Anɛ O Hɛngmɛ Nɔ Tsɔ Lo?
1. Ke nɔ ko “hɛngmɛ nɔ tsɔ” ɔ, mɛni e tsɔɔ?
1 Níhi nɛ wa ngɔɔ wa hɛngmɛ kɛ hyɛɛ ɔ náa wa ní peepeehi a nɔ he wami. Yesu munyu nɛ ɔ ji anɔkuale: “Ke o hɛngmɛ nɔ tsɔ ɔ, o nɔmlɔtso ɔ tsuo ma hyi kɛ la.” (Mat. 6:22) Ke wa “hɛngmɛ nɔ tsɔ” kaa bɔnɛ Yesu de ɔ, lɔɔ haa nɛ waa kɛ wa hɛ fɔɔ Mawu suɔmi nya ní peemi pɛ nɔ. Wa hlaa Matsɛ Yemi ɔ se blɔ kekle nɛ waa kɛ wa hɛ fɔɛ helo nya níhi, loo níhi nɛ ma nyɛ maa tsi wa sɔmɔmi nítsumi ɔ nya a nɔ.
2. Mɛni ma nyɛ ma puɛ wa juɛmi, se mɛni maa ye bua wɔ?
2 E He Hia Nɛ Waa Hyɛ Wɔ Nitsɛmɛ Wa Mi: Níhi a jua nɛ a tsɛɛ ngɛ TV, radio, kɛ adafi fiami womihi a mi, loo níhi nɛ nihi ngɛ ɔ ma nyɛ ma puɛ wa juɛmi. Loko wa ma he nɔ́ ko nɛ e ma nyɛ maa ngɔ wa be, sika, loo he wami ɔ, e maa hi kaa waa ‘bu nya’ kɛ gu sane nɛ ɔ nɛ wa ma bi wa he ɔ nɔ, ‘Anɛ enɛ ɔ ma ha nɛ ma ya ye hɛ mi ngɛ sɔmɔmi nɛ i kɛ haa Yehowa a mi, aloo e maa tsi ye nya?’ (Luka 14:28; Fil. 1:9-11, NW) E hi hu kaa ke e ngɛ mi hluu ɔ, wa maa hyɛ bɔnɛ wa ma plɛ kɛ pee wa si himi kpokploo ha konɛ wa nyɛ nɛ waa pee babauu ngɛ sɔmɔmi nítsumi ɔ mi.—2 Kor. 13:5; Efe. 5:10.
3. Mɛni wa kaseɔ kɛ jeɔ nyɛmiyo ko nɛ e pee tsakemi bɔnɛ pee nɛ e si himi nɛ pee kpokploo ɔ ngɔ?
3 Benɛ nyɛmiyo ko je blɔ gbami nítsumi ɔ sisi ɔ, e ngɛ mi kaa ke e kɛ be bɔɔ pɛ tsu helo nya nítsumi ɔ, e ma ná sika bɔnɛ sa kɛ hyɛ e he mohu, se e ya nɔ nɛ e ngɔ e be tsuo kɛ tsu ní. Nyagbenyagbe ɔ, e de ke: “Nɔ ko be nyɛe ma sɔmɔ nyɔmtsɛmɛ enyɔ. E sa nɛ ma ngmɛɛ níhi nɛ a he hia we mi tsɔ ɔ a he, konɛ ma tsu níhi nɛ a he hia mi ɔ a he ní. I yɔse kaa helo nya níhi a be beɔ nɛ e ji yaka dengme gbomi kaa ma di ní nɛ ɔmɛ a se.” E si fɔfɔɛ ngmɛ lɛ blɔ nɛ e nyɛ nɛ e pee tsakemihi ngɛ e si himi mi nɛ e si himi pee kpokploo, nɛ e nyɛ nɛ e tsake nítsumi nɛ e tsuɔ ɔ hulɔ, nɛ lɔɔ ha nɛ e ya nɔ nɛ e sɔmɔ kaa blɔ gbalɔ.
4. Mɛni heje nɛ e he hia wawɛɛ kaa wa ha nɛ wa hɛngmɛ nɔ nɛ e tsɔ ɔ?
4 Nyagbe ɔ nɛ ma kɛ fo ngɛ wa be nɛ ɔ mi ɔ ha nɛ e he hia wawɛɛ kaa wa ha nɛ wa hɛngmɛ nɔ nɛ e tsɔ. Daa je nɛ maa na a tsɔɔ kaa wa ngɛ be nɛ je yaya nɛ ɔ maa ba nyagbe nɛ́ Mawu je ehe ɔ maa je sisi ɔ he sue. (1 Kor. 7:29, 31) Ke wa ngɔ wa juɛmi kɛ ma fiɛɛmi nítsumi ɔ nɔ ɔ, wa ma he wɔ nitsɛmɛ kɛ nihi nɛ buɔ wɔ tue ɔ a yi wami.—1 Tim. 4:16.