Matsɛ Yemi Fiɛɛmi​—Sane Kpakpa a Fiɛɛmi Ngɛ Je Kɛ Wɛ

O DLA o he kaa o maa ya fiɛɛmi mla ngɛ ligbi nɛ o be ní tsumi yae ɔ nɔ. Se o yi mi ngɛ mo pee enyɔɔnyɔ kaa o ya loo o ko ya akɛnɛ pɔ tɔ mo ɔ he je. Kɛkɛ nɛ o sɔle, nɛ o ma o juɛmi nya si kaa o maa ya. O kɛ nyɛmiyo anɔkualetsɛ ko nɛ e wa ngɛ jeha mi nɛ ya, nɛ o bua jɔ bɔ nɛ e toɔ e tsui si, kɛ bɔ nɛ e mi mi jɔ ha a he. Benɛ nyɛ ngɛ Baiblo ɔ mi anɔkuale ɔ fiɛɛe ngɛ wehi a mi ɔ, o kai kaa o nyɛmimɛ ngɛ je kɛ wɛ ɔ ngɛ sɛ gbi nɛ ɔ nɔuu fiɛɛe, a kɛ womi kake ɔ nɔuu ngɛ ní tsue, nɛ wɔ tsuo wa ngɛ tsɔsemi kake too nɛ a kɛ haa wɔ ɔ he se nae. Benɛ o ba we mi ɔ, o nu he kaa o ná he wami ehe. O bua jɔ wawɛɛ kaa o hí si ngɛ we mi!

Mwɔnɛ ɔ, Mawu Matsɛ Yemi ɔ ní tsumi titli ji Kristofohi a sɔmɔmi ní tsumi ɔ. Yesu gba kɛ fɔ si kaa a ma tsu fiɛɛmi ní tsumi ɔ wawɛɛ ngɛ nyagbe ligbi ɔmɛ a mi. (Mat. 24:14) Mɛni blɔ nɔ gbami nɛ ɔ ba mi ngɛ? Ngɛ fã nɛ ɔ mi ɔ, wa ma susu nihi nɛ a fiɛɛ, blɔhi a nɔ nɛ a gu kɛ fiɛɛ, kɛ nɔ́ nɛ he hia wawɛɛ nɛ a kɛ ngɛ ní tsue kɛ ngɛ nihi ayɔhi abɔ ye buae ngɛ je kɛ wɛ konɛ a na kaa Mawu Matsɛ Yemi ɔ ji nɔ yemi nitsɛ ɔ he.