Nɔ́ He Je Nɛ Ni Komɛ A Hɛ Mi Ma Kpata

Yesu bɔ mɔde si abɔ kaa e maa ye bua ni ɔmɛ konɛ a susu huɛ bɔmi nɛ ngɛ a kɛ Mawu a kpɛti ɔ he saminya. Benɛ e kɛ ni ɔmɛ sɛɛ ní ngɛ Farisi no ɔ we ɔ mi se ɔ, e kpale ná he blɔ kpa ko nɛ e kɛ tsɔɔ mɛ ní.

Jamɛ a be ɔ mi ɔ, nihi nɛ a ngɛ lejɛ ɔ a kpɛti ni komɛ ngɛ oslaa ko nɛ ba a he munyu tue. A de Yesu “bɔ nɛ [Roman Amlaalo Pontio] Pilato ha nɛ a gbe Galilea bi ɔmɛ nɛ ya ngɛ bɔ sãe ha Mawu ɔ.” (Luka 13:1) Galilea bi te nɛɛ a he munyu nɛ a ngɛ tue ɔ?

Matsɛ Pilato ya ngɔ sika ngɛ sɔlemi we ɔ nɛ e kɛ pee lɔku, nɛ e kɛ gbla nyu kɛ ya Yerusalem. Yuda bi ɔmɛ tsɔ Pilato hɛ mi atua kaa e ya ngɔ sika ngɛ sɔlemi we ɔ kɛ pee lɔku. Enɛ ɔ he ɔ, a gbe a kpɛti nihi fuu ngɛ atua tsɔmi ɔ mi. Eko ɔ, Galilea bi nɛ ɔmɛ piɛɛ nihi nɛ a gbe ngɛ basabasa peemi nɛ ɔ mi ɔ a he. Eko ɔ, Pilato kɛ sɔlemi we ɔ nikɔtɔma amɛ ya pee kake loko e ngɔ sika a nɛ. E ma nyɛ maa ba kaa nihi nɛ a ya ngɛ Yesu amaniɛ nɛ ɔ bɔe ɔ susu kaa yayami ko nɛ Galilea bi nɛ ɔmɛ pee he je nɛ a gbe mɛ ngɛ basabasa peemi ɔ mi ɔ nɛ. Se Yesu kɛ mɛ kpa we gbi.

E bi mɛ ke: “Anɛ nyɛ susu kaa blɔ nɔ nɛ Galilea bi nɛ ɔmɛ gu kɛ gbo ɔ tsɔɔ kaa mɛ ji yayami peeli kpanakuhi pe Galilea bi tsuo lo?” Yesu nitsɛ ha heto ke, dɛbi. E da oslaa nɛ ɔ nɔ kɛ bɔ Yuda bi ɔmɛ kɔkɔ ke: “Ke nyɛ tsakee we nyɛ tsui ɔ, nyɛ tsuo nyɛ ma gbo jã nɔuu.” (Luka 13:2, 3) Yesu kpale tu oslaa kpa ko nɛ eko ɔ e ba benɛ a ngɛ ní tsue ngɛ jamɛ a lɔku ɔ nɔuu he ɔ he munyu. E bi mɛ ke:

“Ni nyɔngma kɛ kpaanyɔ ɔmɛ nɛ mɔ ɔ ku pue a nɔ ngɛ Siloam nɛ a gbo ɔ, mɛ nɛɛ? Anɛ nyɛ susu kaa lɔ ɔ tsɔɔ kaa mɛ kɛkɛ ji yayami peeli pe nihi tsuo nɛ ngɛ Yerusalem ɔ lo?” (Luka 13:4) Eko ɔ, Yuda bi ɔmɛ susu kaa yayami ko nɛ ni ɔmɛ pee he je nɛ a gbo ɔ nɛ. Yesu kɛ mɛ kpa we gbi ngɛ enɛ ɔ hu he. E le kaa ‘be yayami ba náa nɔ tlukaa,’ nɛ lɔ ɔ he je nɛ oslaa nɛ ɔ ba ni ɔmɛ a nɔ ɔ nɛ. (Fiɛlɔ 9:12) E sa nɛ Yuda bi ɔmɛ nɛ a kase nɔ́ ko ngɛ oslaa nɛ ɔ mi. Yesu de mɛ ke: “Ke nyɛ tsakee we nyɛ tsui ɔ, nyɛ tsuo nyɛ ma gbo jã nɔuu.” (Luka 13:5) Se mɛni he je nɛ e ngɛ mɛ ní nɛ ɔmɛ tsɔɔe ngɛ jamɛ a be ɔ mi ɔ?

Si fɔfɔɛ nɛ ngɛ he nɛ e ngɛ fiɛɛe ngɛ ɔ hu piɛɛ he nɛ e tsɔɔ mɛ ní nɛ ɔmɛ ɔ nɛ. E ya nɔ nɛ e ngɔ nɔ́ hetomi nɔ́ ko kɛ tsɔɔ mɛ ní. E de mɛ ke: “Be ko ɔ, nyumu ko du ngmɔkɔ tso ngɛ e wai ngmɔ mi, nɛ e ya, konɛ e ya hla yiblii ngɛ tso ɔ nɔ, se e nɛ eko. Lɔ ɔ he ɔ, e de ngmɔ nɔ hyɛlɔ ɔ ke, ‘Hyɛ, jeha etɛ sɔuu ji nɛ ɔ nɛ i baa ba hlaa yiblii ngɛ ngmɔkɔ tso nɛ ɔ nɔ, se i nɛ eko. Poo tso ɔ ngɔ fɔ si! Mɛni he je nɛ e maa hi zugba a puɛe kɛ mwɔɔ ɔ?’ Se ngmɔ nɔ hyɛlɔ ɔ de lɛ ke, ‘Ye nyɔmtsɛ, ha nɛ e hi si jeha nɛ ɔ hulɔ; nɛ ma tsua he kɛ be, nɛ ma wo sisi kuku. Ke e wo yiblii jeha nɛ ma a mi ɔ, saminya. Se ke e wui ɔ, lɛɛ o ma nyɛ ma ha nɛ a po lɛ ngɔ fɔ si.’”​​—Luka 13:6-9.

Yesu ngɔ jeha etɛ kɛ se sɔuu kɛ bɔ mɔde kaa e maa ye bua Yuda bi ɔmɛ nɛ a ná hemi kɛ yemi ngɛ e mi. Se kɛ̃ ɔ, nihi bɔɔ pɛ nɛ a ba pee e kaseli. Wa ma nyɛ ma de ke e ní tsumi ɔ wo yiblii bɔɔ pɛ. Benɛ e sɔmɔmi ní tsumi ɔ ma nyagbe ɔ, e fiɛɛ wawɛɛ. Bɔ nɛ e fiɛɛ ngɛ Yudea kɛ Perea ha a ngɛ kaa nɔ́ nɛ e tsua Yuda bi nɛ a ngɛ kaa ngmɔkɔ tso ɔ he, nɛ e ngɔ kuku zu kɛ wo sisi. Mɛni lɛ je mi kɛ ba? Yuda bi bɔɔ pɛ nɛ a bu lɛ tue. Ma a tsuo bui lɛ tue, nɛ a tsakee we a tsui. Enɛ ɔ he ɔ, a ma kpata a hɛ mi.

Be bɔɔ se ngɛ Hejɔɔmi ligbi ɔ nɔ ɔ, a kpale pee nɔ́ ko nɛ tsɔɔ kaa a be hemi kɛ yemi ngɛ Yesu mi. Jamɛ a be ɔ mi ɔ, Yesu ngɛ ní tsɔɔe ngɛ kpe he ɔ. E na yo ko nɛ daimoniohi ha nɛ e mi dɔ gɔdɔɔ jeha 18. Yesu je mi mi himi kpo kɛ tsɔɔ yo ɔ nɛ e de lɛ ke: “Yo, i ngɛ mo dee ke o hiɔ ɔ ngmɛɛ o he!” (Luka 13:12) Benɛ Yesu ngɔ e nine kɛ pue yo ɔ nɔ nɔuu kɛkɛ nɛ yo ɔ ba da bɔ nɛ e ngɛ sa a, nɛ e bɔni Mawu yi jemi.

Kpe he nɔkɔtɔma a mi mi fu, nɛ e de ke: “Ligbi ekpa lɛ sa kaa a kɛ tsuɔ ní. Lɔ ɔ he ɔ, nyɛɛ ba jamɛ a be ɔ, konɛ a tsa nyɛ; se pi Hejɔɔmi ligbi ɔ!” (Luka 13:14) Kpe he nɔkɔtɔma a ji he wami nɛ Yesu kɛ ngɛ nihi tsae ɔ he atsinyɛ, mohu ɔ, e ngɛ ni ɔmɛ a hɛ mi kãe kaa a ba ngɛ tsami hlae ngɛ Hejɔɔmi ligbi nɔ! Yesu ha lɛ heto ke: “Osatotsɛmɛ! Nyɛ ti mɛnɔ pɛne we e na, loo e teji Hejɔɔmi ligbi ɔ, nɛ e kɛ lɛ ji kpo ya ha we lɛ nyu? Hyɛ, yo nɛ ɔ, Abraham nina ji lɛ, nɛ Satan bɔ lɛ pã jeha nyɔngma kɛ kpaanyɔ sɔuu. Anɛ e sɛ kaa a jeɔ lɛ ngɛ pã mi Hejɔɔmi ligbi ɔ lo?”​​—Luka 13:15, 16.

Zo gbe nihi nɛ a te si kɛ wo Yesu ɔ kpɔtɔɔ, se nimli kpekpemi ɔ lɛɛ a bua jɔ níhi nɛ Yesu ngɛ pee ɔ he. Enɛ ɔ se ɔ, Yesu ngɔ nɔ́ hetomi níhi enyɔ nɛ kɔɔ Matsɛ Yemi ɔ he kɛ tsu ní. Be ko nɛ be ɔ, e ngɔ nɔ́ hetomi ní nɛ ɔmɛ kɛ tsu ní ngɛ Galilea Wo ɔ nya.​​—Mateo 13:31-33; Luka 13:18-21.