɔ, nɛ ma tsɔɔ mo níhi nɛ e sa kaa a ba mi.” 2 Enɛ ɔ se ɔ, amlɔ nɔuu nɛ i ba je mumi ɔ he wami ɔ mi, nɛ hyɛ! matsɛ sɛ ko maa si ngɛ e blɔ he ngɛ hiɔwe, nɛ nɔ ko hii si ngɛ matsɛ sɛ ɔ nɔ. 3 Nɛ nɔ nɛ e hii si ɔ ngɛ kaa yaspi tɛ kɛ saadion tɛ,* nɛ alale nɛ ngɛ kaa emerald* bɔle matsɛ sɛ ɔ kɛ kpe.

4 Nɛ matsɛ sɛhi 24 bɔle matsɛ sɛ ɔ kɛ kpe, nɛ i na nikɔtɔmahi 24 nɛ a hii si ngɛ matsɛ sɛ nɛ ɔmɛ a nɔ, nɛ a wo tade hiɔhi, nɛ sika tsu jlasihi fĩ a yi. 5 Oslabai gbami kɛ gbihi kɛ hiɔwe simihi ngɛ matsɛ sɛ ɔ mi jee kɛ ngɛ bae; nɛ kanehi kpaago nɛ́ a ngɛ tsoe ngɛ matsɛ sɛ ɔ hɛ mi, nɛ lɔ ɔmɛ ji Mawu mumi kpaago ɔmɛ ɔ nɛ. 6 Nɔ́ ko nɛ e ngɛ kaa ahuhuɛ wo, kaa kristalo ngɛ matsɛ sɛ ɔ hɛ mi.

Adebɔ níhi nɛ wami ngɛ a mi eywiɛ nɛ hɛ ngmɛhi hyi a hɛ mi kɛ a se tɔtɔɔtɔ ɔ ngɛ matsɛ sɛ ɔ* kpɛti kɛ e he tsuo kɛ kpe. 7 Kekleekle adebɔ nɔ́ nɛ wami ngɛ e mi ɔ ngɛ kaa jata, nɛ adebɔ nɔ́ nɛ wami ngɛ e mi enyɔne ɔ ngɛ kaa na ku nyafii, nɛ adebɔ nɔ́ nɛ wami ngɛ e mi etɛne ɔ hɛ mi ngɛ kaa adesa hɛ mi, nɛ adebɔ nɔ́ nɛ wami ngɛ e mi eywiɛne ɔ ngɛ kaa kɔle nɛ ngɛ tee. 8 Ngɛ adebɔ níhi nɛ wami ngɛ a mi eywiɛ ɔmɛ a blɔ fa mi ɔ, a ti nɔ fɛɛ nɔ ngɛ pɛli ekpa; hɛ ngmɛhi hyi a pɛli ɔmɛ a nɔ kɛ a sisi tɔtɔɔtɔ. Nɛ daa nyɔ kɛ pia a, a ngɛ dee ke: “Klɔuklɔu, klɔuklɔu, klɔuklɔu ji Yehowa* Mawu, Ope ɔ, nɔ nɛ e ngɛ momo ɔ, nɛ e ngɛ ɔ, nɛ e ma a.”

9 Be fɛɛ be nɛ adebɔ níhi nɛ wami ngɛ a mi ɔ maa wo Nɔ nɛ e hii si ngɛ matsɛ sɛ ɔ nɔ ɔ, nɛ ji Nɔ nɛ e ngɛ kɛ yaa neneene kɛ neneene ɔ hɛ mi nyami nɛ a maa bu lɛ nɛ a maa na lɛ si ɔ, 10 nikɔtɔmahi 24 ɔ nɔɔ si ngɛ Nɔ nɛ e hii si ngɛ matsɛ ɔ sɛ ɔ nɔ ɔ hɛ mi, nɛ a jaa Nɔ nɛ e ngɛ kɛ yaa neneene kɛ neneene ɔ, nɛ a ngɔɔ a jlasi ɔmɛ kɛ pueɔ matsɛ sɛ ɔ hɛ mi, nɛ a deɔ ke: 11 “Yehowa* wa Mawu, mo ji nɔ nɛ sa kaa o ngɔ hɛ mi nyami, bumi, kɛ he wami, ejakaa mo lɛ o bɔ níhi tsuo, nɛ o suɔmi nya nɛ a ba si himi mi, nɛ a bɔ mɛ ngɛ.”

5 Nɛ i na womi kpo ko nɛ a ngma ní ngɛ e hɛ mi kɛ e se* tsuo nɛ a ngɔ nya sɔumi níhi kpaago kɛ sɔu nya kpɛkpɛtɛɛ ngɛ Nɔ nɛ e hii si ngɛ matsɛ sɛ ɔ nɔ ɔ hiɔ nine mi. 2 Nɛ i na hiɔwe bɔfo he walɔ ko nɛ e kɛ gbi nɛ nya wa ngɛ jajee ke: “Mɛnɔ sa kaa e bliɔ womi kpo ɔ nya nɛ e tsɔɔ e nya sɔumi ní ɔmɛ?” 3 Se nɔ ko be hiɔwe aloo zugba a nɔ aloo zugba a sisi nɛ e nyɛ nɛ e bli womi kpo ɔ nya, aloo e nyɛ nɛ e hyɛ mi. 4 I fo ya wawɛɛ nitsɛ, ejakaa a nɛ nɔ ko nɛ sa nɛ e ma bli womi kpo ɔ nya aloo e hyɛ mi. 5 Se nikɔtɔma amɛ a ti nɔ kake de mi ke: “Jɔɔ ya fomi. Hyɛ! Yuda wɛtso ɔ mi Jata a, nɛ ji David sipoku ɔ ye kunimi bɔ nɛ pee nɛ e bli womi kpo ɔ mi nɛ e bli e nya sɔumi ní kpaago ɔmɛ.”

6 Nɛ i na jijɔ bi ko nɛ e ngɛ kaa nɔ́ nɛ a gbe lɛ, nɛ e daa si ngɛ matsɛ sɛ ɔ kɛ adebɔ níhi nɛ wami ngɛ a mi eywiɛ ɔmɛ kɛ nikɔtɔma amɛ a kpɛti, e ngɛ koli kpaago kɛ hɛ ngmɛhi kpaago, nɛ hɛ ngmɛ ɔmɛ daa si kɛ ha Mawu mumi kpaago ɔmɛ nɛ a tsɔ mɛ kɛ ho zugba a nɔ tsuo ya a. 7 O ya nɔuu nɛ e ba hɛ mi nɛ e ba ngɔ womi kpo ɔ ngɛ Nɔ nɛ e hii si ngɛ matsɛ sɛ ɔ nɔ ɔ hiɔ nine mi. 8 Benɛ e ngɔ womi kpo ɔ, adebɔ níhi nɛ wami ngɛ a mi eywiɛ ɔmɛ kɛ nikɔtɔmahi 24 ɔ nɔ si ngɛ Jijɔ Bi ɔ hɛ mi, nɛ a ti nɔ fɛɛ nɔ hɛɛ saku kɛ sika tsu kpluhi nɛ tsopa kɛ e he via hyi mɛ tɔ. (Tsopa kɛ e he via a daa si kɛ ha ni klɔuklɔu ɔmɛ a sɔlemihi.) 9 Nɛ a la la ehe ko ke: “Mo lɛ o sa kaa o ngɔɔ womi kpo ɔ nɛ o bliɔ e nya sɔumi ní ɔmɛ, ejakaa a gbe mo nɛ o ngɔ o muɔ ɔ kɛ he nihi kɛ je wɛtso fɛɛ wɛtso kɛ lilɛ* kɛ nimli kɛ je ma mi ngɔ ha Mawu, 10 nɛ o ngɔ mɛ kɛ pee matsɛ yemi kɛ osɔfohi kɛ ha wa Mawu ɔ, nɛ a maa ye zugba a nɔ kaa matsɛmɛ.”

11 Nɛ i na, nɛ i nu hiɔwe bɔfohi babauu nɛ a bɔle matsɛ sɛ ɔ kɛ adebɔ níhi nɛ wami ngɛ a mi ɔ kɛ nikɔtɔma amɛ a gbi, nɛ a yibɔ ji akpe nyɔngmahi abɔ nɛ bɔ he akpe nyɔngmahi abɔ kɛ akpehi abɔ nɛ bɔ he akpehi abɔ, 12 nɛ a kɛ gbi nɛ nya wa ngɛ dee ke: “Jijɔ Bi ɔ nɛ a gbe lɛ ɔ sa kaa e ngɔɔ he wami kɛ ní namihi kɛ juɛmi kɛ nyɛmi kɛ bumi kɛ hɛ mi nyami kɛ jɔɔmi.”

13 Nɛ i nu nɛ adebɔ nɔ́ fɛɛ adebɔ nɔ́ nɛ e ngɛ hiɔwe kɛ zugba a nɔ kɛ zugba a sisi kɛ wo ɔ nɔ kɛ níhi tsuo nɛ a ngɛ a mi ɔ ngɛ dee ke: “A ngɔ jɔɔmi kɛ bumi kɛ hɛ mi nyami kɛ he wami kɛ ha Nɔ nɛ e hii si ngɛ matsɛ sɛ ɔ nɔ ɔ, kɛ Jijɔ Bi ɔ kɛ ya neneene kɛ neneene.” 14 Adebɔ níhi nɛ wami ngɛ a mi eywiɛ ɔmɛ ngɛ dee ke: “Amen!” nɛ nikɔtɔma amɛ nɔ si nɛ a ja Mawu.

6 Nɛ i na nɛ Jijɔ Bi ɔ bli nya sɔumi ní kpaago ɔmɛ a kpɛti kake, nɛ i nu nɛ adebɔ níhi nɛ wami ngɛ a mi ɔmɛ a ti nɔ kake kɛ gbi nɛ ngɛ kaa hiɔwe simi de ke: “Ba!” 2 Nɛ i na, nɛ hyɛ! okpɔngɔ futaa ko, nɛ nɔ nɛ e hii si ngɛ nɔ ɔ hɛɛ kɛ̃ɛ̃; nɛ a ha lɛ jlasi, nɛ e je kpo nɛ e ngɛ kunimi yee, nɛ e maa gbe e kunimi yemi ɔ nya.

3 Benɛ e bli nya sɔumi nɔ́ enyɔne ɔ, i nu nɛ adebɔ nɔ́ nɛ wami ngɛ e mi enyɔne ɔ de ke: “Ba!” 4 Ekpa ko je kpo, okpɔngɔ tsutsuutsu kaa la, nɛ a ha nɔ nɛ e hii si ngɛ nɔ ɔ he blɔ kaa e je tue mi jɔmi kɛ je zugba a nɔ konɛ a gbe a sibi, nɛ a ha lɛ klaate ngua ko.

5 Benɛ e bli nya sɔumi nɔ́ etɛne ɔ, i nu nɛ adebɔ nɔ́ nɛ wami ngɛ e mi etɛne ɔ de ke: “Ba!” Nɛ i na, nɛ hyɛ! okpɔngɔ yumu ko, nɛ nɔ nɛ e hii si ngɛ nɔ ɔ hɛɛ tsesi enyɔ sɛni ko ngɛ e dɛ mi. 6 I nu pɛmi ko nɛ ngɛ kaa gbi ngɛ adebɔ níhi nɛ wami ngɛ a mi eywiɛ ɔmɛ a kpɛti ke: “Ngma kwat kake ɔ, denario* kake, kɛ akoko kwat etɛ ɔ, denario kake; nɛ koo ye oliv nu ɔ kɛ wai ɔ awi.”

7 Benɛ e bli nya sɔumi nɔ́ eywiɛne ɔ, i nu adebɔ nɔ́ nɛ wami ngɛ e mi eywiɛne ɔ gbi, nɛ e de ke: “Ba!” 8 Nɛ i na, nɛ hyɛ! okpɔngɔ lazulazu ko, nɛ nɔ nɛ e hii si ngɛ nɔ ɔ biɛ ji Gbenɔ. Nɛ Gbeje* ngɛ e se nyɛɛe haa. Nɛ a ha mɛ he blɔ ngɛ zugba a mi dlami eywiɛ mi kake nɔ, kaa a ngɔ klaate gagaaga ko, kɛ hwɔ, kɛ gbenɔ hiɔ, kɛ zugba a nɔ lohwe awi yeli kɛ gbe nihi.

9 Benɛ e bli nya sɔumi nɔ́ enuɔne ɔ, i na nihi nɛ a gbe mɛ ngɛ Mawu munyu ɔ kɛ odase nɛ a ye ɔ he ɔmɛ a susumahi* ngɛ afɔle sami la tɛ ɔ sisi. 10 A kɛ gbi nɛ nya wa kpa ngmlaa ke: “Nyɔmtsɛ Matsɛ, nɔ klɔuklɔu kɛ anɔkualetsɛ, mɛni be po nɛ o maa kojo nihi nɛ a ngɛ zugba a nɔ ɔ, nɛ o maa ye wa muɔ ɔ he lue?” 11 Nɛ a ha a ti nɔ fɛɛ nɔ tade futaa klɔii ko, nɛ a de mɛ ke a mlɛ be bɔɔ kɛ yaa si be nɛ a nyɛmimɛ nyɔguɛ ɔmɛ kɛ a nyɛmimɛ ɔmɛ nɛ e be kɛe nɛ a maa gbe mɛ kaa bɔ nɛ a gbe mɛ ɔ, a yibɔ ɔ maa su.

12 Nɛ i na nɛ e bli nya sɔumi nɔ́ ekpane ɔ, nɛ zugba mimiɛɛmi ko nɛ nya wa ya nɔ; nɛ pu ɔ pee tuu kaa kpekpe nɛ a kɛ bwɔmi* pee, nɛ nyɔhiɔ ɔ tsuo pee kaa muɔ, 13 nɛ dodoe ɔmɛ nɛ a ngɛ hiɔwe ɔ tsɔ fiaa zugba a nɔ kaa bɔ nɛ ke kɔɔhiɔ nɛ nya wa fia fig tso nɛ fig ngmlikitihi wɔleɔ kɛ pueɔ si ɔ. 14 Nɛ hiɔwe ɔ je kaa womi kpo nɛ a ngɛ kokloe, nɛ a je yoku fɛɛ yoku kɛ zugba kpɔ fɛɛ zugba kpɔ nɛ nyu bɔle lɛ ɔ kɛ je e blɔ he. 15 Kɛkɛ nɛ zugba a nɔ matsɛmɛ ɔmɛ, ma nikɔtɔma amɛ, ta buli a nyatsɛ ngua amɛ, niatsɛmɛ, he wali, nyɔguɛ fɛɛ nyɔguɛ, kɛ he yelɔ fɛɛ he yelɔ laa a he ngɛ tɛ puɔhi kɛ tɛ sahi a mi ngɛ yoku ɔmɛ a mi. 16 Nɛ a ya nɔ nɛ a ngɛ yoku ɔmɛ kɛ tɛ sa amɛ dee ke: “Nyɛɛ nɔɔ wa nɔ nɛ nyɛɛ ngɔ wɔ kɛ laa kɛ je Nɔ nɛ e hii si ngɛ matsɛ sɛ ɔ nɔ ɔ hɛ mi, kɛ Jijɔ Bi ɔ we abofu ɔ nya, 17 ejakaa a we abofu ligbi ngua a ba, nɛ mɛnɔ ma nyɛ maa da si?”

7 Enɛ ɔ se ɔ, i na hiɔwe bɔfohi eywiɛ nɛ a daa si ngɛ zugba a kɔ̃ nya eywiɛ ɔmɛ, nɛ a hɛɛ zugba a nɔ kɔɔhiɔ eywiɛ ɔmɛ a mi kpɛii konɛ kɔɔhiɔ ko nɛ ko fia ngɛ zugba a nɔ, aloo ngɛ wo ɔ nɔ, aloo ngɛ tso ko nɔ. 2 Nɛ i na hiɔwe bɔfo kpa ko nɛ e ngɛ kuɔe kɛ je puje he kɛ ma, nɛ e hɛɛ Mawu hɛ kalɔ ɔ nya sɔumi nɔ́ ɔ; nɛ e kɛ gbi nɛ nya wa de hiɔwe bɔfo eywiɛ ɔmɛ nɛ a ha mɛ he blɔ kaa a ye zugba a kɛ wo ɔ awi ɔ 3 ke: “Nyɛ ko ye zugba a aloo wo ɔ aloo tso ɔmɛ awi kɛ yaa si be nɛ wa maa sɔu wa Mawu ɔ nyɔguɛ ɔmɛ a nya ngɛ a hɛ nya lolo.”

4 Nɛ i nu ni nɛmɛ nɛ a sɔu a nya amɛ a yibɔ, nimli 144,000, nɛ a sɔu a nya kɛ je Israel bi ɔmɛ a wɛtso fɛɛ wɛtso mi:

9 Ngɛ enɛ ɔ se ɔ, i na, nɛ hyɛ! asafo kuu ngua ko nɛ adesa ko nyɛ we nɛ e kane, nɛ a je je mahi tsuo kɛ wɛtsohi kɛ nihi kɛ lilɛhi* a mi, nɛ a daa si ngɛ matsɛ sɛ ɔ kɛ Jijɔ Bi ɔ hɛ mi, nɛ a wo tade hiɔ klɔiihi; nɛ tã kũɔmihi* ngɛ a dɛ mi. 10 Nɛ a ya nɔ nɛ a kɛ gbi nɛ nya wa ngɛ ngmlaa kpae ke: “Wa yi wami hemi ɔ ngɛ wa Mawu ɔ, nɔ nɛ e hii si ngɛ matsɛ sɛ ɔ nɔ ɔ, kɛ e Jijɔ Bi ɔ a dɛ mi.”

11 Hiɔwe bɔfo ɔmɛ tsuo daa si kɛ bɔle matsɛ sɛ ɔ kɛ nikɔtɔma amɛ kɛ adebɔ níhi nɛ wami ngɛ a mi eywiɛ ɔmɛ kɛ kpe, nɛ a ngɔ a hɛ mi kɛ bu si ngɛ matsɛ sɛ ɔ hɛ mi nɛ a ja Mawu, 12 nɛ a ngɛ dee ke: “Amen! Ha nɛ a ngɔ yi jemi ɔ kɛ hɛ mi nyami ɔ kɛ juɛmi ɔ kɛ si nami ɔ kɛ bumi ɔ kɛ he wami ɔ kɛ nyɛmi ɔ kɛ ha wa Mawu ɔ kɛ ya neneene kɛ neneene. Amen.”

13 Nikɔtɔma amɛ a kpɛti nɔ kake he nɔ nɛ e bi mi ke: “Ni nɛmɛ nɛ a wo tade hiɔ klɔii ɔmɛ ɔ, mɛnɔmɛ ji mɛ, nɛ jije a je kɛ ba?” 14 Lɔ ɔ he ɔ, amlɔ nɔuu nɛ i de lɛ ke: “Ye nyɔmtsɛ, mo lɛ o le.” Nɛ e de mi ke: “Nimli nɛ ɔmɛ ji ni nɛmɛ nɛ a je amanehlu ngua a mi ɔ nɛ, nɛ a fɔ a tade klɔii ɔmɛ a he nɛ a pee mɛ futaa ngɛ Jijɔ Bi ɔ muɔ ɔ mi. 15 Lɔ ɔ he je nɛ a ngɛ Mawu matsɛ sɛ ɔ hɛ mi nɛ a ngɛ lɛ sɔmɔe ngɛ blɔ nɛ ngɛ klɔuu nɔ nyɔ kɛ pia ngɛ e sɔlemi we ɔ nɛ; nɛ Nɔ nɛ e hii si ngɛ matsɛ sɛ ɔ nɔ ɔ ma bli e bo tsu ɔ mi ngɛ a nɔ. 16 Hwɔ be mɛ yee hu nɛ jã kɛ̃ nɛ kuma hu be mɛ yee, nɛ pu be mɛ sãe, nɛ jã kɛ̃ nɛ la nɛ nya wa ko hu be mɛ sãae, 17 ejakaa Jijɔ Bi ɔ, nɔ nɛ e ngɛ matsɛ sɛ ɔ kpɛti ɔ maa hyɛ a nɔ, nɛ e ma kudɔ mɛ kɛ ya wami nyu hɛ ngmɛhi a he. Nɛ Mawu ma tsu vo nyu fɛɛ vo nyu ngɛ a hɛ mi.”

8 Benɛ e bli nya sɔumi nɔ́ kpaagone ɔ, hiɔwe jɔ dii maa pee ngmlɛfia fã. 2 Nɛ i na hiɔwe bɔfo kpaago ɔmɛ nɛ a daa si ngɛ Mawu hɛ mi ɔ, nɛ a ha mɛ titimati kpaago.

3 Hiɔwe bɔfo kpa ko nɛ e hɛɛ sika tsu tsopa kɛ e he via kplu* ko ba nɛ e ba da si ngɛ afɔle sami la tɛ ɔ he, nɛ a ha lɛ tsopa kɛ e he via fuu kaa e sã kɛ piɛɛ ni klɔuklɔu ɔmɛ tsuo a sɔlemi ɔmɛ a he ngɛ sika tsu afɔle sami la tɛ ɔ nɛ ngɛ matsɛ sɛ ɔ hɛ mi ɔ nɔ. 4 Nɛ tsopa kɛ e he via la su ku ɔ nɛ je hiɔwe bɔfo ɔ dɛ mi ɔ piɛɛ ni klɔuklɔu ɔmɛ a sɔlemi ɔmɛ a he kɛ kuɔ kɛ ho Mawu hɛ mi ya. 5 Se amlɔ nɔuu ɔ, hiɔwe bɔfo ɔ ngɔ tsopa kɛ e he via kplu ɔ, nɛ e je la ngɛ afɔle sami la tɛ ɔ nɔ kɛ wo mi nɛ e hyi tɔ, nɛ e sake ngɔ fɔ zugba a nɔ. Nɛ hiɔwe simihi kɛ gbihi kɛ oslabai gbamihi kɛ zugba mimiɛɛmi ba. 6 Nɛ hiɔwe bɔfo kpaago ɔmɛ nɛ a hɛɛ titimati kpaago ɔmɛ ɔ pee klaalo konɛ a kpã titimati ɔmɛ.

7 Kekleekle nɔ ɔ kpã e titimati ɔ. Nɛ gbiɛ ngo ngu kɛ la nɛ muɔ futu mi ba, nɛ a sake ngɔ pue zugba a nɔ; nɛ zugba a mi dlami etɛ mi kake sã, nɛ tso ɔmɛ a mi dlami etɛ mi kake sã, nɛ ba mumu ɔmɛ tsuo sã.

8 Hiɔwe bɔfo enyɔne ɔ kpã e titimati ɔ, nɛ a sake nɔ́ ko nɛ ngɛ kaa yoku ngua ko nɛ ngɛ tsoe gegeege ngɔ fɔ wo ɔ mi. Nɛ wo ɔ mi dlami etɛ mi kake plɛ pee muɔ; 9 nɛ adebɔ níhi nɛ wami ngɛ a mi* ngɛ wo ɔ mi ɔ mi dlami etɛ mi kake gbo, nɛ mele ɔmɛ a mi dlami etɛ mi kake butu.

10 Hiɔwe bɔfo etɛne ɔ kpã e titimati ɔ. Nɛ dodoe ngua ko nɛ ngɛ tsoe kaa kane je hiɔwe kɛ ba nɔ si, nɛ e ba nɔ pa amɛ kɛ nyu hɛ ngmɛ ɔmɛ a mi dlami etɛ mi kake mi. 11 Dodoe ɔ biɛ ji Nɔ́ Nɛ Dooɔ. Nɛ nyu ɔmɛ a mi dlami etɛ mi kake plɛ pee nɔ́ nɛ dooɔ, nɛ nyu ɔ gbe nihi fuu, ejakaa a ha nɛ a dooɔ.

12 Hiɔwe bɔfo eywiɛne ɔ kpã e titimati ɔ. Nɛ a fia pu ɔ mi dlami etɛ mi kake kɛ nyɔhiɔ ɔ mi dlami etɛ mi kake kɛ dodoe ɔmɛ a mi dlami etɛ mi kake nɔ́, konɛ a mi dlami etɛɛtɛ mi kakaaka nɛ wo diblii, nɛ́ je nami mi dlami etɛ mi kake nɛ ko na la, nɛ je jɔmi hu jã nɔuu.

13 Nɛ i na kɔle ko nɛ e ngɛ tee ngɛ hiɔwe kpɛti, nɛ i nu nɛ e kɛ gbi nɛ nya wa de ke: “Musu, musu, musu tloo ni nɛmɛ nɛ a ngɛ zugba a nɔ ɔ ngɛ titimatihi a pɛmi nɛ maa je titimatihi nɛ piɛ nɛ e be kɛe nɛ hiɔwe bɔfo etɛ ɔmɛ ma kpa a mi kɛ ba a he je!”

9 Hiɔwe bɔfo enuɔne ɔ kpã e titimati ɔ. Nɛ i na dodoe ko nɛ e tsɔ kɛ je hiɔwe kɛ ba nɔ zugba, nɛ a ngɔ muɔ voo ɔ nya safe ɔ kɛ ha lɛ. 2 E bli muɔ voo ɔ nya, nɛ la su ku nɛ ngɛ kaa flɔɔnɔɔ ngua ko mi la su ku je muɔ ɔ mi kɛ ba, nɛ pu ɔ wo diblii, nɛ jã kɛ̃ nɛ muɔ ɔ nya la su ku ɔ hu ha nɛ kɔɔhiɔ ɔ mi pee tuu. 3 Nɛ baalɛhi je la su ku ɔ mi kɛ ba zugba a nɔ, nɛ a ha mɛ he wami, nɛ jamɛ a he wami ɔ nɔuu nɛ zugba a nɔ nyingmogblakoto ɔmɛ ngɛ. 4 A de mɛ ke a ko ye zugba a nɔ nga aloo ba mumu ko aloo tso ko awi, mohu ɔ, ni nɛmɛ nɛ Mawu nɔ́ nya sɔumi nɔ́ ɔ be a hɛ nya a pɛ.

5 Nɛ a ha baalɛ ɔmɛ he blɔ, pi kaa a gbe mɛ, se mohu a pii mɛ nyɔhiɔ enuɔ, nɛ a piimi ɔ ngɛ kaa bɔ nɛ ke nyingmogblakoto tsɛ̃ nɔ ko nɛ nɔ ɔ piiɔ ɔ. 6 Ngɛ jamɛ a ligbi ɔmɛ a mi ɔ, nihi ma hla gbenɔ se blɔ, se a be lɛ nae, nɛ a maa suɔ wawɛɛ kaa a ma gbo, se gbenɔ maa tu fo kɛ je a he.

7 Baalɛ ɔmɛ je okpɔngɔhi nɛ́ a dla mɛ kɛ ha ta; nɔ́ ko ngɛ a yi kaa sika tsu jlasi, nɛ a hɛ mi ngɛ kaa adesa hɛ mi, 8 se a yi bwɔmi ngɛ kaa yihi a yi bwɔmi. Nɛ a lunguhi ngɛ kaa jatahi a lungu, 9 nɛ a ngɛ gugue nɔ damahi kaa dade gugue nɔ damahi. Nɛ a pɛli ɔmɛ a pɛmi ngɛ kaa zugba lɛhi nɛ okpɔngɔhi ngɛ gblae kɛ fo kɛ yaa ta. 10 Jehanɛ se hu ɔ, a ngɛ hlemihi kɛ a nya níhi nɛ a kɛ tsɛ̃ɔ nɔ kaa nyingmogblakotohi, nɛ a he wami ɔ nɛ a kɛ maa plaa ni ɔmɛ nyɔhiɔ enuɔ ɔ ngɛ a hlemi ɔmɛ a mi. 11 A ngɛ matsɛ ngɛ a nya, lɛ ji muɔ voo ɔ nya bɔfo ɔ nɛ. A tsɛɔ lɛ ngɛ Hebri gbi mi ke Abadɔn,* se a tsɛɔ lɛ ngɛ Hela gbi mi ke Apoliɔn.*

12 Musu ɔ kake ba be. Hyɛ! Musu kpahi enyɔ ma ngɛ ní nɛ ɔmɛ a se.

13 Hiɔwe bɔfo ekpane ɔ kpã e titimati ɔ. Nɛ i nu gbi kake kɛ je sika tsu afɔle sami la tɛ ɔ nɛ ngɛ Mawu hɛ mi ɔ koli ɔmɛ a mi, 14 nɛ e de hiɔwe bɔfo ekpane ɔ nɛ e hɛɛ titimati ɔ ke: “Pɛne hiɔwe bɔfo eywiɛ ɔmɛ nɛ a fĩ mɛ ngɛ Yufrate pa ngua a nya a.” 15 Nɛ a pɛne hiɔwe bɔfo eywiɛ ɔmɛ nɛ a dla mɛ kɛ ha ngmlɛfia a kɛ ligbi ɔ kɛ nyɔhiɔ ɔ kɛ jeha a konɛ a gbe ni ɔmɛ a mi dlami etɛ mi kake.

16 Ta buli nɛ a hiɔ okpɔngɔ nɔ ɔmɛ a yibɔ ji akpe nyingmi enyɔ nɛ bɔ he akpe nyɔngma;* i nu a yibɔ ɔ. 17 Nɛ bɔ nɛ i na okpɔngɔ ɔmɛ kɛ a nɔ hili ɔmɛ ngɛ nina a mi ha ji nɛ ɔ nɛ: A ngɛ gugue nɔ damahi tsutsuutsu kaa la, bluu* kɛ kungwɔ zɔ,* nɛ okpɔngɔ ɔmɛ a yi ngɛ kaa jatahi a yi, nɛ la kɛ la su ku kɛ sɔlfa je kpo ngɛ a nya mi. 18 Haomihi etɛ nɛ ɔmɛ, la a kɛ la su ku ɔ kɛ sɔlfa a nɛ je kpo kɛ je a nya mi ɔ gbe nimli ɔmɛ a mi dlami etɛ mi kake. 19 Ejakaa okpɔngɔ ɔmɛ a he wami ɔ ngɛ a nya mi kɛ a hlemi ɔmɛ a mi, ejakaa a hlemi ɔmɛ ngɛ kaa sinɔhi nɛ a ngɛ yi, nɛ a ngɔɔ ní nɛ ɔmɛ kɛ yeɔ awi.

20 Se ni nɛmɛ nɛ e piɛ nɛ mɛɛ lɛɛ haomi nɛ ɔmɛ gbi mɛ ɔ tsakee we a tsui kɛ ji a nine nya ní tsumi ɔmɛ a he; a kpa we daimonio ɔmɛ kɛ sika tsu, kɛ sika hiɔ, kɛ akɔblee, kɛ tɛ, kɛ tso wɔ ɔmɛ nɛ a hyɛ we nɔ́ nɛ a nui nɔ́ nɛ a nyɛɛ we hulɔ ɔ jami. 21 Nɛ a tsakee we a tsui ngɛ a nɔmlɔ gbemi ɔmɛ kɛ a mumi yayami kɛ ní tsumi ɔmɛ kɛ a we ajuama bɔmi ɔmɛ* kɛ a jumi ɔmɛ a he.

10 Nɛ i na hiɔwe bɔfo he walɔ kpa ko nɛ e ngɛ si kplee kɛ je hiɔwe kɛ ma, nɛ e ha bɔku, nɛ alale ngɛ e yi, nɛ e hɛ mi ngɛ kaa pu, nɛ e nanehi* ngɛ kaa la titimahi, 2 nɛ womi kpo nyafii ko nɛ a pɛne mi ngɛ e dɛ mi. Nɛ e ngɔ e hiɔ nane ɔ kɛ ma wo ɔ nɔ, se e muɔ nane ɔ maa si ngɛ zugba a nɔ, 3 nɛ e kɛ gbi nɛ nya wa kpã ngmlaa kaa bɔ nɛ jata huãa a. Nɛ benɛ e kpã ngmlaa a, hiɔwe simi kpaago ɔmɛ a gbi ɔmɛ tu munyu.

4 Jehanɛ ɔ, benɛ hiɔwe simi kpaago ɔmɛ tu munyu ɔ, jinɛ i ma ngmami, se i nu gbi ko kɛ je hiɔwe nɛ e de ke: “Sɔuu níhi nɛ hiɔwe simi kpaago ɔmɛ de ɔ nya, nɛ koo ngma mɛ kɛ fɔ si.” 5 Hiɔwe bɔfo ɔ nɛ i na nɛ e daa si ngɛ wo ɔ kɛ zugba a nɔ ɔ wo e hiɔ nine nɔ kɛ ya hiɔwe, 6 nɛ e kɛ Nɔ nɛ e ngɛ kɛ yaa neneene kɛ neneene ɔ, nɔ nɛ e bɔ hiɔwe kɛ níhi nɛ ngɛ mi, kɛ zugba a kɛ níhi nɛ ngɛ mi, kɛ wo ɔ kɛ níhi nɛ ngɛ mi ɔ kã kita ke: “E be se kpɛe hu. 7 Se ngɛ ligbi ɔmɛ a mi ke e piɛ bɔɔ nɛ hiɔwe bɔfo kpaagone ɔ ma kpã e titimati ɔ, kɛkɛ lɛɛ a gbe laami sane nɛ e ngɛ klɔuu ɔ nɛ Mawu jaje kaa sane kpakpa kɛ tsɔɔ lɛ nitsɛ e nyɔguɛ ɔmɛ nɛ ji gbali ɔmɛ ɔ nya ji lɔ ɔ nɛ.”

8 Nɛ i nu gbi ɔ kɛ je hiɔwe nɛ e kɛ mi ngɛ munyu tue ekohu ke: “Moo ya nɛ o ya ngɔ womi kpo ɔ nɛ a bli nya nɛ e ngɛ hiɔwe bɔfo ɔ nɛ e daa si ngɛ wo ɔ kɛ zugba a nɔ ɔ dɛ mi ɔ.” 9 I ya hiɔwe bɔfo ɔ ngɔ nɛ i ya de lɛ ke e ha mi womi kpo nyafii ɔ. E de mi ke: “Ngɔɔ nɛ o ye, nɛ e ma ha nɛ o mi mi maa dooɔ, se e maa ngɔɔ ngɛ o nya mi kaa hwo.” 10 I ngɔ womi kpo nyafii ɔ ngɛ hiɔwe bɔfo ɔ dɛ nɛ i ye, nɛ e ngɔɔ ngɛ ye nya mi kaa hwo, se benɛ i ye ɔ, e ha nɛ ye mi mi dooɔ. 11 Nɛ a de mi ke: “E sa nɛ o gba ekohu kɛ kɔ nihi kɛ je mahi kɛ lilɛhi* kɛ matsɛmɛ fuu a he.”

11 Nɛ a ha mi go ko nɛ e ngɛ kaa tso,* nɛ e de ke: “Tee si nɛ o susu Mawu sɔlemi we ɔ kɛ afɔle sami la tɛ ɔ kɛ ni nɛmɛ nɛ a ngɛ jae ngɛ mi ɔ. 2 Se kpo ɔ nɔ ngɛ sɔlemi we ɔ se ɔ lɛɛ jee he, nɛ ko susu lejɛ ɔ, ejakaa a ngɔ lejɛ ɔ kɛ ha je ma amɛ, nɛ a maa naa ma klɔuklɔu ɔ nɔ ngɛ a nane si nyɔhiɔ 42. 3 Ma ha nɛ ye we odase* enyɔ ɔmɛ ma bu kpekpe kɛ gba ligbi 1,260.” 4 A ngɔ oliv tso enyɔ ɔmɛ kɛ kane tso enyɔ ɔmɛ kɛ pee enɛ ɔmɛ a he okadi nɛ a daa si ngɛ zugba a Nyɔmtsɛ ɔ hɛ mi.

5 Ke nɔ ko ngɛ hlae kaa e maa ye mɛ awi ɔ, la jeɔ a nya mi nɛ e ba sãa a he nyɛli ɔmɛ. Ke nɔ ko maa suɔ kaa e maa ye mɛ awi ɔ, blɔ nɔ nɛ e sa kaa a gu kɛ gbe lɛ ji nɛ ɔ nɛ. 6 Nimli nɛ ɔmɛ ngɛ he wami nɛ a kɛ ma nyɛ ma nga hiɔwe nya konɛ hiɔmi nɛ ko nɛ ngɛ a gbami ligbi ɔmɛ a mi, nɛ a ngɛ he wami ngɛ nyuhi a nɔ, nɛ a ma nyɛ ma tsake mɛ kɛ pee muɔ, nɛ a ma nyɛ maa ngɔ haomi slɔɔtohi tsuo kɛ fiaa zugba a si abɔ nɛ a suɔ.

7 Ke a gbe a we odase yemi ɔ nya a, lohwe awi yelɔ ɔ nɛ kuɔɔ kɛ jeɔ muɔ voo ɔ mi kɛ baa a kɛ mɛ maa hwu ta, nɛ e maa ye a nɔ kunimi nɛ e maa gbe mɛ. 8 Nɛ a gbogboe ɔmɛ ma pue si ngɛ gbɛjegbɛ ngua a nɔ ngɛ ma kpetekpleenyɛ ɔ nɛ́ ngɛ mumi mi sisi numi nya a, a tsɛɔ ke Sodom kɛ Ijipt ɔ mi, he nɛ a gbe a Nyɔmtsɛ ɔ hu ngɛ tso nɔ ngɛ ɔ. 9 Nɛ nimli ɔmɛ kɛ wɛtso ɔmɛ kɛ lilɛ* ɔmɛ kɛ je ma amɛ a mi ni ɔmɛ maa hyɛ a gbogboe ɔmɛ ligbi etɛ kɛ fã, nɛ a kplɛɛ we nɛ a ya to a gbogboe ɔmɛ ngɛ yɔkɔ mi. 10 Nɛ ni nɛmɛ nɛ a ngɛ zugba a nɔ ɔ nya nɛ a bua jɔ a he wawɛɛ ngɛ a gbenɔ ɔ he je, nɛ a ngɔɔ nike níhi kɛ ya haa a sibi, ejakaa gbali enyɔ nɛ ɔmɛ pii nihi nɛ a ngɛ zugba a nɔ ɔ.

11 Ngɛ ligbi etɛ kɛ fã a se ɔ, wami mumi nɛ je Mawu ngɔ ɔ sɛ a mi, nɛ a te si kɛ da a nane nɔ, nɛ gbeye nu ni nɛmɛ nɛ a na mɛ ɔ. 12 Nɛ a nu gbi nɛ nya wa ko kɛ je hiɔwe nɛ e de mɛ ke: “Nyɛɛ ba hiɛ ɔ.” Nɛ a kuɔ kɛ ho hiɔwe ya ngɛ bɔku ɔ mi, nɛ a he nyɛli ɔmɛ na mɛ.* 13 Ngɛ jamɛ a ngmlɛfia a mi ɔ, zugba mimiɛɛ wawɛɛ, nɛ ma ngua a mi dlami nyɔngma mi kake nɔ si; nɛ zugba mimiɛɛmi ɔ gbe nimli 7,000, nɛ gbeye nu ni nɛmɛ nɛ a piɛ ɔ, nɛ a wo hiɔwe Mawu ɔ hɛ mi nyami.

14 Musu enyɔne ɔ ba be. Hyɛ! musu etɛne ɔ ma kɛ fo.

15 Hiɔwe bɔfo kpaagone ɔ kpã e titimati ɔ. Nɛ gbihi nɛ a he wa pɛ ngɛ hiɔwe nɛ a ngɛ dee ke: “Je ɔ mi matsɛ yemi ɔ ba pee wa Nyɔmtsɛ ɔ kɛ e Kristo ɔ a Matsɛ Yemi, nɛ e maa ye nɔ kaa matsɛ kɛ ya neneene kɛ neneene.”

16 Nɛ nikɔtɔmahi 24 nɛ a hii si ngɛ a matsɛ sɛhi a nɔ ngɛ Mawu hɛ mi ɔ ngɔ a hɛ mi kɛ bu si, nɛ a ja Mawu, 17 nɛ a ngɛ dee ke: “Wa naa mo si, Yehowa Mawu Ope, nɔ nɛ e ngɛ ɔ nɛ e ngɛ momo ɔ, ejakaa o ngɔ o he wami ngua a nɛ o bɔni nɔ yemi kaa matsɛ. 18 Se je ma amɛ a mi mi fu, nɛ mo nitsɛ hu o mi mi fumi ɔ ba, nɛ be nɛ a to ɔ su nɛ́ a maa kojo ni gbogboe ɔmɛ nɛ́ a maa wo o nyɔguɛ ɔmɛ nɛ ji gbali ɔmɛ, kɛ ni klɔuklɔu ɔmɛ kɛ ni nɛmɛ nɛ a yeɔ o biɛ ɔ gbeye, nimli wawi kɛ nimli nguahi ɔ hiɔ, konɛ a kpata ni nɛmɛ nɛ a ngɛ zugba a hɛ mi kpatae ɔmɛ a hɛ mi.”

19 Nɛ a bli Mawu sɔlemi we ɔ nɛ ngɛ hiɔwe ɔ nya, nɛ a na e somi daka a ngɛ e sɔlemi we ɔ. Nɛ oslabai gbamihi kɛ gbihi kɛ hiɔwe simihi kɛ zugba mimiɛɛmi kɛ gbiɛ ngo ngu babauu ba.

12 Lɔ ɔ se ɔ, a na okadi ngua ko ngɛ hiɔwe: Yo ko nɛ a ngɔ pu ɔ kɛ ha e he, nɛ nyɔhiɔ ɔ ngɛ e nane si nɛ dodoe 12 jlasi fĩ e yi, 2 nɛ hɔ ngɛ e he. Nɛ e ngɛ ngmlaa kpae ngɛ e kɔɔmi ɔ kɛ e nɔ́ nami ɔ mi konɛ e fɔ.

3 A na okadi kpã ko hu ngɛ hiɔwe. Hyɛ! Drako ngua ko nɛ e tsuɔ tsutsuutsu kaa la, kɛ e yi kpaago kɛ koli nyɔngma, nɛ matsɛ jlasihi fĩ e yi ɔmɛ; 4 nɛ e hlemi ɔ gblaa hiɔwe dodoe ɔmɛ a mi dlami etɛ mi kake, nɛ e sake mɛ ngɔ pue zugba a nɔ. Nɛ drako ɔ ya nɔ nɛ e daa si ngɛ yo ɔ nɛ e be kɛe nɛ e ma fɔ ɔ hɛ mi konɛ ke yo ɔ ná nɛ e fɔ ɔ, e maa mi e bi ɔ.

5 Nɛ yo ɔ fɔ binyumu ko, nɔ nɛ e maa ngɔ dade tso kɛ hyɛ je ma amɛ tsuo a nɔ ɔ. Nɛ a sa e bi ɔ kɛ ho Mawu ngɔ ya kɛ e matsɛ sɛ ɔ he ya. 6 Nɛ yo ɔ tu fo kɛ ho nga a nɔ ya, he nɛ Mawu dla he ko ngɛ kɛ ha lɛ ɔ, kɛ he nɛ a maa lɛ lɛ ngɛ ligbi 1,260.

7 Nɛ ta fɛ ngɛ hiɔwe: Maikɛl* kɛ e hiɔwe bɔfo ɔmɛ kɛ drako ɔ hwu ta, nɛ drako ɔ kɛ e bɔfo ɔmɛ hu kɛ mɛ hwu 8 se a yi kunimi,* nɛ jã nɔuu kɛ̃ nɛ a nɛ he ko kɛ ha we mɛ hu ngɛ hiɔwe. 9 Lɔ ɔ he ɔ, a sake drako ngua a, blema sinɔ ɔ, nɔ nɛ a tsɛɛ lɛ ke Abosiami kɛ Satan ɔ, nɔ nɛ e ngɛ nihi nɛ a ngɛ zugba a nɔ hehi tsuo nɛ nimli ngɛ ɔ sisie ɔ kɛ fɔ he; a sake lɛ ngɔ fɔ zugba a nɔ, nɛ a sake e bɔfo ɔmɛ hu kɛ piɛɛ e he. 10 I nu gbi nɛ nya wa ko ngɛ hiɔwe ke:

“Jehanɛ ɔ lɛɛ yi wami hemi ɔ kɛ he wami ɔ kɛ wa Mawu ɔ Matsɛ Yemi ɔ kɛ e Kristo ɔ he wami ɔ ba, ejakaa a sake wa nyɛmimɛ ɔmɛ a nya polɔ ɔ kɛ fɔ he, nɔ nɛ e poɔ a nya nyɔ kɛ pia ngɛ wa Mawu ɔ hɛ mi ɔ! 11 Nɛ a gu Jijɔ Bi ɔ muɔ ɔ kɛ a we odase yemi munyu ɔ nɔ kɛ ye e nɔ kunimi, nɛ a ná we suɔmi kɛ ha we a susumahi* ngɛ gbenɔ hɛ mi po. 12 Enɛ ɔ he ɔ, nyɛ hiɔwehi kɛ nyɛ nihi nɛ nyɛ ngɛ a mi ɔ, nyɛ nya! Musu tloo je ɔ kɛ wo ɔ, ejakaa Abosiami kple si kɛ ba nyɛ ngɔ, e mi mi fu wawɛɛ nitsɛ, ejakaa e le kaa be bɔɔ pɛ nɛ e ngɛ.”

13 Jehanɛ ɔ, benɛ drako ɔ na kaa a sake lɛ kɛ fɔ zugba a nɔ ɔ, e wa yo ɔ nɛ e fɔ binyumu ɔ yi mi. 14 Se a ha yo ɔ kɔle ngua a pɛli enyɔ ɔmɛ, konɛ e te kɛ je sinɔ ɔ hɛ mi kɛ ya nga a nɔ ngɛ e sihi he ɔ, he nɛ a ma ha lɛ niye ní be kɛ behi kɛ be fã* ngɛ ɔ.

15 Nɛ sinɔ ɔ su nyu nɛ ngɛ kaa pa kɛ je e nya mi kɛ nyɛɛ yo ɔ se konɛ e ha nɛ pa a nɛ ngɔ yo ɔ kɛ ho.* 16 Se zugba a ba je ngmlaa ha yo ɔ, nɛ zugba a bli e nya mi nɛ e mii pa a nɛ drako ɔ su kɛ je e nya mi ɔ. 17 Lɔ ɔ he ɔ, drako ɔ mi mi fu yo ɔ nɛ e je kɛ ho konɛ e kɛ yo ɔ nina* nɛ piɛ ɔ, nɛ ji ni nɛmɛ nɛ a yeɔ Mawu kita amɛ a nɔ, nɛ a hɛɛ Yesu he odase yemi ní tsumi ɔ mi ɔ nɛ ya hwu ta.

13 Nɛ e* da si kpɛii ngɛ wo nya zia a nɔ.

Nɛ i na lohwe awi yelɔ ko nɛ e ngɛ kpo jee ngɛ wo ɔ mi kɛ ma, e ngɛ koli nyɔngma kɛ yi kpaago, nɛ matsɛ jlasihi fĩ e koli nyɔngma amɛ, se musu bɔmi biɛhi ngɛ e yi ɔmɛ a he. 2 Jehanɛ ɔ, lohwe awi yelɔ ɔ nɛ i na a ngɛ kaa ngatsɛ, se e nanewɛɛhi ngɛ kaa osisiblisi nanewɛɛhi, nɛ e nya ngɛ kaa jata nya. Nɛ drako ɔ ngɔ e he wami ɔ kɛ e matsɛ sɛ ɔ kɛ blɔ nya ngua kɛ ha lohwe ɔ.

3 I na kaa a plaa e yi ɔmɛ a kpɛti kake gbenɔ plaami, se a tsa e gbenɔ pa a ha lɛ, nɛ zugba a tsuo nyɛɛ lohwe awi yelɔ ɔ se kɛ bua jɔmi. 4 Nɛ a ja drako ɔ, akɛnɛ e ngɔ he wami ɔ kɛ ha lohwe awi yelɔ ɔ he je, nɛ a ja lohwe awi yelɔ ɔ kɛ munyuhi nɛ ji: “Mɛnɔ lɛ e ngɛ kaa lohwe awi yelɔ ɔ, nɛ mɛnɔ kɛ lɛ ma nyɛ maa hwu ta?” 5 A ha lɛ nya nɛ ngɛ munyu nguanguahi kɛ musu bɔmi munyuhi tue, nɛ a ha lɛ he wami konɛ e tsu ní nyɔhiɔ 42. 6 Nɛ e pã e nya mi nɛ e tu musu bɔmi munyuhi kɛ si Mawu, nɛ e tu Mawu biɛ ɔ kɛ e sihi he ɔ kɛ ni nɛmɛ nɛ a ngɛ hiɔwe ɔ po a he musu bɔmi munyu. 7 A ngmɛ lɛ blɔ kaa e kɛ ni klɔuklɔu ɔmɛ nɛ a hwu ta nɛ́ e ye a nɔ kunimi, nɛ a ha lɛ he wami ngɛ wɛtso fɛɛ wɛtso kɛ nimli kɛ lilɛ* kɛ je ma nɔ. 8 Nɛ nihi tsuo nɛ a ngɛ zugba a nɔ ɔ ma ja lɛ. Kɛ je be nɛ a to je ɔ sisi ɔ, a ngmɛ a biɛ ɔmɛ kake ngmelu po ngɛ Jijɔ Bi ɔ nɛ a gbe lɛ ɔ wami womi kpo ɔ mi.

9 Ke nɔ ko ngɛ tue ɔ, ha nɛ e nu. 10 Ke e sa kaa nɔ ko nɛ e ya nyɔguɛ tso mi ɔ, e maa ya nyɔguɛ tso mi. Ke nɔ ko maa ngɔ klaate kɛ gbe nɔ ɔ,* e sa nɛ a gbe lɛ kɛ klaate. Hiɛ ɔ ji he nɛ e biɔ si fimi kɛ hemi kɛ yemi ngɛ ni klɔuklɔu ɔmɛ a blɔ fa mi ngɛ ɔ nɛ.

11 Lɔ ɔ se ɔ, i na lohwe awi yelɔ kpã ko nɛ e ngɛ kpo jee ngɛ zugba a mi kɛ ma, nɛ e ngɛ koli enyɔ kaa jijɔ bi, se e bɔni munyu tumi kaa drako. 12 E kɛ kekle lohwe awi yelɔ ɔ he wami ɔ tsuo tsuɔ ní ngɛ e hɛ mi. Nɛ e haa nɛ zugba a kɛ nihi nɛ a ngɛ nɔ ɔ jaa kekle lohwe awi yelɔ ɔ nɛ́ e gbenɔ pa a gbo ɔ. 13 Nɛ e pee okadi nguanguahi, e haa nɛ la jeɔ hiɔwe kɛ baa zugba a nɔ po ngɛ adesahi a hɛ mi.

14 E sisiɔ ni nɛmɛ nɛ a ngɛ zugba a nɔ ɔ ngɛ okadihi nɛ a ngmɛ lɛ blɔ nɛ e peeɔ ngɛ lohwe awi yelɔ ɔ hɛ mi ɔ he, be mi nɛ e deɔ ni nɛmɛ nɛ a ngɛ zugba a nɔ ɔ kaa a pee lohwe awi yelɔ ɔ nɛ klaate pa a ngɛ e he se kɛ̃ ɔ, e yi ná wami ɔ he amaga a. 15 Nɛ a ngmɛ lɛ blɔ kaa e ngɔ mumi kɛ wo lohwe awi yelɔ ɔ he amaga a mi, konɛ lohwe awi yelɔ ɔ he amaga a nɛ tu munyu nɛ e ha nɛ a gbe nihi tsuo nɛ a kua ke a be lohwe awi yelɔ ɔ he amaga a jae ɔ hulɔ.

16 E nyɛɔ nihi tsuo—nimli wawi kɛ nimli nguahi, niatsɛmɛ kɛ ohiatsɛmɛ, he yeli kɛ nyɔguɛhi a nɔ—kaa e sa nɛ a ha nɛ a kadi mɛ ngɛ a hiɔ nine he aloo a hɛ nya, 17 nɛ nɔ ko be nyɛe ma he nɔ́ ko aloo e jua ní, ja nɔ nɛ kadimi ɔ, lohwe awi yelɔ ɔ biɛ ɔ aloo e biɛ ɔ yibɔ ɔ ngɛ e he. 18 Hiɛ ɔ ji he nɛ e biɔ juɛmi ngɛ ɔ nɛ: Ha nɔ nɛ e ngɛ nɔ́ se kɔmi ɔ nɛ e bu lohwe awi yelɔ ɔ yibɔ ɔ he akɔtaa, ejakaa e ji adesa yibɔ, nɛ e yibɔ ɔ ji 666.

14 Lɔ ɔ se ɔ, i na, nɛ hyɛ! Jijɔ Bi ɔ daa si ngɛ Zion Yoku ɔ nɔ, nɛ nimli 144,000 nɛ́ a ngma e biɛ kɛ e Tsɛ ɔ biɛ ngɛ a hɛ nya a piɛɛ e he. 2 I nu pɛmi ko nɛ e ngɛ hiɔwe jee kɛ ngɛ bae kaa nyu babauu pɛmi, kaa hiɔwe simi nɛ nya wa pɛmi; nɛ pɛmi ɔ nɛ i nu ɔ ngɛ kaa lali nɛ a ngɛ lae nɛ a ngɛ a sakuhi fiae kɛ ngɛ he toe. 3 Nɛ a ngɛ la ko nɛ e ngɛ kaa la ehe lae ngɛ matsɛ sɛ ɔ hɛ mi kɛ adebɔ níhi nɛ wami ngɛ a mi eywiɛ ɔmɛ kɛ nikɔtɔma amɛ a hɛ mi, nɛ nɔ ko nyɛ we nɛ e le jamɛ a la a lami saminya kaa ja nimli 144,000 ɔ pɛ, ni nɛmɛ nɛ a he mɛ kɛ je zugba a nɔ ɔ. 4 Nimli nɛ ɔmɛ ji nihi nɛ a kɛ yihi ble we a he; ngɛ anɔkuale mi ɔ, a ji nyumuhi nɛ a li yo. Nimli nɛ ɔmɛ ji nihi nɛ a ya nɔ nɛ a ngɛ Jijɔ Bi ɔ se nyɛɛe kɛ yaa he fɛɛ he nɛ e yaa a nɛ. A he nimli nɛ ɔmɛ kɛ je adesahi a kpɛti kaa kekle yiblii kɛ ha Mawu kɛ Jijɔ Bi ɔ, 5 nɛ sisimi munyu ko ji a nya hyɛ; a ji nihi nɛ mu ko be a he.

6 Nɛ i na hiɔwe bɔfo kpa ko nɛ e ngɛ tee ngɛ hiɔwe kpɛti,* nɛ e hɛɛ neneene sane kpakpa a nɛ e maa jaje kɛ tsɔɔ ni nɛmɛ nɛ a ngɛ zugba a nɔ ɔ, je ma fɛɛ je ma kɛ wɛtso kɛ lilɛ* kɛ nihi. 7 E kɛ gbi nɛ nya wa ngɛ dee ke: “Nyɛɛ ye Mawu gbeye nɛ nyɛɛ wo e hɛ mi nyami, ejakaa ngmlɛfia nɛ e kɛ maa kojo ɔ su, lɔ ɔ he ɔ, nyɛ ja Nɔ nɛ e bɔ hiɔwe ɔ kɛ zugba a kɛ wo ɔ kɛ nyu hɛ ngmɛ ɔmɛ ɔ.”

8 Nɔ kpa, nɛ ji hiɔwe bɔfo enyɔne nyɛɛ e se, nɛ e ngɛ dee ke: “E nɔ si! Babilon Ngua a nɔ si, yo ɔ nɛ e ha nɛ je ma amɛ tsuo nu e we ajuama bɔmi* he akɔnɔ* wai ɔ!”

9 Hiɔwe bɔfo kpã ko, nɔ etɛne hu nyɛɛ a se, nɛ e kɛ gbi nɛ nya wa ngɛ dee ke: “Ke nɔ ko ja lohwe awi yelɔ ɔ kɛ e he amaga a nɛ e nine su e kadimi ɔ eko nɔ ngɛ e hɛ nya aloo e nine he ɔ, 10 jamɛ a nɔ ɔ hu maa nu Mawu mi mi fumi wai ɔ nɛ a futuu we mi nɛ a plɛ kɛ wo Mawu mi mi fumi kplu ɔ mi ɔ eko, nɛ a kɛ la kɛ sɔlfa ma pii lɛ ngɛ hiɔwe bɔfo klɔuklɔu ɔmɛ a hɛ mi, kɛ Jijɔ Bi ɔ hu hɛ mi. 11 Nɛ a piimi ɔ he la su ku ɔ teɔ kɛ yaa neneene kɛ neneene, nɛ nyɔnyɔɔnyɔ kɛ piapiaapia a, ni nɛmɛ nɛ a jaa lohwe awi yelɔ ɔ kɛ e he amaga a, kɛ nɔ fɛɛ nɔ nɛ a kɛ e biɛ ɔ kadi lɛ ɔ jɔɔ we a he. 12 Hiɛ ɔ ji he nɛ e biɔ nɛ ni klɔuklɔu ɔmɛ, ni nɛmɛ nɛ a yeɔ Mawu kita amɛ a nɔ nɛ a pɛtɛ Yesu hemi kɛ yemi ɔ he wawɛɛ ɔ nɛ́ a fĩ si ngɛ ɔ nɛ.”

13 Nɛ i nu gbi ko kɛ je hiɔwe ke: “Ngmaa: Gbogboe ɔmɛ nɛ a gbo ngɛ Nyɔmtsɛ ɔ mi kɛ je be nɛ ɔ mi kɛ yaa a ngɛ bua jɔmi. Ee, mumi ɔ ke, ha nɛ a jɔɔ a he kɛ je a dengme gbomi ɔmɛ a he, ejakaa níhi nɛ a pee ɔ nyɛɛɔ a se.”

14 Lɔ ɔ se ɔ, i na, nɛ hyɛ! bɔku futaa ko, nɛ nɔ ko nɛ e ngɛ kaa nɔmlɔ bi hii si ngɛ bɔku ɔ nɔ, nɛ sika tsu jlasi fĩ e yi, nɛ e hɛɛ ní kpami ha nɛ nya ba ngɛ e dɛ mi.

15 Hiɔwe bɔfo kpã je kpo kɛ je sɔlemi we ɔ, nɛ e kɛ gbi nɛ nya wa ngɛ nɔ nɛ e hii si ngɛ bɔku ɔ nɔ ɔ dee ke: “Hiaa o ní kpami ha a nɛ o kpa ní, ejakaa zugba a nɔ ní nɛ a ma kpa a fu saminya.” 16 Nɛ nɔ nɛ e hii si ngɛ bɔku ɔ nɔ ɔ hia e ní kpami ha a kɛ wo zugba a he, nɛ e kpa zugba a nɔ ní.

17 Nɛ hiɔwe bɔfo kpã ko hu pa je kpo kɛ je sɔlemi we ɔ nɛ ngɛ hiɔwe ɔ, nɛ lɛ hu e hɛɛ ní kpami ha ko nɛ nya ba.

18 Nɛ hiɔwe bɔfo kpã ko hu pa je kpo kɛ je afɔle sami la tɛ ɔ mi, nɛ e ngɛ he wami ngɛ la a nɔ. Nɛ e kɛ gbi nɛ nya wa tsɛ nɔ nɛ e hɛɛ ní kpami ha nɛ nya ba a, nɛ e de lɛ ke: “Hiaa o ní kpami ha nɛ nya ba a nɛ o bua zugba a nɔ wai yiblii sau ɔmɛ a nya, ejakaa a nɔ wai yiblii ɔmɛ fu.” 19 Hiɔwe bɔfo ɔ hia e ní kpami ha a kɛ wo zugba he, nɛ e bua zugba nɔ wai yiblii ɔ nya, nɛ e sake mɛ ngɔ pue Mawu mi mi fumi wai ngami nɔ́ ngua a mi. 20 A naa wai ngami nɔ́ ɔ nɔ ngɛ ma ngua a se, nɛ muɔ je wai ngami nɔ́ ɔ mi kɛ kuɔ kɛ ya su hiɔwe maa pee okpɔngɔhi a nya mi dadehi a he, nɛ e mi kami ya su stadio 1,600.*

15 Nɛ i na okadi kpa ko hu ngɛ hiɔwe, e kle nɛ e ngɛ nyakpɛ, hiɔwe bɔfohi kpaago nɛ a hɛɛ haomihi kpaago. Enɛ ɔmɛ ji nyagbe níhi, ejakaa a nɔ nɛ a maa gu kɛ gbe Mawu mi mi fumi ɔ nya.

2 Nɛ i na nɔ́ ko nɛ e ngɛ kaa ahuhuɛ wo nɛ la futu mi, nɛ ni nɛmɛ nɛ a ye lohwe awi yelɔ ɔ kɛ e he amaga a kɛ e biɛ ɔ yibɔ ɔ nɔ kunimi ɔ daa si ngɛ ahuhuɛ wo ɔ he, nɛ a hɛɛ Mawu sakuhi. 3 A ngɛ Mawu nyɔguɛ Mose la a kɛ Jijɔ Bi ɔ la a lae, nɛ a ngɛ dee ke:

“Yehowa* Mawu, Ope ɔ, o ní tsumi ɔmɛ kle nɛ a ngɛ nyakpɛ. Neneene Matsɛ, o blɔ ɔmɛ da nɛ a ji anɔkuale. 4 Yehowa,* mɛnɔ po lɛ e be mo gbeye yee, nɛ e be o biɛ ɔ hɛ mi nyami woe, ejakaa mo pɛ lɛ o fĩɔ nɔ se? Ejakaa je ma amɛ tsuo maa ba nɛ a ma ba ja ngɛ o hɛ mi, akɛnɛ a je o dami mlaa amɛ kpo ɔ he je.”

5 Enɛ ɔ se ɔ, i na, nɛ a bli odase yemi bo tsu jami he ɔ nya ngɛ hiɔwe, 6 nɛ hiɔwe bɔfo kpaago ɔmɛ nɛ a hɛɛ haomi kpaago ɔmɛ je kpo kɛ je jami he ɔ, nɛ a wo klala tade nɛ e he tsɔ nɛ e ngɛ kpɛe, nɛ a kɛ sika tsu mi mi fimi níhi fĩ a gugue. 7 Adebɔ níhi nɛ wami ngɛ a mi eywiɛ ɔmɛ a kpɛti nɔ kake ha hiɔwe bɔfo kpaago ɔmɛ sika tsu kpluhi kpaago nɛ Mawu, nɔ nɛ e ngɛ kɛ yaa neneene kɛ neneene ɔ mi mi fumi ɔ hyi mɛ tɔtɔɔtɔ ɔ. 8 Nɛ Mawu hɛ mi nyami ɔ kɛ e he wami ɔ ha nɛ la su ku hyi jami he ɔ tɔ, nɛ nɔ ko nɔ ko nyɛ we nɛ e sɛ jami he ɔ kɛ ya si be nɛ hiɔwe bɔfo kpaago ɔmɛ a haomi kpaago ɔmɛ ba nyagbe.

16 Nɛ i nu gbi nɛ nya wa ko kɛ je jami he ɔ, nɛ e de hiɔwe bɔfo kpaago ɔmɛ ke: “Nyɛɛ ya nɛ nyɛ ya plɛ Mawu mi mi fumi kplu kpaago ɔmɛ a mi ní ɔmɛ ngɔ pue zugba a nɔ.”

2 Kekleekle nɔ ɔ je kɛ ho nɛ e ya plɛ e kplu ɔ mi nɔ́ ɔ ngɔ pue zugba a nɔ. Nɛ nihi nɛ lohwe ɔ kadimi ɔ ngɛ a he nɛ a ngɛ e he amaga a jae ɔ hia pa yaya ko nɛ yeɔ nɔ.

3 Nɔ enyɔne ɔ plɛ e kplu ɔ mi nɔ́ ɔ ngɔ pue wo ɔ mi. Nɛ wo ɔ pee muɔ kaa nɔ gbogboe muɔ, nɛ adebɔ nɔ́ fɛɛ adebɔ nɔ́* nɛ wami ngɛ e mi ɔ gbo, ee, níhi nɛ a ngɛ wo ɔ mi ɔ gbo.

4 Nɔ etɛne ɔ plɛ e kplu ɔ mi nɔ́ ɔ ngɔ pue pa amɛ kɛ nyu hɛ ngmɛ ɔmɛ a mi. Nɛ a pee muɔ. 5 I nu nɛ hiɔwe bɔfo ɔ nɛ e ngɛ nyu ɔmɛ a nɔ ɔ de ke: “Mo, Nɔ nɛ o ngɛ ɔ, nɛ o ngɛ momo ɔ, mo Nɔ nɛ o fĩɔ nɔ se ɔ, o da, ejakaa mo lɛ o ngɔ kojomi nɛ ɔmɛ kɛ ba, 6 ejakaa a pue ni klɔuklɔu ɔmɛ kɛ gbali ɔmɛ a muɔ si, nɛ o ha mɛ muɔ kaa a nu; e sa mɛ.” 7 Nɛ i nu nɛ afɔle sami la tɛ ɔ de ke: “Ee, Yehowa* Mawu, Ope ɔ, o kojomi* ɔmɛ ji anɔkuale nɛ a da.”

8 Nɔ eywiɛne ɔ plɛ e kplu ɔ mi nɔ́ ɔ ngɔ pue pu ɔ nɔ, nɛ a ha pu ɔ he blɔ kaa e kɛ la nɛ sãa ni ɔmɛ. 9 Nɛ la dɔmi nɛ nya wa a sãa ni ɔmɛ, se a tu Mawu, nɔ nɛ e ngɛ he wami ngɛ haomi nɛ ɔmɛ a nɔ ɔ biɛ ɔ he musu bɔmi munyu, nɛ a tsakee we a tsui nɛ a wui e hɛ mi nyami.

10 Nɔ enuɔne ɔ plɛ e kplu ɔ mi nɔ́ ɔ ngɔ pue lohwe awi yelɔ ɔ matsɛ sɛ ɔ nɔ. Nɛ e matsɛ yemi ɔ ba wo diblii, nɛ nɔ́ yeyee nɛ ngɛ mɛ pee ɔ ha nɛ a bɔni a lilɛhi tami, 11 se a tu hiɔwe Mawu ɔ he musu bɔmi munyu ngɛ nɔ́ yeyee nɛ ngɛ mɛ pee ɔ kɛ pa yaya nɛ a hia a he je, nɛ a tsakee we a tsui ngɛ a ní tsumi ɔmɛ a he.

12 Nɔ ekpane ɔ plɛ e kplu ɔ mi nɔ́ ɔ ngɔ pue Yufrate pa ngua a mi, nɛ e mi nyu ɔ si, konɛ a kɛ dla blɔ kɛ ha matsɛmɛ ɔmɛ nɛ a je puje he ɔ.

13 Nɛ i na munyuhi nɛ a je mumi mi* nɛ a he tsɔ we etɛ nɛ a ngɛ kaa ovɔnɔhi* nɛ a je drako ɔ nya mi kɛ lohwe awi yelɔ ɔ nya mi kɛ lakpa gbalɔ ɔ nya mi. 14 Ngɛ anɔkuale mi ɔ, a ji mumi mi munyuhi nɛ je daimoniohi a ngɔ, nɛ a peeɔ okadihi, nɛ a jeɔ kpo kɛ yaa matsɛmɛ ɔmɛ nɛ a ngɛ zugba a nɔ hehi tsuo nɛ nimli ngɛ ɔmɛ a ngɔ, konɛ a ya bua a nya kɛ ya Mawu Ope ɔ ligbi ngua a nɔ ta a.

15 “Hyɛ! i ma kaa julɔ. Nɔ nɛ e hwɔ we mahe nɛ e baa tadehi nɛ e woɔ ngɛ e tade nɔ ɔ yi bɔ nɛ pee nɛ e ko hɛɛ e he gu kɛ nyɛɛ nɛ́ nihi nɛ a ba na e zo ɔ, ngɛ bua jɔmi.”

16 Nɛ a bua a nya kɛ ya he nɛ a tsɛɔ ngɛ Hebri gbi mi ke Hamagedɔn ɔ.*

17 Nɔ kpaagone ɔ plɛ e kplu ɔ mi nɔ́ ɔ ngɔ pue kɔɔhiɔ ɔ mi. Kɛkɛ nɛ gbi nɛ nya wa ko pɛ kɛ je jami he ɔ ngɛ matsɛ sɛ ɔ he ke: “A gbe nya!” 18 Nɛ oslabai gbamihi kɛ gbihi kɛ hiɔwe simihi ba, nɛ zugba mimiɛɛmi nɛ nya wa nɛ́ kɛ je benɛ adesahi ba zugba a nɔ ɔ eko bɛ hyɛ ɔ ba, zugba mimiɛɛmi ɔ ya tsitsaa nɛ e nya wa wawɛɛ nitsɛ. 19 Ma kpetekpleenyɛ ɔ mi gba etɛ, nɛ je ma amɛ a ma ngua amɛ nɔ si; nɛ a kai Babilon Ngua a ngɛ Mawu hɛ mi, konɛ a ha lɛ Mawu mi mi fumi nɛ nya wa a he abofu kplu ɔ kɛ e mi wai ɔ. 20 Jehanɛ se hu ɔ, zugba kpɔ fɛɛ zugba kpɔ nɛ nyu bɔle lɛ ɔ tu fo, nɛ a nɛ yokuhi. 21 Kɛkɛ nɛ gbiɛ ngo ngu babauu nɛ eko fɛɛ eko jiɔmi ji talɛnt kake* ɔ nɛ kɛ je hiɔwe kɛ ba pue ni ɔmɛ a nɔ, nɛ ni ɔmɛ tu Mawu he musu bɔmi munyu ngɛ haomi ɔ nɛ gbiɛ ngo ngu ɔ ngɔ kɛ ba a he je, ejakaa haomi ɔ nya wa wawɛɛ tsɔ.

17 Hiɔwe bɔfo kpaago ɔmɛ nɛ a hɛɛ kplu kpaago ɔmɛ a kpɛti nɔ kake ba nɛ e ba de mi ke: “Ba, ma tsɔɔ mo yaholɔ* ngua a nɛ e hii si ngɛ nyuhi babauu a nɔ ɔ kojomi ɔ, 2 zugba a nɔ matsɛmɛ ɔmɛ kɛ lɛ bɔ ajuama,* nɛ e we ajuama bɔmi* wai ɔ ha nɛ nihi nɛ a ngɛ zugba a nɔ ɔ de.”

3 Nɛ e ngɔ mi kɛ ya nga ko nɔ ngɛ mumi ɔ he wami ɔ mi. Nɛ i na yo ko nɛ e hii si ngɛ lohwe awi yelɔ tsutsuutsu ko nɛ musu bɔmi biɛhi hyi e he tɔ, nɛ e ngɛ yi kpaago kɛ koli nyɔngma a nɔ. 4 Yo ɔ wo tade nɛ e hɛɛ alamua tu su kɛ tade tsutsuutsu, nɛ e ngɔ sika tsu kɛ tɛhi nɛ a he jua wa kɛ adiagbahi kɛ dla e he, nɛ e hɛɛ sika tsu kplu ko nɛ tsui nya kpɔtɔmi níhi kɛ e we ajuama bɔmi* níhi nɛ a he tsɔ we ɔ hyi lɛ tɔ ngɛ e dɛ mi. 5 A ngma biɛ ko ngɛ e hɛ nya, e ji laami sane: “Babilon Ngua a, yaholi* kɛ zugba a nɔ tsui nya kpɔtɔmi níhi a nyɛ ɔ.” 6 Nɛ i na kaa yo ɔ de kɛ ni klɔuklɔu ɔmɛ a muɔ ɔ kɛ Yesu we odasefo ɔmɛ a muɔ ɔ.

Anɔkuale mi, benɛ i na lɛ ɔ, ye nya kpɛ ye he wawɛɛ nitsɛ. 7 Lɔ ɔ he ɔ, hiɔwe bɔfo ɔ de mi ke: “Mɛni he je nɛ o nya kpɛ o he ɔ? Ma de mo yo ɔ kɛ lohwe awi yelɔ ɔ nɛ e tloo yo ɔ nɛ e ngɛ yi kpaago ɔmɛ kɛ koli nyɔngma amɛ ɔ a he laami sane ɔ: 8 Lohwe awi yelɔ ɔ nɛ o na a ngɛ momo, se e be, se kɛ̃ ɔ, e be kɛe nɛ e maa je kpo kɛ je muɔ voo ɔ mi kɛ ba, nɛ e maa ya hɛ mi kpatami mi. Nɛ nihi nɛ a ngɛ zugba a nɔ ɔ—ni nɛmɛ nɛ a ngmɛ a biɛ ngɛ wami womi kpo ɔ mi kɛ je be nɛ a to je ɔ sisi ɔ—a nya maa kpɛ a he ke a na lohwe awi yelɔ ɔ nɛ ngɛ momo, se e be, se kɛ̃ ɔ, e maa ba a.

9 “Enɛ ɔ biɔ nile nɛ juɛmi ngɛ mi: Yi kpaago ɔmɛ daa si kɛ ha yokuhi kpaago nɛ yo ɔ hii si ngɛ a nɔ ɔ. 10 Nɛ matsɛmɛ kpaago ngɛ: Enuɔ nɔ si, kake ngɛ, nɛ kake lɛɛ e ba sui lolo; se ke e ná nɛ e ba su ɔ, e sa nɛ e ba hi si be bɔɔ ko. 11 Nɛ lohwe awi yelɔ ɔ nɛ e ngɛ momo, se e be ɔ, e ji matsɛ kpaanyɔne hulɔ, se e jeɔ kpaago ɔmɛ a mi, nɛ e yaa hɛ mi kpatami mi.

12 “Koli nyɔngma amɛ nɛ o na a daa si kɛ ha matsɛmɛ nyɔngma nɛ a nine sui matsɛ yemi ko nɔ lolo, se a nine suɔ blɔ nya nɔ kaa matsɛmɛ ngmlɛfia kake, a kɛ lohwe awi yelɔ ɔ. 13 Ni nɛ ɔmɛ hɛɛ susumi kake, enɛ ɔ he ɔ, a ngɔ a he wami ɔ kɛ a blɔ nya a kɛ ha lohwe awi yelɔ ɔ. 14 Ni nɛ ɔmɛ kɛ Jijɔ Bi ɔ maa hwu ta, se akɛnɛ Jijɔ Bi ɔ ji nyɔmtsɛmɛ a Nyɔmtsɛ kɛ matsɛmɛ a Matsɛ he je ɔ, e maa ye a nɔ kunimi. Jehanɛ se hu ɔ, ni nɛmɛ nɛ a piɛɛ e he nɛ a tsɛ mɛ nɛ a hla mɛ nɛ a ji anɔkualetsɛmɛ ɔ maa pee jã.”

15 E de mi ke: “Nyu ɔmɛ nɛ o na a, he nɛ yaholɔ* ɔ hii si ngɛ ɔ daa si kɛ ha nihi kɛ asafo kuuhi kɛ je mahi kɛ lilɛhi.* 16 Nɛ koli nyɔngma amɛ nɛ o na a kɛ lohwe awi yelɔ ɔ maa nyɛ yaholɔ* ɔ, nɛ a ma kpɔ̃ nɔ́ fɛɛ nɔ́ ngɛ e dɛ, nɛ e maa hɛɛ e he gu, nɛ a maa ye e he lo ɔ, nɛ a kɛ la maa sã lɛ kulaa. 17 Ejakaa Mawu ngɔ kɛ wo a tsui mi kaa a tsu e susumi ɔ he ní, ee, kaa a tsu a susumi kake ɔ he ní kɛ gu a matsɛ yemi ɔ nɛ a kɛ ma ha lohwe awi yelɔ ɔ nɔ, kɛ yaa si be nɛ Mawu munyu ɔmɛ maa ba mi. 18 Nɛ yo ɔ nɛ o na a daa si kɛ ha ma kpetekpleenyɛ ɔ nɛ e ngɛ matsɛ yemi ko nɛ́ e yeɔ zugba a nɔ matsɛmɛ ɔmɛ a nɔ ɔ.”

18 Enɛ ɔ se ɔ, i na hiɔwe bɔfo kpã ko nɛ e ngɛ si kplee kɛ je hiɔwe kɛ ma kɛ he wami ngua, nɛ e hɛ mi nyami ɔ ha nɛ zugba a nɔ tsɔ heii. 2 Nɛ e kɛ gbi nɛ he wa kpa ngmlaa ke: “Yo ɔ nɔ si! Babilon Ngua a nɔ si, nɛ e ba plɛ pee daimoniohi a hi he, kɛ mumi* nɛ he tsɔ we fɛɛ mumi nɛ he tsɔ we, kɛ lohwe pɛlitsɛ fɛɛ lohwe pɛlitsɛ nɛ a hiɔ ɔ laami he! 3 Ejakaa e we ajuama bɔmi* ɔ he akɔnɔ* wai ɔ he je ɔ, je ma amɛ tsuo sɛ haomi mi, nɛ zugba a nɔ matsɛmɛ ɔmɛ kɛ lɛ bɔ ajuama, nɛ zugba a nɔ jua yeli* ɔmɛ ba pee niatsɛmɛ ngɛ e zo ní nami kpɔtɔɔ ɔ he wami ɔ nya.”

4 Nɛ i nu gbi kpa ko kɛ je hiɔwe nɛ e de ke: “Ye we bi, ke nyɛ sume kaa nyɛ maa piɛɛ e he ngɛ e yayami ɔmɛ a mi, nɛ nyɛ sume kaa nyɛ ma ná e haomi ɔmɛ eko ɔ, lɛɛ nyɛɛ je kpo ngɛ e mi. 5 Ejakaa e yayami ɔmɛ nya bua kɛ ya su hiɔwe tɔɔ, nɛ Mawu kai e yayami* ní peepee ɔmɛ. 6 Bɔ nɛ e kɛ ni kpahi hi si ha a, nyɛ hu nyɛɛ to lɛ nane mi jã, ee, nyɛɛ to lɛ nane mi kɛ bɔ he si enyɔ ngɛ níhi nɛ e pee ɔmɛ a he; kplu ɔ nɛ e futu ngɛ mi ɔ, nyɛ futu kɛ bɔ he si enyɔ ngɔ ha lɛ. 7 He nɛ e wo lɛ nitsɛ e hɛ mi nyami nɛ e hi si ngɛ zo ní nami kpɔtɔɔ mi kɛ ya su ɔ, lejɛ ɔ nɔuu nɛ nyɛ hu nyɛ pii lɛ nɛ nyɛ ha nɛ e ye kɔmɔ kɛ ya su. Ejakaa e yaa nɔ nɛ e deɔ ngɛ e tsui mi ke: ‘I hiɔ si kaa manyɛ, nɛ pi yalɔyo* ji mi, nɛ i be kɔmɔ yee gblegbleegble.’ 8 Enɛ ɔ he je nɛ ngɛ ligbi kake mi ɔ, e haomi ɔmɛ maa ba a nɛ, gbenɔ kɛ kɔmɔ yemi kɛ hwɔ, nɛ a kɛ la maa sã lɛ kulaa, ejakaa Yehowa* Mawu, nɔ nɛ e kojo lɛ ɔ he wa.

9 “Nɛ zugba a nɔ matsɛmɛ ɔmɛ nɛ a kɛ lɛ bɔ ajuama* nɛ a kɛ lɛ hi si ngɛ e zo ní nami kpɔtɔɔ ɔ mi ɔ ma fo ya, nɛ a maa ye e he kɔmɔ ke a na e sami ɔ he la su ku ɔ. 10 A maa da si ngɛ se lokoo ngɛ e piimi ɔ he gbeye yemi ɔ he je, nɛ a ma de ke: ‘E hí kulaa, e hí kulaa, mo ma kpetekpleenyɛ ɔ, mo Babilon ma nɛ o he wa a, ejakaa ngɛ ngmlɛfia kake mi ɔ, o kojomi ɔ ba su!’

11 “Jehanɛ se hu ɔ, zugba a nɔ jua yeli ɔmɛ ngɛ ya foe nɛ a ngɛ kɔmɔ yee, ejakaa nɔ ko be nɛ e ma he a jua yemi ní babauu ɔmɛ hu, 12 sika tsu, sika hiɔ, tɛhi nɛ a he jua wa, adiagbahi, klala kpakpahi, bohi nɛ a hɛɛ alamua tu su, sliiki, bohi nɛ a tsuɔ tsutsuutsu babauu ɔ; nɔ́ fɛɛ nɔ́ nɛ a kɛ tso nɛ jeɔ via pee; kɛ ní slɔɔtohi tsuo nɛ a kɛ suɔ wu, tsohi nɛ a he jua wa, akɔblee, dade, kɛ mamaro pee; 13 jehanɛ se hu sinamon, amomon, tsopa kɛ e he via, nu kɛ e he via, ohɛ, wai, oliv nu, mamu bukɔbukɔ, ngma, nahi, jijɔhi, okpɔngɔhi, zugba lɛhi, nyɔguɛhi, kɛ adesahi a wami.* 14 Ee, tso yiblii nɛ hi nɛ e jlo mo ɔ* bɔ mo, nɛ niye ní kpakpahi kɛ níhi nɛ a ngɛ fɛu tsuo laa mo, nɛ o be mɛ nae hu gblegbleegble.

15 “Jua yeli ɔmɛ nɛ a jua ní nɛ ɔmɛ, ni nɛmɛ nɛ yo ɔ ha nɛ a ba pee niatsɛmɛ ɔ, a maa da si ngɛ se lokoo ngɛ e piimi ɔ he gbeye yemi ɔ he je, nɛ a ma fo ya nɛ a maa ye kɔmɔ, 16 nɛ a maa hi dee ke: ‘E hí kulaa, e hí kulaa, ma kpetekpleenyɛ ɔ nɛ e ha klala kpakpa, kɛ bo nɛ hɛɛ alamua tu su, kɛ bo nɛ tsuɔ tsutsuutsu, nɛ e ngɔ sika tsu junehi kɛ tɛhi nɛ a he jua wa kɛ adiagbahi babauu kɛ dla e he ɔ, 17 ejakaa ngɛ ngmlɛfia kake mi ɔ, kikɛmɛ a ní nami babauu ɔ hɛ mi kpata!’

“Nɛ mele kudɔlɔ fɛɛ mele kudɔlɔ kɛ mele mi ní tsulɔ fɛɛ mele mi ní tsulɔ kɛ lɛ mi ní tsuli kɛ nihi tsuo nɛ a náa a nya mi ngma ngɛ wo ɔ nɔ ɔ da si ngɛ se lokoo 18 nɛ a kpa ngmlaa be mi nɛ a ngɛ yo ɔ sami ɔ he la su ku ɔ hyɛe ɔ, nɛ a de ke: ‘Mɛni ma ngua po lɛ ngɛ kaa ma kpetekpleenyɛ ɔ?’ 19 A muɔɔ zu pue a yi mi, nɛ a kpa ngmlaa nɛ a ngɛ ya foe nɛ a ngɛ kɔmɔ yee, nɛ a ngɛ dee ke: ‘E hí kulaa, e hí kulaa, ma kpetekpleenyɛ ɔ, yo ɔ nɛ e ngɔ e ní nami ɔ kɛ ha nɛ nihi tsuo nɛ a ngɛ mele ngɛ wo ɔ nɔ ɔ ba plɛ niatsɛmɛ ɔ, ejakaa ngɛ ngmlɛfia kake mi ɔ, a kpɔ̃ e níhi tsuo ngɛ e dɛ!’

20 “Oo hiɔwe, kɛ jehanɛ se hu nyɛ ni klɔuklɔu ɔmɛ kɛ hiɔwe bɔfo ɔmɛ kɛ gbali ɔmɛ, nyɛ bua nɛ jɔ ngɛ e he, ejakaa Mawu kojo lɛ ngɛ nyɛ he je!”

21 Nɛ hiɔwe bɔfo he walɔ ko wo tɛ ko nɛ ngɛ kaa wɛ tɛ ngua ko nɛ e sake ngɔ fɔ wo ɔ mi, nɛ e de ke: “Kikɛ nɛ ɔ ji bɔ nɛ a ma sake Babilon ma kpetekpleenyɛ ɔ si kake too kɛ fia si ɔ nɛ, nɛ a be lɛ nae hu gblegbleegble. 22 Nɛ a be lali nɛ a ngɛ lae nɛ a ngɛ saku fiae kɛ ngɛ he toe, kɛ la poli kɛ bɛ kpali kɛ titimati kpali a he nue ngɛ o mi hu gblegbleegble. Nɛ a be ga ní tsulɔ ko nɛ e tsuɔ nɔ́ ko nae ngɛ o mi hu, nɛ a be wɛ tɛ pɛmi he nue ngɛ o mi hu gblegbleegble. 23 Kane ko la be kpɛe ngɛ o mi hu gblegbleegble, nɛ a be ayɛflo huno ko aloo ayɛflo ko nya nue ngɛ o mi hu gblegbleegble; ejakaa o jua yeli ɔmɛ ji nihi nɛ a nɔ kuɔ saminya ngɛ zugba a nɔ, nɛ o gu o mumi yayami kɛ ní tsumi ɔ nɔ kɛ sisi je ma amɛ tsuo. 24 Ee, yo ɔ mi nɛ a na gbali ɔmɛ kɛ ni klɔuklɔu ɔmɛ kɛ nihi tsuo nɛ a gbe mɛ ngɛ zugba a nɔ ɔmɛ a muɔ ɔ ngɛ.”

19 Enɛ ɔ se ɔ, i nu nɔ́ ko kaa asafo kuu ngua ko gbi nɛ nya wa ngɛ hiɔwe. A de ke: “Nyɛ je Yah yi!* Wa Mawu ɔ nɔ́ ji yi wami hemi ɔ kɛ hɛ mi nyami ɔ kɛ he wami ɔ nɛ, 2 ejakaa e kojomi ɔmɛ ji anɔkuale nɛ a da. Ejakaa e kojo yaholɔ* ngua a, nɔ nɛ e ngɔ e we ajuama bɔmi* ɔ kɛ puɛ zugba a, nɛ Mawu ye e nyɔguɛ ɔmɛ a muɔ nɛ ngɛ yo ɔ nine he ɔ he lue.”* 3 Nɛ amlɔ nɔuu ɔ, a de si enyɔne ke: “Nyɛ je Yah yi!* Nɛ la su ku nɛ ngɛ tee ngɛ yo ɔ nɔ ɔ maa ya nɔ nɛ e maa hi tee kɛ ya neneene kɛ neneene.”

4 Nɛ nikɔtɔma 24 ɔmɛ kɛ adebɔ níhi nɛ wami ngɛ a mi eywiɛ ɔmɛ nɔ si nɛ a ja Mawu, nɔ nɛ e hii si ngɛ matsɛ sɛ ɔ nɔ ɔ, nɛ a de ke: “Amen! Nyɛ je Yah yi!”*

5 Jehanɛ se hu ɔ, gbi ko je matsɛ sɛ ɔ mi nɛ e de ke: “Nyɛɛ hi wa Mawu ɔ yi jee, nyɛ e nyɔguɛ ɔmɛ tsuo nɛ nyɛ yeɔ lɛ gbeye ɔ, nimli wawi ɔmɛ kɛ nimli ngua amɛ.”

6 Nɛ i nu nɛ nɔ́ ko pɛ kaa asafo kuu ngua ko gbi, e ngɛ kaa nyuhi babauu a pɛmi, kaa hiɔwe simihi nɛ nya wa pɛmi. A de ke: “Nyɛ je Yah yi,* ejakaa Yehowa* wa Mawu ɔ, Ope ɔ, e bɔni nɔ yemi kaa matsɛ! 7 Nyɛ ha nɛ wa nya nɛ wa bua nɛ jɔ kɛ be nɔ nɛ waa wo e hɛ mi nyami, ejakaa Jijɔ Bi ɔ yo kpeemi ɔ su nɛ e yo ɔ dla e he. 8 Ee, a ha yo ɔ he blɔ kaa e ngɔ klala kpakpa nɛ e he tsɔ nyaii nɛ e ngɛ kpɛe kɛ ha e he—ejakaa klala kpakpa a daa si kɛ ha ni klɔuklɔu ɔmɛ a dami ní peepee ɔmɛ.”

9 Nɛ e de mi ke, “Ngmaa: Ni nɛmɛ nɛ a fɔ mɛ nine kɛ ba Jijɔ Bi ɔ yo kpeemi gbɔkuɛ ní yemi ɔ sisi ɔ ngɛ bua jɔmi.” E de mi hu ke: “Mawu munyuhi nɛ a ji anɔkuale ji nɛ ɔ nɛ.” 10 Kɛkɛ nɛ i nɔ si ngɛ e nane nya kaa ma ja lɛ. Se e de mi ke: “Hyɛ nɛ hi! Koo pee jã! I ji o nyɛmi nyɔguɛ kɛ o nyɛmimɛ ɔmɛ nɛ a hɛɛ Yesu he odase yemi ní tsumi ɔ mi ɔ hu a nyɛmi nyɔguɛ kɛkɛ. Ja Mawu! Ejakaa Yesu he odase yemi ɔ ji nɔ́ nɛ haa nɛ gbami jeɔ mumi mi kɛ baa.”

11 I na nɛ hiɔwe nya bli, nɛ hyɛ! okpɔngɔ futaa ko. Nɛ nɔ nɛ e hii si ngɛ nɔ ɔ, a tsɛɛ lɛ ke Anɔkualetsɛ kɛ Anɔkuale, nɛ e kojoɔ nɛ e hwuɔ ta ngɛ dami mi. 12 E hɛ ngmɛhi ji la nɛ ngɛ tsoe, nɛ matsɛ jlasihi babauu fĩ e yi. E ngɛ biɛ ko nɛ a ngma nɛ́ nɔ ko nɔ ko li kaa ja lɛ pɛ, 13 nɛ muɔ ngɛ* tade nɛ e wo ngɛ e tade ɔ nɔ ɔ mi, nɛ a tsɛɛ lɛ kɛ biɛ nɛ ji Mawu Munyu ɔ. 14 Jehanɛ se hu ɔ, hiɔwe tabo ɔmɛ ngɛ e se nyɛɛe ngɛ okpɔngɔ hiɔhi a nɔ, nɛ a wo klala kpakpa nɛ e he tsɔ nyaii tadehi. 15 Nɛ klaate gagaaga nɛ nya ba nɛ e kɛ ma jajaa je ma amɛ ɔ je e nya mi, nɛ e kɛ dade tso maa hyɛ a nɔ. Jehanɛ se hu ɔ, e naa Mawu Ope ɔ mi mi fumi nɛ nya wa a he abofu wai ngami nɔ́ ɔ nɔ. 16 Ngɛ tade nɛ e wo ngɛ e tade ɔ nɔ ɔ mi ɔ, ee, ngɛ e fiɔ he ɔ, a ngma biɛ ko ke, matsɛmɛ a Matsɛ kɛ nyɔmtsɛmɛ a Nyɔmtsɛ.

17 I na hiɔwe bɔfo ko hu nɛ e daa si ngɛ pu ɔ mi, nɛ e kpa ngmlaa kɛ gbi nɛ nya wa, nɛ e de lohwe pɛlitsɛmɛ nɛ a teɔ ngɛ hiɔwe kpɛti* ɔ tsuo ke: “Nyɛɛ ba hiɛ ɔ, nyɛ bua nyɛ he nya kɛ ba Mawu gbɔkuɛ ní yemi ngua a sisi, 18 konɛ nyɛ ba ye matsɛmɛ a he lo kɛ ta buli a nyatsɛ nguahi a he lo kɛ nyumu he wali a he lo kɛ okpɔngɔhi a he lo kɛ ni nɛmɛ nɛ a hii si ngɛ a nɔ ɔmɛ a he lo, kɛ nihi tsuo a he lo, he yeli kɛ nyɔguɛhi hulɔ, kɛ nimli wawi kɛ nimli nguahi.”

19 Nɛ i na lohwe awi yelɔ ɔ kɛ zugba a nɔ matsɛmɛ ɔmɛ kɛ a ta buli ɔmɛ nɛ a bua a he nya konɛ a kɛ nɔ nɛ e hii si ngɛ okpɔngɔ ɔ nɔ ɔ kɛ e tabo ɔmɛ nɛ hwu ta. 20 Nɛ a nu lohwe awi yelɔ ɔ kɛ lakpa gbalɔ ɔ nɛ e pee nyakpɛ okadihi ngɛ e hɛ mi nɛ e gu lɔ ɔ nɔ kɛ sisi ni nɛmɛ nɛ a nine su lohwe awi yelɔ ɔ kadimi ɔ nɔ kɛ ni nɛmɛ nɛ a ja e he amaga a. A sake mɛ tsuo kɛ wo la taku ɔ nɛ e ngɛ tsoe gegeege kɛ sɔlfa a mi hɛ ngmengmle. 21 Se ni nɛmɛ nɛ a piɛ ɔ lɛɛ, a ngɔ klaate gagaaga a nɛ e je nɔ nɛ e hii si ngɛ okpɔngɔ ɔ nɔ ɔ nya mi ɔ kɛ gbe mɛ. Nɛ a he lo ɔ ha nɛ lohwe pɛlitsɛmɛ ɔmɛ tsuo tɔ.

20 Nɛ i na hiɔwe bɔfo ko nɛ e je hiɔwe nɛ e ngɛ si kplee kɛ ma kɛ e dɛ mi muɔ voo ɔ nya safe ɔ kɛ kɔsɔkɔsɔ ngua ko. 2 E nu drako ɔ, blema sinɔ ɔ, nɔ nɛ e ji Abosiami ɔ kɛ Satan ɔ, nɛ e fĩ lɛ jeha 1,000. 3 Nɛ e sake lɛ ngɔ fɔ muɔ voo ɔ mi nɛ e nga e yi nɛ e sɔu muɔ ɔ nya ngɔ wo e yi, bɔ nɛ pee nɛ e ko sisi je ma amɛ hu kɛ yaa si be nɛ jeha 1,000 ɔ maa ba nyagbe. Ngɛ enɛ se ɔ, e sa nɛ a je lɛ be bɔɔ ko.

4 Nɛ i na matsɛ sɛhi, nɛ a ha ni nɛmɛ nɛ a hii si ngɛ a nɔ ɔ he blɔ kaa a kojo. Ee, i na ni nɛmɛ nɛ a gbe mɛ* ngɛ Yesu he odase nɛ a ye ɔ, kɛ Mawu he munyu nɛ a tu ɔ he, kɛ ni nɛmɛ nɛ a ja we lohwe awi yelɔ ɔ aloo e we amaga a, nɛ a nine sui kadimi ɔ nɔ ngɛ a hɛ nya kɛ a nine he ɔ a susuma* amɛ. Nɛ a ba wami mi nɛ a kɛ Kristo ɔ ye nɔ kaa matsɛmɛ jeha 1,000. 5 (Ni gbogboehi nɛ a piɛ ɔ bɛ wami mi kɛ ya si be nɛ jeha 1,000 ɔ ba nyagbe.) Enɛ ɔ ji kekleekle gbogboehi a si tlemi ɔ nɛ. 6 Nɔ fɛɛ nɔ nɛ e náa kekleekle gbogboehi a si tlemi ɔ mi blɔ fa mi nɔ́ ɔ ngɛ bua jɔmi nɛ e ngɛ klɔuklɔu; gbenɔ enyɔne ɔ be nimli nɛ ɔmɛ a nɔ he wami, mohu ɔ, a maa pee Mawu kɛ Kristo ɔ we osɔfohi nɛ a kɛ lɛ maa ye nɔ kaa matsɛmɛ jeha 1,000.

7 Jehanɛ ɔ, ke jeha 1,000 ɔ ba nyagbe pɛ ɔ, a ma je Satan kɛ je tsu nɛ a wo lɛ ɔ mi, 8 nɛ e maa je kpo nɛ e ma ya sisi je ma amɛ nɛ a ngɛ zugba a kɔ̃ nya eywiɛ ɔmɛ ɔ, Gɔg kɛ Magɔg, nɛ e ma bua a nya kɛ ha ta a. Nimli nɛ ɔmɛ a he maa hiɛ kaa wo nya zia.* 9 Nɛ a gbɛ fĩa zugba a nɔ tsuo, nɛ a bɔle ni klɔuklɔu ɔmɛ a sito he ɔ kɛ ma ngua a nɛ a suɔ ɔ he kɛ kpe. Se la je hiɔwe nɛ e ba sã mɛ. 10 Nɛ a sake Abosiami ɔ nɛ e ngɛ mɛ sisie ɔ ngɔ wo la kɛ sɔlfa taku ɔ mi, he nɛ lohwe awi yelɔ ɔ kɛ lakpa gbalɔ ɔ tsuo ngɛ momo ɔ; nɛ a ma pii mɛ* nyɔ kɛ pia kɛ maa ya neneene kɛ neneene.

11 Nɛ i na matsɛ sɛ futaa agbo ko kɛ Nɔ nɛ e hii si ngɛ nɔ ɔ. Zugba a kɛ hiɔwe ɔ tu fo kɛ je e hɛ mi kɛ ho, nɛ a nɛ he ko kɛ ha we mɛ. 12 Nɛ i na ni gbogboe ɔmɛ, nimli ngua amɛ kɛ nimli wawi ɔmɛ, a daa si ngɛ matsɛ sɛ ɔ hɛ mi, nɛ a bli womi kpohi a nya. Se a bli womi kpo kpa ko hu nya; e ji wami womi kpo ɔ. A da níhi nɛ a ngma ngɛ womi kpo ɔmɛ a mi ɔ nɔ kɛ kojo gbogboe ɔmɛ ngɛ a ní peepee ɔmɛ a nya. 13 Nɛ wo ɔ je ni gbogboehi nɛ a ngɛ e mi ɔ kɛ ha, nɛ gbenɔ kɛ Gbeje* je ni gbogboehi nɛ a ngɛ a mi ɔ kɛ ha, nɛ a kojo a ti nɔ fɛɛ nɔ ngɛ a ní peepee ɔmɛ a nya. 14 Nɛ a sake gbenɔ kɛ Gbeje* ngɔ wo la taku ɔ mi. La taku ɔ daa si kɛ ha gbenɔ enyɔne ɔ. 15 Jehanɛ se hu ɔ, a sake nɔ fɛɛ nɔ nɛ a nɛ kaa a ngma e biɛ ngɛ wami womi ɔ mi ɔ ngɔ wo la taku ɔ mi.

21 Nɛ i na hiɔwe ehe ko kɛ zugba ehe ko; ejakaa blema hiɔwe ɔ kɛ blema zugba a be kɛ ho, nɛ wo ɔ be hu. 2 Jehanɛ se hu ɔ, i na ma ngua klɔuklɔu ɔ, Yerusalɛm ehe ɔ nɛ́ e ngɛ si kplee kɛ je hiɔwe kɛ je Mawu ngɔ kɛ ma, nɛ a dla lɛ kaa ayɛflo ko nɛ a dla e he kɛ ha lɛ kɛ ha e huno. 3 Kɛkɛ nɛ i nu gbi nɛ nya wa ko kɛ je Matsɛ sɛ ɔ mi ke: “Hyɛ! Mawu bo tsu ɔ kɛ adesahi ngɛ, nɛ e kɛ mɛ maa hi si, nɛ a maa pee e we bi. Nɛ Mawu nitsɛ kɛ mɛ maa hi si. 4 Nɛ e ma tsu vo nyu fɛɛ vo nyu ngɛ a hɛ mi, nɛ gbenɔ be si hie hu, jã kɛ̃ nɛ kɔmɔ yemi aloo ya fomi aloo nɔ́ yeyee ko hu be si hie hu. Blema ní ɔmɛ be kɛ ho.”

5 Nɛ Nɔ nɛ e hii si ngɛ matsɛ sɛ ɔ nɔ ɔ de ke: “Hyɛ! i ngɛ níhi tsuo pee ehe.” E de hu ke: “Ngmaa, ejakaa munyu nɛ ɔmɛ ngɛ mi niinɛ nɛ a ji anɔkuale.” 6 Nɛ e de mi ke: “A ba mi! imi ji Alfa a kɛ Omega* a, sisije ɔ kɛ nyagbe ɔ nɛ. Nɔ fɛɛ nɔ ko nɛ kuma ngɛ lɛ yee ɔ, ma ha lɛ nyu kɛ je wami nyu hɛ ngmɛ ɔ mi yaka.* 7 Nɔ fɛɛ nɔ ko nɛ e ngɛ kunimi yee ɔ nine maa su ní nɛ ɔmɛ a nɔ, nɛ ma pee e Mawu, nɛ e maa pee ye bi. 8 Se sawaletsɛmɛ, kɛ ni nɛmɛ nɛ a be hemi kɛ yemi, kɛ afatsɛmɛ, kɛ nɔmlɔ gbeli, kɛ ajuama bɔli,* kɛ ni nɛmɛ nɛ a kɛ mumi yayamihi tsuɔ ní, kɛ wɔ jali, kɛ lakpatsɛmɛ ɔmɛ tsuo lɛɛ, a blɔ fa mi nɔ́ maa hi la kɛ sɔlfa nɛ ngɛ tsoe ɔ mi. Enɛ ɔ daa si kɛ ha gbenɔ enyɔne ɔ.”

9 Hiɔwe bɔfo kpaago ɔmɛ nɛ a hɛɛ kplu kpaago ɔmɛ nɛ nyagbe haomi kpaago ɔmɛ hyi mɛ tɔtɔɔtɔ ɔ, a kpɛti nɔ kake ba nɛ e ba de mi ke: “Ba, nɛ ma tsɔɔ mo ayɛflo ɔ, Jijɔ Bi ɔ yo ɔ.” 10 Lɔ ɔ he ɔ, e ngɔ mi kɛ ho yoku ngua gagaaga ko nɔ ya ngɛ mumi ɔ he wami ɔ mi, nɛ e tsɔɔ mi ma ngua klɔuklɔu Yerusalɛm ɔ nɛ e ngɛ si kplee kɛ je hiɔwe kɛ je Mawu ngɔ kɛ ma, 11 nɛ e hɛɛ Mawu hɛ mi nyami ɔ. E kpɛmi ɔ ngɛ kaa tɛ nɛ he jua wa pe kulaa, kaa yaspi tɛ nɛ ngɛ kpɛe kaa ahuhuɛ nɛ mi tsɔ. 12 E ngɛ gbogbo ngua nɛ ya hiɔwe gojoo, nɛ e ngɛ agbo 12 kɛ hiɔwe bɔfohi 12 ngɛ agbo ɔmɛ a nya, nɛ a ngma Israel bi ɔmɛ a wɛtso 12 ɔmɛ a biɛ ngɛ agbo ɔmɛ a he. 13 Agbo etɛ ngɛ puje he, nɛ agbo etɛ ngɛ yiti je, nɛ agbo etɛ ngɛ woyi je, nɛ agbo etɛ ngɛ pusinɔ he. 14 Ma ngua a he gbogbo ɔmɛ ngɛ sisi tomi tɛ 12, nɛ a ngma Jijɔ Bi ɔ bɔfo 12 ɔmɛ a biɛ 12 ɔmɛ ngɛ a nɔ.

15 Jehanɛ ɔ, nɔ nɛ e kɛ mi ngɛ munyu ɔ tue ɔ hɛɛ sika tsu go ko ngɛ e dɛ mi kaa nɔ́ susumi nɔ́ konɛ e kɛ susu ma ngua a kɛ e we agbo ɔmɛ kɛ e gbogbo ɔ. 16 Nɛ ma ngua a hɛɛ kɔ̃ nya eywiɛ nɛ a sɔ fiee, nɛ e kami ɔ ngɛ kaa e blimi ɔ nɔuu. Nɛ e kɛ go ɔ susu ma ngua a, stadio 12,000;* e kami ɔ kɛ e blimi ɔ kɛ e hiɔwe yami ɔ tsuo sɔ. 17 Jehanɛ se hu ɔ, e susu ma a gbogbo ɔ, kɔni fã 144* ngɛ adesa nɔ́ susumi nya, nɛ ngɛ jamɛ a be ɔ mi nɔuu hu ɔ, ngɛ hiɔwe bɔfo nɔ́ susumi nya. 18 Jehanɛ ɔ, a kɛ yaspi lɛ fia gbogbo ɔ nɛ, nɛ ma ngua a ji sika tsu ngmingmiingmi kaa ahuhuɛ nɛ mi tsɔ. 19 A ngɔ tɛ nɛ he jua wa slɔɔtohi kɛ dla ma ngua a gbogbo ɔ sisi tomi ɔmɛ: kekleekle sisi tomi ɔ, yaspi, enyɔne ɔ, safiro, etɛne ɔ, kalkedo, eywiɛne ɔ, emerald, 20 enuɔne ɔ, sadoniki, ekpane ɔ, sadio, kpaagone ɔ, krisolito, kpaanyɔne ɔ, berilo, nɛɛne ɔ, topaz, nyɔngmane ɔ, krisopraso, nyɔngma kɛ kakene ɔ, hiakinto, nyɔngma kɛ enyɔne ɔ, ametisto. 21 Jehanɛ hu ɔ, a ngɔ adiagba 12 kɛ pee agbo 12 ɔmɛ; a kɛ adiagba kake lɛ pee agbo fɛɛ agbo. Nɛ ma ngua a mi gbɛjegbɛ ngua a ji sika tsu ngmingmiingmi, kaa ahuhuɛ nɛ mi tsɔ heii.

22 I nɛ sɔlemi we ko ngɛ ma a mi, ejakaa Yehowa* Mawu Ope ɔ, kɛ Jijɔ Bi ɔ ji e sɔlemi we. 23 Nɛ ma ngua a hia we pu ɔ aloo nyɔhiɔ ɔ nɛ e kpɛ ngɛ e nɔ, ejakaa Mawu hɛ mi nyami ɔ ha nɛ ma a mi tsɔ heii, nɛ Jijɔ Bi ɔ ji e kane. 24 Nɛ je ma amɛ maa nyɛɛ ngɛ e la a nya, nɛ zugba a nɔ matsɛmɛ ɔmɛ maa ngɔ a hɛ mi nyami ɔ kɛ ba ma a mi. 25 A be ma a agbo ɔmɛ ngae kɔkɔɔkɔ ngɛ ligbi ɔ mi, ejakaa nyɔ be lejɛ ɔ hie. 26 Nɛ a maa ngɔ je ma amɛ a hɛ mi nyami kɛ bumi ɔ kɛ ba ma a mi. 27 Se nɔ́ fɛɛ nɔ́ ko nɛ a ble lɛ, kɛ nɔ fɛɛ nɔ ko nɛ e peeɔ tsui nya kpɔtɔmi níhi kɛ nihi nɛ a sisiɔ nɔ ɔ be mi sɛe ngɛ blɔ ko blɔ ko nɔ; ni nɛmɛ nɛ a ngma a biɛ ngɛ Jijɔ Bi ɔ wami womi kpo ɔ mi ɔ pɛ lɛ a maa sɛ mi.

22 Nɛ e tsɔɔ mi pa ko kɛ e mi wami nyu nɛ e mi tsɔ keikei kaa ahuhuɛ nɛ je Mawu kɛ Jijɔ Bi ɔ a matsɛ sɛ ɔ mi kɛ ngɛ bee 2 kɛ ngɛ kplee ngɛ ma ngua a gbɛjegbɛ ɔ kpɛti. Wami tsohi nɛ a woɔ yiblii si 12 ngɛ pa a tue hiɛ kɛ hiɛ, nɛ a woɔ yiblii nyɔhiɔ fɛɛ nyɔhiɔ. Nɛ tso ɔmɛ a ba a ngɛ kɛ ha je ma amɛ a tsami ɔ.

3 Nɛ gbiɛmi ko be si hie hu. Se Mawu kɛ Jijɔ Bi ɔ a matsɛ sɛ ɔ maa hi ma ngua a mi, nɛ e nyɔguɛ ɔmɛ ma sɔmɔ lɛ ngɛ blɔ nɛ ngɛ klɔuu nɔ; 4 nɛ a maa na e hɛ mi, nɛ e biɛ ɔ maa hi a hɛ nya. 5 Jehanɛ hu ɔ, nyɔ be si hie hu, nɛ kane la aloo pu la he be mɛ hiae hu, ejakaa Yehowa* Mawu ma kpɛ la ngɔ pue a nɔ, nɛ a maa ye nɔ kaa matsɛmɛ kɛ ya neneene kɛ neneene.

6 E de mi ke: “Munyu nɛ ɔmɛ ngɛ mi niinɛ nɛ a ji anɔkuale; ee, Yehowa,* Mawu ɔ nɛ e tu munyu kɛ gu gbali ɔmɛ a nɔ ɔ tsɔ e bɔfo ɔ kaa e ba tsɔɔ e nyɔguɛ ɔmɛ níhi nɛ e sa kaa a ba mi ngɛ be kpiti mi. 7 Hyɛ! i ma oya nɔuu. Nɔ nɛ e ngɛ womi kpo nɛ ɔ mi gbami munyu ɔmɛ a nɔ yee ɔ ngɛ bua jɔmi.”

8 Ngɛ anɔkuale mi ɔ, imi Yohane lɛ i ngɛ ní nɛ ɔmɛ nue nɛ i ngɛ ní nɛ ɔmɛ nae ɔ nɛ. Benɛ i nu nɛ i na ní nɛ ɔmɛ ɔ, i nɔ si konɛ ma ja ngɛ hiɔwe bɔfo ɔ nɛ e ngɛ ní nɛ ɔmɛ jee kɛ ngɛ mi tsɔɔe ɔ nane nya. 9 Se e de mi ke: “Hyɛ nɛ hi! Koo pee jã! I ji o nyɛmi nyɔguɛ kɛ o nyɛmimɛ gbali ɔmɛ kɛ ni nɛmɛ nɛ a ngɛ womi kpo nɛ ɔ mi munyu ɔmɛ a nɔ yee ɔ hu a nyɛmi kɛkɛ. Ja Mawu.”

10 E de mi hu ke: “Koo sɔu womi kpo nɛ ɔ mi gbami munyu ɔmɛ a nya, ejakaa be nɛ a to ɔ su ta. 11 Ha nɔ nɛ e peeɔ nɔ́ nɛ e dɛ ɔ nɛ e ya nɔ ngɛ nɔ́ nɛ dɛ peemi ɔ mi, nɛ ha mutsɛ ɔ nɛ e ya nɔ ngɛ e mu ɔ mi; se ha dalɔ ɔ nɛ e ya nɔ ngɛ dami ɔ mi, nɛ ha nɔ nɛ e ngɛ klɔuklɔu ɔ nɛ e ya nɔ ngɛ klɔuklɔu peemi ɔ mi.

12 “‘Hyɛ! i ma oya nɔuu, nɛ hiɔ nɛ i woɔ ɔ ngɛ ye dɛ, nɛ ma wo nɔ fɛɛ nɔ hiɔ ngɛ e ní tsumi ɔ he. 13 Imi ji Alfa a kɛ Omega a,* kekleekle ɔ kɛ sekpɛ ɔ, sisije ɔ kɛ nyagbe ɔ nɛ. 14 Ni nɛmɛ nɛ a fɔɔ a tade klɔii ɔ he, bɔ nɛ pee nɛ a ná he blɔ kɛ ya wami tso ɔmɛ a he nɛ́ a nyɛ nɛ a gu agbo ɔmɛ a mi kɛ sɛ ma ngua a mi ɔ ngɛ bua jɔmi. 15 Gbe ɔmɛ* kɛ ni nɛmɛ nɛ a kɛ mumi yayamihi tsuɔ ní, kɛ ni nɛmɛ nɛ a ji ajuama bɔli* kɛ nɔmlɔ gbeli kɛ wɔ jali kɛ nɔ fɛɛ nɔ nɛ e suɔ lakpa yemi nɛ e yeɔ lakpa a ngɛ ma a se.’

16 “‘Imi Yesu lɛ i tsɔ ye bɔfo ɔ kaa e ba ye ní nɛ ɔmɛ a he odase kɛ tsɔɔ mo kɛ ha asafo ɔmɛ. Imi ji David sipoku ɔ kɛ e nina a kɛ mɔtu dodoe nɛ ngɛ kpɛe ɔ nɛ.’”

17 Nɛ mumi ɔ kɛ ayɛflo ɔ ya nɔ nɛ a ngɛ dee ke, “Ba!” nɛ ha nɔ fɛɛ nɔ ko nɛ e ngɛ nue ɔ nɛ e de ke, “Ba!” nɛ ha nɔ fɛɛ nɔ ko nɛ kuma ngɛ lɛ yee ɔ nɛ e ba; ha nɔ fɛɛ nɔ ko nɛ e suɔ ɔ nɛ e ba ngɔ wami nyu ɔ yaka.

18 “I ngɛ nɔ fɛɛ nɔ ko nɛ e nuɔ womi kpo nɛ ɔ mi gbami munyu ɔmɛ ɔ odase yee: Ke nɔ ko ngɔ nɔ́ ko kɛ piɛɛ ní nɛ ɔmɛ a he ɔ, Mawu maa ngɔ haomihi nɛ a ngma ngɛ womi kpo nɛ ɔ mi ɔ kɛ piɛɛ he kɛ ha lɛ; 19 nɛ ke nɔ ko je nɔ́ ko kɛ je womi kpo ɔ mi gbami munyu nɛ ɔmɛ a mi ɔ, Mawu ma je e blɔ nya kɛ je wami tso ɔmɛ a mi nɛ e ma je lɛ kɛ je ma ngua klɔuklɔu ɔ mi, níhi nɛ a ngma a he sane ngɛ womi kpo nɛ ɔ mi ɔ.

20 “Nɔ nɛ e yeɔ ní nɛ ɔmɛ a he odase ɔ ngɛ dee ke, ‘Ee, i ma oya nɔuu.’”

“Amen! Ba, Nyɔmtsɛ Yesu.”

21 Nyɔmtsɛ Yesu dloomi ɔ kɛ ni klɔuklɔu ɔmɛ nɛ hi si.