E Kɛ Yo ɔ Ngɛ Nyu Vu ɔ He

YESU ya hi si ngɛ nyu vu ko he ngɛ Samaria konɛ e jɔɔ e he bɔɔ. E kaseli ɔmɛ ho ma a mi ya nɛ́ a ya he niye ní. Yo ɔ nɛ Yesu kɛ lɛ ngɛ munyu tue ɔ ba nyu yɛmi. Yesu de lɛ ke: ‘Ha mi nyu ɔ eko nɛ ma nu.’

Enɛ ɔ ha yo ɔ nya kpɛ e he wawɛɛ. Mɛni heje? Ejakaa, Yesu ji Yudano, nɛ yo ɔ lɛɛ Samariano ji lɛ. Nɛ Yudabi fuu sume Samariabi. A kɛ mɛ tu we munyu po! Se Yesu suɔ nimli slɔɔtohi tsuo. Lɔɔ he ɔ, e de yo ɔ ke: ‘Kaa o le nɔ nɛ ngɛ mo nyu ɔ bae ɔ, jinɛ o ko ba lɛ nɛ e ha mo wami nyu.’

Yo ɔ bi Yesu ke: ‘Etsɛ, nyu vu ɔ mi kuɔ, nɛ o be goga po. Lɛɛ jije o ma ná wami nyu ɔ kɛ je mɔ?’

Yesu de lɛ ke: ‘Ke o nu vu nɛ ɔ mi nyu ɔ, kuma maa ye mo ekohu. Se nyu nɛ ma ha mo ɔ ma ha nɛ o maa hi si kɛ ya neneene.’

Yo ɔ de Yesu ke: ‘Etsɛ, mo ha mi nyu nɛ ɔ! Kɛkɛ ɔ, kuma be mi yee hu. Nɛ e he be hiae hu kaa ma ba hiɛ ɔ nɛ ma ba yɛ nyu.’

Yo ɔ susu kaa nyu nitsɛnitsɛ he munyu nɛ Yesu ngɛ tue. Se Yesu ngɛ anɔkuale nɛ kɔ Mawu kɛ e matsɛ yemi ɔ he ɔ he munyu tue. Anɔkuale nɛ ɔ ngɛ kaa wami nyu. Nɛ e ma nyɛ ma ha nɔ neneene wami.

Jehanɛ ɔ, Yesu de yo ɔ ke: ‘Yaa nɛ o ya tsɛ o huno nɛ o kɛ lɛ nɛ ba.’

Yo ɔ ha heto ke: ‘I be huno.’

Yesu de lɛ ke: ‘O tu anɔkuale. Se o gba nyumuhi enuɔ momo, nɛ nyumu nɛ o kɛ lɛ ngɛ amlɔ nɛ ɔ hu pi o huno.’

Yo ɔ he mi po, ejakaa munyu ɔmɛ tsuo ji anɔkuale. Se kɛ Yesu pee kɛ le ní nɛ ɔmɛ tsuo kɛɛ? E le ejakaa Yesu ji Nɔ nɛ́ Mawu Wo Si kaa e ma tsɔ lɛ kɛ ba a nɛ, nɛ e ha e le munyu nɛ ɔmɛ tsuo. Yesu kaseli ɔmɛ kpale a se kɛ ba, nɛ benɛ a na nɛ e kɛ Samaria yo ɔ ngɛ munyu tue ɔ, a nya kpɛ a he.

Mɛni ji nɔ́ nɛ wa kaseɔ kɛ jee sane nɛ ɔ mi? E tsɔɔ kaa Yesu mi mi hi kɛ ha nihi slɔɔtohi tsuo. Nɛ ja ji bɔnɛ e sa kaa wɔ hu waa pee. E sɛ nɛ wa susu kaa akɛnɛ ni komɛ je ma kpa mi heje ɔ, nimli yayamihi ji mɛ. Jehanɛ ɔ, Yesu suɔ kaa nihi tsuo nɛ le anɔkuale nɛ kɛ nɔ yaa neneene wami mi ɔ. Nɛ ja lɛ e sa kaa wɔ hu waa ye bua ni kpahi nɛ a le anɔkuale ɔ.