Moo Ye Be Nɔ Be Tsuaa Be
1. Mɛni nɔ hyɛmi nɔ́ Yehowa pee ngɛ be nɔ yemi he?
1 Yehowa yeɔ e be nɔ be tsuaa be. Kaa nɔ hyɛmi nɔ́ ɔ, e yeɔ bua e sɔmɔli “ngɛ be nɛ sa mi.” (Heb. 4:16) E haa mɛ mumi mi niye ní “ngɛ be nɛ sa mi.” (Mat. 24:45) Wa ma nyɛ ma ná nɔ mi mami kaa e mi mi fumi ligbi ɔ nɛ ma a ‘be se kpɛe.’ (Hab. 2:3) Wa náa be nɔ nɛ Yehowa yeɔ ɔ he se wawɛɛ! (La 70:5) Akɛnɛ wa ji adesahi nɛ a yi mluku, nɛ wa be deka he je ɔ, e be gbɔjɔɔ kaa wa maa ye be nɔ. Mɛni he je nɛ e sa nɛ e pee wa su kaa wa maa ye be nɔ ɔ?
2. Mɛni he je nɛ be nɔ yemi woɔ Yehowa hɛ mi nyami ɔ?
2 Ngɛ nyagbe be nɛ ɔ mi ɔ, nihi foɔ mɛ pɛ a nɔ́ mi nɛ a yí a he nɔ, lɔ ɔ he ɔ, a yí be nɔ kulaa. (2 Tim. 3:1-3) Enɛ ɔ he ɔ, ke Kristofohi yaa ní tsumi kɛ kpehi mla, nɛ a yeɔ a be nɔ ke a kɛ nɔ ko pee blɔ nya tomi ko ɔ, nihi yɔseɔ nɛ e woɔ Yehowa hɛ mi nyami. (2 Pet. 2:12) Anɛ wa jee wa ní tsumi sisi ngɛ be nya, se wa kpɛɛ se kɛ yaa teokrase ní peemihi a sisi lo? Ke wa yeɔ be nɔ kɛ yaa asafo mi kpehi loko a laa nɛ a sɔlee kɛ jeɔ kpe ɔ sisi ɔ, lɔ ɔ tsɔɔ kaa wa suɔ nɛ wa maa kase wa hiɔwe Tsɛ nɛ e peeɔ ní ngɛ be nya a.—1 Kor. 14:33, 40.
3. Mɛni he je nɛ be nɔ yemi tsɔɔ kaa wa susuɔ ni kpahi a he ɔ?
3 Be nɔ yemi tsɔɔ kaa wa susuɔ ni kpahi a he. (Filip. 2:3, 4) Kaa nɔ hyɛmi nɔ́ ɔ, ke wa ya Kristofohi a kpehi kɛ fiɛɛmi yami kpehi mla a, wa be nyɛmimɛ kpahi a nya gbae. Se ke wa kpɛɛ se be tsuaa be ɔ, e haa nɛ nihi naa kaa wa bui ni kpahi a be kaa e he hia. Ke nɔ ko yeɔ be nɔ ɔ, e tsɔɔ kaa e yeɔ anɔkuale, e bɔɔ mɔde nɛ a ma nyɛ kɛ he maa fɔ e nɔ. Enɛ ɔ ma ha nɛ nihi maa suɔ e sane.
4. Ke wa pɔɔ se kpɛmi ɔ, mɛni blɔ nɔ wa ma nyɛ maa gu kɛ pee tsakemi?
4 Ke o pɔɔ se kpɛmi ɔ, mo susu nɔ́ nɛ haa nɛ o kpɛɛ se ɔ he. Moo to blɔ nya kpakpa, nɛ o tsu níhi a he ní ngɛ be nɛ o to ɔ nya. (Fiɛlɔ 3:1; Filip. 1:10) Mo bi Yehowa nɛ e ye kɛ bua mo. (1 Yoh. 5:14) Be nɔ yemi ji blɔ kake nɔ nɛ wa guu kɛ yeɔ Mlaa enyɔ nɛ kle pe kulaa nɛ ji, suɔ Mawu kɛ o nyɛmi ɔ nɔ.—Mat. 22:37-39.