Koo Ngmɛɛ He Blɔhi Nɛ O Náa Nɛ O Ma Nyɛ Ma Kɛ Fiɛɛ ɔ He!

1. Mɛni wa ma nyɛ maa kase ngɛ David nɔ hyɛmi nɔ́ ɔ mi?

¹ Matsɛ David ha we nɛ ní komɛ nɛ wo e kɔni mi nyu. Kaa nɔ hyɛmi nɔ́ ɔ, jinɛ David suɔ kaa e maa ma sɔlemi we kɛ ha Yehowa. Se benɛ Yehowa de lɛ ke pi lɛ nɛ e maa ma sɔlemi we ɔ, e ha we nɛ lɔ ɔ nɛ hao lɛ, mohu ɔ, e bua níhi nɛ a kɛ maa ma sɔlemi we ɔ nya kɛ ha e bi Salomo. (1 Ma. 8:17-19; 1 Kron. 29:3-9) David ngɔ e juɛmi kɛ ma níhi nɛ e ma nyɛ maa pee ɔmɛ a nɔ mohu pe níhi nɛ e be nyɛe peemi ɔmɛ. Mɛni blɔ nɔ David nɔ hyɛmi nɔ́ ɔ maa ye bua wɔ konɛ wa hla he blɔhi nɛ wa kɛ fiɛɛ Matsɛ Yemi sɛ gbi ɔ?

2. Mɛni he nɛ nɔ tsuaa nɔ ma nyɛ ma susu?

² Pee Nɔ́ Nɛ O Ma Nyɛ: Nihi babauu pee a si himi kpokploo bɔ nɛ pee nɛ a nyɛ nɛ a ngɔ a he kɛ wo blɔ gbali a wami loo blɔ gbami ní tsumi ɔ mi. (Mat. 6:22) Anɛ mo hu o ma nyɛ maa ngɔ o he kɛ wo mi lo? Ke o sɔle nɛ o susu o si fɔfɔɛ ɔ he ɔ, eko ɔ, o maa na kaa ‘blɔ ko bli ha mo nɛ o kɛ ma tsu ní saminya.’ Ke o na jã a, koo ngmɛɛ jamɛ a he blɔ ɔ he nɛ e be!​—1 Kor. 16:8, 9.

3. Mɛni he blɔhi nɛ wa ma nyɛ maa ngɔ kɛ ye odase ke wa si fɔfɔɛ be wɔ blɔ ngmɛe nɛ waa pee blɔ gbali?

³ Nɛ ke o si fɔfɔɛ be mo blɔ ngmɛe nɛ o ngɔ o he kɛ wo blɔ gbami ní tsumi ɔ mi hu nɛɛ? Ko ma o hɛ kɛ fɔ he blɔ kpahi nɛ o náa amɛ a nɔ. Kaa nɔ hyɛmi nɔ́ ɔ, ke o kɛ nihi nɛ a pi odasefohi tsuɔ ní ɔ, moo ngɔ he blɔ nɛ ɔ kɛ ye mɛ odase. Ke o be he wami ɔ, o ma nyɛ maa ye hiɔ tsali ɔmɛ loo nihi nɛ a maa hyɛ mo ɔ odase. Mo kai kaa a to blɔ nya kɛ ha nihi nɛ a be nɔmlɔ tso mi he wami kpakpa ko, nɛ a be nyɛe maa ya fiɛɛmi ɔ konɛ ke e hí kulaa a, a ngɔ hɛngmɛfia 15 kɛ ye odase. Ke o ngɛ o fiɛɛmi ní tsumi ɔ he akɔtaa bue ɔ, mo kai nɛ o bu be nɛ o kɛ ye odase be mi nɛ o be fiɛɛmi tso mi, kɛ womi slɔɔtohi, dɛ womihi, kɛ Kaimi yemi kɛ kpe yami he nine fɔmi womihi nɛ o kɛ ha a he akɔtaa. Ke nyɔhiɔ ɔ gbo nɛ o bu akɔtaa a, o maa na kaa o tsu ní babauu!

4. Mɛni nɛ o fia o pɛɛ si kaa o maa pee?

⁴ Nyɛ ha nɛ waa ngɔ he blɔhi tsuo nɛ wa ma ná ngɛ si fɔfɔɛ saisaa mi ɔ kɛ fiɛɛ sane kpakpa a. Ke wa pee jã a, wa tsui maa nɔ wa mi, ejakaa wa le kaa nɔ́ nɛ wa ma nyɛ maa pee ngɛ Matsɛ Yemi ɔ he ɔ tsuo nɛ wa ngɛ pee ɔ nɛ.​—Mar. 14:8; Luka 21:2-4.