Jeha 2009 Yehowa Odasefoli A Kpe Ngua
1. (a) Mɛni jɔɔmihi wa ma ná ke wa ya kpe ngua a ligbi etɛ ɔmɛ tsuo? (b) Mɛni blɔ nya e sa kaa waa to piɔ?
1 Wɔ tsuo wa ngɛ blɔ hyɛe kaa waa kɛ wa nyɛmimɛ nɛ jeɔ Yehowa yi nɛ ‘mumi mi níhi a he hia mɛ’ ɔ maa kpe ngɛ jeha 2009 kpe ngua nɛ ma a. (Mat. 5:3) Akɛnɛ Yehowa ligbi ngua a ma kɛ fo heje ɔ, wa ngɛ nɔ tsuaa nɔ he wami woe nɛ e ya kpe ɔ ligbi etɛ ɔmɛ tsuo bɔnɛ pee nɛ e ná Kristofoli a huɛ bɔmi kpakpa kɛ mumi mi he wami womi konɛ e kɛ da si kpɛii ngɛ hemi kɛ yemi ɔ mi. (Zef. 1:14) Mo ha o tsɔɔli loo o nítsumitsɛmɛ nɛ a le kaa kpe ɔ piɛɛ o jami ɔ he, nɛ e he hia mo saminya. Moo to blɔ nya mla konɛ o bi Yehowa dɛ mi jɔɔmi kɛ pue nɔ, nɛ Yehowa maa ye bua mo.—Yes. 50:10.
2. Mɛni ji mahi a kpɛti kpe ɔ he kɔɔhiɔ nɛ ma nyɛ ma pue wa nɔ ngɛ jeha nɛ ɔ kpe ɔ ekomɛ?
2 Mahi A Kpɛti Kpe: Kaa bɔnɛ nyɛ le ɔ, a maa pee mahi a kpɛti kpe ngɛ Accra, nɛ nihi maa je Europa, Afrika Kpɛti kɛ Afrika Pusinɔ He mahi a nɔ kɛ ba. Akɛnɛ a maa pee mahi a kpɛti kpe ɔ ngɛ Accra pɛ heje ɔ, asafohi nɛ a ha mɛ blɔ kaa a ya lejɛ ɔ pɛ lɛ maa ya. Blɔ tsɔɔmi nɛ ɔ nɛ waa kɛ ma tsu ní ɔ be hae nɛ nihi a yibɔ ngɛ kpe ɔ maa hiɛ tsɔ pe bɔnɛ nine ma nyɛ maa kpe a he. (1 Kor. 14:40; Heb. 13:17) Se a maa nu mahi a kpɛti kpe ɔ mi munyu ɔmɛ ngɛ he kpa komɛ. Nihi nɛ maa ya Kumasi kɛ Takoradi kpe ɔ maa nu ngɛ kpã nɔ. Ma se sane kpakpa fiɛɛli a he sanehi hu maa piɛɛ blɔ nya tomi ɔ he, nɛ wa ma ná he blɔ kɛ bu ma kpahi a nɔ níhi a si kpamihi tue. Mɛni wa ma nyɛ maa pee konɛ wa ná jeha nɛ ɔ kpe ɔmɛ nɛ a ngɛ he blɔ nya toe amlɔ nɛ ɔ he se kɛ pi si?
3. Kɛ wa ma plɛ kɛ je Kristofoli a suɔmi kpo ha ni komɛ ngɛ asafo ɔ mi kɛɛ?
3 Ye Bua Nihi Nɛ A Ya: Anɛ ni komɛ ngɛ nyɛ asafo ɔ mi nɛ a hia yemi kɛ buami kɛ ha kpe ɔ yami lo? Ke o ye bua mɛ nɛ a ya a, e tsɔɔ kaa ‘o foɔ o nyɛmi nɔ́ mi, se pi mo nitsɛ pɛ o nɔ́ mi.’—Fil. 2:4.
4. Mɛni heje e sɛ nɛ e ye ha wɔ kaa wa ma bi blɔ kɛ ya kpe nɛ ma a?
4 Be komɛ ɔ, e yee ha nyɛmimɛ kaa a ma bi a nítsumitsɛmɛ blɔ, ejakaa a susuɔ kaa a be mɛ blɔ hae nɛ a ya kpe ɔ. Se ke e ba kaa á ya he nya buami kpa ko, kaa ya nɔ loo yo kpeemi ɔ, lɛɛ blɔ bimi yi ha mɛ. E sa nɛ wa bi wa he ke: Ke wa huɛ kpakpa ko yaa sɛ gba si himi mi ngɛ ma kpa ko nɔ ɔ, anɛ wa be wa nítsumitsɛ ɔ blɔ bie konɛ waa ya yo kpeemi ɔ lo? Nɛ ke e sume nɛ e ha wɔ blɔ ɔ, anɛ waa kɛ bumi be lɛ nya tsɔɔe bɔnɛ e he hia ha kaa waa ya lo? Ngɛ anɔkuale mi ɔ, ní nɛ Yehowa maa tsɔɔ wɔ ngɛ kpe ɔ he hia kulaa pe he nya buami kpa ko nɛ wa maa ya! Ke wa he ye nitsɛnitsɛ kaa kpe blɔ nya tomi ɔ he hia kɛ ha wa nɔ yami ngɛ Mawu jami mi ɔ, e he be wae ha wɔ kulaa kaa wa ma plɛ wa nítsumitsɛ yi mi konɛ e ha wɔ blɔ nɛ waa ya kpe ɔ. (Yak. 1:7, 8) Ha nɛ a le kaa kpe ɔ piɛɛ o jami ɔ mi níhi nɛ o peeɔ daa a he. Mo ná nɔ mi mami kaa ke o ngɔ Matsɛ Yemi ɔ kɛ sɛ hlami ɔ, Yehowa maa jɔɔ o mɔde bɔmi ɔ nɔ.—Mat. 6:33.
5. Mɛni heje a ngɛ wɔ he wami woe kaa waa ya kpe nɛ wa asafo ɔ maa ya a?
5 Kpe Kpa Yami: Bɔnɛ pee nɛ sɛhi, womihi, tsu, kɛ ní kpahi nɛ su nyɛmimɛ ɔ, wa ngɛ nyɛ he wami woe kaa nyɛɛ ya kpe nɛ a to he blɔ nya kaa nyɛ asafo ɔ nɛ ya a. Ke e hia kaa o ya kpe ɔ ngɛ he kpa a, wa kpa mo pɛɛ nɛ o hyɛ behi kɛ hehi nɛ a maa pee ngɛ ɔ ngɛ bafa 6.
6. Mɛni be nɛ blɔ ngɛ kaa asafo ko ma nyɛ maa ya kpe ngɛ he kpa?
6 Ngɛ asafo komɛ nɛ be ma nguahi a mi a blɔ fa mi ɔ, eko ɔ, gbi nɛ a tuɔ, blɔ kɛmi, kɛ lɔle nami heje ɔ, e maa hi ha mɛ kaa a ya kpe ɔ ngɛ he kpa. Asafohi nɛ ní nɛ ɔmɛ kɔɔ a he ɔ, ma nyɛ maa ya kpe ɔ ngɛ he kpa. E he hia we kaa a ngma blɔ bimi womi kɛ ya asafo nítsumi he ɔ. Se e sa nɛ asafohi nɛ maa ya kpe kpa a nɛ ha a kpokpa nɔ hyɛlɔ ɔ lemi kɛ sɛ hlami, konɛ e ko to blɔ nya kaa e ma ya slaa mɛ jamɛ a otsi ɔ. E hi hu kaa a ma ha Kpe ɔ nɛ a maa ya a he Ajlatoli ɔmɛ lemi kɛ gu adrɛs nɛ ngɛ bafa 6 nɔ.
7. Mɛni e sa kaa asafo mi nikɔtɔma amɛ nɛ hyɛ nɛ a pee?
7 Lɔle Nɛ A Maa Sɛ Mi: E sa nɛ nyɛmimɛ nɛ hyɛɛ lɔle he blɔ nya tomi ɔ nɔ nɛ hyɛ nɛ́ a ngɔ lɔle nɛ ngɛ he wami, nɛ e mi himi maa pee slɔkee. E sa nɛ asafo mi nikɔtɔma amɛ nɛ hyɛ konɛ lɔle ɔmɛ nɛ́ ko wo nihi pe bɔnɛ Kaisare mlaa ngmɛɛ blɔ.
8, 9. Kɛ a tsuɔ hwɔ he bimi womi ɔ he ní kɛɛ?
8 Hwɔ He: A kɛ Room Request Form (Hwɔ He Bimi womi) maa mane asafo tsuaa asafo. Ke o suɔ nɛ nihi nɛ ngɛ kpe ɔ he blɔ nya toe nɛ hla hwɔ he ha mo ɔ, wa kpa mo pɛɛ nɛ o ngma Hwɔ He Bimi womi ɔ nɔ ní nɛ o kɛ ha nyɛ asafo mi womi ngmalɔ ɔ nɛ́ e hyɛ mi konɛ e kɛ mane nihi nɛ ngɛ kpe ɔ he blɔ nya toe ɔ. Ke a maa pee kpe nɛ hiɛ pe kake ngɛ he nɛ nyɛ maa ya kpe ɔ ngɛ ɔ, moo tsɔɔ be nɛ nyɛ maa pee nyɛ nɔ́ ɔ. NYƐ KO NGƆ Hwɔ He Bimi womi kɛ womi kpahi nɛ kɔɔ kpe ɔ he kɛ mane asafo ɔ nítsumi he ɔ ngɛ Accra.
9 Ke fiɛɛlɔ ko nɛ hia yemi kɛ buami klɛdɛɛ ngma Hwɔ He Bimi womi nɔ ní ɔ, e sa nɛ e kɛ ha Asafo Mi Sɔmɔmi Ajlatoli ɔmɛ nɛ́ a da blɔ tsɔɔmi nɛ ngɛ womi ɔ nɔ kɛ hyɛ keji fiɛɛlɔ ɔ sa. Blɔ nya tomi nɛ ɔ ngɛ kɛ ha fiɛɛli nɛ ngɛ si dami kpakpa ngɛ asafo ɔ mi, kɛ a bimɛ nɛ baa a je mi saminya pɛ.
10. Ke wa ya to nihi a wehi a mi ɔ, mɛni wa maa pee kɛ tsɔɔ kaa wa ji nibwɔ kpakpahi nɛ ngɛ hɛsa?
10 Ni komɛ ma ya to nihi a wehi a mi. Eko ɔ, nyɛmimɛ loo ni kpahi a wehi a mi. Kpe be ɔ PƐ nɛ a kɛ tsu ɔmɛ ma ha. Nihi nɛ ma ya hi we nɛ ɔmɛ a mi ɔ, a hyɛ konɛ a kɛ a bimɛ nɛ je bumi kpo ha a wetsɛmɛ ɔmɛ, nɛ a ko gbɛ wetsɛmɛ ɔmɛ a níhi a mi, a ko puɛ nɔ́ ko, a ko da sɛhi a nɔ, loo a ya hehi nɛ piɛɛ we he nɛ a ha mɛ ɔ he. E sa kaa a pee a tsu ɔmɛ a mi falifali daa ligbi kɛ tsɔɔ kaa bumi ngɛ a he. Ke wetsɛmɛ ɔmɛ ná haomi ko ngɛ enɛ ɔ blɔ fa mi ɔ, á ha nɛ nɔkɔtɔma nɛ hyɛɛ hwɔ he nɔ ɔ nɛ le amlɔ konɛ e tsu he ní. Nibwɔ kpakpahi nɛ wa maa pee ɔ tsɔɔ kaa wa be blɔ hyɛe kaa wa wetsɛmɛ ɔmɛ nɛ a sɔmɔ wɔ kaa nɔ́ nɛ e ji a blɔ nya nítsumi.
11. Ke wa ya to nibwɔhi a to he ɔ, mɛni blɔ nɔ wa ma nyɛ ma je Kristofoli a suɔmi kɛ bumi kpo ngɛ?
11 Ke o pee o juɛmi kaa o ma ya to nibwɔhi a to he ɔ, mo kai kaa se nami ngɛ he kaa o maa ngɔ o jemiba, munyu tumi, kɛ o he dlami kɛ ye nihi odase. E sɛ nɛ wa je nɔ buimi su kpo kɛ tsɔɔ nihi nɛ ma ha wɔ niye ní loo nihi nɛ ma dla wa tsu ɔmɛ a mi kɔkɔɔkɔ. E ngɛ mi kaa wa maa wo mɛ hiɔ mohu lɛɛ, se e sa nɛ wa je bumi kpo kɛ tsɔɔ mɛ. Enɛ ɔ tsɔɔ kaa Yehowa webi je ekpa ke a ngɔ mɛ kɛ to nihi nɛ be Baiblo mi nile nɛ a je we suɔmi kɛ bumi kpo a he ɔ.
12. (a) Mɛni e sa kaa nihi tsuo nɛ to he blɔ nya nɛ a kɛ ya kpe ɔ ligbi etɛ ɔ tsuo, nɛ mɛni heje? (b) Mɛni wa ma nyɛ maa ngɔ piani he jɔɔmi be ɔ kɛ pee, nɛ wa ma ná enɛ ɔ he se ngɛ mɛni blɔ nɔ?
12 Piani He Jɔɔmi Be: Jehahi saii ji nɛ ɔ nɛ tsɔlɔ anɔkualetsɛ kuu ɔ ngɛ wɔ he wami woe kaa wa ha niye ní nɛ wa yeɔ ngɛ kpe ɔ nɛ pee nɔ́ ko bɔɔ kɛkɛ. Enɛ ɔ ma ha nɛ wa juɛmi maa hi níhi nɛ a he hia titli ɔ a nɔ, kaa, wa weku ɔ he blɔ nya nɛ wa maa to daa ligbi konɛ wa ko kpɛ se, kɛ blɔ nya tomi ɔ tue nɛ wa maa bu saminya. Enɛ ɔ heje ɔ, a ngɛ wɔ he wami woe kaa nɔ tsuaa nɔ nɛ́ hɛɛ niye ní nɛ mi jiɔ we kɛ je we mi kɛ ba nɛ e ye piani. Enɛ ɔ ma ha nɛ wa maa hi kpe peemi he ɔ, nɛ waa kɛ wa nyɛmimɛ maa bɔ huɛ nɛ wa maa wo wa sibi he wami. Ke wa hia blɔ kɛ ba kpe ɔ po ɔ, e sa nɛ waa to blɔ nya daa ligbi nɛ waa hɛɛ nɔ́ ko bɔɔ nɛ waa kɛ nihi nɛ wa fɔ mɛ nine ɔ maa ye. Enɛ ɔ ma ha nɛ wa maa hi kpe peemi he ɔ he jɔɔmi ɔ be ɔ, nɛ waa kɛ nyɛmimɛ ma ná huɛ bɔmi nɛ ngɛ bua jɔmi. Ke wa to nɔ́ ko nɛ mi jiɔ we bɔɔ ko he blɔ nya kɛ ba nɛ wa ba ye ɔ, e be hae nɛ mahe maa de wɔ ke piani kpe ɔ ngɛ nɔ yae. Akɛnɛ wa kpɛti nihi fuu be mahe hwɔe loko piani kpe ɔ maa je sisi heje ɔ, e sa kaa waa hyɛ konɛ wa ko ye ní fuu tsɔ. E sɛ kaa wa yeɔ ní benɛ kpe ɔ ngɛ nɔ yae kaa bɔnɛ wa pee we ngɛ wa Matsɛ Yemi Asa amɛ a nɔ ɔ. Ke wa ha wa piani niye ní pee nɔ́ ko hlɛhlɛ ɔ, wa tsɔɔ kaa wa ngɛ hɛsa ha níhi nɛ a he hia wawɛɛ ɔ, nɛ wa ngɛ bumi ha jami blɔ nya tomi ɔ, kɛ mumi mi niye ní nɛ a haa wɔ ɔ.—Kane Luka 10:42.
13. (a) Jije nyɛmimɛ a yemi kɛ buami he maa hia ngɛ? (b) Mɛni o to kaa o maa pee kɛ ye bua konɛ kpe ɔ nɛ ya nɔ pɛpɛɛpɛ?
13 Ngɔɔ O He Kɛ Ha Nítsumi Faa: Nyɛmimɛ fuu yeɔ bua kɛ tsuɔ ní benɛ kpe ɔ ngɛ nɔ yae ɔ. Nibwɔhi A Kpeeli tsɔɔ wɔ he nɛ waa hi, nɛ a hyɛɛ wa lɔlehi a nɔ ha wɔ. Nítsumi He Nɛ Hyɛɛ Falifali Peemi nɔ ɔ haa wa kpe peemi he ɔ tsɔɔ nyaii. Anɛ wa ma nyɛ maa ye bua nítsumi he nɛ ɔmɛ loo ekpa amɛ kɛ tsu ní lo? Anɛ o maa ngɔ o he kɛ ha konɛ o kɛ o nyɛmimɛ ɔmɛ nɛ ‘pee kake kɛ sɔmɔ’ lo? (Zef. 3:9) Ke wa piɛɛ we kpe ɔ sisi nítsuli ɔmɛ a he po ɔ, wa ti nɔ tsuaa nɔ ma nyɛ ma tsu nɔ́ ko faa, kaa dwɔmi nɛ wa ma kukuɔ ngɛ zugba, kɛ wa si himi he ɔmɛ nɛ wa ma ha nɛ a tsɔ ke wa kpa kpe ɔ daa ligbi.
14. Benɛ wa ngɛ wa he dlae kɛ ha jeha 2009 kpe ngua a, mɛni ji nɔ́ nɛ sa kaa e hia wɔ titli?
14 Ní Peepeehi Nɛ Woɔ Mawu Hɛ Mi Nyami: Ke wa je mumi ɔ yiblii ɔ kpo ngɛ wa ní peepeehi a mi, titli ngɛ bɔnɛ waa kɛ nibwɔhi a to he nɔ hyɛli, kɛ ni kpahi maa tu munyu ha, kɛ bɔnɛ waa kɛ mɛ maa hi si ha mi ɔ, wa ma ha nɛ́ a tu Yehowa webi a he munyu kpakpa, nɛ wa be nihi a nane tɔ̃tɔ̃e. (1 Kor. 10:31; 2 Kor. 6:3, 4) Moo ya jeha 2009 kpe ngua a loo mahi a kpɛti kpe ɔ, nɛ o ngɔ o jemiba kɛ wo Mawu hɛ mi nyami!—1 Pet. 2:12.
[Daka ngɛ ba fa 3]
Blɔ Nya Tomi ɔ Be Ɔmɛ:
So (Mahi A Kpɛti Kpe ɔ Pɛ)
1:20 piani - 4:55 gbɔkuɛ
Soha kɛ Hɔ
9:20 mɔtu - 4:55 gbɔkuɛ
Hɔgba
9:20 mɔtu - 4:00 gbɔkuɛ
[Daka ngɛ ba fa 5]
Mo Bɔni Kpe ɔ Nɛ O Maa Ya a He Blɔ Nya Tomi Kɛ Je Piɔ
• Moo to blɔ nya saminya konɛ o ya kpe ɔ ligbi ɔmɛ tsuo.
• Mo bi o nítsumitsɛ blɔ piɔ.
• Mo bɔni sika nɛ o ma kɛ ya kpe ɔ si tomi.
• Ngɔɔ niye ní nɛ mi jiɔ we kɛ nyu kɛ ya kpe ɔ daa ligbi, bɔnɛ pee nɛ o ko je kpe peemi he ɔ kɛ ya ma a mi kaa o ma ya he niye ní kɛ nyu.
• Moo to blɔ nya nɛ o weku ɔ TSUO nɛ ya kpe ɔ kulaa.