Sane Bimi He
◼ Mɛni ji níhi pɔtɛɛ nɛ wa ma nyɛ maa pee kɛ ye bua blɔ gbali?
Ngɛ jeha 2009 sɔmɔmi jeha a mi ɔ, nyɛmimɛ nyumuhi kɛ yihi nɛ e piɛ bɔɔ nɛ a hiɛmi maa su 800,000, sɔmɔ kaa daa blɔ gbali kɛ blɔ gbali klɛdɛɛ ngɛ je kɛ wɛ. Be tsuo sɔmɔli nɛ ɔmɛ ngɔ a be kɛ a he wami, kɛ níhi nɛ a ngɛ ɔ a mi kekleekle níhi kɛ sã afɔle bɔnɛ pee nɛ a nyɛ nɛ a fiɛɛ Matsɛ Yemi ɔ he sane kpakpa a. (Abɛ 3:9) Yehowa bua jɔ a mɔde bɔmi ɔ he wawɛɛ! Mɛni blɔhi a nɔ wɔ hu wa ma nyɛ maa gu kɛ ye bua wa blɔ gbali nɛ ɔmɛ konɛ a ná bua jɔmi nɛ a ya nɔ nɛ a tsu blɔ gbami nítsumi ɔ?
Anɛ o tuɔ blɔ gbami nítsumi ɔ he munyu kpakpa lo? Mɛni be ji nɛ ɔ nɛ o je blɔ gbalɔ ko yi ngɛ e he nɛ e kɛ sã afɔle ɔ heje? Ngɛ anɔkuale mi ɔ, munyuhi nɛ wa maa tu kɛ wo mɛ he wami ɔ ma nyɛ ma ha nɛ a ya nɔ nɛ a tsu blɔ gbami nítsumi ɔ. (Abɛ 25:11) Anɛ wa ma nyɛ maa to wa be he blɔ nya daa otsi konɛ waa kɛ mɛ nɛ ya fiɛɛmi lo? Nɔ́ titli nɛ blɔ gbali a bua jɔɔ he ji, nɛ́ nɔ ko kɛ mɛ maa ya fiɛɛmi ngɛ be nɛ fiɛɛli fuu yɛ fiɛɛmi ɔ nɔ. (1 Kor. 13:5; Fil. 2:4) Wa ma nyɛ ma je suɔmi mi nɛ waa kɛ mɛ nɛ pee huɛ, konɛ ke e ngɛ mi hluu ɔ, wa tsɛ mɛ ní yemi ngɛ wa we ɔmɛ a mi. (1 Pet. 4:8, 9) Wa ma nyɛ maa je wa tsui mi nɛ waa ye bua mɛ kɛ wo blɔhi nɛ a hiaa ngɛ sɔmɔmi nítsumi ɔ he ɔ he hiɔ, loo nɛ waa ye bua mɛ ngɛ blɔ kpahi nɛ wa ma nyɛ ɔ a nɔ.—Mo kɛ to 1 Tesalonikabi 5:13 ɔ he.
Ngmami ɔmɛ ma nɔ mi kaa Yehowa ma ha nihi nɛ hlaa e Matsɛ Yemi ɔ se blɔ kekle ɔ a hiami níhi. (La 37:25; Mat. 6:33) Suɔmi nɛ wa nyɛmimɛ Kristofoli jeɔ kpo ɔ ji blɔ kake nɛ Yehowa guu nɔ kɛ peeɔ enɛ ɔ. (1 Yoh. 3:16-18) Ngɛ anɔkuale mi ɔ, e ngɛ mi kaa blɔ gbali hyɛ we blɔ kaa nihi nɛ ha mɛ sika kɛ tsu a hiami níhi a he ní, nɛ a be nihi dee kaa e fi mɛ hulɔ mohu lɛɛ, se ke wa peeɔ klaalo nɛ wa toɔ nɔ́ he hɛ ɔ, wa ma nyɛ maa ye bua blɔ gbali anɔkualetsɛmɛ ɔmɛ ngɛ a fimi behi a mi.—2 Kor. 8:14, 15.
Benɛ kekle jeha lafa a mi sane kpakpa fiɛɛlɔ ko nɛ ngɛ kã, nɛ a tsɛɛ lɛ ke Foibe, nɛ e ngɛ Kenkrea asafo ɔ mi ɔ hia blɔ kɛ ho Roma ya a, Paulo wo nyɛmimɛ ɔmɛ nɛ a ngɛ Roma a he wami ke: “Nyɛ he lɛ hɛmuɔ ngɛ Nyɔmtsɛ ɔ biɛ mi bɔnɛ sa ni klɔuklɔu ɔmɛ. Nɔ́ tsuaa nɔ́ nɛ he maa hia lɛ ɔ, nyɛ ha lɛ.” (Rom. 16:1, 2) Wɔ hu wa ngɛ he blɔ kaa wa maa je suɔmi mi nɛ waa ye bua daa blɔ gbali kɛ blɔ gbali klɛdɛɛ nɛ a ngɛ wa asafo ɔ mi nɛ a ngɛ sane kpakpa a fiɛɛe kɛ kã a.—Níts. 5:42.