Ní Tsumi Klɛdɛɛ Ko Maa Ya Nɔ Ngɛ August Mi!

1. Be mi nɛ Matsɛ Yemi ɔ yaa ná jeha 100 nɛ ɔ, mɛni womi gbami klɛdɛɛ lɛ maa ya nɔ ngɛ je ɔ mi tsuo?

¹ E piɛɛ bɔɔ nɛ be nɛ a to Mawu Matsɛ Yemi ɔ sisi ɔ maa su jeha 100. Enɛ ɔ he ɔ, e sa saminya kaa wa ma tsu ní klɛdɛɛ ko kɛ wo Yehowa hɛ mi nyami! Ngɛ August mi ɔ, wa ma gba dɛ womi nɛ yi ji “Jije Wa Maa Na Sane Bimihi Nɛ A He Hia Amɛ A Heto Ngɛ?” ɔ ngɛ je ɔ tsuo. Dɛ womi nɛ ɔ maa wo e kaneli he wami kaa a ha nɛ Baiblo ɔ nɛ ha a sane bimihi a heto, nɛ e maa tsɔɔ bɔ nɛ jw.org ma nyɛ maa ye bua mɛ ha.

2. Kɛ wa maa pee kɛɛ konɛ waa ngɔ wa he kɛ wo ‘Yehowa yi nɛ wa ma je’ ngɛ August nyɔhiɔ ɔ mi ɔ mi?

² Wa Ma He Ose Kɛ Je Yehowa Yi: A to blɔ nya klɛdɛɛ ko nɛ e ye bua fiɛɛli nɛ a suɔ kaa a ma bli a sɔmɔmi ɔ mi ɔ konɛ a nyɛ nɛ a pee blɔ gbali a wali ngɛ August mi. Ngɛ nyɔhiɔ nɛ ɔ mi ɔ, a ma ha fiɛɛli he blɔ konɛ a kɛ ngmlɛfia 30 sɔmɔ kaa blɔ gbali a wali. Akɛnɛ Soha, Hɔ, kɛ Hɔgba enuɔɔnuɔ lɛ ngɛ August nyɔhiɔ ɔ mi he je ɔ, fiɛɛli fuu nɛ a ngɛ amlaalo ní tsumi tsue ma nyɛ maa ngɔ a he kɛ wo blɔ gbali a wami ní tsumi ɔ mi. Jehanɛ, sukuu bi hu ma nyɛ maa pee blɔ gbali a wali ngɛ August sukuu blɔ hami ɔ mi. Ke o ngɛ Baiblo kaselɔ ko, loo bi nɛ e he su kɛ ha fiɛɛmi ɔ, moo bɔ nikɔtɔmahi a kuu ɔ sanehi a he blɔ nya tolɔ ɔ amaniɛ nɔuu. E maa pee bua jɔmi wawɛɛ kaa a ma ba piɛɛ wa he kaa fiɛɛli konɛ waa kɛ mɛ nɛ tsu ní ngɛ nyɔhiɔ klɛdɛɛ nɛ ɔ mi! Daa blɔ gbali fuu jɔɔ a he ngɛ August nyɔhiɔ ɔ mi akɛnɛ a ná jeha ngmlɛfia nɛ a ngɛ hlae ngɛ a dɛ ɔ, se a ma nyɛ maa pee tsakemi konɛ a ngɔ a he kɛ wo dɛ womi gbami klɛdɛɛ nɛ ɔ mi kɛ pi si. Amlɔ nɛ ɔ ji be nɛ e sa kaa wekuhi a susu bɔ nɛ a maa pee konɛ a ngɔ a he kɛ wo ‘Yehowa yi nɛ wa ma je’ ngɛ August nyɔhiɔ ɔ mi ɔ he.​—Ezra 3:11; Abɛ 15:22.

3. Mɛni wa ngɛ blɔ hyɛe ngɛ dɛ womi gbami klɛdɛɛ nɛ ɔ mi?

³ E ngɛ mi kaa wa gba womi kaa kikɛ hyɛ mohu lɛɛ, se wa ngɛ blɔ hyɛe kaa enɛ ɔ ma pã lɛ tsuo. Anɛ wa ma nyɛ ma ná ngmlɛfia, fiɛɛli, kɛ blɔ gbali a wali yibɔ nɛ hiɛ pe kulaa ngɛ August mi lo? E piɛɛ bɔɔ nɛ 2014 sɔmɔmi jeha a maa ba nyagbe, lɔ ɔ he ɔ, wa ngɛ blɔ hyɛe kaa Yehowa maa jɔɔ ní tsumi nɛ e we bi ma tsu ngɛ August ɔ nɔ, konɛ e pee odase yemi agbo ngɛ je ɔ mi tsuo!​—Mat. 24:14.