SANE BIMI 7
Mɛni Ma Pee Ke Nɔ Ko Ngɛ Mi Haoe Kaa I Kɛ Lɛ Nɛ Ná Bɔmi?
MƐNI O MAA PEE?
Mo susu si fɔfɔɛ nɛ ɔ he nɛ o hyɛ: Nyɔhiɔ enyɔ pɛ ji nɛ ɔ nɛ Heather kɛ Mike bɔni huɛ bɔmi, se e peeɔ Heather kaa e hi Mike kasa mi daa. A ngmaa sɛ gbi kɛ maneɔ a sibi daa, a sɛɛɔ ní ngmlɛfiahi abɔ ngɛ tɛlifoo nɔ, nɛ a le a sibi a yi mi munyuhi tsuo! Se amlɔ nɛ ɔ lɛɛ, Mike sume kaa a maa hi ní sɛɛe pɛ kɛkɛ.
Ngɛ nyɔhiɔ enyɔ nɛ be ɔ mi ɔ, nɔ́ nɛ Mike kɛ Heather peeɔ pɛ ji kaa a pɛtɛɛ a sibi a nine he, nɛ a fiɔ a sibi a nya he bɔɔ. Heather sume kaa a maa pee nɔ́ kpa ko kɛ piɛɛ he. Se e sume kaa e kɛ Mike a kpɛti nɛ puɛ hulɔ. Mike pɛ ji nɔ nɛ deɔ lɛ kaa e he ngɛ fɛu, nɛ e ji yiheyo tsuãa. Heather deɔ e he ke: ‘Tse i kɛ Mike wa suɔ wa he . . . ’
Ke o wa bɔ nɛ sa nɛ o kɛ yo ko aloo nyumu ko ma bɔni kpo jemi, nɛ o ya je si himi nɛ Heather ya je mi ɔ mi ɔ, mɛni o maa pee?
MOO MLƐ NƐ O SUSU HE!
Nihi nɛ a sɛ gba si himi mi pɛ nɛ Mawu ha mɛ he blɔ kaa a ná bɔmi. Enɛ ɔ he ɔ, ke nɔ ko sɛ we gba si himi mi nɛ e kɛ nɔ ko ná bɔmi ɔ, e ngɛ kaa nɔ́ nɛ nɔ ɔ ngɔ bo saminyayoo ko nɛ a kɛ ke lɛ kɛ ngɛ níhi a he tsue
Adebɔ mlaa ko tsɔɔ kaa ke nɔ ko tu kɛ je hiɔwe ɔ, e ma ba nɔ zugba, e be kɔɔhiɔ mi tlɔe. Enɛ ɔ he ɔ, ke nɔ ko susu kaa ke lɛɛ e tu kɛ je hiɔwe tsitsaa a, e ba be zugba nɔe ɔ, e maa ye e he awi. Jã kɛ̃ nɛ ke o susu kaa ke o yi je mi bami he mlaahi a nɔ ɔ, nɔ́ ko be mo pee ɔ, o maa ye o he awi. Mlaa nɛ ɔmɛ eko ji: “Nyɛ ko fiɛ nyumu kɛ yo yakayaka fiɛmi.”—1 Tesalonika Bi 4:3.
Ke nɔ ko yi mlaa nɛ ɔ nɔ ɔ, mɛni maa je mi kɛ ba? Baiblo ɔ de ke: “Nɔ nɛ fiɛɔ nyumu kɛ yo yakayaka fiɛmi ɔ, yeɔ lɛ nitsɛ e nɔmlɔ tso ɔ awi.” (1 Korinto Bi 6:18) Mɛni tsɔɔ kaa e ji anɔkuale?
Níhi a mi hlali yɔse kaa nihewi kɛ yihewi fuu nɛ a kɛ a he wo ajuama bɔmi mi ɔ kɛ haomihi nɛ nyɛɛ se nɛ ɔ a kpɛti kake loo nɔ́ nɛ hiɛ pe jã kpeɔ.
TSUI YEMI. Nihewi kɛ yihewi fuu nɛ a kɛ nihi ná bɔmi be mi nɛ a sɛ we gba si himi mi ɔ piaa a he pee se.
A HE WE A SIBI YI. Ke a kɛ a huɛmɛ ɔmɛ ná bɔmi ta a, a ti nɔ fɛɛ nɔ biɔ e he ke, ‘Mɛni tsɔɔ kaa tsa pi imi pɛ nɛ e kɛ ná bɔmi?’
KƆNI MI NYU WOMI. Yihewi fuu suɔ kaa a maa na nɔ ko nɛ e maa po a he piɛ, se pi nɔ nɛ maa pee mɛ níhi nɛ sɛ. Nihewi fuu yɔse kaa ke a nine su yo ko nɔ nɛ a kɛ lɛ na bɔmi ɔ, yo ɔ he pee we mɛ akɔnɔ hu.
Nɔ́ Nɛ E Sa Kaa Wa Kadi: Ke o ha nɛ nɔ ko kɛ mo ná bɔmi be mi nɛ o sɛ we gba si himi mi ɔ, o pue o hɛ mi si, nɛ nɔ́ ko nɛ he jua wa ngmɛɛ mo. (Roma Bi 1:24) O he jua wa wawɛɛ pe bɔ nɛ o maa ngmɛɛ o he ha nɔ ko!
Moo tsɔɔ kaa o yeɔ o he nɔ, konɛ ‘o ko fiɛ nyumu kɛ yo yakayaka fiɛmi.’ (1 Tesalonika Bi 4:3) Ke pee se nɛ o sɛ gba si himi mi ɔ, o kɛ o huno ɔ loo o yo ɔ ma nyɛ ma ná bɔmi. Nɛ ke e ba jã a, e be mo haoe, nɛ o be o he hu piae kaa bɔ nɛ nihi nɛ a náa bɔmi be mi nɛ a sɛ we gba si himi mi ɔ piaa a he ɔ.—Abɛ 7:22, 23; 1 Korinto Bi 7:3.
KƐ O SUSU KƐƐ?
Ke nɔ ko suɔ mo niinɛ ɔ, anɛ e maa pee nɔ́ ko nɛ maa ye mo awi loo nɔ́ ko nɛ maa hao mo lo?
Anɛ nɔ ko nɛ e susuɔ o he nitsɛnitsɛ ɔ ma ha nɛ o kɛ Mawu nyɛ kpɛti nɛ puɛ lo?—Hebri Bi 13:4.