Nimli Ma Mɔ Nguaa Ko

JEHAHI fuu ba be. Nɛ Noa binyumu ɔmɛ fɔ bimɛ fuu. A bimɛ ɔmɛ wa nɛ mɛ hu a fɔ bimɛ fuu. E kɛ we nɛ nimli ba hiɛ babauu ngɛ zugba a nɔ.

Nimli nɛ ɔmɛ a kpɛti nɔ kake ji Noa bibimibi nɛ a tsɛɛ lɛ Nimrod. E ji nɔmlɔ yayami nɛ́ daa de kɛ gbee lohwehi kɛ nimli. Jehanɛ Nimrod pee e he matsɛ nɛ e ye ni ɔmɛ a nɔ. Mawu sume Nimrod sane.

Ni ɔmɛ nɛ hi si ngɛ jamɛ a be ɔ mi tsuo tuɔ gbi kake. Nimrod suɔ kaa e bua mɛ tsuo a nya ngɛ he kake konɛ e ye a nɔ. Lɔɔ heje ɔ, o le nɔ́ nɛ e pee lo? E de ni ɔmɛ ke a po ma ngua ko, konɛ a ma mɔ nguaa ngɛ mi. Hyɛ mɛ ngɛ foni ɔ mi nɛ a ngɛ bliikisi poe.

Yehowa Mawu bua jɔɛ mɔ nɛ a ngɛ mae nɛ ɔ he. Mawu suɔ kaa nimli nɛ gbɛ kɛ ya hi zugba a nɔ he tsuaa he. Se ni ɔmɛ de ke: ‘Nyɛɛ ba! Nyɛ ha nɛ waa po ma, nɛ waa ma mɔ nɛ e yi mi nɛ ka kɛ ya su hiɔwe. Kɛkɛ ɔ, wa ma he biɛ!’ Ni ɔmɛ suɔ kaa a wo mɛ nitsɛmɛ a hɛ mi nyami mohu pe Mawu.

Enɛ ɔ he ɔ, Mawu ha ni ɔmɛ kpa mɔ ɔ mami. Anɛ o le blɔ nɔ nɛ e gu kɛ pee ja lo? Si kake too ɔ, e ha nɛ ni ɔmɛ jɔɔ gbi kake tumi nɛ a bɔni gbi munomunohi tumi. Tsu mali ɔmɛ nui a sibi sisi hu. Enɛ ɔ heje nɛ a tsɛɛ ma a ke Babel aloo Babilon, nɛ e sisi ji “Futumi” ɔ nɛ.

Jehanɛ, ni ɔmɛ gbɛ kɛ je Babel. Ke nimli nɛ́ tuɔ gbi kake bua a he nya a, kɛkɛ a je kɛ ho ya hi si ngɛ he kake ngɛ zugba a nɔ.