“Nyɛɛ To Nyɛ He ngɛ Mawu Suɔmi ɔ Mi”
1. Mɛni yi mi tomi heje nɛ a pee “Nyɛɛ To Nyɛ He ngɛ Mawu Suɔmi ɔ Mi” womi ɔ?
1 Waa kɛ bua jɔmi nitsɛ ngɛ blɔ hyɛe kaa wa ma bɔni “Nyɛɛ To Nyɛ He ngɛ Mawu Suɔmi ɔ Mi” womi ɔ kasemi ngɛ Asafo Baiblo Mi Nikasemi ɔ kɛ je February 23 otsi ɔ sisije! Womi nɛ Nɔyemi Kuu ɔ ngma nɔ tsuaa nɔ nɛ suɔ Yehowa a ba nyagbe kɛ munyu nɛ ɔmɛ ke: “Wa hɛ nɔ kami ji kaa womi nɛ ɔ maa ye bua mo konɛ o ya nɔ nɛ o nyɛɛ ngɛ anɔkuale ɔ nya, bɔnɛ pee nɛ o ‘to o he ngɛ Mawu suɔmi ɔ mi, nɛ o ná neneene wami.’—Yuda 21.”
2. Mɛni blɔhi a nɔ womi ehe nɛ ɔ maa ye bua wɔ ngɛ?
2 Níhi Nɛ Maa Je Kpo Ngɛ Mi: Mɛni blɔ nɔ Baiblo sisi tomi mlaahi kɔɔ huɛ bɔmi, hɛja jemi, bumi nɛ wa ma je kpo ha nihi nɛ hɛɛ blɔ nya, wa suhi, gba si himi, munyu tutui, kɛ kusumihi a he? Womi nɛ ɔ ma tsɔse wa he nile konɛ e kɛ dami tɛ pomihi nɛ nɔ kuɔ nɛ ngɛ Mawu Munyu ɔ mi ɔ nɛ kɔ. (La 19:7, 8) Ke wa nu bɔnɛ Yehowa susuɔ ha ngɛ níhi a he sisi saminya a, wa maa suɔ wawɛɛ kaa waa pee e suɔmi nya ní, nɛ lɔɔ ma ha wa maa bu lɛ tue ngɛ si himi nɔ́ tsuaa nɔ́ mi.—Abɛ 27:11; 1 Yoh. 5:3.
3. Mɛni heje nɛ e sa kaa waa bɔ mɔde kaa wa maa ngɔ wa he kɛ wo nikasemi ɔ mi daa otsi?
3 Moo Mwɔ O Yi Mi Kpɔ Kaa O Kɛ O He Maa Wo Mi: Ke o ngɛ o he dlae ɔ, ha nɛ e pee oti ngɛ o hɛ mi kaa o ma je Mawu yi ngɛ e we asafo ɔ kpɛti. (Heb. 13:15) Asafo ɔ tsuo maa pee kake kɛ kase womi ehe nɛ ɔ. Akɛnɛ wa maa kase womi ɔ bɔɔbɔɔ daa otsi heje ɔ, wa ma ná be kɛ́ dla wa he saminya, konɛ wa nyɛ nɛ́ wa ha heto kɛ nɔ mi mami. Hetohi nɛ nu tso kpitikpiti nɛ wa ma ha a ma ha nɛ nikasemi ɔ maa pee nɔ́ nɛ ngɛ bua jɔmi nɛ sisi numi ngɛ he, nɛ e maa wo nyɛmimɛ he wami konɛ a suɔ a sibi nɛ a tsu ní kpakpahi. (Heb. 10:24) Jehanɛ se ɔ, hetohi nɛ wa ma ha kɛ je wa hemi kɛ yemi ɔ kpo ɔ ma ha nɛ wa ná bua jɔmi saminya.
4. Mɛni heje e he hia wawɛɛ kaa waa ye Yehowa mlaa amɛ a nɔ?
4 Gbɔkuɛ nɛ e nɔ jena Yesu ma gbo ɔ, Yesu tsɔɔ kaa e he hia nɛ waa ye Yehowa mlaa amɛ a nɔ bɔnɛ pee nɛ waa hi Mawu suɔmi ɔ mi. (Yoh. 15:10) “Mawu Suɔmi” womi nɛ ɔ maa ye bua wɔ konɛ waa mwɔ wa yi mi kpɔ kaa wa maa ngɔ Baiblo mi sisi tomi mlaahi kɛ tsu ní ngɛ wa si himi mi pe daa, bɔnɛ pee nɛ waa ‘to wa he ngɛ Mawu suɔmi ɔ mi.’—Yuda 21.