Kɛ Je Nyu Afua a Nɔ Kɛ Ya uu Benɛ A Kpɔ Israelbi Kɛ Je Mizraim

Nimli kpaanyɔ pɛ nɛ a ná yi baami ngɛ Nyu Afua be ɔ mi, se jehahi komɛ a se ɔ, a he ba hiɛ kɛ su akpehi abɔ. Nyu Afua a se jeha 352 nɛ a fɔ Abraham. Wa maa na bɔnɛ Yehowa ye e siwo nɔ nɛ e ha Abraham binyumu nɛ a tsɛɛ lɛ Isak ɔ. Jehanɛ, wa maa kase bɔnɛ Mawu hla Yakob ngɛ Isak binyumuhi enyɔ ɔmɛ a kpɛti ɔ he ní.

Yakob ba ná weku nɛ kle kɛ e mi binyumuhi 12 kɛ biyihi kpahi. Yakob binyumuhi 10 nyɛ a senɔ nɛ ji Yosef nɛ a jua lɛ kaa nyɔguɛ kɛ ho Mizraim ya. Pee se ɔ, Yosef ba plɛ amlaalo ngɛ Mizraim. Benɛ hwɔ ngua ko ba a, Yosef ka e nyɛmimɛ ɔmɛ nɛ e hyɛ ha kaa a tsake a tsui loo a tsakee we. Nyagbenyagbe ɔ, Yakob weku ɔ tsuo, nɛ ji Israelbi hia kɛ ho Mizraim ya. Enɛ ɔ ba ngɛ Abraham fɔmi se jeha 290.

Jeha 215 nɛ nyɛɛ se tsuo ɔ, Israelbi ɔmɛ hi Mizraim. Yosef gbenɔ se ɔ, a ba plɛ nyɔguɛhi ngɛ lejɛ ɔ. Pee se ɔ, a ba fɔ Mose, nɛ Mawu gu e nɔ kɛ kpɔ Israelbi ɔmɛ kɛ je Mizraim. Yinɔ sane nɛ́ Mi Gbami ENYƆ ɔ tu he munyu ɔ tsuo ngɔ jeha 857.