Moo Wo Kristofohi Nɛ A Kpa Asafo Mi Kpe Kɛ Fiɛɛmi Yami ɔ He Wami

Daa jeha a, Kristofohi fuu nɛ a kpa asafo mi kpe kɛ fiɛɛmi yami ɔ baa Kaimi ɔ. Mɛ hu a ngɛ wami he fo ɔ tue, se pɔ tɔ a he ngɛ blɔ ɔ nɔ ngɛ ní komɛ a he je. A tsɔɔ ní nɛ ɔmɛ ekomɛ ngɛ womiyo nɛ ji, Kpale Kɛ Ba Yehowa Ngɔ ɔ mi. (Heb 12:1) Nimli nɛ ɔmɛ a he jua wa ha Yehowa, ejakaa e kɛ e Bi ɔ muɔ lɛ he mɛ. (Níts 20:28; 1Pet 1:18, 19) Mɛni wa maa pee kɛ ye bua mɛ konɛ a kpale kɛ ba asafo ɔ mi?

Ke to hyɛlɔ ko e to laa a, e bɔɔ mɔde kaa e ma hla to ɔ se blɔ. Jã kɛ̃ nɛ asafo mi nikɔtɔma amɛ hu bɔɔ mɔde kaa a ma hla Kristofohi nɛ a kpa asafo mi kpe kɛ fiɛɛmi yami ɔ a se blɔ, konɛ a ye bua mɛ. (Luka 15:4-7) Enɛ ɔ tsɔɔ kaa Yehowa suɔ e tohi nɛ a laa a wawɛɛ. (Yer 23:3, 4) Pi asafo mi nikɔtɔmahi pɛ nɛ ma nyɛ maa wo mɛ he wami; wɔ tsuo wa ma nyɛ maa pee jã. Ke wa je nyɛmi suɔmi kɛ mi mi himi kpo kɛ tsɔɔ mɛ ɔ, Yehowa bua maa jɔ, nɛ e maa jɔɔ wɔ. (Abɛ 19:17; Níts 20:35) Enɛ ɔ he ɔ, ke o le nɔ ko nɛ e he hia kaa a wo lɛ he wami ɔ, e maa hi kaa o maa ye bua lɛ mla!

NYƐƐ HYƐ VIDEO NƐ JI, MOO WO NIHI NƐ A KPA ASAFO MI KPE KƐ FIƐƐMI YAMI Ɔ HE WAMI. LƆ Ɔ SE Ɔ, NYƐ HA SANE BIMI NƐ ƆMƐ A HETO:

• Benɛ Abbey ya na Odasefo no ko nɛ e li lɛ ɔ, mɛni e pee konɛ e nyɛ nɛ e ye bua lɛ?

• Ke wa na nɔ ko nɛ e kpa asafo mi kpe kɛ fiɛɛmi yami, nɛ wa suɔ kaa wa maa ye bua lɛ ɔ, mɛni he je nɛ e sa kaa wa ha asafo mi nikɔtɔma amɛ lemi ɔ?

• Mɛni Abbey pee kɛ dla e he loko e kpale ya slaa Laura si enyɔne ɔ?

• Benɛ Abbey ngɛ mɔde bɔe konɛ e wo Laura he wami ɔ, mɛni e pee kɛ tsɔɔ kaa e suɔ Laura, e toɔ e tsui si, nɛ e kɔni gbo we ngɛ e he?

• Mɛni wa ma nyɛ maa kase ngɛ nɔ́ he tomi nɔ́ nɛ Yesu kɛ tsu ni ngɛ Luka 15:8-10 mi?

• Benɛ Abbey kɛ asafo mi nikɔtɔma amɛ pee kake kɛ ye bua Laura a, mɛni je mi kɛ ba?