Yesu Tsɔɔ E Kaseli Ɔmɛ Bɔ Nɛ A Sɔleɔ Ha

Nɔ́ fɛɛ nɔ́ nɛ Farisi bi ɔmɛ peeɔ ɔ, a peeɔ konɛ a kɛ sa nimli a hɛ mi. Ke a pee nɔ ko kpakpa a, a suɔ kaa nihi nɛ a na. A sɔleɔ ngɛ magbɛ nɔ konɛ nihi nɛ na mɛ. A kaseɔ sɔlemi gagaagahi kɛ woɔ a yi mi, nɛ a tiɔ mi ngɛ kpe he ɔmɛ, kɛ gbɛjegbɛ ɔmɛ a he konɛ nihi nɛ a nu nɔ́ nɛ a ngɛ dee. Enɛ ɔ he ɔ, e pee ni ɔmɛ nyakpɛ benɛ Yesu de mɛ ke: ‘Nyɛ ko sɔle kaa bɔ nɛ Farisi bi ɔmɛ peeɔ ɔ. A susu kaa ja a tu munyu fuu loko Mawu maa bu mɛ tue, se e bui mɛ tue. Sɔlemi ji ní sɛɛmi nɛ yaa nɔ ngɛ nyɛɛ kɛ Yehowa nyɛ kpɛti. Ke nyɛɛ kɛ Yehowa ngɛ ní sɛɛe ɔ, nyɛ ko hi nɔ́ kake dee kpamisa. Yehowa suɔ nɛ o de lɛ bɔ nɛ o nuɔ he ha ngɛ o tsui mi.

‘Bɔ nɛ e sa kaa nyɛɛ sɔle ha ji: “Wa Tsɛ nɛ ngɛ hiɔwe, ha nɛ o biɛ ɔ he nɛ tsɔ. Ha nɛ o Matsɛ Yemi ɔ nɛ ba. Ha nɛ a pee o suɔmi nya ní ngɛ zugba a nɔ kaa bɔ nɛ a peeɔ ngɛ hiɔwe ɔ.”’ Yesu de mɛ hu ke daa ligbi ɔ, e sa nɛ a sɔle kɛ bi niye ní nɛ a hia, nɛ a sɔle konɛ a ngɔ a he tɔmihi kɛ pa mɛ, nɛ a sɔle ngɛ ní kpahi hu a he.

Yesu de ke: ‘Nyɛ ko kpa sɔlemi. Nyɛɛ ya nɔ nɛ nyɛ bi Yehowa, nyɛ Tsɛ ɔ ní kpakpahi. Fɔlɔ fɛɛ fɔlɔ suɔ kaa e ma ha e bimɛ ní kpakpahi. Ke o bi ɔ bi mo abolo ɔ, anɛ o ma ha lɛ tɛ lo? Ke e bi mo lo ɔ, anɛ o ma ha lɛ sinɔ lo?’

Lɔ ɔ se ɔ, Yesu tsɔɔ nɔ́ nɛ wa ma nyɛ maa kase ngɛ munyu nɛ ɔ mi: ‘Ke nyɛ le bɔ nɛ nyɛ haa nyɛ bimɛ ní kpakpahi ɔ, anɛ nyɛ Tsɛ nɛ ji Yehowa be nyɛ mumi klɔuklɔu ɔ hae hluu lo? Nɔ́ nɛ e sa nɛ nyɛɛ pee pɛ ji kaa nyɛ bi.’ Anɛ o buɔ Yesu ga womi nɛ ɔ tue lo? Mɛni níhi nɛ o sɔleɔ ngɛ he?