Prologue

Ní Kanelɔ Kpakpa:

“Ba nyɛɛ ye se.” (Marko 10:​21) Munyu nɛ ɔ nɛ́ Yesu Kristo tu ɔ tsɔɔ kaa e ngɛ wɔ nine fɔe nɛ wa ba nyɛɛ e se. Anɛ o ngɛ e se nyɛɛe lo? Jã nɛ o maa pee ɔ ma ha nɛ o si himi maa pee kpakpa. Mɛni heje?

Yehowa tsɔ e Bi kake ɔ kɛ ba zugba a nɔ konɛ e ngɔ e wami kɛ ba ha kaa kpɔmi nɔ́. ( Yohane 3:​16) Ngɛ gbomi nɛ Bi nɛ ɔ ba gbo kɛ ha wɔ se ɔ, e tsɔɔ bɔnɛ e sa kaa waa ba wa je mi ha hulɔ. E ya nɔ nɛ e pee nɔ́ nɛ da ngɛ e si himi mi, nɛ enɛ ɔ ha nɛ e Tsɛ ɔ ná bua jɔmi. Jehanɛ se hu ɔ, Yesu tsɔɔ wɔ bɔnɛ wa ma plɛ kɛ pee kaa e Tsɛ ɔ ha. Bi ɔ gu e munyu tumi kɛ e ní peepeehi a nɔ nɛ e ha a na Tsɛ ɔ blɔhi kɛ e suɔmi nya ní nitsɛ.​—Yohane 14:⁠9.

Baiblo ɔ de kaa Yesu “pee nɔ hyɛmi nɔ́ ha [wɔ] konɛ [waa] nyɛɛ e se.” (1 Petro 2:​21) Ke wa suɔ nɛ waa hɛ wɔ kɛ su Yehowa he, ke wa suɔ nɛ wa ná si himi kpakpa amlɔ nɛ ɔ, ke wa suɔ hu nɛ waa hi neneene wami blɔ ɔ nɔ ɔ, lɛɛ e sa kaa waa nyɛɛ Kristo nane mami he ɔmɛ a se haa.

Loko wa ma nyɛ maa pee jã a, e he hia nɛ waa le bɔnɛ Yesu hi si ha benɛ e ngɛ zugba a nɔ ɔ. Enɛ ɔ he ɔ, e sa kaa waa kase Yesu he sane nɛ a ngma kɛ wo Baiblo ɔ mi ɔ saminya. Ke wa susuu níhi nɛ Yesu de kɛ níhi nɛ e pee ɔ a he nɛ wɔ hu wa bɔ mɔde kaa waa kɛ ma tsu ní ngɛ wa munyu tumi kɛ wa ní peepeehi a mi ɔ, lɔɔ maa ye bua wɔ nɛ wa maa le bɔnɛ wa ma plɛ kɛ nyɛɛ e se ha.

Mo ha nɛ womi nɛ ɔ nɛ ye bua mo konɛ suɔmi nɛ o ngɛ kɛ ha Yesu kɛ Yehowa a mi nɛ wa. Ha nɛ suɔmi nɛ ɔ nɛ wo mo he wami nɛ́ o nyɛɛ Yesu nane mami he ɔmɛ a se haa, konɛ o ha nɛ Yehowa nɛ ná bua jɔmi amlɔ nɛ ɔ kɛ ya neneene.

Nihi Nɛ́ A Pee Womi ɔ