‘Nyɛ Hɛ Nɛ Hi Mlaa Nɛ Ɔmɛ A Nɔ’
Fɔli ngɛ kaa to hyɛli. E sa nɛ a hyɛ a bimɛ a nɔ saminya, ejakaa e he wɛ kaa nihi maa mlɔɔ mɛ nɛ a je anɔkuale ɔ mi. (Abɛ 27:23) Mɛni blɔ nɔ nɛ fɔli maa gu kɛ po a bimɛ ɔmɛ a he piɛ? E sa nɛ a ná deka kɛ ha a bimɛ, nɛ a kɛ mɛ nɛ sɛɛ ní daa, konɛ a le jokuɛ ɔmɛ a juɛmi ngɛ níhi a he, kɛ níhi nɛ a bua jɔ he. (Abɛ 20:5) Jehanɛ hu ɔ, e sa nɛ fɔli nɛ a ngɔ níhi nɛ la be nyɛe maa sã kɛ fia a bimɛ ɔmɛ a hemi kɛ yemi kɛ ma si. (1 Kor. 3:10-15) Video nɛ ji, ‘Nyɛ Hɛ Nɛ Hi Mlaa Nɛ Ɔmɛ A Nɔ’ ɔ tsɔɔ bɔ nɛ weku Mawu jami he hia ha. Nyɛ bla kɛ hyɛ kaa weku, nɛ nyɛɛ ngɔ sane bimihi nɛ nyɛɛ se ɔmɛ kɛ susu he.
(1) Mɛni lɛ ha nɛ Nyɛminyumu Roman weku ɔ hɛ dɔɛ ngɛ Mawu jami he ɔ? (2) Mɛni he je nɛ sisije ɔ, Nyɛminyumu Roman weku Mawu jami ɔ yi manye ɔ? (3) Mɛni blɔ pɔtɛɛ nɛ Ngmami ɔ tsɔɔ kaa ke fɔli gu nɔ kɛ tsɔse a bimɛ ɔ, a maa ye manye? (5 Mose 6:6, 7) (4) Mɛni lɛ haa nɛ ní sɛɛmi kpakpa yaa nɔ ngɛ weku mi? (5) Mɛni nɛ e sa kaa fɔli nɛ a kɛ sã afɔle ngɛ a bimɛ a he? (6) Mɛni blɔ nɔ nɛ Nyɛminyumu Barrow kɛ e yo ɔ a ná Nyɛminyumu Roman weku ɔ nɔ he wami kpakpa ngɛ? (Abɛ 27:17) (7) Mɛni nɛ e sa nɛ wekuyi ɔ nɛ e sɛ hlami nɛ e pee konɛ weku Mawu jami ɔ nɛ ya nɔ saminya? (8) Mɛni Nyɛminyumu Roman pee loko níhi bɔni nɔ yami saminya ngɛ e weku ɔ mi ɔ? (9) Mɛni he je nɛ e sɛ nɛ a po weku Mawu jami mi gblee ɔ? (Efe. 6:4) (10) Mɛni níhi nɛ wa ma nyɛ ma susu a he ngɛ weku Mawu jami mi? (11) Mɛni blɔ nɔ nɛ benɛ Nyɛminyumu Roman ngɛ Marcus ye buae konɛ e pee nɔ́ nɛ da a, e to e tsui si, se kɛ̃ ɔ, e ngɔ e nane kɛ ma si? (Yer. 17:9) (12) Mɛni blɔ nɔ nɛ Nyɛminyumu Roman kɛ e yo ɔ a gu nɛ a kɛ Rebbeca susu níhi a he konɛ e le nɔ́ nɛ e sa kaa e pee ngɛ e kɛ Justin a huɛ bɔmi ɔ he? (Mar. 12:30; 2 Tim. 2:22) (13) Mɛni blɔ nɔ nɛ Nyɛminyumu Roman kɛ e yo a gu kɛ je hemi kɛ yemi kpo benɛ a ngɛ tsakemihi pee ngɛ a si himi mi ɔ? (Mat. 6:33) (14) Mɛni blɔ nɔ nɛ video nɛ ɔ tsɔɔ kaa e sa nɛ wekuyihi nɛ a ha nɛ mumi mi níhi nɛ a kɛ ma ha a weku ɔ he nɛ hia mɛ wawɛɛ? (1 Tim. 5:8) (15) Ke wekuyi ji mo ɔ, mɛni nɛ o fia o pɛɛ si kaa o maa pee?
KƐ HA WEKUYIHI: A pee drama nɛ ɔ benɛ wa ya jeha 2011 kpokpa nɔ kpe ɔ. Anɛ o yɔse ngɛ jamɛ a be ɔ mi kaa e sa nɛ o pee tsakemihi ngɛ bɔ nɛ o peeɔ weku Mawu jami ha a he lo? Amlɔ nɛ ɔ hu nɛɛ? Ke e he hia nɛ o pee tsakemi ɔ, wa kpa mo pɛɛ nɛ o sɔle ngɛ he, konɛ o weku Mawu jami ɔ nɛ nu tso, nɛ e fia o weku ɔ kɛ ma si kɛ ya neneene.—Efe. 5:15-17.