Mɛni He Je Nɛ Yesu Kaseli Ɔmɛ Hɛ Hwɔ ɔ?

Benɛ Yesu ya ye jeha 30 Hetsɔmi ɔ, e kɛ we nɛ a wo Yohane Nɔ Baptisilɔ ɔ tsu. Yohane suɔ kaa e kaseli ɔmɛ nɛ a nyɛɛ Yesu se, se loloolo ɔ, a ti ni komɛ ngɛ nɛ a pee we jã.

Amlɔ nɛ ɔ, e be kɛe nɛ a maa ye jeha 31 Hetsɔmi ɔ. Yohane kaseli ɔmɛ ekomɛ ya Yesu ngɔ nɛ a ya bi lɛ ke: “Mɛni he je waa kɛ Farisi bi ɔmɛ haa hwɔ, nɛ o kaseli ɔmɛ lɛɛ a hɛ hwɔ ɔ?” (Mateo 9:14) Farisi bi ɔmɛ kɛ hwɔ hami fiɛ we kulaa ngɛ a jami mi. Pee se ɔ, Yesu ngɔ nɔ́ hetomi nɔ́ ko nɛ kɔɔ Farisi no ko nɛ e buu e he dalɔ he ɔ kɛ tsu ní. Farisi no ɔ sɔle ke: ‘Mawu, i naa mo si kaa i pee we jiklɔɔ; nɛ i haa hwɔ si enyɔ ngɛ otsi mi.’ (Luka 18:11, 12) Eko ɔ, Yohane kaseli ɔmɛ a susu kaa e sa nɛ a ha hwɔ kaa bɔ nɛ Farisi bi ɔmɛ peeɔ ɔ. Aloo eko ɔ, Yohane nɛ a wo lɛ tsu ɔ he je nɛ a ngɛ hwɔ hae ɔ nɛ. Nihi nui sisi kaa Yesu kaseli ɔmɛ a piɛɛ we Yohane kaseli ɔmɛ a he kɛ hɛ hwɔ ngɛ nɔ́ nɛ ba Yohane nɔ ɔ he.

Yesu pee nɔ hyɛmi nɔ́ kɛ ha mɛ ke: “Ke a fɔ̃ nihi nine kɛ ya yo kpeemi ɔ, anɛ a maa ye kɔmɔ be abɔ nɛ ayɛflo huno ɔ kɛ mɛ ngɛ ɔ lo? Dɛbi! Be maa ba nɛ a maa ngɔ ayɛflo huno ɔ kɛ je a kpɛti kɛ ho; jamɛ a be ɔ loko a maa ha hwɔ.”​​—Mateo 9:15.

Yohane Nɔ Baptisilɔ ɔ tu Yesu he munyu kaa e ji ayɛflo huno. (Yohane 3:28, 29) Enɛ ɔ he ɔ, akɛnɛ Yesu ngɛ e kaseli ɔmɛ a kpɛti ɔ, e he hia we nɛ a ha hwɔ. Pee se ke Yesu gbo ɔ, e kaseli ɔmɛ maa ha hwɔ. Se ke a tle a Nyɔmtsɛ ɔ si ɔ, a bua maa jɔ, nɛ e he be hiae hu kaa a maa ha hwɔ.

Enɛ ɔ se ɔ, Yesu ngɔ nɔ́ hetomi níhi enyɔ kɛ tsu ní. E de mɛ ke: “Nɔ ko ngɔɛ bo he kɛ ta we tade momo mi. Ke o pee jã a, he nɛ o ta a ma hía, nɛ puɔ ɔ ma bli mohu pe kekle ɔ. Jã kɛ̃, nɔ ko ngɔɛ wai he kɛ wui lohwe he womi tɔ momo mi. Ejakaa lohwe he womi tɔ ɔ ma pɛ, nɛ wai ɔ ma pue si, nɛ lohwe he womi tɔ ɔ ma puɛ. Wai he ɔ, lohwe he womi tɔ he mi mohu a kɛ woɔ.” (Mateo 9:16, 17) Mɛni Yesu ngɛ hlae maa tsɔɔ?

Yesu ngɛ hlae nɛ e ye bua Yohane kaseli ɔmɛ konɛ a nu sisi kaa e sɛ nɛ nɔ ko nɛ hyɛ blɔ kaa e kaseli ɔmɛ maa ngɔ a he kɛ wo Yuda bi ɔmɛ a blema kusumihi, kɛ ní peepeehi kaa hwɔ hami mi. E bɛ kaa e ma ba fĩ blema jami blɔ nya tomi nɛ e be kɛe nɛ e maa ba nyagbe ɔ se. Jami nɛ Yesu ngɛ nihi he wami woe nɛ a ngɔ a he kɛ wo mi ɔ be kaa Yuda bi a jami nɛ nimli a kɔhi hyi lɛ tɔ ɔ. Yesu be bo ehe ngɔe kɛ ta tade momo mi, nɛ e be wai ehe hu ngɔe kɛ wo lohwe he womi tɔ momo mi.