Asafo Nɛ Ngɛ He Nɛ Wa Ngɛ ɔ Nikasemi Nɛ Wa Maa Ya
1 E he hia kaa waa pee níhi ngɛ blɔ nya tomi kɛ teokrase blɔ tsɔɔmi nya. Bɔfo Paulo ngma ke: “Mawu sume basabasa, se mohu tue mi jɔmi e suɔ. . . . Á pee nɔ́ tsuaa nɔ́ bɔnɛ sa ngɛ blɔ nya tomi nya.”—1 Kor. 14:33, 40.
2 E ngɛ mi kaa eko ɔ, lɔle nami nɛ yee, be nɛ nɔ ko kɛ tsuɔ ní, kɛ yemi kɛ buami nɛ a kɛ haa asafo ko ma nyɛ maa tsɔɔ he nɛ nɔ ko maa ya nikasemi ngɛ, se behi fuu ɔ, e hi kaa wa maa ya nikasemi ngɛ asafo nɛ ngɛ he nɛ wa ngɛ ɔ mi. Enɛ ɔ haa nɛ fiɛɛmi yami yi, ejakaa e hia we kaa waa sɛ lɔle mi kɛ ya tsitsaa loko waa kɛ wa nyɛmimɛ nɛ ya fiɛɛ. E yeɔ bua wɔ nɛ waa kɛ asafo ɔ mi bi tsuɔ ní nɛ wa tsɔɔ nihi nɛ ngɛ munyu ɔ he bua jɔmi ɔ blɔ kɛ yaa nikasemi ngɛ he nɛ maa hi ha mɛ. Ke wa hia yemi kɛ buami ko ɔ, wa nyɛɔ suu nyɛmimɛ a he mla.
3 Ke wa ba wa he si nɛ waa kɛ blɔ nya tomi ɔ tsu ní ɔ, wa tsɔɔ kaa Matsɛ Yemi ɔ ji oti ngɛ wa si himi mi. (Luka 16:10) Ke a to asafo ehe sisi loo a pee tsakemi ngɛ fiɛɛmi yami kuu ɔmɛ a he ɔ, eko ɔ, wa maa suɔ kaa waa kɛ wa huɛmɛ komɛ maa hi he kake. Se ke wa kplɛɛ blɔ nya tomi ehe ɔ nɔ ɔ, wa ma nyɛ ma ná huɛmɛ ehehi konɛ wa bli wa nyɛmi peemi ɔ mi. Jehanɛ se hu ɔ, ke fiɛɛli yaa nikasemi ngɛ he nɛ a ngɛ ɔ, e yi ha asafo mi nikɔtɔma amɛ kaa a maa slaa to kuu ɔ, nɛ a ye bua asafo mi bi ɔmɛ konɛ a he nɛ wa ngɛ Mawu jami mi.
4 E ji anɔkuale kaa nɔ tsuaa nɔ si himi ngɛ munomuno. Nɛ ní komɛ kaa, nítsumi nɛ nɔ ko tsuɔ, nɔ he piɛɛlɔ nɛ be asafo ɔ mi, loo lɔle nami ma nyɛ ma ha nɔ ko ma susu kaa, ke e ya nikasemi ngɛ asafo kpa mi ɔ, lɔɔ maa ye bua lɛ konɛ e nyɛ nɛ́ e sɔmɔ.
5 E ji wekuyi tsuaa wekuyi blɔ nya kaa e hyɛ e weku ɔ nɔ. E sa nɛ e susu si fɔfɔɛ ɔ he konɛ e pee juɛmi ngɛ nɔ́ nɛ maa hi saminya ha weku ɔ he. E kɛ asafo mi nikɔtɔma amɛ ma nyɛ maa sɛsɛ he konɛ a wo lɛ ga loko e ma e juɛmi nya si. Nyagbe ɔ, nikɔtɔma amɛ maa wo wekuyi ɔ he wami nɛ e pee juɛmi nɛ maa ye bua e weku ɔ si dami ngɛ Mawu jami mi.
6 Ngɛ anɔkuale mi ɔ, nɔ́ nɛ hi pe kulaa ji kaa o maa ya nikasemi ngɛ asafo nɛ ngɛ he nɛ o ngɛ ɔ mi. Lɔɔ maa tsɔɔ kaa o kɛ teokrase blɔ tsɔɔmi ngɛ ní tsue, nɛ lɔɔ ma ha ‘nɔ́ tsuaa nɔ́ maa ya nɔ ngɛ blɔ nya tomi nya.’—1 Kor. 14:33, 40.