Su Nɛ He Hia Pe Kulaa Nɛ Tsɔɔlɔ Kpakpa Jeɔ Kpo
1. Mɛni ji su nɛ he hia pe kulaa nɛ tsɔɔlɔ kpakpa jeɔ kpo?
1 Mɛni ji nɔ́ nɛ haa nɛ nɔ ko peeɔ Baiblo tsɔɔlɔ kpakpa? Anɛ sukuu nɛ e ya lo? Níhi a si kpami nɛ e ngɛ lo? Dloomi nike ní nɛ e ngɛ lo? Ngɛ anɔkuale mi ɔ, e daa si ngɛ su ko nɛ nɔ ɔ jeɔ kpo ɔ nɔ. Su nɛ ɔ ji Mlaa a tsuo nɔ yemi, nɛ kikɛmɛ a su nɛ ɔ lɛ a kɛ kadiɔ Yesu kaseli ɔmɛ, nɛ su nɛ ɔ nɔuu ji su nɛ kle pe kulaa ngɛ Yehowa su titli eywiɛ ɔmɛ a kpɛti. (Yoh. 13:35; Gal. 5:14; 1 Yoh. 4:8) Jamɛ a su ɔ ji suɔmi. Tsɔɔli kpakpahi jeɔ suɔmi kpo.
2. Mɛni heje nɛ e he hia kaa waa suɔ nihi?
2 Moo Suɔ Nihi: Yesu nɛ ji Tsɔɔlɔ Ngua a je suɔmi kpo ha nihi, nɛ enɛ ɔ wo mɛ he wami nɛ a bu lɛ tue. (Luka 5:12, 13; Yoh. 13:1; 15:13) Ke wa susuɔ nihi a he ɔ, waa kɛ he blɔhi tsuo nɛ wa ma ná a maa ye mɛ odase. Níhi nɛ ma nyɛ maa tsi wɔ blɔ, kaa yi mi wami kɛ munyu ɔ tue nɛ nihi bui ɔ be wa kɔni mi jɔ̃e. Mohu ɔ, wa ma susu nihi nɛ wa fiɛɛɔ kɛ tsɔɔ mɛ ɔ a he wawɛɛ nɛ wa maa lo wa munyu ɔ saminya konɛ a bua nɛ jɔ he. Ke wa ngɛ nɔ́ nɛ wa ma ya tsɔɔ wa Baiblo kaseli ɔmɛ kasee ɔ, wa maa to wa tsui si nɛ ke wa ya su a ngɔ hu ɔ, wa maa to wa tsui si ha mɛ.
3. Mɛni blɔ nɔ suɔmi nɛ wa ma ná ha Baiblo ɔ mi anɔkuale ɔmɛ ɔ maa ye bua wɔ ngɛ fiɛɛmi nítsumi ɔ mi ngɛ?
3 Moo Suɔ Baiblo ɔ Mi Anɔkuale Ɔmɛ: Yesu hu suɔ Baiblo ɔ mi anɔkuale ɔmɛ nɛ e bu mɛ kaa weto ní. (Mat. 13:52) Ke wa suɔ anɔkuale ɔ, lɔɔ ma ha nɛ waa kɛ kã maa tu he munyu nɛ e maa wo wa tue buli ɔmɛ he wami nɛ a kɛ tsu ní. Suɔmi nɛ ɔ maa ye bua wɔ nɛ waa kɛ wa juɛmi maa fɔ munyuhi nɛ a he jua wa nɛ wa ngɛ nihi tsɔɔe ɔ nɔ mohu pe wa gbɔjɔmihi a nɔ, nɛ lɔɔ ma ha nɛ wa ma ná kã ngɛ wa fiɛɛmi nítsumi ɔ mi.
4. Mɛni ma ha nɛ suɔmi nɛ wa ngɛ ha nihi ɔ mi nɛ wa?
4 Ha Suɔmi Nɛ O Ngɛ Ha Nihi ɔ Mi Nɛ Wa: Mɛni ma ha nɛ suɔmi nɛ wa ngɛ kɛ ha nihi ɔ mi nɛ wa? Kɛ gu suɔmi nɛ Yehowa kɛ e Bi ɔ je kpo kɛ tsɔɔ adesahi, kɛ mumi mi si himi nɛ ngɛ mɔbɔ nɛ nihi nɛ a ngɛ wa zugba kpɔ ɔ mi ɔ ngɛ mi ɔ he nɛ wa ma susu ɔ nɔ. (Mar. 6:34; 1 Yoh. 4:10, 11) Ke wa peeɔ dɛhe nikasemi nɛ wa susuɔ níhi nɛ wa kaseɔ ɔ a he ɔ, lɔɔ ma ha nɛ suɔmi nɛ wa ngɛ kɛ ha Baiblo ɔ mi anɔkuale ɔ mi maa wa. Suɔmi ji mumi ɔ yiblii ɔ fã ko. (Gal. 5:22) Enɛ ɔ he ɔ, wa ma nyɛ ma kpa Yehowa pɛɛ konɛ e ha wɔ e mumi klɔuklɔu ɔ nɛ e ye bua wɔ nɛ suɔmi nɛ wa ngɛ ɔ mi nɛ wa. (Luka 11:13; 1 Yoh. 5:14) Ngɛ sukuu nɛ wa ya, loo níhi si kpami loo dloomi nike ní nɛ wa ngɛ ɔ tsuo se ɔ, wa ma nyɛ maa pee Baiblo tsɔɔli kpakpahi kɛ gu suɔmi kpo nɛ wa ma je ɔ nɔ.