Kɛ Yehowa Naa Mi Kɛɛ?
1. Mɛni blɔ nɔ nɛ Baiblo ɔ ngɛ kaa ahuhuɛ ngɛ?
1 Si enyɛmɛ nɛ o hyɛɛ ahuhuɛ mi? Wa kpɛti nihi fuu peeɔ jã ejakaa e yeɔ bua wɔ nɛ wa naa ní komɛ ngɛ wa he nɛ e sa kaa wa dla. A ngɔ Baiblo ɔ kɛ to ahuhuɛ he. Ke wa kaneɔ Mawu Munyu ɔ daa a, e ma ha nɛ wa maa na nɔ tutuutu nɛ wa ji, nɛ lɔ ɔ ji nɔ́ nɛ Yehowa naa. (1 Sam. 16:7; Yak. 1:22-24) Mawu Munyu ɔ ma nyɛ ma je “adesa tsui mi níhi, kɛ e yi mi tomi kpo.” (Heb. 4:12) Mɛni blɔ nɔ nɛ Baiblo ɔ nɛ wa maa kane daa ligbi nɛ wa ma susu he ɔ maa ye bua wɔ nɛ waa na hehi nɛ e sa nɛ waa bɔ wa he mɔde ngɛ konɛ waa ye manye ngɛ fiɛɛmi ní tsumi ɔ mi?—La 1:1-3.
2. Mɛni blɔ nɔ nɛ Baiblo ɔ maa ye bua wɔ konɛ waa hyɛ wɔ nitsɛmɛ wa mi?
2 Ngɔɔ Baiblo ɔ Kɛ Tsu Ní Kaa Ahuhuɛ: Yehowa sɔmɔli anɔkualetsɛmɛ a he sane nɛ ngɛ Baiblo ɔ mi ɔ tsɔɔ wɔ suhi nɛ muɔɔ Yehowa hɛ. Kaa nɔ hyɛmi nɔ́ ɔ, David pee kã ngɛ Mawu biɛ ɔ he. (1 Sam. 17:45, 46) Yesaya pee kã nɛ e ngɔ e he kɛ ha kaa e ma ya fiɛɛ ngɛ zugba kpɔ ko nɛ mi wa mi. (Yes. 6:8, 9) Suɔmi nɛ mi kuɔ nɛ Yesu ngɛ kɛ ha e Tsɛ ɔ ha we nɛ e na fiɛɛmi ní tsumi ɔ kaa e ji tlomi, mohu ɔ, e na lɛ kaa e ji nɔ́ nɛ haa nɔ bua jɔmi nɛ e haa nɔ tsui nɔɔ e mi. (Yoh. 4:34) Kristofohi nɛ a hi si ngɛ kaseli ɔmɛ a be ɔ mi ɔ fiɛɛ kɛ kã, nɛ a ngɔ a he kɛ fɔ Yehowa nɔ, nɛ a fia a pɛɛ si kaa a be hae nɛ a kɔni mi nɛ wo nyu. (Níts. 5:41, 42; 2 Kor. 4:1; 2 Tim. 4:17) Nɔ hyɛmi ní nɛ ɔmɛ a he nɛ wa ma susu ɔ maa ye bua wɔ konɛ waa kpa wa mi nɛ waa hyɛ kaa wa ngɛ hɛ mi yae ngɛ Mawu nɛ wa ngɛ sɔmɔe ɔ mi lo.
3. Mɛni he je nɛ e sɛ nɛ waa to tsle ngɛ tsakemihi nɛ e sa nɛ waa pee ɔmɛ a he ɔ?
3 Mo Dla O Fa Tɔmi Ɔmɛ: Ke wa hyɛ ahuhuɛ mi nɛ wa na fa tɔmi ko ngɛ wa he nɛ wa dla we ɔ, se nami ko be he. Enɛ ɔ he ɔ, wa ma nyɛ ma bi Yehowa nɛ e ye bua wɔ nɛ waa na bɔ nɛ wa ngɛ ha tutuutu, nɛ e ye bua wɔ konɛ waa pee tsakemi nɛ sa. (La 139:23, 24; Luka 11:13) Akɛnɛ be nɛ piɛ ɔ pi, nɛ adesahi a wami ngɛ oslaa mi he je ɔ, e sɛ nɛ waa to tsle ngɛ tsakemihi nɛ e sa nɛ waa pee ɔmɛ a he.—1 Kor. 7:29; 1 Tim. 4:16.
4. Mɛni se nɛ nɔ ko nɛ hyɛɛ Mawu Munyu ɔ mi, nɛ e tsuɔ nɔ́ nɛ e na a he ní ɔ náa?
4 Bɔ nɛ nɔ ko ngɛ ha ngɛ e tsui mi ɔ he hia pe bɔ nɛ e ngɛ ha ngɛ kpo nɔ blɔ, ejakaa tsui mi nɛ Yehowa hyɛɛ. (1 Pet. 3:3, 4) Ke nɔ ko hyɛɛ Mawu Munyu ɔ mi nɛ e tsuɔ nɔ́ nɛ e naa a he ní ɔ, mɛni se nɛ e náa? Ke e “hɛ ji nɔ́ nɛ e kase ɔ nɔ, se mohu e ye nɔ ɔ, a maa gbaa lɛ saminya ngɛ nɔ́ tsuaa nɔ́ nɛ e ngɛ tsue ɔ mi.” (Yak. 1:25) Niinɛ, wa bua maa jɔ nɛ wa fiɛɛmi ní tsumi ɔ maa pi si, ejakaa ‘wa ngɛ kaa ahuhuɛ nɛ Yehowa hɛ mi nyami ɔ kpɛɔ kɛ guu mi.’—2 Kor. 3:18.