Kɛ A Ma Plɛ Kɛ Nu Kɛɛ?
1. Mɛni heje nɛ fiɛɛmi nítsumi ɔ he ma nyɛ maa wa ha wɔ, nɛ mɛni heje nɛ wa jɔɔ we fiɛɛmi?
1 Akɛnɛ Yehowa ligbi ɔ ma kɛ fo heje ɔ, e he hia wawɛɛ kaa waa ye bua nihi babauu konɛ a ba ná Mawu he anɔkuale nile ɔ, nɛ a le e yi mi tomi nɛ e hɛɛ ha adesahi. (Yoh. 17:3; 2 Pet. 3:9, 10) Behi ngɛ nɛ enɛ ɔ peemi he wa ejakaa nihi fuu bui munyu ɔ tue loo a yeɔ wa he fɛu ngɛ wa fiɛɛmi ɔ heje. (2 Pet. 3:3, 4) Se kɛ̃ ɔ, wa he ye kaa nihi ngɛ wa zugba kpɔ ɔ mi nɛ ke a nu sane kpakpa a, a maa kplɛɛ nɔ. Kɛ nimli nɛ ɔmɛ ma plɛ kɛ nu munyu ɔ kɛɛ, ke nɔ ko fiɛɛ we ha mɛ?—Rom. 10:14, 15.
2. Mɛni blɔ nɔ bɔfo Paulo nɔhyɛ nɔ́ ɔ woɔ wɔ he wami ngɛ?
2 Si Temi Kɛ Womi Nya Dami: Akɛnɛ nihi babauu ngɛ nɛ suɔ kaa a maa bu Matsɛ Yemi ɔ he sɛgbi ɔ tue heje ɔ, e sɛ kaa wa kɔni mi nɛ wo nyu. Filipi ji kekleekle ma ngɛ Europa nɛ bɔfo Paulo ya fiɛɛ sane kpakpa a ngɛ. Benɛ a tu nya pomi munyuhi kɛ si e kɛ Sila se ɔ, a fiaa mɛ ni enyɔ ɔmɛ kpã nɛ a wo mɛ tsu. (Níts. 16:16-24) Se ní yaya nɛ ɔmɛ nɛ a pee mɛ ɔ ha we nɛ Paulo nɛ ye gbeye nɛ e jɔɔ fiɛɛmi. Benɛ e ya Tesalonika, nɛ ji ma enyɔne nɛ e ya slaa ngɛ e blɔ hiami fiɛɛmi nítsumi ɔ mi ɔ, ‘Mawu wo lɛ kã nɛ e fiɛɛ.’ (1 Tes. 2:2) Paulo nɔhyɛ nɔ́ nɛ ɔ ha wɔ yi mi tomi heje nɛ e sɛ kaa ‘pɔ nɛ tɔ wɔ’ ngɛ fiɛɛmi nítsumi ɔ mi.—Gal. 6:9.
3. Mɛni ma nyɛ ma ha ni komɛ ma tsake a su e ngɛ mi kaa be ko nɛ be ɔ a bua jɔɛ munyu ɔ he mohu?
3 Nihi fuu nɛ kua munyu ɔ tue bumi jeha babauu ɔ tsake a su ngɛ wa sɛgbi ɔ he. Ohia, hiɔ, wekuno ko gbenɔ, loo je ɔ mi sanehi nɛ poɔ nɔ tsui he amaniɛ bɔmihi ma nyɛ ma tsake nɔ ko su. (1 Kor. 7:31) Ni komɛ nɛ́ a fɔli tsi a nya be ko nɛ be ɔ ba plɛ nikɔtɔmahi, nɛ a suɔ kaa a maa bu munyu ɔ tue. Ke wa ya nɔ nɛ wa fiɛɛ daa a, lɔɔ ma ha nimli nɛ ɔmɛ he blɔ konɛ a ‘tsɛ Yehowa biɛ’ loko e kpɛ se tsɔ.—Rom. 10:13.
4. Mɛni woɔ wɔ he wami nɛ wa yaa nɔ nɛ wa fiɛɛɔ nɛ wa “jɔɔ we” ɔ?
4 “A Jɔɔ We”: Suɔmi nɛ wa ngɛ ha Mawu kɛ wa nyɛmi nɔmlɔ ɔ maa wo wɔ he wami konɛ waa ya nɔ ngɛ fiɛɛmi kɛ kaselɔ peemi nítsumi ɔ mi nɛ ‘wa ko jɔɔ,’ kaa bɔnɛ bɔfo ɔmɛ pee ngɛ kekle jeha lafa a mi ɔ. (Níts. 5:42, NW) Mwɔnɛ ɔ, nihi fuu “ngɛ haoe, nɛ a ngɛ kɔmɔ yee ngɛ ní hiemi níhi” nɛ ngɛ nɔ yae ɔ a he. (Ezek. 9:4) Ke nihi kaa jã nu sane kpakpa a, a náa hɛ nɔ kami, nɛ a tsui nɔɔ a mi! Nɛ ke nihi babauu bui munyu ɔ tue po ɔ, Ngmami ɔ ha wɔ nɔ mi mami kaa Yehowa bua jɔ wa mɔde bɔmi ɔ he.—Heb. 13:15, 16.