Yesu Fɔmi Kɛ Ya Su Benɛ E Gbo

A tsɔ bɔfo Gabriel kɛ ya yiheyo fini ko nɛ a tsɛɛ lɛ Maria ngɔ. Nɛ e ya de lɛ kaa e ma fɔ bi ko nɛ́ ma ba ye matsɛ kɛ ya neneene. A fɔ bimwɔyo Yesu ɔ ngɛ lohwehi a hwɔ he, nɛ to hyɛli komɛ ya slaa lɛ. Pee se ɔ, dodoe ko tsɔɔ nyumuhi komɛ blɔ kɛ je puje he kɛ ba bimwɔyo ɔ ngɔ. Wa maa le nɔ nɛ ha a na jamɛ a dodoe ɔ, kɛ bɔnɛ a baa Yesu yi kɛ je nihi nɛ bɔ mɔde kaa a maa gbe lɛ ɔ dɛ.

Lɔɔ se ɔ, wa maa na benɛ Yesu ye jeha 12 nɛ́ e kɛ mlaa tsɔli ɔmɛ ya sɛɛ ní ngɛ sɔlemi we ɔ. Jeha nyɔngma kɛ kpaanyɔ se ɔ, a baptisi Yesu nɛ e bɔni nítsumi nɛ Mawu tsɔ lɛ kaa e ba tsu ngɛ zugba a nɔ ɔ tsumi, nɛ ji, Matsɛ Yemi ɔ he ní tsɔɔmi. Yesu hla nyumuhi 12 nɛ e pee mɛ e bɔfohi, nɛ a ye bua lɛ kɛ tsu ní ɔ.

Jehanɛ se hu ɔ, Yesu pee nyakpɛ ní fuu. E ngɔ abolo kɛ lo bɔɔ pɛ kɛ lɛ nimli akpehi abɔ. E tsa hiɔtsɛmɛ nɛ e tle gbogboehi si. Nyagbe ɔ, wa maa na níhi tsuo nɛ ba Yesu nɔ ngɛ e si himi ɔ nyagbe ligbi ɔ nɔ, kɛ bɔnɛ a gbe lɛ. Yesu ngɔ maa pee jeha etɛ kɛ fã kɛ fiɛɛ, lɔɔ he ɔ, Mi Gbami EKPA ngɔ jeha 34 kɛ bɔɔ ko.