Níhi Nɛ A Je Kɛ Tsɔɔ Yohane

Benɛ a wo bɔfo Yohane tsu ngɛ Patmɔs zugba kpɔ nɛ wo bɔle lɛ ɔ nɔ ɔ, Yesu je nina loo foni ekpaekpa 16 nɛ kɔɔ níhi nɛ maa ba hwɔɔ se ɔ he kɛ tsɔɔ lɛ nɔtonɔto. Nina amɛ tsɔɔ bɔ nɛ Yehowa ma plɛ kɛ tsɔ e biɛ ɔ he, kɛ bɔ nɛ e Matsɛ Yemi ɔ maa ba zugba a nɔ ha. E tsɔɔ hu kaa a maa pee e suɔmi nya ní ngɛ zugba a nɔ kaa bɔ nɛ a peeɔ ngɛ hiɔwe ɔ.

Ngɛ nina kake ko mi ɔ, Yohane na Yehowa nɛ e hii si ngɛ e matsɛ sɛ nɛ hɛ mi ngɛ nyami ɔ mi ngɛ hiɔwe. E na nikɔtɔmahi 24 nɛ a wo tade hiɔ, nɛ a kɛ sika tsu jlasi fĩ a yi, nɛ a bɔle matsɛ sɛ ɔ. Oslabai gbami kɛ hiɔwe simi ngɛ matsɛ sɛ ɔ mi jee kɛ ngɛ bae. Nikɔtɔmahi 24 ɔmɛ kpla si ngɛ Yehowa hɛ mi nɛ a ngɛ lɛ jae. Ngɛ nina kpa ko hu mi ɔ, Yohane na nimli asafo ko nɛ a ngɛ Yehowa jae. Ni ɔmɛ je je ma amɛ tsuo a mi, a ji nimli slɔɔtoslɔɔtohi, nɛ a tuɔ gbi slɔɔtoslɔɔtohi. Yesu nɛ ji Jijɔ Bi ɔ lɛ ngɛ a nɔ hyɛe, nɛ e kpaka mɛ kɛ ya nyu nɛ haa nɔ wami ɔ he. Ngɛ nina kpa ko mi ɔ, Yohane na kaa Yesu bɔni matsɛ yemi ngɛ hiɔwe, nɛ nikɔtɔmahi 24 ɔmɛ piɛɛ e he. Lɔ ɔ se ɔ, Yohane na kaa Yesu kɛ sinɔ ngua a nɛ ji Satan kɛ e daimonio ɔmɛ ngɛ ta hwue. Yesu sake mɛ kɛ je hiɔwe kɛ ba zugba a nɔ.

Kɛkɛ nɛ Yohane na foni ko nɛ ngɛ fɛu. E na Jijɔ Bi ɔ kɛ nihi 144,000 nɛ a daa si ngɛ Zion Yoku ɔ nɔ. E na bɔfo ko hu nɛ e ngɛ tee ngɛ zugba a nɔ, nɛ e ngɛ nihi dee ke a ye Mawu gbeye, nɛ a wo e hɛ mi nyami.

Ngɛ nina nɛ nyɛɛ se ɔ mi ɔ, Yohane na kaa a hwu Hamagedɔn ta a. Ngɛ ta a mi ɔ, Yesu kɛ e ta buli ɔmɛ kpata Satan je yaya a hɛ mi. Ngɛ nyagbe nina a mi ɔ, Yohane na kaa kake peemi ba hiɔwe kɛ zugba a nɔ tsuo. A kpata Satan kɛ e sisi bi ɔmɛ tsuo a hɛ mi. Nihi tsuo nɛ a ngɛ hiɔwe kɛ zugba a nɔ ɔ wui Yehowa biɛ ɔ he mu, nɛ a jaa lɛ pɛ.