Mɛnɔmɛ Ji Mawu Huɛmɛ?

Yesu Kristo ji Yehowa bi nɛ e suɔ lɛ nitsɛ, kɛ e huɛ nɛ pe kulaa. Loko Yesu ma ba hi zugba a nɔ kaa adesa a, e hi hiɔwe kaa mumi mi adebɔ nɛ ngɛ he wami. (Yohane 17:5) Kɛkɛ nɛ e ba zugba a nɔ nɛ e ba tsɔɔ nimli Mawu he anɔkuale ɔ. (Yohane 18:37) E ngɔ e wami hu kɛ ha konɛ e kɛ kpɔ adesahi nɛ peeɔ tue bumi kɛ je yayami kɛ gbenɔ dɛ mi. (Romabi 6:23) Amlɔ nɛ ɔ, Yesu ji Matsɛ ngɛ Mawu Matsɛ Yemi ɔ mi. Matsɛ Yemi ɔ ji hiɔwe nɔyemi nɛ́ maa pee zugba a Paradeiso.—Kpojemi 19:16.

Bɔfo ɔmɛ hu ji Mawu huɛmɛ. Bɔfo ɔmɛ ji a wami sisi ngɛ zugba a nɔ kaa adesahi. Mawu bɔ mɛ ngɛ hiɔwe loko e bɔ zugba a. (Hiob 38:4-7) Bɔfohi akpeakpe abɔ lɛ ngɛ. (Daniel 7:10) Mawu huɛmɛ nɛ́ ngɛ hiɔwe nɛ ɔ suɔ kaa nimli nɛ́ kase Yehowa he anɔkuale ɔ.—Kpojemi 14:6, 7.

Mawu ngɛ huɛmɛ ngɛ zugba a nɔ hulɔ; e tsɛɛ mɛ ke e we odasefoli. Odasefono ngɛ́ munyu yemi he ji nɔ nɛ deɔ nɔ́ nɛ e le ngɛ nɔ ko he aloo ngɛ nɔ́ ko he. Yehowa Odasefoli deɔ ni kpahi nɔ́ nɛ a le ngɛ Yehowa kɛ e yi mi tomi he. (Yesaya 43:10) Odasefoli ɔmɛ suɔ nɛ́ o kase Yehowa he anɔkuale ɔ kaa bɔnɛ bɔfo ɔmɛ hu suɔ kaa o pee ɔ. A suɔ kaa mo hu o ba pee Mawu huɛ.