Yayami Kɛ Pami He Ní Kasemi

Bɔ nɛ nihi peeɔ a ní ha ngɛ Yesu munyu ɔ he ɔ ngɛ ekpaekpa, ejakaa e slo bɔ nɛ nɔ tsuaa nɔ tsui ngɛ ha. Enɛ ɔ je kpo heii benɛ Yesu ya slaa nɔ ko ngɛ Galilea a. Farisi no ko nɛ a tsɛɛ lɛ Simon tsɛ Yesu ní yemi, konɛ e gu lɔ ɔ nɔ kɛ le lɛ saminya ejakaa e nu kaa Yesu ngɛ nyakpɛ níhi pee. Eko ɔ, Yesu suɔ nɛ e maa ngɔ jamɛ a he blɔ ɔ kɛ tsɔɔ nihi nɛ a maa ya lejɛ ɔ ní kaa bɔ nɛ e pɔɔ peemi ke tó tsuli kɛ yayami peeli fɔ lɛ nine ɔ.

Se benɛ Yesu ya a, a pee we lɛ nibwɔ kaa bɔ nɛ a pɔɔ peemi ngɛ jamɛ a be ɔ mi ɔ. Akɛnɛ pu tsoɔ wawɛɛ, nɛ bunyuku hu hiɛ ngɛ Palestina blɔ ɔmɛ a nɔ he je ɔ, blɔ hiali a tokotahi a he sɛɛ mu wawɛɛ. Enɛ ɔ he ɔ, ke nubwɔ ya to nɔ ko ɔ, a fiɔɔ e nya he nɛ a fɔɔ e nane he kɛ heɔ lɛ atuu. Nɔ́ kpa ko hu nɛ a peeɔ haa nubwɔ ɔ ji kaa a ngɔɔ nu kɛ pueɔ e yi mi. Jinɛ e sa kaa a ko fiɔ Yesu nya he, nɛ a ko fɔ e nane he, nɛ a ko pɔ e yi mi nu kaa bɔ nɛ a pɔɔ peemi haa nibwɔhi ɔ, se lɔ ɔmɛ tsuo bɔ lɛ. Ke o hyɛ ɔ, a pee lɛ nibwɔ lo?

Nibwɔ ɔmɛ ba hi si nɛ a bɔni ní yemi. Benɛ a ngɛ ní ɔ yee ɔ, yo ko nɛ a fɔ̃ we lɛ nine pee blɛuu nɛ e ba sɛ tsu ɔ mi. A le yo nɛ ɔ ngɛ ma a mi kaa e ji “yayami peelɔ.” (Luka 7:37) Wɔ tsuo wa peeɔ yayami, se yo nɛ ɔ nɔ́ ɔ lɛɛ, e po blɔ mi. Yaholɔ ji lɛ. Eko ɔ, e nu nɛ Yesu de ke ‘nihi tsuo nɛ a tloo tlomi nɛ pɔ tɔ mɛ ɔ, a ba e ngɔ, nɛ e ma ha nɛ a he mi maa jɔ mɛ.’ (Mateo 11:28, 29) Eko ɔ, munyu nɛ ɔmɛ nɛ Yesu tu, kɛ níhi nɛ e pee ɔ wo lɛ he wami, nɛ lɔ ɔ he je nɛ e ngɛ lɛ hlae ɔ nɛ.

Yo ɔ gu Yesu se nɛ e ba kpla si ngɛ e nane he. E fo ya kɛ pue Yesu nane nɔ, nɛ e ngɔ e yi bwɔmi kɛ tsu. Lɔ ɔ se ɔ, e fiɔ Yesu nane he nɛ e plɛ nu kɛ he via nɛ e hɛɛ kɛ ya a kɛ pue Yesu nane nɔ. Simon nɛ e ji Farisi no nɛ e fɔ Yesu nine ɔ na yo ɔ, nɛ e bua jɔɛ nɔ́ nɛ e ngɛ pee ɔ he. E de ngɛ e yi mi ke: “Nyumu nɛ ɔ, gbalɔ nitsɛ ji lɛ jinɛ e ko le yo nɛ ngɛ e he tae nɛ ɔ mi tso kaa yayami peelɔ ji lɛ!”​—Luka 7:39.

Benɛ Yesu na Simon juɛmi ɔ, e de ke: “Simon, i ngɛ sane ko nɛ ma de mo.” Simon he nɔ ke: “Tsɔɔlɔ, de!” Yesu ya nɔ nɛ e de ke: ‘Nyumuhi enyɔ komɛ ya sika palɔ ko ngɔ ya pa sika. Nɔ kake pa sika hiɔ yi 500, nɛ nɔ kake hu pa yi 50. Se akɛnɛ a nyɛ we nɛ a wo hiɔ ɔ he je ɔ, e ngɔ kɛ ke mɛ ni enyɔ ɔmɛ tsuo. Lɔ ɔ he ɔ, a ti mɛnɔ maa suɔ lɛ pe kulaa?’ Eko ɔ, Simon he munyu ɔ nɔ ngɛ e kuɔ si ke: “E peeɔ mi kaa nɔ nɛ e ngɔ fuu ngɔ ke lɛ ɔ.”​—Luka 7:40-43.

Yesu kɛ lɛ kpa gbi. Yesu plɛ nɛ e ya hyɛ yo ɔ, kɛkɛ nɛ e de Simon ke: “Tse o ngɛ yo nɛ ɔ hyɛe? Nɛ i ba sɛ o we ɔ mi ɔ, o ha we mi nyu nɛ ma kɛ fɔ ye nane he, se lɛɛ e kɛ vo nyu fɔ ye nane he, nɛ e kɛ e yi bwɔmi tsu. O fiɔ we ye nya he, nɛ o pee we mi atuu. Se kɛ je benɛ i ba hiɛmɛ nɛ ɔ, yo nɛ ɔ jɔɔ we ye nane he fiɔmi.” Yesu na kaa yo yaholɔ nɛ ɔ pia e he kɛ je e tsui mi tɔɔ. E mwɔ e munyu ɔ nya ke: “Lɔ ɔ he ɔ, i ngɛ mo dee ke, suɔmi nɛ e je kpo ɔ tsɔɔ kaa a ngɔ e he yayami babauu ɔ ngɔ pa lɛ. Nɔ nɛ a ngɔ bɔbɔyoo pɛ ngɔ pa lɛ ɔ, suɔmi bɔbɔyoo pɛ e jeɔ kpo.”​—Luka 7:44-47.

Pi nɛ Yesu ngɛ tsɔɔe kaa e kplɛɛ je mi bami yaya nɔ. Mohu ɔ, e ngɛ tsɔɔe kaa ke yayami peelɔ ko pia e he nɛ e tsake e tsui, nɛ e ba e ngɔ ɔ, e maa na lɛ mɔbɔ, nɛ e ma ná he jɔmi. Benɛ Yesu de yo ɔ ke: ‘A ngɔ o he yayami ɔmɛ ngɔ pa mo. O hemi kɛ yemi ɔ he o yi wami; yaa ngɛ he jɔmi mi’ ɔ, yo ɔ tsui nɔ e mi.​​—Luka 7:48, 50.