Matsɛ Yemi ɔ Si Womihi​—Níhi Tsuo Maa Pee Ehe

O TSƆ tso yiblii agbo ko nɛ fu. Kɛkɛ nɛ o ngɔ kɛ to o gugwɔ nya nɛ o nu e he via a loko o kɛ wo o kɛtɛ loo kusii kɛ e mi tso yiblii fuu ɔ mi. O tsu ní ngmlɛfia babauu se o nui he kaa pɔ tɔ mo, nɛ o suɔ nɛ o tsa ní tsumi ɔ nɔ bɔɔ. O yayo ngɛ ní tsue ngɛ tso nɛ kɛ o he kɛ we ɔ sisi. E ngɛ ní ɔ tsue kɛ bua jɔmi, nɛ e kɛ weku li kɛ huɛmɛ nɛ a ngɛ nyɛ ye buae ngɛ ní kpami ɔ mi ɔ ngɛ ní sɛɛe. E kpale pee yiheyo kaa bɔ nɛ e ji be mi nɛ o ji jokuɛ ɔ. E pee mo nyakpɛ, ejakaa o na o yayo nɛ e pee yomoyo ngɛ je momo ɔ mi. O kai be nɛ hiɔ ko fia lɛ wawɛɛ, nɛ o pɛtɛ e nine he benɛ e ngɛ gboe, kɛ benɛ o fo ya ngɛ e yɔkɔ ɔ he ɔ. Se amlɔ nɛ ɔ, o na lɛ kɛ ni kpahi nɛ a ba wami mi ekohu, nɛ a ngɛ nɔmlɔ tso mi he wami!

Wa le kaa jamɛ a be ɔ maa ba. Wa le jã ejakaa Mawu si womihi baa mi be tsuaa be. Ngɛ fã nɛ ɔ mi ɔ, wa ma susu Matsɛ Yemi ɔ si womihi nɛ e be kɛe nɛ maa ba mi loko Harmagedon maa ba a he. Wa ma susu níhi nɛ Matsɛ Yemi ɔ maa pee ngɛ Harmagedon se ɔ hu he. Ke Mawu Matsɛ Yemi ɔ ba ye zugba a tsuo nɔ, nɛ e pee níhi tsuo ehe ɔ, hyɛ bɔ nɛ wa bua maa jɔ ha!