Mɛni Woɔ Wɔ He Wami Nɛ Wa Fiɛɛ ɔ?
1. Mɛnɔmɛ a he suɔmi nɛ woɔ wɔ gɛjɛmi nɛ wa fiɛɛ ɔ?
1 Mwɔnɛ ɔ, Mawu Matsɛ Yemi ɔ he sane kpakpa a fiɛɛmi ji nítsumi nɛ he hia pe kulaa nɛ wa ma nyɛ ma tsu. Ngɛ anɔkuale mi ɔ, ke wa tsuɔ nítsumi nɛ ɔ, wa ngɛ mla enyɔ nɛ he hia pe kulaa nɛ ji, suɔ Yehowa kɛ o nyɛmi ɔ nɔ yee. (Mar. 12:29-31) Suɔmi lɛ woɔ wɔ he wami nɛ wa peeɔ fiɛɛli nɛ a ngɛ kã.—1 Yoh. 5:3.
2. Mɛni blɔ nɔ sane kpakpa a nɛ wa fiɛɛ ɔ tsɔɔ kaa wa suɔ Yehowa?
2 Suɔmi Nɛ Wa Ngɛ Kɛ Ha Yehowa: Suɔmi nɛ wa ngɛ kɛ ha Yehowa, nɛ ji wa Huɛ nɛ pe kulaa a lɛ woɔ wɔ he wami nɛ wa fãa e he ɔ nɛ. Ma pee jeha 6,000 nɛ be ɔ, Satan gbe Mawu biɛ ɔ he guɛ. (2 Kor. 4:3, 4) Enɛ ɔ he ɔ, nihi he ye kaa Mawu piiɔ yayami peeli ngɛ hɛl la mi, e ji Mawu etɛ nɛ bla kɛ pee kake nɛ́ e he ngɛ gbeye, nɛ e susuu we adesahi a he. Nihi fuu po deɔ ke Mawu be. Hyɛ bɔnɛ wa suɔ kaa nihi nɛ á le anɔkuale ɔ nɛ kɔɔ wa hiɔwe Tsɛ ɔ he ha! Mɔde nɛ wa bɔɔ nɛ wa yeɔ Mawu he odase ɔ haa nɛ e náa bua jɔmi wawɛɛ se e haoɔ Satan.—Abɛ 27:11; Heb. 13:15, 16.
3. Mɛni blɔ nɔ waa kɛ fiɛɛmi nítsumi ɔ tsɔɔ kaa wa ngɛ suɔmi ha wa nyɛmi?
3 Suɔmi Nɛ Wa Ngɛ Kɛ Ha Wa Nyɛmi: Be tsuaa be nɛ wa maa ye nɔ ko odase ɔ, wa tsɔɔ kaa wa ngɛ suɔmi kɛ ha lɛ. E he hia wawɛɛ nɛ nihi nɛ a nu sane kpakpa a ngɛ be nɛ mi wa nɛ ɔ mi. Nihi fuu a si fɔfɔɛ ngɛ kaa Ninevebi ɔmɛ ngɛ Yona be ɔ mi “nɛ a li kpakpa kɛ yayami a kpɛti slɔɔto” ɔ. (Yona 4:11) Wa fiɛɛmi nítsumi ɔ yeɔ bua nihi nɛ a náa si himi kpakpa nɛ́ bua jɔmi ngɛ mi. (Yes. 48:17-19) E haa mɛ hɛ nɔ kami. (Rom. 15:4) Ke a bu tue nɛ a kɛ níhi nɛ a kase ɔ tsu ní ɔ, ‘a ma he a yi wami.’—Rom. 10:13, 14.
4. Mɛni Yehowa hɛ be nɔ jee kɔkɔɔkɔ ɔ?
4 Jokuɛwi kpakpahi jeɔ suɔmi kpo kɛ tsɔɔ a fɔli be tsuaa be se pi ngɛ be pɔtɛɛ komɛ pɛ a mi. A ngɛ suɔmi be tsuaa be. Jã nɔuu nɛ suɔmi nɛ mi wa nɛ wa ngɛ kɛ ha Mawu kɛ wa nyɛmi ɔ lɛ woɔ wɔ gɛjɛmi nɛ wa peeɔ klaalo kaa wa maa ye nihi odase be tsuaa be, se pi be nɛ wa ngɛ fiɛɛmi tso mi pɛ. Wa maa fiɛɛ nɛ wa be kpae. (Nits. 5:42) Yehowa hɛ be suɔmi nɛ ɔ nɔ jee kɔkɔɔkɔ.—Heb. 6:10.