Sane Bimi He

◼ Mɛni wa ti nɔ tsuaa nɔ ma nyɛ maa pee kɛ ye bua konɛ wa ná tue mi jɔmi kɛ kase ní ngɛ asafo mi kpehi a sisi? (5 Mose 31:12)

Akɛnɛ wa ngɛ bumi kɛ ha Yehowa kɛ blɔ nya nɛ e to kɛ ha asafo mi kpehi heje ɔ, a ngɛ wɔ he wami woe kaa wɔ tsuo waa ba mla nɛ waa pee klaalo kɛ ha ní nɛ e maa tsɔɔ wɔ ɔ. E hi kaa wa maa hi sɛhi nɛ a ngɛ hɛ mi ɔ nɔ konɛ wa si sɛhi nɛ a ngɛ se ɔ kɛ ha nihi nɛ hɛɛ jokuɛwi tsɔwi kɛ nihi nɛ maa kpɛ se ɔ. Loko nikasemi ɔ maa je sisi ɔ, e sa nɛ waa to wa mobile phone ɔmɛ a he blɔ nya konɛ a ko pɛ kɛ hao tue buli. Ke nɔ tsuaa nɔ je bumi kpo ngɛ nikasemi ɔ sisije kɛ ya su nyagbe ɔ, e ma ha nɛ haomi tsɔwitsɔwi bɔɔ pɛ nɛ maa te si.—Fiɛlɔ 5:1; Fil. 2:4.

Ke ni hehi bɔni nikasemi bami ɔ, e sa nɛ asafo ɔ mi nɔ ko nɛ le mɛ ɔ nɛ hi a kasa nya. Enɛ ɔ yeɔ bua, titli ke a hɛɛ bimɛ tsɔwi nɛ sa kaa a tsɔse mɛ. Eko ɔ, nikasemi nɛ weku nɛ ɔ bɔni bami ɔ ji nɔ́ ehe kulaa ha mɛ. Ke jã nɛ e ji ɔ, lɛɛ eko ɔ, a bua maa jɔ he kaa a maa hi sɛhi nɛ ngɛ se ɔ eko nɔ, bɔnɛ pee nɛ ke e hia kaa a je asa a nɔ kɛ ya tsu a bimɛ tsɔwi ɔmɛ a hiami ní ha mɛ ɔ, e ko pee haomi ha ni kpahi ngɛ asa a nɔ. (Abɛ 22:6, 15) E sɛ kaa wekuhi nɛ a ngɛ bimɛ tsɔwi ɔ ya hii si ngɛ tsu kpa mi ngɛ he nɛ jokuɛwi ɔmɛ ma ná blɔ nɛ a kpa ngmlaa. E hi saminya kaa fɔlɔ ɔ kɛ e bimɛ maa je kpo ke e ma tsɔse mɛ loo e ma tsu a hiami ní ha mɛ, konɛ lɔɔ se ɔ, e kɛ mɛ nɛ kpale kɛ ba asa a nɔ.

Nibwɔhi a kpeeli ji nihi nɛ haa nɛ níhi yaa nɔ pɛpɛɛpɛ ngɛ he nɛ wa jaa Mawu ngɛ ɔ. A yeɔ bua wekuhi kɛ nihi nɛ kpɛɛ se ɔ nɛ a ná sihi he nɛ sa. Nibwɔhi a kpeeli ɔmɛ ngɔɔ ga kɛ ní lemi kɛ tsuɔ ní be mi nɛ a ngɛ nihi ye buae nɛ a ná he ko kpakpa nɛ a maa hi ɔ, bɔnɛ pee nɛ a ko hao tue buli ɔmɛ. A ngɔɔ ní lemi kɛ tsuɔ ní ke a ngɛ haomi ko nɛ ba tlukaa he ní tsue. Ke jokuɛ ko ní peepee ngɛ tue buli ɔmɛ haoe ɔ, nibwɔhi a kpeeli ɔmɛ kɛ mi mi jɔmi tsuɔ he ní.

Nihi tsuo nɛ ba kpe kɛ ha Mawu jami ɔ ma nyɛ maa ye bua nɛ wa ná tue mi jɔmi kɛ kase Yehowa kɛ e yi mi tomi nɛ kɔɔ tue mi jɔmi kɛ dami je ehe ɔ he ɔ he ní.—Heb. 10:24, 25.