Nya Tsɔɔmi

MAWU OPE ɔ ji je mluku ɔ tsuo Nɔyelɔ. Wa si himi amlɔ nɛ ɔ, kɛ hwɔɔ se tsuo daa si ngɛ e nɔ. E ngɛ he wami nɛ e kɛ haa nɔ hiɔwo kɛ he wami nɛ e kɛ gblaa nɔ tue. E ngɛ he wami nɛ e kɛ haa wami kɛ he wami nɛ e kɛ ngɔɔ wami ngɛ nɔ dɛ. Ke wa ná e nɔ kplɛɛmi ɔ, wa maa ye manye; se ke wa na we e nɔ kplɛɛmi ɔ, lɛɛ haomi maa ba wa nɔ. E he hia nitsɛ kaa wa jami ɔ nɛ sa e hɛ mi!

Nimli jaa ngɛ blɔhi fuu a nɔ. Ke jami ngɛ kaa blɔ ɔ, anɛ Mawu kplɛɛɔ jami mi blɔhi tsuo a nɔ lo? Dɛbi, e kplɛɛ we nɔ. Yesu, nɛ ji Mawu gbalɔ ɔ, tsɔɔ kaa blɔhi enyɔ pɛ lɛ ngɛ. E de ke: “Agbo nɛ bli kɛ blɔ gbajaa ji nɔ́ nɛ kɛ nɔ yaa hɛ mi kpatami mi ɔ nɛ, nɛ nihi babauu lɛ sɛɛ mi. Se agbo tokofii kɛ blɔ nɛ hɛ́ ji nɔ nɛ kɛ nɔ yaa wami mi ɔ nɛ, nɛ nihi bɔɔ ji nihi nɛ naa lɔɔ.”—Mateo 7:13, 14, Somi He Ɔ.

Jami slɔɔtohi enyɔ pɛ lɛ ngɛ: kake kɛ nɔ yaa wami mi nɛ kake hu kɛ nɔ yaa hɛ mi kpatami mi. Yi mi tomi nɛ ngɛ womi nɛ ɔ he ji kaa, e ye bua mo konɛ o na blɔ ɔ nɛ kɛ nɔ yaa neneene wami mi ɔ.