KRISTOFOHI A SI HIMI
Bɔ Nɛ O Ma Plɛ Kɛ Kase Ngmami ɔ Ha Saminya
Ke o kɛ ka ko kpe ɔ, anɛ o maa ye anɔkuale kaa bɔ nɛ Daniel pee ɔ lo? Daniel kase Mawu Munyu ɔ saminya. Níhi nɛ e kase ɔ ekomɛ ji gbamihi. (Dan 9:2) Ke o kase Baiblo ɔ saminya a, lɔ ɔ maa ye bua mo konɛ o ya nɔ nɛ o ye anɔkuale. Ngɛ mɛni blɔ nɔ? E ma ha nɛ hemi kɛ yemi nɛ o ngɛ kaa Yehowa si womi ɔmɛ maa ba mi ɔ mi maa wa. (Yosh 23:14) Jehanɛ hu ɔ, e ma ha nɛ suɔmi nɛ o ngɛ ha Mawu ɔ mi maa wa, nɛ o maa pee nɔ́ nɛ da. (La 97:10) Se kɛ o ma plɛ kɛ je sisi ha kɛɛ? Mo susu ga womihi nɛ nyɛɛ se ɔ he.
Mɛni e sa kaa ma kase? Daa otsi ɔ, e sa nɛ o sɛ hlami nɛ o kase níhi nɛ wa ma susu a he ngɛ asafo mi kpe ɔmɛ a mi ɔ. Ke o ná deka kɛ hla otihi nɛ o nui sisi ɔ mi ɔ, o ma ná daa otsi Baiblo kanemi ɔ he se. Ni komɛ hu suɔ kaa a maa kase Baiblo gbamihi, suhi nɛ peeɔ Mawu mumi ɔ yiblii ɔ, blɔhi nɛ bɔfo Paulo hia kɛ ya fiɛɛ sane kpakpa a, loo níhi nɛ Yehowa bɔ ɔ a he ní. Ke o nui nɔ́ ko sisi ngɛ Baiblo ɔ mi ɔ, moo ngma kɛ fɔ si konɛ be kpa a, o hla níhi a mi ngɛ he.
Jije ma hla níhi a mi ngɛ? Ke o hyɛ video nɛ ji, Níhi Nɛ A Kɛ Hlaa Juetli Nɛ Ngɛ Mawu Munyu ɔ Mi ɔ, o maa na ní komɛ nɛ maa ye bua mo. Daniel yi 7 ɔ tu lohwe komɛ nɛ daa si kɛ ha mahi nɛ a ma ba ye je ɔ nɔ ɔ he munyu. O ma nyɛ ma hla níhi a mi konɛ o le jamɛ a ma amɛ.
Be enyɛmɛ e sa kaa ma kɛ kase ni? Ke nɔ ko kaseɔ ní ɔ, e yaa e hɛ mi ngɛ Mawu jami mi. Sisije ɔ, o ma nyɛ maa kase ní be kpiti. Se bɔɔbɔɔbɔɔ ɔ, o ma nyɛ maa ngɔ be fuu kɛ kase ní. Ke o ngɛ Mawu Munyu ɔ kasee ɔ, e ngɛ kaa nɔ́ nɛ o ngɛ juetli ko nɛ a kɛ laa hlae. Ke o ná juetli babauu ɔ, o maa suɔ kaa o hla eko kɛ piɛɛ he. (Abɛ 2:3-6) O bua ma ba jɔ Mawu Munyu ɔ he wawɛɛ, nɛ o maa suɔ kaa o maa kane Baiblo ɔ daa ligbi.—1Pet 2:2.
LOHWE ƆMƐ NƐ DANIEL YI 7 Ɔ TU HE MUNYU Ɔ DAA SI HA MƐNI?
SANE BIMI KPA:
Kɛ Daniel 7:8, 24 plɛ kɛ ba mi ha kɛɛ?
YE NÍ KASEMI NƐ NYƐƐ SE:
Lohwe ɔmɛ nɛ a tu a he munyu ngɛ Kpojemi yi 13 ɔ mi ɔ daa si ha mɛni?