Anɛ O Kɛ Womi ɔ Se ɔ Tsu Ní Hyɛ Lo?

Ke nihi ngɔ womi tɛtlɛɛ ɔ eko ɔ, ke a hyɛ womi ɔ nɔ ɔ, a kpale plɛɔ nɛ a ya hyɛɛ womi ɔ se hulɔ. Ngɛ Watchtower nɛ a pee kɛ ha ma mi bi ɔ se mi ɔ, a ngmaa sane bimihi kɛ munyuhi nɛ tleɔ nɔ bua jɔmi si kɛ bafa nɛ a maa na jamɛ a munyu ɔmɛ ngɛ ngɛ Watchtower a mi ɔ ngɛ lejɛ ɔ.

Munyu nɛ ɔmɛ ma nyɛ maa ye bua wɔ nɛ́ waa le sane nɛ wa ma bi kɛ je ní sɛɛmi sisi. Ke wa pɔɔ nítsumi ngɛ wa zugba kpɔ ɔ mi ɔ, wa ma nyɛ ma tsake blɔhi a nɔ nɛ wa guu kɛ fiɛɛɔ ngɛ nyɔhiɔ ɔ mi ɔ hɛ mi kɛ gu sane bimi slɔɔtoslɔɔtohi nɛ waa kɛ ma tsu ní ɔ nɔ. Ke wetsɛ ɔ be deka a, wa ma nyɛ maa po munyu nɛ wa maa tu ɔ nɔ kɛ gu sane bimihi nɛ a ngma ngɛ womi ɔ se ɔ a kpɛti kake nɛ waa kɛ maa tsɔɔ lɛ nɛ wa ma de ke, “Ke o suɔ kaa o maa le sane bimi nɛ ɔ heto ɔ, ma nyɛ ma si womi nɛ ɔmɛ kɛ ha mo, kɛkɛ ke i kpale kɛ ba nɛ o ngɛ deka a, wa ma susu a he” ɔ nɔ. Fiɛɛli komɛ maa suɔ kaa a maa je ní sɛɛmi sisi kɛ gu munyuhi nɛ a ngɛ womi ɔ se nɛ a kɛ maa tsɔɔ wetsɛ ɔ konɛ a ngmɛ lɛ blɔ nɛ e hla sane bimi nɛ e bua jɔ he ɔ nɔ. Lɔɔ se ɔ, a tsɔɔ wetsɛ ɔ he nɛ e maa na heto ɔ ngɛ nɛ a kaneɔ ngmami ko nɛ a kɛ dla a he momo kɛ haa wetsɛ ɔ. O ma nyɛ ma susu blɔ kpahi a nɔ nɛ o maa gu kɛ ngɔ munyuhi nɛ ngɛ Watchtower a se ɔ kɛ tsu ní kɛ tle nihi a bua jɔmi si ɔ he.