Ná Si Himi mi Bua Jɔmi ngɛ Zugba a nɔ kɛ Ya Neneene!

A pee womi nyafii nɛ ɔ konɛ e ye kɛ bua mo nɛ o le nɔ nɛ bɔ zugba a kɛ níhi tsuo nɛ ngɛ nɔ ɔ. O maa kase kaa Mawu, nɔ nɛ bɔ zugba a, ngɛ biɛ. Nɛ wa maa tsɔɔ nɔ́ heje nɛ Mawu bɔ adesa kɛ bɔ nɛ o maa pee ha kɛ na si himi nɛ buajɔ ngɛ mi ngɛ zugba a nɔ kɛ ya neneene.

Wa ngɛ hɛ nɔ kami kaa fonihi fuu nɛ ngɛ womi ɔ mi ɔ maa ye kɛ bua mo konɛ o pee nɔ́ nɛ o maa kane ɔ he foni nitsɛ ngɛ o juɛmi mi. Bɔ nɛ pee ha nɛ o na he se babauu ɔ, e sa nɛ o kane Baiblo ngmami ɔmɛ nɛ a ngma ngɛ foni ɔmɛ a kasa nya a. Enɛ ɔ ma ha nɛ mo nitsɛ o maa kane Mawu si womi kpakpahi nɛ ngɛ Baiblo ɔ mi ɔ ekomɛ kɛ nɔ́ nɛ Mawu de ke o pee konɛ o na si womi nɛ ɔmɛ a mi bami ɔ he se.

Eko ɔ o maa suɔ nɛ o ngɔ womi nyafii nɛ ɔ kɛ tsu ní kɛ ye bua ni kpahi hu. Ke o ngɛ bimɛ ɔ, o ma nyɛ maa ngɔ kɛ ye bua mɛ nɛ a kase Mawu he ní. Keji kaa ma nɛ o ngɛ mi ɔ mi nikɔtɔmahi fuu li ní kanemi ɔ, o ma nyɛ maa ngɔ foni ɔmɛ kɛ ye bua mɛ nɛ a nu Mawu yimi tomi ɔmɛ a sisi konɛ mɛ hu a nyɛ nɛ a ye kɛ bua a huɛmɛ.

Wa ngɛ hɛ nɔ kami nitsɛ kaa womi nyafii nɛ ɔ nɛ o maa kase ɔ maa bli blɔ ha mo konɛ o na jɔɔmihi babauu, konɛ o tsɔɔ ni kpahi bɔ nɛ a maa pee ha kɛ hi si ngɛ zugba a nɔ kɛ ya neneene.