Yesu Tsɔɔ Ní Benɛ E Yaa Yerusalem ɔ

Yesu fiɛɛ saii ngɛ Galilea, ejakaa nihi buɔ lɛ tue ngɛ lejɛ ɔ pe Yudea. Jehanɛ hu ɔ, benɛ Yesu ya Yerusalem nɛ e tsa nyumu ko ngɛ Hejɔɔmi ligbi ɔ nɔ ɔ, ‘Yuda ma nimeli ɔmɛ a hɛ dɔ nɛ a to kaa a maa gbe lɛ.’​​—Yohane 5:18; 7:1.

E ba su gbo be ngɛ jeha 32 mi, nɛ Gbasisihimi Nyami yemi be ɔ miɔ nɛ e maa su. A yeɔ gbijlɔ nɛ ɔ ligbi kpaago sɔuu, nɛ ngɛ ligbi kpaanyɔne ɔ nɔ ɔ, ni ɔmɛ tsuo ya buaa a he nya. A yeɔ gbijlɔ nɛ ɔ ngɛ a ngmɔ humi be ɔ nyagbe, nɛ e ji be nɛ a nyaa wawɛɛ nɛ a naa Mawu si.

Yesu nyɛmimɛ Yakobo, Simon, Yosef, kɛ Yuda ya de Yesu ke: “Jee hiɛ ɔ, nɛ o ya Yudea.” Yerusalem ji he nɛ Yuda bi ɔmɛ jaa Mawu ngɛ titli. Ke a ngɛ gbijlɔ etɛ ɔmɛ nɛ a yeɔ ngɛ jeha a mi ɔ yee ɔ, ma a mi tsuo peeɔ hoo. Enɛ ɔ he ɔ, Yesu nyɛmimɛ ɔmɛ de lɛ ke: “Ke nɔ ko suɔ kaa ma nɛ le lɛ saminya a, níhi nɛ e peeɔ ɔ, e laa we nɔ. Ní ɔmɛ tsuo nɛ o ngɛ pee ɔ, ha nɛ je ɔ tsuo nɛ nu he.”​​—Yohane 7:3, 4.

Ngɛ anɔkuale mi ɔ, Yesu nyɛmimɛ eywiɛ ɔmɛ a “he we lɛ yi” kaa lɛ ji Mesia a. Se a ngɛ hlae nɛ nihi nɛ a maa ya gbijlɔ ɔ nɛ a na nyakpɛ níhi nɛ Yesu ngɛ pee ɔ. Yesu le kaa oslaa ngɛ jã nɛ e maa pee ɔ he, enɛ ɔ he ɔ, e de mɛ ke: “Je ɔ be nyɛ nyɛe, se a nyɛɔ mi, ejakaa i yeɔ odase kɛ siɔ mɛ ngɛ ní yayamihi nɛ a peeɔ ɔ he. Nyɛɛ ya nɛ nyɛ ya ye nyami be ɔ. Imi lɛɛ i be yae, ejakaa be nɛ maa da mi ɔ na we nɛ e su.”​​—Yohane 7:5-8.

Benɛ Yesu nyɛmimɛ ɔmɛ kɛ nihi nɛ a yaa Yerusalem ɔ tsuo je ɔ, Yesu kɛ e kaseli ɔmɛ hu a gu he kpa kɛ je ma a mi bɔ nɛ pee nɛ nɔ ko kó na mɛ. A gui blɔ nɛ ngɛ Yordan Pa a kasa nya a nɔ, mohu ɔ, a ya gu Samaria. Akɛnɛ a be he ko nɛ a maa hwɔ ngɛ Samaria he je ɔ, Yesu tsɔ e kaseli ɔmɛ a kpɛti ni komɛ kɛ sɛ e hlami kaa a ya hla hwɔ he. Se benɛ a ya a, ni ɔmɛ he we mɛ, ejakaa a na kaa Yesu yaa ye Yuda bi ɔmɛ a gbijlɔ ɔ ngɛ Yerusalem. Yakobo kɛ Yohane kɛ abofu bi Yesu ke: “Nyɔmtsɛ o suɔ kaa wa de nɛ la nɛ je hiɔwe ba sã mɛ lo?” (Luka 9:54) Yesu kã a hɛ mi kaa a de jã, nɛ a tsa a blɔ hiami ɔ nɔ.

Benɛ a ngɛ blɔ nɔ kɛ yaa a, mlaa tsɔɔlɔ ko ba de Yesu ke: “Tsɔɔlɔ he tsuaa he nɛ o yaa a, i kɛ mo maa ya.” Se Yesu de lɛ ke: “Kɔkɔbohi ngɛ a muɔ, nɛ lohwe pɛlitsɛmɛ ngɛ tsu, se Nɔmlɔ Bi ɔ lɛɛ e be he ko nɛ e kɛ e yi fɔɔ.” (Mateo 8:19, 20) Yesu ngɛ tsɔɔe kaa ke mlaa tsɔɔlɔ ɔ nyɛɛ e se ɔ, e kɛ haomihi maa kpe. E ma nyɛ maa pee kaa mlaa tsɔɔlɔ ɔ woɔ e he nɔ, lɔ ɔ he ɔ, e he wa ha lɛ kaa e maa pee e si himi kpokploo. Wɔ tsuo wa ma nyɛ ma bi wa he ke, ‘Anɛ ma nyɛ ma nyɛɛ Yesu se ngɛ si fɔfɔɛhi tsuo a mi lo?’

Yesu de nɔ kpa ko hu ke: “Ba nyɛɛ ye se.” Nyumu ɔ de lɛ ke: “Nyɔmtsɛ, ha mi blɔ nɛ ma ya pu tsaatsɛ lolo.” Akɛnɛ Yesu le nyumu ɔ si fɔfɔɛ he je ɔ, e de lɛ ke: ‘Ha ni gbogboehi nɛ pu mɛ nitsɛmɛ a ni gbogboehi. Se moo lɛɛ yaa nɛ o ya fiɛɛ Mawu Matsɛ Yemi ɔ he sane ɔ.’ (Luka 9:59, 60) E ngɛ heii kaa nyumu ɔ tsɛ ɔ gbo we lolo. Kaa e tsɛ ɔ gbo ɔ, jinɛ e ko bɛ Yesu ngɔ ngɛ jamɛ a be ɔ mi po. Nyumu ɔ pee we e juɛmi kaa e kɛ Mawu Matsɛ Yemi ɔ maa pee nɔ́ titli ngɛ e si himi mi.

Benɛ a ngɛ blɔ nɔ loloolo kɛ yaa Yerusalem ɔ, nyumu ko hu ba de Yesu ke: “Nyɔmtsɛ, ma nyɛɛ o se. Se ha mi blɔ nɛ i kɛ ye weku li ya ye sɛ lolo.” Yesu de lɛ ke: “Nɔ nɛ kɛ e nine pɛtɛɛ na kpakplaa he, nɛ e plɛɛ hyɛɛ e se ɔ, e sɛ Mawu matsɛ yemi ɔ.”​—Luka 9:61, 62.

E sa nɛ nihi nɛ a suɔ kaa a maa pee Yesu kaseli ɔ nɛ a ngɔ a juɛmi tsuo kɛ ma Matsɛ Yemi ɔ nɔ. Ke nɔ ko pɛtɛ na kpakplaa he nɛ e hyɛ we e hɛ mi tɛɛ ɔ, e maa je e blɔ nɔ, nɛ nɔ́ nɛ e ngɛ pee ɔ maa kpɛ̃. Ke e ngmɛɛ kpakplaa a he kɛ fɔ si nɛ e ya ngɛ e se hyɛe ɔ, ní tsumi ɔ maa kpɛ se. Jã a nɔuu kɛ̃ nɛ ke nɔ ko kpale ya hyɛ níhi nɛ ngɛ je yaya nɛ ɔ mi ɔ, e maa tɔtɔ lɛ nitsɛ e nane, nɛ e be neneene wami náe.