Fã 14 ɔ Nya Blimi Munyu

Kristofohi nɛ a hi si blema a fiɛɛ sane kpakpa nɛ kɔɔ Matsɛ Yemi ɔ he ɔ kɛ ya su jɔ ɔ nyagbe he tɔɔ. Yesu tsɔɔ hehi nɛ e sa kaa ya fiɛɛ ngɛ. E gu nyakpɛ blɔ nɔ kɛ ye bua mɛ, nɛ a tsɔɔ nihi ní ngɛ ni ɔmɛ a gbi mi. Yehowa wo mɛ kã, nɛ a ná he wami kɛ da yi mi wami nya.

Yesu ha nɛ bɔfo Yohane na Yehowa hɛ mi nyami ɔ he nina ko. Ngɛ nina kpa mi ɔ, Yohane na kaa hiɔwe Matsɛ Yemi ɔ ye Satan nɔ kunimi, nɛ e be he wami hu. Yohane na kaa Yesu ngɛ matsɛ yee, nɛ nimli 144,000 piɛɛ e he. Jehanɛ hu ɔ, Yohane na kaa zugba a tsuo plɛ pee paradeiso, nɛ nɔ fɛɛ nɔ ngɛ Yehowa sɔmɔe ngɛ tue mi jɔmi kɛ kake peemi mi.